TBP Balochi

بلوچستان ءِ دمگ کلات ءِ ھنکین نیمرغ ءَ ناشناسیں مردماں یوفون موبائل شرکت ءِ ٹاور تراکناکیں شورواں گوں تراکینتگ۔

تراکے آسر ءَ ٹاور ءَ تاوان رستگ،سلاہ بندیں مردمانی اُرش ءَ پد پاکستانی لشکریاں ٹاہ داتگ کہ ھنکین انگر کُتگ ءُ گامگیج بندات کُتگ اَنت۔

دومی نیمگ ءَ کیچ دمگ ءِ بنجاھی شھر تربت ءَ پاکستانی لشکریانی یک چوکی ءِ نشانگ کنگ بیتگ۔

اھوالانی ردءَ بالی پَٹ چارراہ ءِ سرءَ بستگیں لشکریانی چوکی ءِ سرءَ سلاہ بندیں مردماں گوں دستی بمب ءَ اُرش کُتگ۔

پولیس ءِ ردءَ ناشناسیں مردماں بالی پَٹ چارراہ تُربت ءَ بستگیں پاکستانی لشکریانی چوکی ءِ سرءَ دستی بمب ءِ دور داتگ کہ آ ڈن ءَ دگ ءِ سرءَ کپتگ ءُ ترکیتگ البت چریشی ءَ ھچ پئیمیں جانی تاوان نہ بیتگ۔

زانگ بہ بیت اَے دمگانی تہءَ چدوپیسر ھم پاکستانی لشکری ءُ موبائل ٹاورز نشانگ کنگ بیتگ اَنت، ءُ اے اُرشانی زمہ واری بلوچستان ءَ برجاھیں آجوئی لوٹوکیں سلاہ بندیں گلاں من اِتگ اَنت۔ البت مروچی بیتگیں اُرش ءِ زمہ واری داں انگت ھچ گل ءَ نہ من اِتگ۔

زورانسری بیگواھیانی بگیر ءَ شال پریس کلب ءِ دیما وائس فار بلوچ مسنگ پرسنز ءِ زھرشانی بنجل مروچی 4974 می روچءَ برجاہ بیتگ۔

اے نیام ءَ چہ کلات ءَ بی این پی ءِ باسک دستگیر بلوچ، محمد خان بلوچ ءَ ھوار زند ءِ جتاھیں تکاں سیادی داروکیں مردماں اتکگ ءُ کھولاں یکجاھی درشان اِتگ۔

 گل ءِ وائس چیرمین ماما قدیر بلوچ ءَ گُشتگ کہ بلوچانی ھونواریں کوش، ڈیھی ادارگ ءُ آیانی داشتگیں ٹولیانی زوراکیانی درور اِنت ءُ آیانی شیطانی ذہنیت ءِ درشانی ءَ کنت۔ 

ماما قدیر بلوچ ءَ گُشتگ کہ آیانی کوش ءِ وڑ ءُ پیم در راستی ءَ کوش ءِ سوبانی چیر دیگ ءُ وتءَ چہ سلکاریں کرد ءَ پھک پیش دارگ ءِ یک بے سوبیں کوشست اِنت۔ ڈیھہ ءِ ھمک یک ادارگ ءِ بلوچ نسل کشی ءِ زمہ ءَ یک دومیگ ءِ سرءَ لڈگ ءُ وتءَ پھک کنگ ءِ کوشست کنگ ءَ اِنت۔ 

آئی ءَ گُشتگ کہ ما سرپد بئیں کہ اے کردگار ءِ تہءَ یک ادارگ ءِ مہ بلکینہ سرجمیں ڈیھہ ءِ پنجر ھوار اِنت بلے دومی نیمگ ءَ پاکستانی پولیس، آمید گِس ءُ پارلیمنٹ ءِ منگ ءَ پد ھم میان اُستمان ءُ جھانی انسانی اگبالانی ھاترءَ کارکنوکیں گلانی ھاموشی جنیوا کنونشن ءِ پدراھیں بگیری اِنت ءُ آیانی کرد ءِ جُست اِنت۔

زالبولانی روچ ءِ درگت ءَ آئی ءَ گُشتگ کہ بلوچ زالبولاں ڈیھی زوراکیانی دیما بے دروریں کرد پیلو کُتگ۔ زورانسری بیگواھیانی بگیر ءَ اے دلیریں مات ءُ گھارانی جدوجھد راجدپتر ءَ مدام یات کنگ بیت اِنت۔

بلوچ یکجھتی کمیٹی ءِ نیمگ ءَ زالبولانی میان استمانی روچ ءِ درگت ءَ ماں شال ءَ زھرشانی ءِ کنگ بوتگ – بلوچ زالبولانی ھاتر ءَ انساپ ءِ لوٹ کناں – زاکر مجید بلوچ ءِ مات

