TBP Balochi

کچلاک بائی پاس ءَ پانزدہ اُشتر اناگتی نادراھی ءِ سوب ءَ مُرتگ انت وھدیکہ دگہ بازینے تلوسگ ءَ انت –

گیشیں ھالانی رِد ءَ شال ءِ نزیک ءَ کچلاک بائی پاس ءَ پانزدہ اُشتر اناگتی نادراھی ءِ سوب ءَ مُرتگ انت وھدیکہ ایندگہ اُشتر ھم تلوسگ انت، بگّ ءِ تہ ءَ پنجاہ ءَ گیش اُشتر بوتگ انت کہ یک یک ءَ اُشتر مرگ ءَ انت –

اُشترانی واھند محمد خان ءِ گوشگ انت کہ مناں لکھانی ھساب ءَ مالی تاوان بوتگ، پہ تاوان ءِ رککگ ءِ ھاتر ءَ واھند ءَ نادراھ ءُ مرتگیں اُشتر ھلار کُتگ ءُ شال ءِ مارکیٹ ءَ بھا ءَ برتگ انت، اشترانی آروکیں مزور پہ درد ءَ تلوسوکیں اُشتر درمان داتگ انت، گوستگیں شپ ءَ اُشتر چہ سوئی ءَ تاں شال ءَ پہ بھا آرگ بوتگ انت کہ سھور ءِ وھد ءَ اُشترانی جاور نگیگ بوتگ –

زورانسری آوار جنیانی بگیری ءَ شال پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی پنچ ھزار ءُ پانزدہ روچ سرجم بوتگ انت –

مروچی بی ایس او ءِ گوستگیں سرکماش مھیم خان بلوچ، شکیل احمد بلوچ ءُ دگہ مردماں بنجل ءَ اتکگ ءُ بیگواھیں مردمانی کھولانی گون ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ ائید جھان ءِ اسلام منوگرانی ھاتر ءَ وشی ءِ ھما روچ انت کہ مردم وتی زند ءِ سرجمیں ناوشی ءُ دلرنجیاں ھلاس کن انت ءُ یک ءُ دومی ءَ گوں وش بنت ، دومی ارساں پھک کن انت شادمانی کن انت –

ماما قدیر ءَ گوشتگ ائید ءَ سرجمیں جھان شادمانی کنگ ءَ انت بلے بژن ھمے مزھب ءَ گوں سیادی داروکیں بلوچ راج مروچی اسلامی استان پاکستان ءِ مسلمانانی دست ءَ وتی پرزندانی بیگواھی ءُ آھانی نمیرانی ءَ چہ وتی ائید ءَ زبھر انت – گوستگیں بازیں سالاں پاکستان ءِ چیریں ادارہ ءُ پوج ءِ ناشرکاری ءُ زوراکیانی سوب ءَ بلوچ راج ءَ ائید ءِ دارگ ءِ رواج ھلاس کتگ – ائید ءِ روچ ءَ کہ سرجمیں جھان ائید کنت، یکے دومی ءَ وتی وشیاں بھر کنت ءُ بلوچ راج ھمے روچ ءَ پرسیگ انت – ائید نزیک بوان انت ءُ استان ءِ زوراکیانی درچ یکشل ءَ برجاہ انت – بلوچ راج ائید ءَ سادگی ءَ.گوں بہ دار انت – استان ءِ ادارھاں بازیں دمگاں مردم زورانسری آوار جتگ ءُ بیگواہ کتگ انت – استان ءِ ادارھانی نیمگ ءَ بازیں سالے بیت کہ ائید ءَ جون سوگات کن انت – زورانسری آوار جنگ شھید بوتگیں مردمانی کھول وتی دوستیگیں مردمانی ھاتر ءَ دردیگ انت – مات ءُ پت، گھار، برات، چُک سیاد ءُ وارساں وتی دوستیگیں مردمانی درد دل ءَ داشتگ ءُ ارس شلین انت ءُ چوں ائید کت کناں – ھمے ھاتر ءَ درکانودی پاکستانی پوج ءُ ایجنسیانی دست ءَ آوار جنگ بوتگیں بلوچانی ھاتر ءَ ائید ءِ روچ ءِ ادار سَے ءَ شال پریس کلب ءِ دیم ءَ روانک ءِ کشگ بیت ءُ پد ءَ رند ءَ مچی کنگ بیت اِنت – وی بی ایم پی درسیں بیگواھیں مردمانی کھول، نودربرگل، درسیں پاٹی، انسانی ھکانی باسک، وکیل ءُ ھرتک ءُ پھناتاں سیادی داروکیں مردماں گوں لوٹ کنت کہ اے دردیگیں مات ءُ گوھارانی ھمراہ داری ءَ بکن ات -.

