TBP Balochi

مصر ءِ گوریچانی کمشنری البحیرہ ءَ یک مصری شھری ءَ گپ جتگ کہ آئی ءِ لوگی زالبولے نہ اِنت مردینے –

مصری شھری ءِ گوشگ ات کہ دیشتار بندی ءَ دو سال سرجم بوگ ءَ پد آروس بیتگ ءُ پد ءَ اے گپ ءَ سرپدی رس اتگ –

العربیہ نیٹ ءِ رد ءَ مصری ھندی ءُ چاگردی ترامجاھاں اے گپ سرھال اِنت ءُ ایشی ءِ سر ءَ وتی لیکھاں درشان کنگ ءَ اَنت –

مصری شھری ءَ ھالکار ءَ گوں گوشتگ آئی ءِ لوگی مردینی ءُ زالبولی ھردوکیں تکاں سیادی کنت اِنت ءُ آئی ءِ پت ءُ مات ھال دیگ بیتگ اَنت ءُ آیاں پسھی ءَ گوشتگ اے مزنیں گپے نہ اِنت ءُ آپریشن ءَ جیڑہ گیش ات کنت اِنت-

مصری شھری ءَ گوشتگ ڈاکٹرانی گور ءَ روگ ءَ پد اگاں جیڑہ نہ گیش ات گڑا تچکیں رنگے ءَ تپاکی ءَ گیش ءُ گیوار کنگ بیت اِنت بلے آیاں اے گپ رد کتگ-

پد ءَ پیسلہ کنوکاں منی ھک ءَ سول داتگ ءُ آئی ءِ پت ءُ مات رازی بیتگ اَنت ءُ آیاں گوشتگ کہ جھیز بانور ءِ گور ءَ بنت ءُ بے تواری ءَ یلو بہ دے-

مصری شھری ءَ گوشتگ کہ آئی ءِ زال ءَ نُھ سال ءِ اُمر ءَ بچکی رنگ ءَ وتی زند گوازینتگ ءُ پد ءَ آئی ءِ پت ءُ مات ءَ نام بدل کتگ ءُ جنینی نامے ایر کتگ –

ھمے وڑ ءَ نیم جنک ءَ وتی ھک ءَ گپ کنان ءَ گوشتگ کہ کسانی ءَ آپریشن ءَ ودی بیتگ انت ءُ چریشی ءَ ساز ءُ سامان دگہ وڑ بیتگ اَنت-

زالبول ءَ تچک ءَ گوشتگ کہ آ سرجم ءَ زالبولے ءُ مرد ءِ بھتام رد اِنت ءُ چِک ءُ تان ءِ واستا ساجو آں-

زالبول ءَ اے گپ ھم جتگ کہ آ لاپر بیتگ ءُ آئی ءِ مرد ءَ لٹ ءُ کٹ کنگ ءَ پد آئی ءِ چُک کپتگ-

زالبول ءَ بھتام جتگ ءُ گوشتگ کہ آئی ءِ مرد ءُ مرد ءِ لوگ ءِ مردم بدنام کنگ ءَ ڈنڈور کنگ ءَ اَنت دانکہ آیانی داتگیں مالاں چہ منی پت ءُ مات ءَ بہ گر اَنت-

بلوچستان ءَ جتا جتائیں وئیلاں چار مردم بیران ءُ سَے کس زدگ بیتگ اَنت-

سر بیتگیں اھوالانی رد ءَ بلوچستان ءِ دمگ لورالائی ءَ دگ ءِ وئیل ءَ چار مردم بیران بیتگ اَنت –

گیشیں اھوالانی رد ءَ لورالائی ءِ دمگ ڈیرہ دگ ءَ مرتت ءِ ھند ءَ وئیل پیش اتکگ –

پولیس ءِ رد ءَ وین ءُ مزدہ گاڑی ءَ ٹکر وارتگ ءُ چریشی ءَ چار مردم ھما جاہ ءَ بیران بیتگ اَنت-

وئیل ءِ ھال ءِ سر بوگ ءَ پولیس ءُ کمکی کارمند سر بوتگ اَنت ءُ پولیس ءَ لاش نادراہ جاہ ءَ رسینتگ اَنت-