بلوچ یکجھتی کمیٹی ءَ زالبولانی میان استمانی روچ ءِ درگت ءَ شال پریس کلب ءِ دیم ءَ بلوچ زالبولانی سرا زوراکی کنگ ءُ زورانسری آوار جنگ بوتگیں ماھل بلوچ ءُ ایندگہ زورانسری آوار جنگ بوتگیں زالبولانی بیگواھی ءِ بگیری ءَ روانک ءِ کش اِتگ ءُ زھرشانی نبشتہ کنائیں اِتگ – کہ اودا مزنیں کچے ءَ زالبولاں بھر زرتگ ءُ گوستگیں دوھکاں برجاھیں ریاستی زوراکی ترندی ءَ گوں ایرجتگ –

زھرشانی ءَ ھر تک ءُ پھناتاں سیادی داروکیں مردماں بھر زرتگ ءُ بلوچ زالبولانی سر ءَ بووکیں ریاستی زوراکیانی بگیری ءَ توار چست کتگ ءُ ماھل بلوچ ءَ ھوار ایندگہ زالبولانی یل کنگ ءِ لوٹ کتگ –

ھمے وھد ءَ پاکستانی پوج ءِ دست ءَ زورانسری آوار جنگ بوتگیں مردمانی کھولاں ھم بھر زرتگ ءُ وتی دوستیگیں مردمانی یل کنگ ءِ لوٹ کتگ –

شال ءِ روانک ءَ بھر زوروکیں مردمانی گوشگ ات کہ پاکستان ءِ پھازگی لشکر ءَ مدامی یکجاھیں سزا ءَ بلوچ زالبول نشانگ کتگ انت – کہ زالبولانی زورانسری آوار جنی، آھانی سر ءَ لٹ شاپ ءُ جنگ ءُ کشگ ءَ ھوار ترسینگ ھمک روچی کار ءِ جوڈ بوتگ –

ھمے وھد ءَ زھرشانی ءَ ھواریں بیگواھیں مردمانی کھولانی گوشگ ات کہ بلوچ چاگرد ءِ تہ ءَ زالبولانی ازت ءُ شرپ ءِ ھست بلے گوستگیں بازیں سالاں پھازگی لشکر مئے زھگاں ھوار کھول ءِ ایندگہ مردیناں آوار جنگ انت ءُ مارا لاچار کنگ بوتگ کہ دگانی سر ءَ بیا ایں – مارا اے وڈ وار بوگ ءُ در پہ دری ءِ شوک نیست بلکیں ما لاچار ایں کہ ادا ایں –

آھاں پاکستان ءِ پھازگی لشکر نیمگ ءَ بلوچ زالبولانی ترسینگ نوکیں رویش ترندی ءَ گوں ایرجتگ گوشتگ کہ بلوچ زالبول یکشل ءَ اوار جنگ بوگ ءَ انت – ھمے زوتاں ماھل بلوچ ءِ آوار جنی ھم ھمیشی ءِ بھرے کہ تنی وھدی بیگواہ انت –

آھانی گوشگ ات کہ مروچی دنیایے جتا جتائیں جاھاں زالبول وتی آجوئی ءُ ھکانی گپ ءَ جنگ ءَ انت بلے بلوچ زالبول وتی زند ءُ وتی دوستیگیں مردمانی یل کنگ ءِ ھاتر ءَ زھرشانی کنگ ءَ انت کہ ھر یک انسان ءِ بنکی ھک انت –

شال ءِ زھرشانی ءَ ھواریں درنگاز کنوکانی گوشگ ات کہ استان ءِ زمہ داری انت کہ زالبولانی پھریز ءَ بہ کنت چاگرد ءِ تہ ءَ آیاں دیما آیگ ءِ موہ بہ دنت بلے بدکسمتی ءَ بلوچستان ءِ جاور جتا انت بلکنہ ادا استان ءَ زالبولانی بگیری ءَ سنگر ءِ پچ کتگ کہ آھانی سر ءَ بے کساس زلم زوراکی کنگ بوگ ءَ انت – ما بلوچ زالبولانی بگیری ءَ استان ءِ زوراکیانی ھلاس کنگ ءِ لوٹ ءَ کن ایں –

زالبولانی میان استمانی روچ ءِ درگت ءَ بیگواھیں نودربر رھشون زاکر مجید ءِ مات ءَ وتی شنگ کرتگیں تامر ءِ تہ ءَ گوشتگ کہ منی لوگواجہ ءِ کوش ءَ پد منی زاھگ زورانسری آوار جنگ ءُ بیگواہ کنگ بوتگ –

