TBP Balochi

سر بیتگیں ھالانی رد ءَ روکپتی بلوچستان ءِ دمگ چھبار ءُ کنارک ءِ دگ ءَ دو گاڑیانی ٹکر ورگ ءَ دو مردم بیران بیتگ اَنت-

گیشین ھالانی رد ءَ روکپتی بلوچستان ءِ دمگ چھبار ءُ کنارک ءِ دگ ءَ روکیں دو تیل کشین گاڑیانی ٹکر وارتگ ءُ چریشی ءَ دو گاڑیاں سواریں دو مردم ستکگ ءُ بیران بیتگ اَنت-

ھالانی رد ءَ گاڑیاں تیل مان بیتگ ءُ چریشی ءَ آس ءِ کپگ ءَ گاڑی ستکگ ءُ تیل کش بیران بیتگ اَنت-

زانگ بہ بیت چوشیں وئیل یکشل ءَ رپورٹ بوگ ءَ اَنت کہ ایشی ءِ توک یَ مردم زدگ ءُ بیران ھم بیتگ اَنت-

بلوچستان ءِ دمگ جھل مگسی ءَ تیرگواری ءِ وئیل ءَ چار مردم بیران بیتگ۔

واکدارانی رد ءَ جھل مگسی ءَ دُزاں آروسی گاڈی ءِ سر ءَ تیرگواری کُتگ چریشی ءَ زالبوال ءُ چُک ءَ آوار چار مردم بیران ءُ پنچمی زدگ بیتگ۔

تیرگواری ءِ وئیل سوئجہ لیویز پانگس ءِ نزدیک ءَ بیتگ البت گُشگ بوھگ ءَ ایں کہ بیران ءُ زدگ بیتگیں مردم یکیں کھول ءَ چہ سیادی دار اَنت۔

بیران ءُ زدگ بیتگیں مردم ڈی ایچ کیو نادرھجاہ ءَ برگ بیتگ انت، گُشگ بوھگ ءَ اِنت کہ زدگ بیتگینانی تہ ءَ سئے مردمانی جاورھال سک نگیگ اَنت۔

اے وئیل ءَ پیسر بلوچستان ءِ دمگ آواران ءَ گاڈی ءِ ھار ءَ برتگ، گاڈی ءَ سواریں یکیں کھول ءِ ھشت مردم بیران بیتگ۔ اے مردمانی سیادی خضدار ءِ ھَند سوراب ءَ انت، وھدیکہ بیران بیتگینانی تہءَ زالبوال ءُ چُک آوار اَنت۔

تربت شھدربرجاہ ءِ نودربراں شھدربرجاہ ءَ لین، آپ ءُ انٹرنیٹ ءَ ھوار ایندگہ آسراتیانی لوٹ ءَ شھدربرجاہ ءَ بگر تاں ڈی بلوچ شھدگ ءَ روانک ءِ کش اِتگ ءُ شھدگ بند کتگ –

ھمے میان ءَ نودربراں واکدارانی بگیری ءَ ترندیں اوگام جتگ- نودربرانی گوشگ ات کہ تربت شھدربرجاہ ءَ بجٹ ءِ رسگ ءَ ابید ھم آسراتی نیست انت –

نودربراں گوشتگ کہ تربت شھدربرجاہ ءَ بلوچستان ءِ جتا جتائیں ھند ءُ دمگانی نودربر وانگ ءَ انت کہ اودا ھزارانی کچ ءَ بلوچ نودربراں چہ دوریں ھند ءُ دمگاں امیت زرتگ ءُ وانگ ءَ اتکگ انت دانکہ آ شری ءَ ونت بہ کن انت ءُ باندات ءَ وتی راج ءُ دمگ ءِ ھاتر ءَ وتی کرد ءَ پیلو کت بہ کن انت بلے ادا واکدارانی کرپشن ءُ نادلگوشی ءَ آ وتی بنکی آسراتی ءُ زانت ءَ زبھر کنگ بوگ ءَ انت کہ چریشی ءَ آھاں بازیں دلسیاھیانی دیمپانی کنگ کپگ ءَ انت –

زھرشانی کنوکیں نودربرانی گوشگ ات کہ گوستگیں بازیں روچاں لین نہ بوگ ءِ سوب ءَ ھاسٹلاں آپ ءُ دگہ آسراتی نیست انت چریشی ءَ نودربر بازیں اڈوجنجالانی آماچ انت –

