TBP Balochi

بلوچ نودربر گل آزاد (BSO Azad) بیست ءُ سیمی بنجاھی لس مجلس ءِ نیاد بیاد لمہ ء وتن بانک کریمہ بلوچ ءُ بلوچ نمیران ءُ بنام بیگواھیں بلوچانی یات ءَ مروچی سیمی روچ ءَ سوبمندی ءَ گوں آسر کنگ بوتگ ءُ گل ءِ اگدہ دار گچین کنگ بوتگ انت کہ درپشان بلوچ گل ءِ سرکماش ءُ زروان بلوچ کارگشاد گچین کنگ بوتگ انت –

بلوچ نودربر گل آزاد ءِ بنجاھی جارکش ءَ ماں رسانکدراں وتی شنگ کرتگیں درشان ءِ تہ ءَ گل ءِ سوبمندیں لس مجلس ءِ ھال شنگ کُتگ ءُ گوشتگ کہ گل بیست ءُ سیمی لس مجلس نیاد بیاد ءِ لمہ ء وتن بانک کریمہ بلوچ ءُ بلوچ نمیران ءُ بنام بیگواھیں بلوچانی یات ءَ مروچی سیمی روچ ءَ سوبمندی ءَ گوں آسر کنگ بوتگ کہ درپشان بلوچ ابید ءِ دیم ءَ اوشتوکیں مردم ءَ سرکماش وھدیکہ زروان بلوچ ابید ءِ دیم ءَ اوشتوکیں مردم ءَ کارگشاد گچین کنگ بوتگ انت –

جارکش ءَ گوشتگ کہ بیست ءُ سَیمی بنجاھی لس مجلس دیوان ءَ سرکماش ءِ تران، بنراھبند سازی، کارگشاد ءِ اھوال، نگدی دیوان، گل کاری، میان اُستمانی ءُ ھَندی سیاسی جاورھال ءَ ھوار آؤکیں گامگیج ءِ سر ءَ گوں دلجمی ءَ تران کنگ بوتگ-

آئی ءَ گوشتگ کہ لس مجلس ءِ اولی روچ ءَ بنجاھی سرکماش ءِ تران، بنراھبند سازی، کارگشادی اھوال، نگدی دیوان ءِ سرھالانی سر ءَ گپ ءُ تران کنگ بوتگ ءُ دومی روچ ءَ گل کاری، میان استمانی ءُ ھندی سیاسی جاورھال ءُ آؤکیں گامگیج ءِ یک بھرے ءِ سرھال ءِ سر ءَ گوں جوانی ءَ تران بوتگ- مروچی بنجاھی لس مجلس ءِ گُڈی روچ بوتگ کہ آؤکیں گامگیج ءِ پَشت کپتگیں بھر دیم ءَ جنز اِتگ کہ آئی ءِ تہ ءَ ھستیں جوڑشت پروشگ بوتگ ءُ دیوان گچینکاری ءِ نیمگ ءَ شُتگ ،گوستگیں بنجاھی مزن کارگشاد مھرزاد ءِ سروکی ءَ یک سے باسکی پترے جوڑ کنگ بوتگ کہ آ گچینکاری ءِ نیمگ ءَ شتگ- گچینکاریانی آسر ءَ گچینکاری پتر ءِ سرپان ءَ گل ءِ اگدھانی سر ءَ گچین بوتگیں بنجاھی کابینہ ءُ بنجاھی پتر ءِ باسکانی نام دیم ءَ آؤرتگ انت کہ آیانی تہ ءَ درپشان سرکماش ءُ زروان مزن کارگشاد گچین کنگ بوتگ-

بنجاھی جارکش ءَ گوشتگ کہ گچینکاری ءِ ھلاس بوگ ءَ رند بندیں کوٹی ءِ دیوان ھلاس کنگ بوتگ ءُ دیوان سوگندی نیاد ءِ نیمگ ءَ جنز اِتگ کہ گچین بوتگیں باسک ءُ زمہ دار گل ءِ گوستگیں سرکماش ابرم ءَ سوگند داتگ اَنت-

بنجاھی لس مجلس ءِ سوگندی نیاد ءَ گل ءِ گوستگیں سرکماش ابرم ءَ تران کُرتگ ءُ گْوشتگ کہ امیت ھمیش اِنت کہ بی ایس او آزاد ءِ نوک گچین بوتگیں سروک بلوچ ورنایاں گیشاں چہ گیش جُنز ءِ بھر جوڑ کن اَنت ءُ آیاں یکمشت ءُ یکراہ کن اَنت- راجی جنز ءَ نوکیں جُنزانی لوٹانی ھساب ءَ بی ایس او آزاد آشوبی باسکانی ھیلکاری ءِ کار ءَ برجم داریت۔ پہ بی ایس او آزاد ءَ اے پیمیں نا وش ءُ نگیگیں جاوراں اے آشوبی کار ءِ یکشل ءَ برجم دارگ ارزانیں کارے نہ اِنت بلے وتی پانزدہ سال ءِ سیاسی کیرئر ءِ کُتہ کاریانی بنیات ءَ گْوشت کناں کہ بی ایس او آزاد ءِ تہ ءَ اے پیمیں نا وش ءُ نگیگیں جاورانی دیم دارگ ءِ زِکت است اِنت- بی ایس او آزاد ءِ باسکاں گل ءِ باسک ءُ سروک ءِ نمیرانی، آوار جَنی ءُ بے کساس ژانگولیں جون وتی کوپگاں کتگ اَنت بلے آیانی ھیال،لیکہ ءُ کارانی تہ ءَ کدی اوں بگیری پیداک نہ بوتگ- بی ایس او آزاد ءِ باسکاں نہ ایوک ءَ دژمن ءِ دیم داشتگ بلکیں تھی پادکَشی اوں اوپار کتگ اَنت بلے راجی جنز ءِ مول، سینٹرل ڈیموکریسی، گل ءِ تہ ءَ راجمستری ءِ ربیت ءُ گل ءِ وتواکی کدی اوں سان زورگ ءَ نہ اشتگ ءُ ھمے گلانی سوبمندی ءِ مزنیں سوَب اَنت، ھمے ھسابیں پگر ءُ لیکہ بی ایس او آزاد ءَ مھکمیں گلے ءِ گوناپ ءَ دات کت کنت –

