TBP Balochi

روکپتی بلوچستان ءِ بنجاھی شھر زاھدان ءَ مھلوک ءَ “خونین جمعہ ” ءِ درچاں زھرشانی کتگ-

زھرشانی زاھدان ءَ مکی مسیت ءَ آدینگ ءِ نماز ءَ پد ھزارانی ھساب ءَ مھلوک ءَ زھرشانی دروشم ءَ روانک کش اتگ –

زھرشانی کنوکاں جتا جتائیں اوگام “سد سالی والایت جنات ” مرگ بر خامنہ ای ” ءُ دگہ دگہ اوگام جتگ اَنت-

زھرشانی کنوکاں گوستگیں سال ءِ سِی ستمبر ءَ زاھدان کشگ بیتگیں مردمانی کھولاں انساپ، بیگواھیانی یل کنگ ءُ بندیگین مردمانی پاھو دارگ ءِ لوٹ کتگ اَنت-

دومی نیمگ ءَ زاھدان ءُ کش ءُ گوراں رھوتی دامگ ھم چیزیں اداراں بند کنگ بیتگ اَنت ءُ ھمے ور ءَ زاھدان ءِ بازیں دمک ءُ دراں پوجی سر ءُ مانسر ءُ پٹ ءُ پولانی توک ءَ گیشی گندگ اتکگ اَنت-

زانگ بہ بیت روکپتی بلوچستان ءَ زھرشانی درچ ھما وھد ءَ بندات بیتگ اَنت کہ ایرانی پولیس آپسر ءَ چھبار ءَ یک پانزدہ سالی ئیں جنکوے ءِ گون ءَ جنسی زوراکی کتگ ات – چرے وئیل ءَ پد روکپتی بلوچستان ءِ بنجاھی شھر زاھدان ءَ زھرشانی بندات بیتگ ات کہ اود ءَ سدانی کساس ءَ مردم کشگ ءُ زدگ کنگ بیتگ اَنت-

ھندوستان ءِ پولیس ءَ یک جتائی ءِ درشاندابیں رھشونے ءِ شوھاز ءَ اِنت کہ آئی ءَ آجو سکھانی ڈیھ ءِ لوٹ کتگ – اے لوٹ ءَ پد گوریچانی روکپتی پنجاب ءَ ریاست ءِ لٹ ءُ کُٹانی توک ءَ گیشی اتکگ –

ھال سرکنوکیں ادارہ ایجنسی ایسوسی ایٹڈ پریس ءِ رد ءَ پولیس ءَ سِی سالی ئیں امرت پال سنگھ ءُ آئی ءِ ھمراھاناں ریاست ءَ پندل ءِ تالان کنگ ءِ بھتام جتگ-

پنجاب ءِ انسپکٹر جنرل آف پولیس سکھچین سنگھ گل ءَ گوشتگ کہ واکداراں ھزارانی نیم پوجی کارندہ ریاست ءَ داشتگ اَنت ءُ بدامینی ءِ دارگ ءِ ھاتر ءَ لھتے دمگاں انٹرنیٹ سروسز سرجم ءَ بند کتگ اَنت-

آئی ءَ گوشتگ کہ پولیس ءَ داں انگت ءَ امرت پال سنگھ ءِ پلامرزی کنوکیں 154 پلامرزی کنوک دزگیر ءُ دَہ توپک ءُ تراکناکیں شورو گپتگ اَنت –

گوستگیں شمبے ءَ پولیس ءِ نیمگ ءَ پٹ ءُ پول ءِ درچ برجاہ دارگ بیگ ءَ پد امرت پال سنگھ چیر اِنت – امرت پال سنگھ ءِ گوشگ اِنت کہ آ ھالستان ءِ زرمبشت ءِ پلامرزی ءَ کنت ے

اے گپ ھما وھد ءَ دیم ءَ اتکگ کہ فروری ءِ ماہ ءَ سدانی کچ ءَ پلامرزی کنوک جیل ءَ بندین یک پلامرزی کنوکے ءِ لوٹ ءِ کنگ ءَ زھم ءُ توپکانی ھواری ءَ پنجاب ءَ پولیس ءِ یک اسٹیشنے ءِ سر ءَ بیڑ اش برتگ-

امرت پال سنگھ ءِ بارو ءَ باز کم سرپدی ھست اَنت بازیں سالاں آئی ءَ مزن ھور ءِ شھر دبئی ءَ ٹرک ھلائینتگ-

آ سال دوھزار ءُ بیست ءُ دو ءَ پنجاب ءَ دیم ءَ اتکگ کہ آئی ءَ سکھانی ھکانی پھریزگ ءِ واستا روانک ءِ سروکی کتگ ھندوستان ءِ آبادی ءِ کساس ءَ یک ٹک ھپت درسد اِنت-

