TBP Balochi

آسٹریلیا ءِ پولیس ءِ رد ءَ ریاست نیو ساؤتھ ویلز ءَ آروس ءَ واتر روکین یک بسے وئیل ءِ آماچ بیتگ چریشی ءَ دَہ مردم بیران بیتگ اَنت –

فرانسیسی ھال سرکنوکیں ادارہ اے ایف پی ءِ رد ءَ اے وئیل شپ ءَ پیش اتکگ بیتگ کہ بس دگ ءِ کش ءَ کپوک بیتگ ءُ اود ءَ ریسکیو کارمند گیشنگ ءَ دزبند بیتگ اَنت-

پولیس ءِ گوشگ اِنت کہ بیرانیانی کساس گیش بوت کن اَنت پرچاکہ بیست ءُ پنچ مردم نادراہ جاہ ءَ برگ بیتگ اَنت ءُ کہ ایشانی توک ءَ دو مردم ھیلی کاپٹر ءِ سر ءَ نادراہ جاہ ءَ برگ بیتگ انت کہ آیانی جاور ناگیگ اَنت-

میڈیا رپورٹ ءِ رد ءَ زانگ بیت اِنت اے وئیل گیتلو ءِ سبب ءُ پیش اتکگ بیتگ کہ چریشی ءِ سبب ءَ اسٹنٹ پولیس کمشنر ٹریسی چیپ مین ءَ گوشتگ کہ داں انگت ءَ سرپدی نہ بیتگ کہ بس ءَ زھگ ھم جاڑیگ بیتگ اَنت-

آئی ءَ گوشتگ ھسپتال ءَ بس ءِ ڈرائیور ءِ چار ءُ ٹپاس بوگ ءَ اِنت ءُ آ دزگیری ءِ تہ ءَ اِنت –

پولیس آفیسر ءَ رسانکدراں گوں گوشتگ کہ یک مساپر یک آروسی مراگشے ءَ واتر روگ ءَ بیتگ اَنت –

اسٹریلیا ءِ سروزیر انتھونی البانیز ءَ گوشتگ کہ اے وئیل ھنٹر ریجن ءَ بیتگ ءُ ناوشیں وئیل ءَ بیران بیتگیں مردمانی کھولانی گماں برابری ءَ گوں ھوار اِنت-

ترکمانستان ءِ سروک ءَ تمباک ءِ ھلاپ ءَ یک بے مٹیں مھمے ءِ بندات کتگ – چریشی ءَ واکداراناں دو سال ءِ میان ءَ تمباک ءِ ھلاس کنگ ءِ ھمک داتگ-

اے ایف پی نیوز ءِ رد ءَ ترکمانستان ءِ سروک سردار بردی مخمیدوف ءَ گوشتگ کہ تمباک کشی ءِ ھلاپ ءَ بیوکیں جد ءُ جھد ءَ کس ناسرپد مہ بیت اِنت-

سرجمیں ڈیھ ءَ تمباک ءِ زرکاری ءِ گیرکانونی شیشہ پائپ ءُ الیکٹرک سگریٹ ءَ ھوار اے دراھیں چیزانی بھا کنگ ءِ ھلاپ ءَ کریک ڈاون بیت اِنت-

سروک مخمیدوف ءَ گوشتگ کہ مئے ریاست ءُ تمباک ءِ ھلاپ ءَ مزنیں زرمبشت جبینگ بیت اِنت دانکہ سرجمیں دنیا ابید تمباک ءَ ساہ کش ات بہ کن انت ءُ کمک کت بہ کن اَنت-

زانگ بہ بیت ترکمانستان ءَ تمباک کشی ءِ درگت ءَ ترندیں جار ءُ مھلوکی مُچیانی تہ ءَ تمباک ءِ سر ءَ ترندیں بندش ھست اَنت ءُ ایشانی توک ءَ دو کساس دھکاں بردی مخمیدوف ءِ کھول ءِ وھد ءِ سرکار ءَ اِنت-

