TBP Balochi

گوادر شھدربرجاہ لاھور، گیشواری لوٹ کنت

ٹی بی پی گچینی

زارین بلوچ

ابکھی پئیم ءَ پاکستان ءِ راجی پتر ءَ شون داتگیں منگ نامگ، کہ ایشی ءِ تہ ءَ پنجاب ءِ بنجاھی شھر لاھور ءَ پاک چائنہ گوادر شھدبرجاہ ءِ جوڑینگ من اِتگ۔ اے گامگیج ءَ بازیں مردم ابکہ کُتگ اَنت ءُ چاگردی رسانکدر ءِ سر ءَ گرما گرمیں باوستے چیڑینتگ، پرچاکہ شھدربرجاہ ءِ نام وَ بلوچستان ءِ تیاب دپی شھر گوادر ءَ بندوک اِنت، بلے اے لاھور ءَ جوڑ کنگ بئیگ ءَ اِنت۔ اے بِل ءِ منگ بوگ ءَ گوں پاکستانی ڈیھ ءِ پیسلہ سازی ءُ واھشتانی سر ءَ بازیں جست چِست کنگ ءَ لاچار کُتگ انت۔ بِل ءِ منارینوکیں سیاستداناں لس زھر ءُ گم ءُ ایراد ءِ پد ءَ ھچ پئیمیں لیکہ ءُ درشان ءِ ھم نہ داتگ۔

ھال چاگردی رسانکدر ءَ ترندی ءَ گوں شنگ بوتگ، بلوچستان ھوار ھاسیں پئیم ءَ مکران ءِ مھلوک ءَ گوادر ءِ جاہ ءَ لاھور ءَ گوادر شھدربرجاہ ءِ اڈ بئیگ ءَ مناپکت نامینتگ۔ اے وئیل ءَ ڈیھ ءِ چَپ ءُ چوٹیں واھشت ءُ آسراتیانی گیر انساپیں بھر ءُ بانگی گیشتر پدر کُتگ۔

زانگ بہ بیت اے بل ءِ منارینگ یکدم اڑوکیں گامگیجے بیتگ، دیوان ءِ نیام ءَ یک ادارے کسانیں وھدے ئے تہ ءَ 29 بل منارینگ بیتگ اَنت، اود ءَ سرکاری ھمسنتی ءِ تھنا 15 باسک ساڑی بیتگ اَنت، ءُ اپوزیشن ءِ یک ھم باسکے ساڑی نہ بوتگ۔ اے بلانی تہ ءَ 24 نوکیں شھدربرجاہ ءُ وانگی ادارگانی اڈ کنگ ءِ بابت ءَ بیتگ اَنت، کہ ایشانی تہ ءَ پاک چائنہ گوادر شھدربرجاہ ھم ھوار اِنت۔ گیشتر اجکہ کنوکیں گپ ایش اِنت کہ ایشانی تہ ءَ گیشتریں بل ابید کجام ھم دلجمیں پَٹ ءُ پول ءُ اگاں کمیٹیانی گورا دیم دیگ ءَ ابید منارینگ بیتگ اَنت۔

زند ءِ جتائیں تکاں سیادی داروکیں مردم ءُ ٹولیاں اے منگ نامہ ءِ منگ بوگ ءِ سر ءَ نادوستی ءُ وسواسی یے درشان کُتگ۔ گوادر ءِ ھندی مھلوک ءَ گُشتگ کہ لاھور ءَ شھدربرجاہ ءِ اڈ کنگ ءِ جار آیانی دمگ ءَ سرجمی ءَ ناانساپی یے ءُ اے دلیل داتگ کہ چین پاکستان زرکاری راھداری ءِ بندات ءَ بگر داں انگت آھاں ھچ پئیمیں پائدگ نہ دیستگ۔ جتائیں باسک ءُ زانشت ءِ زانتکاراں گوادر ءُ بلوچستان‌‌ ءِ جتاجتائیں دمگانی تہ ءَ پیسر ءَ چہ آدراھیں وانگی بودشت ءِ جاورانی سر ءَ تُرس ءِ درشان کُتگ۔

بلوچ انسانی اگبالانی باسک ڈاکٹر ماھرنگ بلوچ ءَ اڑوکی بل ءَ چہ راجی اسمبلی ءَ منگ بوگ ءِ سر ءَ پدگرد درشان کنان ءَ ڈیھ ءِ دیمروئی ءِ نام ءَ بلوچستان ءِ آسراتیانی پُل ءُ پانچ کنگ ءِ سر ءَ ترندیں ایرادگری ءِ نشانگ کُتگ۔

