TBP Balochi

بلوچستان دو جتائیں دمگ پنجگور ءُ کوھلو ءَ سلاہ بندیں مردماں سرکاری پلامرزی کنوکیں ڈیتھ اسکواڈ کارندھانی ءُ موباھل ٹاور سر ءَ اُرش کتگ ءُ تاوان داتگ اَنت دومی نیمگ ءَ اے اُرشانی زمہ واری دو جتائیں بلوچ آجوئی ءِ لوٹوکیں سلاہ بندیں گل بی ایل ایف ءُ یو بی اے ءَ زرتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراں پروم ءَ پاکستانی پوج ءِ یک ھاسیں چاریگ ءُ ڈیتھ اسکواڈ سروک فقیروک ء پیر محمد جھننند پروم گوں سے سنگتاں ھوار کُشتگ سلاہ دستیگ کتگ اَنت-

آئی ءَ گْوشتگ کہ سرمچاراں چیریں ھالانی رسگ ءَ گوستگیں شپ ءَ پروم ءِ دمگ بسد ءَ زورگریں ریاست ءِ چاریگ ءُ ڈیتھ اسکواڈ ءِ سروک فقیروک سر ءَ پیسر ءَ سنگر گپتگ ءُ اُرش کتگ -اے ریاستی چاریگ کہ چار گاڑیانی کاروان ءِ ھمراہ بیتگ اَنت کہ سرمچاراں مزنیں ءُ نوکیں سلاھاں گوں آیانی سر ءَ اُرش کتگ – اے اُرش ءَ فقیروک وتی سے کارندھانی ھمراھی ءَ مرتگ اَنت وھدے کہ لھتے کارندہ ٹپی ئیں جاوراں تچگ ءَ سوبمند بیتگ اَنت-

جارکش ءَ گْوشتگ کہ سرمچاراں ریاستی چاریگاں چہ یک ایل ایم جی ، یک آر پی جی 7 ، دو کلاشنکوف دستیگ کتگ ءُ آیانی لینڈ کروزر گاڑی مانداشتگ-

آئی ءَ گْوشتگ کہ فقیروک یک دْراجیں مدتے ءَ ریاستی چاریگ ءُ ڈیتھ اسکواڈ ءِ کرد ءَ پیلو کنگ ءَ بیتگ- آ پروم ، پنجگور، بلیدہ ءُ بالگتر ءِ کش ءُ گوراں پُرکار بیتگ- آ بازیں سرمچارانی چاریگی ءُ شھیدی ءَ پاکستانی پوج ءِ گوم ءَ جرمکاری ءَ شریدار بیتگ- آ لُٹ ءُ پُل ءُ منشیات باپاری ءَ ھوار بازیں چاگردی سلّکاریاں ھم ھمگرنچ بیتگ ءُ اش دُژمنیں پوج ءَ سرجمی ءَ یل داتگ-

جارکش ءَ گْوشتگ کہ ریاستی چاریگ بوگ ءَ ساری آ یک سلاہ بندیں گلے ءِ باسکے بیتگ- پاکستانی پوج ءِ دیم ءَ باجو بوگ ءَ پد اش دمگی ڈیتھ اسکواڈ سروک جوڑ کتگ- آ ریاستی گوشگ پد ءَ سرمچارانی کھول ءُ سیاداں بیھار ءِ دیگ ءَ پیشگام بیتگ-

آئی ءَ گْوشتگ کہ آ بلوچستان ءَ پاکستانی پوج ءِ چُکچینی پالیسی ءَ شریدار جرم بیتگ- اے وڑیں جرمکاراں سزا دیگ مئے راجی زمہ واری ءُ جھانی راہ راھبندانی رد ءَ اِنت-

آئی ءَ گْوشتگ کہ نکش ءِ تہ ءَ ھست اَنت کہ ریاستی ڈیتھ اسکواڈ سروک یکرندے تربت پولیس دزگیر کتگ بلے اے وڑ کارندہ گوں سلاھاں ھوار یل داتگ اَنت-

جارکش ءَ گْوشتگ کہ اے وڑیں باز مردم ھست آ لب ءُ لالچ داتگ ءُ رد دیگ بوتگ اَنت، کہ بے اکلی ءَ چہ ریاستی چاریگانی ھمراہ اَنت، پوج ءِ چیردستیں مردم آیاں بلوچ جُھد بگیر ءَ کارمرز کنگ ءَ اَنت، گل اشاں یکے موھے دنت کہ آ راجی پوج ءِ آمیدگس ءَ بیا اَنت وتی پلگاری ءَ پیش بکن اَنت ءُ وتی دمگاں دگہ راج ءِ وڑ ءَ زندگی ءَ بہ گوازین اَنت، اے جنگ زورگریں دُژمن ریاست ءَ اِنت آ اشی ءَ بھر مہ بنت- راج ءَ چہ دزبندی کن ایں کہ آ ریاستی پوج ءُ آیانی ڈیتھ اسکواڈ ءَ چہ دیر بہ بنت ءُ آیانی ھمراھداری ءَ پھریز بکن اَنت – پروم ، بلیدہ، زامران ءِ کوھی دمگاں شکار سر ءَ پابندی اِنت، لَس راج شکار ھاتر ءَ مہ رو اَنت ھمے ھاتر ءَ کہ ریاستی کارندہ شکار نام سر ءَ سرمچارانی چاریگری ءَ کن اَنت-