دومی نیمگ ءَ شال ءِ ھند جوائنٹ دگ ءَ پوج ءِ چیک پوسٹ ءِ نزیک ءَ پاکستانی بیرک ء بھا کنوکیں اسٹال ءِ سر ءَ دزبمبے چگل دیگ بیتگ ءُ چریشی ءَ داں انگت ءَ سَے کس زدگ بیتگ اَنت-

پولیس ءِ رد ءَ تراک ءَ زدگ بیتگین مردمانی پجار جلال الدین، نجیب اللہ ءُ سردار ولی ءِ ناماں زانگ بیتگ اَنت-

تراک ءَ زدگ بیتگیں مردم نادرجاہ ءَ برگ بیتگ اَنت ءُ تراک ءَ پد پولیس ءُ پھزداری لشکر ءَ دمگ انگیر ءَ کتگ –

روکپتی بلوچستان ءِ دمگ ایرانشھر ءَ ناشناسیں سلاہ بندیں مردماں زالبولے ءَ ھوار یک مردینے آوار جنگ ءَ پد گون وت برتگ اَنت-

گیشیں اھوالانی رد ءَ روکپتی بلوچستان ءِ دمگ ایرانشھر ءِ ھند مھمد آباد ءَ گوستگیں مگرب ءِ وھد ءَ ناشناسیں سلاہ بندیں مردماں یک لوگے ءِ سر ءَ بیڑ برتگ ءُ اود ءَ زالبولے ءَ ھوار یک مردینے دزگیر کتگ اَنت-

آوار جنگ بیتگیں مردمانی پجار شش اگست ءَ رودراتکی بلوچستان ءِ دمگ کیچ ءَ نیکراھی ناشرکارانی دست ءَ نیکراھی ءِ لپاشگ ءِ بھتام ءَ کُشگ بیتگیں استاد روف ءِ برات سمیر ء برکت ءُ آئی ءِ زال ھانی گل بلوچ آوار جنگ ءَ پد گون وت برتگ اَنت-

دمگی مردماں گمان پدر کنان ءَ دی بلوچستان پوسٹ ءَ گوں گوشتگ کہ آوار جنوکانی سیادی نیکراھی ناشرکارانی نیمگ ءَ اِنت –

آیاں گوشتگ کہ مگرب ءِ وھد ءَ سلاہ بنداں لوگ ءَ دور کتگ ءُ اود ءَ سمیر دزگیر کتگ ءُ آئی ءِ زال ھانی ءَ گشتگ من ءَ ھم بر ات گوں گڑا ھردوک اش برتگ اَنت – آوار جنگ ءَ پد آیانی درگت ءَ دگہ اھوال نہ بیتگ اَنت-

ھانی گُل بلوچ کے اِنت؟

زانگ بہ بیت ھانی گل بلوچ ءِ پیسریگیں دیشتار نسیم ء ابدالکریم سال دوھزار ءُ نوزدہ چاردہ مئی ءَ ماں کراچی ءَ آوار جنگ بیتگ ءُ آئی ءِ ھمراھی ءَ ھانی ھم آوار جنگ بیتگ ات ءُ پد ءَ چیزے وھد ءَ پد ھانی یل بیتگ ات-

ھانی گل بلوچ ءِ یل بوگ ءَ پد آئی ءَ چاگردی ترامجاھاں وتی آوار جنگ ءُ لٹ ءُ کٹ کنگ ءِ تامری دروشم ءَ گشتگ ات کہ من ءَ ھوار منی دیشتار اش برتگ ءُ من لٹ ءُ کٹ کنگ ءَ پد یل کنگ بیتگ اَنت-

نسیم داں انگت ءَ بیگواہ اِنت ءُ ھانی گل بلوچ دوبر وتی نوک آروس کرتگیں لوگ واجہ ءَ دوبر مان روکپتی بلوچستان ءَ ناشناسانی دست ءَ بیگواہ کنگ بیتگ-

یوکرین ءِ واکداراں بھتام جنان ءَ گوشتگ کہ روس ءِ لشکر ءَ اے جنگ ءَ کمکی باسکانی جنگ ھم بندات کتگ – اے بھتام ھما وھد ءَ دیم ءَ اتکگ کہ سَے شمبے ءِ روچ ءَ یوکرین ءِ بنجاھی شھر ءَ دو میزائلانی اُرش ءَ ھپت مردم بیران بیتگ ات اَنت ءُ چریشاں یک کمکی باسکے ھوار ات-

