TBP Balochi

روکپتی بلوچستان ءِ دمگ ایرانشھر ءَ یک ماھے ءَ پیش بیگواہ بیتگیں ورنا ءِ لاش دزکپتگ-

روکپتی بلوچستان ءَ سر بیتگیں اھوالانی رد ءَ لاش گوستگیں ھپتگ ءَ دزکپتگ ءُ گوستگیں روچ ءَ آئی ءِ کھول ءَ پجار کتگ-

اھوالانی رد ءَ لاش ءِ پجار سِی ءُ دو سالی ئیں داؤد ملکزئی ء مھمد علی جھنند سرباز ءُ ایرانشھر ءِ نام ءَ زانگ بیتگ-

داؤد کساس یک ماھے ءَ پیش بیگواہ بیتگ ءُ آئی ءِ لاش گوستگیں ھپتگ ءَ دزکپتگ ءُ لاش ءِ پجار مشکلیں رنگے ءَ کتگ بیتگ-

اھوالانی رد ءَ لاش ءَ تیرانی ٹپ ھم پر بیتگ اَنت ءُ لاش یک بندیں لوگے ءِ توک ءَ دزکپتگ –

زانگ بہ بیت روکپتی بلوچستان ءَ اے لھتیں وھدانی توک ءَ اود ءَ مردمانی بیگواہ بیگ یا لاشانی دزکپگ گیش ودان اَنت چِد ءُ پیسر گوستگیں ماہ ءَ ھم ایرانشھر ءَ یک مردمے ءِ لاش گوں ھمراھے گاڑی ءَ دزکپتگ کہ آ ناشناساں آوار جنگ ءُ تیر جنگ ءَ پد لاش چگل داتگ بیتگ-

روکپتی بلوچستان ءَ اے دابیں وئیلانی بارو ءَ یا ایشانی بیگواہ کنگ ءُ اے داب ءَ لاشانی دزکپگ تنی وھدی ھاسیں رنگے ءَ زانگ نہ بیتگ اَنت-

بلوچستان ءِ بنجاھی شھر شال ءَ بلوچ اکیڈمی ءِ شست ءُ پنچمی سالروچ ءِ درگت دیوانے بلوچی اکیڈمی ءِ سرکماش سنگت رفیق ءِ پاگواجھی ءَ برجم دارگ بوتگ – دیوان ءَ اکیڈمی ءِ باسکاں بھر زرتگ ءُ دیوان ءَ بلوچی اکیڈمی ءِ کارگشاد ڈاکٹر بیزن سبا ءَ ھمک سالی کارگزاری ءِ درگت ءَ حال داتگ انت ءُ سال ءَ داشتگیں لبزانکی مراگش ، شنگکاری کارانی باروا سرپدی، اکیڈمی ءِ اے دگہ سُر ءُ پُر ءُ شؤر بندیانی درگت ءَ باسک سرپدی داتگ انت – چہ ایشی ءَ ابید سال ءِ میان ءَ مالی ھرچ ءُ درچ ءِ درگت ءَ حال داتگ ءُ آیانی شور ءُ سلاہ زُرتگ اَنت –

دیوان ءَ اکیڈمی ءِ باسکاں بلوچستان سرکار ءِ سر وزیر میر عبدالقدوس بزنجو ءِ منّت گپتگ کہ آئی ءَ پہ بلوچی زبان ءِ دیمروئی ءَ اکیڈمی ءِ سالانہ گرانٹ ودّینتگ ءُ پنچ کروڑ کُتگ –

بلوچی اکیڈمی ءِ باسکاں اے گپ ءِ سرا بژنی درشان کرتگ کہ سرکاری وانگ جاھاں بلوچی ءِ وانینگ ءُ بلوچی نبشتانک نبیسی ءِ کار دارگ بوتگ – چہ ایشی ءَ ابید باسکاں لوٹ کرتگ کہ وانگ جاھاں بلوچی زبان ءِ استاد دارگ بہ بنت – اکیڈمی ءِ باسکاں اے گپ ءِ سرا زور داتگ کہ بلوچستان ءِ سرکاری کالجاں پہ بلوچی ءِ ھورکیں جاھاں پبلک سروس کمیشن ءِ نیمگ ءَ گچین کرتگیں استاد دارگ بہ بنت داں کہ کالجاں بلوچی وانینگ ءِ کار گھتر بہ بیت –

