TBP Balochi

کراچی ءَ گوستگیں روچ ءَ کراچی سنٹر جیل ءِ ڈن یل بوتگیں حفیظ بلوچ دوبر زورانسری آوار جنگے کوشست کنگ بوتگ ءُ آئی ءِ ھمراھی ءَ آئی کھول زدگ کنگ بوتگ کہ ھمے وھد ءِ تامر چاگردی ترامجاھاں شنگ بوتگ انت کہ چریشی ءَ پد انسانی ھکانی گلاں ھوار راجداریں رھشوناں اے وئیل ترندی ءَ گوں ایر جتگ-

اے درگت ءَ ہیومن رائٹس کونسل آف پاکستان ءَ وئیل ترندی ءَ گوں ایرجتگ ءُ گوشتگ کہ وئیل ءَ ھواریں مردمانی بگیری ءَ گامگیج زورگ بہ بیت-  آئی ءَ گوشتگ کہ عبدالحفیظ زھری کہ زورانسری آوار جنگ ءُ بیگواہ کنگ بوتگ ءُ سال دوھزار بیست ءُ دو ءَ چہ دبی ءَ دزگیر کنگ بوتگ کہ پدا رند ءَ دبی ءَ چہ در کتگ ءُ پاکستان ءَ آؤرتگ کہ پدا رند ءَ آمیدگس ءَ آئی ءِ سرءَ جنگ بوتگیں درسیں کیس ھلاس کنگ بوتگ انت ءُ آ بے گناہ نامینگ بوتگ-

آئی ءَ دیمتر ءَ گوشتگ کہ ایچ آر سی پی اے ھال اشکُنگ ءَ سک باز پدرد بوتگ کہ گوستگیں روچ ءَ سنٹرل جیل ءَ یل بوگ ءَ پد دوبر آئی ءِ زورانسری آوار جنی ءِ جھد کنگ بوتگ- اے اُرش ءَ آئی ءِ کھول ءِ مردم زدگ بوتگ انت- اُرش ءَ ھواریں مردم گرگ ءُ جست کنگ بہ بنت-

اے وئیل ءِ درگت ءَ پاکستان پیپلز پارٹی ءِ رھشون فرحت اللہ بابر ءَ وتی ٹویٹ ءِ تہءَ گوشتگ کہ انسانی ھکانی باسک حفیظ بلوچ آمیدگس ءَ یل داتگ جیل ءِ درآیگ ءَ پد آوار جنوکاں دوبر آئی ءِ آوار جنی ءِ کوشست کتگ، آئی ءِ گھار لٹ شاپ کتگ- نوں ھمے بٹاک جنگ بوگ ءَ انت کہ ناشناسیں مردمانی پٹ پول کنگ بوگ ءَ انت چوش کہ ماں ناشناساں پجاہ کاریں-

دومی نیمگ ءَ فرحت اللہ بابر ءِ سرءَ ھم نگد کنگ بوگ ءَ انت کہ آئی ءِ ٹویٹ ءِ سر ءَ اھوال کار وینگس ءَ نبشتگ کہ سندھ سرکار ءِ زمّہ واری انت کہ اشانی جستانی جواب بہ گپت- آیا آ  گامگیج زور انت؟  

ایڈوکیٹ شفیع احمد نامی ءَ فرحت اللہ ٹویٹ ءِ چیر ءَ نبشتگ منی واجہ شمے پاٹی ءِ سندھ ءَ سرکار انت،  تو بنجاھی سرکار ءِ تہءَ پوج ءِ سروکی ءَ جوڑ بوتگیں ھم سنتی ءِ بھر ءِ،  یک رندے ھماھانی نام ءَ بگر ات ءُ چہ ھماھاں جست بکنے کہ اے چی بوگ ءَ انت-

وائس فار بلوچ مسنگ پرسنز ءِ رھشون سمی دین بلوچ نبشتہ کنت کہ ما ایمنی لوٹ ایں بلے ریاست ایمنی نہ لوٹیت- وھدیکہ بساک ءِ سرکماش صبیحہ بلوچ ءَ حفیظ زھری ءِ ھون ءَ مِس اتگیں پشک ءِ اکس شنگ کتگ ءُ گوشتگ کہ پہ بلوچ ءِ واست ءَ پاکستان ءِ کانود اے پشک ءِ داب ءَ انت کہ بس پہ سبوت ءَ پھریز کنگ بیت- یکیں کھول ءِ بازیں مردمے شھید، در ملک ءَ آوار جنگ ءُ دروگیں کیس جنگ ءُ بند کنگ ءُ پدا آمیدگس ءَ یل بوگ ءَ پد دوبر آوار جنگ ءُ آئی ءِ جنگے کوشست کنگ، ھمے بلوچستان ءِ کسہ انت- 

