بلوچ آجوئی لوٹوکیں راجکاریں گل بلوچ نیشنل مومنٹ (بی این ایم) ءِ سرکماش ڈاکٹر نسیم ءَ گوشتگ کہ چین ءُ پاکستان ءِ یکجاھی ناکہ تھنا روکپتی سیتاں پہ بیھارے بلکیں اے یکجاھی بلوچ راج ءِ بنکی انسانی ھکانی سر ءَ تچکی ءَ اُرش کنگ انت –
آئی ءَ اے گپ اقوام متھدہ ءِ انسانی ھکانی کونسل ءِ پنجاہ ءُ دومی نیاد ءَ مراگشے ءَ تران کنان ءَ گوشتگ انت – اے نیاد گوں اقوام متھدہ ءِ ترامگیجاں شورکاری بستار ءَ کار کنوکیں درسرکاری گل (این جی اوز) پہ زمیر ءِ آجوئی ءِ ھاتر ءَ ، گل ءُ مردمانی میان ءَ ھمگرنچی کیپ (Coordination des Associations et des Particuliers pour la Liberté de Conscience ) ءِ چیردستی ءَ برجم دارگ بیتگ-
ڈاکٹر ءَ وتی تران ءَ گوشتگ چہ ھما روچاں کہ پاکستان اے دمگانی سر ءَ زور کبزہ کتگ ، بلوچستان ءِ مردم پہ وتی ھمروچیں زندمان ءِ گوازینگ ءَ جھد کنگ ءَ اَنت۔پاکستان ءِ زوراکیں کارپداں مئے گزرانک، ربیدگ، دودمان ءُ زبان گار ءُ گمساری ءِ کنڈ ءَ رسینتگ اَنت۔بلوچستان ءِ گیشتر مردم کوھی دمگاں زندگی کنگ ءَ بیتگ اَنت ءُ آیانی زند ءِ گزران مالداری ءِ سر ءَ بوتگ۔ بلے ، چہ لشکرکشیانی گیش بیگ ءَ ، آیانی نگن پچ گرگ بیتگ ، ءُ آ وتی کوہ ءُ کوچگانی یلہ کنگ ءَ لاچار بیتگ اَنت-
چیئرمین ڈاکٹر نسیم ءَ چین ءُ پاکستان ءِ نام گیپتیں گزرانکی راھداری ءِ سر ءَ ترندیں ایراد گران ءَ گوشتگ چہ چریشی ءَ پیش، پاکستان بلوچستان ءَ آیوک ءَ مردمی اگبالانی بگیری کنگ ءَ بوتگ ،بلے نی چین ھم اے زور ءَ گیش کنگ ءُ وتی نام گیپتیں دیمروی شورانی منڈینگ ءَ گوں آئی ءَ ھمدست اِنت، کہ دمگے ءُ دگے ءِ کارشور ، چین پاکستان گزرانکی راھداری ( سی پیک) ءِ بھر اِنت۔اے کارشور ءِ زور منڈینگ ءِ آسر ءَ بلوچستان ءَ اے کشک ءِ سر ءَ نندوکیں ھزاراں ھندی مردم لڈ اتگ انت ءُ آ زورانسری آوار جنگ ءُ بیگواہ کنگ بیتگ اَنت – سی پیک ءِ راہ ءِ تچک کنگ ءَ بازیں کوچگ بن دیگ بیتگ ءُ پہ چینی سیتانی پھریزگ ءِ نام ءَ لشکری بنجل ءُ پانگس جوڑ کنگ بیتگ، وھدے کہ راستی ایش اِنت اے لشکری کارمند رستری ءَ مردمی اگبالانی لپاشگ ءِ زمہ وار اَنت – چین ءُ پاکستان ءِ ھم یکجاھی ناکہ تھنا پہ روکپتی سیتاں بیھارے بلکیں اے یکجاھی بلوچ ءِ بنکی مردمی اگبالانی سر ءَ ھم تچکے ءَ ارش کنگ انت –