دیوان ءَ ڈاکٹر بیزن سبا ءَ گوشتگ کہ اکیڈمی ءَ اے سال ءَ پہ بلوچی زبان ءِ ڈیجیٹلائزیشن ءَ یک موبائیل اپیلی کیشن ئے جوڑ کرتگ کہ ایشی ءِ تہ ءَ اکیڈمی ءِ چھاپ کُرتگیں کتاب وانگ بنت۔ ایشی ءَ ابید بلوچستانیات جرنل ءَ دھ کتاب چھاپ ءُ شنگ کرتگ ءُ دگہ دوازدہ کتاب پہ چھاپ ءَ پریس ءَ دیم دیگی انت –

اکیڈمی ءِ دیوان ءَ ھواریں باسکاں کڈن کتگ کہ آ پہ زھگاں وانگی مواد جوڑ بہ کن انت ، دری زبانانی کوٛہنیں ساچشت ماں بلوچی زبان ءَ رجانک کنگ بہ بنت ءُ بلوچی ءِ نامداریں لبزانکی ءُ تاریخی مواداں ماں انگریزی یا دگہ زباناں رجانک کنگ بہ بنت ءُ بلوچی زبان ءِ گالوار ءُ تاریخ ءِ درگت ءَ پولکاری کنگ ءُ کتاب شنگ کنگ بہ بیت –

دیوان ءَ ھواریں باسکاں سر وزیر ءُ بلوچستان اسمبلی ءِ باسکانی دلگوش اے نیمگ ءَ پِرّینتگ کہ آ بلوچی زبان ءَ ھوار بلوچستان ءِ اے دگہ مزنیں زبان براھوئی ءُ پشتو ءِ سرکاری بنداتی وانگ جاھاں وانینگ ءَ گامگیج زورگ ءَ راھبند ٹاھینگ بہ بیت – شست ءُ پنچمی دیوان ءَ باسکاں لوٹ کُتگ کہ گوادر یونیورسٹی ءَ بلوچی ڈیپارٹمنٹ پچ کنگ بہ بیت ءُ ڈیرہ اسماعیل خان یونیورسٹی (گومل) ءَ بلوچی زبان ءِ وانینگ بندات کنگ بہ بیت –

باسکاں بلوچی اکیڈمی ءِ کارانی درگت ءَ باوست کرتگ ءُ گوٛشتگ کہ اکیڈمی ءَ گوستگیں چیزے سالاں پولکاری مراگش کرتگ ، پولکاری ءِ نیمگ ءَ گیشتر دلگوش گور کتگ کہ چہ ایشی ءَ پہ بلوچی زبان ءُ لبزانک ءِ دیمروئی ءَ کمک رسِتگ – ایشی ءَ ابید بلوچی اکیڈمی ءِ جوڑ کرتگیں موبائیل ایپلی کیشن ہم اے کارانی تہ ءَ یک مزنیں گامگیجے –

برجم داشتگیں دیوان ءَ اے کول دیم ءَ آرگ بیتگ کہ بلوچستان ءِ سرکار ءَ ھوار گوں ھمے کار ءِ ادارھاں لوٹ کنگ بیت کہ بلوچستان ءِ کلیں سرکاری بنداتی وانگ جاھاں بلوچی ، پشتو ءُ براھوئی ءِ سرجمی ءَ استاد دارگ بہ بنت ءُ اے زبانانی وانینگ ءِ کار پد ءَ بندات کنگ بہ بیت۔ ریڈیو ، ٹی وی مراگشانی رہبند گھتر کنگ ءَ ابید شنگ کنگ ءِ وھد ھم گیش کنگ بہ بنت – بلوچی زبان ءَ ایپ ایم ریڈیو ءَ مراگش شنگ کنگ بہ بیت –

دیوان ءِ گُڈسر ءَ بلوچی اکیڈمی ءِ سرکماش سنگت رفیق ءَ دیوان ءَ بھر زرتگیں کلیں باسکانی منت گپتگ ءُ گوشتگ کہ بلوچی زبان ، تاریخ ، دودمان ءُ لبزانک ءِ دیمروی ءَ وتی جھداں چد ءُ گیشتر پیلو بہ کن انت –

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ گوستگیں روچ ءَ بلوچ لبریشن آرمی ءِ سرمچاراں بلیدہ ءَ زورگریں پاکستانی پوج ءِ واستا مڈی بروکیں گاڑی ءِ سر ءَ تیرگواری کتگ ءُ پروشتگ-