بنجاھی لس مجلس ءِ گچینکاری ءِ ھلاس بوگ ءَ رند گل ءِ زمہ داری نوکیں بنجاھی پتر ءِ کوپگاں دیگ بوتگ انت کہ چرائی ءَ رند سرکماش دْرپشان بلوچ ءَ بنجاھی لس مجلس ءِ دیوان ءَ تران کُرتگ ءُ گْوشتگ کہ چہ درساں پیش لس مجلس ءِ سوبمندی ءِ گون ءَ برجم بوگ ءَ من بی ایس او آزاد ءِ باسک ءُ تیوک ءَ گل ءِ گوستگیں راھشونانی ستا ءَ کناں کہ آیاں اے نا وشیں جاورانی میان ءَ نیاد گوں سوبمندی ءَ اڈ داتگ ، راستے کہ آشوبی ادارھاں جاور کدی اوں ایمن ءُ آسودگ نہ بنت ءُ بی ایس او آزاد چہ وتی جوڑشت ءِ اولی روچاں ھمے جاورانی دیمپان انت، پمشکا گل ءِ نشانگ مدام مزن ءُ پروگرام بندپتری بوتگ انت-

نوک گچین بوتگیں سرکماش درپشان بلوچ ءَ گوشتگ کہ بی ایس او آزاد ءِ آشوبی سنگتاں! چہ وتی جھد، توان ءُ دیمونیاں گل ءِ رھشونی ءِ جاہ ءَ سر بوگ یک نیمگے پمّا یک مزنیں شرپے داں دومی نیمگ ءَ یک باز مزنیں ڈُبّہ ءُ زمہ واری یے کہ سنگتاں وتی کوپگاں زرتگ- زاکر مجید کہ مرچی چہ چاردہ سالاں دژمن ءِ بندیگجاہ ءَ بند اِنت، کمبر چاکر ءِ ڈولیں مزن شانیں ورنا کہ آ دژمن ءِ آزارجاھاں اے باور کنائین ایت کہ من مرگ ءَ امبازاں زرت کناں بلے تئی گلامی ءَ نہ من آں، زاھد ءِ پیمیں مزن شانیں رھشون مرچی دژمن ءِ آزارجاھانی تہ ءَ بند انت – اے کلیں سنگتاں چوشیں مزنیں دیمونی پمشکا اوپار کتگ انت ءُ کنگ ءَ انت داں کہ بی ایس او آزاد ھرچ ڈول ءَ مھکم بہ بیت- پمشکا نوک گچین بوتگیں باسک سرپد بہ بنت کہ اے کسانیں بارے نہ یے کہ ما کوپگاں کتگ ءُ امیت انت کہ گل ءِ دیم ءِ دو سالی مراگشانی مھکم دارگ ءُ گیش شاھگان کنگ ءَ گل ءِ ھمبل چہ ھچ پیمیں دیمونی ءِ دیگ ءَ چک ءُ پد نہ بنت-

سرکماش درپشان ءَ گْوشتگ کہ بلوچ راجی جنز ءَ گیش مھکم کنگ ءُ آئی ءِ برجاہ دارگ ءَ ادارتی بنیاد ءَ گیش کار کنگ ءُ جھد ءِ گیش مھکم کنگ درکار انت- مئے جنگ یک نپر یاکہ یک راجے ءِ گون ءَ بوگ ءَ نہ انت بگندئے استانی بنیاد ءَ اڈ داتگیں مھکمیں ادارھانی گون ءَ بوگ ءَ انت کہ آیانی سر ءَ ھمک سال ءِ بنیاد ءَ کَرباں زر ھرچ کنگ بنت – مئے جنگ گوں ھما ھزاراں ادارھان اِنت کہ آیاں اے استان ءِ جوڑشت پہ وتی نپ ءُ سیتاں زندگ داشتگ – اے زورگری ءِ ھلاس کَنگ ءَ اداراتی سیاست ءُ جھد گیش مھکم کنگ ءُ نپری پگرچہ ھُنڈالاں ولگوج کنگی اِنت – بلوچ ورنایاں نہ تھنا گوں جزباتاں بلکیں گوں ھوش ءُ گوش ءُ وتی بودشتانی گون ءَ اے جنز ءَ بھر زورگی انت ءُ دیم ءَ روگی انت – مھکمیں ادارہ، نوکتریں سائنسی بودشت ءُ ھنراں بلوچ راجی جنز آکبتے ءَ سر بوت کنت – بلوچ راجی جنز اے وھداں ادارھانی بستار ءَ ساڑی انت ءُ پہ ھر چونیں استانے ءَ آجوئی ءِ جنگ ءُ آئی ءِ سوبمندی ءَ راجی جنز ءَ ھما استان ءِ دیم پہ دیمی کنگ ءِ ادارہ لوٹ ایت – بلوچ ورنا وتی بودشتانی سر ءَ گیشاں چہ گیش کار کنان ءَ راجی جنز ءَ بنجاھی ادارھے ءِ بستار ءَ دیم ءَ بیار انت۔ یک آزات ءُ وتواکیں بلوچستانے ءَ بلوچ ءِ راجی پجّار، زبان، دود ءُ ربیدگ ءُ مال ءُ مڈی پھریزگ بوت کن انت ءُ ڈیھ وشھالی ءِ مانزمان بوت کنت –