چریشی ءَ پیسر سردار بردی مخمیدوف ءَ گوستگیں سال ءَ آئی ءِ پس گربنگولی بردی مخمیدوف ءَ واک دست ءَ داتگ بیتگ ات کہ آ ایشی ءَ پیش دنتانانی ڈاکٹر بیتگ نی آ لوٹ ایت اِنت کہ دوھزار ءُ بیست ءُ پنچ ءَ داں آئی ءِ ڈیھ تمباک ءَ چہ پاک ءُ پلگار بہ بیت اِنت-

ترکمانستان ءِ سرکاری ٹیلی وژن ءَ ھال شنگ کتگ بیتگ کہ ڈیھ ءِ سیمسراں تمباک شیشہ ءُ الیکٹرونک سگریٹ ءِ باپاری کنگ ءِ بھتام ءَ کساس بیست مردم دزگیر کنگ بیتگ اَنت-

سروک سردار بردی مخمیدوف ءَ گوشتگ کہ ترکمانستان ءَ مھکمہ ءِ کسٹمز ءِ سروک ءُ پرز ءِ پیلو کنگ ءُ آئی ءِ کرد ءِ سر ءَ پھری کتگ-

گوشگ بیتگ کہ بردی مخمیدوف کلانیں ارکاداگ ( پھزداری شان) ءِ نام ءَ زانگ بیت اِنت وتی ریٹائرمنٹ ءِ بوگ ءَ ابید ھم وتی زھگ سردار مخمیدوف ءِ گون ءَ ھمدست بیتگ ءُ آیوکیں باندات ءِ واستا جیڑگ ءَ اِنت –

ترکمانستان ءَ یک شھرے، یک ٹی وی چینلے، یک روتاکے ءُ یک فٹبال ٹیمے آئی ءِ نام ءِ سر ءَ انت-

سربوتگیں ھالانی رِد ءَ بلوچستان ءِ دمگ پنجگور ءُ دکی ءَ دو مردمی جون دست کپتگ انت کہ پہ چار ٹپاس ءَ نادراھجاہ ءَ سرکنگ بوتگ انت –

گیشیں ھالانی رِد ءَ پنجگور ءِ دمگ سراوان ءَ یک مردمے ءِ جون ءِ دست کپتگ کہ پولیس ءَ جون دست گپتگ ءُ نادراھجاہ ءَ سرکتگ –

دست کپتگیں جون ءِ پجار شاھمیر ء یاسین جھمنند کلیری پروم ءِ نام ءَ بوتگ –

پولیس ءِ رِد ءَ جون کَنڈے ءَ دست کپتگ، بنداتی چارٹپاس ءِ رد ءَ اے مرد نشھی ءِ بوتگ بلے پولیس گیشیں پٹ پول کنگ ءَ انت ـ

دومی نیمگ دکی ءِ دمگ تلاو دامان ءَ ھم یک جون ءِ دست کپتگ کہ تیر جنگ ءُ کُشگ بوتگ –

پولیس ءِ رِد ءَ آئی ءِ پجار شراف الدین غوری لونی ءِ نام ءَ بوتگ کہ تیر جنگ ءُ کشگ بوتگ –

شراف الدین ءِ زمینی جیڑھے ءِ ھم بوتگ – جون دکی نادراھجاہ ءَ سرکنگ بوتگ کہ اودا اژدری چار ءُ ٹپاس ءَ پد جون کھول ءِ دست ءَ دیگ بوتگ –

بلوچ آجوئی آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام ءَ وتی آفیشل ٹیلی گرام چینل “آشوب” ءَ شنگ کرتگیں درشان ءِ تہ ءَ گوشتگ کہ مئے ءِ سرمچاراں نھ جون ءَ تربت، ءُ دھ جون ءَ ماں بلیدہ ءَ پاکستانی کارمند نشانگ کرتگ اَنت – اُرشاں یک کارمندے مُرتگ –