ھمے درگت ءَ بلوچ ایکٹوسٹ ءُ بلوچ یکجھتی کمیٹی ءِ رھشون ڈاکٹر ماھرنگ بلوچ ءَ نبشتگ کہ استان وتی مردمانی پھازگ ءَ بے سوب بوتگ، رب ءَ بچارے اے ناشرکاریانی بگیری ءَ گپ بہ جن یے،  بلوچ ءِ ھکانء ناں وتی واست ءَ گپ بہ جن ات – پرچاکہ زوراکی ءُ ناھکیانی سر ءَ جوڈ بوتگیں استان ھچ راج ءِ شری ءَ پہ نہ انت- ادا نزورانی مڈی پُلگ بنت ءُ آھانی سر ءَ زلم زوراکی کنگ بیت – 

راجی بلوچ وومن ءَ وتی درشان ءِ تہ ءَ گوشتگ کہ راجی بلوچ وومن فورم حفیظ زھری بلوچ ءُ آئی ءِ کھول ءِ سر ءَ بوتگیں زوراکی ءَ.ترندی ءَ گوں ایر جنت- ھمک روچ ھلاس نہ بؤکیں زوراکی ءِ چاگرد کہ پاکستان ءِ پھازگی لشکر ءَ وتی ملک ءِ بلوچ سندھی پشتون راج ءِ سر ءَ برجاہ داشتگ چریشی تُرس ءِ ھلاس نہ بیوکیں 

زانگ بہ بیت متحدہ عرب امارات ءَ زورانسری آوار جنگ بوتگیں ءُ پدا رند ءَ پاکستان ءِ دست ءَ دیگ بوتگیں حفیظ بلوچ یل بوگ ءَ پد دوبر آوار جنگ جھد کنگ بوتگ-

کھول ءِ گوشگ انت یل بوگے ھما دمان ءَ پد اسپت رنگ ءِ گاڑی ءِ سلاہ بند سوار بوتگ انت اتکگ انت سنٹرل جیل ءِ دیم ءَ حفیظ ءِ آوار جنگ ءِ کوشست کتگ- آھاں حفیظ ءُ کھول تپنگ ءِ کنداک جتگ ءُ تیرگواری کتگ ءُ زدگ کتگ انت بلے کھول ءَ گوں آھاں گھگیری کتگ ءُ آھانی آوار جنی بے سوب کتگ- 

چاگردی ترامجاھاں شنگ بوتگیں تامر ءَ گندگ بیت گاڑی ءَ سواریں پوج ءِ کارمند کہ لس مردمی پوشاک ءِ گور ءَ زھگ ءُ زالبولانی سر ءَ زوراکی کنگ ءَ انت وھدیکہ آیانی سر ءَ تیر گواری کن انت کہ چریشی ءَ حفیظ بلوچ ءُ آئی کھول ءِ مردم زدگ بنت-

کیچ ءِ دمگ ھوشاب ءَ سرکاری مزن وانگجاہ ءِ نودربرانی ھمک سالی مراگش ءِ برجم دارگ بوتگ،  مراگش ءَ ماسٹر ،جنک ءُ بچکیں نودربراں ھوار مزنیں کچے ءَ چاگردی زانتکاریں مردماں بھر زرتگ –

مراگش ءِ بندات گوں بلوچی دوچاپی ءَ بوتگ کہ نودربراں جوانیں وڈی ءَ دو چاپی پیش داشتگ ءُ چریشی ءَ پدا نودربراں وانگ ءُ زانگ ءِ درگت ءَ اسٹیج ڈرامہ ءِ کُتگ -مراگش ءَ اسٹیج ڈرامہ ءَ پد جنک ءُ بچکیں نودربراں ماں اردو ءُ انگریزی ءِ تہ ءَ تران کُتگ وشگٹی ءَ شئیر گوشتگ –

مراگش ءِ سیمی بھر ءَ وانگجاہ ءِ ماسٹر چاگردی مردماں گوں نودربراں تران کتگ – تران کنان ءَ آھانی گوشگ ات کہ مئے لوٹ انت کہ وانگ ءُ زانگ پڑ ءَ بائدیں اے وڈیں مراگش برجاہ دارگ بہ بنت ءُ نودربرانی ٹیلنٹ دیما برگ بہ بیت – ھنو بیست ءُ یکمی کرن انت ، اے کرن ءَ دنیا گلوبلائز ایں ، ھما راج دنیایے تہ ءَ زندگ بوت کناں کہ آ گوں  الم ءَ دوستی کن انت – راج ایٹم بم ءِ اُرشے ءَ ھلاس نہ بنت ھما وھد ءَ ھلاس بنت کہ اے بیست ءُ یکمی کرن ءَ گلوبل ورلڈ ءِ تہ ءَ وتی کنٹریبیوشن ءَ کت نہ کن انت – 