دومی نیمگ ءَ گوستگیں روچ ءَ چہ شال ءَ اوار جنگ بوتگیں ڈاکٹر نبی داد بگٹی یل کنگ بوتگ –

گیشیں ھالانی رِد ءَ گوستگیں شپ ءَ آوار جنگ بوتگیں ڈاکٹر نبی داد بگٹی یل کنگ بوتگ وھدیکہ آئی ءِ ھمراہ ڈاکٹر فیاض لاشاری انگت بیگواہ انت –

زانگ بہ بیت ھردو ڈاکٹر گوستگیں شپ ءَ ھما وھد ءَ آوار جنگ بوتگ انت وھدیکہ چہ اسلام آباد ءَ دیم پہ شال ءَ آیگ ءَ بوتگ انت کہ زیارت کراس ءَ آوار جنگ بوتگ انت –

متحدہ عرب امارات شھر دبئی ءَ جھمنندی ماڑی ءَ آس کپگ ءِ سبب ءَ شانزدہ مردم بیران بیتگ اَنت ءُ نُھ مردم زدگ بیتگ اَنت-

عرب نیوز ءِ رد ءَ دبئی ءِ سرکاری رسانکدر ءِ نیمگ ءَ شنگ بیتگیں درشان ءَ گوشگ بیتگ کہ سقل ڈیفنس ءِ یک جارکشے ءَ گوشتگ دیرہ ءَ الراس ءِ ھند ءَ آس ءِ کپگ ءِ سبب ماڑی ءَ پھزداری ءِ گامگیج ءِ نہ زورگ بیتگ –

درشان ءِ رد ءَ واکدار اے درگت ءَ پٹ ءُ پول کنگ ءُ ایشی ءِ سبب ءِ درگیجگ ءُ رپورٹ ءِ پیش کنگ گوشگ بیتگ-

کساس ساھت دوازدہ ءِ نزیک ءَ ماڑی ءَ آس کپتگ ءُ چارُمی منزل ءَ اپارٹمنٹ ءَ آس کپتگ دو ادار ءَ پد ساھت سَے ءُ توسینگ بیتگ-

گم جتیں کھولانی گون ءَ پدردی کنان ءَ دبئی سول ڈیفنس ءَ کڈن کنان ءَ گوشتگ ریائیشی ءُ کمرشل ماڑیانی واھند ءُ نندوکاناں کڈن کتگ وئیلانی رکگ ءِ ھاتر ءَ گامگیجاں بہ زور اَنت ءُ مردمانی زندگیاں بہ بچیناں –

چم دیستگیں مردمابی رد ءَ ایاں ماڑی ءِ آس ءِ کپگ ءِ برانز دیستگ اَنت-

روتاک خلیج ٹائمز ءِ رد ءَ ماڑی ءِ یک دکاندارے ءِ ملازمے ءِ گوشگ اِنت آئی ءَ یک تراکے ءِ توار ایش کتگ ءُ لھتے مردم باڑوداراں کش اتگ اَنت ءُ بلے دوت سک باز گیش بیتگ اَنت چرے ھاتر ءَ کشگ بیتگ اَنت-

یک دگہ چم دیستگیں مردمے ءِ رد ءَ فائر انجن، آس کُشوک ءُ پولیس ءِ آفیسر دمان ءَ سر بیتگ اَنت ءُ آیاں وتی ھمراھی ءَ یک کرینگے آورتگ ءُ مردمانی کشگے کمک اش کتگ آیاں زوت زوتیں مردمانی زند بچ اتگ اَنت-