آئی ءَ ماں بلوچستان ءَ انسانی ھکانی لگتمالی ءِ ھستیں وھدے جاورانی سرا تران کنان ءَ گوشتگ ایوک ءَدوھزار بیست ءُ سَے ءِ فروری ماہ ءَ سِی ءُ نھ مردم زورانسری آوار جنگ ءُ بیگواہ کنگ بیتگ کہ ایشانی تہ ءَ دو جنین رشیدہ زھری ءُ ماھل ھم ھوار انت ۔ماھل یک برے زور بیگواہ کنگ بیتگ ءُ پد ءَ آئی ءِ سر ءَ جنگی گل ءِ باسک بیگ ءِ دروگیں بھتام جنگ بیتگ – آ گوں وتی وسیگ ءُ دو جنکیں زھگانی ھواری ءَ آوار جنگ بیتگ ءُ درس داں بیست ءُ چار ادار ءَ بیگواہ کنگ بیتگ اَنت ، پدا رند ءَ آ دگہ یلہ دیگ بیتگ اَنت بلے ماھل ھنگت بیگواہ انت – بلوچ ءِ ترندیں زھرشانی ءُ روانکاں پد ھپتگے ءَ رند آ آمیدگس ءَ آرگ بوتگ ھمے پیم رشیدہ زھری گوں آئی ءِ لوگواجہ ءُ چکانی ھمراہ آوار جنگ بیتگ – چوشکہ رشیدہ یانزدہ روچ ءَ آزار دیگ ءَ پد یلہ کنگ بیتگ بلے آئی ءِ لوگواجہ رھیم زھری روچ مروچی بیگواہ انت – دگہ دلپدردیں ویلے ماں آواران ھنکین گیشکور ءَ بیتگ، کہ دادبکش ء مسکان ءِ گوں بے دردی ءَ کوش ءِ ھال اَت۔آ لشکری بنجل ءَ لوٹائینگ ءَ پد سک باز آزار دیگ بیتگ، وھدے یلہ اش داتگ آئی ءَ ٹپانی درد نہ سگ اتگ اَنت ءُ بیران بیتگ –
ڈاکٹر ءَ پاکستان ناں کہ تھنا پہ دمگ ءَ بلکیں پہ جھان ءَ تُرس ءِ لیک اتگ ، آئی ءِ گوشگ اَت کہ پاکستان ناں ایوک ءَ پہ بلوچستان ءَ بلکیں پہ سرجمیں دمگ ءِ ایمنی ءُ ساکمی ءَ ٹوھیں تُرسے – اے المی اِنت کہ اقوام متھدہ ءُ ایندگہ میان استمانی واک جھان ءِ بے پانکی ءُ مردمی جانانی تاوان ءِ بنیادی پارستاں نشان بہ دنت ءُ پہ آیانی گر ءُ دار ءُ دیمپانی ءَ یک جْوانیں شونداتے بہ ٹاھین ایت – اے دمگ ءَ داں ھما وھد ءَ ایمنی ءُ ساکمی نہ رس ایت داں کہ پاکستان ناشرکاری ءَ رودینگ ءُ پلہ مرزی کنگ ءَ اِنت – پاکستان ءِ مزھبی جنگولیں دار دستگ جوڑ کنگ ءُ کارمرد کنگ ءِ شونداتانی پد ءَ گیشتر دست ءَ کسملیکیں جنگول ءُ اسلامی ترندرو واکدار جوڑ کنگ بیتگ اَنت، کہ آسر ءَ پہ میان استمانی ایمنی ءَ بیھارے۔پاکستان ءِ ھیل داتگیں ترندرواں یورپ، میانی رودرتک ءَ بہ گراں داں ھندوستان ءَ ناشرکاریں ارش کرتگ۔دودمانداریں جھان ءَ اے ترسناکیں مزھبی گنوکانی بگیری ءَ جنگ کنوکیں راج ءُ ھندی زْرمبشتانی پلہ مرزی کنگی اِنت – بلوچ، سندی ءُ پشتون رنگیں راج سداں سال کْوھنیں سیکولریں دودماناں چہ مزھبی ترندروانی پنجگ ءَ پھریزگ ءِ جھد کنگ ءَ اَنت – میان استمان ءَ اے چست بیتگیں جیڑہ ءِ نیمگ ءَ دلگوش کنگ لوٹ ایت ءُ دمگ ءَ پہ آجوئی ءَ جنگ کنوکانی کوشستانی پلہ مرزی کنگی اِنت –