درپشان بلوچ ءَ دیمتر ءَ تران کنان ءَ گْوشتگ کہ بلوچ ورنایاں ءَ چہ لھتیں تھلیں راستیاں آشنا بوگی اِنت کہ آ بیست ءُ یکمی کرن ءَ یک انچیں استانے ءِ بگیری ءَ جنگ کَنگ ءَ اَنت کہ آ استان یک نیمگے امریکہ ءِ وڑیں زورآورے ءِ ھمراہ انت تاں دومی نیمگ ءَ چین ءِ وڑیں وتگڑیں کمیونسٹ ملکے ءِ گوما ھمکوپگ انت، ما چہ سردجنگ ءِ بائی پولر آرڈر ءَ دراتکگ ءُ یک انچیں اھدےءَ ایر کپتگیں کہ اود ءَ یونی پولر کیپیٹیلسٹ رھبند ءِ تہ ءَ وت ءَ مگکم کنگی اِنت۔ بلکیں مرچی ئیں زمانگ ءَ مھکم، تمرد، ھنرمَند ءُ گوں مزنیں زوراں ھمگرنچیں راج اے جھان ءَ منگ بنت ءُ آیانی پلہ مرزی کنگ بیت- نزوریں راج آجوئی ءِ بیرک دار بوت نہ کن اَنت بلکیں چہ توانمند ءُ ھنرمَندی ءَ راج آزات ءُ مھکم بنت- مارا چہ وتی زھناں ایردستی ءِ رٹا کشگی اِنت ءُ یک مزنیں توانمندی یے ءِ جوڑ بوگ ءِ پگر ءِ گون ءَ جھد کنگ درکار انت۔ بلوچ راجی جنزءَ اے وھداں نوکتریں بودشتانی درکار انت کہ چرائی ءَ آ اے استان ءِ ادارتی جوڑشت ءَ ھلاس بہ کن اَنت ءُ آئی جاہ ءَ بلوچ ءِ استانی جوڑشتے اڈ بہ دینت کہ پہ ایشی ءَ تھنا راجی جزبات کار نہ دنت بگندئے پہ ایشی ءَ مزنیں ھنر ءُ بودشت ئِے درکار انت کہ آ اے استانی جوڑشت ءَ دیمتر بہ بنت-

آئی ءَ گوشتگ کہ مارا چہ وتی جند ءُ جزباتی اوگاماں درآھگی اِنت ءُ راستیں بنیاداں یک استانے ءِ اڈ دیگ ءِ کارانی بارو ءَ وانگ ءِ نیم ءَ روگی اِنت۔ اے نوکیں زمانگ ءَ مزنیں بودشت ءُ ھنراں ابید زورگر ءِ بگیری ءَ جنگ بوت کت نہ کنت کہ آ چہ نوکیں جنگی سلاہ ءُ ساماناں کتار بند انت ءُ سدانی کچ ءَ جتائیں ادارھانی واھند انت –

درپشان ءَ گوشتگ کہ بلوچ جنز ءَ گیش بنجاھی ادارہ سازی ءِ نیمگ ءَ برگ ءِ درکار انت، چے ءَ کہ مئے دژمن یک مردمے نہ انِت، نہ کہ یک ادارھے – بلوچ یک سرجمیں استانے ءَ گوں دیم پہ دیم اِنت کہ آئی تہ ءَ ھر وڑیں ادارہ است، پمشکا پہ بلوچاں الّمی اِنت کہ وتی راجی جھد ءَ بنجاھی ادارہ سازی ءِ بنیات ءَ دیم ءَ بہ بارت- ایوکءَ نوکیں وھد ءِ لوٹ ءُ گزراں پیلو کنوکیں ادارہ اے استان ءِ دیم ءَ اوشتات کن اَنت ءُ بلوچ راج ءِ آجوئی ءِ مانزمان بنت۔ بلوچ ورنایاں لوٹیت کہ آ چہ کوھن ءُ پدمنتگیں کار رھبنداں بُرز نوکیں دور ءِ سائنسی، وانگی ءُ آشوبی کار رھبنداں کارمرز کنان ءَ بلوچ راجی آجوئی جُنز ءِ تہ ءَ بھر بُزور اَنت –

آزاد ءِ نوک گچین بوتگیں سرکماش ءَ گْوشتگ کہ جنگ آماچیں راجانی تہ ءَ چاگردی ءُ آشوبی بدلی آرگ ءَ ورنایانی کرد سک باز ارزشت داریت۔ بلوچ ورنا اے آشوبی دور ءِ تہ ءَ وتی زاتی نپ ءُ سیتّاں آمیدگس ءَ نشتگیں پارٹی ءُ سرکاری زر ھرید ءُ میر ءُ سردارانی دست ءَ وتا کارمرز بوگ ءَ بہ رکّین اَنت، وتی نپری زند ءَ در بیا اَنت ءُ وھد ءُ جاورانی رِد ءَ راجی ءُ مُچانکی لوٹ ءُ گزرانی پیلو کنگ ءَ جھد بہ کن اَنت – ما چہ اے راستی ءَ وتا اندیم کُت نہ کنیں کہ بلوچ گلامی زندے گوازینگ ءَ اِنت۔ بلوچ ءِ جنگ آماچیں راجے ءَ سیادی دارگ ءُ پدا روبرکتی راجانی وڑ ءَ آزات ءُ وشھالیں زندے گوازینگ ءِ گُمان کنگ بس یک وھد زوالی یے- بلوچ ورنا راجی جھد ءَ دیم ءَ ایر کنان ءَ وتی باندات ءِ پیسلہ ءَ بہ کن اَنت۔

آئی ءَ گوشتگ کہ زورگریں استان گوستگیں ھپت دھکاں بلوچ ورنایاں پروش دیگ ءِ جُھد ءَ اِنت۔ جاھے پہ تُرس ءُ بیم، تہ جاھے پہ لب ءُ لالچ، استان یکشل ءَ جھد ءَ اِنت کہ بلوچ ورنا وڑے ناں وڑے ءَ پدکنز بہ بنت۔ اے پندل ءِ تہ ءَ نا تھنا دژمن ءِ جند اِنت بگندئے ھما بلوچ ھم ھوار اَنت کہ آیاں چہ بنداتی روچ ءَ بلوچ راجی جھد ءِ سودا جتگ۔ اے راستی وتی جاہ ءَ کہ راجدپتر آیاں کدی نہ بکشائیت بلئے اے وھد اے لوٹ ھمیش اِنت کہ بلوچ ورنا تیوک ءَ بی ایس او آزاد ءِ آشوبی باسک وتی شپ ءُ روچاں یک بہ کن اَنت ءُ بلوچ راج ءُ بلوچ ورنایاں اے راجی زرمبشت ءِ ارزشت ءَ پوہ بہ کن اَنت-