آئی ءَ گوشتگ کہ من چاردہ سال وتی زھگ ءِ ودار ءَ گوازینتگ، زالبولانی میان استمانی روچ ءِ درگت ءَ بلوچ زالبولانی ھاتر ءَ انساپ ءِ لوٹ ءَ کناں –

پاکستان ءِ نامداریں ٹی وی جرنلسٹ عاصمہ شیرازی ءَ زالبولانی میان استمانی روچ ءِ درگت ءَ وتی ٹویٹ ءَ گوشتگ کہ زالبولاں میان استمانی زالبولانی روچ مراد بات – آئی ءَ زالبولانی روانک ءِ آرگنائزر ھم مراد باتی داتگ ءُ گوشتگ کہ ھمائی ءِ جھد ءِ کوشست ءَ مروچی سرجمیں بلوچستان ءَ زالبول وتی ھکانی لوٹ ءَ کنگ ءَ انت –

عاصمہ ءَ نبشتگ کہ ھمے وھد ءَ ھما بلوچ زالبول ھم یات کنگ بہ بنت کہ وتی برات ءُ زھکانی یل کنائینگے ھاتر ءَ یکشل ءَ جھد کنگ ءَ انت –

ھمے روچ ءِ درگت ءَ انسانی ھکانی توار چست کنوک ءُ وکیل ایمان زینب مزاری ءَ نبشتہ کتگ کہ مروچیگیں روچ بلوچ زالبولانی ایمنی گھگیری ءِ نام انت –

آئی گوشتگ کہ مروچیگیں روچ بس زالبول نام ءَ کتگ کہ آئی ءَ وتی زھگ راشد حسین ءِ وش ءُ سلامتی یل کنائینگ ءِ ھاتر ءَ ھر در ٹک اِتگ –

آئی ءَ نبشتہ کتگ کہ مروچیگیں روچ سمی دین ءِ نام ءَ کہ کسانیں جنکو ات وتی پت ءِ یل کنائینگ ءِ ھاتر ءَدگانی سر ءَ در اتک – مروچیگیں روچ ماھل ءِ نام ءَ کہ یک بے رھم ءُ بزدلیں استان ءِ بندیگ جاھاں بندیگ انت وھدیکہ آئی ءِ بگیری ءَ ھچ وڈیں راستیں ارزی نیست – اگاں ما بلوچ زالبولانی سرا بؤکیں زوراکیانی بگیری ءَ ھما وھد ءَ پاد بہ اتکینیں کہ نوک بندات بوتگ ات گڈا اے درچ سرجمیں ملک ءِ تہ ءَ شنگ نہ بوتگ ات – مروچی چہ پنجاپ ءَ راحت آنٹی وتی زھگ اھوالکار مدثر نارو ءِ یل کنائینگ ءِ لوٹ کنگ ءَ انت –

ایمان ءَ نبشتگ کہ ھر پیشی ءَ نارو ءِمات وتی نماسگاں گوں اسلام آباد ءَ کئیت – ھمے وڈ حمزاد بیگم وتی دو زھگ زاھد امین ءُ صادق امین ءِ یل بوگ ءِ راہ ءَ چارگ انت – مروچیگیں روچ ھما درسیں زالبولانی ھاتر ءَ وقف انت کہ آھاں استان ءِ درسیں زلم زوراکیاں ابید وتی جھد برجاہ داشتگ ءُ امیت زندگ داشتگ –

بلوچستان ءِ جتائیں دمگاں وتکشی، تیرگواری ءُ دگ ءِ وئیلانی آسر ءَ چار مردم بیران ءُ زالبولے ءَ ھوار ھپت مردم ٹپی بیتگ اَنت-

سربیتگیں ھالانی رِد ءَ پشین ءَ ھپدہ سالی ئیں ورناہ ءَ وت ءَ تیرجتگ ءُ وتی زندگی کُٹّینتگ- پولیس رِد ءَ اے ورناہ دماگی درگت ءَ شر نہ بیتگ بلے پولیس ءَ لاش دستیگ کتگ ءُ گیشیں چار ءُ ٹپاس ءَ پد کھول ءَ داتگ-

دومی نیمگ ءَ پسنی ءَ مکران کوسٹل ھائی وے ءِ سر ءَ وئیل ءِ آسر ءَ دو مردم بیران ءُ دو ٹپی بیتگ اَنت-