آئی ءَ گوشتگ سرمچاراں گردانک ءِ ھند ءَ دشمنیں پوج ءِ راشن دستیگ کتگ انت ءُ گاڑی پروشتگ ءُ سرمچاراں سندھ ءِ جھمنندیں ڈرائیور ءُ آئی ءِ ھمراہ سرپد کتگ ءُ یل داتگ اَنت-

جارکش ءَ گوشتگ کہ زورگریں پاکستانی لشکر کجام رنگیں آسراتی سرکنوکیں مردماں سرپد کن ایں کہ آ اے امل ءَ دور بہ بنت اگاں ناں گڑا وتی جانی ءُ مالی زمہ وار وت بہ بنت-

جارکش ءِ گوشگ ات کہ اے اُرش ءِ زمہ واری ءَ بلوچ لبریشن آرمی من ایت ءُ زورگریں پاکستانی پوج ءُ آئی ءِ کمکارانی سر ءَ مئے اُرش برجاہ بنت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی پنچ ھزار ءُ یکسد ءُ بیست ءُ ھشت روچ سرجم بوتگ انت –

مروچی چہ سریاب شال ءَ سیاسی ءُ چاگردی باسک عبدالصمد بلوچ، محمد عثمان بلوچ ءُ دگہ مردماں اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ اگست ءِ ماہ بلوچستان ءِ راجدپتر ءِ تہ ءَ شری زانگ بیت کہ ھما وھد ءَ برتانیہ ءِ شاہ ءَ اے دمگ ءِ تہ ءَ درآیگ وتی رکینگ پھم اتگ گڈا بلوچ سرڈگار ھم کہ برٹش ءِ ایردست بوتگ آجو بوتگ، بلے برتانیہ ءَ اے دمگ ءِ تہ ءَ پہ وت گلام جوڈ کتگ تانکہ آؤکیں وھد ءَ سامراجیت ءِ برجاہ دارگ ءَ یس مین ءِ کرد ءَ پیلو بہ کن انت –

ماما قدیر بلوچ ءَ گوشتگ کہ بلوچ جھد ءِ اے پانزدہ سالی جھد ءَ نوکیں دور ءِ تہ ءَ پرزنداں وتی ھوناں گوں گوستانک نبیس اِتگ کہ پہ وتی پدریچ ءِ ھاتر ءَ دیم پہ منزل ءَ جنزان انت – بلوچ ءِ گوستانک کماش، پرزند ءَ زالبولانی تمردی ءِ کسہ ءَ پُر انت بلے بیست ءُ یکمی کرن ءَ سال دوھزار ءُشش ءَ اگست ءِ ماہ ءَ اسپیت ریشیں کماشے ءِ ھوناں آ پیگمبرے جوڈ کت ھمے وڈ اگست ماہ ءَ وت بلوچ پرزندانی ھونانی جو ءِ درچ جوڈ کت –

ماما قدیر ءَ گوشتگ کہ پاکستانی پوج ءِ نیمگ ءَ بلوچ مھلوک ءِ سر ءَ لشکر کشی بلوچ پرزندانی آوار جنی ءُ آیانی ژانگولیں جونانی چگل دیگ ءِ درچ برجاہ انت ءُ پوج ءَ ڈیرہ بگٹی ءَ بگر تاں مکران ءَ وتی زوراکی برجاہ داشتگ انت ـ اگست ءِ ماہ ءَ پوج ءَ.ماں ھزار گنجی ءَ پد ماں پد بازیں اُرشے کتگ مزنیں کچے ءَ بلوچ پرزند آوار جتگ ءُ لٹ پُل برجاہ داشتگ انت، نوں دو بر ھمے اگست ءَ لینڈ مافیا ءُ کیو ڈی اے ءِ لھتے اپسر مری زمینانی دستیگ کنگ ءِ جھد ءَ انت – اے ھونیگیں ماھے – مروچی بلوچ پدریچ راجی یکجھتی ءِ نیمگ ءَ الم کیت ءُ ھمیشی ءِ تہ ءَ باندات ءِ سوبمندی برورد ھست انت –

سربوتگیں ھالانی رِد ءَ یکشمبے ءِ روچ ءَ تربت ءِ دمگ کلگ ءَ کئور ءَ جان شودگے میان ءَ ھپت کسانسالیں جنک بیران بوتگ انت –