آھاں گُشت کہ نودربراں اردو ءُ انگریزی ءَ تران کتگ ڈرامہ اسٹیج کتگ کہ آھانی تہ ءَ ھچ کمی گندگ نہ اتکگ پرچا  کہ آ ترانانی تہ ءَ درسیں چیز مان اِتاں،  تئی ڈرامہ ءَ کلچر پیشدارگ بوتگ ات بلے یک نزوری ءِ ما دیست کہ بلوچی ءَ تران کنگ نہ بوت بائدیں بلوچی ءِ تہ ءَ ھم تران کنگ بہ بوتیں – 

آھانی گوشگ ات  کہ مارا زندگ کُتگ شما ما ھوشاپ ءِ تہ ءَ زندگاں آئی ءِ بنیاد ھمے وانگجاہ انت – ما ھمے وانگجاہ ءَ ونتگ ءُ در اتکگ انت – مئے اے وانگجاہ ءَ چی جوڈ نہ کتگ،  دانشور،  فلاسفر ڈاکٹر ءُ انجینئیر ـ ما پھر بندیں مکران تہ ءَ  ھوشاپ ءِ بازیں وانندھے مزنیں اگدھانی سر ءَانت –  

آھانی گوشگ ات کہ تالیم ءِ مکسد اے نہ انت کہ مئے گور ءَ ڈگری بہ بیت ڈگری دھمی تبک ءَ بگر تاں پی ایچ ڈی کنے ترا ڈگری رسیت تو ڈاکٹر ھم جوڈ بہ یے – بلے گپ ایش انت کہ الم ترا چی جوڈ کنت مردمانی دیما تو چی یے جوڈ بہ یے مردم ترا چی سرپد بیاں – بازیں مردماں پی ایچ ڈی کتگ،  سی ایس ایس ھم کتگ بلاہ بلاھیں پوزیشنانی سر ءَ انت بلے آ تعلیم یافتہ نہ انت زر کمائینگے مشین جوڈ بوتگ انت – پھلی لوٹاں بازیں ھست کہ آ مات ءُ پتاں بلاہ بلاھیں ادارھاں راہ داتگ انت وانگے ھاتر ءَ بلے اودا آ شریں انسان جوڈ نہ بوتگ انت – تالیم انسانی رویش ءَ بدل کنت آھانی رویش مٹ نہ بوتگ – وانندہ ءُ ناوانندہ  میان تالیم ءَ.گشین ایت – بلے ادا ریس لگ اِتگ کہ کئے باریں چینچو زر کمائینیت – 

آھانی گوشگ ات کہ ما چکاں ھمے سوج ءَ.دیاں کہ شریں انسان جوڈ بہ بئے وتی آؤکیں پدریچ ءَ وتی آؤکیں زند ءَ  سازگار بہ کنے گوں شریں نسلے ءِ ھمراھی ءَ وھدیکہ مئے شریں نسل ءِ جوڈ نہ بیت ما بس کاروباری جوڈ بہ ایں ھرکس پہ وت بیست گڈا شریں سوسائٹی ءُ سماج جوڈ نبیت اے تباہ ءُ برباد بیت گڈا ما ھم زندگ نہ بئیں ما ھم نہ مان انت – 

آھانی گوشگ ات کہ.مرچی مئے ھالا بہ چارے بلوچستان دنیائے تہ ءَ.کرپشن ءَ اولی نمبر ءَ انت دومی لمبر ءَ ویزمیلائے ءِ شھر انت پاکستان ھمے زراں مئے شمے نام ءَ پنڈ ایت بلے پہ وتی عیش ایاشی ءَ – اسسٹٹ کمشنر ھشاد لک ءِ گاڈی ءَ.سواریں 19 گریڈ ءِ پرنسپل ءَ پرپٹ ءِ پہ سواری ءَ.نیست – 

آھانی گوشگ ات کہ گڈسر ءَ ما ھمے چکاں گوشگ لوٹاں کہ اے وانگجاہ ءَ چہ درآیگ انت ءُ دیم پہ وتی منزلے نیمگ ءَ من ھمے گشاں بوانے جھد بہ کنے یک شریں انسانے جوڈ بہ بئے اے واست ءَ ناں کہ ڈاکٹر بہ ایں کساب ءِ جوڈ بئین – اے نیت ءَ ناں کہ زر کمائیناں ءُ درملک ءَ رواں  ـ 

مراگش ءِ گڈسر ءَ چہ گچینی مھمانانی نیمگ ءَ نودربر دلبڈی دیگ ءُ داد دیگ بوتگ انت ءُ مراگش آسر کنگ بوتگ –

بلوچستان ءِ دمگ تمپ ءَ پاکستانی پوج ءُ جھاؤ ءَ نورا ءُ محب اللہ ءِ سر ءَ بوتگیں اُرشانی زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ انت-