چاگردی رسانکدر ءِ تندجاہ ءَ یک ‌ ٹویٹے ءِ تہ ءَ آئی ءَ گُشتگ کہ ڈیھ بودشتی واکدار بلوچستان ءِ مڈیاں پُلگ ءُ پنجاب ءِ ھزمت ءِ ھاتر ءَ کار کن اَنت۔ آئی ءِ گُشگ اَت مئے پجار تنگی ءِ آماچ اِنت۔ وتگڑیں دیمروئی ءِ نام ءَ بلوچ ءِ آسراتیانی ناجائزیں پُل پانچ ءِ بگیری ءَ جد ءُ جھد ءِ برجاہ دارگ المی اِنت۔

زرکاری ءِ زانتکار ءُ آئی ایم ایف ءِ ھاتر ءَ کارکنوکیں مریم ضیا بلوچ ءَ آسراتیانی گورسی بھر ءِ سر ءَ زور داتگ ءُ جُست کُتگ کہ گوادر ءَ شھدربرجاہ پرچا اڈ کنگ نہ بیتگ اگاں آئی ءِ ھاتر ءَ پوڑی دیگ بیتگ اَنت۔

نیشنل پارٹی ءِ رھشون ءُ پاکستانی سینیٹ ءِ باسک تاھر بزنجو ءَ دمگانی نیام ءَ وانگی تپاوت ءَ دیما ایر کنان ءَ گوادر ءَ شھدربرجاہ ءِ اڈ کنگ ءِ سر ءَ زور داتگ۔

پیسرگیں ایم این اے ءُ نیشنل ڈیموکریٹک موومنٹ ءِ رھشون بشریٰ گوھر ءَ گوادر ءِ جاہ ءَ لاھور ءَ شھدربرجاہ ءِ اڈ کنگ ءِ پیسلہ ءِ سر ءَ جست چِست کُتگ۔

زرکاری ءِ زانتکار عزیر یونس ءَ وتی پدگرد ءِ تہ ءَ پدراھیں لبزاں گُشتگ کہ اے کانود سازی ءَ پد ڈیھ ءَ اے جُست کنگ نہ لوٹ ایت کہ ’’بلوچ پرچا بگاوت کنگ ءَ اَنت؟‘‘

بلوچ آجوئی دوستیں گلاں چہ بندات ءَ چین پاکستان زرکاری راھداری ءِ بگیری کُتگ، ءُ اے زرکاری راھداری ءَ آ بلوچستان ءِ مڈیانی پُلگ ءِ ھاتر ءَ “سامراجی” شوربندی نامین اَنت۔ آجوئی لوٹوکیں گل میگا انفراسٹرکچر شوربندیاں پُل پانچی ءُ بلوچستان ءِ مپادانی ھاتر ءَ تاوانبار سرپد بنت، ءُ اسٹبلشمنٹ ءِ سر ءَ بھتام جن اَنت کہ آ ھندی آباتیاں ھاسیں پائدگ دیگ ءَ ابید آیانی مڈیاں پُلگ ءَ اَنت۔ ھمے پُل پانچی شوربندیانی پَدگَرد ءَ آیاں بلوچستان ءُ بلوچستان ءَ ڈن چینی مپاد ءُ بُنکی کالب ءِ شوربندیانی سر ءَ اُرش کنگ ءِ راہ گچین کُتگ۔

ھاسیں پئیم ءَ بلوچ لبریشن آرمی ءِ مجید بریگیڈ اے ارشاں درستاں دیم ءَ بوتگ۔ اپریل 2022 ءَ یک وتکُشیں تراکے ءَ مجید بریگیڈ ءَ کراچی شھدربرجاہ ءِ کنفیوشس انسٹی ٹیوٹ ءِ پروفیسرز نشانگ کُتگ اَنت، کہ ایشی ءِ آسر ءَ سئے چینی زانشتی زانتکاراں ھوار چار مردم مُرتگ اَنت۔چہ اے اُرش ءَ چین پاکستان سیادی ءِ سر ءَ سکیں سان کپتگ اَنت، کہ ایشی ءَ چینی واکدارانی نیمگ ءَ چینی شھریاں پھازگی دیگ ءِ پاکستان ءِ بودشتانی سر ءَ مزنیں بے باوری ءِ ودی بیتگ اَت۔ ایشی ءِ آسر ءَ چین ءَ پاکستان ءِ درستیں کنفیوشس انسٹیٹیوٹاں چہ وتی زانتکار پد ءَ لوٹارینتگ اَنت۔