دیرہ دبئی یک ھنچیں گنجان آبادیں جاھے کہ اود ءَ سُھر ءُ ماسلاھانی نھاد جاہ اَنت –

بلوچستان ءِ کیچ دمگ ءِ دشت ھنکین ءَ ناشناسیں مردماں جتاھیں وھداں شش موبائل ٹاور مانداشتگ ءُ بے کار کُتگ اَنت۔ دومی نیمگ ءَ بلوچستان لبریشن فرنٹ ءَ وتی شنگ کُتگیں درشانے تہ ءَ ٹاورانی ماندارگ ءِ ذمہ واری زُرتگ۔

اھوالانی ردءَ گوستگیں بیست چار ادارانی تہءَ دشت ءِ جتاھیں بازار کُمبیل، جان محمد بازار، فرنٹ، زریں بگ، سنگئی ءُ کسر ءَ ناشناسیں مردماں موبائل ٹاورانی سرءَ اُرش کُتگ ءُ ٹاورانی مشینری مانداشتگ اَنت۔

اھوالانی ردءَ ٹاورانی ماندارگءَ پد ھمے ھنکینانی تہءَ موبائل نیٹورک بند بیتگ اَنت۔

دومی نیمگ ءَ بلوچستان لبریشن فرنٹ ءِ جارکش میجر گھرام ءَ رسانکدراں شنگ کُتگیں درشانے تہءَ ٹاورانی ماندارگ ءِ ذمہ واری زیران ءَ گُشتگ کہ مئے سرمچاراں کیچ دمگ ءِ دشت ھنکین ءَ پاکستان ءُ چینی شرکتانی موبائل فون ءِ شش ٹاورانی سرءَ اُرش کُتگ ءُ مانداشتگ اَنت۔

 میجر گھرام ءَ گُشتگ کہ پانزدہ اپریل ءَ شمبے ءِ روچ ءَ ادار دوازدہ ءَ سرمچاراں دشت کمبیل، یک ءُ نیم ءَ جان محمد بازار، ادار چار ءَ پرنٹ بازار، ءُ چار ءُ نیم ءَ زرین بُگ ءِ تہءَ پاکستانی موبائل فون شرکت یوفون ءُ چینی شرکت زونگ ءِ موبائل فونانی ٹاورانی سرءَ اُرش کُتگ ءُ درستیں مشینری مان داشتگ اَنت۔

آئی ءَ گُشتگ کہ ھمے پئیم چاردہ اپریل ءِ بیگاہ ءِ ادار سات ءَ دشت کسر ءِ تہءَ چین پاکستان اکنامک کوریڈور (سی پیک) دگ ءِ سرءَ یوفون ءُ سنگئی بازار ءَ زونگ شرکت ءِ ٹاورانی سرءَ اُرش کُتگ ءُ درستیں مشینری مانداشتگ اَنت۔

میجر گھرام ءَ گُشتگ کہ پاکستان ءُ چین بلوچستان ءِ جتاھیں دمگانی تہ ءَ آجوئی دوستیں جھدکار ءُ دوزواھانی رندگیری کنگ ءُ آیانی اھوالانی درگیجگ ءَ ھوار وتی چریک ءُ پوجیانی کمک ءِ ھاترءَ موبائل فون ءِ ٹاورانی تند شنگ کنگ ءَ اَنت۔

بی ایل ایف جارکش ءَ گُشتگ ھمے پئیم سی پیک دگ ءِ پھازگ ءِ ھاترءَ آود ءَ موبائل فون ءِ ٹاور مِک کنگ بئیگ ءَ اَنت ءُ اے شوربندیاں بلوچ ءُ بلوچستان ءِ دیمروی ءِ نام دیگ ءَ اَنت ءُ مئے آسراتیانی لُٹ ءُ پُل ءَ ھوار مئے گلامی ءَ گیشتر ودینگ ءِ پندل سازگ بئیگ ءَ اِنت۔ آئی ءَ گُشتگ مئے اُرش بلوچستان ءِ آجوئی ءَ داں برجاہ مان اَنت۔