نودربرانی گوشگ ات کہ شھدربرجاہ ءِ واکدار جیڑھانی گیشگواری ءَ سنجیدگ نہ انت چکاس ھم سر ءِ سرا انت، برزی تبک ءِ واکدار زوت گامگیج بہ زور انت – آھاں گوشتگ کہ تاں ھما وھد ءَ مئے لوٹ سرجم کنگ نہ بنت ڈی بلوچ پچ کنگ نہ بیت –

بلوچ لبریشن آرمی ءِ جارکش جئیند بلوچ ءَ ماں رسانکدرءَ شنگ کتگیں درشانے تہءَ گشتگ کہ بی ایل اے ءِ سرمچاراں گوستگیں شپ ءَ قلات ءِ ھند منگچرءَ کبزہ گیریں پاکستانی پوج ءِ بنجائی کیمپ ءِ پانگس ءِ سرءَ اوشتاتگیں کارمند گوں دستی بمب ءَ نشانگ کتگ اَنت۔

جارکش ءَ گُشتگ تراکے آسر ءَ یک کارمندے ھما دمانءَ مُرتگ ءُ دگہ دو زدگ بیتگ اَنت۔

آئی ءَ گُڈ سرءَ گشتگ کہ بلوچ لبریشن آرمی اے اُرشے زمہ واری ءَ منّ اِیت ءُ کبزہ گیریں پوج داں ھما وھد ءَ چہ بلوچستان ءَ تیوگءَ در نہ کپتگ مئے اُرش برجاہ بنت اِنت۔

بلوچستان ءَ زورانسری آوار جنیانی بگیری ءَ وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ نُھسد ءُ ھشتاد ءُ شش روچ سرجم بوتگ انت کہ شال پریس کلب ءِ دیم ءَ برجاہ اِنت-

مروچی بی ایس او ءِ گوستگیں ھنکینی سرکماش شکور بلوچ، سلطان بلوچ،  قاضی احمد بلوچ ءُ دگہ مردماں بنجل ءَ اتکگ ءُ بیگواھیںمردمانی کھول ءِ گوم ءَ دلپدردی درشان اِتگ-

ھمے وھد ءَ گل ءِ سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ تاگت ءِ زور ءَ برجاھیں ریاستی پالیسیانی دیما چیدگی اَنت پرچہ کہ بلوچ راج چہ اولی روچ ءَ ڈیھی زوراکیانی دیما زیردست بئیگ ءِ جاہ ءَ آئی بگیرءَ وتی جھدءَ دیما برگ ءَ اَنت۔

آئی ءَ گوشتگ کہ اے راجی سیاست ءُ دودمانی بنجل ریاست ءِ ادارہ نہ انت بلکینہ بلوچ راج ءِ دل ءُ مجگ انت کہ آھانی ھلاس کنگ گوںبلوچ راج ءِ ھلاس کنگ ءَ بیت انت- ھمے ھاتر ءَ ریاستی زور کارمرز کنگ ءُ بلوچ ءِ چکچینی ءِ تہ ءَ گیشی گندگ اتکگ- اے درچ گڈی سیمسران انت اے گیشگیواری میان استمانی ءُ گوستانک ءِ راستی ءَ گوں یک میان استمانی فورم ءِ تہ ءَ بوت کن انت کہ اشی ءِ ھاتر ءَاقوام متھدہ ءُ دگہ میان استمانی ادارہ ھست انت بلے زوراک ھمیشی ءِ سر ءَ باور کن انت کہ اے جاوراں آ وتی زور ءَ داشت نہ کن انتءُ بلوچ راج ءِ جتائیں پجار ءِ آرگ کپیت-

دومی نیمگ ءَ گل ءِ سرکماش نصراللہ بلوچ چہ ھزدار ءَ آوار جنگ بوتگیں لیاقت زھری ءِ کھول ءَ گوں دچار کپتگ-

آئی ءَ گوشتگ کہ لیاقت زھری سال دوھزار نوزدہ ءِ نُھ جون ءَ ایف سی ءِ کارمنداں چہ ھزدار ءَ عبدالرحمن ءِ دیم ءَ زورانسری آوار جتگ ءُبیگواہ کتگ ءُ آھاں لیاقت ءِ درگت ءَ ھچ وڈیں سرپدی دیگ بوگ ءَ نہ انت چریشی ءَ آئی ءِ کھول سک باز ماژگی ازیت ءِ آماچ اِنت-

آھاں دزبندی کتگ کہ وائس فار بلوچ مسنگ پرسنز لیاقت زھری ءِ یل کنگ ءَ وتی کرد ءَ پیلو بہ کنت-