بی ایل ایف ءِ جارکش میجر گوھرام بلوچ ءَ وتی آفیشل ٹیلی گرام چینل “آشوب” ءَ شنگ کرتگیں درشان ءِ تہءَ گْوشتگ کہ سرمچاراں گْوستگیں روچ ءَ سَے فروری ءَ جھاؤ ءِ دمگ پیلارءَ دُژمنیں ریاست ءِ چاریگانی راہ ءِ سرءَ تراکناکیں شورہ کل کُرتگ ءُ تراکین اِتگ انت چریشی ءَ دو چاریگ نورا ءُ محب سَک باز زدگ بوتگ اَنت-

میجر ءَ گْوشتگ کہ اے کُشندہ ٹولی ءِ کارمندانی سروکی ءَ سبزل نامیں مردمے کنگ ءَ اِنت- جھاؤ ءَ دُرسیں میارباریں مردماں یکجاہ کنت ءُ چہ گْوستگیں بازیں سالاں بلوچ راجی آجوئی جُھد ءِ بگیری ءَ کارمرد کنگ ءَ اِنت- اے مردم پہ دُژمنیں پوج ءَ دیم ءَ اَنت۔ آ بازیں بلوچ بچانی شھید ءُ آوار جنگ ءَ ھوار اَنت- پاکستانی پوج اشانی سروک سبزل گوں مزن ءُ نوکیں سلاھاں سلاہ بند کُرتگ اَنت، داں آیاں پہ بلوچ راجی جُھد ءِ بگیری ءَ کارمرد بہ کنت ءُ وتی مول ءُ مُراد ءَ سرجم بہ کنت-

جارکش ءَ گْوشتگ کہ بلوچ راج اے گپ ءَ سرپد بہ بیت کہ پہ کمے آسراتیاں مرچی دُژمن آیاں پہ وتی مول ءُ مُراداں کارمرد کنگ ءَ اِنت- اے مردمانی بستار پاکستانی پوج ءِ کِرءَ یک ایردستے ءَ ابید ھچ نہ اِنت- اے وڈیں دُرسیں مردم کہ بلوچ آجوئی جُھد ءِ بگیری ءَ کار کنگ ءَ اَنت آ دُرس سرمچارانی نشانگ ءَ اَنت-

میجر ءَ گْوشتگ کہ بیست ءُ سَے جنوری ءَ جھاؤ ءِ واجہ باگ ءِ بُنجل ءَ ٹیکیدار ءِ بندساچی شرکت ءِ مشین ءُ سامان مانداشتگ اَنت-  اے ٹیکیدار پہ زورگریں پاکستانی پوج ءَ دگاں ھوار ایپ ڈبلیو اوءِ ٹیکہ زُرتگ ءُ کار کنگ ءَ اِنت- چوشیں مردماں ما کڈن کنیں کہ وتی دست ءَ بہ کَش اَنت اگاں ناں گڑا وتی تاوان ءِ زمہ وار وت اَنت-

جارکش میجر گوھرام ءَ وتی دگہ درشانے ءَ گوشتگ کہ کیچ ءِ ھند تمپ ءَ سرمچاراں دو فروری ءِ بیگاہ ءِ ادار پنچ ءَ اَبدوئی نھنگ کور ءَ پاکستانی پوج ءِ پانگس ءِ سرءَ گوں دور جنگیں توپک ءَ اُرش کرتگ یک کارمندے کشتگ ءُ پانگس ءِ نزیک ءَ اوشتاتگیں بلڈوزر ھم نشانگ کرتگ-

 میجر گوھرام ءَ گڈی ءَ گوشتگ کہ زورگریں پوج ءِ سرءَ اُرش ایردستیں بلوچستان ءِ آجوئی ءَ تاں برجاہ مان انت-

انسانی ھکانی باسک ءُ وکیل ایمان زینب مزاری ءَ چاگردی ترامجاہ ٹویٹر ءَ گوستگیں روچ ءَ چہ کراچی ءَ عبدالحفیظ زھری ءِ دوبر زورانسری آوارجنی ءِ کوشست ءُ آئی کھول ءِ سر ءَ زوراکی ءُ آھانی زدگ کنگ ءِ درگت گوشتگ کہ آمیدگس ءِ نیمگ ءَ یل بوگ ءِ ھکم پد ھم پاکستان تہ ءَ یک بلوچے رکیتگ نہ انت – 

آئی ءَ نبشتگ کہ جیل ءِ درآیگ ءَ پد ھما دمان ءَ حفیظ بلوچ ءُ آئی ءِ کھول ءِ سر ءَ زوراکی کنگ بوتگ اشی ءَ چی زانگ بیت کہ بلوچ راج ءِ بگیری ءَ نہ اوشتوکیں زلمانی جست ءُ پد کنوک نیست – 

آئی ءَ گوشتگ وھدیکہ بلوچ راج آمیدگسانی نیمگ ءَ رؤانت گڈا آھانی آوار جنگ ءُ کُشگ ءِ کوشست بیت – وھدیکہ آ زانت ءِ نیمگ ءَ رؤانت گڈا شما ھمک روچ نودربراں آوار جن ات – 