آجوئی لوٹوکیں بلوچ گل ءُ سیاسی پاٹیانی نیمگ ءَ مزنیں اھدے ءَ چہ پارلیمانی سیاست ءِ بگیر ءَ یک توانائیں لیکھے برجاہ داشتگ، آجوئی لوٹوک اے گپ ءِ سر ءَ زور دے اَنت کہ پارلیمان پرستیں سیاست دان بلوچستان ءِ پُل ءُ پانچی ءَ جائز نامینگ ءَ گوں تھنا پنجاب ءِ مپادانی ھزمت کن اَنت۔ کہ اود ءَ انیگیں کانود ءِ منگ بوگ ءُ آیانی دلیل سدکی ءَ دنت۔ راجی اسمبلی ءَ بلوچستان ءِ کانود جوڑکنوکانی پدراھیں جھگیری ءَ ابید ھم لاھور ءَ گوادر ءِ نام ءَ شھدربرجاہ ءِ اڈ بیگ ءِ منارینوکیں بِل تیزی ءَ گوں منارینگ بوت۔ اے دیمروئی ءَ پریسکارانی نیام ءَ ھاسیں ترس ودی کُتگ، کہ آ بلوچ پارلیمنٹرینزانی وتی مردمانی مپادانی پھازگ ءِ بودیشت ءِ سر ءَ جُست چست کنگ ءَ اَنت، پرچہ کہ سرزائری ءَ آ بلوچستان ءِ مڈیاں پنجاب ءَ شھدربرجاھانی اڈ کنگ ءِ ھاتر ءَ کارمرز کنگ ءَ داشت کُت نہ کُتگ اِش۔

زانگ بہ بیت پارلیمنٹ ءِ بلوچ باسک نی مشکلیں جیڑھے ءِ دیمپان اَنت پرچاکہ آیاں نی بلوچستان ءِ مھلوک ءِ ھک ءُ گھبودی ءِ پھریزگ ءِ واستا وتی سرجمیں زور ءَ گوں اوشتگ لوٹ ایت ھمے سبب ءَ آ گوست ءَ گیشتر پارلیمنٹ ءِ بھر بیتگ اَنت-

ابید دگہ راستگیں دلیل ءَ لاھور ءَ گوادر ءِ نام ءَ یک یونیورسٹی ءِ دیم ءَ ارگ ءُ بلوچ راج ءِ نیمگ ءَ سما کنگ بیتگیں سماہ ءَ ڈالچار کنگ ءَ نادلگوش کنگ ءُ وت ءَ بے ترانگی ءَ گیش دوری ودی کتگ – اے دمگانء میان ءَ دیمروئی ءُ وھد ءِ ھمراھی ءَ تپاوت ءِ یک تچکیں یاداشتی ءَ کنت چریشی ءَ بلوچستان ءِ مھلوک اے مزنیں پریم ورک ءَ وتی جاہ ءَ چیدگی ءَ گیش زانتکار بیت اِنت-

بلوچستان ءِ دمگ چہ آواران ءَ پاکستانی پوج ءَ یک مردمے دزگیر کتگ ءُ ناشناسیں زنداناں برتگ-

آوار جنگ بیتگیں مردم ءِ پجار جنگی خان ء جان مھمد جھمنند تیرتیج آواران ءِ نام ءَ زانگ بیتگ –

دمگی مردمانی رد ءَ آوار جنگ بیتگیں مردم پوج ءَ آواران ءِ دمگ تیرتیج سورھی بند ءَ دزگیر کتگ ءُ گون وت برتگ-

زانگ بہ بیت بلوچستان ءَ مردمانی آوار جنگ ءُ بیگواہ کنگ ءِ درچ یکشل ءَ برجاہ اَنت ءُ گوستگیں روچ ءَ بلوچ نیشنل مومنٹ ءِ شنگاری تک پانک ءَ جولائی ماہ ءِ رپورٹ ءَ پنجاہ ءُ ھپت مردمانی بیگواھی ءُ ھپت مردمانی کُشگ ءُ چگل دیگ ءِ ھال شنگ کتگ اَنت-

پانک ءِ رد ءَ جولائی ءِ ماہ ءَ جتا جتائیں ھنداں بیست ءُ دو مردم بیگواہ کنگ ءَ پد لٹ ءُ کٹ ءُ ژند ءُ پندی جاوراں یل کنگ بیتگ اَنت-

بلوچستان ءَ سیاسی ءُ چاگردی گلانی گوشگ اِنت پاکستانی پوج ءَ بلوچ ورنایانی بیگواہ کنگ ءِ درچانی توک ءَ ترندی آوارتگ ءُ ھمک روچ ورنا بیگواہ ءُ کشگ بوگ ءَ اَنت-

روکپتی بلوچستان ءِ دمگ زاھدان ءَ گوستگیں روچ ءَ ایرانی ادارہ مسکونی ءَ بازیں لوگ ڈروھینتگ ءُ دور داتگ اَنت-