بھارت ءِ درستاں مستریں اُستان اتر پردیش ءِ پیسرگیں پارلیمنٹ ءِ باسک (ایم پی) عتیق احمد ءُ آئی برات اشرف 15 اپریل بزاں شمبے ءُ یک شمبے ءِ میانی شپءَ پریاگ راج ءَ سئے مردماں تیرگواری کُتگ ءُ کُشتگ اَنت۔

ھما وھدءَ اَے کوش ءِ وئیل بیتگ آ وھد ءَ پولیس عتیق احمد ءُ آئی برات اشرف ءَ پہ میڈیکل چیک اپ ءِ ھاترءَ نادراھجاہ ءَ برگءَ بیتگ ءُ آ بُت کش ءِ دیما تران کنگ ءَ بیتگ اَنت۔

عتیق احمد ءُ اشرف گوستگیں ایم ایل اے راجو پال ءِ کوش ءِ کیس ءَ بندیگ جاہ ءَ بند بیتگ اَنت۔ آ راجو پال کوش ءِ شاھد امیش پال ءِ کوش ءِ باروہ ءَ جُست پُرس کنگ ءِ ھاترءَ سابرمتی بندیگ جاہ ءَ چہ پریاگ راج ءَ آرگ بیتگ اَت۔

زانگ بہ بیت کہ دو روچ پیسر (پنچ شمبے ءَ) عتیق احمد ءِ بچ اسد احمد ءُ آئی ھمراھیں دگہ یک ورناھے غلام محمد اتر پردیش پولیس ءِ اسپیشل ٹاسک فورس ءَ جھانسی ءَ یک میڑ ئے تہءَ کُشتگ اِت اَنت۔

عتیق ءِ برات اشرف اسمبلی ءِ باسک بیتگ ءُ آ ھم دوشیگیں تیرگواری ءَ کُشگ بیتگ۔

گوستگیں ماہ ءَ مزن آمید گِس ءَ آیانی اے ارزی ءِ گوش دارگ ءَ مہ کن کُتگ اَت کہ اِشی تہءَ آیاں بھتام جتگ اَت کہ چہ پولیس ءَ آیانی زندمان تُرس آماچ اَنت۔

اتر پردیش ءَ ھندو راجدوستیں بی جے پی ءِ سرکار اِنت ءُ سرکار بگیریں گلاں اے کوشانی ذمہ واری پھازگی ءِ نزوری نامینتگ ءُ سرکار ایرادگری ءِ نشانگ کُتگ۔

اتر پردیش اُستان ءَ گوستگیں شش سالانی تہءَ جتاھیں بھتامانی دیمپانی کنوکیں 180 ءَ گیش مردم پولیس ءَ کُشتگ اَنت۔ اپوزیشن پاٹیانی گُشگ اِنت کہ آودہ ’تُرسناکیں جاور‘ اَنت وھدیکہ سوشل میڈیا ءَ اِشی ءَ ’جنگل راج‘ گُشگ بئیگ ءَ اِنت۔

چہ کوش ءَ پیسر وھدے عتیق ءُ اشرف چہ پولیس گاڑی ءَ ایر گیجگ بنت آیاں 10 سیکنڈانی تہءَ رسانکدری مردم چاریں نیمگ ءَ گِر اَنت۔ اھوالکار چہ دوھیں براتاں جُست کنگ ءَ بنت۔
یک اھوالکارے جُست کنت کہ شما جنازہ ءَ نہ شُتگ اِت، اِشی سرءَ شما چے گُش اِیت، آئی مکسد عتیق احمد ءِ بچ ءِ جنازہ بیتگ کہ آ ھما روچ ءَ ترندیں پولیس پھازگی ءِ تہءَ برجم بیتگ اَت۔
اِشی پسہ ءَ عتیق احمد ءَ گُشت کہ ’نہ بُرتگ اِش پمیشکہ نہ شُتگ اِنت۔‘اِشی ءَ پد اشرف ءَ تھنا ھمینچو گُشت کہ ’اژدری گپ ایش اِنت گڈو مسلم۔۔۔‘اشرف ءِ ھمینچو گُشگ ءَ گوں گندگ بیت کہ عتیق احمد ءِ سرءَ پستول ایر کنگ ءُ تیر جنگ بیت۔

