TBP Balochi

سربوتگیں ھالانی رِد ءَ مروچی پنچ شمبے ءِ روچ ءِ سھب ءَ پاکستانی پوج دشت ءُ تمپ ءِ میانی دمگ مزن بند ءُ زامران ءِ کوھاں مان ریتکگ لشکر کشی کنگ ءَ انت، پاکستانی پوج ءَ زمینی ءُ بُرزی کمک ھم گون انت –

دمگی اھوالکارانی رِد ءَ دشت ءُ تمپ ءَ ھردو نیمگاں پاکستانی پوج مزنیں کچے ءَ کوھانی تہ ءَ سر بوتگ –

اھولکار ءِ رِد سُھبگینیں اے دمگاں جنگی بالگرد ءُ ڈرون بالگتر تر ءُ تاب کنگ ءَ انت انت –

اے ھم گوشگ بوگ ءَ انت چہ بلیدہ ءَ نیمروچ ءِ وھد ءَ پاکستانی پوج ءِ گاڑی زامران ءِ کوھانی تہ ءَ شُتگ انت –

بلے تنی وھدی پوجی واکدارانی نیمگ ءَ اے درگت ءَ ھچ وڈیں درشان دیگ نہ بوتگ ناکہ تنی وھدی جانی تاوان ءِ ھال انت –

بلوچستان ءِ بنجاھی شھر شال ءِ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل برجاہ، زھرشانی بنجل ءَ مروچی پنچ ھزار ءُ یکسد ءُ سِی ءُ سَے روچ سرجم بوتگ انت –

مروچی کمیونسٹ پاٹی پاکستان ءِ بنجاھی سیکریٹری جنرل قاضی امداد سلطان، یحییٰ نیک محمد ءُ بلوچ وطن پاٹی ءِ بنجاھی کنوینر حیدر رئیسانی ءَ ھوار دگہ مردماں بنجل ءَ اتکگ ءُ بیگواھیں مردمانی کھولءِ گوم ءَ دلدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچستان ءَ زورانسری آوار جنیانی درچ یکشل ءَ تیزی ءِ گوم ءَ برجاہ انت – سیاسی باسک ءُ نودربر زورانسری آوار جنگ ءُ بیگواہ کنگ بوگ ءَ انت – اے ریاستی زوراکیانی بگیری ءَ مئے جھد برجاہ مانیت –

دومی نیمگ ءَ عبدالرحمن ء محمد بخش مری ءِ کھول ءَ وتی شنگ کرتگیں درشان ءِ تہ ءَ گوشتگ کہ عبدالرحمن سیزدہ جنوری سال دوھزار پانزدہ سھب ءِ ادار ھشت ءَ چہ نیوکاھان ھزار گنجی ءَ پولیس ءُ چیریں ادارھانی کارمنداں وتی گِس ءِ تہ ءَ زورانسری آوار جتگ ءُ شال ءِ پولیس تھانہ کسٹم ءَ برتگ پدا رند ءَ یک مردمے ءِ دیم زیر بوگ ءَ ایس ایچ او قادر قمبرانی ءَ آ یل داتگ- دومی روچ ءَ پدا قادر قمبرانی ھال کتگ کہ دوبر پیش بہ بیت آ شتگ پیش بوتگ ءُ اودا سریاب ء ایس پی ظہور احمد آفریدی ءُ ایس پی غفور لاگانی مری ھم ساڑی بوتگ انت ءُ پدا عبدالرحمن گوں دگہ چار مردم ءَ شال ءِ بجلی گھر تانہ ءَ برگ بوتگ انت ءُ یک شپ ءِ ھمودا بوتگ انت پدا مگرب ءِ نماز ءِ وھد ءَ چیریں ادارھانی کارمند اتکگ ءُ عبدالرحمن ھوار ایندگہ مردمانی چم بستگ ءُ ناشناسیں جاھے ءَ برتگ انت –

آئی ءَ گوشتگ کہ بیست روچ ءَ پد ماسٹر اعظم ء احمد خان یل کنگ بوتگ پدا ھشت ماھ ءَ پد حمید اللہ ء احمد حفظ اللہ ء یار خان، نجب اللہ ء نصیب اللہ شپ ءِ ادار یازدہ ءَ قمبرانی دگ ءَ یل کنگ بوتگ انت بلے عبدالرحمن ھنگت گار ءُ بیگوای انت –

سربوتگیں ھالانی رِد ءَ بلوچستان ءِ بنجاھی شھر شال ءَ ناشناسیں مردماں پاکستانی بیرک بھا کنوکیں اسٹالے ءِ سر ءَ دز بمب اُرش ءِ کتگ ، دومی نیمگ ءَ بلوچستان ءِ دمگ تمپ ءُ جھاؤ ناشناسیں مردماں پاکستانی پوج ءِ بنجلانی سر ءَ اُرش کُتگ –

گیشیں ھالانی رِد ءَ گوستگیں شپ ءَ ناشناسیں سلاہ بندیں مردماں کیچ ءِ دمگ تمپ ءَ پاکستانی پوج ءِ بنجل ءِ سر ءَ اُرش کُتگ ءُ درشُتگ انت –

اے اُرش تمپ ءِ دمگ کلاھو ءَ برجاھیں پوجی بنجل ءِ سر ءَ کنگ بوتگ اھوالکار ءِ رِد ءَ اُرش ءِ وھد ءَ سک باز تیرگواری ءُ تراکانی توار بوتگ –