اھوالانی رد ءَ زاھدان ءِ ھند جھاد ءَ گوستگیں روچ ءَ لس مھلوک ءِ لوگ ایرانی پولیس ءُ زمینانی گر ءُ دار کنوکیں فاؤنڈیشن ’مسکونی ‘ ءَ لوگ ڈوزر کتگ ءُ دور داتگ اَنت-

زمینانی گر ءُ دار کنوکانی گوشگ اِنت اے مردم اد ءَ زمینانی زورگری ءِ ھاتر ءَ نشتگ اَنت ءُ اے مردماں زمین دستیگ کتگ اَنت-

لس مھلوک ءِ گوشگ اِنت اے مردم اد ءَ بازیں وھداں چہ نندوک اَنت ءُ آیانی بازیں وھد بنت اِنت کہ اے ھند ءُ جاھاں جھمنند اَنت-

زانگ بہ بیت زاھدان ءَ ھوار روکپتی بلوچستان ءِ دگہ ھند ءُ جاھاں ھم اے دابیں کسہ گوست ءَ پیش اتکگ اَنت کہ ایشانی توک ءَ چھبار ھم ھوار اِنت –

سربوتگیں ھالانی رِد ءَ کیچ ءِ دمگ بالگتر ءَ بمب تراکے ءَ ھپت مردم مُرتگ انت وھدیکہ آواران ءِ دمگ مشکے ءَ ناشناسیں سلاہ بندیں مردماں گِسے ءَ پُترتگ ءُ پت گوں ھمراھے چُک ءَ تیرباران کُتگ ءُ کشتگ انت –

گیشیں ھالانی رِد ءَ کیچ دمگ بالگتر ءَ ناشناسیں مردماں دگ ءِ سر ءَ تراکناکیں شورہ کل کُتگ ءُ گاڑی ءِ نشانگ کُتگ چریشی ءَ ھپت مردم مرتگ انت –

پولیس ءِ رِد ءَ دوشمبے ءِ روچ ءَ بمب تراک گاڑی ءِ سر ءَ کنگ بوتگ گاڑی ءَ سواریں ھپت مردم ھما دمان ءَ مرتگ انت –

آھانی پجار اسحاق ء یعقوب جھمنند نلی بازار، ابراہیم ء بدل جھمنند نلی بازار، نظام دیدار ء واجداد جھمنند نلی بازار، فدا حسین ء مومن جھمنند نلی بازار، سرفراز ء بنڈو جھمنند نلی بازار، سفر خان ء حیدر جھمنند نلی بازار قاسم جھمنند پنجگور ناماں چہ بوتگ انت –

اے مردم نزیکیں میتگے ءَ آروسے ءَ شُتگ بوتگ انت کہ واتر آیگ ءَ بوتگ انت چاکر بازار ءِ نزیک ءَ نشانگ کنگ بوتگ انت –

دومی نیمگ ءَ مشکے ءَ بوتگیں تیرگواری ءِ وئیل جکی ءَ بوتگ – تیرگواری ءَ بیران بوتگیں مردمانی پجار مدد علی ء شفیع محمد ءُ آئی ءِ پت شفیع محمد ء نندو محمد حسنی ءِ ناماں چہ بوتگ انت وھدیکہ تیرگواری ءَ عبیداللہ ء مدد علی زدگ بوتگ –

لیویز ءِ گوشگ انت کہ سلاہ بندیں مردماں گِس ءَ اتکگ ءُ تیرگواری کتگ وھدیکہ لیویز ءَ زدگ ءُ بیران بوتگیں مردم آر ایچ سی نادراھجاہ مشکے ءَ سرکتگ انت ءُ اودا اژدری چار ءُ ٹپاس ءَ پد کھول ءِ دست ءَ دیگ بوتگ انت –

سربوتگیں ھالانی رِد ءَ کراچی ءِ دمگ لیاری ءَ سرھوائی تیرگواری ءَ ورنایے بیران بوتگ، دومی نیمگ ءَ کیچ ءَ ناشناسیں مردمانی تیرگواری ءَ کراچی ءِ جھمنندے زدگ بوتگ وھدیکہ ھب ءَ گونی ءِ تہ ءَ بندیں مردمی جونے دست کپتگ –

گیشیں ھالانی رِد ءَ لیاری ءَ دوشی شپ لیاری ءِ دمگ بانکڑا چار راہ ءِ نزیک ءَ آروسے ءِ سر ءَ سرھوائی تیرگواری ءَ دھمی تبک ءِ نودربرے بیران بوتگ –