جارکش میجر گوھرام بلوچ ءِ رِد ءَ دھ جون ءَ میناز بُلیدہ ءَ مئے سرمچاراں بلوچستان ءِ پیشیگیں وزیر ءُ انوگیں اسمبلی ءِ باسک ظہور بُلیدھی ءِ زامات کیوم ء سعید ءَ تیرگواری کرتگ ءُ کشتگ کہ آ پاکستانی پوج ءُ چیریں ادارھانی ھمراھی ءَ بلوچ راج ءُ راجی زْرمبشت ءِ بگیری ءَ کار ءَ بوتگ- آئی ءَ باز رند ءَ سرمچارانی راہ ءِ بندگ ءُ پیش دارگ ءَ پوج ءِ ھمراہ بوتگ چریشاں اَبید آئی ءَ سیمسر ءَ ٹوکن ءِ نام ءَ مردم رد داتگءُ پہ پوج ءَ راشن برگ ءِ کار ءَ ھم پرماتگ انت –

میجر ءِ رِد ءَ کیوم ء سئید ءَ پاکستانی پوج ءِ کمک ءَ یک چئین ءِ جتگ کہ اود ءَ چہ سیمسر ءَ رئوکیں درسیں گاڑیاں ملام گپتگ ءُ اشی ءِ یک بھرے پوج ءُ یک بھرے وتی ٹولیانی سر ءَ بھر ءُ بانگ کتگ انت-

جارکش ءِ رِد ءَ کیوم بیست ءُ شش اپریل ءَ سرمچارانی دست ءَ کشگ بیتگیں ایم آئی ءِ سروک ارشد نذیر ءِ نزیکیں سنگت ءُ کمک کنوکانی تہ ءَ ھوار بوتگ آئی ءَ پہ ارشد نذیر ءِ نیٹ ورک ءَ بُلیدہ ءَ ھوار کیچ ءِ جتائیں ھنداں پہ چاریگی ءَ مردم زْرتگ یک ناشریں میارباری یے کرتگ –

آئی ءَ گوشتگ کہ ھمے پاکستانی کارمند ءَ گوستگیں سال ءِ شانزہ نومبر ءَ ریکو بلیدہ ءَ طاہر ء عطا محمد ءِ گس ءَ اُرش کرتگ تیرگواری کرتگ ءُ گس مانداشتگ اَنت –

جارکش میجر گوھرام بلوچ ءَ دیمتر ءَ گوشتگ کہ نھ جون ءَ سرمچاراں تربت ءَ پاکستانی کارمند یاسر بھرام ءِ دوار ءَ دز بمب اُرشے کرتگ ، پیش ءَ ھم ایشی ءِ سر ءَ اُرش کنگ بوتگ –

جارکش ءَ گوشتگ کہ اے چیریں گپے نہ اِنت کہ پاکستانی پوج بلوچستان ءَ چکچینی ءَ ھوار چنچو میارباری کنگ ءَ اِنت۔ اے میارباریں ادارھانی کمک کنگ اے میارباریاں یک کچ ءَ شریداری اِنت ءُ ایشانی سزا دیگ میان استمانی کانود ءِ رد ءَ ھک اِنت – اگاں دیم ءَ کسے ھمے میارباری ءَ بہ کنت آئی ءِ سزا ھم ھمے بیت انت –

کوھلو: ٹیل ءُ گیس شوھاز کنوکیں کمپنی ءِ سر ءَ بوتگیں اُرش ءِ زمّہ واری بلوچ آجوئی لوٹوکیں سلاہ بندیں گل یو بی اے ءَ منّ اِتگ

بلوچ آجوئی لوٹوکیں سلاہ بندیں گل یونائیٹڈ بلوچ آرمی ءِ جارکش مزار بلوچ ءَ ماں رسانکدر ءَ وتی شنگ کرتگیں درشانے تہءَ گوشتگ کہ مئے سرمچاراں مروچی ادار ھپت ءَ کوھلو ءِ دمگ ماوند ءَ ٹیل ءُ گیس شوھاز کنوکیں کمپنی ماڑی پٹرولیم کمپنی لمیٹڈ MPCL سر ءَ BM12 گولہ آس داتگ کہ اے اُرش ءِ آسر ءَ بازیں کارمند ءِ مُرتگ ءُ زدگ بوتگ انت –

