TBP Balochi

بلوچ لبریشن آرمی ءِ جارکش جیئند بلوچ ءَ رسانکدراں شنگ کرتگیں درشان ءَ گوشتگ کہ مئے سرمچاراں پنجگور ءِ شھر ءَ گاڑی ءَ سواریں پاکستانی پوج ءِ کارندھانی سر ءَ دزبمبے چگل داتگ – چریشی ءَ دشمن ءِ یک کارندھے مُرتگ ءُ دو زدگ بیتگ اَنت ءُ چریشانی توک ءَ یکے سک زدگ بیتگ-

جیئند بلوچ ءَ گوشتگ بلوچ لبریشن آرمی اے اُرش ءِ زمہ واری ءَ من ایت ءُ زوگریں پوج ءِ درایگ ءَ سرجم ءَ وتی اُرشاں برجاہ کنت-

گوستگیں روچ ءَ پاکستانی پوج ءَ بلوچستان ءِ بنجاھی شھر شال ءِ نادراھجاہ ءَ سَے مردمانی جون آؤرتگ انت کہ آھانی تہ ءَ یک مردمے ءِ پجار فرید شاھوانی ءِ نام ءَ بوتگ –

اھوالکار ءِ رِد ءَ ھر سَئیں مردمانی جان ءَ تیرانی ٹپ پِر انت – مروچی آھانی تہ ءَ یک مردمے ءِ پجار فرید شاھوانی ء گلام مصطفی ءِ نام ءَ بوتگ کہ آ پاکستانی پوج ءَ سال دوھزار بیست ءُ دو ءِ اگست ماہ ءَ چہ سریاب دگ ءَ زورانسری آوار جتگ ءُ بیگواہ کتگ بوتگ – ایندگہ دو مردمانی پجار ھنگت نہ بوتگ بلے ھمے گمان کنگ بوگ ءَ انت کہ اے ھم زورانسری آوار جنگ بوتگیں مردم بنت –

بلوچ نیشنل مومنٹ ءِ انسانی ھکانی درگت ءَ شنگ کنوکیں ادارہ پانک ءَ ماں چاگردی ترامجاہ ٹویٹر ءَ اے درگت ءَ گوشتگ کہ بلوچستان ءَ وتگڑیں دروگیں میڑاں کشت ءُ کوش ءِ درچ برجاہ انت – دروگیں میڑ جنگ بوتگیں یکے ءِ پجار فرید شاھوانی ءِ نام ءَ بوتگ کہ آ پاکستانی پوج ءَ سال دوھزار ءُ بیست ءُ دو ءِ اگست ماہ ءَ زورانسری آوار جتگ ءُ بیگواہ کتگ –

آئی ءَ گوشتگ کہ بازیں وھدے بیت کہ بلوچستان ءِ مردم زورانسری آوار جنگ ءُ درکانودی کُشگ بوگ ءَ انت ءُ انسانی ھکانی لگتمالی کنگ بوگ ءَ انت ـ بگیر داروکاں ھاموش کنگ ءُ انسانی ھکانی لگتمالی ءِ چیردیگ ءِ ھاتر ءَ دروگیں میڑ ھچ وڑ ءَ اوپار کنگ نہ بنت –

آئی ءَ گوشتگ کہ ما چہ میان اُستمانی ادارھاں گوں لوٹ کنیں کہ آ بلوچستان ءَ برجاھیں انسانی ھکانی لگتمالی ءِ سر ءَ دلگوش بہ دے اَنت –

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، وی بی ایم پی ءِ زھرشانی بنجل ءَ مروچی پنچ ھزار ءُ نوزدہ روچ سرجم بوتگ انت – مروچی نیشنل پاٹی ءِ باسک ظہیر بلوچ، عصمت اللہ ءَ ھوار دگہ مردماں بنجل ءَ اتکگ ءُ دلپدردی درشان اِتگ –

گل ءِ کمک سرکماش ماما قدیر بلوچ ءَ گوشتگ کہ ھزاراں سالاں بلوچ کہ ھما سرڈگار ءِ واھند بوتگ مروچی پہ آھاں زمین تنک کنگ بوتگ – پاکستان ءِ ریاستی ادارھاں ھر ھما جاہ ءَ بلوچ ٹکانی وت ماں وتی اڈ ءُ جنجالے ءِ ھال سر بیت وت ءَ ھمودا سر کن انت ءُ بلوچ ٹکاں وت ماں وت میڈین انت بجن ءُ ھاکمی بکن ءِ پالیسی وتیگی کتگ ات –