بیران بوتگیں نودربرے پجار شانزدہ سالی زاہد ء اسحاق بلوچ ءِ نام ءَ چہ بوتگ –

پولیس ءِ رِد ءَ بیران بوتگیں ورنا ءَ ھنوں دھمی تبک ءِ چکاس داتگ بوتگ، وئیل چو اے وڈ دیم ءَ اتکگ کہ ورنایے گس ءِ نزیک ءَ آروس ءِ بوگ ءَ بوتگ وھدیکہ زاھد وتی گس ءَ کمے دور رحمانی مسیت ءِ گور ءَ اوشتوک بوتگ کہ آروس ءِ سر ءَ یک مردمے ءَ سرھوائی تیرجتگ، کہ یک تیرے زاھد ءِ دلبند ءَ لگ اِتگ کہ ھما دمان ءَ بیران بوتگ –

پولیس ءِ رِد ءَ کھول ءِ مردم اے چیز ءَ سرپد انت کہ تیرگواری کیا کتگ ھمے واست ءَ آیاں کانودی کاروائی نہ کتگ – پولیس اے درگت ءَ پٹ ءُ پول کنگ ءَ انت –

دومی نیمگ ءَ کیچ ءِ بنجاھی شھر تربت ءَ ناشناسیں مردمانی یک مردمے زدگ بوتگ-

تیرگواری وئیل سنگانی سر ءَ بوتگ کہ چریشی ءَ کراچی ءِ جھمنندے زدگ بوتگ –

پولیس ءِ رِد ءَ ناشناسیں سلاھبندیں مردماں سنگانی سر ءَ تیرگواری کتگ ءُ کراچی ءِ جھمنند سفیان زدگ کتگ – زدگ بوتگیں مردم ھما دمان ٹیچنگ نادراھجاہ ءَ برگ بوتگ ءُ اے درگت پولیس گیشیں پٹ ءُ پول کنگ ءَ انت –

چہ بلوچستان ءِ باپاری شھر ھب ءَ ھمے ھال آیگ انت کہ گونی ءَ بندیں مردمی جونے دست کپتگ –

جون ساکران روڈ گلیکسی ٹاؤن ءَ مری چار راھے نزیک ءَ دست کپتگ کہ آ گونی ءِ تہ ءَ بند بوتگ – پولیس ءَ جون دست گپتگ ءُ ھب ءِ نادراھجاہ ءَ سرکتگ –

ایدھی ءِ کمکار عدنان بلوچ ءِ رِد ءَ جون ءِ دیم پھک ژانگول انت ءُ لٹ کٹ کنگ بوتگ ءُ جون ءَ کساس چار یا پنچ روچ بیت – پولیس گیشیں پٹ پول کنگ ءَ انت –

زورانسری آوار جنگ بوتگیں آصف ءُ رشید بلوچ ءِ گھار سائرہ بلوچ ءِ گوشگ انت کہ منی گھاراں ھوار کھول ءِ ایمدگہ مردم ناشناسیں مردمانی نیمگ ءَ ترسینگ بوگ ءَ انت، منی گھار وانگ ءِ یل کنگ ءَ لاچار کنگ بوگ ءَ انت – دمگی واکدار مئے پھریز ءَ بہ کن انت –

بلوچستان ءِ دمگ ھزدار ءِ جھمنند سائرہ بلوچ ءَ پنچ سال انت کہ وتی بیگواھیں برات آصف ءُ وارس رشید بلوچ ءِ یل کنائینگے ھاتر ءَ توار چست کنگ ءَ انت – آئی ءَ شال ءُ اسلام آباد ءَ ھم زھرشانیاں بھر زرتگ وھدیکہ ھمے میان ءَ سائرہ بلوچ بیگواھیں مردمانی ھاتر ءَ اڈ دیگ بوتگیں کمیشن ءُ آمیدگس ءَ ھم پیش بوتگ –

سائرہ بلوچ ءَ وتی درشان ءِ داتگ ءُ گوشتگ کہ گوستگیں لھتے روچ بیت کہ ھزدار ءَ منی گھار ءُ کھول ءِ ایندگہ مردم ترسینگ بوگ ءَ انت – آئی گوشتگ کہ سیاہ کانچیں گاڑی ءُ برے پرپٹ سوار منی گھارانی رندگیری ءَ کن انت کدی بیھاری کاگد چگل دئینت – منی گھار لاچار کنگ بوگ ءَ ننت کہ وتی وانگ ءَ یل بہ دئینت –

سائرہ بلوچ ءِ گوشگ ات کہ اشی ءَ ابید مناں ھوار ایندگہ مردمانی سر ءَ پون کنگ ءُ بیھار دیگ بوگ ءَ انت –

آئی ءَ گوشتگ کہ گوستگیں پنچ سال انت کہ منی برات درکانودی زورانسری آوار جنگ ءُ بیگواہ کنگ بوتگ انت – مئے دوستیگیں مردمانی یل کنگ ءِ بدل مئے کھول گنتر دلسیاہ کنگ بوگ ءَ انت – مارا وتی دوستیگیں مردمانی یل کنائینگے پُرایمنیں جھد کنگ ءِ بدل ءَ ترسینگے جھد بوگ ءَ انت –

سائرہ بلوچ ءَ گوشتگ کہ دمگی واکدار، ڈپٹی کمشنر، پولیس ءُ ایندگہ واکداراں گوں دزبندی انت کہ آ مئے پھریز ءَ بہ کن انت سر بازار وانگجاہ ٹیوشن سنٹر ءَ ڈن جنکانی ترسینوکانی بگیری ءَ گامگیج بہ زور انت -.

