TBP Balochi

بلوچستان ءِ تیاب دپی شھر گوادر ءَ پاکستانی پوج ءِ گاڑی بمب تراک ءَ نشانگ کنگ بیتگ۔

اھوالانی ردءَ مروچی بیگاہءِ ادار 5 ءَ گوادر ءِ ھنکین پشکان ءَ ناشناسیں مردماں پاکستانی لشکری بمب تراکے ءَ نشانگ کُتگ اَنت۔

اھوالانی پدءَ بمب تراک ءَ لشکریاں تاوان ءِ دیمپانی کنگ کپتگ البت واکدارانی نیمگ ءَ چہ اے درگت ءَ داں انگت ھچ پئیمیں لیکہ دیما نئیتکگ۔ اُرش ءَ پد لشکری اُرش جاہ ءَ رستگ اَنت ءُ ھنکین انگیراں کُتگ اِش۔

زانگ بہ بیت پاکستانی پوج ءِ سرءَ بلوچستان ءَ مدام انچائیں اُرش بنت کہ اِشانی ذمہ واریاں بلوچ آجوئی لوٹوکیں گل زیر اَنت، البت مروچیگیں اُرش ءِ ذمہ واری داں انگت ھچ گل ءَ نہ من اِتگ۔

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، گل ءِ زھرشانی بنجل ءَ مروچی 5ھزار ءُ 16 روچ سرجم بوتگ انت – مروچی بی ایس او پجار ءِ سرکماش زبیر بلوچ، ایڈوکیٹ سھیلہ بلوچ، عطا محمد بلوچ ، ارسلان بلوچ، زیشان بلوچ ءُ دگہ مردماں بھر زرتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ ائید ءِ روچ ھر کجا گوں وشی ءُ شاتکامیانی ھمراھی ءَ ٹک دنت ھر ھما جاہ ءَ کہ راج ایردست کنگ بوتگ ءُ گلامی ءِ زنجیراں گوں ٹٹاتگ انت پہ آھاں ائید ءِ وشی درد ءُ رنجانی داب ءَ بنت – ائید ءِ بابرکتیں روچ ءَ ھم وی بی ایم پی ءِ نیمگ ءَ پہ زورگیر ءِ ھاتر ءَ پیام تچک انت کہ زلم ءُ زوراکی، زورانسری آوار جنی، نمیرانی ایردستی ءَ گیش برجاہ داشت نہ کنت بلکنہ اے پہ سرڈگار ءِپھازگ ءَ پند ءِ بھر انت بلے بوت کنت زوراک چہ اشی ءَ سرپد نہ انت کہ زوراکی ھچبر راجاں ایردست کُت نہ کنت بلکنہ اے پہ راجاں پہ شری ءَ ٹیل ءِ کار ءَ کنت –

ماما قدیر بلوچ ءَ گوشتگ کہ شھید بوتگیں بلوچ پرزندانی سرا مروچی بلوچ پھر بندیت ـ تچکیں مکسد ءِ سوب ءَ ھمک روچ کاروان ءِ تہ شھیدانی ھون تچگ ءُ آھانی جھد گیشتر بوان انت – پاکستان ءِ درسیں زلم ءُ زوراکی ءُ.کشت کوشاں ابید ھم پرایمنیں جھد وت بلوچانی دیمھونی ءِ فلسفہ ءِ آشنائی یے – ژانگولیں جون ءُ زورانسری آوارجنی ءَ ھلاس کنگ ءِ ھاتر ءَ درسیں ورنا ءُ زالبولاں وی بی ایم پی ءِ تہ ءَ بھر زورگی انت –

آئی ءَ گوشتگ کہ بلوچستان ءِ جاور نگیگ انت، ٹک وت ماں وت گلائیش انت – مروچی جھد کنوکیں شھیدانی ھوناں جھد تھنا دنیائے دیم ءَنیاؤرتگ بلکنہ زوگیریں ریاست ھم ترس ءِ آماچ انت –

ماما قدیر بلوچ ءَ گوشتگ کہ ریاست مئے دراجکش ءُ یکشلیں جھد ءَ چہ سک پریشان انت ءُ آئی ءِ ھلاس کنگ ءَ پہ وڈ وڈیں ھنر ءُ ھیلا کنگ ءَ انت –