واکدارانی رد ءَ دو شمبے ءِ بیگاہ ءَ بیتگیں اُرشاں دو زھگاں ھوار سِی ءُ نُھ مردم زدگ بیتگ اَنت کہ ایشانی توک ءَ سِی ءُ یک پولیس ءِ کارمند، ھپت کمکی کار کنوک ءُ چار پوجی ھوار اَنت-

یوکرین ءِ گوشگ ات کہ اے اُرش وھد وھد ءِ سر ءَ داں سِی منٹ ءِ میان ءَ کنگ بیتگ اَنت کہ آیانی مول ءُ مراد ھمے بیتگ کمکی باسک وئیل جاہ ءَ سر بہ بنت ءُ دانکہ آ ھم نشانگ کنگ بہ بنت-

ڈونیٹسک ءِ گورنر پاولو کیریلینکو ءَ گوشت دو شمبے ءِ بیگاہ ءُ پوکروسک ءِ شھر ءَ روس ءِ لشکر ءِ اُرش ءَ یک کمکی باسک ءُ یل پوجی ءَ ھوار ھپت مردم بیران بیتگ اَنت ءُ زدگ بیتگیں ردمانی کساس بے کساس اِنت.کہ ایشانی توک ءَ گیشتریں مردم پولیس ءِ کارندہ انت ءُ پوجی ءُ کمکی باسک ھم ھوار اَنت-

روس ء میزائل پوکروسک ءِ شھد ءِ بنجاھی بھراں کپتگ ءُ اے شھر ڈونیٹسک ءِ رودراتک ءَ اِنت ءُ ایشی ءَ کمے کساس ءَ روس ءِ لشکر ءِ دستیگی ھم ھست اَنت ءُ گورنر ءِ رد ءَ اے اُرش ءَ روس ءَ اسکندر میزائل کارمرد کتگ ءُ ایشی ءِ مکسد ایش اِنت کہ اے میزائل وتی نشانگ ءَ برابر روت اِنت-

اے اُرش ءَ روس ءِ لشکر ءَ ھما ٹیکنیک کارمرد کتگ ءُ ایشی ءَ پوجی تکاں ڈبل ٹیپ گوش اَنت ءُ اے ٹیکنیک ءَ یکیں جاہ ءُ لھتے دمانانی میان ءَ وھد ءَ وھد ءَ دوبر اُرش کنگ دانکہ اود ءَ ایوکیں کمکی باسک ھم نشانگ کنگ بہ بنت-

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلی گرام چینل “ھکل” ءَ شنگ کرتگیں درشان ءِ تہ ءَ شال ءُ کلات ءَ پاکستانی پوج ءِ سر ءَ بوتگیں سَے جتا جتائیں اُرشانی زمہ واری منّ اِتگ ءُ گوشتگ کہ اے اُرشاں پاکستانی پوج ءِ سَے کارمند مُرتگ انت ءُ پنچ زدگ بوتگ انت –

جارکش ءِ رِد ءَ بی ایل اے ءِ سرمچاراں شال ءِ دمگ سریاب دگ ءَ زیارت کالونی ءَ برجاھیں پاکستانی پوج ءِ بنجل ءِ دروازگ ءِ دپ ءِ کارمند دز بمب اُرش ءِ نشانگ کتگ کہ دزبمب پانگسے تہ ءَ کپتگ ءُ چریشی ءَ دو کارمند زدگ بوتگ انت –

جارکش ءِ رِد ءَ دومی نیمگ ءَ کلات ءَ بی ایل اے ءِ سرمچاراں گوستگیں شپ ءَ جوھان ھند ءَ برجاھیں زورگیریں پوج ءِ بنجاھی بنجلے سر ءَ راکٹ ءُ دگہ سلاھاں گوں اُرش کتگ –

اُرش ءِ آسر ءَ یک دشمن کارمندے ھما دمان ءَ مُرتگ وھدیکہ کم چہ کم سَے کارمند زدگ بوتگ انت، راکٹ گولہ بنجل ءِ تہ ءَ کپتگ انت چریشی ءَ دژمن ءَ گیشتر جانی ءُ مالی تاوان رستگ –