درپشان بلوچ ءَ گوشتگ کہ من نمیرانیں بلوچانی وارساں گوشگ لوٹاں کہ سرسوبی ءُ آجوئیءِ منزل ءَ سر بوگ ءَ ابید مارا ھچ وڑیں باندات نیست۔ پہ بلوچ ءِ راجی آجوئی ءَ ھزارانی کساس ءَ بلوچ ورنایاں وتی بےبھائیں سر ندر کُتگ اَنت ءُ لس بلوچ ءَ ھر وڑیں سگّی اوپار کُتگ، بلئے راجدپتر گواھی دنت کہ راجانی جوڑ بوگ ءَ اے رنگیں نگیگیں ءُ گرانیں سپر الّمی اَنت۔ چُشیں ھچ راجے نیست کہ آیاں پہ وتی راجی آجوئی ءَ کُربانی نہ داتگ۔ مرچی ھزارانی کساس ءَ بے لوگ ءُ بزّگیں بلوچانی اوست گوں ما بندوک اَنت، پمشکا الّمی اِنت کہ ما وتی توان ءَ گوں سنگینی ءُ دل ءُ ستک پہ آجوئی ءِ منزل ءَ سر بوگ ءَ ھرچ بہ کن ایں –

نوک گچین بوتگیں مزن کارگشاد زروان ءَ وتی زمہ واری کوپگاں زرتگ ءُ بی ایس او آزاد ءِ بیست ءُ سیمی راجمان پتر بنام لمہ ء وتن کریمہ ءِ یات ءُ آجوئی ءِ نمیران ءُ بیگواھیں بلوچانی نام ءَ آسری جار جتگ –

بالی وڈ ءِ پکی چوپس ءِ نام ءَ نامان اِنت ازمکار پرینکا چوپڑا یک وھدے ءَ داں ھندوستان ءِ سنیماھاں راجے کتگ بلے آ بالی وڈ ءَ وتی شرکاریانی آسن جوڑ کنگ ءَ اِنت – پرینکا گوستگیں لھتے سالاں چہ امریکہ ءَ جھمنند اِنت ءُ آئی ءَ لھتے روچ ءَ پیش آئی ءُ بالی وڈ ءَ ایگ ءِ پیسلہ کتگ پرچا کہ اود ءَ آئی ءَ بالی وڈ ءَ دیوال ءَ جنگ ءَ اَنت-

آئی ءَ انڈین نیوز ایجنسی اے این آئی ءَ یک انٹرویوی ءَ پدر کرتگ کہ آئی ءِ کش ءُ گوراں لھتے ھنچیں مرد ھست اَنت آئی ءِ سوبمندی ءِ سبب ءَ وت ءَ اِن سکیور سرپد بنت-

اے این آئی ءَ انٹرویوی دیان ءَ پرینکا چوپڑا ءَ بالی وڈ ءِ توک ءَ مردین ءُ جنینین ازمکارانی میان ءَ دگریانی سر ءَ گپ ءُ تران کتگ-

پرینکا ءِ گوشگ اِنت آ اے گپ ءَ ستک دار ایت درستاں سوبمند بیگ لوٹ ایت –

منی زند ءَ لھتے ڈولڈاریں مرد ھست اَنت منی سوبمندی ءَ وت ءَ گیر مھپوز سرپد نہ بنت بلے لھتے ھنچیں مرد ھم ھست اَنت منی سوبمندی ءَ لرز اَنت-

آئی ءَ گوشتگ کہ مردین ترس آماچ بنت کہ زالبول سوبمند اَنت-

وتی کھول ءِ درگت ءَ گپ کنان ءَ پرینکا چوپڑا ءَ گوشتگ کہ یک وھدے منء مات منی پت ءَ چہ گیش کمائی کنگ ءَ بیتگ بلے پد ءَ آ یکین دروشم ءَ چارگ بیتگ پرچاکہ لوگ بیتگ دگہ ڈنی نہ بیتگ-

آئی ءَ گوشتگ کہ من وتی مرد نک جونس ءِ سر ءَ پھر بنداں وھدیکہ من وتی مرد ءِ گون ءَ ریڈ کارپٹ ءِ سر ءَ گاماں جنان باں گڑا یک نیمگے ءَ منی کش ءَ گون بیت ءُ دانکہ بنجاھی تلوا سر کنت من ءَ پھر اِنت-

پرینکا چوپڑا گوش ایت مارا چاگرد ءَ ھنچیں مرد رودینگ لوٹ اَنت آ اے چیزاں چہ اِن سکیور مہ بنت درستاں سوبمندی ءُ بِل ات مارا وتی زھگ ھیل دیگی اَنگ گریوگ ءُ ھرس ءِ ریچگ شرمے نہ اِنت ءُ نانکہ مات، گوھار ءُ گرل فرینڈز ءَ سپاٹ لائٹ دیگ ھم شرمے نہ اِنت-

بلوچستان ءِ دمگ چمن ءَ یک تراکے بیتگ ءُ یک مردمے بیران بیتگ-

لیویز بنشون ءِ رد ءَ گوستگیں شپ ءَ چمن ءِ ھند سپینہ تیڑہ ءَ یک شوانگے ءَ دزبمبے رس اتگ چریشی ءَ آ گون بمب ءَ لیب کنان ءَ بمب ترک اتگ ءُ شوانگ بیران بیتگ-

وئیل ءِ ھال ءِ سر بوگ ءَ لیویز ءِ کارندہ وئیل جاہ ءَ شتگ ءُ دمگ اش انگیر کرتگ ءُ چم دیستگیں مردمانی یکجاہ کنگ اش بندات کتگ-

زانگ بہ بیت لھتے روچ پیش ھم چمن رھمان کھول دگ ءَ لوگے ءَ شوروانی تراک ءَ سَے زھگ بیران بیتگ ات اَنت-

