TBP Balochi

بلوچستان ءِ کیچ دمگ ءَ چہ پاکستانی لشکریاں یک ورناھے دزگیر کنگ ءَ پد ناشناسیں ھنداں بُرتگ۔

بیگواہ بیتگیں ورناھے پجار میر وائس ء خلیل احمد ءِ نامءَ چہ بیتگ۔

اھوالانی ردءَ بیگواہ بیتگیں ورناہ لشکریاں 28 فروری ءِ شپ ءَ تربت ءِ آبسر ھنکین ءَ آئی لوگے سرءَ بیڑ بُرتگ ءُ آوار جتگ۔

کھول ءَ وئیل ءِ ھال مروچی راست کتگ ءُ گُشتگ کہ میروائس داں انگت لشکریانی دزگیری ءَ اِنت ءُ آئی درگت ءَ کھول ءَ داں انگت ھچ گُشگ نہ بیتگ کہ آ کج ءَ اِنت ءُ چونیں جاورانی تہءَ اِنت۔

یات بہ بیت کہ مرچیگیں روچے تہءَ زورانسری بیگواھی ءِ دومی وئیل اِنت کہ رپورٹ بیتگ۔ چدوپیسر چہ گوادر ءِ کلانچ ھنکین ءَ پاکستانی لشکریاں یک ورناھے آوار جنگ ءَ پد بیگواہ کتگ اَت، کہ آئی پجار حمید بلوچ ء بابو محراب ءِ نامءَ چہ بیتگ اَت۔

بلوچستان ءِ دمگ کیچ ءِ دو جتاھیں ھنکین تُربت ءُ ھوشاپ ءَ پاکستانی پوج ءِ سر ءَ ناشناسیں سلاہ بندیں مردماں اُرش کتگ ءُ دومی نیمگ ءَ اے اُرشانی زمہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ زرتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہءَ گْوشتگ کہ مئے سرمچاراں مروچی شش مارچ دوشمبے ءِ روچ ءَ بیگاہ ءِ ادار سے ءُ چل دمان ءَ کیچ ءِ بُنجاھی شھر تربت ءِ دمگ ڈنُک ءَ زورگریں پوج ءِ کاروان ھما وھد ءَ چیرکتگیں بمبے ءَ گوں نشانگ کتگ کہ وھدے آ تربت ءِ بُنجاھی بُنجل ءَ چہ دراتکگ ءُ دیم پہ ڈی بلوچ ءِ نیمگ ءَ روگ ءَ بیتگ اَنت-

جارکش ءَ گْوشتگ کہ بمب تراک ءَ گاڑی ءِ دیمی بھر سرجم ءَ تباہ بوتگ وھدے کہ اِشی آسر ءَ گاڑی ءَ سوار پنچ کارندہ مرتگ ءُ چار ٹپی بیتگ اَنت-

جارکش ءِ رِد ءَ اُرش ءَ پد پروش وارتگیں پوج ءَ تاں دیراں لَس میتگانی سر ءَ تیرگواری کتگ- ھمے وڑ وتی تاوانانی چیر دیگ ءِ ھاتر ءَ دُژمنیں پوج ءَ اے دگ دو کلاک آں تاں روگ ءُ آھگ ءِ ھاتر ءَ سرجمی ءَ بند کتگ-

گْوھرام بلوچ ءَ گْوشتگ کہ دومی نیمگ ءَ پاکستانی پوج ءِ جارکش آئی ایس پی آر ءَ ھم وتی کُشگ بیتگیں کارمند ءُ تاوانانی چیر دیگ ءُ پروش وارتگیں پوج ءَ را دروگیں دلبڈی دیگ ءِ ھاترءَ تھنا ھما وھد ءَ رسانکدر دیم ءَ کئیت یا کہ ھالاں شنگ کنت وھدے کہ یک سرمچارے شھید بہ بیت وھدیکہ راستیءَ بلوچ پُسگ بلوچستان ءِ پھازگ ءَ پہ شھید بوگ ءَ پھر بند اَنت ءُ ما اشاں چہ ھچ کس ءَ چیر نہ دئے اِنت پرچاکہ ما زان ایں ما ھک ءُ راستی ءِ ھاتر ءَ جنگ ءَ ایں-

بلوچستان لبریشن فرنٹ ءِ جارکش میجر گْوھرام بلوچ ءَ وتی دگہ یک درشانے ءِ تہءَ گْوشتگ کہ مئے سرمچاراں ھوشاپ ءَ پوج ءِ گشتی ٹولی ءُ تربت ءِ دمگ چاہ سر ءَ پوج ءِ چوکی ءِ سرءَ دستی بمب ءَ گوں اُرش کتگ ءُ دُژمن تاوان داتگ-

میجر گْوھرام بلوچ ءَ گْوشتگ کہ سھب ءِ دہ ءَ کیچ ءِ دمگ ھوشاپ تنک سرمچاراں بستگ ءُ دُژمنیں پاکستانی پوج ءِ پیادگ گشت کنوکیں ٹولی ءِ سر ءَ نوکیں سلاھاں گوں اُرش کتگ،  چریشی ءِ آسرءَ دو کارندہ ھما دمان ءَ مرتگ ءُ سے ٹپی بیتگ اَنت-

جارکش ءَ گْوشتگ کہ سرمچاراں دو مارچ ءَ کیچ ءِ بُنجاھی شھر تربت ءِ دمگ چاہ سر کراس ءَ برجاھیں پوج ءِ چوکی ءِ سرءَ دستی بمب ءَ گوں اُرش کتگ، دستی بمب چوکی ءِ تہءَ کپتگ ءُ چریشی ءِ چہ زورگریں پوج ءَ تاوان رس اِتگ-

میجر گْوھرام بلوچ ءَ گْوشتگ کہ بلوچستان لبریشن فرنٹ اے اُرشانی زمہ واری ءَ منّ اِیت، زورگریں پوج ءِ سرءَ وتی اُرشاں داں زورگپتگیں بلوچستان ءِ وتواجھی ءَ برجاہ دار اِیت-

روکپتی بلوچستان ءِ دمگ بندر عباس ءَ ایرانی آمیدگس ءِ ھکم ءَ سَے کس پاھو دیگ بیتگ اَنت-

پاھو دیگ بیتگیں مردمانی پجار سِی سالی ئیں مھمد جاوشیری ء سید مھمد جھمنند کلینک ایرانشھر، بھرام بھزادی ء جنگی جھمنند رمشک ءُ امین جاوشیری ء ساھبداد جھمنند اسپکہ لاشار ءِ ناماں زانگ بیتگ اَنت-

ھالانی تہ ءَ گوشگ بیتگ کہ ایشانی توک ءَ امین چار سال ءَ پیش نشہ باپاری بھتام ءَ گرگ بیتگ ءُ آ دویں کس ھم نشہ باپاری ءِ بھتام ءَ گرگ بیتگ اَنت –

ھرسئینانی سر ءَ گوست ءَ پاھو بندگ بیتگ انت ءُ گوستگیں روچ ءَ جتا کوٹی ءَ کنگ بیتگ اَنت –

اھوالانی تہ ءَ گوشگ بیتگ کہ ایشانی کھول گوستگیں روچ ءَ گڈی گندوک ءَ کنگ بیتگ اَنت –

روکپتی بلوچستان ءَ بندوکیں مردم یکشل ءَ نشہ باپاری ءُ دگہ دگہ بھتامانی پژدر ءَ پاھو دیگ بیگ ءَ اَنت چریشی ءَ سیاسی مھلوک ءِ گوشگ اِنت کہ بندیگیں مردماں وتی سپاھی کنگ ءِ موھ دیگ بوگ ءَ نہ اِنت –

گلامیں زند

نبشتہ کار: واجد شئے بلوچ

دی بلوچستان پوسٹ

ھما کہ اِیردستیں راج اَنت گڑا ھما ایردستیں راجانی سر ءَ سک ءَ زلم ءُ جبر کنگ بیت، ھما کہ زورآور بیت آ گلامیں کَوم ءِ سر ءَ وار کنت ھر روچ نوجواناں گار ءُ بیگواہ کنت دانکہ پیرو ءُ کماش بہ بنت یانکہ زھگ ءُ زالبول بہ بنت-