وئیل ءَ بیران بیتگیں مردمانی پجّار حنیف ء مولابخش ءُ ننکر ء رستم جھمنند ٹنڈوآدم ناماں چہ بیتگ اَنت وھدے کہ ٹپیانی تہ ءَ چنیسر ء میر خان جھمنند ٹنڈو آدم ءُ عالم ء حاسل نام ءَ چہ بیتگ اَنت-

ھمے وڑ پسنی ءَ گوستگیں روچ ءَ وارڈ نمبر چار ءَ زوبگ میتگ ءَ محمد علی نامیں ورنایے کارچ جتگ ءُ کُشتگ – پولیس ءَ گیشیں چار ءُ ٹپاس ءَ پد لاش کھول ءَ داتگ-

انچش شال ءَ ھال سر بیتگ کہ نواکلی بائی پاس ءَ ناشناسیں مردماں سروس اسٹیشن سر ءَ تیرگواری کتگ چار مردم ٹپی کتگ اَنت-

وئیل ءَ پد ٹپیانی کھول ءَ بائی پاس دگ سر ءَ زھرشانی بندات کتگ-

ھمے وڑ نوشکی ءَ کلی جمالدینی ءَ ٹکی دُژمنی ءِ پُشدر ءَ دو نیمگی تیرگواری ءَ تیر لگگ ءَ چہ زالبولے ٹپی بیتگ-

نوشکی کلی جمالدینی ءَ ٹکی دُژمنی ءِ پُشدر ءَ جمالدینی ٹکی دو شاھانی سلاہ بندیں مردمانی میان ءَ کلی ءَ دو نیمگی تُرندیں تیرگواری ءَ چہ یک زالبولے ٹپی بیتگ ءُ آ ٹیچنگ نادُراھجاہ ءَ برگ بیتگ-

تیرگواری ءَ چہ دمک ءَ اوشتوکیں پرپٹ ءَ ھم تاوان رس اِتگ- پولیس فورس ءِ سر بوگ ءَ پد کلی جمالدینی ءِ جاور گیشینگ بیتگ اَنت-

گْوادر ءِ مرچیگ ءُ باندات

نبشتہ کار: نودگیر بلوچ

دی بلوچستان پوسٹ

مُولانا ھدایت الرھمان ءِ سروکی ءَ ’حق دو بلوچستان تھریک ‘ءَ کساس دو سال بیت کہ جنزگ ءَ اِنت ۔ اے تھریک ءِ لوٹ ، باڈر پہ لس مھلوک ءَ پچ کنگ بہ بیت ، تْیاب ءَ چینی ٹرالر دارگ بہ بنت کہ آ دریا وردانی گزرانکی کُوش (معاشی قتل ) ءَ کنگ ءَ اَنت۔ گار ءُ بیگواھیں بلوچ یلہ کنگ بہ بنت۔ شپ ءَ لوگانی تہ ءَ بیڑ برگ ءُ چست کنگ ءِ درچ ھم بند کنگ بہ بیت۔

گْوادر ءَ اے کچ ءَ لس مھلوک ھجبر دَگانی سر ءَ در نیتکگ ناں کہ گْوادر ءِ گْوَست ءَ چُشیں دراجکَشیں نندانک جَنگ بیتگ۔ اے جاورانی گندگ ءَ گوں ھمے سما بیت کہ گْوادر ءِ مردم چہ دیمروئی ءِ نام ءَ ھروچگیں جنجالانی پاند ءَ چہ در کپگ لوٹ اَنت آیانی لوٹ دیمروئی نہ اِنت بلکیں آسیدگیں زند گوازینگ ئیگ اِنت۔

آیانی گُشگ اِنت ما چہ سرکار ءَ ھچ وڑیں دیمروئی ءِ لوٹ نہ کن ایں بس مارا وتی لوگانی تہ ءَ پہ ایمنی ءَ نندگ ءَ بِل ات۔ اے مئے بُنکی ھَک اِنت۔ بلے سرکاری واکدار ایشانی بُنکی لوٹانی پیلو کنگ ءَ ھم انکاری بنت ۔ ھمے زھرشانی کہ برجاہ بنت 23 دسمبر 2022 شپ ءَ پولیس ، ایف سی ءُ ایندگے ادارہ ھمے نندانک جاہ ءِ سر ءَ بیڑ بَر اَنت ءُ لس مھلوک ءَ لٹ ءُ کُٹ کنگ ءَ پد دزگیر کن اَنت آیانی تہ ءَ ھسین واڈیلہ ھم ھوار اِنت۔

داں کہ چار ءُ پنچ روچ ءَ لس مھلوک ءُ سرکاری لشکر ءِ نیام ءَ جنگ ءُ جوپ برجاہ بیت اِنت۔