جیئند بلوچ ءِ رِد ءَ ترس آماچیں زورگیریں پوج ءَ اُرش ءَ پد سرجمیں شپ ءَ چاریں نیمگاں لس مھلوک ءِ سر ءَ مارٹر گولہ آس داتگ –

جارکش جئیند بلوچ ءِ رِد ءَ بی ایل اے ءِ سرمچاراں یک دگہ اُرش ءِ مروچی بزاں ھشت اگست ءِ بیگاہ ءَ منگچر جوھان کراس ءَ پرپٹ سواریں زورگیریں پوجی کارمندانی سر ءَ کُتگ ءُ پرپٹ سواریں ھردو پوجی کارمند تیر جتگ ءُ کُشتگ انت –

جارکش ءِ رِد ءَ اے پوجی کارمند جوھان بنجل ءَ زدگ بوتگیں کارمندانی ھاتر ءَ درمان برگ ءَ بوتگ انت کہ سرمچاراں ھال رستگ ءُ نشانگ کتگ انت –

گڈسر ءَ آئی ءَ وتی درشان ءِ تہ ءَ گوشتگ کہ بی ایل اے ھر سئیں اُرشانی زمہ واری ءَ منیت ءُ کول کنت زورگیریں پوج ءِ در ایگ ءَ تاں مئے اُرش برجاہ مان انت –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل “آشوب” ءَ شنگ کرتگیں درشان ءِ تہ ءَ بالگتر ءَ اسحاق ءِ گاڑی ءِ سر ءَ بوتگیں اُرش ءِ زمّہ واری منّ اِتگ ءُ گوشتگ اسحاق یعقوب پاکستانی پوج ءِ کشندہ ٹولی ءِ کارمندے بوتگ کہ تراکناکیں شوروانی نشانگ کُتگ ءُ گوں دگہ شش ھمراہ ءَ ھوار کُشتگ انت –

بی ایل ایف ءِ جارکش میجر گوھرام بلوچ ءَ اُرش ءِ سرجمیں ھال شنگ کتگ ءُ گوشتگ کہ مئے سرمچاراں گوستگیں روچ ءَ ادار پنچ ءَ بالگتر ءِ دمگ نلی ءَ پاکستان ءِ چیریں ادارہ ایم آئی ءِ کشندہ ٹولی ءِ کارمندانی راھے ءِ سر ءَ تراکناکیں شورو کل کُتگ ءُ نشانگ کتگ انت چریشی ریاستی کارمند اسحاق ء یعقوب گوں دگہ شش ھمراھاں ھوار مرتگ انت –

جارکش ءِ رِد ءَ تراکناکیں شوروانی اُرش ءِ زد ءَ اتکگیں ریاستی کارمندانی تہ ءَ راجی کتکار اسحاق ء یعقوب جھمنند نلی بازار، ابراہیم ء بدل جھمنند نلی بازار، نظام دیدار ء واجداد جھمنند نلی بازار، فدا حسین ء مومن جھمنند نلی بازار، سرفراز ء بنڈو جھمنند نلی بازار، سفر خان ء حیدر جھمنند نلی بازار قاسم ء عبدالحکیم جھمنند پروم ھوار انت –

میجر ءِ رِد ءَ اے کشندہ ٹولی پاکستان ءِ چیریں ادارہ ایم آئی ءِ چیردستی ءَ خالد ء یعقوب ءِ سروکی ءَ کار ءَ بوتگ انت ءُ بالگتر، کیلکور، کولواہ، بلیدہ ءُ کش ءُ گوری ھند ءُ دمگاں لشکر کشی، بلوچ سرمچارانی راھانی بندگ، لس مردمانی زورانسری آوار جنی ءُ کوش، مھلوک ءِ سر ءَ زوراکی کنگ ءُ دگہ بازیں چاگردی سلکاریاں اشانی دست مان بوتگ کہ گوستگیں روچ ءَ بی ایل ایف ءِ سرمچاراں نشانگ کتگ انت –

