TBP Balochi

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی افیشل ٹیلیگرام چینل ھکل ءَ شنگ کرتگیں درشان ءِ تہ ءَ پنجگور ءَ پاکستانی پوج ءِ سر ءَ اُرش ءُ دمگی چاریگے ءِ کوش ءِ زمّہ واری منّ اِتگ –

جیئند بلوچ ءِ رِد ءَ بی ایل اے ءِ سرمچاراں گوستگیں شپ ءَ زورگیریں پاکستانی پوج ءِ پانگسے ءِ سر ءَ اُرش کُتگ ، سرمچاراں رخشان کور ءَ نوک جوڈ بوتگیں پانگِس ءِ سر ءَ وتکاریں سلاھاں گوں اُرش کُتگ ءُ چہ گرنیڈ لانچر ءَ گولا ھم جتگ، اُرش ءِ آسر ءَ کم چہ کم دو کارمند زدگ بوتگ انت ءُ آھاں بازیں مالی تاوان ءِ دیمپانی کنگ کپتگ –

جارکش ءِ رِد ءَ اُرش ءَ پد پروش وارتگیں دژمن کارمنداں بیست ملٹ ءَ تاں کورکاؤ تیرگواری کتگ ءُ سرویلنس ڈرون کارمرز کتگ بلے بلوچ سرمچار جوانیں جنگی رپک ءُ ھنراں وش ءُ سلامتی چہ جنگ جاہ ءَ در اتکگ ءُ اوتاک ءَ سر بوتگ انت –

بی ایل اے ءِ جارکش جیئند بلوچ ءَ دیمتر ءَ وتی درشان ءِ تہ ءَ گوشتگ کہ پنجگور ءِ دمگ گچک ءَ گوستگیں روچ ءَ بی ایل اے ءِ سرمچاراں دزگیر کُتگیں شوکت ء مولا بخش مرگ ءِ شزائے سر ءَ امل کنان ءَ آ تیر جتگ ءُ کشتگ –

جارکش ءِ رِد ءَ شوکت ء مولا بخش جھمنند گچک دو ھپتگ ءَ ساری سرمچاراں دزگیر کتگ – اے مرد ءَ سال دوھزار بیست ءَ پوج ءِ دیم ءَ سلاہ دور داتگ انت ءُ لگور بوتگ وھدیکہ پدا رند ءَ ھماھانی گوشگ ءِ پد ءَ چاریگری کنگ ءَ بوتگ –

جیئند ءِ رِد ءَ شوکت ءَ جست ءُ پُرس ءِ میان ءَ دپ ءِ وت منّ اِتگ کہ دژمن پوج ءِ گوشگ ءِ پد ءَ آئی ءَ بلوچ جھدکارانی بگیری ءَ کار کتگ، جھد کارانی راہ ءِ پیشدارگ ءُ آھانی چاریگی کتگ وھدیکہ گچک ءُ سولیر ءَ بوتگیں لشکر کشیاں ھم دژمن پوج ءِ کمک کار بوتگ –

جارکش ءِ رِد ءَ اے مرد ءَ دپ ءِ وت منّ اِتگ کہ لشکر کشی ءِ میان ءَ دمگی مردمانی آوار جنی، آھانی گِسانی ماندارگ ءُ در پہ در کنگ ءَ پاکستانی پوج ءِ گوم ءَ ھوار بوتگ –

جارکش ءَ گوشتگ کہ مولا بخش چاریگری ءِ سر ءَ بلوچ راجی آمیدگس ءَ آ مرگ ءِ شزا داتگ کہ گوستگیں روچ ءَ آئی ءِ سر ءَ امل کنگ بوتگ –

جارکش ءَ گوشتگ کہ بلوچ لبریشن آرمی زورگیریں پاکستانی پوج ءِ سرجمی ءَ در آیگ ءَ تاں وتی اُرشاں برجاہ داریت – ما اے گپ ءَ تچک کنیں کہ دژمن ءِ گوشگ ءِ پد ءَ کار کنوکیں مردم مئے نشانگ انت ءُ زوت آ جنگ بنت –

