دُژمن ءِ تمردی اگاں مئے ردی؟
نبشتہ کار: واجُل دشتی
دی بلوچستان پوسٹ
جنگ گوں جوْانیں جنگی شوندات ءُ ھکمت املیاں کٹّگ بیت، اگاں تئی کِرّ ءَ جوْانیں جنگی شوندات ءُ رھبند مہ بیت تو تُری ستر توانمند ءُ زورآور بہ بئے جنگ ءِ کَٹّگ تھنا پہ تو وابے بیت- اگاں دومی ھبر ءَ جنگ ءَ بہ کَٹّ ئے ھم بلاھیں تاوان ءُ دراجکشّیں جنگے ءَ پد، تاوان انچیں تاوان بنت کہ جنگ ءِ سوبمندیں ھلاسی ءَ پد ھم ھما جاگہ ھورک بنت ءُ تاوان مان اَنت- اے وَ یک انچنائیں گپّے کہ من ھکّ ءِ سر ءَ آں الّم سوبمند باں اے گپ ءِ ھچ منّانک نیست جنگ ءَ ھما سوبمند بیت کہ آئی ءِ کرّ ءَ جنگی شوندات ءُ ھکمت املی بیت- جنگ ءَ جنگ ءِ وڈ ءَ بہ کن بلوچ ءِ جنگ سائِنٹپک جنگے گڈا چہ وتگلائی، نیکراھی، روایت ءُ بلوچی زھرگ ءَ چہ یکّر کنگ بہ بیت-
چیرجنگیں جنگولانی سوبمندی ھما اِنت کہ دژمن ءَ گیشاں چہ گیش تاوان بہ دئے اَنت ءُ وت کم ءَ چہ کم تاوان بہ ور اَنت، یکیں جاگہ ءَ یازدہ یازدہ سنگت ءِ تاوان جنگی رھبندانی ٹوھیں ردی یے، بلکیں یک جنگی میارباری یے (جُرمے) اشی ءِ میاربار گل ءِ رھشون ءُ رھبندانی ٹھینوک بنت- پد ماں پد اِنچو تاوان ءَ ابید انگت ھما پیسری رھبندانی سر ءَ کار کنگ مئے کم پھمی ءُ نازانتکاری ءَ پدّر کنت- دژمن چہ روایتی جنگاں درکپتگ آئی ءَ اے روایتی جنگ شر چکاس اِتگ دو دو ماہ ءَ کوہ ءُ سنگت انگر ءَ بوتگ اَنت بلے دژمن انگت بے سوب بوتگ دژمن ءَ بازیں جیڑگ ءَ پد وتی جنگی ھکمت املی مٹ کتگ اَنت نوکیں شونداتانی سر ءَ کار کنگ ءَ اِنت بلے مئے کِرّ ءَ نوکیں چیز ھچ نیست اے گپ ءِ گواہ پد ماں پد ءَ یکّیں وڈ ءَ تاوان ورگ اِنت-
جنگ ءِ توک ءَ تاوان الّم ورئے بلئے ھرّوچ یکیں وڈ ءَ تاوان ورگ جنگ ءِ بھر نہ اِنت بلکیں ٹوھیں ردی ءُ بے سوبی یے، بلوچ راجی جُنز ءَ بیست ءُ سےَ سالانی توک ءَ درستاں چہ گیش تاوان گوستگیں دو سالاں رس اِتگ دُژمن وتی نوکیں جنگی شونداتاں گوں سوبمند بوتگ پمیشکہ آ گیشاں چہ گیش ھمے نوکیں ٹیکنالوجی ءَ کار گرگ ءَ اِنت بلے تو اے ٹیکنالوجی ءِ دیم ءِ دارگ ءِ ھاترا کجام گامگیج زرتگ؟ چونیں رھبند ٹھینتگ کہ وتی سنگتاں بہ پھریزئے؟ گمان ھمیش اِنت کہ انگت ھچ ٹھینگ نہ بوتگ پمیشکا مار مارا یکّیں ھونڈ ءِ دپ ءَ ھرّوچ ڈنگ جنگ ءَ اِنت ءُ ابکّھی گپ ایش اِنت کہ ھمک رند یکّیں وڑ ءَ ڈنگ جنگ ءَ اِنت بلے مئے کر ءَ انگت آئی ءِ دیم ءِ دارگ ءَ ھچ نیست-