ماھل بلوچ زورانسری ءَ گپتگیں انٹرویو انساپ ءِ لگتمالی ءِ بروبری اِنت، زالبولانی نشانگ کنگ ءِ آسر نوزدہ سد ءُ ھپتاد ءُ یک ءِ ڈول ءَ بیت اِنت – اے امل مردماں ریاست ءِ ھلاپ ءَ گیش برانز کنت –

اے گپانی درشان انسانی ھکانی باسک ءُ وکیل ایمان زینب مزاری ءَ دزگیری ءِ بندیگ جاہ ءَ بندیگیں ماھل بلوچ ءِ انٹرویو ءِ پژدر ءَ کرتگ اَنت – ایمان زینب ءَ چاگردی ترامجاھاں ٹوئٹ ءَ نبشتگ کتگ ئِے کہ ماھل بلوچ ءِ زورانسری ءُ اسکرپٹڈ انٹرویو ءِ آئی ءِ کیس ءَ گوں انساپ ءَ یک دگہ کوشے ءِ بروبری اِنت-

آئی ءَ گوشتگ کہ گوست ءَ آئی ایس پی آر ءِ اے اھمکی گندگ ءَ امل آصف غفور ءَ جوڑ کتگ – آئی ءَ اے چیز ءِ سما نیست اِنت کہ بلوچ اسلام آباد نہ اِنت-

ایمان مزاری ءَ گوشتگ کہ پوج ءَ اے گپ یاداشتی بیگ لوٹ ایت کہ بلوچستان ءَ چی بیتگ وھدیکہ ڈاکٹر شازیہ ءِ گون ءَ جنسی زوراکہ بیتگ گڑا بلوچستان ءَ زالبولانی نشانگ کنگ ءِ آسر ھما بیت اِنت نوزدہ سد ءُ ھپتاد ءُ یک ءَ بیتگ- وھدیکہ مئے پوج ءَ یک یک ءُ زالبولانی ھلاپ ءَ جنگی جرائم کتگ اںت گڑا اے آیانی سلیں گامگیج بیتگ ءُ اے وڑی ءَ ڈیھ نہ بچ ایت – اے وڑیں نشانگ بس مردمانی دل ءَ نپرت ءَ ابید دگہ ھچ ودی کت نہ کنت-

ایمان مزاری ءَ نبشتگ کتگ بزگیں بلوچ زالبول ءُ زھگانء نشانگ کنگ ءُ آیانی کمشرپ کنگ ءِ امل بند کنگ بہ بیت – مئے پوج ءَ اے تچکیں کلوہ اِنت پاکستان ءِ مھلوک اے اجازت ءَ ھچ نہ دنت آ وتی زوراکیاں Entitlement ءِ سبب ءَ پد ءَ دوبر ڈیھ ءَ ٹکر ٹکر بہ کنت – ماھل بلوچ ناشرکارے نہ اِنت اے پوجی جرنیل ناشرکار اَنت-

ھمے رنگ ءَ بلوچ نودربر رھشون ڈاکٹر ماہ رنگ بلوچ ءَ اے درگت ءَ ٹوئٹ کنان ءَ گوشتگ کہ ’ بلوچ زالبعلاں جنگ ءِ نیمگ ءَ تیلانک مہ دے ات ‘ اوگام جنوکیں مردماں زوراکی ءِ آسل ءِ سرپدی بیگ لوٹ ایت وھدیکہ کجام راج ءَ یکشلیں نسل کشی ءِ دیمپانی کنگ کپتگ گڑا اے رستریں تاکتاں کسی جان نہ بکش اتگ اَنت ھمے رنگ ءَ ھروھد ءَ زالبول ءُ زھگ نشانگ ءَ بیتگ اَنت-

آئی ءَ گوشتگ کہ ریاست ءَ یک بے وسیں دو زھگانی مات ماھل بلوچ وتی دروگیں پندلانی جنگ ءِ واستا دزگیری ءَ داشتگ اے زُلم ھروھد بیت اِنت دانکہ ما وتی زیردستی ءِ بستار ءَ مہ زانین پُر ایمنین بلوچ مئے بلوچستان ءِ آیوکیں نسلانی مانزمان اِنت ھر ھما مردم ءَ وتی کرد پیلو کنگی اِنت-