ھمے وڈ آواران ءِ دمگ جھاؤ ءَ ھم سلاہ بندیں مردماں پاکستانی پوج ءِ بنجلے ءِ سر ءَ اُرش کتگ ءُ جانی تاوان ءِ ھال انت –

اھوالکار ءِ رد ءَ اے اُرش دوشی شپ ءِ ادار یازدہ ءَ جھاؤ ءِ بگاڑی زیلگ ءَ برجاھیں پاکستانی پوج ءِ بنجل ءِ سر ءَ کنگ بوتگ ءُ اے اُرش داں شپ ءِ ادار یک ءَ برجاہ بیتگ – تیر ءُ تراکانی توار داں دور ءَ اش کنگ بیتگ اَنت۔ اُرش ءِ آسر ءَ زورگریں پاکستانی پوج ءِ جانی تاوان ءِ ھال اِنت –

دومی نیمگ ءَ بلوچستان ءِ بنجاھی شھر شال ءَ موتی رام دگ ءَ تراک ءُ تیرانی توار اشکُنگ بوتگ –

پولیس ءِ رِد ءَ ناشناسیں مردماں چاردہ اگست ءِ درگت ءَ جنگ بوتگیں پاکستانی بیرکانی اسٹالے ءِ سر ءَ بمب اُرش ءِ کتگ ءُ چریشی ءَ دو مردم زدگ بوتگ انت –

اُرش ءَ پد پوج ءِ نیمگ ءَ تیرگواری کنگ بوتگ ءُ دمگ انگر کتگ –

زانگ بہ بیت گوستگیں روچ ءَ شال ءَ جوائنٹ دگ ءَ پاکستانی بیرک بھا کنوکیں یک اسٹالے ءِ سر ءَ ھم دزبمب اُرش ءِ کنگ بوتگ ات کہ چریشی ءَ دو پوجی کارمنداں ھوار شش مردم زدگ بوتگ اِتاں ءُ اُرش ءِ زمہ واری بلوچ آجوئی لوٹوکیں سلاہ بندیں گل بی ایل اے ءَ منّ اِتگ ات – بلے اے اُرش ءِ زمہ واری ھچ گل ءَ نہ من اِتگ –

ھمے وڈ بلوچستان ءِ جتا جتائیں ھند ءُ دمگاں پاکستانی پوج ءِ سرا بوتگیں اُرشانی زمہ واری ءَ ھم گیشتر بلوچ آجوئی لوٹوکیں سلاہ بندیں گل منّ اِنت بلے اے ھردو اُرشانی زمہ واری تنی وھدی منگ نہ بوتگ انت –

وکیل آباد ءِ زندان ءَ بندیگیں دو بلوچ پاھو دیگ بیتگ اَنت-

گیشیں اھوالانی رد ءَ ایران ءِ اُستان مشھد ءَ دو بندیگیں بلوچ ایرانی انکلاب ءِ آمیدگس ءِ ھکم ءَ پاھو دیگ بیتگ اَنت-

پاھو دیگ بیتگیں مردمانی پجار سِی ءُ پنچ سالی ئیں اھمد کریمدادزئی ء عبداللہ جھمنند تاجر آباد مشھد ءُ سِی ءُ چار سالی ئیں حمید گرخیل ء مجید جھمنند زابل ءِ ناماں زانگ بیتگ اَنت-

اھوالانی رد ءَ اے ھردوک دو سال ءَ پیش ماں نشہ باپاری ءِ پژدر ءَ گرگ بیتگ اَنت ءُ پد ءَ ایران ءِ انکلاب ءِ آشوب ءِ آمیدگس ءَ پاھو دیگ ءِ ھکم داتگ اَنت-

اھوالانی رد ءَ ھردوکیں مردمانی کھول سرپد کنگ نہ بیتگ اَنت ءُ اے بندیگ پاھو دیگ بیتگ اَنت-

زانگ بہ بیت ایران ءَ پاھو دیگ ءِ وئیل یک ترسناکیں رنگے ءِ دروشم ءَ روگ ءَ اَنت کہ اود ءَ لس مردم اے ترس ءُ بیم ءِ ودار ءِ ھلاس ءِ اُمیت ءَ راھیگ اَنت-

اِستانی مُلا ءُ بلوچ راج

نبشتہ کار: زھیر بلوچ

دی بلوچستان پوسٹ

وھدے یازدہ ساچان نوزدہ سد ءُ چِل ءُ ھپت ءَ بلوچستان چہ زورگریں برتانیہ ءِ چَنگُلاں آجو بیت ءُ یک وتواجھیں ڈیھے ءِ بستار ءَ دُگنیا ءِ دیم ءَ منّگ بیت گُڑا آ وھد ءَ پاکستان نامیں مُلک نہ بیت ءُ ھِندوستان پروشت ءُ پروش نہ بیت۔ ھِندوستان ءِ تہ ءَ مسلمان ءُ ھندواں ھوار دُرستیں نیکراھی منوگر برتانیہ ءِ بگیری ءَ ھندوستان ءِ آجوئی ءِ ھاتر ءَ گھگیری کن اَنت۔