چمن ءَ بمب تراک ءَ بیران بیتگیں شوانگ ءِ لاش لیویز ءَ چست کتگ ءُ ھسپتال ءَ برتگ-

انڈین پریمئیر لیگ ءِ شانزدھمی سیزن ءِ بیست ءُ پنچمی گوازی سن رائزرس حیدرآباد ءُ ممبئی انڈین میان ءَ بوتگ کہ ممبئی انڈینز اے سیزن ءِ تہ ءَ گوستگیں دو گوازیاں بے سوب بوگ ءَ پد ممبئی ءَ پد ماں سَے گوازی کٹ اِتگ انت – روہت شرما ءِ سروکی ءَ ممبئی ٹیم ءَ سن رائزرس حیدرآباد ھمائی جند ءِ ھوم گراؤنڈ ءَ بے سوب کتگ – ممبئی ءَ حیدرآباد ءِ دیم ءَ بیست اووراں یکسد ءُ نود ءُ سَے رنانی ٹارگٹ ایر کُتگ کہ حیدراباد ٹیم ءَ یکسد ءُ ھپتاد ءُ ھشت رن جوڑ کتگ ءُ درستیں لیبی آؤٹ بوتگ انت ءُ ٹارگٹ ءِ پروشت نہ کتگ ءُ ممبئی ءَ اے گوازی چاردہ رناں کٹ اِتگ – اے گوازی ءَ سن رائزرس حیدرآباد ءِ ٹاپ آرڈر فلاپ بوتگ –

گوستگیں گوازی ءَ سنچری کنوکیں ہیری بروک ممبئی دیم ءَ بے سوب بوتگ ءُ آئی ءَ نھ رن جوڈ کتگ ءُ واتر بوتگ – مینک اگروال ءَ درساں گیشتر چِل ءُ ھشت رن جوڈ کتگ – کپٹن ایڈن ءَ بندات جوانی ءَ کتگ بلے بیست ءُ دو رن جوڑ کتگ ءُ واتر بوتگ – حیدرآباد ءَ پاور پلے ءَ دو وکٹانی تاوان ءَ چِل ءُ دو رن جوڑ کتگ –

ہینرک ءَ میانی اووراں لھتے چوکا ءُ چکا جتگ ءُ آئی ءَ شانزدہ بالاں سِی ءُ شش رن جوڑ کتگ بلے آئی ءِ آؤٹ بوگ ءَ پد حیدرآباد ءِ وکٹ یکشل ءَ کپان بوتگ انت ءُ ٹیم بے سوب بوتگ –

ممبئی انڈینز ءِ جیسن ءَ دو، ریلی میریڈیتھ چار اووراں سِی ءُ سَے رن داتگ ءُ دو وکٹ گپتگ انت – ڈیوڈ ءَ اے گوازی ءَ بالنگ ءِ جند نہ کُتگ، بلے چار کیچ ءِ گرگ ءَ ھوار واشنگٹب سندر ڈائریکٹ تھرو ءِ سر ءَ رن آؤٹ کتگ –

سن رائزرس ءِ اے پنچمی گوازی ءِ تہ ءَ سیمی بے سوبی انت ءُ ٹیم پوٹنٹ ٹیبل ءِ تہ ءَ نھمی نمبر انت – ارجن ٹیندولکر ءَ گڈی اوور ءَ جوانی کتگ ءُ بھونیشور کمار ءِ دروشم ءَ آئی پی ایل ءِ اولی وکٹ گپتگ –

چدوپیسر ممبئی ءَ یکسد ءُ نود ءُ دو رن جوڑ کتگ انت – روہت شرما ءُ ایشان کشن ءَ پہ ممبئی ءِ ھاتر ءَ بندات جوان کتگ – روہت ءَ ھژدہ بالاں بیست ءُ ھشت رن جوڑ کتگ ءُ آؤٹ بوتگ ءُ ایشان ءَ سِی ءُ یک بالاں سِی ءُ ھشت رن جوڑ کتگ – سیمی نمبر ءَ اتکگیں کیمرون ءَ جوانیں گوازی پیش داشتگ کہ آئی ءَ چِل بالاں شست رن جوڑ کتگ ءُ ناٹ آؤٹ بوتگ – آئی پی ایل ءِ تہ ءَ اے آئی ءِ اولی نیم سنچری بوتگ – تلک ورما ءَ ھم آئی ءِ جوانی ءَ ھمراھداری کتگ – تلک ءَ بس ھبدہ بالاں سِی ءُ ھپت رن جوڑ کتگ –

ممبئی انڈینز ءَ گڈی چار اووراں چِل ءُ ھشت رن جوڑ کُتگ گرین ءَ بالنگ ءِ ھم جوان بوتگ کہ آئی چار اووراں بیست ءُ نُھ رن داتگ ءُ یک وکٹ ءِ گپتگ –

چوشیں جاوراں بلوچ راھشوناں لوٹ ایت کہ آ دری کاری (سفارت کاری) ءَ را یورپی بنجاہ ءَ دارگ ءِ بدل ءَ آئی ءَ را سرجمیں جھان ءَ سرکنگ ءِ جھد ءَ بہ کن انت- کونسلران

بلوچ نودربر گل آزاد (BSO Azad) بیست ءُ سیمی بنجاھی لس مجلس ءِ نیاد بیاد لمہ ء وتن بانک کریمہ بلوچ ءُ بلوچ نمیران ءُ بنام بیگواھیں بلوچانی یات ءَ مروچی دومی روچ برجاہ دارگ بوتگ ءُ مروچی بزاں ھژدہ اپریل سَے شمبے ءِ روچ ءَ بلوچ نمیرانانی یات ءَ دو دمان ءِ بے تواری ءُ گوں گل ءِ بنجاھی لس مجلس ءِ نیاد بندات کنگ بوتگ –

بلوچ نودربر گل آزاد ءِ بنجاھی جارکش ءَ ماں رسانکدراں وتی شنگ کرتگیں درشان ءِ تہ ءَ مروچی لس مجلس ءِ سرجمیں ھال شنگ کُتگ ءُ گوشتگ کہ بی ایس او آزاد ءِ بیست ءُ سیمی بنجاھی لس مجلس ءَ ھشت بنگپانی (ایجنڈا) سرا تران بیت اِنت کہ ایشانی تہ ءَ بنجاھی سرکماش ءِ تران، آئین سازی، کارگشاد ءِ اھوال، نگدی نشست، گَل کاری ، دمگی ءُ میان استمانی سیاسی جاورھال ءُ آؤکیں گامگیج، گچینکاری ءُ سرکماش ءِ گُڑی تران ھوار اَنت –