ماما قدیر بلوچ ءَ گوشتگ کہ ائید ءِ روچ ءَ ادار سَے ءَ بیگواھیں مردمانی کھولاں گوں ھوار بہ ایں ءُ زھرشانی کن ایں، درسیں بیگواھیں مردمانی کھول ءُ انسان دوستاں گوں دزبندی انت کہ زھرشانی ءَ بھر بہ زور انت، ائید وشی ءُ شاتکامی ءِ روچ یے درسیں مسلمان اے روچ ءَ وشی ءَ گوں گوازین انت بلے بلوچ مات ءُ گھار، بیگواھیں مردمانی زھگاں ھچ وڈیں وشی مانا نہ داریت تاں ھما وھد ءَ کہ آھانی دوستیگیں مردم گساں واتر نہ بنت – پہ آھاں ائید ءِ نوک ھما روچ ءَ در کئیت وھدیکہ آھانی دوستیگیں مردم چہ ریاستی زنداناں وش ءُ سلامتی آجو بنت –

بلوچستان ءِ دمگ پنجگور ءَ ناشناسیں سلاہ بندیں مردماں گوستگیں شپ ءَ یک لوگے ءَ دور کرتگ ءُ کواس ءُ شائر کُشتگ ءُ تتکگ ءُ شتگ اَنت –

کُشگ بیتگیں مردم ءِ پجاف یاکوب آمل ءِ نام ءَ زانگ بیتگ ءُ آ مھکمہ زراعی انجینئرنگ ءِ ڈپٹی ڈائریکٹر بیتگ – یاکوب آمل آ نبشتہ کارے ءِ نام ءَ زانگ بیت اِنت- آئی ءِ بلوچی ءُ اردو زباناں کتاب چاپ ءُ شنگ بیتگ اَنت-

کوش ءِ سبب تنی وھدی زانگ نہ بیتگ بلے لبزانکی پھناتاں اے وئیل ءِ پدردی ءَ درشان کنگ ءَ اَنت-

بلوچستان ءُ پنجاب ءَ دو مردم بیگواہ کنگ بیتگ ءُ دو یل کنگ بیتگ اَنت

گیشیں ھالانی رِد ءَ پنجاب ءِ شھر راولپنڈی ءَ دو بلوچستان ءِ جھمنندیں مردم بیگواہ کنگ بیتگ اَنت-

اِھوالکارانی رِد ءَ بیگواہ بیتگیں دوئیں مردمانی پجّار ظھر شاہ ءُ شھزاد نام ءَ چہ بیتگ اَنت دوئیں وت ماں وت ءَ سیاد اَنت کہ دو روچ اِنت چہ راولپنڈی ءَ بیگواہ ءَ اَنت –

کھول گوشگ رِد ءَ اے دوئیناں سک دیر اِنت کہ راولپنڈی ءَ پوریاگری ءَ بیتگ اَنت گوستگیں دو روچ اِنت بیگواہ اَنت کھول ءَ انسانی ھکانی گل ءُ انسان دوستاں گوں دزبندی کتگ آیانی ھاتر ءَ توار چست بکن اَنت-

زانگ بہ بیت اشی ءَ ساری ھم پنجاب ءِ جتاجتائیں شھراں بلوچستان ءِ جھمنندیں نودربر ءُ پوریاگری ھاتر ءَ اَتکگیں بلوچ زورانسری آوار جنی ءِ نشانگ کنگ بیتگ اَنت-

دومی نیمگ ءَ بلوچستان ءِ بُنجاھی شھر شال ءَ پاکستانی پوج ءِ دست ءَ بیگواہ بیتگیں دو مردم آجو بیتگ ءُ وتی لوگاں سر بیتگ اَنت-

بلوچستان ءَ زورانسری آوار جنی ءِ بگیری ءَ پُرکاریں گل وائس فار بلوچ مسنگ پرسنز ءَ راست کتگ ءُ گْوشتگ کہ پاکستانی چیریں ادارھانی دست ءَ اپریل 2016 ءَ چہ اسپلنجی ءَ بیگواہ بیتگیں ڈاکٹر عبدالشکور ء فتح علی آجو بیتگ-

ھمے وڑ چہ شال ءَ زورانسری آوار جنگ بیتگیں شیرزمان ھم آجو بیتگ ءُ وتی لوگ ءَ سر بیتگ-

زانگ بہ بیت چیزے روچ ءَ ساری پاکستانی پوج ءَ شیرزمان ءُ شعیب بلوچ زورانسری آوار جتگ اِت اَنت بلے شعیب انگت بیگواہ ءَ اِنت-

نزیکیں مردمے ءَ شیرزمان ءِ یل بوگ ءِ گپ راست کتگ-

سرمچار پرچا کوہ ءَ اَنت؟

نبشتہ کار: سمُل بلوچ

دی بلوچستان پوسٹ

انچوش کہ شما سر پد ات کہ مئے بلوچ برات کوه ءَ اَنت، وتی راج ءُ وتن ءِ واستا کربانی دیگ ءَ انت چیا کہ مئے راج ءِ سربازیں پُسگ گلامی ءَ برداشت نہ کن اَنت۔

بلوچستان مئے وتی وتن انت بلے پنجاپیاں وتی دزگیر ءُ ایردست کتگ ءُ مئے وتن چہ مارا پچ گپتگ ھمے سبب اِنت مروچی ھزاراں بلوچ اے جنگ ءِ بھر بیتگ ءُ ھزارانی کساس ءَ گھگیری کنگ ءَ اَنت ۔