آئی ءِ گشتانکاں ھالستان ءِ زرمبشت ءِ پلامرزی گیش بیتگ اَنت کہ چریشی ءَ ھندوستان ءَ بندش اِنت – واکداراں آئی ءَ آئی ءِ ٹولی ءَ را ڈیھ ءِ سلامتی ءِ واستا ترس سرپد بنت-

اگاں اے زرمبشت گوستگیں سالاں ھلاس بیتگ بلے آ داں انگت ءَ پنجاب ءُ آئی ءَ چہ ڈن لھتے پلامرزی کنوک گون اَنت گیشتر ایشانی توک ءَ کینیڈا ءُ برتانیہ ءِ وڑیں جاھاں کہ اود ءَ سکھ آباد اَنت –

گوستگیں یکشمبے ءَ زرمبشت ءِ پلامرزی کنوکاں لندن ءَ ڈیھ ءِ ھائی کمیشب ءِ سر ءَ ھندوستان ءِ بیرک دور کرتگ ءُ امرت پال سنگھ ءِ دزگیری ءِ گامگیج ءِ ھلاپ ءَ زھر ءِ درشان ءَ ماڑی ءِ دریگ پروشتگ –

اے وئیل ءَ پد ھندوستان ءِ ڈنی کارانی وزیر ءَ اے وئیل ایر جتگ ءُ نوکیں دھلی ءَ برتانیہ ءِ ڈپٹی ھائی کمشنر لوٹ اتگ ءُ لندن ءَ سپارت ھانہ ءِ پھریزگی ءِ واستا زھرشانی یاداشت کتگ-

ھال سرکنوکیں ایجنسی پریس ٹرسٹ آف انڈیا ءِ رد ءَ چارشمبے ءِ روچ ءَ پولیس ءَ نوکیں دھلی ءَ برتانیہ ءِ ھائی کمیشن ءَ ڈن لس پھریزگی دور کتگ اَنت ھالستان ءِ زرمبشت ءِ پلامرزی کنوکاں دوشمبے ءَ سان فرانسسکو ءِ انڈین کونسل ھانہ ءِ پروشتگ-

امرت پال سنگھ ءِ گوشگ اِنت کہ آ یک سکھ لشکری دوستیں رھشون جرنیل سنگھ بھنڈرانوالے ءَ چہ اسرمند اِنت کہ آئی ءِ سر ءَ ھندوستان ءِ سرکار ءَ ھالستان ءِ واستا سلاہ بندیں گھگیری ءِ سروکی کنگ ءِ بھتام جتگ-

بھنڈرانوالے ءُ آئی ءِ پلامرزی کنوک سال نوزدہ سد ءُ ھشتاد ءُ چار ءَ ھما وھد ءُ کُشگ بیتگ اَنت وھدیکہ ھندوستانی لشکر ءَ سکھ مذھب ءِ پاکترین ءُ ابادت جاہ گولڈن ٹیمپل ءِ سر ءَ بیڑ برتگ-

بلوچستان ءِ بُنجاھی شھر شال ءِ دمگ کلی مریانی ءِ ھند ءَ ناشناسیں سلاہ بندیں مردماں ھزارہ برادری ءَ چہ سیادی داروکیں ھپت مردم تُپنگ ءِ زور ءَ آوار جتگ اَنت-

اشی ءَ پد چار مردم یل کنگ بیتگ اَنت- ٹرک ڈرائیور رستم علی ءِ گوشگ رِد ءَ آ گوستگیں روچ ءَ وتی دگہ سنگتانی ھمراھی ءَ چہ غزہ بند ءَ ریگ ءِ آرگ ءِ ھاتر ءَ روگ ءَ بیتگ اَنت کہ کلی مریانی ءِ نزیک ءَ کساس شش ءُ ھپت سلاہ بندیں مردم کہ گاڑی ءِ سر ءَ گوں سلاھاں اَتکگ اَنت ءُ ھزارہ برادری ءِ سے پوریاگر کہ آ ھزارہ ٹائون ءُ چہ مری آباد سیادی داروکیں نوروز عزیز اللہ ءُ جمشید ءَ ابید علی خان، محمد گمان ، خان محمد گوں وت برتگ اَنت بلے چار مردم پد ءَ یل کتگ اَنت-

تنی وھدے وئیل ءِ سوب زانگ نہ بیتگ ،دمگی انتزامیہ ءَ پٹ ءُ پول کنگ ءَ اِنت-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل آشوب ءَ شنگ کرتگیں درشان ءِ تہ ءَ گوشتگ کہ سرمچاراں کیچ ءِ دمگ سری گڈگی ءَ پاکستانی پوج ءِ پانگِسے سر ءَ گوں راکٹاں اُرش کتگ –