لیور پول ءُ مانچسٹر یونائیٹیڈ مروچی انفیلڈ پَٹ ءَ وتی پریمیر لیگ گوازی ءِ ھاترءَ دیم پہ دیم بیتگ اَنت، اے گوازی لیورپول ءَ ھپت گول داتگ ءُ وتی نام ءَ کُتگ۔

لیورپول ءُ مانچسٹر یونائٹیڈ ءِ نیام ءَ برجاھیں گوازی ءَ لیور پول ءَ ھپت گول داتگ، وھدیکہ مانچسٹر یونائٹیڈ ءَ ھچ گول آورت نہ کُتگ ءُ پروش وارتگ اِش۔ 

لیورپول ءِ نیمگ ءَ کوڈی گاکپو، ڈارون نونِز ءُ محمد صلاح ءَ دو دو گول آورتگ وھدیکہ روبرٹو فیرمینو ءَ یک گول ءِ آورتگ ءُ مانچسٹر یونائٹیڈ پروش داتگ۔ 

دومی نیمگ ءَ پریمیر لیگ ءِ دگہ یک لئیب ءِ نوٹینگھم فورسٹ ءُ ایورٹن ءِ نیام ءَ برجاہ بیتگ کہ دو دو گولاں بروبر بیتگ۔

ایورٹن ءُ نوٹینگھم فورسٹ ءِ نیام ءَ لئیب ءَ چہ ایورٹن ءِ نیمگ ءَ اولی گول ڈیمرے گرے ءَ پینالٹی ءِ سرءَ آورتگ وھدیکہ دومی گول ابدلائے ڈوشور ءَ داتگ۔ وھدیکہ نوٹینگھم فورسٹ ءِ نیمگ ءَ دوھیں گول برینن جانسن  ءَ آورتگ اَنت ءُ لئیب دو دو ءِ برابری ءَ آسر بیتگ۔

بلوچستان ءِ جتاجتائیں دمگ تربت ، کولواہ ، آواران ءُ بلیدہ ءَ پاکستانی پوج ءِ سر ءَ سلاہ بندیں مردماں اُرش کتگ ءُ دومی نیمگ ءَ اے اُرشانی بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ زرتگ اَنت-

بلوچستان لبریشن فرنٹ ءِ سرمچاراں آواران، گیشکور ءَ زورگریں لشکر ءِ گشتی ٹولی سر ءَ اُرش کتگ چریشی ءِ آسر ءَ چار کارندہ مرتگ ءُ دو ٹپی بیتگ اَنت، بلیدہ ءَ پوج چوکی سر ءَ اُرش کتگ-

میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں آواران ءِ دمگ گیشکور، سُونڈم ءَ دُژمنیں پاکستانی پوج ءِ ھشت پرپٹانی ءُ پیادگ گشتی ٹولی سر ءَ پیسر ءَ بستگ مزنیں ءُ نوکیں سلاھاں چہ اُرش کتگ چریشی ءِ آسر ءَ چار کارندہ مرتگ ءُ دو ٹپی بیتگ اَنت-

جارکش ءَ دیمتر ءَ گوشتگ کہ چار مارچ ءِ شپ ءِ دہ ءُ بیست ملٹ ءَ سرمچاراں بلیدہ ءِ دمگ گلی ءَ لشکر ءِ چوکی سر ءَ اے ون گولھاں چہ اُرش کتگ، گولہ چوکی ءِ تہ ءَ کپتگ اَنت چریشی ءِ آسر ءَ دُژمن ءَ جانی ءُ مالی تاوان چست کنگ کپتگ-

دگہ درشانے ءِ تہ ءَ بی ایل ایف ءَ گوشتگ کہ شمبے چار مارچ ءَ ھشت چل ملٹ ءَ کیچ ءِ بُنجاھی شھر تربت انٹرنیشنل ایئرپورٹ ءِ بُنجاھی گیٹ سر ءَ ائیرپورٹ ءِ پھازوکی ءِ ھاتر ءَ برجاھیں چیک پوسٹ ءُ نزیک ءَ برجاھیں سنگر ءِ سر ءَ یکیں وھد ءَ مزنیں ءُ وتکاریں سلاھاں گوں اُرش کتگ، چیک پوسٹ ءُ سنگر ءَ ساڑی ئیں دو کارندہ ٹپی بیتگ اَنت-