پہ گوریلا سنگتاں وتی رھبندانی مٹ کنگ ءُ گیش چیر بوگ بلاھیں گپے نہ اِنت پرچہ کہ آ چوناہ ءَ کوہ ءَ اَنت تکانسری ءُ تکلیپ سگّگ ءَ اَنت سکّیں تُرْندیں رھبندانی رندگیر اَنت گڈا دژمن ءِ جنگی رِپک ءُ جنگی ھکمت املیانی مٹ بوگ ءَ گوں اژدری اِنت کہ آ ھم وت ءَ مٹ بہ کن اَنت- لھتے رھبندانی توک ءَ گیشی آرگ ءُ لھتینانی مٹ کنگ ءَ چہ بس آ وت ءَ پھاز اِت کن اَنت اگاں تاوان ور اَنت ھم سک کم ور اَنت-
جنگی ھکمت املی وھد ءُ جاورانی گون ءَ مٹ کنگی اَنت، دژمن ءَ کہ ھر وھد ءَ وتی ھکمت املی مٹ کت اَنت ترا ھما ساھت ءَ پوہ بوگی اِنت ءُ ھچ وھد مہ زور ءُ وتی جنگی ھکمت املیاں ءُ شونداتاں مٹ بہ کن، چوناہ ءَ بائد ایش اِنت کہ تئی سرپدی ءُ دژمن ءِ سر ءَ نگاہ ایرکنگ انچو تیز بہ بیت کہ آئی ءِ ھکمت املیاں پیسر ءَ چہ پوہ بہ بئے دانکہ آئی ءَ بے سوب کُت بہ کن ئے بلے اَنچو سما بیت کہ مئے انٹیلی جنس توان سُست اِنت ءُ مارا ھما ھال سربوگی اَنت پہ وھد سر نہ بنت- زمین مئیگ اِنت، کوہ ءُ مھلوک مئیگ اَنت بائدیں جنگ ءِ دیم ءِ ترّینوک ما بہ بہ اِیں بلے چُش نہ اِنت دژمن مارا چہ سوائی اِنت اے جنگی شوندات نہ بوگ ءِ بلاھیں ردی یے، دژمن مروچی کہ اے نوکیں جنگی رپکاں مارا جنگ ءَ اِنت اشی ءِ سر ءَ آ دیریں کار ءَ بوتگ گپ پد ءَ ھما اِنت کہ انٹیلی جنس نہ بوگ ءِ سوب ءَ مارا سرپدی دیراں سر بیت- مروچی چاردہ سال اِنت کہ تربت ءَ پاکستان نیوی ءَ یک بلاھیں زمینے دستیگ کتگ ءُ بلاھیں بیسے جوڈ کتگ، ھمے بیس ءَ روچ پہ روچ مزن کنگ ءُ وتی ٹیکنالوجیاں نوکاز کنگ ءَ اِنت- مکران ھاسکار کیچ ءُ گوادر ءِ لشکر ءِ دراھیں جنگی ٹیکنالوجی، ڈرون ءُ جنگی بالگرد ھمدا چہ مانیٹر ءُ آپریٹ بوگ ءَ اَنت- اد ءَ آئی ءَ شارٹ رینج میزائل لانچگ پیڈے ھم جوڈ کتگ کہ نزیک ءِ دراھیں کوھاں نشانگ کت کن اَنت- ھرچ سُھب ءِ رودرائی ءَ آئی ءِ چاروگ ڈرون ھمے نیوی ءِ بنجل ءَ چہ چست بنت دراھیں کوھانی سر ءَ گشت جنگ ءَ پد واتر کاینت، ھمے وڑ ءَ ھرچ بیگاہ ءَ آئی ءِ چاروگ ڈرون گشت کن اَنت اے گڑا تچکیں گپے کہ آئی ءَ مئے سر ءَ نگاہ ایر کتگ ءُ مارا یک یک ءَ چارگ ءُ گندگ ءَ اِنت-