وھدے کہ زورگریں برتانیہ چار ایت کہ نوں آئی ءِ زور نِزور بوان اِنت گُڑا آ گوں جناھ ءُ ایدگہ لُچیں مسلماناں شور کنت کہ شما مسلمان باید اِنت چہ ھِندواں جُتا بہ بہ اِت ءُ وتی مسلمانیں ڈیھے جوڑ بکن اِت۔ چی ءَ کہ زورگریں برتانیہ چار ایت اگاں باندا روچ ھندوستان آجو بہ بیت ءُ اے درُستیں ملک یکجاہ بہ بیت گُڑا ایشیا ءِ تہ ءَ برتانیہ ءِ واجھی ھلاس بیت پمیشکا برتانیہ وتی یک کاسگ چٹیں مُلکے پاکستان ءِ نام ءَ دیم ءَ آرگ لوٹ ایت۔ گُڑا ھمے وڑ ءَ نیکراھی ءِ نام ءِ سر ءَ مردم گنوک کنگ بنت ءُ اے وتگڑیں پاکستان نامیں اِستان ءَ برتانیہ جوڑ کنت۔

وتگڑیں پاکستان ءِ جوڑ بوگ ءَ پَد جناھ ءُ برتانیہ ءِ چم بلوچستان ءَ سک بنت آ نہ لوٹ اَنت کہ بلوچ وتواجہ بہ بنت ءُ وتی ڈیھ ءِ سر ءَ ایمنیں زندے بہ گوازین اَنت۔ پمیشکا لُچیں جناھ نیکراہ ءِ نام ءِ سر ءَ بلوچاں گوں پاکستان ءَ ھوار بوگ ءِ سلاہ ءَ جنت بلے بلوچ ھما روچ ءَ اے گپ ءَ رَد کن اَنت کہ بلوچ پرچا مزھب ءِ نام ءِ سر ءَ گوں پاکستان ءَ ھوار بہ بنت۔ بلوچانی زمین جتا اَنت، زبان ءُ دودمان جتا اَنت۔

گُڑا ھما روچ ءَ پَد زورگریں پاکستان لھتیں وتگڑیں سرداراں پہ لب ءُ لالچ ءُ پہ مزھب ءِ نام ءِ سر ءَ گوں وت ھوار کنت ءُ بلوچستان ءِ سر ءَ اُرش کنت ءُ بلوچ ڈیھ ءَ ایردست کنت۔

نوں اِد ءَ اے گپ پدر بیت کہ بلوچ ءَ نیکراہ ءَ چہ پیسر وتی راج، دود ءُ ربیدگ ءُ وتی زمین دوست اَنت۔ پمیشکا زورگریں پاکستان بلوچ ڈیھ ءِ ایردست کنگ ءَ پَد وڑ وڑیں پندلانی رِد ءَ بلوچ ءِ چُکچینی ءَ کنگ ءَ اِنت۔ چی ءَ کہ زورگِر ءَ بلوچستان ءِ گوھر کیمتی مڈی درکار اَت۔

اے رِد ءَ زورگریں اِستان ءَ بلوچانی بھر ءُ بانگ کنگ ءُ وت ماں وت میڑینگ ءِ وڑ وڑیں پندل ساز اِتگ۔ برے زبان ءِ نام ءِ سر ءَ ۔۔ برے ھَند ءُ دمگ ءِ نام ءِ سر ءَ ۔۔۔۔برے زات ءُ زُریات ءِ نام ءِ سر ءَ ۔۔۔ ءُ برے مزھب ءُ نیکراہ ءِ نام ءِ سر ءَ ۔

اے دُرستیںں پندلانی تہ ءَ زورگر ءَ دُرستاں گیشتر مزھب ءِ سر ءَ زور داتگ۔” یک گپے مارا زانگ لوٹ ایت کہ دنیا ءِ تہ ءَ ھچ چُشیں زمینے نیست کہ اود ءَ یکیں مزھب ءِ راج جھمنند بہ بنت” پمیشکا زورگریں استان بلوچاں وت ماں میڑینگ ءُ گورجیگ ءِ کنگ ءِ ھاتر ءَ وتی لھتیں مزھبی کاسگ چٹ جوڑ کتگ کہ زگری ءُ نمازی ءِ نام ءِ سر ءَ بلوچاں بہ جن اَنت ءُ وت ماں وت کُشت ءُ کوش بکن اَنت۔زورگر ءِ اے کاسگ چٹاں کمو ریش دیم ءَ داشتگ بلے بُن ازل ءَ اے ناں مُلا اَنت ءُ ناں مزھبی مردم اَنت بلکیں اے اِستانی کاسگ چٹ اَنت۔ اے بس ھما کار ءَ کن اَنت کہ اشاناں پاکستانی لشکر پرما ایت۔

اے ھمے کُشندہ ٹولی (ڈیتھ اسکواڑ) اِنت بس زورگِریں لشکر ءَ ایشی ءِ درُوشُم مَٹ کتگ دانکہ بلوچ راجی جُنز ءَ مزھب ءِ نام ءِ سر ءَ اڈاند ءِ آماچ بہ کنت ءُ پروش بہ دنت۔

وھدے کہ زورگریں استان ءَ چار اِت کہ منی دُرستیں پندل بے سوب بوتگ اَنت۔ زبان، ھند ءُ دمگ، زات ءُ زریات، میر ءُ سردارانی کارمرز ھم بے سوب بوت، زگری ءُ نمازی ءِ پندل ھم بلوچ راجی جُنز ءِ دیم ءَ بے سوب بوت۔ چی ءَ کہ بلوچ ءَ چہ مزھب ءَ پیسر وتی زمین ءُ راج ءُ وتی زبان ءُ ربیدگ دوست اَنت۔