آئی ءَ دیمتر ءَ گوشتگ کہ ناشرکاریں پوجی ادارہ ءُ چیریں ادارہ ھمے لوٹ انت کہ ھر بلوچ آھانی بگیری ءَ توپک ءِ چست کنگ ءَ لاچار بہ بیت پرچا کہ آھاں وت درسیں پُرایمنیں جھدے در بند کتگ انت – 

ایمان مزاری ءَ پوجی ادارہ دلگوش گور کُتگ ءُ گوشتگ کہ وھدیکہ پُرایمنیں گھگیری ءِ سرءَ اے وڈ تاکت کارمرز کنگ بیت گڈا شما مردماں کجام نیمگ ءَ دیم دیگ ءَ یے؟  تاں ھما وھد ءَ جیڑہ برجاہ بنت شما ارب پتی جوڈ بوان بئے ھمے ھاتر ءَ شما لوٹ ایت کہ جیڑہ برجاہ بہ بنت –

لسبیلہ ءَ بس ءِ ترسناکیں وئیل

ٹی بی پی شونگال

لسبیلہ ءِ ترسناکیں دگ ءِ وئیل ءَ چل ءُ یک مردم بیران بیتگ اَنت ءُ سئے ٹپیگانی اِلاج کراچی ءِ نادراھجاہ ءَ برجاہ اِنت۔ لسبیلہ ءِ تباھکاریں بس ءِ وئیل اولی وئیل نہ اِنت بلکیں شال -کراچی ، پنجگور – شال ، تربت – کراچی ءُ پنجگور -کراچی شھدگانی سر ءَ یکشلی ءَ گوں رنج ءُ درد دیوکیں وئیل بیان اَنت، کہ ایشانی تہ ءَ ھزارانی کچ ءَ مردم بیران بیتگ اَنت۔ یک اندازگے ءِ رد ءَ اے شھدگانی سر ءَ وئیلانی تہ ءَ سالے ءِ تہ ءَ ھپت ءَ چہ ھشت ھزار مردم بیران بنت اِنت۔

لسبیلہ ءِ وئیل ٹپی بیتگیں مساپرے ئِے گُشگ اِنت کہ بس ءِ تہ ءَ ھرابی ءَ ابید ءُ مساپرانی گُشگ ءَ پد ھم سپر برجاہ دارگ بیتگ ءُ وھدیکہ سپر ءِ نیام ءَ یک مساپرے ءَ وتی کھول ءَ پیغام کُتگ ءُ ھال داتگ بیتگ کہ ڈرائیور تیزی ءَ گوں بس ءَ تاچگ ءَ اِنت ءُ ٹرالراں گوازینگ ءَ اِنت۔ بسانی واھند ءُ ڈرائیورانی بے پروائی ءَ چہ بازیں وئیل دیم ءَ اتکگ اَنت بلے سرکار وئیلانی دارگ ءِ ھاتر ءَ کارریچیں پالیسی اڈ کنگ ءِ جاہ ءَ تھنا ترانکاری ءِ ھد ءَ داں پادبند اِنت۔

سرکار ءِ سر ءَ اَے بھتام جنگ بیت اِنت کہ بلوچستان ءَ ھمینچو شھدگ کہ اڈ کنگ بیتگ اَنت آ درست نوک آبادکاری ءِ شوربندیانی پد ءَ اڈ کنگ بیتگ اَنت دانکہ بلوچستان ءِ آسراتیانی “لُٹ ءُ پُل” ءَ پد پاکستان ءِ دگہ بھراں داں ارزانی ءَ روان دیگ بہ بنت۔ شال آ کراچی شھدگ شست ءِ دھک ءَ اڈ کنگ بیتگ اَت دانکہ نوکنڈی ءُ جھلاوان ءِ سنگِ مرمر ءُ دگہ آسریاتی ءَ ارزانی ءَ گوں کراچی ءَ روان دیگ بہ بیت۔

اہشی ءَ ابید اَے وئیلانی دیم ءَ آیگ ءِ دگہ یک مستریں سوبے وھد ءِ پجیگ ءَ بلوچستان ءِ دگانی سر ءَ ودوکیں ٹریپک اِنت بلے ایشی ءَ ابید ھم بلوچستان ءَ یک ھم چار کِشکی دگے گندگ نہ بیت، بازیں لس لوٹاں پد ھم آر سی ڈی شھدگ ٹاھاں ابید ھم چار کِشکی دگ ءِ اڈ کنگ نہ بیت، کہ ایشی ءِ سوب ءَ وئیلانی کساس ءَ ھمروچیگیں رد ءَ گیشی پیداک اِنت۔