انچو کہ دژمن ءِ پیسری دراھیں جنگی رپک ما بے سوب کتگ اَنت ءُ پروش داتگ ھمے وڑ ءَ ما اے نوکیں جنگی رپک ءَ ھم بے سوب کت کن اِیں آئی ءِ واستہ لھتیں بنداتی ءُ اژدری رھبندانی سر ءَ امل کنگی اِنت ءُ دراھیں ھندی زمہ دار کڈّن کنگ بہ بنت کہ آ کُلیں سنگتاں ھمے رھبندانی سر ءَ امل کنگ ءَ زور بہ دے اَنت، رھبند پروشوکیں سنگت گل ءِ وتی کانود ءِ رِد ءَ سزا دیگ بہ بیت- درستاں چہ پیش گل ءِ بنجاھی باسک کہ آھانی توک ءَ سک باز چُشیں کلانیں ءُ زانتکاریں سنگت ھست اَنت کہ نوکیں جنگی ٹیکنالوجی ءُ جنگی سلاھانی درگت ءَ آھاں جوانیں سرپدی ھست آ دژمن ءِ ھمے نوکیں ڈرون ٹیکنالوجی ءُ میزائل اُرشانی درگت ءَ پٹ ءُ پول بہ کن اَنت ءُ چریشی ءَ چہ رکّگ ءِ رھبندے جوڈ بہ کن اَنت- ڈرون ٹیکنالوجی ءَ چہ رکّگ ءُ دژمن ءِ پروش ءِ دیگ ءِ واستہ ھیلکاری کتابے ٹھینگ بہ بیت ءُ زوتاں زوت دراھیں اوتاک ءُ ھندی زمہ وارانی سر ءَ دیم دیگ بہ بیت دانکہ چد ءُ دیم ما بلاھیں تاوان مہ ور اِیں-
پاکستان انوں کجام ڈرون ٹیکنالوجی ءَ مئے سر ءَ کارمرز کنگ ءَ اِنت، یکے یاکہ یکے ءَ چہ گیش تھر کارمرز بوگ ءَ اِنت ایشی ءِ پکائیں سرپدی نیست بلے لھتے بنداتی رھبنداں کہ آھانی سر ءَ امل کنگ ءَ چہ گیشتریں تھرانی ڈرون اُرشاں ما رکّ اِت کن اِیں، اگاں ڈرون اُرش بہ بیت ھم تاوان کم بیت- درستاں چہ پیش وتی کُلیں سنگت ڈرون ٹیکنالوجی ءُ آئی ءَ چہ رکگ ءِ درگت ءَ سرپدی دیگی اَنت- دگہ یک چیزے ھیال گور کنگی اِنت کہ دراھیں ڈرون اُرش سُھب ءِ سر ءَ بوتگ اَنت اشی ءِ مانا ایش اِنت کہ دژمن ءَ پکائیں ھال رس اِتگ کہ ما سُھبانی سر ءَ یکجاگہ بہ اِیں، سُھب ءِ سر ءِ دیوان ءُ یکجاھی ھلاس کنگی اِنت- ننگری ءِ جاگہ گِستا کنگی اِنت ورگ گرادگ ءَ رند ننگری ءِ جاگہ ءَ نندگ ءُ دیوان کنگی نہ اِنت وھدیکہ آس ءِ برانزے اگاں دژمن گندیت ھم گڈا تاوان کم ءَ چہ کم بہ بیت بلے جھد کنگی اِنت کہ روچ ایر رؤگ ءَ پیش ورگ گرادگ بہ بیت دانکہ شپ ءَ آس روک کنگ ءِ زلورت مہ بیت- سنگتانی وابجاہ یکے دومیگ ءَ چہ نزیک مہ بنت گیشتریں جھد ھمے بہ بیت کہ تلمبانی چیر اگاں چیریں جاگھاں وابجاہ ٹھینگ بہ بنت اگاں کسّے کُڈ بندیت گڈا کُڈ انچو رجینگ بہ بنت ءُ انچیں جاگھاں بندگ بہ بنت کہ ھچ وڈ ءَ زانگ مہ بنت- دانکہ بلاھیں کارے مہ کپیت اوتاگ ءِ سنگت کم ءَ چہ کم کنگی اَنت چار چار سنگت ءِ ٹولی جتاجتا شنگ کنگ بہ بنت- اوتاکانی پلگارگ اَژدری اِنت ھچ وڈیں کاگز ءُ دگہ چیزے مہ کپیت کہ بُرز ءَ چہ یا دور ءَ چہ زانگ بہ بیت، آپانی سر ءَ درْپ ءُ گُدانی ایرکنگ ءِ سر ءَ سرجم ءَ بندش جنگ بہ بیت، یک اوتاکے ءَ دَہ داں پانزدہ روچ ءَ چہ گیش نندگی نہ اِنت- اگاں سپرے ءَ درکپگی بیت سےَ یا چار سنگت جتاجتائیں راھاں بھر کنگ بہ بنت ءُ وتی منزل ءَ ھوار بہ کپ اَنت اگاں راہ ھمے یکیّن اِنت گڈا پد ءُ پیش دربیا اَنت ھواری ءَ درمیا اَنت- جھد کنگی اِنت کہ اوتاگ بیت اگاں راہ بیت پچیں آزمان ءِ چیر ءَ نندگی نہ اِنت درچکے ءِ یا تلمبے ءِ چیر ءَ چیر بوگی اِنت- پانک سک مھکم کنگی اِنت اوتاگ بیت اگاں راہ بیت ھچ جاگہ سنگت بے پانک مہ بنت ھرچ جاگہ ءَ رسگ ءِ ھواری ءَ درستاں چہ پیش پانک بُرز ءَ بہ رؤت دراھیں ھند ءُ کشکانی چاروک بہ بیت- اوتاگ بیت اگاں سپر سنگت کہ نند اَنت ھوار ءُ نزیک مہ نند اَنت یکے دومیگ ءَ چہ دور بہ بند اَنت- نامکَپتگیں، کوھنیں ءُ ھما اوتاک کہ اود ءَ لشکر شُتگ ءُ دیستگ ئِے اود ءَ ھچ وڈ ءَ دوبر اوتاگ کنگ ءُ دارگی نہ اِنت بوت کنت آپریشن ءِ وھد ءَ لشکر ءَ ھمود ءَ چِپ یاکہ دگہ ڈیوائسے ایرکتگ، مروچاں کوھاں لشکر کہ زوراکی ءَ پُتریت ھمے لشکری ٹولی ءَ کیمرہ ءِ ھواری ءَ دگہ ڈیوائس ھم گون آ ھرجاگہ کہ رواں ویڈیو جوڈ کنان اَنت ءُ ڈیوائس ءَ داں دیراں کوھانی سر ءَ ایر کن اَنت ءُ نِند اَنت اشی ءَ چہ زانگ بیت کہ دژمن نوکیں ٹیکنالوجی ءِ کُمک ءَ جاگھانی ویڈیو ءُ ٹِکاں وتی کر ءَ ایر کنگ ءَ اِنت-