نصراللہ بلوچ ءَ آ باور کنائین اِتگ اَنت کہ ھما وڈ گل ءَ لیاقت زھری کیس سرکار ءُ کمیشن ءَ سر کتگ ءُ ارزی نبشتہ کنگ ءَ وتی کرد پیلوکتگ ھمے وڈ ملکی کانودانی رِد ءَ دیمتر ءَ ھم پہ لیاقت بلوچ ءِ وش ءُ سلامتی یل کنائینگ ءَ وتی توار ءَ چست کنت-

نصراللہ بلوچ ءَ چہ سرکار ءَ لوٹ کتگ کہ آ لیاقت زھری ءِ وش ءُ سلامتی یل کنگ ءَ وتی کرد ءَ پیلو بہ کن انت اگاں لیاقت زھری ءِ سر ءَبھتام ءِ ھست آمیدگس ءَ آرگ بہ بیت اگاں ھچ نہ کتگ ھما دمان ءَ یل کنگ بہ بیت ءُ کھول چہ ماژگی ازیت ءَ رکینگ بہ بیت-

سربوتگیں ھالانی رِد ءَ پاکستانی پوج ءَ بلوچستان ءِ دمگ ھاران ءَ ورنائیں فٹبالر ءِ زورانسری آوار جتگ ءُ بیگواہ کتگ –

آوار جنگ بوتگیں فٹبالر ءِ نام صغیر احمد پنام ءِ چھوٹے ءِ نام ءَ چہ بوتگ –

اھوالکار ءِ رِد ءَ اے ورنا پاکستانی پوج ءَ گوستگیں شپ ءَ ھاران ءِ شھر شیلگ ایریا ءَ زورانسری آوار جتگ ءُ بیگواہ کتگ –

زانگ بہ بیت کہ چیزے وھدیں ھاران ءِ تہ ءَ زورانسری آوار جنیانی تہ ءَ گیشی اتکگ –

ھمے ماہ ءَ ھاران ءِ دمگ ھاش ءَ زورانسری آوار جنگ بوتگیں یک مردمے ءَ یل بوگ ءَ پد ٹپانی درد نہ سگ اِتگ ءُ بیران بوتگ –

ورنا ءِ پجار صلاح الدین ء ظفر علی ءَ ات کہ ایف سی ءُ سی ٹی ٹی ءِ کارمنداں دزگیری ءَ پد گوں وت برتگ ات پدا آ بے ھوشی ءِ جاوراں ھاران ءِ نزیک ءَ دست کپتگ ات –

صلاہ الدین ءَ نگیگیں جاوراں گوں نادراھجاہ ءَ برگ ءَ بوتگ انت کہ ا بیران بوتگ –

گوستگیں روچ ءَ آواران ءَ تُرندیں ھوراں پد کور ءَ آپ یک گاڑی یے بُک اِتگ، چریشی ءَ زالبول چُکاں ھوار ھپت ھوار مردم بُک اِتگ اَنت-

گیشیں ھالانی رِد ءَ آواران ءِ دمگ جھاو سیڑ کور ءَ یکیں کھول گاڑی یے ءَ ھوار بُک اِتگ- گاڑی ءَ سوار ھپت مردم بیران بیتگ اَنت- ریسکیو ٹلولی ءَ لاش در کتگ اَنت جھاو نادُراھجاہ ءَ برتگ وھدے کہ یک چُکے ءِ پٹ ءُ پول برجاہ ءَ اِنت-

بیران بیتگینانی تہ ءَ دو ءِ پجّار منیر احمد ءُ عزیز اللہ سمالاڑی ءِ ناماں چہ بیتگ وھدے کہ سوراب گدر جھمنند اَنت-

سعودی عرب، ایران ءِ مُسام ءُ دمگ ءِ سر ءَ سان

ٹی بی پی شونگال

گوستگیں ھپتگ ءَ چین ءِ ٹھینگی کوشستانی سوب ءَ میان رودراتک ءِ دو سانداریں دیم پہ دیمیں ڈیھہ سعودی عرب ءُ ایران ءِ بازیں سالاں چہ سستگیں سپارتی ھمبندی ءِ برجاہ کنگ ءِ ءُ آیوکیں دو ماھانی تہ ءَ بندیگیں سپارت جاھانی پچ کنگ ءِ جار جتگ۔ چین ءَ پیسر عمان ءُ عراق ءِ مھمانجلی ءَ سعودی عرب ءُ ایران ءِ نیام ءَ ترانکاریانی بازیں اھد بیتگ اَنت۔ سعودی عرب ءُ ایران ءِ ھمبندیانی برجاہ بیگ ءِ پدراھیں ءُ چیریں سان مئے دمگءِ سر ءَ کپ اَنت۔