اِشی ءَ پد عتیق احمد ءُ آئی برات ءَ نشانگ کنان ءَ تیر گواری کنگ بیتگ ءُ دوھیں برات وئیل جاہ ءَ کپ اَنت۔

عتیق احمد ءُ اِشرف ءِ کُشگ ءَ پد گندگ بیت کہ کوش کار جئے شری رام ءِ اوگام جنان بنت ءُ وتءَ پولیس ءِ دزگیری ءَ دئینت۔ عتیق احمد ءُ آئی برات ءِ کوش ءَ پد ھندوستان ءِ سیاسی گلاں بی جے پی ءِ سرکار ایراد ءِ نشانگ کُتگ ءُ گُشتگ کہ اے سرکار ءِ بے سوبی اِنت ءُ اے کوش پیسرءَ چہ جیڑ اِتگیں وئیل اِنت۔

شمبے ءِ بیگاہ ءَ ڈاکٹر نبی داد بگٹی ءُ ڈاکٹر فیاض لاشاری بیگواہ بیتگ اَنت۔

اھوالانی ردءَ ہیلتھ سروسز اکیڈمی اسلام آباد ءَ پبلک ہیلتھ ءِ تہ ءَ ماسٹر کنوکیں دو ورناہ دوشی اسلام آباد ءَ چہ شال ءَ آیگ ءِ وھدءَ بیگاہ ءِ ادار 7 ءِ نزیک ءَ چہ زیارت کراس ءِ ھند ءَ پاکستانی لشکریانی دست ءَ دزگیری ءَ پد بیگواہ کنگ بیتگ اَنت۔

بلوچستان ءِ تہءَ زورانسری بیگواھیانی بگیری ءَ سُرپُر کنوکیں گل وائس فار بلوچ مسنگ پرسنز ءِ وائس چئرمین ماما قدیر ءِ رد ءَ بلوچ ڈاکٹرز فارم ءَ پَکّا کُتگ کہ ڈاکٹر نبی دادبگٹی ءُ ڈاکٹر فیاض لاشاری اسلام آباد ءَ چہ شال ءَ آیگ ءِ وھد ءَ زیارت ءِ نزیک ءَ “ناشناسیں سلاہ بندیں مردماں” بیگواہ کُتگ اَنت۔

دومی نیمگ ءَ بلوچ اسٹوڈنٹس آرگنائزیشن بولان میڈیکل کالج بنزہ ءِ جارکش ءَ وتی شنگ کُتگیں درشانے تہءَ گُشتگ کہ ڈاکٹر نبی داد بگٹی ءُ ڈاکٹر فیاض لاشاری چہ اسلام آباد ءَ چہ شال ءَ آیگ ءِ وھدءَ زیارت کراس ءِ نزیکیں ھند ءَ چہ مروچی بیگاہ ءِ ادار ھپت ءُ نیم ءَ ناشناسیں مردماں دزگیر کنگ ءَ پد بیگواہ کُتگ اَنت۔

بی ایس او بی ایم سی بنزہ ءَ اَے شرمناکیں کارپد ایر جنان ءَ گُشتگ کہ ما بی ایم سی ءَ ھوار ڈاکٹرانی کمیونٹی ءُ درستیں تکاں سیادی داروکیں مردماں گوں دزبندی کنیں کہ آ مئے ھمراہ داری ءَ بہ کن اَنت ءُ مئے ڈاکٹرانی پہ سلامتی ءَ یل کنائنگ ءِ جھد ءَ مئے ھم توار بہ بنت۔

جارکش ءَ گُڈسر ءَ گُشتگ کہ اگاں بیگواھیں ڈاکٹر زیت پہ سلامتی یل کنگ مہ بنت گُڑا بی ایس او شال ءَ ھوار سرجمیں بلوچستان ءَ زھرشانیانی جار ءَ جنت۔