اے وئیلانی تہ ءَ مرگانی یک مستریں سوبے، ایمبولنس ءُ ایمرجنسی ھزمتانی نہ بیگ اِنت۔ اگاں بلوچستان ءِ شھدگاں چار کِشکی کنگ، ایمرجنسی ھزمتی جاوراں گھتر کنگ بہ بیت ءُ مساپر بساں ریگولیٹ کنگ بہ بیت گُڑا بازیں نگرھیں ساہ رکینگ بیت کن اَنت۔

سربوتگیں ھالانی رِد ءَ گوستگیں روچاں ناشناسیں سلاہ بندین مردماں بلوچستان ءِ جتا جتائیں ھند ءُ دمگاں پاکستانی پوج ءُ بلوچستان ءِ مال مڈیانی بروکیں ٹرک ءُ موبائیل ٹاوریے سر ءَ اُرش کُتگ ـ 

پاکستانی پوج ءِ سر ءَ اُرش یک فروری ءَ کیچ ءِ دمگ زامران ءَ زامری ھند ءَ برجاھیں پوجی پانگس ءِ سر ءَ کنگ بوتگ چریشی ءَ پوج ءَ جانی تاوان ءِ دیمپانی کنگ کپتگ – اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –  وھدیکہ دومی نیمگ ءَ گوستگیں شپ ءَ منگچر ءَ سلاہ بندیں مردماں مڈی بروکیں ٹرکے ءُ کلات ءِ دمگ پارود ءَ موبائیل ٹاور ءِ مانداشتگ – 

بلوچستان ءِ مال مڈیاں بروکیں ٹرک ءُ موبائیل ٹاور ءِ ماندارگ ءِ زمّہ واری بلوچ آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ انت – 

بی ایل اے ءِ جارکش جیئند بلوچ ءَ وتی شنگ کرتگیں درشان ءِ تہ ءَ گوشتگ کہ مئے سرمچاراں کلات ءَ مڈی بروکیں ٹرک ءُ موبائیل ٹاور سر ءَ اُرش کُتگ – 

جارکش ءِ رِد ءَ گوستگیں شپ ءَ منگچر بازار ءِ نزیک ءَ مڈیانی بروکیں یک ٹرک ءِ مئے سرمچاراں مانداشتگ وھدیکہ ٹرک ءِ ڈرائیور مکن کُتگ ءُ یل داتگ – 

جارکش ءَ دیمتر ءَ گوشتگ کہ مئے سرمچاراں مروچی کلات ءِ دمگ پارود ءَ یوفون کمپنی ءِ موبائیل ٹاور چیر ءَ تراکناکیں شورہ کل کتگ ءُ تراکین اِتگ انت چریشی ءَ ٹاور کپتگ ءُ تباہ بوتگ ءُ ٹاور ءِ ایندگہ ازباب مانداشتگ انت – 

جارکش ءَ گوشتگ کہ اے ٹاور زورگیریں پوج ءِ گوشگ ءِ پد ءَ کل کتگیں ٹاور ءِ بوتگ – بلوچ لبریشن آرمی ھردو اُرشانی زمّہ واری منّ ایت  ءُ زورگیریں پوج ءُ آئی ءِ کمکارانی سر ءَ مئے اُرش برجاہ مان انت –

زامران ءَ پوج ءِ سر ءَ بوتگیں اُرش ءِ زمّہ بلوچستان لبریشن فرنٹ ءَ منّ اِتگ – بی ایل ایپ ءِ جارکش ءَ میجر گوھرام ءَ گوشتگ کہ مئے سرمچاراں یک فروری ءَ کیچ ءِ دمگ زامران ءَ  زامُری کور ءَ برجاھیں پاکستانی پوج ءِ پانگس ءِ سر ءَ گوں دورجنگیں توپک ءَ دُژمن پوج ءِ یک کارمندے نشانگ کُتگ ءُ کُشتگ –

میجر ءَ گوشتگ کہ پاکستانی پوج ءِ سر ءَ مئے اُرش داں زوگِپتیں بلوچستان ءِ آجوئی ءَ برجاہ مان انت –

آزمانک: چڑکہ

آزمانکار: مھر بلوچ

دی بلوچستان پوسٹ

زند چے یے؟ اے سوال ھر بنی آدم ءِ دل ءِ توک ءَ الم ودی بیت ءُ ھر یکے وتی وڑ ءَ زند ءَ را یک رنگ ءُ دروشم ءُ مانایے دنت ھمے رنگ ءَ واجہ چگرد ھم وتی زند ءِ روچاں گْوازینگ ءَ ات۔ آ مُدام زند ءِ مانا ءُ دْروشماں شوھاز ءُ پد جنان ات۔ چوناھا چگرد یک کوھی شوانگے ات ءُ وتی ھلک ءِ تہ ءَ یک ابدالے ءَ زانگ بوت۔ مردماں مدام آئی ءَ را گنوکے پھم اِت ءُ چہ کندان ءَ آئی دیم ءَ گوست شت اَنت۔