دژمن ءِ نوکیں جنگی رِپک ڈرون ٹیکنالوجی مئے ھلاپ ءَ وڈ وڈ ءَ کارمرز بوت کنت دژمن ءِ مستریں جھد ھمیش اِنت کہ اوتاگانی توک ءَ چِپ دیم بہ دنت اشی ءِ دیم ءِ دارگ یک ھدّے ءَ داں ایش اِنت کہ نوکیں سنگت ءُ ڈن ءَ چہ آیوکیں کُلیں سنگتانی سامان ءُ چیز چارگ بہ بنت بِلّے آ کوھنیں ءُ کلانیں سنگتے بوت کنت دژمن ءَ نزیکیں مردمے کارمرز کتگ ءُ ھمائی ءِ سامانانی توک ءَ چیریں جاگھے چِپ ایر کتگ ءُ آ سرپد نہ اِنت- راشن آروکیں مردم شر تپاسگ ءُ پکّہ کنگی اَنت آھانی سر ءَ مدام نگاہ ایرکنگی اِنت- ڈن ءَ چہ اتکگیں راشن سرجم ءَ پٹ ءُ پول کنگی اِنت پٹ ءُ پول ءَ رند نوں وتی منزلاں سرکنگی اِنت- دژمن ءَ تئی راشن زورگ ءِ جاگہ ءِ درگت ءَ ھچ وڈ ءَ زانگی نہ اِنت اگاں ترا اے درگت ءَ شکّے است گڈا راشن ءِ جاگہ ءَ مَٹ کن، وتی اوتاگ ءِ چاریں نیمگاں مدام ترّ ءُ تاب کنگی اِنت پد ءُ رند چارگی اَنت دانکہ کسّے تئی نزیک ءَ اتک مہ کنت، اگاں کسّے دیست گڈا آئی ءَ دزگیر کنگ ءَ رند اوتاگ ءَ مہ بر دگہ نیمگے بہ دار ءُ جست ءُ پرس کن اگاں رند ءَ آ مردم یلہ دات وتی جاگہ ءَ ھما دمان ءَ مٹ کن، نوکیں ٹیکنالوجی ءِ رِد ءَ انچیں چاروگ ڈرون است کہ ھچ توار نہ کن اَنت ءُ سک بُرز بال کن اَنت کہ تو آھاں اجُست ءَ دیست ھم نہ کن ئے آ جھل ءِ ھمک سُرپُر ءَ وتی مانیٹرینگ بیس ءَ ھما دمان ءَ سر کن اَنت، مانیٹر کنوک ھمے چاروگ ڈرون ءِ کیمرہ ءَ چہ ھما جاگہ ءَ ٹِک کنت ءُ نیم ادار ءِ توک ءَ ھمے جاگہ ءَ نشانگ کت کنت- اے وڈ ھم بوت کنت کہ ھمے ڈرون کہ کیمرہ ءِ سر ءَ ترا چارگ ءَ اِنت اشی ءَ میزائل ھم پِر اِنت گندگ ءِ ھواری ءَ مانیٹرنگ بیس ءَ نشتگیں مردم ھما دمان ءَ میزائل ءَ آس دنت چریشی ءَ چہ آ ھچ وھد نہ زور اِیت ءُ پنچ منٹ ءِ توک ءَ تئی جاگہ ءَ نشانگ کنت- شپ ءَ گشت کنوکیں چاروگ ڈرون لینٹ ءُ آس ءِ رُژنائی ءَ ابید ھم وتی شپ گندیں (نائیٹ وژن) کیمرہ ءِ کمک ءَ ترا دیست کنت ءُ ھما دمان ءَ مانیٹرنگ بیس ءَ ھال دنت اشی ءَ چہ زانگ بیت کہ تھنا چِپ ناں باز تھر مئے ھلاپ ءَ کارمرز بوت کنت کہ ما آھانی توار ءَ ھم اِش کت نہ کن اِیں ءُ آھانی جند ءَ ھم دیست نہ کن اِیں اشی ءِ دیم ءِ دارگ ءِ راہ یکّین اِنت کہ پچیں آزمان ءِ چیر ءَ ھچ وڈ ءَ نندگی نہ اِنت- اے ھم بوت کنت کہ چاروگ ڈرون تھنا ٹِک ءَ نشان کن اَنت ءُ میزائل چہ ھمود ءَ بیس ءَ لانچ کنگ ءُ جنگ بیت پمیشکہ اے ھیال ءَ چہ درآھگی اِنت کہ ما توارے اِش کن اِیں نوں وتی سر ءَ گِر اِیں بلکیں مارا ھمک ساھت شیوار بوگی اِنت- اگاں دژمن ءِ ھالے سربوت، توارے اِش کُت، بُرز ءَ بالیں چیزے دیست یاکہ سما کُت کہ چاروگ بالیگاں جاگہ دیستگ گڈا ھچ نزوری کنگی نہ اِنت ھما دمان ءَ سنگت شِنگ کنگی اَنت ءُ چیر بوگی اِنت اے ساھتاں دژمن ءِ رد دیگ ءُ ریپینگ ءِ ھاتر ءَ ھما جاگہ ءِ سر ءَ نشانیں ءُ تِرْپناکیں چیز ایر بہ کن ءُ در کپ دانکہ دژمن ءِ زھن گوں ھما جاگہ ءَ بہ بیت ءُ تو وتی منزل ءَ سر بہ بہ ئے-
اے ھم بوت کنت کہ ریڈیو سنگل ءَ چہ دژمن مارا نشانگ کنگ ءَ اِنت پمیشکہ سیٹلائٹ، اِنمار ءُ موبائل پون کارمرز کنگ مہ بیت دانکہ سک اَژدری نہ بیت واکی ٹاکی ھم پچ کنگ مہ بنت، موبائل نیٹ ورک کم ءَ چہ کم کارمرز کنگ بہ بیت- اوتاگانی توک ءَ تھنا یک سنگتے ءَ رسانکدر ءِ زمہ واری دیگ بہ بیت ھما نیٹ ورک ءَ بہ رؤت ءُ ھالاں بیاریت آ دگہ سنگتانی سر ءَ نیٹ ورک کارمرز کنگ ءِ سر ءَ پھک بندش جنگ بہ بیت (سکّیں اَژدری ئیں کار بئے نہ اِنت) نیٹ ورک ءِ جاگہ اوتاگ ءَ چہ دو کلومیڑ دور بہ بیت سِم تھنا ھما نیٹ ورک ءِ جاگہ ءَ موبائل ءِ دپ ءَ دیگ بہ بیت نیٹ ورک ءَ چہ واتری ءَ پیسر سِم پد ءَ موبائل ءَ چہ کَشّگ بہ بیت اگاں بوت کنت گڈا نیٹ ورک ءِ جاگہ وھد وھد ءِ سر ءَ مٹ کنگ بہ بیت اگاں دژمن پون ءَ ٹریس کنت ھم رد دیگ بہ بیت ءُ ھما ٹِک ءِ جند ءَ زانت مہ کنت- ھمک سنگت ءَ اکس کشّگ ءِ موکل دیگ مہ بیت اے زمہ واری ھم یکے ءَ دیگ بہ بیت کہ آ سنگتانی اکساں وتی کرّ ءَ ایر بہ کنت دانکہ زلورت ءِ وھد ءَ گل ءِ بنجاھی پتّر ءَ اکساں دات بہ کنت- چاگردی رسانکدر پیس بُک، انسٹاگرام ءُ ٹک ٹاک ءَ ھوار آ دگہ جاگھاں کوہ، کِشک ءُ جاگھانی اکس ءُ ویڈیوانی شنگ کنگ ءِ سر ءَ پھک بندش جنگ بہ بیت پرچہ کہ دژمن زوراک اِنت آئی ءِ کرّ ءَ وڈ وڈیں نوکیں ٹیکنالوجی است بوت کنت ھمے اکس ءُ ویڈیوانی سوب ءَ آ مئے جاگہ ءُ ٹِکّاں نشان کنت ءُ تاوان دنت- پد ءَ دومی گپ ایش اِنت کہ سک باز مردم سرنڈر بوتگ ءُ ھندی چاروگ ءُ مُکبر ھم سک باز اِنت کہ آ جاگہ ءُ ٹِکّانی اکس ءُ ویڈیواں پجاہ کار اَنت-