ھاش ءُ مھرستان ءَ تیرگواری وئیلاں دو مردم بیران بیتگ اَنت –

سر بیتگیں ھالانی رد ءَ ھاش ءَ سلاہ بندیں مردماں تیرگواری کنان ءَ یک مردمے کُشتگ-

کُشگ بیتگیں مردم ءِ پجار اللہ بخش جمالزئی ء کادر بخش ءِ نام ءَ زانگ بیتگ-

ھالانی رد ءَ گوشگ بیتگ کہ اللہ بخش کُشگ ءَ پد اود ءَ اُرشکار تکگ ءُ شتگ اَنت، وئیل ءِ سبب زانگ نہ بیتگ-

ھمے وڑ ءَ مھرستان ( مگس) ءَ سلاہ بندیں مردماں تیرگواری کنان ءَ یک مردمے کُشتگ –

کُشگ بیتگیں مردم ءِ پجار کاظم باھوٹزئی ءِ نام ءَ زانگ بیتگ کہ مھرستان ءِ جھمنند گوشگ بوگ ءَ اِنت –

روکپتی بلوچستان ءَ چوشیں وئیل یکشل ءَ بوگ ءَ اَنت کہ ایشانی پژدر گیشتر وت ما وتی دشمنی ءُ دگہ جیڑہ گوشگ بوگ ءَ اَنت-

چین ءِ وزیر دفاع ءَ روس ءِ سروک ولاد دیمیر پوتن ءَ گند ءُ نند ءِ وھد ءَ ڈیھ ءِ مھکمی ءُ برجمی ءِ سر ءَ داد شانی داتگ-

ھال سرکنوکیں ادارہ اے ایف پی ءِ رد ءَ چین ءِ وزیر دفاع لی شنگفو ءَ گوشتگ کہ ’ مئے سیادی سک مھکم اِنت اے سرد جنگی ءِ وھد ءَ سیاسی ءُ لشکری اتھاد ءَ برزتری اِنت ءُ یکدم مھکم اِنت ‘-

چین ءِ وزرات دفاع ءِ نیمگ ءَ شنگ بیتگیں لی شنگفو ءَ گوشتگ کہ روس ءُ چین ءِ میان ءَ سیادمندی نوکیں دور ءَ سر بیتگ-

چین ءِ وزیر دفاع ءِ نیمگ ءَ اے اولی رند اِنت ڈنی ڈیھاں تر ءُ تاب کنگ اِنت ھمے واستا آئی ءَ درستاں گیش روس گچین کتگ ھردوکیں نیمگاں سیادی ءِ یک نوکیں درے پچ بہ بیت ءُ ایشی ءِ گیش شرپ کنگ بہ بیت اِنت-

وزیر دفاع لی شنگفو ءَ دیمتر ءَ گوشتگ کہ ھردوکیں ڈیھانی پوجانی میان ءَ اسٹریٹیجک ءِ سیادی گیش مھکم کنگ ءِ ھاتر ءَ روس ءِ گون ءَ کار کنگ ءَ ساجو اِنت-

سروک پوتن ءِ گون ءَ گند ءُ نند ءَ روس ءِ وزیر دفاع سرگی شوئیگو ھم جاڑیگ اِنت – سروک پوتن ءَ چین ءِ لشکری کمک ءِ وش اھت کنان ءَ گوشتگ ’ لشکری تکاں گچینی ءِ رنگ ءَ کار کنگ انت وتی واھشانی سرپدی ءِ رد ءُ بدل بیت اِنت –

آئی ءَ گوشتگ کہ پوج ءِ تکنیکی سُر ءُ پراں ھوار جتائیں تک ءُ پھناتاں ھیلکاریاں ھم برجم دارگ ءَ اِنت-

گوستگیں ماہ ءَ سروک شی جن پنگ ءِ تر ءُ تاب ماں ماسکو ءَ پد وزیر دفاع لی شنگفو ءَ روس ءِ تر ءُ تاب کتگ –