مرچی ما بلوچ راج ءَ بچاریں ھمے جاوراں گوں دُوچار اَنت کہ ریاستِ پاکستان چُنچو زوراکی کنگ ءَ اِنت، بلوچ ءِ مال ءُ مڈیاں برگ ءَ اِنت بلوچ پہ چنڈے نان ءَ در پہ دَر اِنت، پنجاب ءَ داں گیس روت، بلے بلوچ ءَ را رَسگ ءَ نہ اِنت ھر چیز بلوچ ئیگ اِنت داں گیس بہ بیت سنگ ء مرمر بہ بیت یا ایدگہ مڈی بہ بنت بلوچ کوم زِبھر اِنت-

بَلے مئے بلوچ کوم ءِ بدبھتی اِیش اِنت کہ ما بلوچ تپاک نہ ایں مئے مزنیں بد بھتی اِنت ما جند ءِ براتاں گوں جیگ ماں جیگ اِنت اگاں ما راجدپتراں بچاریں کجام کہ کوم ءَ وتی بْراتاں گوں جیگ ماں جیگ بوتگ کہ کوم ءَ ھچ وڑ ءَ دیمروی نہ کُتگ مدام پُشت ءَ پَش کپتگ اَنت-

مرچی ما بچار اِیں کہ پاکستان ءَ مارا وتی ایردست جوڑ کُتگ ایردستیں راجاں ءَ نیکہ وانگ ءُ زانگ ھَک دیگ بیت نیکہ کار ءَ روزگارے، مئے نوجوان گوں نشہ ءِ آماچ کُتگ اگاں ما دُگنیا ءِ تاریک ءَ بچاریں بوانیں، گُڑا کجام راج کہ ایردست بوتگ اَنت گُڑا آ راجاناں نیکہ وانگ ءِ ھک دژمن ءَ نہ داتگ کہ دژمن اے گپ ءَ سرپد اِنت ایردستیں راجاناں وانگ بہ لوٹ اَنت دُگنیا دیم ءَ سرپد بنت بانداتیں روچاں منی دیم ءَ چو کوہ ءَ مَک بنت مرچی ما چمشانک بہ دے اِیں بلوچستان ءِ تہ ءَ بلوچ کوم ءِ نودربراں بچار اِیں پاکستانی لشکر ھر روچ ھمے نودربراں گار ءُ بیگواہ کنگ ءَ اِنت، پد ءَ جوناں دور دِیگ ءَ اِنت پرچا کہ ریاست پاکستان زانتکہ اے وان اَنت وتی راج ءِ بابت ءَ سرپد بنت گُڑا باندا ھمے راج ءَ پہ چیزے کن اَنت، پمیشکا پاکستان ءِ لشکر بلوچ نودربراں لٹ ءُ شاپ کنت کہ ءِ مہ وان اَنت وانگ ءُ زانگ چہ دُور بہ بنت۔

مرچی بلوچ سرمچار کہ کوھانی تہ ءَ مھاز ءَ نشتگ اَنت ءُ دژمن ءَ گوں جنگ ءَ اَنت گرم ءُ سرد، تُن ءُ گژن ءَ پہ وتی بزگیں راج ءِ آھوکیں باندات ءِ واستا ھمے وڑ ءَ مئے مات ءُ گھار مرچی دگانی (روڈانی ) سر ءَ نشتگ ءَ اَنت پہ وتی گار ءُ بیگواھیں براتانی واستا کہ آیاں چنچو سال اِنت کہ گار ءُ بیگواہ اَنت وتی میتگ وتی لوگ وتی مردم ءَ چہ جُتا بیتگ اَنت وتی منزل ءِ نیمگ ءَ روگ ءَ اَنت انشا اللہ اے شھیدانی ھون الم رنگ کار اَنت-

بلوچستان زندگ بات بلوچ کوم یک مُشت ءُ تپاک بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

جرمنی ءِ چانسر اولاف شولز ءَ چین ءَ را بیھار دیاب ءَ گوشتگ کپ اگاں روس ءَ را تو سِلاہ دات گڑا ایشی ءِ پژدر ءِ دیمپانی کنگ ترا لوٹ ایت -دومی نیمگ ءَ روسی ملیشیا واگنر ءِ سروک ءَ گوشتگ کہ آئی ءِ پوج مھکمین دستاں ھرچ نیمگ ءَ انگیر کتگ اگاں سلاہ دیگ نہ بیت گڑا پشتکنزی کنگ کپ ایت-