ڈاکٹر نسیم بلوچ ءَ گوشتگ بلوچ وتی لبرل ءُ سیکولریں ربیدگانی پھریزگ ءَ پاکستان ءِ لیکھی بنیاد ءَ اسلامی لشکر ءُ آئی ءِ مزھبی پروکسیانی بگیری ءَ جھد کنگ ءَ اَنت – نی ھما وھد اتکگ کہ میان استمان اے گپ ءَ بہ من ایت کہ بلوچستان ءِ جیڑہ تیوک ءَ دمگی جیڑھے نہ اِنت بلکیں جھانی جیڑھے۔جھان چین ءِ بالادستی ءُ گیش بیوکیں اسلامی ترند روی ءِ بگیری ءِ جنگ ءَ بلوچ راج ءِ ھمکوپگ بہ بیت -اے گوں اے ھمے گپ ءَ بندوک اِنت کہ بلوچستان ءَ مردمی اگبالانی ٹوھیں بگیریاں پد ھم یورپ ءَگوں پاکستان ءَ وتی گزرانکی سیادی ءُ مسام برجاہ داشتگ اَنت – درچتگ ءُ ارزشتمند لیکگ بیتگیں کارشورانی مسام (جی پی ایس پلس)چہ پاکستان ءَ مردمی اگبالانی راھبند ءُ ربیدگانی برجاہ دارگ ءُ آیاں منگہ دیگ ءِ لوٹ ءَ کنت – ما یورپ ءَ زور دئے ایں کہ آ دیم ءِ نیاد ءَ ناں ایوک ءَ بلوچستان ءِ ناگیگیں جاور ءَ دیم ءَ بہ یاریت بلکیں پاکستان ءِ کارپدانی سر ءَ آئی ءَ جست ءُ پد کنگ ءَ مادنیں گامگیج بہ زیر ایت – بلوچستان ءِ مردمانی بنکی اگبال ءُ مڑاہ ءِ منگہ دیگ ءَ پاکستان ءِ جی پی ایس پلس بستار ءَ دیم ءَ برگ ءِ نیاد گوں ڈکاں بندوک بہ بیت یا بجینگ بہ بیت – بلوچ ءَ باز تاوان دیستگ نی وھد اتکگ کہ یورپ زوراکانی بگیری ءَ ترندیں دیدانکے بہ دار ایت ءُ گوں زیردستاں یکجھتی ءِ درشان ءَ بہ کنت-
آئی ءَ شیوار کرتگ، اگاں میان استمان پاکستان رنگیں زوراک ءُ مزھبی تنگدیدیں لیکھانی سر ءَ جوڑ بیتگیں ڈیھانی پلہ مرزی ءَ برجاہ بہ دار ایت گڑا چہ ایشی ءَ میان استمانی ناشرکاری گیشتر ترسناکیں کچے ءَ گیش بیت ءُ برجاہ مان ایت –
بی این ایم ءِ سرکماش ءَ گوشتگ یک رندے بلوچ راج وتی چہ مادناں سرچکاریں سرزمین ءِ واکدار بیت ءُ آیانی زیردستیں راجی مھترھند (ریاست) ءِ آجوئی بہ سبز ایت گڑا آیانی دیمروی دوستیں ربیدگ، آزاتیں گلگ ءُ مردمی ھمددری ءِ شوندات بلوچستان ، ھمساھگیں ڈیھ ءُ پہ سرجمیں جھان ءِ پاداریں ایمنی ءُ دیمروی ءَ کردے پیلو کرت کن اَنت-
آئی ءَ گوں میان استمان ءَ لوٹ کرتگ کہ آ یک دیمروی دوست، سیکولر چاگرد ، آزاتیں گلگ ءُ انسانی ھمدردی ءِ پجیگ ءَ بلوچ راج ءَ وتی سرزمین ءِ واھند بیگ ءَ کمک بہ کن اَنت –