میجر ءِ رِد ءَ کیچ ءِ دمگ سری گڈگی ءَ مروچی سھب ءِ ادار دھ ءَ پاکستانی پوج ءِ پانگس ءِ سر ءَ اُرش ھما وھد ءَ.کنگ بوتگ وھدیکہ آ بیست ءُ سَے مارچ پاکستان روچ ءِ مراگش ءِ تیاری ءَ کنگ ءَ بوتگ انت – راکٹ گولہ پانگس ءِ تہ ءَ کپتگ ءُ ترک اِتگ انت چریشی ءَ دژمن پوج ءَ جانی ءُ مالی تاوان ءِ دیمپانی بوتگ –

میجر ءِ رِد ءَ اے پانگس پاکستانی پوج ءَ یک واٹر سپلائی ءِ سر ءَ کبزہ کتگ ءُ برجم کتگ –

جارکش ءَ گوشتگ کہ بی ایل ایف اے اُرش ءِ زمّہ واری ءَ منیت ءُ چہ بلوچستان ءَ دژمن پوج ءِ در آیگ ءَ تاں اُرش برجاہ مان انت –

کیچ ءِ دمگ تمپ ءَ کیسکو ءِ ھژدہ ادار ءَ بازیں لوڈ شیڈنگ ءِ بگیری ءَ مردماں زھرشانی ءُ روانک کش اِتگ –

روانک ءَ بھر زوروکیں مردماں کیسکو ایکسیئن ءِ بگیری ءَ ترندیں نارہ جتگ ءُ تمپ ءِ دمک ءُ دراں اوگام جنان ءَ تمپ شھدربر جاہ ءَ نندانک جتگ ءُ نشتگ انت وھدیکہ تمپ تاں تربت ءَ رؤکیں بنجاھی شھدگ شش ادار ءَ بند کنگ بوتگ –

کہ پدا رند ءَ تمپ میونسپل کمیٹی ءِ سرکماش امین قریش ءُ کمک سرکماش حاجی مسلم یعقوب، ماسٹر محمد خان گچکی، کونسلر مسعود جلس، عبدالحق ھوت ءَ گوں زھرشانی کنوکاں گند ءُ نند کتگ دگ پچ کتگ ءُ آھانی لوٹ کیسکو ءِ واکداراں سر کتگ –

درنگاز کنوکاں گوشتگ کہ کیسکو ایکسین بنگل مری نامیں مردمے ءَ پون کتگ ءُ تمپ ءِ ھر سَئیں فیڈرزانی لوڈ شیڈنگ ھژدہ ادار کتگ انت –

آھانی گوشگ ات کہ لینانی لوڈ شیڈنگ درگت ءَ آھانی شر کنگ ءِ ھاتر ءَ مردم ھر وڈا ساڑی انت بلے اے کرپٹ ایں ایکسین بنگل مری وتی زاتی زد ءُ انا تمپ ءِ سر ءَ کشگ انت کہ اشی ءِ ما ھچ وڈا موکل ءَ نہ دے ایں –

آئی ءَ تمپ ءِ مردماں دلسیاہ کنگ ءِ اے دیریگیں رویش یے نوں ما چد ءُ گیشتر اوپار کت نہ کن ایں ھر سال ءِ وڈا ھردے کہ رمزان ماھ کئیت اے بنگل مری لوڈشیڈنگ ھژدہ ادار گیش کنت –

آھانی گوشگ ات کہ رمزان ءِ وشیں ماہ ءَ مردماں آسراتی دیگ ءِ بدل ءَ گیشتر دلسیاہ کنگ بوگ ءَ انت چوش کہ اے مرد اتکگ ءُ ادا وتی بادشاھی ءَ برجاہ دارگ لوٹیت گڈا اشی ءِ موکل ءَ.ھچ وڈا نہ دئیں –

گوستگیں ماہ ءَ چہ شال ءَ بیگواہ کنگ ءُ پد ءَ سی ٹی ڈی ءِ زور ءَ دزگیری ءِ دیم ءَ آرگ بیتگیں بلوچ زالبول ماھل بلوچ ءِ بارو ءَ ایمنسٹی انٹرنیشنل ءَ لوٹ کتگ کہ پاکستانی واکداراں لوٹ ایت کہ آ میان اُستمانی ھکانی کانون ءِ رد ءَ سرجمی ءَ ماھل بلوچ ءَ یل بہ کن اَنت-

