TBP Balochi

روکپتی بلوچستان ءِ دمگ راسک ءَ ایرانی چیریں ادارھانی کارندھاں یک مردمے دزگیر کنگ ءَ پد ناشناسیں جاھاں برتگ-

سر بیتگیں ھاکانی رد ءَ گوستگیں روچ ءَ راسک ءَ ایرانی چیریں ادارھانی کارندھاں یک ورنایے آوار جتگ ءُ گون وت برتگ –

آوار جنگ بیتگیں مردم ءِ پجار امجد ھوت ء عبدل ءِ نام ءَ زانگ بیتگ –

ھالانی تہ ءَ گوشگ بیتگ کہ ابید ارزی گرزی ءَ چیریں ادارھاں آئی ءِ لوگ انگیر کرتگ ءُ پد ءَ آ دزگیر کتگ ءُ گون وت برتگ-

زانگ بہ بیت روکپتی بلوچستان ءَ مردمانی آوار جنگ ءُ بیگواہ کنگ ھمک روچ گندگ ءَ آیگ ءَ اَنت بلے ایشانی توک ءَ لھتے کساس ءَ مردم واتر یل کنگ بوگ ءَ ھم گندگ بوگ ءَ اَنت –

خیبرپختوانخواہ ءِ شھر لکی مروت ءُ ٹانک ءَ مردم شماری ءِ ٹیم ءِ سر ءَ اُرش ءِ آسر ءَ دو پولیس کارمند بیران بیتگ اَنت-

اردو نیوز ءَ پولیس ءِ درور دیان ءَ گوشتگ کہ اُرشکاراں اُرش کرتگ ءُ دو پولیس کارندہ کشتگ اَنت ءُ چریشی ءَ پد پولیس ءَ اُرشکارانی پٹ ءُ پول بندات کتگ-

لکی مروت تھانہ صدر ھد ءَ مردم شماری ءِ ٹیم یک دمکے ءَ جاڑیگ بیتگ اَنت پرپٹ سواراں ناگتی تیرگواری بندات کتگ ءُ ڈیوٹی دیوکیں پولیس کارندہ دل جان ھما جاہ ءَ بیران بیتگ ءُ اُرشکار تتکگ اَنت-

آئی ءَ گوشتگ کہ دومی وئیل ٹانک ءَ گومل ءِ ھند ءَ ھما وھد ءَ پیش اتکگ کہ اود ءَ مردم شماری ءِ ٹیم ھساب ءَ بیتگ اَنت وھدیکہ آ کوٹ اعظم ءَ سر بیتگ انت ناگتی مردماں تیرگواری کتگ ءُ چریشی ءُ پولیس کارندہ نواب ھما جاہ ءَ بیران بیتگ ءُ دگہ ھشت کارندہ زدگ بیتگ اَنت ءُ زدگ بیتگیں پولیس کارندہ ڈسٹرکٹ ھیڈکوارٹر بسپتال ءَ برگ بیتگ اَنت-

زانگ بہ بیت ھشف مارچ ءَ ھم خیبر پختونخواہ ءِ ھند ڈیرہ اسماعیل خان ءَ مردم شماری کنوکیں ٹیم ءِ سر ءَ اُرش بیتگ ات لپ چریشی ءَ یک پولیس کارندھے مرتگ ات ءُ یکے زدگ بیتگ ات

پاکستانی لشکریانی نیمگ ءَ چہ جیڑھانی گیواری ءَ داں پاکستان ایران سیمسرءَ چہ کس ءَ گوزگ ءَ نئیل ایں، چاغی ءَ ھندی مردمانی زھرشانی نندانک

ایف سی ءِ نیمگ ءَ نوکیں راھداری شنگ نہ کنگ ءَ سرءَ ھندی مردماں پاکستان ایران سیمسری سَرُک راجئے ءَ زھرشانی کنان ءَ گوزراہ بند کُتگ۔

ھندی مردم، میر ءُ قبائلی کارستانی گُشگ اِنت کہ گوستگیں یک سالءَ چہ آیانی ھاترءَ راھداری ءِ جیڑہ بیتگ کہ آ گوستگیں روچاں ڈی سی چاغی حسین جان بلوچ ءَ پرمان شنگ کُتگ ءُ گیوار کُتگ نی ایف سی ءِ نیمگ ءَ چہ لڑ ءِ شنگ نہ کنگ زوراکی اِنت مردماں وتی گاڑی گون اَنت ءُ سیمسرءِ سرءَ لاچار اَنت۔

درانگازی کنوکاں گُشتگ کہ چدوپیسر بازیں برءَ اسسٹنٹ کمشنر تفتان ءُ آئی ٹولی ءِ مستری ءَ انسپکشن ءُ فزیکل ویری فکیشن بئیگ ءَ پد ھم ایف سی ءِ نیمگ ءَ چہ اے اڑاند ءِ بئیگ ھندی مردمانی سرءَ زلم ءُ زوراکی اِنت۔