ھمے وڑ کیچ ءِ دمگ کولواہ، جِرک ءَ برجاھیں پوجی بُنجل سر ءَ سرمچاراں چار مارچ ءَ شپ ءِ نُھ ءَ ایل ایم جی راکٹ ءُ نوکیں سلاھاں چہ اُرش کتگ دُژمنیں پوج جانی ءُ مالی تاوان ءِ دیمپان کتگ-

جارکش ءَ گوشتگ بلوچستان لبریشن فرنٹ اے اُرشانی زمہ واریاں منّ اِیت ءُ زورگپتگیں بلوچستان ءِ وتواجھی ءَ تاں وتی اُرشاں برجاہ دار اِیت-

کَے گوں کَے ءَ جنگ ءَ اِنت؟

نبشتہ کار: آئیشہ بلوچ

دی بلوچستان پوسٹ

وھدیکہ یک مُھکمیں مُلکے ءِ جاور زرکاری(Economy)، روزگار، جنگی ءُ سیاسی ھساب ءَ ھراب بنت گُڑا اود ءَ اُلسی جنگے ودی بیت کہ انگریزی ءَ سول وار ئِے گْوش اَنت۔ بزانکہ اود ءَ مُلک ءِ سِلکاریں سیاسی مردم وت ماں وت جنگانی دیمپانی بنت ءُ بیرانی تھنا لس مھلوک ءِ بیت، ھمے راج ءِ شھر تباہ بنت۔ اگاں اے وڑیں مُلکے یک ابرمی راجے بیت گُڑا وت ماں وتیں جنگ ءَ پد ھم اے وڑیں مُلک وتی ھستی ءَ برجاہ دار اَنت، اگاں بے ابرمی مُلکے، بزانکہ وتگڑ ءُ دْروگیں ملکے بیت، یک راجے ءِ بُنیات مہ بیت گُڑا اے وڑیں مُلک پْروش اَنت انچوشکہ 1971 بنگالی راج ءَ وت ءَ چہ پنجابی ءُ سندھیاں آزات کنائینت:- پاکستان پْروشت۔ بزانکہ پاکستان ناں 1970 ءَ یک راجے نہ اَت ءُ ناں کہ انیگیں وھد ءَ یک راجے بلکیں یک کوڑائیں استانے(Federation) کہ آئی ءِ تہ ءَ سندھی، پنجابی، بلوچ ءُ پشتو ءِ وڑیں دِگہ بازیں راجے زورانسری ھوار اَنت۔

اگاں مُلک ءِ لس مھلوک یکیں راجے ئیگ اَنت گُڑا بے روزگاری، زرکاری جیڑہ ، گِرانبھائی ءُ سْیاسی کُشت ءُ کوشانی آماچیں راج وتی مُلک ءِ زالمیں ھُکمران ءُ سرکار ءِ ھلاپ ءَ آشوبے ودی کن اَنت۔ ھر وڑیں کُربانیاں دے اَنت بلے ایشانی مُلک وَ نہ پْروش اَنت انچوشکہ نوکیں دور ءِ اَرب آشوب کہ چہ ایشی ءَ یمن، سوریا، ایراک، لیبیا، مِسر ءُ تیونس ءِ وڑیں بازیں اَرب مُلک کہ اود ءَ ھرکس وت ماں وت جنگ ءَ اِنت بلے انگت مُلک وَ نہ پْروشتگ اَنت۔ دومی بے روزگاری ءُ بدیں زرکاری ءِ سبب ءَ 2022 ءِ تُرکمانستان ءُ سری لنکا ءِ آشوب کہ لس مھلوک پہ وتی ھک ءَ پاد آتک ءُ وتی نابودیں سرکاراں پْروش دات اش۔