میجر گْوھرام بلوچ ءَ گْوشتگ کہ بلوچستان لبریشن پرنٹ ڈیتھ اسکواڈ سر ءَ اُرش، فقیروک ءُ آئی ءِ سے کارندھانی کوش زمہ واری ءَ من ایں-

دومی نیمگ ءَ یونائیٹڈ بلوچ آرمی ءِ جارکش مزار بلوچ ءَ گْوشتگ کہ گوستگیں روچ ءَ کوھلو ءِ دمگ مخماڑ ءَ ساھت چار ءُ پانژدہ ملٹ ءَ زورگریں پاکستانی پوج ءِ چوکی سر ءَ مئے سرمچاراں مزنیں سلاھاں گوں اُرش کتگ-

جارکش ءَ گْوشتگ کہ اُرش ءَ زورگریں پوج ءِ دو کارندہ ھما دمان ءَ مرتگ اَنت-

یو بی اے ءِ جارکش ءَ گُڈی ءَ وتی درشان ءَ اے اِھد کتگ کہ مئے اُرش زورگریں پوج ءِ سرجمی دراھگ ءَ تاں ءُ بلوچستان ءِ وتواجھی ءَ برجاہ بنت-

بلوچستان ءَ سیادی داروکیں اھوالکار عابد میر چہ اسلام آباد ءَ بیگواہ انت –

گیشیں ھالانی رِد ءَ چہ بلوچستان ءَ سیادی داروکیں اھوالکار عابد میر زیکیں بیگاھگین انت کہ بیگواہ انت، آئی ءِ برات خالد میر ءِ گوشگ انت کہ زیکیں بیگاہ انت کہ آئی ءِ نمبر ھم بند انت –

برات ءِ رِد ءَ اھوالکار عابد میر گوستگیں بیگاہ ءِ ادار شش ءَ چہ گِس ءَ در اتکگ ءُ بینک ءَ شُتگ کہ ھما انت آئی ءِ نمبر بند انت –

عابد میر ءِ برات ءِ گوشگ انت کہ آئی ءَ اے درگت ءَ پولیس ءِ گور ءَ ارزی نبشتہ کنائیں اِتگ بلے تنی وھدی ھچ وڈیں ھال سر نہ بوتگ کہ آئی ءِ برات کجا انت –

عابد میر ءِ بیگواھی ءَ پد چاگردی ترامجاھاں بازیں اھوالکار ءُ انسانی ھکانی گلاں وتی ھیالانی درشانی ءَ کنگ ءَ انت –

اھوالکار ءُ ندکار وسعت اللہ خان ءَ ھم وتی یک ٹویٹ ءِ تہ ءَ نبشتہ کتگ کہ عابد میر گوستگیں بیگاھیگین انت کہ بیگواہ انت –

ہیومن رائٹس کمیشن آف پاکستان ءَ اسلام آباد ءِ پولیس ءَ گوں اھوالکار ءِ یلا کنائینگے لوٹ کتگ –

ڈیجیٹل میڈیا ءِ تہ ءَ اھوالکارانی گل گل لوگ سجاگ ءَ اھوالکار ءِ بیگواھی ءِ درگت ءَ نبشتہ کتگ کہ عابد میر بلوچستان ءِ تہ ءَ انسانی ھکانی سریں توار یے ءُ جاگیردارانہ نزام ءُ زورانسری آوار جنیانی درگت ءَ توار چست کتگ – اسلام آباد ءِ پولیس ءُ وکداراں گوں آئی ءِ وش ءُ سلامتی یل کنگ ءِ لوٹ کتگ –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی مروچی چار ھزار ءُ نُھ سد ءُ ھپتاد ءُ شش روچ سرجم بوتگ انت –

مروچی نیشنل پاٹی ءِ رھشون تاج محمد کاکڑ، رحمت اللہ کاکڑ، امیر محمد کاکڑ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بیگواھیں بلوچانی جیڑہ گیش گیواری بدل ءَ گیشتر دراج بوان انت ءُ ھمک روچ اشی ءِ تہ ءَ گیشی آرگ بوگ ءَ انت –