سر بیتگیں ھالانی رد ءَ روکپتی بلوچستان ءِ دو جتا جتائیں دمگاں دگ ءِ وئیلانی تہ ءَ دو تیل باپار ءَ بندوکیں مردم بیران بیتگ اَنت-

گیشین ھالانی رد ءَ روکپتی بلوچستان ءِ دمگ چھبار ءَ تیل کشین گاڑی ءِ دگ ءِ وئیل ءِ آماچ بیتگ ءُ چریشی ءَ گاڑی ءَ آس کپتگ ءُ گاڑی ءِ ڈرائیور آس ءَ گپتگ ءُ ستکگ ءُ بیران بیتگ –

بیران بیتگیں ڈرائیور ءِ پجار پنجاہ ءُ سَے سالی ئیں دوست مھمد روزدار ء جلائی جھمنند تیس کوپان چھبار ءِ نام ءَ زانگ بیتگ-

ھمے وڑ ءَ ایرانشھر ءَ ھم یک تیل کشین گاڑی یے دگ ءِ وئیل ءِ آماچ بیتگ ءُ ڈرائیور ستکگ ءُ بیران بیتگ-

بیران بیتگیں مردم ءِ پجار سِی ءُ سَے سالی ئیں عرض مھمد ریگی ء درمھمد جھمند غریب آباد تفتان ءِ نام ءَ زانگ بیتگ-

ھالانی رد ءَ گوشگ بیتگ کہ اے وئیل بیست پنچ کیلو میٹر ءِ دوری ءَ اسٹیل میل ءِ ایرانشھر ءِ نزیک ءَ پیش اتکگ بیتگ کہ اود ءَ گاڑی کلٹی بیتگ ءُ گاڑی ءَ آس کپتگ ءُ چریشی ءَ ڈرائیور بیران بیتگ-

روکپتی بلوچستان ءَ دگ ءِ وئیلانی جاور یک ناوشیں ابکہ کنوکیں جاورے ودی کن اَنت کہ اود ءَ گاڑی وئیلانی آماچ بوگ ءَ اَنت بلے چرے گاڑیانی تہ ءَ سواریں گیشتریں مردم رکگ ءَ نہ اَنت کہ گوستگیں روچاں اے دمگانی تہ ءَ بازین گاڑیانی تامر شنگ بیتگ اَنت کہ آیانی توک ءَ اے گندگ بیت اِنت گاڑی آس ءَ گپتگ ءُ سچُگ ءَ اَنت –

اے وئیلانی گر ءُ دار کنگ ءَ انتزامیہ یا دگ ءِ پھازوکیں مردم ھچ ھساب ءَ گندگ ءَ آیگ ءَ اَنت اے ھم گندگ ءَ کیت اِنت داں آس کُشیں گاڑی کیت اود ءَ گاڑی ءَ آس وتی ھرجان زیر ات ءُ آئی ءَ سواریں مردم ھم اے آس ءِ ھرجان بنت اِنت-

آئی پی ایل 2023 ءِ بیستمی گوازی ءَ رائل چیلنجرز بنگلور ءَ چہ دھلی کیپٹلز ءَ گوازی کٹ اِتگ – اے سیزن ءِ تہ ءَ دھلی ءِ پنچمی رند انت کہ گوازی کٹگ ءَ نہ انت – دھلی کیپٹلز ءَ 175 ءِ ٹارگٹ پروشت نہ کُتگ – آر سی بی ءِ سوبمندی ءِ ھیرو وجے کمار ویشاک بوتگ کہ آئی سَے وکٹ گپتگ – پہ دھلی ءِ ھاتر ءَ منیش پانڈے ءَ نیم سنچری کُتگ بلے آئی ءِ نیم سنچری کنگ ءَ پد ھم آئی ءِ ٹیم ءَ گوازی نہ کٹ اِتگ – وراٹ کوہلی ءَ ھم پہ آر سی بی ءِ ھاتر ءَ پنجاہ رن جوڈ کتگ ـ چار گوازیانی تہ ءَ آر سی بی ءِ اے دومی گوازی انت کہ کٹگ انت –