سروک شی جن پنگ ءِ ولاد دیمیر پوتن ءِ گون ءَ دو روچی تر ءُ تاب ءُ گپ ءُ تران ءَ ھردوکیں ڈیھانی سیادی نوکیں در ءَ سر بوگ ءِ ستاشانی کتگ –

زانگ بہ بیت فروری ءِ ماہ ءِ گڈسر ءَ چین ءَ یوکرین جنگ ءِ ھلاس ءُ امنی مھکمی ءِ دوازدہ نکاتانی بارو ءَ گپ پیش کنگ بیتگ اَنت-

دوازدہ نکاتانی امن ءِ شوربندی ءَ چین ءَ یوکرین ءِ جنگ ءَ سیاسی گیش ءُ گیواری ءِ سر ءَ ھردوکیں ڈیھ کڈن کنگ بیتگ اَنت دانکہ ھردوکیں نیمگاں جنگ ءِ تہ ءَ کمی بہ بیت اِنت-

شوربندی ءِ ھرچ تک ءَ شھریانی پھریزگ ءُ دراھیں ڈیھانی شرپ کنگ گوشگ بیتگ بلے چین ءَ روس ءِ سر ءَ زیر بیتگیں گامگیج ایر جتگ-

زِر پهازیں پدائی عُمرجان

نبشتہ کار: کندیل بلوچ

دی بلوچستان پوسٹ

“اِے سربُلندیں گواڑگاں زمین ءِ پاسبان بنت”
“دا جنگ ءِ گُڈی ساهت ءَ پہ آجوئی مڑان بنت”

آجوئی ءِ جنگ چوناها وتی آشوبی جُدکارے کردار ءَ وت سینگاریت ءُ رُژناه کنت بلّئے عُمرجان بلوچ آجوئی ءِ جنگ ءَ را دِگہ نوکیں رنگ ءُ دروشُمے دات سربُلند جان ءَ وتی کسانیں اُمر ءِ تہ ءَ وتی کرد چو کوه ءِ پیم ءَ مزن کُت آئی ءِ اِے گرانبهائیں دیمونی همُکّ مردم ءَ را پہ جیڑگ ءَ لاچار کنت کہ آئی ءَ وتی اِے اُمر ءَ اِے راه چو گچین کُتگ ما اگاں گوستانک ءَ بیچاریں گُڑا اود ءَ مارا اَنچیں ورنایانی نام گندگ ءَ کیت کہ چِد ءُ ساری هم پہ وتن پدائی کن اَنت آهانی تہ ءَ ریحان جان، شھید مجید، ءُ شھید درویش اَنت بلّئے سربُلند جان ءِ کُربانی پہ راج ءِ ورنایاں یکّ درونتے اگاں هرکّس پہ وتن ءَ کُربان بوگ ءِ واهگے بداریت گُڑا پیسر ءَ الّم اِیشاں وان ایت-

عُمرجان ءِ پگّر ءِ لیکہ ءَ مرچی بلوچ ورنا گوں جوانی ءَ دیم ءَ برگ ءَ اَنت سربُلند مُھکمیں پگّر ءِ نام اِنت ءُ مُھکّمیں پگّرانی واهُند وتی راجی آجوئی ءِ کاروان ءَ مُھکّم کن اَنت بلوچ راج ءِ مُھکّمیں سِتکّ ءِ گوں سربُلند جان ءِ مُھکّمیں پِگّر ءَ بندوک اِنت ءُ اِے گّپ ءَ مرچی دُرست سرپد اَنت زان اَنت کہ تباهی پہ دژمن ءَ اِنت ءُ آجوئی پہ بلوچ راج ءَ اِنت-