جارکش ءَ گوشتگ کہ چوشکہ ھبدہ اپریل ءَ دو شمبے ءِ روچ ءَ دیوان ءِ اولی روچ ءَ سرکماش ءِ تران، آئین سازی، کارگشاد اھوال ءُ نگدی نشست ءِ بنگپانی سر ءَ پیسری روچ ءِ شنگ بوتگیں باوستاں گوں دیوان آسر بوتگ ات ءُ مرچی بزاں ھژدہ اپریل ءَ سَے شمبے ءِ روچ ءَ بنجاھی لس مجلس ءِ دومی روچ ءَ گل کاری، دمگی ءُ میان استمانی سیاسی جاورھال ءُ آؤکیں گامگیج ءِ بنگپانی سر ءَ گوں دلجمیءَ باوست کنگ بوتگ کہ اود ءَ (ڈسکیشن ءَ) دیوان ءِ کلیں کونسلراں بھر زرتگ ءُ پہ گل ءِ کار ءُ پروگرامانی درگت ءَ وتی شور ءُ سَلاہ داتگ انت –

جارکش ءَ گوشتگ کہ چو مدامی ئیں وڈا مرچی ئیں دیوان ءِ بندات اوں چہ بلوچ نمیرانانی یات ءَ دو دمان ءِ بے تواری ءَ بندات کنگ بوتگ ءُ دیوان ءِ پنچمی بنگپ تنظیمی امور بوتگ کہ آ دو بھرانی تہ ءَ بوتگ۔ بنگپ ءِ اولی بھر ءَ کونسلراں وتی تاک ونتگ انت کہ اے تاک (پیپر) آھاں بنجاھی کارگشاد ءِ گشگ ءِ پد ءَ چہ پیسر ءَ نبشتہ کتگ ات انت ءُ اے بنگپ ءِ دومی بھر ءَ اولی بھ رءِ پیش کتگیں گپ ءُ تران ءُ سِلاہ ءُ شورانی سر ءَ گیشیں باوست کنگ بوتگ –

آئی ءَ گوشتگ کہ بنجاھی لس مجلس ءِ ششمی سرھال دمگی ءُ میاں استمانی سیاسی جاورھال ءِ سر ءَ بوتگ کہ آئی ءِ تہ ءَ کونسلراں ھمے بنگپ ءِ سر ءَ وتی نبشتگیں تاک ونتگ انت –

دیوان ءِ سنگتاں تران کنان ءَ گشتگ کہ میاں استمانی سیاست ھمک روچ ءِ بنیاد ءَ چہ بدلی ءِ امل ءَ سپر کنان انت ءُ اے درچ ءَ انچو گمان بوان انت کہ روس ءُ یوکرین ءِ جنگ ءَ رند میان استمانی سیاست ءِ ندارگ آوکیں چندے مدتانی نیام ءَ بدل بوت کنت – گوستگیں یک کرنے ءِ ویل پمّے واستہ سرپد یا چار ءُ بیچار ءِ ھاتر ءَ بس انت کہ میان استمانی سیاست ءِ تہ ءَ ھچ پیمیں رھبند، لیکہ ءُ پائیدگ ابدی نہ بنت بگندئے گوں وھد ءِ ھمبرائی ءَ آھانی تہ ءَ مٹی ءُ بدلی کیت انت۔ ھما امریکہ کہ آئی ءَ تالبان ھوار سرجمیں جھان ءَ ھاسکر میانی ایشیا ءَ سویت یونین ءِ ھلاپ ءَ اسلامی گل مھکم کتگ ات، آھاناں نوک نوکیں سِلاہ دات ءُ سیاسی ءَ مالی بستار ءَ آھانی سک باز کمک کت ءُ رند ءَ وتی بندپتری مستریں جنگ اوں ھمیشانی ھلاپ ءَ کت ءُ در کپت – ھمے ڈول ءَ یک منّگ نامہ یے مارا ھما وھد ءِ سویت یونین ءُ نیٹو بزانکہ امریکہ ءِ میان ءَ دیم ءَ کیت وھدے کہ آھاں جرمنی ءِ یکجاھی ءِ سر ءَ پیسلہ کت کہ اود ءَ امریکہ ءِ سَرپان ءَ سویت یونین بزانکہ روسی فیڈریشن ءَ را دلجمیں بیسہ دات کہ امریکہ نیٹو ءَ را چہ جرمنی ءَ دیم نہ بارت انت بلے سویت یونین ءِ پرشگ ءَ رند امریکہ ءَ نیٹو ءَ را سرجمیں یورپ ءَ سر کت، آئی ءَ بالٹک نیشنزاں ھوار یوکرین کہ آئی ءِ مزنیں سیمسری بھرے گوں روس ءَ انت، آئی ءَ را ھم باسکی زورگ ءِ پلہ مرزی کت کہ ایشی ءِ سوب ءَ روس ءُ یوکرین ءِ میان ءَ جنگ پاد اتک کہ اے جنگ جھانی دنیا ءَ مدام بدلیانی سوب جوڑ بوان انت – ھمے ڈولیں درور مارا چہ سعودی عرب ءِ نیمگ ءَ گندگ ءَ پیداک انت، وھدے کہ عراق ءَ کویت ءِ سر ءَ ارش کت ءُ تاں دو روچاں آئی ءِ سر ءَ وتی ارش جَم داشت گڑا سعودی ءَ چہ وتی ترس ءَ سعودی عرب ءِ تہ ءَ “سیکورٹی گارنٹی” ءِ پالیسیانی بستار ءَ جتائیں پوجی اڈا دات، بلے استیں جاورالانی چار ءُ بیچارءَ گوما آئی ءَ وتی گواتانی دیم تاب داتگ انت ءُ چین، روس ءُ ایرانءِ ڈولیں امریکی دژمنیں ملک ءِ ھمبرائی ءَ وتی سیادیاں گھتر کنان انت، کہ اے جاور اے گپ ءِ منانک ءَ دینت کہ میاں استمانی سیاست ءِ میان ءَ ھچ پیمیں لیکہ اولی ءُ آسری بوت نہ کنت –