یکسد ءُ ھپتاد ءُ پنچ رنانی ٹارگٹ پروشگ ءَ پہ دھلی کیپٹلز ءِ بندات ھراب بوتگ – پرتھوی شا اولی اوور چارمی بال ءَ انج راوت ءَ رن آؤٹ کتگ ـ دیمے اوور ءَ مچل مارش مزنیں شاٹ ءِ جتگ ءُ وت ءَ کوہلی دست ءَ کیچ آؤٹ کنائیں اِتگ – پاور پلے ءِ شش اوورانی ھلاسی ءَ تاں یش دھول ءُ کپٹن ڈیوڈ ھم آؤٹ بوتگ انت – دھلی کیپٹلز ءَ پاور پلے ءِ تہ ءَ چار وکٹانی تاوان ءَ سِی ءُ دو رن جوڈ کتگ –

دھلی کیپٹلز ءِ دو رناں سَے وکٹ کپتگ ، چریشی ءَ پد وارنر جوڈ بوتگ بلے سینزدہ بالاں نوزدہ رنانی جوڈ کنگ ءَ پد آ ھم آؤٹ بوتگ ـ آئی ءِ آؤٹ بوگ ءَ پد منیش ءَ پنجاہ ءُ اکشر پٹیل ءَ ھژدہ رنانی جوڈ کنگ ءَ کنگ ءَ پد دھلی ایندگہ بیٹس مین ھچ کُت نہ کتگ ءُ سرجمیں ٹیم ءَ بیست اوورانی تہ ءَ نُھ وکٹانی تاوان ءَ بس یکسد ءُ پنجاہ ءُ یک رن جوڈ کتگ اینریک ءَ گڈی اوور ءَ لھتے شاٹ جتگ بلے آ بس نہ بوتگ انت –

ڈیبیو کنوکیں وجے کمار آ سی بی ءِ نیمگ ءَ درساں چہ سوبمندتریں بالر بوتگ کہ آئی ءَ چار اووراں بیست رن داتگ ءُ سَے وکٹ گپتگ – آئی ءَ ابید محمد سراج ءَ ھم دو بیٹس مین آؤٹ کتگ –

آئی پی ایل ءِ شمبے ءِ روچ ءَ بوتگیں بیست ءُ یکمی گوازی لکھنو سپر جائنٹس ءُ پنجاپ کنگز ءِ میان ءَ بوتگ کہ پنجاپ ءَ لکھنو دیم ءَ دو وکٹاں گوازی کٹ اِتگ – لکھنو ءَ یکسد ءُ شست رنانی ٹارگٹ پنجاپ ءِ دیم ءَ ایر کتگ کہ پنجاپ ءَ سکندر رضا ءِ نیم سنچری ءِ کمک ءَ گپتگ، سکندر ءَ شاہ رخ ءِ ھم ھاسیں کمک ءِ گون بوتگ کہ شاہ رخ ءَ دہ بالاں بیست ءُ سَے رن جوڈ کتگ – اے دؤئیناں ابید میتھیو ءَ ھم بیست ءُ دو بالاں سِی ءُ چار رن جوڈ کتگ – شاہ رخ گڈی اوور ءَ چوکائے جتگ ءُ گوازی وتی ٹیم ءِ نام ءَ کتگ –

لکھنو ءِ ھاتر ءَ کپٹن کے ایل راہل ءَ پنجاہ ءُ شش بالاں ھپتاد ءُ چار رن جوڈ کتگ اشی ءَ ابید کائل مائرس ءَ ھم بیست ءُ نُھ رن جوڈ کتگ بلے ایندگراں چوش ھاسین گوازی پیش نہ داشتگ –