اے لھتیں بنداتی چیز اَنت کہ اشانی سر ءَ امل کنگ ءَ سنگت رکّ اِت کن اَنت اگاں تاوان بہ وراں ھم کم تاوان ور اَنت- چوناہ ءَ سنگتانی پھازگ ءُ رکّینگ گلانی اوّلی زمہ واری اِنت- اے گل، آئی ءِ رھشون ءُ بنجاھی باسکانی زمہ واری اِنت کہ دژمن ءِ ھرچ ھکمت املی ءُ شوندات ءَ پیسر ءَ چہ سرپد بہ بنت ءُ وتی دراھیں اوتاگ ءُ ھندی زمہ واراں شیوار بہ کن اَنت دانکہ آ وتی سنگتاں پھاز اِت بہ کن اَنت، گلانی مستریں زمہ واری ایش اِنت کہ وھد پہ وھد سنگتانی سر ءَ ھیلکاری کتاب دیم بہ دئے اَنت ھاسکار انوگیں نوکیں جنگی سلاہ ءُ ڈرون ٹیکنالوجی ءِ درگت ءَ وتی سنگتاں ھیلکاری بہ دئے اَنت دانکہ تاوان کم ءَ چہ کم بہ بیت- سلاہ بندیں گلے ءِ مستریں ءُ اَژدری ئیں لوٹ انٹیلی جنس اِنت ءُ دژمن ءِ سر ءَ نگاہ ایر کنگ اِنت وھدیکہ ترا دژمن ءِ ھمک سُرپُر ءُ ھکمت املی ءِ ھال پیسر ءَ رس اِیت تو نا تھنا وت ءَ رکّینت کن ئے بلکیں دژمن ءِ ھمے ھکمت املی ءَ ھم بے سوب کن ئے ءُ پروش دے ئے، اشی ءِ مستریں درور بی ایل ایپ ءِ کولواہ وئیل اِنت کہ بی ایل ایپ ءِ انٹیلی جنس ءَ ھال سر بیت کہ دژمن ءَ وتی یک مردمے ءَ کہ آ سنگتانی دوزواہ ءِ پوست ءَ بوتگ چِپے داتگ کہ اشی ءَ وڈے ناں وڈے ءَ سنگتانی اوتاگ ءَ سر بہ کن ھبدہ اکتوبر 2022 ءَ سنگت ھمے مرد ءَ سامان ءِ آرگ ءَ گوش اَنت آ ساماناں جاگھے ایر کن اَنت ھمے مرد ءَ دزگیر کن اَنت ءُ سنگر گِر اَنت دژمن ءِ ودار ءَ کن اَنت، مدامی ئیں داب ءَ دژمن ھمے جاگہ ءَ ڈرون میزائل اُرشے کنت ءُ جنگی بالگرد کمانڈوز ایرگیج اَنت چُش کہ اے سنگتانی وتی چالے بیت پمیشکہ آ رکّ اَنت ءُ پدی ءَ دژمن ءِ سر ءَ ٹوھیں اُرشے کن اَنت- اے وڈیں رِپکاں چہ دژمن ءِ ریپینگ ءُ رد دیگ جوانیں اَملے کہ آئی ءِ مڈی ھم تاوان ءَ رواں ءُ وتی چاروگ ءُ جنگی ٹیکنالوجی ءِ سر ءَ ھم آئی ءِ بھیسہ کم بیت، دژمن ءِ ریپینگ ءُ رد دیگ جنگی شونداتانی جوانیں بھرے کہ اشی ءَ کارمرز کنان ءَ دژمن ءِ دراھیں رِپک بے سوب کنگ بنت- بلے گپ ھمیش اِنت کہ تو پہ وھد ھوش بہ کن ئے وتی جنگ ءُ سنگتانی رکّینگ ءِ ھاترا ھکمت املیاں ھما دمان ءَ مٹ بہ کن ئے-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