جارکش ءَ گوشتگ کہ درسیں لٹ پُل کنوکیں کمپنی ءُ آھانی ایجنٹ مئے نشانگ ءَ انت، مئے اُرش بلوچستان ءِ آجوئی ءَ تاں برجاہ مان انت –

زورانسری آوار جنگ بوتگیں بلوچ نودربر رھشون زاکر مجید ءِ گھار پرزانہ مجید ءَ وتی برات ءِ چاردہ سال سرجم بوگ ءَ ماں نیویارک ءَ زھرشانی کنان ءَ وتی برات ءِ یل کنگ ءِ لوٹ کتگ –

آئی ءَ ماچاگردی ترامجاہ ٹویٹر اکس داتگ ءُ گوشتگ کہ مروچی ھشت جون دوھزار بیست ءُ سَے انت کہ من نیویارک آں ءُ وتی برات ءِ یل کنگ ءِ لوٹ ءَ کنگ ءَ آں – آئی ءَ گوشتگ کہ منی برات زاکر مجید ءِ ماں پاکستانی پوجی زانداناں وش ءُ سلامتی یل کنائینگے ھاتر ءَ میان استمانی ادارہ منی کمک ءَ بہ کن انت –

زانگ بہ بیت زاکر مجید ءِ یل کنائینگے ھاتر ءَ آئی ءِ کھول ءُ سیاسی ادارہ جوانی سیاسی مھم ھم چلائینتگ، زاکر مجید ءِ گھار پرزانہ مجید ءَ ماما قدیر ءِ ھمراھی ءَ بلوچستان ءَ زورانسری آوار جنگ بوتگیں سیاسی باسکانی ھاتر ءَ شال ءَ بگر تاں کراچی ءُ پدا تاں اسلام آباد ءَ دراجیں پند ھم بھر بوتگ –

زاکر مجید ءِ گھار پرزانہ مجید ءَ آئی ءِ یل کنائینگے ھاتر ءَ پُریں پنچ سالاں پریس کلب ءُ زھرشانیانی سروکی کتگ ءُ زاکر مجید ءِ مات گوستگیں چاردہ سالاں شال، کراچی ءُ اسلام آباد ءَ زھرشانی کنگ ءَ انت بلے چاردہ سالانی گوزگ ءَ پد ھم آ یل کنگ نہ بوتگ ـ

گوستگیں روچاں زاکر مجید ءِ کھول ءُ چاگردی ءُ سیاسی باسکاں بیگواھیں بلوچانی روچ ءَ شال ءُ کراچی ءَ مراگشاں ھوار زھرشانی ھم کتگ ات –

بلوچستان ءِ بنجاھی شھر شال ءَ مروچی پنچمی روچ ءَ وتی ھکانی ھاتر ءَ شدکشیں زھرشانی ءَ نشتگیں ماسٹرانی جاور نگیگ بوتگ انت –

وتی لوٹانی منارینگے ھاتر ءَ بلوچستان اسمبلی ءِ ڈن ءَ نشتگیں ماسٹرانی شدکشیں زھرشانی ءَ مروچی پنچ روچ سرجم بوتگ انت، کہ آھانی تہ ءَ یازدہ ماسٹرانی جاور نگیگ بوتگ انت –

ماسٹرانی لوٹ انت کہ اپ گریڈیشن پری میچوع انکریمنٹ ٹائم اسکیل ءُ بھرتی رِد ءَ پوسٹانی الاٹمنٹ ءِ لوٹ منگ بہ بنت – وھدیکہ سال دوھزار ءَ چہ بندیں کنوینس، میڈیکل ءَ ھوار درسیں الائونس ھم گیش کنگ بہ بنت –