پولیس ءِ رِد ءَ یکشمبے ءِ بیگاھے ادار پنچ ءِ نزیک ءَ تربت ءِ دمگ کلگ ءَ کئور ءَ جانشودگے میان دھ سالی بگر ھبدہ سالی ھپت جنک بُک اِتگ ءُ بیران بوتگ انت –

بیران بوتگیں جنکانی پجات فضا ء زبیر، فائزہ ء سلیم، ماہ تاپ ء کریم، دردانہ ء نعیم، بشرہ ء غلام، شیرین ء ناصر، ماہ زیب ء اشرف ناماں چہ بوتگ انت –

دمگی مردماں وتی کمک ءِ وت جون چہ کئور ءَ در کتگ ءُ نادراھجاہ ءَ سر کتگ انت کہ اودا اژدری چار ءُ ٹپاس ءَ پد جنکوانی جون کھول ءِ دست ءَ دیگ بوتگ انت –

نواب شاہ، ھزارہ ایکسپریس ءِ دَہ بوگی پٹیاں جھل شترتگ اَنت بیست ءُ دو مردم بیران بیتگ انت ءُ پنجاہ مردم زدگ بیتگ اَنت-

چہ کراچی ءَ دیم پہ ایبٹ آباد ءَ روکیں ٹرین ءَ یازدہ سد مساپر ءَ گیش سوار بیتگ اَنت ٹرین سندھ ءِ شھر نواب شاہ سرھاری ریل اسٹیشن ءِ نزیک ءَ وئیل ءِ آماچ بیتگ –

ریل ءِ واکدار ءِ رد ءَ وئیل ءِ وھد ءَ ریل ءِ لھتیں بوگی پٹری ءَ شترتگ ءُ جھل ءَ شتگ اَنت ءُ ریل ءِ کارمند ءُ دمگی مردم کمکی کاراں دزبند اَنت ءُ پانزدہ لاش کش اتگ ءُ نزیکیں ھسپتال جاڑیگ کتگ اَنت-

آئی ءَ ریلیف ٹرین روھڑی ءُ کوٹری اسٹیشناں روان داتگ اَنت ءُ ریل ءِ ٹریک ءَ زوت ءَ چہ زوت کار بندات کنگ بیت اِنت-

ریل ءِ واکدار ءِ گوشگ اِنت کراچی ءَ ٹرینانی روگ ءُ آیگ کساسی رنگ ءَ اِنت بلے گمان ھمیش اِنت کہ وھد ءُ پاس مٹ کنگ بنت-

واکدارانی گوشگ اِنت کہ ٹرین اکنامی کلاد ءَ یک ھزار مساپر ءُ اے سی کلاس ءَ یک سد ءُ سی مردماں بکنگ کےگ اَنت –

تربت سول سوسائٹی ءِ جارکش ءَ وتی شنگ کُتگیں درشانے تہءَ گُشتگ کہ تربت ءَ ورناھیں نودربر ءُ پرائیویٹ سکول ءِ اُستاد عبدالرؤف ءِ توہین رسالت ءِ بھتام جنگ ءُ آئی علماء کرامانی جرگہ ءَ آیگ ءِ وھدءَ بیدردی ءَ کُشگ سکیں اپسوزیگیں کار اِنت۔ چُشیں وئیلانی گوست ءَ ھچ درور دز نہ کپیت، کیچ ءِ مھلوکءَ چہ اے وئیل ءَ باز دردمند اَنت۔

جارکش ءَ گُشتگ کہ تربت شھر ءَ لھتیں سالاں چہ یکشلی ءَ گوں توہین دین ءُ رسالت ءِ بھتام جنگ ءُ وتسریں جرگہ آنی ردءَ ورناھاں توبہ تائب ءُ بکشائنگ ءَ پہ توار کنگ ترس ودی کنوکیں جاور اَنت، چریشی ءَ پیسر چُشیں دو اگں سئے وئیلانی تہءَ ازمکار ءُ زندمان ءِ دگہ تکاں بستگیں مردمانی بگیرءَ توہین رسالت ءِ بھتام کنگ بیتگ ءُ آ وتگڑیں جرگہ اں لوٹارینگ آیانی گومءَ بدکردیں روش برجاہ دارگ بیتگ دانکہ ازمکاراں توبہ تائب کنائنتگ ءُ سہُن نوک کنگ ءَ لاچار کُتگ اَنت کہ اے چاگردی تکءَ کپتگیں کرد اِنت۔