چُشیں جنگ ءُ چوپ من پیش ءَ بی ایس او ءِ زمانگ ءَ دیستگ بیتگ ھمے پیم ءَ کہ کامریڈ کیوم ءَ اوار جَن انت بلوچ وارڈ ءِ مردم ھمے پیم ءَ جاوید کمپلکس ءِ دیم ءِ چوکیاں مانداراں یا آیاں پیش اکبر بگٹی ءِ شھادت ءَ شوکت پنجاپی ءُ ایندگے مزن مزنیں بیپاریانی دکان سوچگ بنت سرکاری درائیں کارگس ماندارگ بنت بلے دہ سال ءِ مزنیں اوشتانکے ءَ پد ھما ندارہ چمانی دیم ءَ سھرا بوت اَنت پورا کہ لالا ھمید انت پازل چوک ءَ اوشتاتگ ءُ بلوچ راج ءَ واب ءَ چہ پاداھِگ ءِ گشتانک ءَ دیگ ءَ اِنت-

من اے گپ ءَ ھم زاناں مولانا ھدایت ءُ لالا ءِ راہ پھک ءَ چہ یک ءُ دومی ءَ جتا اَنت ۔ ملا اے ساد ءَ گِرگ ءُ پارلمنٹ ءَ روگ لوٹگ ءَ اِنت بلے لس مھلوک ھروچگیں اڑ ءُ جنجالاں چہ در کپگ لوٹگ ءَ اِنت ۔

گْوادر ءِ مستریں جیڑہ گُجّو جنوکانی (ٹرالر ) اِنت۔ زانگ بہ بیت کہ اے ساھت ءَ کساس 2400 ءَ گیش گجو ءِ لانچ ماں بلوچ زِر ءَ ساڑی اَنت ءُ ماھیگانی نسل کُشی بوھگ ءَ اِنت۔

اے دراہ چین ءِ ٹرالر اَنت ۔ چین بلوچستان ءِ مال ءُ مڈیانی ھمرائی ءَ بلوچ زِر ءِ ھم لُٹ ءُ پُل ءَ کنگ ءَ اِنت ۔ ایشانی دارگ سی پیک ءِ بند کنگ اِنت داں سی پیک جنزان اِنت چینی ٹرالر ھم بلوچ زِر ءَ موجود اَنت اے ھم ھمے جَتگیں سودایانی رِد ءَ ھوار اَنت گوں اے سی پیک ءِ پولیسْیانی بھر انت ، ھمدا چائینیز ٹرالرز گُجّو نٹ ( Prohibited Net) کامرز کن اَنت۔ کُلیں دریا ءِ ساھدارانی نسل کُشی بیت کس ایشاں تُتے پِر کُت نہ کنت بلے ھمے کَش ءُ گوراں سی پیک ءِ جوڑ کُتگیں رھبندانی رِد ءَ بلوچ دریا وردانی بوجیگاں پہ اوشتگ ءَ راه ءُ در اوں نیست-

وھد وھدے سر ءَ ایشانی ھلاپ ءَ زھرشانی بیتگ بلے سرکارے گوشاں مورے ءَ اوں نہ وارتگ۔

ھک دو تھریک ءِ مردمانی لوگاں بیڑ برگ ءُ آیانی دزگیری ءَ چہ ھمے گپ پدر بیت۔ کہ اے سرکار بلوچ ءِ بُنکی ھکانی دیگ ءَ ھم ساڑی نہ اِنت مزن مزنیں گپانی کنگ ءُ گوادر ءَ سنگاپور کنگ دوریں گپ ءُ ھبر اَنت ۔ بلوچ چہ وتی زِر ءَ درامد کنگ بوھگ ءَ اِنت آیانی دست ءَ زر ءُ گْوادر ھردو پچ گرگ بوھگ ءَ اَنت آیاں زھرشانی ءِ ھک ھم دیگ نہ بیگ ءَ اِنتنی پورا گْوادر ءِ ھمک دمک ءُ دیوالانی سر ءَ ھمے شئر نبشتہ اِنت

“گڈی راہ اِنت کوہ ءَ روت نیلاں بدوا چش مارا”

اے جیڑہ پہ گْوادر ءَ مدام ھست اَنت۔ بگندے اے زھرشانی نندانک ءِ مردم مٹ ءُ بدل بہ بنت بلے اے بلوچ ءِ زھرگ ءُ تب ، گھگیری ءِ چیدگ اَنت۔ اشانی لوٹ مدام وتی زِر ءَ گوں آسودگی ءَ روگ ئیگ اِنت ، وتئی شھر ءَ پہ ایمنی ءَ نندگ ئیگ اِنت ۔ بلے کہ تئی زمین تئی نہ انت آسودگی بیت نہ کنت ھما وھد ءَ بیت کہ تئی زمین تئی بہ بیت۔

اگاں مرچی ھک دو ءِ رھبر ءُ باسک وتی دزگیری ءَ پد ھاموش اَنت بلے گْوادر ءِ لس مھلوک ءِ دلانی آس انگت ءَ انگر ریچان اِنت ۔

گْوادر ءِ لس مھلوک پہ تُن ءُ لَنگڑی زند گوازینگ ءَ لاچار اِنت دیمروئی (Development) ءِ نام ءَ درائیں گوچلی بیتگ اَنت بلے دیمروئی نہ بیتگ۔ اے ھبر تچک ءُ گواچنی گپے کہ زورآور کَے اِنت کہ کیت ءُ مارا دیمروئی دنت ؟ آ کجام درد ءَ گپتگ ءُ بلوچ زمین ءِ دیمروئی ءُ بلوچ پدریچ ءِ وشھالی ءَ پہ چو بھمتگ ءُ جنجالیگ اِنت ؟-

ھر کجا کہ زورآورے ءَ زمین ءُ راجے کہ ایردست کُتگ آیاں ھمے پروگرام گون بیتگ ءُ لس مھلوک ءِ زھن ءِ توک ءَ چو ماھور ءَ ریچاں کُتگ کہ شما جاھلے ناوانندہ ءُ پشکپتگیں راجے من شمارا اے دنز ءُ مُجاں چہ در کناں دگنیا ءِ دیم ءَ شُتگیں راجانی ھم سِپ کناں ھمے ڈسکورس ءَ گوں اتکگ ءُ نزوریں راج ریپینتگ ءُ آیانی چُک چینی ءُ مڈیانی لُٹ ءُ پُل کنگ ءَ داں آخری ھَد ءَ شُتگ۔

بلے اے وتساچیں راہ ءُ رھبند دیر ءَ داں راجاں گُٹو نہ بیتگ اَنت اودا آشوبی زرمبشت چست بیتگ اَنت۔ گوں گھگیری ءَ دژمن ءِ دیم ءِ دارگ ءَ لس ورنا کماش ءُ زال ءُ زالبول پاد اَتکگ اَنت۔ وتی راجی پجار ءِ رکینگ ءُ پہ وتی آھوکیں باندات ءِ ھاتر ءَ وتی نگرھیں جانانی دیمونی داتگ اَنت۔

بلوچ زِر ءَ داں روچ اول ءُ داں مرچیگ ءَ بدواھگ ءِ چم سک اَنت۔ زی ھم ھملاں زِر ءَ پہ سر بِکش اِتگ اَنت ءُ مرچی ھم وتی جان ءِ کربانی ءَ دیگ ءَ اَنت ۔

زی ھمل ءَ زِر ءِ رکینگ ءَ گوں پرنگیاں جنگ داشتگ مرچی ھم نوکیں اھد ءِ پرنگیانی دیمے دارگ ءَ پہ کچکول ءُ منسب گونگیں ورنا وتی کیمتی ئیں جاناں دیگ ءَ اَنت باندا ھم گْوادر ءِ ھمے لس مھلوک ءَ چہ ھملیں ورنا پاد کاینت ءُ ھچ وڑیں کربانی یے دیگ ءَ چَک ءُ پَد نہ بنت۔

بلے لس مھلوک ئِے زھرشانیاں پاکستان ءُ چین ئے نیامے دیمروئی ءِ وتگڑیں دروگ جھانے دیم ءَ پَدر ءُ آشکار کُتگ ۔ دنیا گندگ ءَ اِنت کہ ادا چنکس دیمروئی بیتگ ءُ لس مھلوک ئِے اے کساس ءَ در کپگ ءُ دگانی سر ءَ آیگ پہ پاکستان ءِ دیمروئی ءِ ٹاہ ءِ پروشگ ءَ پہ مزنیں داگے ۔ اے داگ ءَ سی پیک ءِ دیم جنزگ ءَ پہ مزنے دستے جَتگ کہ پاکستان ءَ اسلام آبادے روانکانی سرا چو درد نہ بیت چُش کہ اشی ءَ بیتگ۔

بلےمولانا ھدایت ءِ بند بوھگ ءَ پَد جاور یک کَچے ءَ سارت اَنت اے گپ ءَ ھمے پدر انت کہ مھلوک ھست بلے مھلوک ءَ بلوچے پروگرامے بھر جوڑ کنگ ءَ پہ پروگرام نیست ۔ مَئے گور ءَ اے پروگرامے بابت ءَ ھچ جیڑگ نہ بیتگ کہ باڈر ءِ بار کَش ءُ دریاورداں چون وتی پروگرام ءَ بہ بَریں ءُ سَر بکن اِنت ۔