جارکش میجر گوھرام ءِ رِد ءَ اسحاق ءِ یعقوب راجی مجرم یعقوب ءِ چُک بوتگ کہ آ سال دوھزار یازدہ ءَ بلوچستان لبریشن فرنٹ ءِ سرمچاراں دگہ یازدہ ھمراھانی گوم ءَ نشانگ کتگ ءُ کشتگ – یعقوب ءِ مرگ ءَ پد پاکستانی پوج ءِ چیریں ادارہ ایم آئی ءَ آئی ءِ چک خالد ءُ اسحاق سلاہ بند کتگ ءُ خالد ءِ سروکی ءَ راجی زرمبشت ءِ بگیری ءَ کار گپتگ انت – گل ءِ نیمگ ءَ باز براں مکن کنگ ءَ ابید ھم اشاں راج دژمنی یل نداتگ – اے زورگیریں ریاستی ٹولہ ءِ بالگٹر، کیلکور ءُ دگہ بازیں ھند ءُ دمگاں بلوچ سرمچار ءُ لس بلوچانی نمیرانی ءَ اشانی دست مان بوتگ –

میجر ءِ رِد ءَ مُرتگینانی تہ ءَ باجو بوتگیں سرمچار نظام پنام ءِ دیدار ء واجداد ھم ھوار ایںکہ لھتے ماہ ساری راجی جھد ءَ چہ دزکش بوتگ ءُ دژمن ءِ ھمراہ بوتگ ءُ خالد ءِ سروکی ءَ جھدکارانی بگیری ءَ کار ءَ بوتگ –

جارکش ءِ رِد ءَ اے کشندہ ٹولی ءِ سروکی ءَ خالد ء یعقوب کنگ ءَ انت کہ مئے ٹارگٹ لڑ ءَ ھوار انت ءُ آئی ءَ راج دژمنی سزا الم دیگ بیت – دمگ ءِ تہ ءَ لھتے وتگڑیں سیاسی مردم، میر متبر خالد ءِ پشت پناھی ءَ کنگ ءَ انت ما آیاں تچکی ءَ مکن کنیں کہ وڈیں کتکارانی کار ءَ میا انت، مئے جھد پہ راجی آجوئی ءِ ھاتر ءَ انت اگاں اے دابیں ھر وڈیں مردمے دشمن ءِ کمک کار بوت گڈا ھچ وڈا پھل کنگ نہ بیت –

گڈسر ءَ میجر گوھرام بلوچ ءَ وتی درشان ءِ تہ ءَ گوشتگ کہ اے راجی مجرمانی کوش ءِ زمہ واری ءَ بی ایل ایف منیت ءُ اے اُرش ءِ تامر ھم گل ءِ گور ءَ ھست انت ھمے زوتاں شنگ کنگ بیت –

ھالانی رِد ءَ واشک ءِ دمگ جھلوار ءَ پاکستانی پوج ایف سی ءَ گسانی سر ءَ بیڑ برتگ ءُ زوراکی کتگ –

دمگی مردمانی رِد ءَ پوج بازیں گسے ءِ تہ ءَ زورانسری مانریتکگ ءُ زوراکی کنان ءَ چادر ءُ چاردیوالی لگتمال کتگ –

دمگی مردمانی رِد ءَ بیڑ میان ءَ ایف سی ءَ گسانی تہ ءِ الماری ءُ ایندگہ سامان پُرشتگ انت ءُ بلوچ زالبولانی گُد لنگ ءُ لانگ کتگ انت کہ جھلوار ءِ مردماں اے کار وتی گیرت ءِ سر ءَ اُرش ءِ لیک اِتگ ءُ اشی ءِ بگیری ءَ زھرشانی ءَ در اتکگ انت دگ بند کتگ انت چریشی ءَ رؤگ ءُ آیگے در بند انت –

سربوتگیں ھالانی رِد ءَ بلوچستان ءِ بنجاھی شھر شال ءُ کلات ءَ پاکستانی پوج ءِ سر ءَ اُرش کنگ بوتگ، چہ اے اُرشاں دوکارمند مُرتگ ءُ دو زدگ بوتگ انت –

گیشیں ھالانی رِد ءَ کلات ءِ دمگ جوہان کراس ءَ ناشناسیں سلاہ بندیں مردماں پاکستانی پوج ءِ دو کارمندانی سرا تیرگواری کتگ ءُ کشتگ انت –

دمگی بنشون ءِ رِد ءَ پوجی کارمنداں چہ بازار ءَ درمان ءُ دگہ وردنی سامان زرتگ ءُ واتر رؤگ ءَ بوتگ انت کہ نشانگ کنگ بوتگ انت –