آئی ءَ چہ سیاسی ءُ چاگردی باسکاں ھم وٹ کتگ ءُ گوشتگ کہ آ ازیت آماچیں کھول ءِ گوم ءَ بؤکیں زوراکیانی بگیری ءَ توار چست بہ کن انت –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی افیشل ٹیلیگرام چینل “آشوب” ءَ شنگ کرتگیں درشانے ءِ تہ ءَ پنجگور ءُ جھاؤ ءَ بوتگیں اُرشانی زمہ واری منّ اِتگ ءُ گوشتگ کہ اے اُرشاں پوج ءَ مزنیں کچے ءَ جانی ءُ مالی تاوان رستگ –

جارکش میجر گوھرام بلوچ ءِ رِد ءَ بی ایل ایف ءِ سرمچاراں شش اگست ءِ بیگاھے ادار ھشت ءَ آواران دمگ جھاؤ کوھڑو ءَ برجاھیں پاکستانی آرمی ءِ بنجاھی بنجل ءِ سر ءَ سَے راکٹ گولہ آس داتگ ءُ وتکاریں سلاھاں گوں اُرش کُتگ – راکٹ گولہ بنجل ءِ تہ ءَ کپتگ انت کہ چریشی ءَ دو کارمند ءُ بازینے زدگ بوتگ انت – اُرش ءِ میان ءَ زورگیریں پوج ءِ یک ڈرون کیمرہ ءِ ھم بال بوتگ کہ سرمچاراں نشانگ کتگ ءُ چگل داتگ –

جارکش ءِ رِد ءَ ھمے روچ ءَ سرمچاراں پنجگور لشکران کئور ءَ برجاھیں پوجی پانگس ءِ سر ءَ وتکار ءُ مزنیں سلاھاں گوں اُرش کتگ ءُ اُرش ءَ یک کارمندے مُرتگ ءُ یکے زدگ بوتگ –

آئی ءَ گوشتگ کہ ما اے گپ ءَ پدر کن ایں کہ بلوچستان ءِ تہ ءَ ھچ وڈیں شوربندی بلوچ راج ءِ مرزی ءُ منشا ابید منگ نہ بنت – پاکستان ءُ چین ءَ ھوار درسیں درملکی سرمایہ کاراں مکن کنیں کہ آ جنگ زدگین بلوچستان ءِ تہ ءَ سرمایہ مہ کن انت اگاں ناں وتی درسیں زمہ وار وت انت –

گڈسر ءَ آئی ءَ گوشتگ کہ بی ایل ایف اے اُرشانی زمہ واری ءَ منیت ءُ اے اُرش بلوچستان ءِ آجوئی ءَ تاں برجاہ مان انت –

روکپتی بلوچستان ءِ دمگ ھاش ءِ جھمنندیں مردمے ماں ایران ءِ اُستان کرمان ءَ پاھو دیگ بیتگ-

گیشیں اھوالانی رد ءَ مروچی ماں ایران ءِ اُستان کرمان ءَ سی ءُ ھشت سالی ئیں عبدالغفار ھاشمزئی ء غلام نبی جھمنند نوک آباد تپتان ھاش ءِ ایرانی آمیدگس ءِ ھکم ءَ پاھو دیگ بیتگ –

اھوالانی رد ءَ عبدالغفار دو سال ءَ پیش ماں اُستان کرمان ءَ ماھان در ءِ چوکی ءِ سر ءَ نشہ باپاری ءِ بھتام ءَ دزگیر کنگ بیتگ ءُ پد ءَ آ ایرانی انقلابی آمیدگس ءَ پاھو داتگ-

اھوالانی رد ءَ عبدالغفار شمبے ءِ روچ ءَ پاھو دیگ ءَ جتا یک کوٹی ءَ برگ بیتگ ءُ پد ءَ مروچی آ پاھو دیگ بیتگ –

اھوالانی رد ءَ عبدالغفار کھول گوستگیں روچ ءَ آ شتگ بیتگ ءُ آئی ءِ گڈی گندوک اش کتگ ءُ رکستی بیتگ-