ماسٹرانی رِد ءَ اگاں لوٹ منّگ نہ بوتاں گڑا وانگجاہ بند کنگ بنت – شدکشیں زھرشانی ءَ نشتگیں دوماسٹرانی جاور نگیگ بوتگ انت کہ نادراھجاہ ءَ برگ بوتگ انت – جتا جتائیں دمگاں چہ مروچی پنچ روچ انت کہ شدکشیں زھرشانی نشتگ انت – جانسلامتی واکدارانی الاج کنوکیں ٹولی ھم بنجل ءَ ساڑی نہ انت – آیانی رِد ءَ مئے شدکشیں زھرشانی تاں ھما وھد ءَ برجاہ مانیت تانکہ مئے لوٹ منگ نہ بنت –

روکپتی بلوچستان ءِ دمگ زاھدان ءَ ایرانی چیریں ادارھاں یک مردمے دزگیر کنگ ءَ پد بیگواہ کرتگ-

بیگواہ کنگ بیتگیں مردم ءِ پجار سی ءُ سَے سالیگیں عبدالعزیز درکزئی دین مھمد جھمنند شورشادی کورین زاھدان ءِ نام ءَ زانگ بیتگ-

اھوالانی رد ءَ عبدالعزیز مفتی دین مھمد امام جمعہ شورشادی ءِ پیش امام اِنت ءُ اود ءَ دینی وانگ جاھے ءِ اُستاد اِنت-

اھوالانی رد ءَ مفتی دین ھم ھما عالم دیناں ھوار اِنت کہ آ سرکار ءِ سر ءَ بگیری ایراد گرگ ءَ اَنت-

زانگ بہ روکپتی بلوچستان ءَ ایرانی سرکار ءِ سر ءَ ایراد گروکیں عالم دینانی سر ءَ ایران ءِ سرکار ءِ ترندیں نگاہ اَنت-

گوست ءَ ھم چرے چیزانی پشدر ءَ روکپتی بلوچستان ءَ بازیں ملایے چہ ڈیھ ءَ کشگ ءُ بیگواہ کنگ بیتگ اَنت-

روکپتی بلوچستان ءَ مردمانی بیگواھی درچ یکشل ءَ گیش بوان اَنت کہ اود ءَ گیشتریں مردم ھژدہ سال ءِ اُمر ءَ ھواریں ورناہ اَنت کہ گوستگیں آدینگ ءَ گرگ بیتگیں مردمانی اکساں زانگ بیت اِنت آیانی اُمر بیست ءُ پنچ سال ءُ ھژدہ سال ءِ میان ءَ اِنت –

کسہ بندات اِنت نہ کُٹ اتگ

نبشتہ کار: سیپ بلوچ

دی بلوچستان پوسٹ

کولواه! داں دیراں جیڑگ ءَ اِت آں کہ کسہ چہ کجا کُٹ ات ؟بلے لبزاں اجکہ کتگ اَت ، کہ کولواه ءَ چتور نبشتہ بہ کن آں ءُ کجا نبشتہ ئِے بہ کن آں ،؟ دائمی منی جست گوں وت ءَ اَت کہ سوهویں مردمانی دپ ءَ اگاں بلوچستان ءِ نام کیت گڑا کولواه ءِ داتگیں کربانیانی توسیپ ءُ ستاه الم بیت بلے مرچی پرچا کسہ ءَ وت ءَ سادے بست ءُ پاهو دات ءُ وت ءَ سرجم کت ،جهان ءِ چماں همے ندارگ اِنت کہ کسہ سرجم انت-