آ گوں کسانیں بالاد ءَ مُھکّمیں پگّر ءُ سسا گوں هجگیں واهگ آں هزار مُرادی یے بچکنداں مرگ ءَ پہ شات امباز کنت ءُ زِرے دلبند ءَ پہ ابدمانی نمیران بیت چہ درکسانی ءَ مردم ءِ دل ءَ پہ زمین ءَ مھر ءِ بہ بیت گُڈ سرا آرا اِے اشک گنوکی ءِ سیمسراں سرکنت اِے مھر ءِ لِزت ءَ هما مار ات کنت کہ آ وت گلزمین ءِ مھراں گوں بندوک اِنت ءُ مرچی یکّ زمین زادگے وتی مھر ءِ دراهئیں سیمیراں چہ گوزگ ءَ اَت پہ وتی گُلزمین ءُ زِر ءَ وتی سر ءَ ندر کنگ ءَ پہ اِے زِر ءُ زمین ءَ هزاراں بامرداں وتی زند کُربان کُتگ هنچو کہ همل جیھند ءَ وتی زِر چہ پرنگاں رکینتگ همے وڑ ءَ همل جان، تسلیم جان، اسد جان ءُ کچکول جان پہ بچکندے داں وتی گُڈی تیر ءَ پہ وتی زمین ءِ پهازگ ءَ گوں بدواه ءَ جنگ دات او مرچی همے پئیم ءَ عُمرجان پہ بچکندے وتی جان ندر کُت همے دمان ءَ گُلزمین جکس ایت بدواهے سر ءَ نپت ءُ بیر کپت اَنت ءُ زِرے چولانی توار اِیرموش بوت انت ءُ گلزمین ءِ دیوانگ ءَ گوں گلزمین ءَ کُتگیں کول سرجم کُت ءُ زِرپهازیں بچ پہ وتن سالونک بوت-

زمین ءِ اِشکّ ءَ سربُلند ءَ گوں وت ءَ پیچیتگ اَت ڈیھ ءِ شیدائی هون آئی ءِ رگ ءُ بندانی تہ ءَ گردش کنگ ءَ اَت کہ آرا اَنچو سرمتاب ءُ سرمچنڈ ءِ کُت آئی ءَ وتی زند ءِ وشی جوانی ءِ لزت درست شمُشتاں پہ هاک ءِ پهازگ ءَ رپت سربُلند ءَ زمین ءِ گّم پر اَت آرا گُلامی ءِ بدیں نام پہ وت ءَ شات نہ بوت ءُ وتی هیشی سرے پہ ڈیھ ءِ پهازگ ءَ ندر کُت أگاں نہ زندگ بوگ کئے نہ لوٹ ایت مرچی آگاں اِے راج جھان ءَ زندگ اِنت گُڑا همئے پیمیں بُرز ءُ بُلندیں سرانی دیمونیانی برود ءَ آئی ءَ زانتگ اَت زندگ بوگ ءِ مول ءُ مراد چے اِنت آئی ءَ وتی زند ءِ مکّسد زانتگ اَت آئی ءَ زانتگ اَت من اگاں زندگاں من ءَ پہ مُدامی زندگ بوگ ءِ هاتر ءَ چیزے کنگی اِنت اگاں آئی ءِ زند ءِ تہ ءَ تھنا پہ لاپ ءِ ولینگ ءَ پُچ ءُ پوشاک ءَ بہ بیت اِے وڑیں مکسد ءِ دارگ بنی آدم ءَ شریں کرد ءُ نام توار نہ دنت هما مکسد مردم ءَ وژنام کنت کہ آ پہ راجی سِت ءُ نپانی هاتر ءَ بہ بیت اگاں کّسے پہ راجی لوٹ ءُ گزرانی هاتر ءَ بہ جیڑ ایت آ مکّسد مُھکّمیں پگّرے بیت گُڑا آپِگّر مردم ءَ را چہ مرگ ءَ پد هم زندگ کنت-