البت مُلکانی اے وڑیں جنگ ءُ جاور پہ گُلام ءُ ایردستیں راجاں شریں موھے ودی کن اَنت کہ وتی آزاتی ءَ پچ بہ گِر اَنت۔ اگاں ما دُنیا ءِ گْوست ءَ چمشانکے دے ایں کہ گُڑا مارا اے وڑیں بازیں درور گِندگ ءَ کیت کہ مُلکانی بدیں ھالاتانی سوب ءَ آزاتی لوٹوکیں راجاں آزاتی رس اِتگ انچوشکہ 1991-92 ھلیج وار(ایراک ءُ امریکہ ءِ جنگ) ءَ ایراکی پوج تباہ کُتگ چریشی ءَ ایراکی کُردستان ءِ پشمرگا گْوریلہ لشکر ءَ وتی دمگ دستگیگ کُتگ اَنت پد ءَ 2003 ءِ امریکہ ءُ ایراک ءِ جنگ ءَ سدام ءِ سروگانیں ایراکی لشکر ھلاس بوتگ ءُ ایراکی کُردستان آجو بوت۔ ھمے وڑ ءَ اگاں ما یمن ءِ سول وار ءَ چمشانکے بدے ایں کہ اود ءَ آلکائدہ اَربین پینسلہ، ساؤتھرن ٹرانزیشنل کاونسل، ھوتی ءُ سھودی اَرب ءِ پُلہ مُرزیں یمن ءِ لشکر ءَ ھوار دِگہ بازیں گروپے وت ماں وت جنگ ءَ اَنت بلے آسودگی ھوتیاں رس اِتگ۔ ھمے جاور سوریا ھم ھست اَنت کہ سوریا یاگی ئیں لشکر کہ پری سیرین آرمی ءِ نام ءَ زانگ بیت، دِگہ دائیش، جبائت النُسرا، الکائدہ، پتھ الشام، سوریا ءِ سرکاری لشکر ءِ وت ماں وتیں جنگ ءَ سوریائی کُرداں آجوئی ءِ موہ داتگ کہ انی آزات ھیال ءُ راجمستری ئیں سوریائی کُرد راجی لشکر YPG ءَ وتی کُردستان ءِ دمگ ءُ شھر دستیگ کُتگ اَنت۔ مُلکانی اے وڑیں دْراجیں جنگاں انگریزی ءَ WHO IS FIGHTING WHOM? گْوش اَنت ءُ بلوچی ءَ تو اے وڑیں مُلکی جاورھالاں “کَے گوں کَے ءَ جنگ ءَ اِنت؟” ءِ سرھالے دات کن ئے۔