چہ روکپتی بلوچستان ءَ اے اولی وئیل ءُ پاھو نہ اِنت کہ ماتانی دل ءِ جگر سندگ بیگ ءَ اَنت اے دابیں ھزارانی کساس ءَ مات ءُ سمبھتگیں بانورانی دیم جنوزام کنگ بیتگ اَنت-

ایران ءِ پاھو نامھانی سر ءَ میان اُستمانی انسانی ھکانی گل ایران ءِ سر ءَ یکشل ءَ ایراد گرگ ءَ اَنت ءُ اے پاھوانی دارگ ءُ بندیگیں مردماں انساپ ءِ ٹرائل کنگ ءِ دزبندی ءَ کنگ ءَ اَنت-

بلوچ نودربر رھشون ڈاکٹر ماہ رنگ بلوچ ءَ چاگردی تندجاہ ٹوئٹر ءَ گوشتگ تربت ءَ ریاستی ملایاں نیکراھی ءِ نام ءَ بلوچ ورنا ءِ کوش بلوچ سیکولر چاگرد ءَ یک نوکیں موڑے ئے بندات اِنت – بلے ریاست مذھبی ڈسکورس ءِ نوک نہ اِنت بلکیں بازیں سالاں چہ برجاہ اِنت ءُ چہ گوست ءَ بلوچ سیاسی زانت ءِ ھلاس کنگ ءَ ریاست ءَ ملا ڈیٹھ اسکواڈ ءِ چیردستی ءَ ڈسکورس رودینتگ-

ماہ رنگ بلوچ ءَ دیمتر ءَ گوشتگ کہ ڈیتھ اسکواڈ ءِ ھمے ٹولی ءَ آواران ءَ یک ذگر ھانہ ءِ سر ءَ اُرش کتگ جھاؤ، مشکے، کولواہ، گورکوپ، بالگتر ءُ کش ءُ گوری دمگاں بازیں جاھاں ریاست ءَ ھمے نیکراھی ڈسکورس ءِ بنھشت ایر کنگ ءِ پژدر ءَ بازیں سیاسی ٹک لس بلوچانی سر ءَ سلاہ بندیں اُرش کتگ اَنت ءُ ذگری ءُ نمازی ءِ نام ءِ سر ءَ بلوچ چاگرد ءَ یک جنگے ودی کنگ ءِ جھد کتگ ءُ تربت ءَ بیتگین وئیل ھمے ریاستی نیکراھی ڈسکورس ءِ درچ اِنت-

آئی ءُ گوشتگ ریاست ھمے نیکراھی ڈسکورس ءِ پژدر ءَ نا ایوک ءَ مکران ءَ بلکیں سرجمیں بلوچستان ءَ چہ پنجاپ ءَ اتکگیں تبلیغیاں تالان کنگ اِنت ءُ اے پنجاپ ءَ اتکگیں ملا ملٹری گروپ یک ترندیں رنگے ءَ بلوچستان ءَ مدرساں وتی تند ءَ دور دیان اَنت-

ماہ رنگ بلوچ ءَ گوشتگ کہ اے نوکیں کالونیل گامگیج سرپد المی ءَ سرپد بوگی اِنت ءُ ایشی ءِ دارگ ءِ ھاتر ءَ سرجمیں بلوچ سیاسی زوراں گھگیری ءِ رنگ ءَ بلوچ مھلوک میدان ءَ آرگ لوٹ ایت – بستار بلوچ سیاسی باسک اگاں ما اے ریاستی نیکراھی ڈسکورس ءِ سرپد بوگ ءَ دیر کت یا اے تالان بوگ ءِ وھد دات گڑا اے بلوچ سیاسی پھناتانی سر ءَ اُرشے بیت اِنت-