نوں زورگریں لشکر ھمے اِستانی مُلایاں پرمایگ ءَ اِنت کہ کُپر ءُ شِرک ءِ نام ءِ سر ءَ بلوچ ءِ وانِندہ ءُ زانتکاریں مردماں بہ جن اِت۔ دانکہ بلوچ راج ءِ تہ ءَ زانشتیں سر پشت مہ کپ ایت ءُ بلوچ وتی راجی پجار ءُ وتی راجی جُنز ءَ چے گِستا بہ بیت۔

پیسر ءَ زورگریں لشکر ءَ وتی کُشندہ ٹولی ءِ دست ءَ بلوچ زانتکار ءُ وانِندہ شھید کتگ اَنت انچوشکہ شھید زاھد آسکانی، شھید اُستاد سباہ دشتیاری، شھید پروپیسر رازک بلوچ ھمے وڑ ءَ مرچی ھمے مزھبی کُشندہ ٹولی ءِ دست ءَ شھید راوُپ بلوچ ءَ را ھم شھید کُت اِش۔

بلوچ راج ءَ زورگریں اِستان ءِ دُراھیں پندل ءُ لُچی زانگ لوٹ اَنت۔ اے مُلا شاھمیر ، ملا گُلام، مُلا رمزان مینگل، مُلا اِجاز، مُلا منزور ءُ شپیک مینگل۔ اے دُرس بس نام ءِ مُلا اَنت اسل ءَ اے زورگریں پاکستانی لشکر ءِ ھاسیں مردم ءُ کُشندہ ٹولی اَنت۔انچوش کہ بلوچ راج ءَ پیسر ءَ زورگریں استان ءِ پندل بے سوب کتگ اَنت ھمے وڑ ءَ دیم ءَ ھم بلوچ راج تپاک ءُ یکجاہ بہ بیت ءُ وتی راجی آجوئی جُنز ءَ ھوار بہ بیت۔ چی ءَ کہ زورگر ءِ دُرستیں پندل ءُ زوراکیانی پُشدر بس بلوچ چُکچینی ءُ بلوچ ءِ ایردستی ءَ مھکم دارگ اِنت۔

بلوچستان آجو بات
بلوچ راج تپاک ءُ یک مُشت بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

عبدالرؤف ءِ کوش: نیکراھی ناشرکارانی گیش بوگ ءِ گمان

ٹی بی پی گچینی

فرید بلوچ

بلوچستان ءِ دمگ کیچ ءَ یک اسکولے ءِ استاد عبدالرؤف ءِ کوش ءِ ھال ءَ مزنیں کچے ءَ تُرسے ودی کُتگ۔ گمانی دروشم ءَ نیکراھی بھتامانی پد ءَ کُشگ بیتگیں، عبدالرؤف ءِ بیرانی اے دمگ بلوچستان ءَ ودوکیں نیکراھی اڑانڈانی چیدگ اِنت کہ اے راجدپتری رد ءَ سیکولر سرگُشتنانی پد ءَ زانگ بیت اِنت۔

عبد الرؤف یک “نیکراھی جرگہ” ءِ ھاتر ءَ روگ ءَ بیتگ، آ جرگہ ءِ راہ ءَ کُشگ بوتگ وھدے آ جرگہ ءَ وتی سر ءَ جتگیں نیکراھی بھتامانی گیوار کنگ ءَ رؤگ ءَ بیتگ۔ اے بھتامانی دلجمی اھوال انگت پدر نہ اَنت، بلے ترسناکیں آسر اوپار ءِ ھالپروش اِنت۔

پدگرد:

عبد الرؤف ءِ گمانی کوش ءِ ھلاپ ءَ بگیر ءَ جتاجتائیں تکانی نیمگ ءَ زیت پدگرد دیم ءَ اَتکگ۔ کہ اود ءَ بی این ایم ءِ مردمی اگبالانی تک، پانک ءَ جاور ھالانی سنگینی ءِ سر ءَ ھیال درشان اتگ اَنت، ایشی ءِ تہ ءَ پاکستانی آرمی ءِ نیمگ ءَ ڈیتھ اسکواڈز ءِ ٹھینگ ءُ بلوچستان ءَ نیکراھی ناشرکارانی ودگ ءِ سر ءَ ترُس ءِ درشان کُتگ۔

بلوچ باسک، نیاز بلوچ ءَ راجدپتری سیکولر کَدر ءُ بلوچ چاگرد ءِ سر ءَ درشان کنان ءَ گُشتگ کہ بلوچ راجدوستی ءُ مکسد ءَ چہ دلگوش ءَ دیر کنگ ءِ ھاتر ءَ پاکستان ءِ نیمگ ءَ چہ نیکراھی ناشرکاری ءِ کارمرز کنگ بیمناک اِنت۔

مردمی اگبالانی باسک ماہ رنگ بلوچ ءَ شھگانیں دروشمے ءَ جاورانی سر ءَ رژنائی کنان ءَ گُشتگ کہ “نیکراھی مکسد ءَ پہ یک بلوچ ورنایے ءِ ڈیھی مستری ءَ کوش مئے سیکولر چاگرد ءَ پہ یک نوکیں چکاسے ودی کُتگ۔  پد ءَ ھم، ڈیھ ءِ نیمگ ءَ چہ اے ’نیکراھی تران‘ نوکیں گپ نہ اَنت۔ ڈیھ ءَ بازیں مدتے ءَ چہ بلوچانی سیاسی سنچ ءَ دارگ ءِ ھاتر ءَ ڈیتھ اسکواڈز کارمرز کُتگ اَنت۔”