جارکش ءَ گُشتگ کہ اے وئیلانی سرءَ نہ کجام سیاسی پاٹی ءُ نانکہ کجام نیکراھی پاٹی ءَ پدگرد درشان کُتگ اَنت دانکہ دمگی واکدار ءُ پولیس ھم اے حساسیں جاورانی ھاموش چاروک جوڑ بوتگ اَت اَنت، اشی ءِ آسر ورناھے نودربر عبدالرؤف ءِ کئوش ءِ دروشم ءَ دیما یک اے سک سنگین ءُ ھترناک اِنت۔

جارکش ءَ گُشتگ کہ مکران نیکراھی رواداری ءِ دنگ مگ اِنت، ادا دین ءُ سِتک ءِ پرک ءِ بنھشت ءَ کدی ھم ناشرکاری ءِ وئیل دیما نئیتکگ اَنت۔ کیچ ءَ چُشیں وئیلانی دیما آیگ ترسناک اِنت، کہ تربت سول سوسائٹی اشاں ترندیں لبزانی تہءَ ایر جنت ءُ اے لوٹءَ کہ وتگڑیں جرگہ سرکار، واکدار ءُ ڈیھی کانوداں پادمال کنان ءَ عبدالرؤف ءِ ھاترءَ نندارینگ بیتگ اَت اشی ءِ درستیں مستریں رھشوناں پُرسپول ءِ تہءَ ھوار کنگ ءُ پَٹ پول کنگ بہ بیت۔

تربت سول سوسائٹی ءِ جارکش ءَ جھل مگسی ءَ دھکان امداد فقیر جویہ ءِ کئوش ھم ایر جنان ءَ گُشتگ کہ کُشگ بیتگیں مردمے کھول ءَ زھرشانی ءِ اگبال نہ دیگ ءَ واکداراں جاگیرداراں گوں ھوار بیتگ ءُ یک بھرے ءِ کرد پیلو کُتگ کہ اے جمھوری ءُ رھبندی اگبالانی بگیری اِنت۔

تربت سول سوسائٹی ءَ دوھیں وئیلانی پُشدرءَ پَٹ ءُ پول ءِ لوٹ کنان ءَ انساپ ءِ لوٹانی سرجم کنگ ءِ لوٹ کُتگ۔

بلوچستان ءِ دمگ کیچ ءَ سَے جتاجتائیں اُرشانی اھوال اَنت-

سر بیتگیں اھوالانی رد ءَ مند ءُ کولواہ ءَ ناشناسیں سلاہ بندیں مردماں پاکستانی پوج ءِ بنجل نشانگ کتگ اَنت ءُ ھمے ڈول ءَ بلیدہ ءَ پوج ءِ واستا مڈی بروکیں گاڑی ناشناسیں مردماں دستیگ کتگ ءُ برتگ-

کولواہ ءِ دمگ ڈنڈار ءَ ناشناسیں مردماں شمبے ءِ شپ ءَ پوج ءِ بنجل سَے نیمگاں اُرش کتگ –

دمگی مردمانی گوشگ اِنت اُرش ءِ وھد ءَ دمگ ءَ تیرگواری ءُ تراکانی توار اشکنگ بیتگ اَنت ءُ اُرش ءَ پد اُرشکاراں پشت مانداتگ ءُ شتگ اَنت-

ھمے ڈول ءَ کیچ ءِ دمگ مند ءَ ھال اِنت کہ شمبے ءِ روچ ءَ ناشناسیں مردماں مند ءِ ھند اپسار ءَ پوج ءِ ھستیں چوکی نشانگ کتگ-

دمگی مردمانی رد ءَ اے اُرشاں پوج ءَ تاوانانی دیمپانی کنگ کپتگ بلے واکدارانی نیمگ ءَ تنی وھدی اے دابیں اھوال دیم ءَ نیتکگ اَنت-

دومی نیمگ ءَ گوستگیں روچ ءَ ناشناسیں مردماں پاکستانی پوج ءِ واستا مڈی بروکیں گاڑی گپتگ ءُ گاڑی ءَ سواریں مردم پد ءَ یلو کتگ انت کہ آیانی سیادی چہ سندھ ءَ اِنت-

زانگ بہ بیت گوست ءَ اے دابیں اُرشانی زمہ واری بلوچ آجوئی لوٹوکیں سلاہ بندیں گلاں پہ وت ءَ زرتگ اَنت-