زانگ بہ بیت گوستگیں شپ ءَ ھم جوھان ءَ پاکستانی پوج ءِ بنجلے سر ءَ اُرش کنگ بوتگ ات ءُ اے کارمند ھمے جوھان بنجل ءَ درمان برگ ءَ بوتگ انت –

دومی نیمگ ءَ بلوچستان ءِ بنجاھی شھر شال ءَ دز بمب اُرشے ءَ دو پوجی کارمندانی زدگ بوگ ءِ ھال انت-

پاکستانی پوج شال ءِ دمگ سریاب دگ ءَ زیارت کالونی ھند ءَ نشانگ کنگ بوتگ انت –

بنشون ءِ رِد ءَ ھمے جاہ ءَ برجاھیں پاکستانی پوجی پانگس ءِ سر ءَ ناشناسیں مردماں دزبمب ءِ چگل داتگ ءُ در شُتگ انت ءُ دزبمب مزنیں توارے ءَ گوں ترک اِتگ –

واکداراں اے اُرش ءَ دو کارمندانی زدگ بوگ ءِ ھبر راست کتگ ءُ گوشتگ کہ زدگ بوتگیں کارمندانی نام سپاھیگ رحیم شاہ ءُ ثناء اللہ انت –

زانگ بہ بیت شال ءُ کلات ءَ ھوار بلوچستان ءِ ایندگہ ھند ءُ دمگاں پاکستانی پوج ءِ سر ءَ بوتگیں اُرشانی زمہ واریاں گیشتر بلوچ آجوئی لوٹوکیں سلاہ بندیں گل منّ اِنت بلے اے اُرشانی زمہ واری تنی وھدی ھچ گل ءَ نہ منّ اِتگ انت –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ کلات ءُ تربت ءَ دو ریاستی کارمندانی کوش ءِ زمہ واری منّ اِتگ ءُ گوشتگ کہ ھردو کارمند پاکستانی پوج ءُ چیریں ادارھانی چاریگی ءِ کار ءَ بوتگ انت-

جارکش جیئند بلوچ ءَ گوشتگ کہ بی ایل اے ءِ سرمچاراں گوستگیں شپ ءَ کلات ءِ دمگ منگوچر ءِ جوھان کراس ءَ تیرگواری کرتگ ءُ یک چاریگے کشتگ- اے کارمند ءَ دیر اِنت کہ وت ءَ گنوکے کرتگ ءُ منگوچر ءِ ھواری ءَ کلات شھر ءَ زورگریں پاکستانی پوج ءُ چیریں ادارھانہ واست ءَ چاریگی کنگ ءَ بوتگ –

جارکش ءَ گوشتگ کہ ھمے وڑ ءَ بی ایل اے ءِ سرمچاراں تربت ءِ سنگانی سر ءَ یک کوٹی یے ءَ زورگریں پاکستانی پوج ءِ چاریگ سفیان ء عبدالمجید جھمنند کراچی تیرگواری کرتگ ءُ کشتگ – اے کارمند گوادر ءَ دُژمنیں پوج ءِ چیردستی ءَ چاریگری کنگ ءَ پد تربت ءَ آتکگ، گوستگیں بازیں روچے بیت کہ کوٹی یے ءِ تہ ءَ چیر بوتگ –

جارکش جیئند بلوچ ءَ گوشتگ کہ بی ایل اے ءَ گوستگیں روچاں بیست ءُ نُھ جولائی ءَ وتی درشان ءَ تچک کرتگ گوشتگ کہ تربت شھر ءُ کِر ءُ کشاں ھوٹل ءُ کوٹی واھند اے وڑیں مردماں جاگہ مہ دے اَنت، اگاں نہ چو آدگرانی وڑ ءَ وتی جان ءُ مال ءِ زمہ وار وت بہ انت –

گڈسر ءَ بی ایل اے ءِ جارکش ءَ وتی درشان ءِ تہ ءَ گوشتگ کہ بلوچ لبریشن آرمی ھردو اُرشانی زمہ واری ءَ منیت، وتی منزل ءَ سربوگ ءَ تاں پاکستانی پوج ءُ آئی ءِ کمکارانی سر ءَ مئے اُرش برجاہ مان انت –