بلوچ نیشنل موومنٹ (بی این ایم) ءِ چیئرپرسن ڈاکٹر نسیم بلوچ ءَ ٹویٹر ءِ سر ءَ اپسوز ءِ درشان کنان ءَ گُشتگ کہ کیچ ءَ عبدالرؤف بلوچ ءِ کوش یک اپسوزیگ ءُ نادوستیں کردے۔ مدتے ءَ چہ، پاکستان ءِ نیمگ ءَ نیکراھی ءِ کارمرزی ءَ گوں بلوچاں ایردست دارگ ءِ بابت ءَ ھژار کنگ ءَ بیتگیں، بلے بلوچاں وتی سیکولر کیلو برجاہ داشتگ اَنت۔”

اھوالکار کیا بلوچ ءَ یک راجدپتری درورے دیان ءَ گُشتگ: “مکران ءَ مدرسہ راجدوستیں جزبگانی دیمپانی کنگ ءِ ھاتر ءَ دیم ءَ آرگ بوتگ اَت اَنت۔ چریشی ءِ سوب ءَ انچیں ادارگ پنجگور، کیچ ءُ گوادر ءَ مزنیں کچے ءَ شنگ اتگ اَنت۔“

ھمے دمگ ءَ سیادی داروکیں دگہ یک اھوالکارے علی جان مقصود ءَ گُشتگ کہ “رپورٹس گُش انت کہ عبدالرؤف چہ آئی ءِ کوش ءَ پیسر وتی نیکراھی لیکھانی پھازگ ءِ ھاتر ءَ یک نیکراھی جرگھے ءَ دیم دیگ بیتگ اَت۔ چُشیں وئیل بلوچستان ءَ برجاھیں نسل کشی ءَ گیشتر پدراہ کن اَنت۔

بلوچ یکجھتی کمیٹی ءَ مفتی شاہ میر ءِ پئیمیں نیکراھی کارستانی سر ءَ ترندی ایراد گری کُتگ۔ آیانی سر ءَ بھتام جتگ کہ جندی مُزانی ھاتر ءَ آ توھین رسالت ءِ ٹاھانی کمک ءَ زیر اَنت، ھمے پئیم وانگی ادارگانی تہ ءَ وتسریں سانمندی اِنت۔ آیاں نیکراھی بنھشتانی سر ءَ بلوچ آباتی ءَ گیشتر بھر کنگ ءِ گمانانی سر ءَ زور دیان ءَ چُشیں ڈیھی چیردستی ءَ برجاھیں نیکراھی پندلانی بگیر ءَ مھلوک ھژار کُتگ اَنت۔

تربت سول سوسائٹی ءَ تربت ءَ نیکراھی ءِ کم شرپی ءِ بھتامانی رد کارمرز کنگ ءِ سر ءَ اپسوزے درشان کُتگ، کہ ایشی ءِ سوب ءَ عبدالرؤف ءِ دردناکیں کوش ءِ وئیل دیم ءَ اتکگ۔ آیاں مکران دمگ ءِ راجدپتری نیکراھی ھمسنتی ءَ پدر کنان ءَ دمگی واکدارانی بے کردی ھم پدر کُتگ۔

راجدپتری رد ءَ:

بلوچستان ءَ مدام وتی سیکولر پجار بُرز داشتگ۔  راجدپتری رد ءَ یک باز نسلی ھند، اے دمگ ھوارکاریں مانشت ءِ چیدگ بوتگ، کہ اود ءَ بازیں ٹک، دود ءُ ربیدگ ءُ نیکراھی لیکہ جتاھیں اھداں ابید کجام ھم جنجالاں یکجاہ جھمنند بوتگ اَنت ءُ پیداک اَنت۔ بلوچاں مدام وتی سیکولر ربیدگ ءِ پھر بستگ، داں انچوکا کہ جتاھیں نیکراھی لیکھانی جھلانکیں راج ء دروشم ءَ ھم۔

البت، اے یکجاھیں ھمسنتیں ٹیپسٹری ءَ گوستگیں لھتیں دھکانی تہ ءَ اڑانی سان پیش دارگ بندات کُتگ اَنت۔ یک بودناکیں درشانی دروریں 2014 ءَ گوادر ءَ دی اوسس اسکول ءِ بنگیج کار زاھد آسکانی ءِ کوش اِنت۔ ڈیھی مستری ءَ گمانی نیکراھی ناشرکارانی دست ءَ آئی ءِ کوش ءَ دمگ ءَ جاڑیگیں زانشت بلد ءُ راجدوستاں دیمپانیں ھترھانی پدراھی کُتگ۔

نیکراھی ناشرکاری ءِ سیادی:

مروچی، ڈیھی تاکتانی نیکراھی پولرائزڈ پجار ءَ دیم ءَ برگ ءِ بابت ءَ وسواس گیشتر بوان اَنت، کہ آ عبدالرؤف ءِ کوش ءِ پئیمیں وئیلاں پدر بیت اِنت۔ چُشیں وئیل تیزی ءَ گوں ترسناکیں ھدے ءَ داں وتی سانمندی ءَ دور دات کن اَنت۔ اے بدلی 2001 ءَ ھاسیں پئیم ءَ سُر ءُ پُر ءَ اَتک وھدیکہ اوگانستان ءِ سر ءَ امریکہ ءِ اُرش ءَ پد، ھمساھگیں ڈیھ ءَ اسلام دوستیں ٹولیاں بلوچستان ءَ باھوٹی زرت ءُ کم کم ءَ بلوچستان ءِ چاگردی ءُ نیکراھی چاگرد ءِ سر ءَ سانمند بوت اَنت۔