ھمے میتگ ءَ کہ چگرد نندوک ات اود ءَ نیزگاری ات، ورد ءُ وراک بس کوھی کوش ءُ پسانی شیر ات اَنت۔ چگرد مُدام سُھب ءَ مھلہ پاد اتک ءُ پسانی چارینگ ءَ شت ءُ بیگاہ ءَ میتگ ءَ واتر اتک ۔

اناگہ یک روچے کہ آ پہ وتی پسانی چارینگ ءَ درکپت پہ کوہ ءُ کوچگاں ءُ سک دور سر بوت تاں بیگاہ ءَ میتگ ءِ روگ ءَ پیسر شپ کپت گڑا آئی ھمے دیاراں کہ سر بوتگ اَت ءُ شپ ءِ گوازینگ ءِ نیت کرت ۔

آئی ءَ پس آؤرت ءُ کوہ بُن ءَ داشت اَنت ءُ وت ھمے کوہ ءِ سر ءَ تچک بوت ، داں دیر نہ گْوست آ واب کپت۔ اناگہ ءَ آئی واب ءَ دیست یک میتگے ءُ سک باز مردماں اوشتاتگ ءُ آئی ءَ آواز دیگ ءَ اَنت ءُ گوشگ ءَ اَنت۔ چگرد جان ماں ھما مردماں کہ وتی زند ببا داتگ ءُ مرتگ اَنت ما ھمے ھلک ءَ کہ تو نشتگ ئے ما ھمے ھند ءِ نندوک بوتگ اَنت ءُ ھچ کار ءُ شری پہ وتی میتگ ءَ نہ کرتگ۔ مارا پھل بکں ءُ اے پنتاں بزور الم بہ جیڑ پہ ھمے میتگ ءَ کہ کجا جیڑہ ءُ جنجالاں چو لاچار ءُ لگت مال کرتگ ۔

دیر نہ بوت چگرد پچلرز اِت داں سماہ ئِے کت، ھید ءُ ھمپان اِنت ءُ آئی دستانی نیام ءَ زندگی وتی گڈی ساھتاں گوازینگ ءَ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ نوشکی ءَ دو مردم زورانسری آوار جنگ ءَ پد بیگواہ کنگ بیتگ اَنت- دوئیں مردم گوستگیں روچ ءَ چہ نوشکی بازار ءَ پوج ءَ آوار جنگ ءَ پد ناشناسیں جاھے ءَ برتگ اَنت-

بیگواہ کنگ بیتگینانی بچّار خرم ء عبدالصمد بادینی ءُ سعود ء عبدالباقی بادینی جھمنند کلی بادینی نوشکی ناماں چہ بیتگ اَنت-

بیگواھیں سعود ھما وھد ءَ آوار جنگ بیتگ وھدے آئی ءَ چہ وانگجاہ چوٹی کتگ ءُ لوگ ءَ روگ ءَ بیتگ وھدے کہ خرم کلی سردار بادینیءِ جھمنند اِنت ءُ یک پوریاگر اِنت کہ آ گوستگیں روچ ءَ آوار جنگ ءَ پد بیگواہ کنگ بیتگ-

زانگ بہ بیت اے بیگواہ بیتگینانی تہ ءَ سعود ءِ برات سلال احمد پوج ءَ اکتوبر 2022 ءَ آوار جنگ ءَ پد خاران ءَ دگہ سے مردمانی ھمراھی ءَ دروگیں میڑے ءَ کُشتگ اَنت-

زانگ بہ بیت کہ اکتوبر ءَ سی ٹی ڈی ءَ چار مردم میڑ ءَ جنگ ءِ ٹاہ جتگ اَت وھدے کہ اے میڑ ءَ جنگ بیتگیانی پجّار پیسر ءَ چہ بیگواھیں مردمانی ردءَ بیتگ اَنت-

اشانی تہ ءَ سلال احمد ھم ھوار اَنت- سلال ء حاجی عبدالباقی بادینی جھمنند نوشکی 6 اکتوبر 2022 ءَ شال ءِ دمگ چہ بروری دگ ریلوے کالونی ءَ لوگ ءَ بیڑبرگ وھد ءَ آوار جنگ ءَ پد بیگواہ کنگ بیتگ اَت-

سلال بادینی اشی ءَ ساری پنچ مارچ 2022 ءَ چہ لاھور ءَ بیگواہ کنگ بیتگ کہ آ اگست ءَ یل کنگ بیتگ اَت وھدے کہ دومی رند ءَ زورانسری آوار جنی ءَ پد سلال دروگیں میڑے ءَ کُشگ بیتگ اَت-