رنگینیں کَبرستان

نبشتہ کار : بِنتُل بلوچ

دی بلوچستان پوسٹ

مھر ءِ مِیتّگ مئے میتّگ یک کسانیں میتّگے اَت میتّگ ءِ زِرباری نیمگ ءَ کوہ اَت انت ءُ گوریچان ءَ مُلک ءُ ڈگار مئے میتّگ ءَ یک کسانیں وانگ جاھے ھم ھست ات کلاس یک ءَ داں ھشت ءَ وانگ مئے میتگ ءَ وانگ بوت دیمتر ءِ وانگ ءِ واستا مئے مردُم پُشتی بازار ءَ شُت انت، پہ پاد مئے واستا گنٹہ ءُ نِیم ءِ سپّر اَت ھودا کلاس یک ءَ دانکہ دہ ءَ وانگ ھست ات آ میتّگ ءِ دُرائیں چُک ءُ چوریگ وانگ ءَ گوں ھُب اَت انت بَلے مئے میتّگ ءِ گِیشتِریں مردُماں وانگ ءِ ھُب ءُ واھگ نسیت ات کمیں مردُم شُت وتی وانگ ءِ سرجم کَنگ ءَ پَشت کپتگیناں نہ وَنت پرچا کہ آ گریب اَت انت پہ گریبیں مردُماں وانگ دردے سرا اَت ءُ گران اَت ، مئے میتّگ ءِ مردُماں وتی پِت ءُ پیروکی مُلک ءُ ڈگاراں کار کُت ءَ لاپ شوھازتگ وانگ ءُ زانگ آیانی وس ءَ دَر اَت وھد پِر گوزان بوت چہ زِربار اَتک یک بَلائیں توپانے اے توپان ءَ میتّگانی میتّگ وتی وڑ ءَ پَتارت ءُ شُت، گوات ءَ شِک شِکے پِر اَت مئے پِیریناں گوشت سیاہ گواتے مئے مُلک ءُ ڈگار تاوان بار بوت انت دلوت مُرتاں گْونڈالیں مَچ کپتاں گَلہ ءِ یک ھوشَگے دست نہ کپت دُرستیناں نُکسان بوت، بَلے توپان ءِ آیگ ءَ پیسر ناکو ائیبتان ءَ پیشگوئی داتگ اَت کہ اے سال ءَ بلائیں ھُدائی توپانے کیت ھرکس وتی وتی تیاری ءَ بہ کنت، ناکو ائیبتان ءَ گُشتگ اَت کہ اے توپان چیزے سال پسرا ھم اَتکگ بلائیں تاوان وارتگ مردُماں ناکو ائیبتان ءِ لوگ کوہ ءِ بُن ءَ اَت انت زِربارے اَوّلی لوگ ناکو ائیبتان ءِ لوگ اَت ناکو ائیبتان ءَ وت ءَ اے ھم شُبینَگ بوتگ ءَ کہ ناکو ائیبتان اے رندیگیں توپان ءَ رکھت نہ کنت اے بَرے ناکو ءَ ھم توپان تاوان دَنت ءُ روت-

شپ اَت مھلوک ئے ھِچ توار ءُ بَرمش نیست اَت تھارونکی اَت شَپ ءِ پیمناکیں تُرس اَت دُنیا واب کَپتگ اَت باند ءِ ودارے ءَ،ناکو ائیبتان چہ واب ءَ جھسُرت کاشیں کُڈ ءَ چہ ڈن ءَ دراتک چارِتے کہ آزمان ءَ سیائیں شالے مانپوشتگ جمبر چوں لَھڑیں لوھگ ءَ جوش وراں انت ناکو ائیبتان دیم پہ پساں شُت کہ پَساں واڑ ءَ بند ات انت
گِروک ءَ شبم دات ءُ گَرانداں چوں بمبانی توار کُت ناکو ءَ اِشتاپ اِشتاپ ءَ پَس واڑ ءِ تہ ءَ کُت انت دیم پہ کُڈ ءَ دات کہ ھُودا ناکو ءِ چُک شَلّی ءُ میراث واب اَت انت چوں مہ بیت کہ شَلّی ءُ میراث دِلترک بہ بنت اے گرندانی توار ءَ ناکو ائیبتان ءِ کُڈ ءِ سَر بوگ ءَ پیسر ناکو ءِ کُڈ ءِ تیر پُروشت. وابیں شَلّی ءُ میراث سیائیں سیاہ گوات ءِ میار بوت انت، جمبراں گُوارگ بِندات کُت گوات پہ دیمے ءُ گِرندانی توار پہ دیمے نپس ءَ نپسی اَت میتّگ تباہ بوتگ اَت بس گِرندانی توار اَت جھان ھسَرتگ اَت تُرس اَت کوکار اَت، مئے میِتّگ مئے کَبرستان بوت۔ ھو ! کَبرستان بَلے رنگینیں کَبرستان، کہ اِدا شَلّی ءُ میراث کَل اَت انت اِدا باریں دِگہ چُنت کل بیت باریں اے رنگینیں کَبر پہ کئے ءَ نسیب ءَ بیت،باریں اے کَبرستان جاگہ کنت اگاں نہ کنت؟ چہ زِربار ءَ اتکَگیں ھما بَرمش انگت ءَ بَرمش ءَ انت ھما مِیتّگ ھما سیائیں سیاہ گوات ھما توار ھما رنگینیں ھما کبرستان، ما کِشتَگ اَت مُلک ءُ میراث رُس اتگ اَنت کَبر رنگیں مئے کمر ء رنگینیں کَبرستان شاری ءِ سُھرچکیں ھونانی بوہ ءَ کنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