چد ءُ گیشتر ، بازیں پریسکار گُش اَنت کہ بلوچستان ءَ آجوئی لوٹوکیں برجاھیں راجدوستیں جزبگانی دارگ ءِ ھاتر ءَ ڈیھہ ءَ یاگی گری ءِ بگیریں گامگیج نیکراھی بنھشتانی سر ءَ بندوک اِنت۔ اے گامگیج ءِ آسر ھم دیم ءَ اَتکگ اَنت۔ اگاں چہ ایشی ءِ مکسد بلوچ راجدوستیں جزبگانی دیمپانی کنگی اَت، بلے ایشی ءَ پہ زانت اگاں نزانتکاری اے پئیم ءَ نیکراھی بے اوپاری ءُ پرکھانی نیام ءَ جدل ودینتگ اَنت۔ مروچی نیکراھی ءُ پدریچی زیرزند چشکہ ہزارہ، ہندو ءُ ذکری اے گامگیج ءِ شپدیمیں سانمدی ءِ چہ تاوانبار اَنت۔

مٹ بیوکیں جاوراں ھم اے دمگ ءِ تہ ءَ نیکراھیں ناشرکاریں ٹولیانی ھاتر ءَ گھتریں جاور ودی کُتگ اَنت۔ ٹی ٹی پی ءِ پئیمیں ٹولی ءِ لیکھانی توم ءَ کِشگ ءُ سانمندی ءَ ودینگ ءِ ھاتر ءَ جوانیں پِڑ شواز کن اَنت، کہ آ دکھی سرگشتنی رد ءَ برجاھیں سیکولر دومان ءَ چکاس اَنت۔

نیکراھی بنیات پرستی ءِ ودگ ءَ لھتیں کارست ھم مدام گندگ بنت۔ یک نامے کہ مدام ردوم زیریت آ شفیق مینگل اِنت، کہ ڈیھی مستری ءَ برجاھیں “ڈیتھ اسکواڈ” ءِ رھشون ءُ مسلح دفاع تنظیم (MDT) ءِ سروک اِنت۔ شفیق مینگل ءَ 2008 ءَ ایم ڈی ٹی ٹھینتگ اَت ءُ گمان کنگ بیت کہ آئی ءَ گوں دگہ نیکراھیں ناشرکاریں گلاں گوں نزیکی اِنت۔

گمانی رد ءَ شفیق مینگل ءِ سیادی کراچی ءَ دیوبندی مدرسہ ءُ لشکر طیبہ ءِ پئیمیں نیکراھیں ناشرکاریں ٹولیاں گون اِنت۔ یک بنامیں ’ڈیتھ اسکواڈ‘ ءِ رھشون ءِ رد ءَ، آ راجدوستیں ءُ ٹک بگیری ءِ ھلاپ ءَ مدام شدت کارمرز کُتگ۔ البت، آئی ءِ پلہ مرزی کنوکیں تک چشکہ آئی ایس آئی،  وتگڑیں دولت اسلامیہ ءُ لشکر جھنگوی العالمی ءِ سروک ءُ آئی ایس آئی ءِ مستری ءَ وڈھ بنجل ءَ ھیلکاری گِپتگ اِش کہ اے گیشتر ترسناکی ءِ سوب اِنت۔

گیشتر مانگیشیتگیں مردم مفتی شاہ میر عزیز ءِ پئیمیں مردم اَنت، کہ ایشانی بابت ءَ ھیال کنگ بیت کہ آ وَ عبدالرؤف ءِ کوش ءَ برپارو ھوار اَنت شاہ میر عزیز نیکراھی مدرسھانی پُشت ءَ نیکراھی ناشرکاریں ٹولیانی مستری ءَ اِنت۔ چُشیں ادارے ھاسیں نیکراھی لیکھانی شنگاری کن اَنت ءُ پوجی مکسداں دیم ءَ بر اَنت، بلوچستان ءِ سر ءَ دارشت ءِ برجاہ دارگ ءَ ھاتر ءَ ڈیھہ ءِ نیمگ ءَ دو دیمیں کرد ءِ درشان کن اَنت۔

مروچی بلوچستان یک سکیں جیڑہ یے ءِ دیمپان اِنت، ڈیھی سانمندی، ڈیتھ اسکواڈ ءُ نیکراھی ناشرکارانی وت ما وت یکجاہ بئیگ ءِ سوب ءَ بلوچستان ءِ راجدپتری سیکولر سرگشتن ھترہ ءِ تہ ءَ اِنت، چریشی ءِ سوب ءَ بلوچانی دپتری کدر ءِ باندات بے باوری اِنت۔

مصری شھری عبدالمولی جیل ءَ آجو بیگ ءَ پد وتی زال ءُ جنک ءِ گردنے چاکو ءِ سر ءَ بر اتگ ءُ کشتگ انت ءُ چار زھگ زدگ کتگ اَنت ئِے –

قاھرہ ءِ دمگ الجیزہ ءَ انسانیت ءِ دردناکیں کسہ ءَ سرجمیں دمگ ءَ ترس بیم ءِ دردناکی ود اتگ-