آشوب ءِ درپشوکیں نام تئی رند پداں ڈیوائیں شیدائی پروانگ اَنگت رھادگ اَنت مرچی سرجمیں دُگنیا زانت بلوچ راج وتی سر ءَ بوهوکیں زُلم ءُ زُوراکیانی دیمپانی ءَ شر زانت ءُ هر وڑیں دیمونی ءِ دیگ ءَ ساڑی اِنت بلوچ راج ءِ بچ ءُ جنک، پیر ءُ ورنا وتی سینگ ءَ شورهاں بندان اَنت ءُ دژمن ءِ دیم ءَ چو باتِل ءَ مِکّ بنت ءُ اِے کاروان ءِ گرانیں باراں کوپگاں زور اَنت کہ اِے اهدے فرعون ءِ نیست ءُ نابود کنگ ءَ شری ءَ زان اَنت ءُ سرپد اَنت مرچی کسانسالیں عُمرجان شورهاں وتی سینگ ءَ بند ایت باندا هزار عُمرجان ودی بیت پہ وتی زمین ءُ زِر ءں پهازگ ءَ اِے کاروان نہ اوشتیت ءُ ناکہ اِے سرمچنڈ وتی پاکیں زمین ءُ زِر ءِ موکگ ءَ پدکنز بنت بلّکیں اِے کاروان اَنگت وتی منزل ءِ نیمگ ءَ گوں تمردی ءَ جُنزان کنت ءُ اِے جُھد ءَ هواریں ورنایانی کوهیں باتن ءَ چِد ءُ گیش دیمونی دیگ ءِ جزبگ ودی بیت ءُ دگہ هزاراں ورنا پیداگ کنت ءُ تنیگا بلوچ ءِ مات سنٹ نہ اَنت بلّکیں دگہ هزاراں زِرپهاز اِیں ورنا پہ وتی گلزمین ءِ پهازگ ءَ ودی کن اَنت ءُ دژمن ءَ چہ وتی آپبنداں پہ مُدامی گلین اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

زاھدان ءَ ایرانی چیریں ادارہ “اطلاعات” ءَ یک ورنایے دزگیر کنگ ءَ پد بیگواہ کرتگ –

سر بیتگیں ھالانی رد ءَ گوستگیں روچ ءَ روکپتی بلوچستان ءِ بنجاھی شھر زاھدان ءَ ایرانی چیریں ادارھاں یک ورنایے آوار جنگ ءَ پد گون وت برتگ-

آوار جنگ بیتگیں مردم ءِ پجار مھمد ناروئی ء علی ءِ نام ءَ زانگ بیتگ –

ھالانی رد ءَ گوشگ بیتگ کہ آ زاھدان ءَ لس پوشاکی کارندھاں آوار جتگ ءُ برتگ ءُ آئی ءِ آوار جنی ءِ وھد ءَ آئی ءِ نزیکیں مردماں دیستگ –

ھالانی رد ءَ گوشگ بیتگ کہ آئی ءِ کھول ءَ چیریں ادارھانی کارندھانی گور ءَ جُست ءُ پرس کرتگ گڑا آیاں اے آوار جنی ءِ گپ رد کتگ-

زانگ بہ بیت روکپتی بلوچستان ءَ مردمانی آوار جنی ھما وھد ءَ بندات بیتگ انت کہ اود ءَ ماھو نام جنکے ءِ گون ءَ زورانسری زوراکی ءِ ھلاپ ءَ یک برانزے چست بیتگ کہ چرے برانز ءَ روکپتی بلوچستان ءَ مھلوک ءَ پہ ماھو بلوچ ءِ انساپ ءَ بازیں کچے ءَ زھرشانی کتگ بیتگ-