مھلوک لوٹ ایت یکے منی دیما بیت ءُ مارا منزلے ءَ بہ بارت ءُ سر بہ کنت۔ اے سَکتیں جاور دنیا ءِ دیما سی پیک ءِ اسل دروشم ءَ ھم پدر کننت ءُ اے لس مھلوک گڈسرا بیزار بیت ءُ اے دیمروئی ءِ جَتگیں درائیں ماھوراں سند ایت ءُ زِر ءَ دور دنت

اے زر ءَ ناں کہ پرنگاں اتکگ ءُ ایمنیں دلے بیپاری کُتگ نیکے چین ءُ پاکستان کنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءَ ایرانی چیریں ادارھانی تیرگواری ءَ یک ورنایے بیران بیتگ-

گیشیں ھالانی رد ءَ روکپتی بلوچستان ءِ بنجاھی شھر زاھدان ءَ گوستگیں روچ ءَ ایرانی چیریں ادارہ “اطلاعات ” تیرگواری کنان ءَ یک ورنایے کُشتگ کہ آئی ءِ پجار مھمد ریگی جھمنند زاھدان ءِ کوھنیں دگ ءِ ھند ءَ نندوک اِنت-

اھوالانی تہ ءَ گوشگ بیتگ کہ ایرانی چیریں ادارھاں یک شکی ئیں گاڑی ءَ را ابید دارگ ءَ آئی ءِ سر ءَ تیرگواری کتگ چریشی ءَ مھمد ریگی نامیں ورنایے ءَ تیر لگ اتگ ءُ آ بیران بیتگ-

زانگ بہ بیت روکپتی بلوچستان ءَ چوشیں وئیل ھمک سال بوگ ءَ اَنت کہ اود ءَ بازیں مردماں زدگ ءُ بیران بنت بلے آیانی کھول اے وئیلانی پاشک کنگ ءَ ابید آ بے تواری ءَ وتی بیران یا زدگ بیتگیں مردم ءَ دست گر اَنت ءُ نانکہ آمیدگساں چوشیں وئیلانی بارو ءَ پٹ ءُ پولی ھُبناکی ھست اِنت –

اوگان جنکیں ڈاکٹر زکریا حکمے ءَ وائٹ ھاؤس ءَ یک مراگشے ءِ وھد ءَ گچینی داد “جرات ایوارڈ ” دیگ بیت اِنت-

عرب نیوز ءِ رد ءَ چارشمبے ءَ بوھوکیں اے مراگش ءَ امریکہ ءِ وزیر ھارجہ انٹونی بلنکن ءُ امریکہ ءِ زالبول اول جِل بائیڈن ھبدھمی سالگشت “انٹرنیشنل ویمن آف کریج ایوارڈز ” سروکاری ءَ کنت-

ڈاکٹر زکریا حکمت ءِ اُمر سِی ءُ پنچ سال اِنت ءُ آ سرجمیں دنیا ءِ توک ءَ ھما یازدھیں زالبولاں ھوار اِنت آیاناں داد دیگ بیت اِنت ءُ اے داد سال دوھزار ءُ ھپت ءَ دیگ ءُ پیداک اَنت-

اے داد ھما زالبولاں دیگ بیت اِنت کہ آ امن، انساپ انسانی ھک، زالبول ءُ جنکانی ھک ءُ جنسی برابری ءِ واستا گیر گچینی دزدراجی، باگچینی ءُ لیڈر شپ ءِ زھرشانی ءَ کنت – اے وھداں آئی ءَ را بازیں وھداں ترسناکین جاورانی دیمپانی ھم کپ ایت ءُ آئی ءَ دیمھونی دیگ ھم کپ ایت-

سال دوھزار ءُ ھپت ءَ بہ گر داں انیگ ءَ ھشتاد مُلکاں یک سد ءُ ھشتاد زالبولاں اے داد دیگ بیتگ سرجمین دنیا ءَ امریکہ ءِ جاڑیگیں سپارت ھانھاں چہ یک زالبولے گچینگ کنگ بیت اِنت ءُ پد ءَ امریکہ ءِ اسٹیٹ ڈیپارٹمنٹ ءِ گچینکاری ءَ چہ نام گچین کنگ بنت-

ڈاکٹر زکریا حکمت کے اِنت –

ڈاکٹر زکریا حکمت ءَ تالبان سرکار ءِ گوستگیں دور ءَ ڈیھ یل کتگ ءُ ترکی ءَ شتگ کہ اود ءَ آئی ءَ اسکالرشپ میڈیسن ءِ ڈگری گپتگ ءُ پد ءَ ڈاکٹر جوڑ بیتگ-