پنجاپ ءِ نیمگ ءَ کپٹب سیم کیرن ءَ درساں گیشتر سَے وکٹ گپتگ – یکسد ءُ شست رنانی ٹارگٹ پروشگ ءَ پہ پنجاپ ءَ اولسر ءَ جوانیں گوازی پیش نہ داشتگ کہ سیمی بال ءَ اتھرو تائیڈے ءَ رن نیاؤرتگ ءُ واتر بوتگ، چریشی ءَ پد امپیکٹ لیبی ءِ جاہ ءَ پربھسمرن اتکگ کہ آئی ءَ چار رن جوڈ کتگ ءُ آؤٹ بوتگ ءُ چریشی ءَ پد میتھیو ءَ سنگر داشتگ ءُ چل ءُ پنچ رن ءَ سر کتگ بلے پدا آئی ءِ آؤٹ بوگ ءَ پد ہرپریت، سیم کیرم ءُ جیتیش ھم آؤٹ بوتگ انت – بلے پدا ھم سکندر ءَ وت ءَ داشتگ ءُ تاں نیم سنچری کتگ بلے آ ھم پنجاہ ءُ ھپت رنانی جوڈ کنگ ءَ پد آؤٹ بوتگ بلے شاہ رخ ءَ وت ءَ برجاہ داشتگ ءُ تاں گڈی ءَ اشتاتگ ءُ گڈسر ءَ چوکائے جتگ ءُ وتی ٹیم کٹاریں اِتگ –

بلوچستان ءِ جتاجتائیں دمگاں دگ ءُ دگہ وئیلانی آسر ءَ ھپت مردم بیران وھدے کہ چار ٹپی بیتگ اَنت-

گیشیں ھالانی رِد ءَ بلوچستان ءِ دمگ مستونگ ءَ شھدگ سر ءَ کیڈٹ کالج کراس نزیک ءَ تُرند رؤکیں پک اپ گاڑی چپ بیتگ ءُ چریشی ءِ آسر ءَ چار مردم ٹپی بیتگ اَنت-

ٹپیانی تہ ءَ علم خان ء محمد اسماعیل لھڑی ، اللہ ڈنہ ء بھاول خان لھڑی ، ولی محمد ء میر علی لھڑی ، اللہ ڈنا ء زمیدار جھمنند لھڑی کلی گوھر آباد شال ھوار اَنت-

ٹپی زوت نواب غوث، بخش رئیسانی نادُراھجاہ ءَ برگ بیتگ اَنت کہ اود ءَ الاج کنگ بوگ ءَ اَنت-

وھدے کہ چہ ھب ءَ شال ءَ رؤکیں ھُزدار ءِ دمگ وڈھ نزیک ءَ دگ وئیل ءَ شش پولیس کارندہ ٹپی بیتگ اَنت کہ آ سول نادُراھجاہ ھُزدار ءَ برگ بیتگ اَنت اود ءَ سرجمیں پولیس کارندھاں ٹپّانی درد نہ سگّ اِتگ ءُ بیران بیتگ اَنت-

ھمے وڑ شال ءِ دمگ کلی خلی ءَ جنگ ءُ چوپ ءِ میان ءَ عبدالواحد نامیں مردمے بیران بیتگ، لاش چار ٹپاس کنگ ءَ پد کھول ءَ داتگ، وئیل درگت ءَ پولیس پٹ ءُ پول کنگ ءَ اِنت-

دگہ یک وئیلے شال ءَ چہ کراچی رؤکیں مساپر بس ءَ اناگاہ آس چست بیتگ بلے وئیل ءَ ھچ وڑیں تاوان نہ بیتگ-

زانگ بہ بیت شال کراچی راجی شھدگ سر ءَ روکیں مساپر بسانی سر ءَ مھلوک بھتام جنگ ءَ اَنت کہ بس ڈرائیور ءُ واھُنند بے زورتیں ساز ءُ سامان لڑ اَنت ئے کہ ھمے ھاتر ءَ گیشتر وئیل آماچ بنت، اشی ءَ ساری مساپر بساں بے کانودی ڈیزل ءُ پٹرول ءِ سبب ءَ بازیں بساں آس کپتگ ماں ءُ بے کساس جانی تاوان بیتگ-

ھمے وڑ بلوچستان ءِ دمگ کلات ءِ ھند نیمرغ کراس ءَ پیمپ ءَ لوڑیں مزدا ٹرک چپی بیتگ بلے اے وئیل ءَ ھچ وڑیں تاوان نہ بیتگ-