ھمبندی ءِ برجاھی ءَ چہ پیسر میان رودراتک ءَ بازیں دھکاں چہ سنی گیشتریں سعودی عرب ءُ شیعہ گیشتریں ایران ءِ نیام ءَ ناٹاھی برجاہ بیتگ ءُ میان رودراتک ءِ بازیں ڈیھہ اے ناٹاھی ءَ چہ زدگ اَنت۔ یمن، شام، عراق ءُ لبنان ءِ تہ ءَ سعودی عرب ءُ ایران ءِ سردستی ءِ ھاتر ءَ جنگ برجاہ اِنت ءُ دویں ڈیھہ جتا جتائیں دیم پہ دیمیں ٹولیاں کمک کنگ ءَ اَنت۔ ایران ءِ وتمنیں گلاں اے ڈیھانی تہ ءَ سعودی عرب ءِ ھاتر ءَ جنجالانی تہ ءَ گیشی ودی کُتگ ءُ حوثی یاگیانی نیمگ ءَ آرامکو ءِ تیل ءِ شوربندیانی سر ءَ ترندیں اُرش ءُ گوں امریکہ ءَ ھمبندیانی تہ ءَ دیری ءُ دمگ ءِ تہ ءَ ایران ءِ ودوکیں سانمندی ءَ پد سعودی عرب ءَ وتی پالیسیانی مٹ کنگ ءُ گوں ایران ءَ ھمبندی ءِ برجاہ دارگ ءِ مُسام کنگ ءَ لاچار بیتگ انت۔

مئے دمگ ءُ بلوچستان ءَ ھم سعودی عرب ءُ ایران ءَ وتی وتمنیں گلانی کمک ءَ یک دومیگ ءِ ھاتر ءَ جنجال ودی کُتگ اَنت۔ سعودی عرب سنی نیکراھیں ناشرکاریں گلانی کمک ءُ مدرسیانی زری کمک کنگ ءَ اِنت ءُ اے گل بلوچستان ءِ تہ ءَ شیعہ آبادی ( ھاسیں پئیم ءَ ھزارہ کمیونٹی ) ءَ نشانگ کنگ ءَ اَنت ءُ ایران ءِ بھتام اِنت کہ آئی ءِ بگیر ءَ جنگ کنوکیں سنی بلوچ گلاں ھم سعودی عرب زری کمک کنگ ءَ اِنت۔

بلوچستان ءُ پاکستان ءِ جتا جتائیں دمگانی تہ ءَ شیعہ آبادی ءِ تہ ءَ ھستیں لھتیں کارست ءُ گلاں ایران کمک کنگ ءَ اِنت ءُ شیعہ آبادی ءَ مزنیں کساسے ءَ ایران ءِ مستری ءَ جنگ ءِ ھاتر ءَ شام، عراق ءُ یمن ءَ شُتگ اَنت۔ پاکستان ءِ تہ ءَ شیعہ آبادی ءَ زینبیوں بریگیڈ ءُ اوگانستان ءَ فاطمیون بریگیڈ ءِ تہ ءَ مھکم کنگ ءَ اِنت کہ آ پاکستان ءُ اوگانستان ءِ تہ ءَ ایران ءِ مپادانی ھاتر ءَ کنگ ءَ اَنت ءُ جھانے دگہ ڈیھانی تہ ءَ ایران ءِ وتمنیں جنگ ءِ تہ ءَ بھر زیرگ ءَ اَنت۔

اے گپ انگت وھد ءَ پیشتر اِنت کہ ایران ءُ سعودی عرب میان رودراتک ءُ مئے دمگ ءِ تہ ءَ وتمنیں گلانی کمک ءَ بند کن اَنت اگںاں اَڑ ءُ کُڑ ءُ ناٹاھی ھمے وڑ جُنزان بنت بلے میان رودراتک ءَ ابراھیم مُسام ءَ پد اسرائیل ءُ عرب ڈیھانی ھمبندی ءَ پد ایران ءِ بگیر ءَ نوکیں سرپ بندی بئیگ ءَ اَت، اے جاوارانی تہ ءَ ایران ءُ سعودی عرب ءِ مُسام ایران ءِ مزنیں سوبمندی ءِ زانگ بیت ءُ چین ءِ کمک ءَ چہ مُسام میان رودراتک ءَ چین ءِ درملکی ءُ دیمروی (روزیگی) سپارت کاری ءِ سوبمندی ءِ اِنت کہ آ دمگ ءِ تہ ءَ آئی ءِ کرد ءَ گیشتر ودینیت کہ اِشی ءِ پدراھیں ءُ چیریں سان بلوچستان ءِ سر ءَ ھم کپ اَنت۔