پھزداراں وئیل ءَ پد تتکگین جرمکار گپتگ کہ اسکریپ ءِ کار ءَ بیتگ ٹ پولیس ءَ ھال سر بیتگ کہ مولی نامیں مصری شھری کہ ھمے زوتاں جیل ءَ دراتکگ بیتگ وتی زال رانیا ءُ نُھ سالیگیں جنک جنا عبدالمولی کشتگ اَنت ءُ دگہ چار زھگ کُشگ ءِ جھد کتگ انت کہ اے وھد ءَ زدگ انت ءُ نادراہ جاہ ءَ مرگ ءِ کش ما کش ءَ اَنت-

پبلک پراسیکیوشن ءِ ٹیم ءَ جرمانی یکجاہ کنان بندات کتگ، زدگ بیتگیں دو جنکاں گوشتگ کہ آیانی پت ءَ گیشتر نشہ کتگ ءُ آیانی مات ءَ گوں اڑ اتگ –

ھما روچ ءَ کارچ ءِ اُرش ءَ پد آئی ءَ لوگ ءَ آس جنگ ءِ ھم جھد کتگ – پولیس ءِ رد ءَ وئیل ءَ مجرم وتی سنگتے ءِ گور ءَ ٹپ اتگ کہ آ دزگیر کتگ-

جست ءُ پرس ءَ پد جرمکار ءَ اے وئیل من اتگ ءُ گوشتگ کہ لوگبانک ءَ جنگ ءُ چوپ کتگ گڑا لاچاری ءَ اے گامگیج چست کتگ-

امارات روتاک دی نیشنل ءِ رد ءَ جرمکار ءَ پولیس ءِ واکداراں گوں گوشتگ کہ آئی ءِ زال ءَ پنچ جنک ودی کتگ اَنت ءُ بچک ودی نہ کتگ-

جرمکار یک دگہ جرمے ءَ وتی سزائے ھلاس کتگ انت ءُ جیل ءَ آجو بیتگ بلے اے وھد پراھی ءَ پد زندان ءَ گوازینگ کپ ایت-

پولیس ءَ جرم ءِ چیردیگ ءِ کمک ءَ جرمکار ءِ سنگت ھم دزگیر کتگ – عبدالمولی پیسر ءَ ھم پولیس ءَ نشہ ایر کنگ ءُ کارمرد کنگ ءِ پژدر ءَ دزگیر کتگ –

سر بیتگیں ھالانی رد ءَ روکپتی بلوچستان ءِ دمگ پھرہ ایرانشھر ءَ یک گاڑی ءِ سر ءَ تیرگواری کتگ ءُ گاڑی چَپی بیتگ –

اھوالانی رد ءَ رد ءَ گوستگیں شپ ءَ ایرانی لشکر ءَ اوگانی مھاجرانی گاڑی ءِ سر ءَ تیرگواری کرتگ ءُ ڈرائیور ءِ دست ءَ گاڑی لگوشتگ ءُ چپی بیتگ-

اھوالانی رد ءَ گاڑی ءَ سواریں مردم زدگ بیتگ اَنت ، زدگ بیتگیں مردم نادراہ جاہ ءَ برگ بیتگ اَنت-

اھوالانی رد ءَ زدگ بیتگیں مردمانی مردینانی ھواری ءَ یک زالبولے ءَ یک زھگے ھم ھوار اِنت –

اھولانی رد ءَ چرے وئیل ءَ پد دمگ ءِ مردم برانز گپتگ ءُ لشکر ءِ بگیری ءَ زھرشانی اِش کتگ – ءُ پد ءَ لشکر ءَ پشت مانداتگ ءُ شتگ –

زانگ بہ بیت روکپتی بلوچستان ءَ گوست ءَ ھم ھمے داب ءَ ایرانی لشکر ءَ تیرگواری کتگ ءُ پد ءَ مردمانی گاڑی کپتگ ءُ مردم زدگ ءُ زامبیل کتگ اَنت-

بلوچ لبریشن آرمی ءِ جارکشّ جیئند بلوچ ءَ ماں رسانکدر ءَ وتی شِنگ کُرتگیں درشان ءِ تہ ءَ گْوشتگ کہ بلوچ لبریشن آرمی ءِ سرمچاراں ھزدار ، شال ءُ کولواہ ءَ چار جتاجِتائیں اُرشاں زورگیریں لشکر ءُ وتگڑیں پاکستان ءِ آجوئی ءِ وشی ءَ اسٹالے ءَ را نِشانگ کُرتگ ، اُرشانی سوب ءَ چہ دو کارندہ مُرتگ ءُ نُھ زدگ بیتگ اَنت ۔

آئی ءَ گُْوشتگ کہ بی ایل اے ءِ سرمچاراں مرچی مگرِب ءِ وھد ءَ ھزدار ءِ ھِند ءَ ڈی سی کارگِس ءِ دیم ءَ زورگیریں پاکستانی لشکر ءُ پولیس ءِ ھواریں گشتی ٹولی ءَ را ریموٹ کنٹرولڈ بمب اُرشے ءَ نِشانگ کُرتگ وھدے کہ آ ھشت موٹل سائیکلانی سر ءَ گشت کنگ ءَ بُوتگ انت ۔

آئی ءِ گْوشتگ کہ تراک ءِ زد ءَ آیگ ءَ چہ دُژمِن ءِ دو کارندہ ھما جاہ ءَ مُرتگ اَنت ءُ کم چہ کم سے زدگ بُوتگ وھدیکہ دو موٹل سائیکلاناں بازیں تاوان رس اتگ ۔