نبشتانک: بی ایس او آزاد بلوچ نودربرانی درسگاہ

نبشتہ کار: البرز بلوچ

دی بلوچستان پوسٹ

بی ایس او ءِ نام ءِ اِشکُنگ ءَ بلوچ مھلوک پھر بند ایت کہ آئی ءَ اے ڈولیں ادارھے رس اتگ کہ پہ راج ءِ نودربراں درسگاھے ءِ بنیات ءَ آھانی رھشونی ءَ کنگ اِنت۔ اے ھمے پتر اِنت کہ اد ءَ بلوچ راجی رھشوناں وتی راجی آجوئی جنز ءِ بابت ءَ پِگری ھیل گپتگ ءُ راجی جنز ءِ رھشونی ءَ کنگ ءَ اَنت۔ اے درسگاہ ءَ بلوچ چاگرد ءِ تہ ءَ چاگردی ءُ راجی آشوب آران ءَ مرچی بلوچ راج ءَ را سرجمیں بلوچستان ءَ یک بیگ ءِ سکین داتگ ءُ ھمے پگر ءِ ولّ ءَ چہ رُستگیں بر ھرچ بلوچ دمک ءُ کوچگاں وڑے نا وڑے ءَ گِندگ ءَ کائینت۔ ھزارانی کچ ءَ ورنایاں اے پتر ءِ وسیلہ ءَ وتی ساچستی بود درنگاز اتگ اَنت ءُ مھکمیں آجوئی پنت زوران ءَ جنز ءِ جتائیں سنگراں وتی کرد ءَ پیلو کنگ ءَ اَنت۔بلے اے گپ ھم شموشگی نہ اِنت کہ بازیں ورنا گمے درسگاہ ءِ تہ ءَ اوار بیتگ اَنت بلے جتائیں ھیل ءُ بھانیاں راہ ءِ دیم ءَ مکسد ءَ چپ شتگ اَنت ءُ آجوئی کاروان ءَ شُت کُت نہ کتگ ءُ یلہ داتگ اش۔ بازیناں جتائیں نپری،ٹولی ءُ پاٹی ءِ نپانی واستا ھم اے ادارہ کارمرز کتگ ءُ مھکمیں تچکیں بلوچ ورنایانی درسگاہ پرُشت ءُ پروش ءِ آماچ کُتگ۔ بلے راست گوْشتگ ماما تالپور ءَ” بی ایس او بلوچ راجی جنز ءِ ارواہ اِنت۔” اے ارواہ ءَ اِنچو گٹگیر کنگ ءَ پد ھم وتی ساہ نہ داتگ اَنت، کپگ ءُ پروشگ ءَ پد ھم دوبر پاد اتکگ ءُ مِنزل ءَ جنزان بیان بیتگ۔ اے ادارہ ءَ سرانی سر جوڑ کتگ ءُ بلوچ جنز ءَ داتگ کہ مرچی بلوچ جنز ءِ رھشونی ءَ کنگ ءَ اَنت۔ بی ایس او آزاد ءَ بلوچ چاگرد چہ تھار ءُ تنکیں سوچ ءَ کش اتگ ءُ راجی مُچی ءِ بھر کتگ، بلوچ چاگرد مزہبی، ٹکی، قبائلی ءَ اوار ایندگہ ٹولیاں بھر بیتگ بلے اے ادارہ ءَ بلوچ ورنا ءُ لس مھلوک ءِ تہ ءَ سِنچ ءُ سرپدی آران ءَ بلوچ چاگرد چہ اے ھلِّتاں کش اتگ ءُ راجی ھوالہ ءَ یکجاء کتگ۔

بی ایس او ءِ بست ءُ سئیمی بنجاھی لس مجلسی دیوان(تئیسویں مرکزی کونسل سیشن) بلوچ راجی جنز ءِ تہ ءَ نوکیں راھے پچ کنت۔ ھمے گندگ بیت کہ نوکیں رھشون ھستیں وھد ءِ بلوچ راجی جنز ءِ لوٹ ءُ گُزراں سرپد ءُ پوہ اَنت ءُ گگتریں ءُ مھکمیں رنگے ءَ بلوچ ورنایانی رھشونی ءَ کت کن اَنت۔ ھستیں وھد ءَ بی ایس او ءِ سر ءَ اِنچو کریک ڈاؤن ءُ آھی ءِ رھشون ءُ جھدکارانی زورانسری بیگواہ کنگ ءُ آھانی زانگولیں جونانی ماں ویراناں دور دیگ ءَ پد ھم بنجاھی لس مجلسی دیوان ءَ برجم دارگ داد کرز ایت۔ پہ دل ءُ ستک ھما ورنایانی جُھد ءُ مکلسی ستا کرز ایت کہ اے آجوئی ءِ مکسد ءَ دمانے ھم پُشت نہ داتگ ءُ ھرچ استانی ءُ رد آشوبی تاکتانی دیم ءَ چو البرز ءِ کوہ ءَ مِکّ بیتگ اَنت ءُ اشانی دیم اِش داشتگ۔ چوناہ ءَ آشوبی جھدکارانی واستا کربانی دیگ ءُ گرانی ءُ سکی ءِ سگگ چوشیں مزنیں ھبرے نہ اِنت چیاکہ کسے اے راہ ءَ گچین کنت گڑا آ زند ءِ سرجمیں آسراتیاں سرگْوزْ ایت ءُ وتی مکسد ءَ سرجم کنگ ءِ ھاتر ءَ وت ءَ ندر کنت بلے اینچو زلم ءُ زوراکیاں، رھشون ءُ جھدکارانی گار ءُ بیگواھیانی ءُ نمیرانی ءَ پد ھم اے جاوراں بی ایس او ءِ ورنایانی مرکزی کونسل سیشن دارگ وتی تہ ءَ سکیں مزنیں ھبرے۔