آئی ءَ گوشتگ کہ بلوچستان ءِ تہ ءَ چیریں ادارھانی کارمنندانی دست ءَ بلوچ پرزندانی زورانسری آوار جنی ءُ آھاں چیریں زنداناں بندیگ کنگے درچ برجاہ انت بلے بلوچ تہ ءَ ھمک روچ گیشی، بلوچ ورنایاں ھوار ھر تک ءُ پھناتاں سیادی داروکیں مردمانی ھمگرنچی پاکستانی ریاست ءِ زوراکیانی تہ ءَ گیشی اتکگ، رستری اے جاوراں بیگواھیں بلوچانی وش ءُ سلامتی یل بوگ ءِ امیت، وسوسی ءُ بے اوستی ءِ تہ ءَ بدل کتگ –

آئی ءَ گوشتگ کہ بیگواھیں مردمانی کھول وتی دوستیگیں مردمانی دیدارے ءَ تلوسگ ءَ انت – ھمے درگت ءَ زورانسری آوار جنگ بوتگیں مردمانی کھول ءُ بلوچ راجدار ءُ چاگردی باسک چہ پاکستانی کانود جوڈ کنوکیں ادارہ، بلوچانی ٹپانی درمان کنگ ٹاہ دیوک ءُ انسانی ھکانی پلامرز سرپد کتگ انت ءُ انساپ لوٹ اِتگ بلے ھر نیمگ بس تسلی دیگ ءُ گپانی تاب دیگ ءَ ابید دگہ ھچ نہ رستگ –

بلوچستان ءِ دمگ پنجگور ءَ گوستگیں روچ ءِ نیمروچ ءَ بیوکیں سلاہ بندین جنگے ءَ داں انگت ءَ سَے مردم بیران ءُ بازینے زدگ بیتگ اَنت-

گیشیں ھالانی رد ءَ پنجگور ءِ دمگ پروم ءُ زامران ءِ میانی دمگ بسد ءَ بیتگیں جنگ ءُ چوپ ءَ داں انگت ءَ سَے مردمانی بیرانیانی ھال راست بیتگ اَنت-

دمگی مردمانی رد ءَ ناشناسیں سلاہ بند ءُ سرکاری پلامرزی ءَ ھستیں گل کہ آ ’ ڈیتھ اسکواڈ ‘ ءِ نام ءَ زانگ بیت اِنت اے ترندیں جنگ ءُ چوپ گوستگیں نیمروچ ءَ بندات بیتگ ءُ بازیں وھداں داں برجاہ بیتگ-

داں انگت ءَ اے سرپدی نہ بیتگ کہ سلاہ بندیں مردم کے بیتگ اَنت بلے دمگی مردماں اے ھال راست کتگ کہ سَے مردم کُشگ بیتگ اَنت ءُ بازینے زدگ بیتگ اَنت-

ڈیتھ اسکواڈ ءِ سر ءَ بلوچستان ءَ بندوکیں سیاسی مردم ایراد گر اَنت آئی ءَ سرکار ءِ چیرین ادارھانی کمک گون اِنت چرے کمک ءَ آ دمگاں لس مردمانی جنگ ءُ کوش ءَ ھواریں گلے-

زانگ بہ بیت گوست ءَ ھم بلوچ آجوئی لوٹوکیں گلانی نیمگ ءَ ڈیتھ اسکواڈ سر ءَ اُرش بیتگ اَنت-

بلوچستان ءِ دمگ ھرنائی ءَ گوشتگیں شپ ءَ ناشناسیں مردماں اشکرانی شش کھن مانداشتگ اَنت-

دمگی مردمانی رد ءَ گوستگیں شپ یَ ناشناسیں سلاہ بندیں مردماں ھزار ڈیم ءِ ھند ءَ دو ءُ چل ءَ اشکرانی چار کھن آس داتگ ءُ سوتکگ اَنت ء پشت اشتگ ءُ شتگ اَنت-

دمگداراں ھال ءِ سر بوگ ءَ وئیل جاہ ءَ سر بیتگ ءُ اود ءَ آیاں پٹ ءُ پول بندات کتگ-

زانگ بہ بیت گوستگیں ماہ ءِ گڈسر ءَ ھم ھرنائی ءِ دمگ خوست ءَ کوئل مائنز دمگ ءَ ناشناساں اشکرانی کاریزکارانی بنجل ءِ سر ءَ اُرش کتگ ات-

سلاہ بندانی اُرش ءَ چار کاریزکار بیران ءُ سَے زدگ بیتگ ات اَنت ءُ سلاہ بندیں مردماں اشکرانی یازدہ کھن مانداشتگ ات اَنت-