شھریانی گُشگ اَت کہ داں وھدیکہ راجئے ءَ ایف سی ءِ نیمگ ءَ چہ مئے جیڑہ گیوار کنگ مہ بیت ءُ نوکیں راھداری شنگ کنگ نہ بیت اِنت داں ھما وھدءَ ما چہ گوزراہ ءَ کس ءَ ھم گوزگ ءَ نئیلیں ما وتی جمھوری اگبال کارمرز کُتگ ءُ پرایمنیں زھرشانی ءَ نشتگ اِنت۔

بلوچستان ءَ زورانسری بیگواھیانی بگیرءَ وائس فار بلوچ مسنگ پرسنز ءِ سروکی ءَ برجاھیں زھرشانی بنجل ءَ 4980 روچ سرجم بیتگ اَنت، عوامی نیشنل پارٹی ءِ بنجاھی پتر ءِ باسک شمس جلال زئی ءَ وتی سنگتانی ھمرائی ءَ بنجل ءَ اَتکگ ءُ بیگواھیں مردمانی کھولاں گوں یکجاھی درشان اِتگ۔

بنجل ءَ اتکگیں مردماں گوں گپ کنان ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گُشتگ کہ بلوچ مھلوکءَ گوں پاکستانی پوج ءُ آئی چیریں ادارگانی گیر انسانی کردگارءُ نسل کشی ءِ تہءَ، پوج ءُ چیریں ادارگانی پجیگ ءَ ایف سی ءُ سی ٹی ڈی سرزاھری ءَ گون اَنت ءُ ءُ وتگڑیں بنجاھی ءُ پرگینگی سرکار، شلنگیں سول سوسائٹی، رسانک در، مزن آمید گِس، نیکراھی تک ھم بلوچ نسل کشی ءِ تہءَ پوج، سی ٹی ڈی ءُ چیریں ادارگانی جرمکاریانی تہءَ سدءَ سدی ھوار اَنت۔

دومی نیمگ ءَ وائس فار بلوچ مسنگ پرسنز ءِ چیئرمین نصراللہ بلوچ ءَ وتی شنگت کُتگیں درشانے تہءَ گُشتگ کہ مئے ھاترءَ درستیں ادارگ شرپدار اَنت ما ادارگانی تہءَ گون ایں سنجیدگ ءُ وتی کاراں گوں ایمانداریں سنگتاں کدرءِ نگاہ ءَ گوں چاریں، ھما کہ ‎وائس فار بلوچ مسنگ پرسنز ءَ ملکی قانودانی ردءَ ءُ مردمی اگبالانی گل ءِ ردءَ کارکنگ ءُ گیر جانبداریں کردءِ برجاہ دارگ ءِ اخلاقی کمک کنان ءَ پیداک اَنت۔

آئی ءَ گُشتگ کہ ما ھما سنگتاں باور کنائنیں کہ انچش کہ وی بی ایم پی ءَ وتی بن ھشت ءَ بگر داں انگت بیگواھیں مردمانی جیڑہ ءِ سرءَ سیاست ءُ پندل سازی کنگ ءَ پھریز کُتگ ءُ گیر جانبدار بیتگ ءُ یک انسانی اگبالانی گل ءِ پئیم ءَ ھمک منانک ءَ گوں راستیں پئیم ءَ ڈیھی ءُ جھانی تکءَ زورانسری بیگواھیانی جیڑہ دیما آورتگ ءُ ھمے کاراں برجاہ داریت ءُ اے گل ءِ مردم گمواری ءُ بنیات ءَ گیر جانبدار بیگ ءُ راستیں بُنکی کارانی کنگ ءِ سوب ءَ ڈیھی ءُ میان اُستمانی تک ءَ آئی کار باوری زانت بنت ءُ ارزشت دیگ بیت اِنت اے باور ءَ گل کدی ھم نہ پروشیت ءُ نانکہ اے باور ءِ ھراب کنگ ءَ کس ءَ کِل اِیت۔

سر بیتگیں ھالانی رد ءَ روکپتی بلوچستان ءِ تیابدپی دمگ چھبار ءَ ایرانی سپاہ ءَ نیزگاریں مردمانی گسانی سر ءَ بیڑ برتگ ءُ اود ءَ آیانی لوگ مانداشتگ اَنت-

گیشیں ھالانی رد ءَ چھبار ءِ ھند میر آباد ءُ مراد آباد ءَ سپاہ پاسداران ءَ لس مردمانی لوگانی سر ءَ بیڑ برتگ ءُ اود ءَ ایانی لوگ ڈروھینگ ءِ ھواری ءَ مانداشتگ اَنت-

ھالانی تہ ءَ گوشگ بیتگ کہ گوستگیں شپ ءِ نسپ ءَ سپاہ ءَ آیانی لوگ انگیر کتگ ءُ اود ءَ آیانی گس پروشتگ ءُ مانداشتگ اَنت-

لس مردمانی رد ءَ سپاہ ءِ گوشگ اِنت کہ اے مردم زمین ءِ گیرکانونی نشتگ اَنت ءُ چریشی ءَ ادارہ ءِ ھکم ءِ پد ءَ اے ڈروھینگ ءُ دور دیگ بیتگ اَنت-