آھاں دیمتر ءَ گوشتگ کہ اے جاورھال تھنا میانی ایشیا ءِ نہ انت کہ اود ءَ امریکہ ءُ یورپ ءِ ھلاپ ھیال دیم ءَ پیداک انت بگندئے ساوتھ ایشیا ءَ ھوار ایشیا ءُ اپریکہ ءِ ڈولیں دمگ دمگاں اوں روایرکپت سینٹرک ورلڑ آرڈر ءِ ھلاپ ءَ توار چست بوان انت، یوکرین ءُ روس ءِ جیڑھاں پد یورپی ملکاں ابید گیشتر ملکاں روایرکپت ءِ ھمسنتی ءَ چہ انکار کت۔ ہندوستانی دری کارانی وزیر ءَ وتی یک گلگدارے ءِ تہ ءَ گشتگ ات کہ یورپ ءَ نوں چرے پکر ءَ درآیگی انت کہ “دنیا ءِ جیڑہ مئے جیڑہ نہ انت ءُ مئے جیڑہ دنیا ءِ جیڑہ انت۔” مرچی ھمے جاورھال میانی ایشیا ءُ خلیجی ملکانی نیمگ ءَ ھم گندگ پیداک انت کہ اود ءَ امریکہ ءِ پوجی اڈہ ھست انت ءُ دومی نیمگ ءَ چہ عرب ملکانی نیمگ ءَ ھمے زوتاں عراق ءُ ایران ءُ روس نواز سرکار ءِ گوما شریں سیادی ءُ اپریکہ ءِ ملکانی چین ءِ نیمگ ءَ آیگ میان استمانی سیاست ءِ دروشم مٹ کتگ- عرب ملک ءُ میانی ایشیا ءَ سعودی عرب ءِ ڈولیں مسلمانیں ملکانی نیمگ ءَ انچوش کہ انفراسٹرکچر، سیل ءُ سواد، گوازی ءُ مردمی ھکاناں ارزشت دیگ بوگ ءَ انت، اے چیز آؤکیں وھداں پورپ ءَ جتائی ءِ سوب جوڑ بنت، کہ ایشی ءِ درور گتر وڈیں مسلمانی ملکے ءَ فیفا ورلڈکپ ءِ اڈّ دیگ انت –

آھاں گوشت کہ بوت کنت اے راستی ءِ رد کنگ ھشکیں ھیالے کہ چہ سرجمیں دنیا ءَ امریکہ ءُ یورپ ءِ دزرس ءِ اینکس زوتاں ھلاسی کسانیں مدتے ءِ تہ ءَ چون بوت کنت ، بلے اے گُمان رد کنگ نہ بیت کہ اے وھداں ھرچ بدلی یے کہ آھان انت چرایاں اے گمان بوت کنت کہ جتائیں دمگاں ساڑی ئیں تاکت چہ امریکہ ءُ یورپ ءِ ساھگ ءَ در بیا انت ءُ وتی جیڑہانی تہ ءَ وت آزاد ءُ وتواکیں تاکتے بہ دار انت۔ روس ءُ ہندوستانی (انڈیا) دری کارانی وزیر ءِ میان ءَ بووکیں یک گند ءُ نندے ءَ گشت دنیا چہ یونی پولر ورلڈ آرڈرءِ بدلءَ پولی سینٹرک ورلڈ آرڈر ءِ نیمگ ءَ بہ روت انت، کہ ایشی ءِ بزانت ھمیش انت کہ ھرچ دمگے ءِ وتی یک جتائیں تاکت ءُ بنجاھے بیت کہ چریشی ءَ سرجمیں جہان ءَ تاکت ءِ مھار تھنا یک استانے ءِ دست ءَ نہ بیت بگندئے ھمک دمگ ءَ یک جتائیں بنجاھی تاکت ءُ پیسلہ ساز یءِ بنجاھے جوڑ بیت۔ بزانکہ چہ امریکہ ءُ یورپ ءِ ساھگ ءِ چیر ءِ بد لءَ اپریکہ، ساؤتھ ایشیا، میانی ایشیا ءُ ھوار کلیں دمگ وتی یک بنجاھی تاکتے دیم ءَ آرگ لوٹ انت کہ چہ اود ءَ آ وتی دمگی جیڑہ ءُ جنجالاں گیش ءُ گیوار بہ کن انت چیا کہ روایرکپت سینٹرک ورلڈ آرڈر سرجمیں دنیاءَ ودی بووکیں جیڑھانی توجیل سازی ءَ سرجم بے سوب بوتگ ءُ بازیں دمگاں وت جنگ ءُ مزنیں جیڑھانی آرگ ءِ مانزمان بوتگ –

کونسلراں میان استمانی سیاست ءِ بدل بوگ ءِ بنیاد ءَ بلوچ درکاری (سفارتکاری) ءِ سرءَ گپ ءُ تران کت ءُ گشت کہ ھرچونیں راجی آجوئی ءِ جہدےءِ ھاتر ءَ دری کاریءِ عمل باز ارزشت دار انت، ھداں بلوچ ءِ درکاری (سفارتکاری) ءِ بنجاہ یورپ نہ انت بگندئے میانی ایشیا ات ءُ عراق ءِ وڈیں ملکاں بلوچ سیاسی جھدکار نشت انت ءُ وتی روتاک ءُ ایدگہ سیاسی چست ءُ ایر برجاہ داشت انت، ءُ آ وھد ءِ میان استمانی سیاسی لوٹانی بنیاد ءَ بلوچانی میان ءَ امریکہ ءُ یورپ ءِ ھلاپ پکر ءُ ھیالے ھست ات، بلے 2000 ءَ رند سر چست کنوکیں بلوچ راجی جنز ءِ وھد ءَ دنیا ءِ جاور مٹ ات انت، یورپ ءَ مردم گری ءُ مردمی ھکانی تاج سر ءَ ات کہ آئی ءِ سوب ءَ بلوچ سیاسی جہدکار یورپ ءَ شت انت ءُ جنز ءِ چست ءُ ایر بنا کت انت ءُ مرچی ما گند ایں کہ میان استمانی چست ءُ ایر پدا مٹ بوان انت، پمیشکہ چوشیں جاوراں بلوچ راھشوناں لوٹ ایت کہ آ دری کاریءَ را یورپی بنجاہءَ دارگءِ بدلءَ آئی ءَ را سرجمیں جھان ءَ سرکنگ ءِ جھد ءَ بہ کن انت تاکہ آؤکیں وھداں ھر چونیں مزنیں مٹ بووکیں بدلیاں چہ بلوچ راجی جنز تاوان بار بوگ ءِ بدل ءَ چہ ھما جاوراں پائیدگ چست بہ کنت کہ آ پائیدگ جنز ءِ مھکمی ءُ سوبمندی ءِ مانزمان بہ بنت –