اگاں ما پاکستان ءِ ھستیں وھد ءِ جاوراں ھورت بچار ایں یا بوان ایں گُڑا مارا لگ ایت پاکستان ھم ھمے وڑیں “کَے گوں کَے ءَ جنگ ءَ اِنت؟” ءِ نادْراھی ءِ آماچ اِنت۔ پاکستان ءِ ھالات ھم چہ سوریا، ایمن ءُ وتی دیریگیں 1971 ءِ ھالاتاں جُتا نہ اِنت۔ وھدیکہ امریکہ چہ اوگانستان ءَ در کپت ءُ شُت پاکستان ءِ ایکونومی یکشل ءَ کپان اِنت، 139 بلین ڈالر ءِ وامداریں پاکستان ءِ اسٹیٹ بینک ءِ تہ ءَ تھنا 3.1 بلین ڈالر پشکپتگ۔ 1 ڈالر ءِ ریٹ 290 ءُ 3.5 پاکستانی گوں 1 انڈین روپے ءَ برابر اِنت۔ پاکستان ءِ تہ ءَ زرکاری جیڑہ ، بےروزگاری ءُ گِرانبھائی ءِ بُندری سبب بلوچستان ءُ پشتونستان ءِ تہ ءَ گوریلہ جنگ اَنت کہ اود ءَ پاکستانی پوج وت ءَ کُشارینگ ءَ اِنت۔ اگاں گوریلہ جنگ سوت روس ءُ امریکہ ءَ گوں نیٹو ءِ ھمراھی ءَ برداشت کُت نہ کُت گُڑا اے پِنڈُوکیں پاکستان چون برداشت ئِے کنت؟ اگاں ما بچار ایں مرچاں پنجابی ءِ سْیاستدان(پی ٹی آئی ءُ نون لیگ) وت ماں وت ھر روچ زاہ ءُ بد کنان اَنت، پنجابی وت ماں وت ءَ راجدْروھی ءِ تُھمت جنَگ ءَ اَنت۔ یک نیمگے ءَ پاکستانی مھلوک ھاس پنجابی گوں وتی پوج ءَ نپرت کنت، پرچا کہ اولی بر اِنت کمر باجوہ ءَ پوج پنجابیانی تہ ءَ تباہ کُت۔ دومی نیمگے ءَ ٹی ٹی پی ءُ بلوچ سرمچارانی گوریلہ جنگ دیمروی کنان اِنت۔ پاکستانی پوج وت بکڑ اِنت کہ گوں ٹی ٹی پی ءُ بلوچاں سُھل ءُ تران(مزاکرات) بکن آں یا جنگی آپریشن؟ اگاں جنگ بہ کن آں گُڑا ھالیگیں لاپ ءَ جنگ وَ نہ بیت۔ انی امریکہ ءُ نیٹو ءِ ڈالر ءُ دِگہ جنگی کُمک نہ رس ایت۔ اگاں امریکہ ءُ نیٹو ءَ اوگانستان ءِ تہ ءَ ایمنی نیاؤرتگ گُڑا چین ھم سِلکاریں پاکستان ءِ تہ ءَ وتی زراں زیان کنگ ءَ اِنت۔

ٹی ٹی پی ءِ جنگ گوں پاکستانی پوج ءُ پاکستان ءِ تہ ءَ دْروگیں راجمستری(جمہوریت) ءَ اِنت کہ آئی ءِ تہ ءَ پی پی پی، ن-لیگ، مُلا پزل الرھمان ءِ مُناپکی ءُ پی ٹی آئی شمار اَنت۔ اگاں گِند ئے اے سْیاسی پارٹی گوں پوج ءَ ھوار وت ماں وت ھم وش نہ اَنت۔ ٹی ٹی پی وتی سسا(نظریات) ءِ رِد ءَ پاکستانی پوج ءَ پْروش دیگ ءُ پاکستان ءِ تہ ءَ راجمستری ءِ ھلاسی ءَ پد اسلامی شری رھبنداں رواج دیگ لوٹ ایت انچوشکہ اوگانستان ءِ تہ ءَ 2021 ءَ بوتگ۔ اسلامی رھبندانی آسر ءَ پاکستان کتر، ملائیشا ءُ سھودی اَرب ءِ وڑ ءَ بے سِلکار بیت ءُ دیمروی بکنت۔ بزانکہ ٹی ٹی پی پاکستان ءِ واست ءَ جنگ ءَ اِنت۔ بلوچ لبریشن آرمی ءُ دگہ بلوچ سرمچارانی گل پاکستان ءِ پْروش ءُ بلوچستان ءِ آجوئی لوٹ اَنت۔ پی پی پی گْوش ایت اگاں پاکستان ءِ تہ ءَ مئے دْروگیں راجمستری نہ بوتگ گُڑا سندھودیش جوڑ بیت۔