سی این این ءَ داتگیں گلگدار ءَ جنرمن چانسلر ءَ اے امیت پدر کرتگ کہ چین روس ءَ را ءَ سلاہ دیگ ءَ پھریز کنت -جرمن چانسلر ءَ اے ٹپاسی واشنگٹن ءَ امریکہ ءِ سروک جوبائیڈن ءِ گند ءُ نند ءِ ؤھد ءَ کتگ –

امریکہ ءِ واکدارانی ھمے زوتاں بیھار داتگ ءُ گوشتگ چین کجام ھم وھد ءَ روس ءَ را سلاہ دات کُت کنت-

جرمن چانسلر ءِ تر ءُ تاب ءِ وھد ءَ پیسر گوشتگ چین ءَ روس ءَ سلاہ دیگ ءَ پھریز کنگی اِنت بلکیں وتی ھیال ءَ یوکرین ءَ پوج ءِ کشگ ءَ بہ کنت-

انٹرویو ءَ اولاف شولز ءَ جست گرگ بیتگ اگاں روس ءَ چین ءَ را سلاہ دات گڑا چین ءِ سر ءَ بندش جنگ بنت؟ آئہ ءَ پسو ءَ آئی ءَ گوشتگ کہ منی ھیال ءَ آئی ءِ آسر بنت ما ھما وھد ءَ گچین کن ایں ما گوش ایں اے وڑ مہ بیت مارا اے جیڑہ ءَ باز شیواری بیگی اِنت-

آئی ءَ آسری ءِ سرجمی نہ گوشتگ بلے آئی ءَ گوشتگ کہ جرمن یورپ ءِ توک ءَ مزنیں یک تاکتداریں زرکارے ءُ چین گوستگیں لھتے سالاں چہ آئی ءِ گون ءَ شریداری کنگ ءَ اِنت-

یک شمبے ءِ روچ ءَ جرمنی ءِ آیگ ءَ پد اولاف شولز ءَ جست گرگ بیتگ اگاں تئی کابینہ یوریپن کمیشن ءِ سروک ارسولاوون ڈیرلیئن ءِ گند ءُ نند ءَ کجام چوشیں مھکمیں چیز پیش دارگ بیتگ انت چین ناگتی روس ءَ سلاہ دیگ ءَ چست بیتگ آ روس ءَ جنگ بیتگیں بندشانی پلامرزی ءَ کنت-

آئی ءَ اے پسو ءِ سر ءَ گوشتگ کہ ما درست اے گپ ءِ سر ءَ تپاک اِنت روس ءَ ھچ وڑ ءَ سلاہ دیگی نہ اِنت چین ءِ سرکار ءِ ھم گوشگ اِنت آ اے وڑ نہ کنت ما ایشی ءِ سر ءَ نگاہ ایر کتگ انت ءُ ایشی ءَ ھرچ ھساب ءَ چارگ ءَ ایں- ءُ آئی ءَ را بندش ءِ سر ءَ جست کتگیں پسو نداتگ-

آئی ءَ منانک ءِ درگت ءَ گوشتگ کہ مارا چوشین منانک انگت دزنہ کپتگ کہ چین روس ءَ را سلاہ دیگ ءَ جاڑیگ اِنت، ارسولا ووب ءَ گوشتگ کہ پورپی یونین ءِ نیمگ ءَ چین ءِ سر ءَ بندش ءِ جست یک فردی جستے پسو ھما وھد ءَ دیگ بیت اِنت اے راستین گپے بہ بیت –

ایشی ءَ ابید یوکرین ءَ جاڑیگین روسی ملیشیا ءِ رینگر مرسنری ءِ سروک روس ءِ واکداراں لوٹ کتگ کہ آیاں کمک سر بہ کن اَنت-

آئی ءِ سروک یوگینی پریگوزن ءَ روس ءِ واکدارانی نام ءَ یک تامر بندے ءَ گوشگگ کہ اگان رینگر ءَ باخموت ءَ پشتکنزی کنگ کپت گڑا سرجمین فرنٹ کپ ایت چریشی ءَ روس ءِ لوٹاں تاوان بیت اِنت-