کونسلراں دمگی سیاسی جاورھالانی سر ءَ وتی ھیال درشان کت انت ءُ گشت کہ زورگریں پاکستان ءِ نیمگ ءَ ھمک روچ ءِ بنیاد ءَ بلوچ ورنایانی زورانسری گار ءُ بیگواھی، سی ٹی ڈی ءِ دستاں فیک انکاونٹر ءُ زانگولیں جونانی دور دیگءِ درچ برجاہ انت ءُ ھمد ءَ ھمک روچ ءِ بنیاد ءَ بلوچ زالبول استان ءِ زلمانی آماچ انت کہ ایش بلوچ راجمان ءِ ترس ءِ پیداک کنگ ءِ یک دگہ بے سوبیں کوشستے – ایشانی ھمبرائی ءَ ما گند ایں کہ وانگی بستار ءَ کمیشن کلچر گیش شاھگان کنگ بوگ ءَ انت، استانی شوربندی ءِ بنیاد ءَ مذہبی شدت پسندی ءَ گیش توان دیگ ءُ پرائیوٹ وانگجاھاں یک ھاسیں پندلے ءِ گوما جنز ءِ ھلاپ ءَ کارمرزگ، جتائیں این جی اوزاں بلوچ ڈیھ ءَ دیم ءَ آرگ، چہ بلوچ ءِ منشا ءَ ابید درملکی لٹ ءُ پلی زرداراں بلوچستان ءَ آرگ، سافٹ تاکت ءِ وسیلہ ءَ مھلوک ءَ چہ جنز ءَ دلپروش کنگ ءِ جھد کنگ ءُ جنز ءِ بارو ءَ نام نھادیں پارٹیانی وسیلہ ءَ مھلوک ءِ تہ ءَ دلپروشی آرگ ءِ کوشست ءُ رد آشوبی تاکتانی ھاتر ءَ میدان ءَ جوڑ کنگ، اے دراھیں جھد ءُ کوشستانی مکسد بلوچستان ءَ وتی کبزہ ءَ را گیش مھکم کنگ انت – اے استانی پالیسیانی مکابلہ کنگ استیں وھد ءَ راجی جنز ءِ ھاسیں دلگوشانی تہ ءَ بہ بنت –

بنجاھی جارکش ءَ وتی درشان ءِ تہ ءَ گوشتگ کہ ششمی بنگپ ءِ ھلاس بوگ ءَ پد کارگشاد ءِ نیمگ ءَ آوکیں گامگیج ءِ بنگپ ءَ تنظیمی کونسلرانی نیمگ ءَ آوکیں دو سالی پروگرامانی ھاتر ءَ داتگیں شور ءُ سلاہ دیوان ءِ دیم ءَ یک یک ءَ ایر کنگ بوتگ انت کہ آھانی سر ءَ کونسلرانی میان ءَ دلجمی باوست بوگ ءَ رند راجی جنز ءُ بی ایس او آزاد ءَ را گیش مھکم ءُ شاھگان کنگ ءِ ھاتر ءَ کونسلرانی گیشتری بھر ءِ منگ نامھانی پد ءَ لھتیں ھاس ءُ پرارزشتداریں پیسلہ زورگ بوتگ انت ءُ وھد ءُ جاورانی چار ءُ بیچار ءِ بنیاد ءَ بنجاھی لس مجلس ءِ ششمی بنگپ ءِ دومی بھر گچینکاری، سوگندی دیوان ءُ کماش ءِ گڑی تران پہ دیمی روچ ءِ ھاتر ءَ مھتل داشتگ انت-

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی پنچ ھزار ءُ ھبدہ روچ سرجم بوتگ انت –

مروچی چہ مستونگ ءَ غلام دستگیر بلوچ، موسی خان بلوچ ءُ دگہ مردماں اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچ جھد ءِ چیر ترینگ ءُ ایرموش کنگے ھاتر ءَ استان زورانسری آوار جنیانی تہ ءَ گیشی آرگ انت ءُ وڈ وڈیں ھنر ءُ ھیلاں سازگ انت –

آئی ءَ گوشتگ کک ماھل بلوچ ءِ میڈیا ٹرائل کانود ءِ بگیری دارگ انت ءُ آمیدگسی کاروائی ءَ سانمند کنگے کوشست کنگ بوگ ءَ انت – جھان ءِ تہ ءَ ھچ چشیں ملزم کہ آئی ءِ سر ءَ تنی وھدی کتکاری ءِ الزام ثابت نہ بوتگ آ ٹی وی ٹاک شو ءَ آرگ بہ بیت ءُ انٹریو گرگ بہ بیت – کئے میڈیا ءَ سرکنگ ءَ انت ءُ پرچا؟

آئی ءَ چہ پاکستان ءِ سپریم کورٹ ءَ گوں لوٹ کتگ کہ آ ماھل بلوچ ءِ میڈیا ٹرائل ءِ سرا گامگیج بہ زوریت بلکنہ پاکستان ءِ چیریں ایجنسیانی نیمگ ءَ بلوچ اھوالکارانی ترسینگ ءِ ھم جست ءَ بہ کنت – اے دابیں کار جمہوری رھبندانء بگیری انت -.

ماما قدیر ءَ گوشتگ کہ دروگیں ارزی ءَ بندیگیں ماھل بلوچ ءِ میڈیا ٹرائل ءِ سر ءَ گامگیج زورگ بہ بیت –