آئی ءَ اود ءَ سال دوھزار ءُ چاردہ ءَ اوگان رفیوجیز سولیڈیرٹی ایسوسی ایشن ءِ بنھشت ایر کتگ کہ چریشی ءَ بازیں اوگانیاں پناہگزینی رس اتگ –

اے وھد ءَ ڈاکٹر زکریا حکمت ترکی یَ اوگان ءِ پناہگزینانی واستا گچینی زالبول ءُ جنک ءُ کمتری نگاہ چارگ بیتگیں مردماں ترکی ءَ رکینگ ءُ جاہ دیگ ءَ کمک کنگ اِنت-

گوستگیں سال ءَ دسمبر ءِ ماہ ءَ زورانسری بیگواھی ءِ آماچ بیتگیں لسبیلہ شھدربرجاہ ءِ نودربر عبدالقدوس قمبرانی داں انگت یل کنگ نہ بیتگ۔ بیگواھیں نودربر ءِ یک مستریں برات ئے ژانگولیں جون ھم پیسرءَ دزکپتگ۔

عبدالقدوس قمبرانی ءِ زورانسری بیگواھی ءُ یل نہ کنگ ءِ بگیر ءَ ھمے سال ءَ فروری ءِ ماہ ءَ سنگتیں نودربراں زھرشانی کُتگ اَت۔

لسبیلہ یونیورسٹی آف ایگریکلچر واٹر اینڈ میرین سائنس اوتھل (لوامز) ءِ نودربر عبدالقدوس قمبرانی داں انگت یل کنگ نہ بیتگ۔ آ شال ءِ سمنگلی دگ ءِ سرءَ بستگیں یک ھوٹل ءَ چہ 28 دسمبر 2022 ءِ شپ ءَ ناشناسیں سلاہ بندیں مردماں زورانسری گاڑی ءَ نندارینتگ ءُ بیگواہ کُتگ اَت۔

کھول ءِ ردءَ کہ آئی ءَ سئے ماہ ءَ بُرز ءِ وھد گوستگ بلے آئی درگت ءَ داں انگت ھچ پئیمیں اھوال نہ رس اتگ اَنت۔

کھول ءِ گُشگ اِنت کہ عبدالقدوس قمبرانی ءَ شھدربرجاہ ءَ چکاس داتگ ءُ موکلانی گوازینگ ءَ شال ءَ بستگیں وتی لوگ ءَ شُتگ بیتگ ءُ ھمے شپ ءَ سنگتانی پجیگ ءَ آ بازار ءِ نیمگ ءَ شُتگ بیتگ کہ چہ ھمودءَ آ زورانسری بیگواہ کنگ بیتگ اَت۔

یات بہ بیت چدوپیسر عبدالقدوس قمبرانی ءِ یک براتے باقر قمبرانی سال 2013 ءَ قلات ءَ چہ زورانسری بیگواھی ءِ آماچ کنگ بیتگ کہ آ دو سالاں پد یل کنگ بیتگ اَت وھدیکہ ھمے نیام ءَ لسبیلہ شھدربرجاہ ءَ واٹر ریسورس منیجمنٹ ءِ نودربر آئی دومی برات حفیظ قمبرانی 14 مارچ 2015 ءَ قلات ءَ چہ زورانسری بیگواھی ءِ آماچ کنگ بیتگ اَت کہ آئی ژانگولیں جون یک ماہ ئے ءَ پد 24 اپریل ءَ دزکپتگ اَت۔

کھول ءِ گُشگ اِنت کہ کجام ھم بے میاریں نودربر ءِ نشانگ کنگ مستریں زوراکی ءُ وانگ ءُ زانگ ءَ گوں دژمنی اِنت۔ قدوس قمبرانی یک مھنتی ءُ لائقیں نودربر اِنت انچش کہ ایندگہ سماداروکیں ءُ زانتکاریں بلوچ نودربرانی زمین تنک کنگ بیتگ قدوس ھم ھما بے میاریں بیگواھیں بلوچ ورناھاں چہ یک اِنت کہ آ ناشناسیں سلاہ ءُ ڈیوائس داروکیں مردمانی دستءَ زورانسری بیگواھی ءِ آماچ بیتگ۔

البت کھول ءَ بنجاھی واکدار ءُ بیگواھیں مردمانی ھاترءَ اڈ داتگیں کمیشن ءَ چہ دزبندی کُتگ کہ قدوس قمبرانی ءِ زیت ءَ زیت دیما آرگ بہ بیت دانکہ آ وتی وانگ ءَ برجاہ داشت بہ کنت۔