ایمنسٹی انٹرنیشنل ءَ وتی نِمدی ءَ پاکستانی وزیر داکلہ رانا سناء اللہ ءَ نشان کتگ ءُ نبشتہ کتگ کہ ایمنسٹی انٹرنیشنل ماھل بلوچ ءِ سلامتی ءِ واستا ترس اِت ترا اے نِمدی ءَ نبشتگ کنگ ءَ آں بیست ءُ ھشت سالی ئیں بلوچ زالبول چہ شال ءَ کاؤنٹرٹیررزام ڈیپارٹمنٹ (سی ٹی ڈی) ءِ دستگیری ءَ ابید جرم ءَ یک ماھے ءَ گیش وھد ءَ دزگیری بندیگجاہ کتگ کہ ماھل بلوچ ءَ شھری ءُ انسانی ھکانی لگتمالی یے بروبری اِنت-

نمدی ءَ نبشتہ کنگ بیتگ ماھل بلوط بازیں وھداں ابید جرم ءِ سرجم کنگ ءَ وتی بندیگ جاہ ءَ داشتگ کہ اے انسانی ھکانی لگتمالی اِنت-

ایمنسٹی انٹرنیشنل ءَ گوشتگ کہ بیست ءُ ھپت فروری ءِ شپ ءَ شال ءَ ماھل بلوچ ءِ لوگ ءَ پوج ءَ بیڑ برتگ ءُ آ گوں زھگ ءُ لوگ ءِ مردماں گوں دزگیر کتگ ءُ بازیں ادارھاں تھاریں زنداناں کنگ بیتگ ءُ دومی روچ ءُ اینٹی ٹیررزم کورٹ ءَ ھپت روچ ءَ جسمانی ریمانڈ ءَ وتی بندیگی ءَ کتگ ءُ کہ اے میان اُستمانی انسانی ھکانی کانون ءِ در ءَ سنگ ءُ شاھیمانی پھریزگی ءِ لگتمالی اِنت-

نمدی ءَ نبشتگ کنگ بیتگ ماھل ءُ ابید جرم ءَ چار رند ءَ آمیدگس ءَ پیش کنگ بیتگ کہ اود ءَ سی ٹی ڈی ءَ ریمانڈ ءِ تلب کتگ کہ اے گیرکانونی اِنت ءُ سی ٹی ڈی ءِ وتمانی پدر کنت- دانکہ واکدار ماھل بلوچ ءِ سر ءَ جتگین بھتاماں راست کت نہ کن اَنت گڑا آئی ءِ دزگیری میان اُستمانی ھکانی کانونی لگتمالی اِنت ایشی ءَ تچک ءَ یل بہ کن اَنت-

زانگ بہ بیت ھبدہ فروری ءِ شپ ءَ ماھل بلوچ ءِ لوگ ءَ پوج ءَ بیڑ برتگ ءُ اود ءَ ماھل بلوچ زورانسری ءِ بیگواھی ءِ آماچ کتگ ءُ پد ءَ بیگواہ کتگ ءُ چریشی ءَ پد مھلوک ءِ زھرشانیاں ماھل بلوچ سی ٹی ڈی ءَ دزگیری ءَ پدر کتگ ات-

ماھل بلوچ ءَ زورانسری آوارجنی ءُ دزگیری ءِ ھلاپ ءَ جتا جتائیں پھناتاں وتی لیکہ ءِ زھر درشان ءَ کنگ ءَ اَنت ءُ ھمے وڑ ءَ سرکار ءَ ھوار بلوچ پارلیمانی پاٹیاں ترندیں ایرادانی دیمپانی اِنت-

شال ءَ ھوار بلوچستان ءِ جتا جتائیں شھراں گرند ءُ گریوکانی ھواری ءَ ھورانی درچ برجاہ، بیست ءُ چار ساھاتانی وھد ءَ برپگواری ءُ گرند ءُ گریوکانی ھواری ءَ ھورانی برجاہ بیگ ءِ گمان-

مھکمہ ءِ موسمیات ءِ رد ءَ پشمبے ءَ شال، ژوب، بارکھان، سبی، جعفر آباد، نصیر آباد، زیارت، چمن، پشین، لسبیلہ، دالبندین، کلات، ھزدار، آواران، پنجگور، کیچ، گوادر، جیوانی، پسنی ءُ مکرانی ءِ جتا جتائیں دمگاں ترندیں گوات ءُ ھورانی درچ برجاہ بیتگ اَنت-

مروچی ھم ھرنائی، زیارت، شال، سبی، نصیر آباد، ڈیرہ بگٹی، مستونگ، پشین، قلعہ عبداللہ، بولان، قلعہ سیف اللہ، لورالائی، ماشکیل، ژوب، شیرانی، بارکھان، کوھلو ءَ برپگواری ءُ آیوکیں چل ءُ ھشت ادارانی میان ءَ زیارت، پشین، قلعہ عبداللہ، ژوب، بارکھان، کوھلو، سبی ءُ شال ءَ ترونگلواری ءُ گرند ءُ گریوکانی ھورانی گمان ھست ءُ چریشی ءَ توپانی جاورانی ودی بوگ ءِ گمان اِنت-