اگاں مرچیگیں پاکستان ءِ ھالاتاں کَسے ھورت چاری بکنت گُڑا لگ ایت کہ پاکستان چہ 1971 ءَ پد دومی رند ءَ ھم زوت ءُ الم پْروش ایت۔ گُڑا زاناں بلوچ راج ءِ رھشُون ءُ بلوچ وانِندہ پہ وتی راجی آجوئی ءَ تیار اَنت۔ بلوچ راجی لشکر بلوچستان ءِ تہ ءَ وتی دمگ شھرانی دستیگ کنگ ءَ تیار اَنت انچوشکہ کُرد ءُ بنگالی راجاں وتی وتن دستیگ کُُت اَنت۔ باید اِنت بلوچ راج چہ پاکستان ءِ اے “کَے گوں کَے ءَ جنگ ءَ اِنت؟” ءِ ھالاتاں پائدگ بہ زُور ایت کہ پہ بلوچستان ءِ آجوئی ءَ اے پہ راج ءَ یک شریں موھے۔ بلوچ راج شالا یکمُشت ءُ تپاک بات، بلوچستان شالا آجو بات، راجمستری بلوچستان ءُ بلوچ شالا دیمروی بکنات۔ شالا انچوش بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

لبزانکی ٹِک ءُ نِشان

نبشتہ کار: رُکسار بلوچ ءُ شازیہ بلوچ

دی بلوچستان پوسٹ

توری دُنیا ءِ ھر وڑیں زُبانے ءِ نیکراھی، میڈیکل سائنس، انجینئرنگ ٹیکنولوجی، سْیاسی ءُ جنگی کتابے بہ بیت یا توری روتاک، ماھتاک یا توری ھالکاری تندجاھے(News Website) ءِ نبشتانک، نمدی ءُ کِسھے بیت۔ بزانکہ ایشانی تہ ءَ لبزانکی ٹِک ءُ نشان لازُم کارمرز بنت۔ ھر وھدے ما کتاب، روتاک، ھالتاک ءُ نبشتانکے چیزے وان ایں گُڑا باید اِنت ما اے لبزانکی ٹک ءُ نشان ھم دلگوش بہ کن ایں ءُ بزان ایں کہ اے کُجام کُجام ھالاتاں وتی راستیں جاھاں کارمرز بنت۔ ما تچک ءَ بزان ایں کہ بے لبزانکی ٹِک ءُ نشانانی زانگ ءَ ما شریں وانِندہ، راجی زُبان ءِ جُھدکار نبشتہ کار ءُ شائِر جوڑ نہ بہ ایں پمیشکا باید اِنت ما اے لبزانکی ٹِک ءُ نشاناں ھم بزان ایں کہ ایشانی لھتیں سرپدی ایش اِنت۔

جُستی ءِ نشان: اے پہ جُست ءَ کارمرز بیت ءُ چیدگ ئِے ایش اِنت(؟) تو چے ورگ ءَ ئے؟ زاناں شما وتی زُبان ءَ وانگ ءُ زانگ لوٹ اِت؟-

ھلاسی ءِ نشان: ھر وھدیکہ گالرِد ھلاس بیت گُڑا گالرِد ءِ گُڈسر ءَ کارمرز بیت۔ چیدگ ئِے ایش اِنت (۔)
من بلوچی درونتاں وانان ءَ وت بلوچی دربر آں۔ ما وتی بزگیں راج ءَ وانین ایں۔ گْوشتینی ءِ نشان: چہ دپ ءَ کَشتگیں توار بے رَد ءُ بدل ءَ نبیسّگ بہ بنت، چیدگ (“۔۔۔۔۔”)

نودربر ءَ گْوشت “اُستاد، من زی نادْراہ ات آں پمیشکا چکاس ءِ تیاری نہ کِت” اُستاد ءَ درائینت “شر اِنت، چد ءُ پد مُدام وتی چکاس ءِ تیاری ءَ بہ کن ئے”
ورداسی: اے گالانی ھوار نبیسّگ ءُ یکشلیں گپ ءُ رپ ءَ کارمرز بیت۔ چیدگ ئِے ایش اِنت (:)

مرد : تو ھال کن کہ زاھگ چون اِنت؟ درمان ئِے وارتگ اَنت یا اِنّا؟جن: ھو، زاھگ وش تب ءُ جان دْراہ اِنت، انی وانگجاہ ءَ روگ ءَ اِنت۔ مرد:ھُدا ءِ شُکر اِنت، ھُدا مُدام وش تب ءُ سلامت ئِے بکنات۔