جارکشّ ءَ گْوشتگ کہ اُرش ءَ رند زورگیریں لشکر ءَ ھمے دمگ ءَ دگ بندی کُرتگ ءُ رسانکدر ءَ وتی تاوانانی چیر دیگ ءِ کوشِست کُرتگ ۔

جیئند بلوچ ءَ گُشتگ کہ ھمے وھد ءَ بی ایل اے ءِ سرمچاراں ھزدار ءِ ھِند مولہ ءَ پولیس تھانہ ءَ را دز بمب اُرشے ءَ نِشانگ کُرتگ ۔

جارکشّ ءِ گْوشتگ کہ دِگہ یک اُرشے ءَ بلوچ لبریشن آرمی ءِ سرمچاراں مرچی شال ءِ ھِند ءَ جوائنٹ دگّ ءَ پاکستانی بیرکانی یک اِسٹالے ءَ را دزبمب اُرشے نِشانگ کُرتگ ۔ اے اِسٹال کبزہ گیریں لشکر ءِ دست چیر ءَ آیانی پانگس ءِ نزّیک ءَ برجاہ کنگ بُوتگ وھدیکہ پولیس ءُ سادگیں پُچّانی اندر ءَ چیریں گلّانی کارندہ اِسٹال ءِ پھریزگ ءَ بیتگ انت ۔

جئیند بلوچ ءَ گوشتگ کہ سرمچارانی اُرش ءَ دو پولیس کارندھانی ھواری ءَ اِسٹال جنوکیں دو مردُم زدگ بُوتگ انت ۔

بی ایل اے ءِ جارکشّ ءَ گْوشتگ کہ بلوچ لبریشن آرمی اے سر ءُ سوج ءَ کنت کہ زورگیریں پاکستانی لشکر ءُ چیریں گلّانی نیمگ ءَ چہ زورگیر ءِ وتگڑیں ” آزاتی ءِ وشی “ ءِ واستا برجاھیں اسٹالز ، مُچّیاں ءُ مراگِشاں وترا دُور بِدار انت ، بلوچ سرمچار آیانی سر ءَ ھرچ وھد ءَ اُرش کُرت کن انت ۔

آئی ءِ گْوشتگ بُوتگ کہ بلوچ لبریشن آرمی ءِ سرمچاراں زورگیریں پاکستانی لشکر ءِ سر ءَ چارُمی اُرش کیچ ءِ ھِند کولواہ ءَ کُرتگ ۔ سرمچاراں کولواہ مالور ءِ دمگ ءَ دُژمِن لشکر ءِ یک پانگسے ءِ سر ءَ گوں نوکیں سِلاھاں اُرش کُرتگ ، اُرش ءَ کم چہ کم دو دُژمِن کارندہ زدگ بُوتگ انت وھدیکہ آیاناں بازیں مالی ءُ جانی تاوانانی دیمپانی کنگ کپتگ ۔

جارکشّ ءِ گْوشتگ بُوتگ کہ ھمے ساھتاں دُژمِن لشکر ءَ سرویلینس ڈرونے کارمرز کُرتگ کہ آئی ءَ سرمچاراں جتگ ءُ دور داتگ ۔

جارکشّ جیئند بلوچ ءَ گْوشتگ کہ بلوچ لبریشن آرمی اے چاریں اُرشانی زمہ واریاں منّ ایت ءُ اے سوگِند ءِ پیلو ءَ کنت کہ زورگیریں لشکر ءِ سرجمی ءَ درایگ ءَ تاں مئے اُرش برجاہ بنت انت ۔

ھزدار، کولواہ ءُ تربت ءَ پاکستانی پوج ءِ سر ءَ ناشناسیں مردماں جتا جتائیں رنگ ءُ دروشماں اُرش کتگ اَنت-

سر بیتگیں ھالانی رد ءَ ھزدار ءَ آر سی ڈی دگ ءَ چمروک ءِ ھند ءَ ترندیں تراکے بیتگ ءُ چریشی ءَ پد پوج ءَ دمگ انگیر ءَ کتگ –

دمگی مردمانی رد ءَ تراک پاکستانی پوج ایف سی ءُ پولیس ءِ موٹر سائیکل گشتی ٹولی ءِ سر ءَ کنگ بیتگ-

ھمے وڑ ءَ کولواہ ءِ دمگ مالار ءَ ناشناسیں مردماں پاکستانی پوج ءِ چیک پوسٹ نشانگ کتگ ءُ پشت مانداشتگ ءُ شتگ اَنت-

ھمے وڑ ءَ بلوچستان ءِ دمگ ءِ کیچ ءَ یکے ءَ پد دگہ سَے تراکانی توار اشکنگ بیتگ اَنت-

سرکاری بنشون ءِ رد ءَ ناشناسیں مردماں پورس ءِ 186 ونگ ءِ پوست ءِ سر ءَ چار گرینیڈ لانچر آس داتگ –

چریشی ءَ پد پوج ءَ دمگ انگیر ءَ.کتگ ءُ تیرگواری کتگ ءُ راہ ءُ در بستگ اَنت-

زانگ بہ بیت پاکستانی پوج ءِ سر ءَ ھمے ھپتگ ءَ اُرش ترندی ءَ گندگ بوگ ءَ اَنت کہ اے اُرشانی زمہ واریاں گیشتر بلوچ سلاہ بندیں گل پہ وت ءَ زورگ ءَ اَنت- مروچی بیتگیں اے اُرشانی زمہ واری تنی وھدی کس ءَ پہ وت ءَ نہ زرتگ اَنت-