شنگ بیتگیں تامرانی تہ ءَ گندگ بیت اِنت کہ اود ءَ آس جمبور اِنت ءُ پد ءَ مھلوک وتی لوگانی رکینگ ءِ ھاتر ءَ دزبندی کنگ ءَ اَنت-

گوست ءَ ھم روکپتی بلوچستان ءِ جتا جتائیں جاھاں چوشیں وئیل پیش اتکگ بیتگ اَنت کہ اود ءَ ھمے رنگ ءَ مردمانی گِس ڈروھینگ بیتگ اَنت –

بلوچستان ءِ دمگ کیچ ءَ پاکستانی پوج ءَ آشوبی گُشندہ ءَ ھوار بازیں لوگے ءَ بیڑبرتگ ءُ دو مردم زورانسری آوار جتگ ءُ بیگواہ کتگ –

گیشیں ھالانی رِد ءَ گوستگیں شپ ءَ پاکستانی پوج ءَ کیچ ءِ دمگ تمپ کونشکلات ءَ آشوبی گُشندہ منھاج مختار ءُ دگہ مردمانی لوگاں بیڑبرتگ ءُ دو مردم ءِ آوار جنگ ءَ پد بیگواہ کتگ اَنت-

اِھوالکارانی رِد ءَ پوج ءَ مھناج مختار ءِ پت دزگیر کتگ لٹ ءُ کُٹ کتگ ءُ پد ءَ یل کتگ، وھدے کہ لوگاں ساڑی ئیں موباھل ھم وتی ھمراھی ءَ برتگ اَنت-

اشی ءَ اَبید پوج ءِ گوم ءَ میڑ جنگ بیتگیں عرفان لوگ ءَ ساڑی ئیں مردم لَٹ ءُ کُٹ کتگ-

زانگ بہ بیت مھناج مختار ءَ لوگانی سر ءَ اشی ءَ ساری ھم پوج ءِ نیمگ ءَ چہ بازیں رنداں بیڑبرگ بیتگ ءُ لوگ مانداشتگ اَنت ھم –

گوستگیں شپ ءَ پوج ءَ عطاء اللہ نامیں مردمے ءِ لوگاں بیڑبرتگ ءُ لُٹ پُل ءُ زالبول چُک لَٹ کُٹانی نشانگ کتگ عطاء اللہ ءِ ورنا ایں چُک اسرار زورانسری آوار جنی ءِ نشانگ کتگ وھدے کہ میرین داد نامیں مردمے ءِ لوگانی سر ءَ بیڑبرتگ ءُ آئی ءِ چُک جلال آوار جتگ ءُ گوں وت برتگ-

روکپتی بلوچستان ءَ بندیگیں یک مردمے یل بیتگ ءُ دگہ یکے مردم پہ جست ءُ پرس ءَ برتگ –

سر بیتگیں ھالانی رد ءَ روکپتی بلوچستان ءِ دمگ ایرانشھر(پھرہ) ءَ نیکراھی رھشون ایرانی چیریں ادارہ اطلاعات ءَ برتگ ءُ آئی ءِ سر ءَ ڈیھ ءِ سر ءَ بیوکیں زھرشانی برانز دیگ ءِ بھتام بیتگ اَنت –

آوار کنگ بیتگیں مردم ءِ پجار مولوی عبدالرھمان عمرزئی ءِ نام ءَ زانگ بیتگ کہ ایرانشھر ءِ نندوک اِنت-

مولوی عبدالرھمان ءَ گوشتگ کہ اگاں من واتر نہ بیت اَنت گڑا بزان ات کہ من بندیگ کنگ بیتگ اَنت ءُ چریشی ءَ تنی وھدی آ ایرانی چیریں ادارھانی گور ءَ بندیگ اِنت –

زانگ بہ بیت روکپتی بلوچستان ءَ گوست ءَ ھم اے وڑیں وئیلاں نیکراھی رھشون برگ بیتگ ءُ پد ءَ بندیگ کنگ بیتگ اَنت-

اھوالانی تہ ءَ گوشگ بیتگ کہ مولوی عبدالرھمان ءَ زاھدان مکی مسیت ءِ پیش امام ءُ روکپتی بلوچستان ءِ نامی ئیں نیکراھی رھشون مولانا عبدالحمید اسماعیل زئی ءِ پلامرزی کتگ –

اھولانی تہ ءَ گوشگ بیتگ کہ روکپتی بلوچستان ءَ ھرچ ھما مولوی کہ عبدالحمید ءِ پلامرزی ءَ کنت گڑا آئی ءَ چیرین ادارہ چرے پژدہ ءَ آوار جن اَنت ءُ بر اَنت-

ھمے وڑ ءَ دو روچ پیش ما زاھدان آوار جنگ بیتگیں مھمد براھوئی یل کنگ بیتگ ءُ وتی لوگ ءَ سر بیتگ –