چوناھیگا بلوچ سیاست ءِ دپتر ءِ تہ ءَ کونسل سیشن سکیں مزنیں ارزشتے داریں مراگھے ءُ بلوچ نودربر سیاست ءِ تہ ءَ بی ایس او کونسل سیشن ھما دیوان بیتگ کہ سرجمیں بلوچستان ءَ چہ بلوچ ورنا اتکگ ءُ یکجاہ بیتگ اَنت ءُ دیوان ءَ بھر اش زرتگ ۔ مرچی بہ گندے اشانی ارزشت یک کچے ءَ کم ترِ اتگ ءُ ایشی ءِ زمہ وار بلوچ ورنا اَنت کہ جتائیں گڈ ءُ منجی ءُ ھیل ءُ بھانیاں وتا چہ سیاسی امل ءَ دیر داشتگ ایش۔ یک راجے ءِ ورنایاں وتی راجی گل ءُ ادراھانی سر ءَ پھر بندگی اِنت ءُ آھانی پلہ مرزی کنگی اِنت بلے مئے راج ءِ لھتے ورنایاں ھلّتے زرتگ کہ وتی ادارھانی دوست دارگ ءُ پلامرزی ءِ بدل ءَ دریں مردم ءُ ادراھانی رند ءَ کپ اَنت ءُ جتائیں لیکھانی تہ ءَ وت ءَ گڈ ءُ منج اش کتگ ۔ ھمے ھاتر ءَ مرچی کونسل سیشن ءِ جاہ ءَ( مزہبی اجتماع) ءُ ایدگہ ریاستی میڑہ گیش بیان اَنت ءُ مھلوک ءِ دلگوشی ھمے راج دژمنیں پندلانی نیمگ ءَ روان اِنت۔ بی ایس او آزاد ءِ کونسل سیشن ءِ سر ءَ بازیں امیتے دارگ بیت کہ اے ھمے ورنا اَنت وتی ساہ ءُ نپری واھشتاں درتکگ ءُ بلوچ جھد ءِ بھر اَنت، اود ءَ بیتگیں سیاسی ءُ آشوبی ھبر ءُ پیسلہ سرجمیں بلوچ چاگرد ءِ گھتری ءِ مانزمان اَنت۔ مرچی بلوچ ورنا جتائیں استانی ڈسکورسانی آماچ اَنت بلے ایشانی ھلاپ ءَ اوشتوکیں ورنا گل بی ایس او آزاد ءِ اِنت کہ انچو گوْست ءَ ایشانی ھلاپ ءَ اوشتاتگ مرچی گھتریں رنگے ءَ اوشتیت ءُ ایشاں پروش دات۔

مرچی اے دمگ ءِ تہ ءَ بلوچ گھگیری پہ ایندگہ راجاں چیدگے ءُ بلوچ آشوبی ورنا پہ ایندگہ راجانی ورنایانی واستا مزنیں درور اَنت۔ بلوچ ورنایاں ھمے ادارہ ءِ وسیلہ ءَ سرانی کربان کنگ ءُ ھونانی ریچگ ءَ گوں وتی راجی جھد منارینتگ۔ بلوچ راج وش بھتے کہ آئی ءَ اے وڑیں نودربر ادارھے رس اتگ کہ آ بلوچ ورنایانی پگری ءُ شعوری تربیت ءَ کنگ ءَ اِنت۔ بلوچ ورنا ءُ نودربر اے موہ ءِ ارزشت ءَ بہ زان اَنت ءُ اے کاروان ءِ مساپر بہ بنت ءُ بلوچستان ءِ آجوئی ءِ جھد ءَ آوار بہ بنت۔ بلوچ ورنایاں زی ءُ پیریگیں وتگڑیں گڈ ءُ منجیاں چہ درایگی اِنت ءُ املی پِڑا بلوچ راجی جنز ءِ بھر بیگی اِنت اگاں نہ بلوچ راج تھاری ءِ مُجاں گار بیت اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