جتائی ءِ نشان: چہ دو ءَ گیشتریں چیزانی جتا کنگ ءَ کارمرز بیت۔ چیدگ ئِے ایش اِنت (،) من پہ وتی گِس ءَ ٹی وی یے، گُدشُودی مشینے، گْواتوے، یک استری یے ءُ جوسرے گپتگ۔ تو بلوچی درونت، زُبان دوستی نبشتانک ءُ بلوچی کِسھاں وانان کن گُڑا وت زبر بہ ئے۔

ششیم: اے پہ سرپدی ءَ کارمرز بیت۔ چیدگ ئِے ایش اِنت () مئے دمگ ءِ لداں ترا شپچر(Bat)، مزار ءُ روباه(Fox) ءِ وڑیں جنگلی ساھدار باز رس ایت۔ھبکّھی ءِ نشان: پہ ھیرانی ءَ کارمرز بیت۔ چیدگ ئِے ایش اِنت( !) ھو، مرچی وَ لیب اِنت! واہ تو بلوچی راست نبیسّگ ءَ زبر ئے!-

ھمے پیم ءَ دِگہ بازیں لبزانکی ٹِک ءُ نشان ھست کہ ما ھمیشاں چہ کتاب ءُ دِگہ نبشتانکانی وانگ ءَ وت ھیل کن ایں۔ چہ ایشی ءَ ابید مارا وتی بلوچی نبشتانکانی تہ ءَ بھرگ(Paragraph) ءُ دِگہ “البت، پمیشکا، چمیشکا، چوناھا، گِند ئے ءُ بلے” ءِ وڑیں لبزانی ھم ھیالداری کنگ لوٹ ایت کہ اے شریں لبز وتی راستیں جاھاں کارمرز بہ بنت پرچاکہ اے وڑیں چیزانی کارمرزی مئے نبشتانکاں براھدار کن اَنت۔

ما اُمیت کن ایں کہ شما چہ مئے اے نبشتانک ءَ بازیں لبزانکی چیزے دربُرتگ۔ چد ءُ پد وتی زُبان دوستی ءُ راجدوستی نبشتانک ءُ آزمانکانی نبیسّگ اے لبزانکی ٹِک ءُ نشاناں الم کارمرز کن اِت۔

شالا راجی زُبان ءِ جھدکار ءُ ھزمتکار بات اِت، بلوچستان ءُ بلوچی شالا دیمروی بکنات۔ شالا انچوش بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ تیابدپی شھر گوادر ءَ پاکستانی پوج ءِ سر ءَ ناشناسیں مردماں بمب اُرشے ءِ نشانگ کتگ-

گیشیں ھالانی رد ءَ ناشناسیں مردماں گوادر ءِ دمگ نلینٹ زیروپوائنٹ ءِ نزیک ءَ کوسٹل ھائی وے پھل ھما وھد ءَ نشانگ کنگ بیتگ کہ پوجی گاڑی گوزگ ءَ بیتگ-

دمگی مردمانی رد ءَ بمب اُرش ءَ پھل ءُ یک گاڑی یے تباہ بیتگ، گاڑی ءَ سواریں کارندھانی بیرانیانی گمان کنگ بوگ ءَ اِنت-

دمگی مردمانی گوشگ اِنت اُرش ءَ پد گوادر ءِ شھر ءَ پوجی کاروان اُرشجاہ ءَ روگ ءَ گندگ بیتگ اَنت ءُ کاروان ءَ ایمبولینس ھم ھوار بیتگ اَنت-

زانگ بہ بیت اے دمگ ءَ بلوچ آجوئی لوٹوکیں سلاہ بندیں گل پرکار اَنت بلے داں انگت ءَ اے اُرش ءِ زمہ واری ھچ گل ءَ پہ وت ءَ نہ زرتگ-

زانگ بہ بیت گوستگیں روچ ءَ بہ گر داں انیگ ءَ پنجگور، ترتب، کولواہ ءُ دگہ دگہ جاھاں پوج ءِ سر ءَ اُرش بیتگ اَنت-