مُلا عبدالحمید اسماعیل زہی بلوچ ءَ مروچی زاھدان مسیت ءَ آدینگ ءِ واھز ءِ میان ءَ گوشتگ کہ بندیگ ترسینگ ءُ کم شرپ کنگ مہ بنت، ھر انسان ءِ شرپ کنگ بہ بیت، درسیں انساناں شرپ ءُ ازت ءِ ھست، مزھب ھچ انسان ءِ کم شرپی ءِ موکل ءَ نہ دنت – 

مُلا عبدالحمید ءَ وتی واھز ءِ وھد ءَ گوشتگ کہ بندیگانی ءِ سر ءَ زور دیگ مکن کنگ بوتگ، بندیگ کم شرپ کنگ مہ بنت پہ زور گپ دپ ءَ دیگ ءُ منارینگ بندیگانی ھکانی بگیری انت، اے اسلام ءُ دین کاری ءِ درونتانی تہ ءَ نیست انت –

آئی ءَ سرکاری کارمند گوشتگ انت کہ نگد کنوکاں بندیگ مہ کن اِت، ملک ءِ الاج شرگداری انت – درساں چہ مستریں جیڑہ ھمیش انت کہ شرگداری ءِ در بند کنگ بوتگ انت – زانتکار ءُ اھوالکاراں جیڑھانی درنگاز کنگے موکل دیگ بہ بیت –

مُلا اسمائیل زہی ءَ گوشتگ کہ سرکار ءِ کدر ءُ کیمت ھما وھد ءَ بیت کہ آ مردمانی کمک ءَ بہ کنت ءُ ایردستں مھلوک ءِ ھکانی دیگ ءَ وتی پرز بہ پھمیت – آئی ءَ گوشتگ کہ اے سرکار کدر ھما وھد ءَ بیت وھدیکہ مھلوک آئی ءَ بلوٹیت بلے اگاں مھلوک اے سرکار ءَ نہ لوٹ انت گڈا آئی ءِ کدر کنگ نہ بیت –

آئی ءَ زاہدان ءِ ھونیگیں آدینگ ءِ آماچیں مردمانی درگت ءَ گوشتگ کہ من گوں آھانی کھول ءَ دچار کپتگ انت گوں آھاں گند ءُ نند کتگ بازیں زدگ بوتگیں مردمانی چم کور انت،  بازینے ءِ پاد بُرگ بوتگ انت ءُ بازیں مردمانی سرین ھڈ پرشتگ – اے وڈیں زوراکی کنوکیں مردمانی بگیری ءَ گامگیج زورگ بہ بیت – 

زانگ بہ بیت زاھدان ءِ ھونیگیں آدینگ ءَ پد کہ اودا ءَ مزنیں کچے ءَ درنگاز کنوک شھید کنگ بوتگ انت،  زاھدان ءُ دگہ دمگاں درنگاز کنوکانی تہ ءَ گیشی اتکگ ءُ تنی اے درچ برجاہ انت ءُ ھمک آدینگے نماز ءَ پد زھرشانی کنگ بیت –

بلوچستان ءَ چہ شومک ءِ نادراھی ءَ یک دگہ زھگے بیران بوتگ – 

ھاران ءِ جھمنندیں زھگ کہ بازیں روچاں چہ شومک ءِ نادراھیءِ آماچ بوتگ کہ گڈسر ءَ کراچی ءِ آغاخان نادراھجاہ ءَ آئی ءَ وتی ساہ داتگ، زھگ ءِ جون وتی بنکی ھنکین ھاران ءَ برگ بوتگ کہ ھمودا آئی ءِ کل ءُ کسارت کنگ بیت –

زانگ بہ بیت کہ بلوچستان ءَ شومک ءِ نادراھانی تہ ءَ گیشی آیان انت،  گوستگیں سال دوھزار بیست ءُ دو ءِ گڈی ماہ ءَ تھنا ڈیرہ بگٹی ءَ زھگے ءَ ھوار سَے مردم مرگ ءِ دیمپان بوتگ – 

انچش گوشگ بیت کہ بی ایم سی نادراھجاہ ءَ ھمک روچ کساس بیست ءَ گیش نادراھانی کیموتھراپی کنگ بیت انت – 

سرجمیں بلوچستان ءَ شومک ءِ نادراھی ءِ الاج ءَ پہ آسراتی نیست – بلوچستان ءِ چاگردی ءُ راجداریں باسک ءُ گلانی نیمگ ءَ مدامی لوٹ کنگ بیت کہ شومک ءِ نادراھی ءِ گر ءُ دار کنگ بہ بیت ءُ بلوچستان ءَ شومک ءِ نادراھجاہ پچ کنگ بہ بیت –

بلوچستان ءِ بازیں دمگاں ھاسکر ھزدار ءُ نوشکی ءَ بازیں شومک ءِ نادراھانی کیس دیم ءَ اتکگ انت ءُ تنی وھدی بازیں مردمے چہ وتی زند ءَ زبھر بوتگ کہ آھانی تہ گیشتریں کچ زھگ ءُ ورنایانی انت –