سگریٹ کُٹ اتگ اَت من پاد اتک آں ءُ دکان ءَ شتاں ، کہ سگریٹے زیراں بلے دکان ءِ واهند پجاروکے اَت ءُ گوشت ئِے هاں بئی کولواهی شما مرچاں سرخیانی تہ ءَ پدر اِنت هیر اِنت ؟ ءُ کندگ ءَ لگ ات ، تاں من پسہ نہ دات ءُ اتک آں کوٹی ءَ کہ سک گرم اَت منی پشک تر بوگ ءَ ات چہ هید ءَ من کوٹی ءَ اتک آں دریگ بست ءُ پنکا بند کُت پُرچنڈ گوں ترماس ءَ زرت ءُ نشتاں جیڑگ ءَ لگ اِت آں ، آیاں ما هما کولواه ءِ مردم اِنت یا کولواه مٹ بوتگ ، جتا جتائیں هیال دل ءَ آیگ ءَ بندات بوت انت ، اے ساهت ءَ من چہ وتی جند ءِ بالاد ءَ پُرشتگ اِت آں هنچوش گمان بوگ ءَ ات کہ یک هشکیں بُتے آں چاره ءَ اوشتاتگ آں هرچ پیمیں ندارگانی دنز منی بالاد ءَ لِچگ ءَ اَنت ءُ من ندارگاں چہ وتی چماں بند کنگ ءَ آں ،گوستانک ءَ اگاں من بہ رواں سک ٹپ ءُ ٹور باں پرچا کہ کولواه ءِ گْوستانک زدگ کنت ارواه ءَ جبین ءَ داگ دنت ءُ تیر سُمب ایت ،من وتی اهد ءِ گوستانک ءِ سر ءَ اگاں چم شانک بہ دے آں بہ چاراں داں کولواه سبز اتگ ءُ جوپاگ اِنت ، کپوتانی کوکوانی الهان ءُ کوچگ ءُ زید ءُ کهچرانی زیبائی اِنت کولواه هما زیبائیں هند بوتگ کہ کولواه ءِ جنین ءُ مرد ءِ مانا یک بوتگ گپے بزانت ایش انت کہ ، اگاں تو رهگوزی لوگے ءَ بہ شتین ئِے گسے ءَ مردینے مہ بوتیں گڑا زهگ ءُ زالبولاں ترا چو وتی گسے مردمانی رنگ زرت ءُ چاه ءُ آپ کت داں تو وتی گرم سارت کتیں ، کولواه ءَ اگاں گوریچان ءِ مالدار اتکگ اَنت همے سماه اش کتگ کہ کولواه وتی گس اِنت کہ کس مارا دار ءُ کاه کهچراں پہ نہ گوش ایت ، هرکس وش بیت کہ منی همساهگ بہ بیت بلے هما دُرین کولواه مرچی وتی جند ءِ زهگاں پجا نیار ایت هنچو ستکگ ءُ ویران اِنت کہ همک دمک ءُ در ءَ چم بہ کپ اَنت جبین ءَ آس لگ ایت هنچش گمان بیت کہ کولواه نوکاز بوتگ ءُ دری مردماں اتکگ جاگہ کتگ هندی مردم درست مرتگ ءُ شتگ اَنت-

مرچی کولواه هنچو لاچار اِنت اگاں کسے اود ءَ پہ رهزنی پشت کپتگ گڑا چو نجما ءَ وت ءَ پاهو دیگ ءَ لاچار اِنت هچ کس ءَ میم نہ ایت کہ هما کولواه اِنت کہ یک میتگے یک مردے اگاں ساڑی بوتگ آدگہ هلک کاروان بوتگ ءُ شتگ ماهے ماهے یک مردمے ءِ امیت ءَ هلک سهڑ اتگ اَنت بلے مرچی یک امیتے یک مردمے نیست کہ هلکے بہ سهڑ ایت کہ هلکے نیاڑی وتا هنچو ایوک مارگ ءَ انت وتی گڈی منزل پاهو اش کتگ ، بلے کولواه میاریگ نہ اِنت میاریگ ما ایں کہ ما کولواه وتی تہ ءَ چہ در کتگ ، ءُ دریگانی دستا داتگ اگاں مرچی مئے نالائکی مہ بوتیں هچ چشیں نوبت نہ اتکگ ات کہ کولواه ءِ امیت نا امیتی بوت اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