گِند ئے بلوچستان ءِ تہ ءَ بازیں مال ءُ مڈی ھست اَنت بلے بژن اِنت کہ درست پنجاپیاں پہ گیشواھی وتی کتگ ءُ پہ وتی سیت ءُ پائدگاں بلوچ راج ءِ ھُدائی گواچ ءُ مڈیاں کارمرز کنگ ءَ اَنت۔ باید اِنت ما بلوچ کوم تپاک ءُ یکمشت بہ ایں ‌گڑا مئے زمین ءَ کس چہ مارا پچ گپت نہ کنت۔ باید انت ما بلوچ هاموش مہ بہ ایں ءُ گُلامی ءِ مہ منّ ایں۔

شما بچار ات مئے برات کوهاں کپتگ انت ءُ پہ وتی ڈیھ ءِ وتواجھی ءُ راج ءُ آجوئی ءَ جُھد کنگ ءَ اَنت، راستی ءَ اِے دْراہ پہ مئے واستا جُھد ءَ اَنت چیا کہ ما انگت نشتگ ءُ وتی لوگ ءَ آرام کن ایں۔ گڑا همے براتانی برکت ءَ اگاں مرچی اے سرمچار کوهاں مہ بیتین اَنت گڑا مارا هم چہ لوگانی توک ءَ پوج ءَ برتگ انت۔

بلے همے مئے براتانی انگت بیم انت کہ ما لوگ ءَ آرامی نشتگیں بلے باید انت چوش مہ بیت درست بلوچ تپاک بہ بنت ءُ پہ وتی گُلزمین ءِ آجوئی جُھد بکن اَنت-

شالا بلوچ جنزان بات ءُ بلوچستان آزات بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ھوسی واکدارانی گوشگ اِنت یمن ءَ کمکی ساز ءُ سامانانی بھر ءُ بانگ ءِ وھد ءَ یکے دومی ءَ لگت دیوکائی ءِ وھد ءَ ھشتاد ءَ گیش مردم بیران ءُ سدانی ھساس ءَ زدگ بیتگ اَنت-

ھال سرکنوکیں ادارہ اے ایف پی ءِ رد ءَ اے وئیل پشمبے ءَ یک وانگجاھے ءَ پیش اتکگ کہ اود ءَ کمی ساز ءُ سامانی بھر ءُ بانگ کنگ ءِ وھد ءَ مھلوک ءَ یکے دومی ءَ لگت دیوکائی بیتگ اَنت-

جزیرہ دروشمیں نیزگاریں ڈیھ یمن ءَ اے ناوشیں وئیل ائید ءَ دو روچ پیش اتکگ –

ھوسی سیکورٹی کارندھے ءَ گوشتگ بنجاھی شھر ءَ باب الیمن ءَ شور ءُ شاراں پد کم چہ کم ھشتاد ءُ پنچ مردم بیران ءُ سَے سد ءُ بیست ءُ دو مردم زدگ بیتگ اَنت-

آئی ءَ نام ءِ پدر نہ کنگ ءِ سر ءَ اے ایف پی ءَ گوں گوشتگ کہ میروکانی توک ءَ زالبول زھگ ھم ھوار اَنت-

مھکمہ ءِ جانسلامتی ءِ یک کارندھے ءَ بیرانیانی ھال راست کتگ ءُ گوشتگ کہ چم دیستگیں مردمانی رد ءَ سدانی ھساب ءَ مھلوک کمک ءِ واستا مُچ بیتگ اَنت-

باگیانی ھال سرکنوکیں ایجنسی صبا ءِ رد ءَ وزارت داکلہ ءَ یک درشانے ءَ گوشتگ کہ بیران بیتگین ءُ زدگ بیتگیں مردم نادراھجاھاں سر کنگ بیتگ اَنت کمکی ساز ءُ سامانی بھر کنوک دزگیر کنگ بیتگ اَنت-

بیران بیتگیں مردمانی درگت ءَ وزارت داکلہ ءَ سرجمیں گپ دیم ءَ نیاؤرتگ اَنت بلے لھتے تاجرانی زرانی بھر ءُ بانگی ءِ وھد ءَ مھلوک ءَ یکے دومیگ لگت دیان کتگ ءُ بازیں مردمے کُشتگ اَنت-

باگیانی سروک مھدی المشاط ءَ گوشتگ کہ پٹ ءُ پول ءِ واستا یک کمیٹی ءِ جوڑ کرتگ ءُ ھوسیانی یک سیکورٹی کارندھے ءَ گوشتگ شک ءِ بنیات ءَ سَے مردم دزگیر کتگ اَنت-

چاگردی ترامجاھاں شنگ بیتگیں تامرانی توک ءَ گندگ بیت اِنت یک مزنیں کمپلیکسے ءَ بازیں کچے ءَ لاش گندگ بنت ءُ مردمانی پریات ھم اشکنگ بنت-