TBP Balochi

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراں چار فروری ءَ چاگی ءِ دمگ شعبیان ءَ سیندک پروجیکٹ ءَ چہ ھمگرنچ دشتکین شرکت ءِ ھمگرنچ کاروان آئی ای ڈی ءَ چہ نشانگ کتگ- اُرش ءِ آسر ءَ کاروان ءِ یک گاڑی یے تباہ بیتگ، چریشی ءِ سوب ءَ دو کارندہ مرتگ ءُ سے سک ٹپی بیتگ اَنت-

جارکش ءَ گْوشتگ کہ سرمچاراں پنچ فروری ءَ نال ءَ یک پولیس چیک پوسٹے انگیر ءَ کتگ ھپت کارندہ دزگیر کتگ اَنت ،پٹ ءُ پول ءَ پد یل داتگ اَنت، وھدے کہ پوسٹ ءُ سرکاری گاڑی مانداشتگ اَنت دمگ ءَ سرمچارانی سُر ءُ پرانی چاروگی ءُ تیل کار ءُ بار ءَ چہ ھمگرنچیں گاڑی ءُ واھننداں چہ زر گرگ ءِ ھاتر ءَ جوڑ کتگ-

جارکش ءَ گوشتگ کہ سرمچاراں ھپت فروری ءَ جھاؤ ءِ دمگ ارہ ءَ آواران بیلہ بُنجاھی شھدگ سر ءَ سنگر گپتگ ءُ زورگریں پاکستانی پوج ءِ پیادگ ٹولی ءُ دو گاڑیاں ھمگرنچ کارندہ مزنیں ءُ وتکاریں سلاھاں چہ نشانگ کتگ اَنت- اُرش ءِ آسر ءَ پنچ کارندہ مرتگ ءُ بازین ئِے ٹپی بیتگ اَنت-

گُڈی ءَ جارکش ءَ سرجمیں اُرشانی زمہ واری منّ اِتگ اَنت-

بی وائی سی ءِ بنجاھی رھشون سمی دین بلوچ ءَ گوشتگ کہ بلوچستان ءِ تہ ءَ زورانسری آوار جنی ءِ سنگینیں انسانی جیڑھے سرا سرکاری نمائندگانی اڑیں ءُ ناسنگینیں درشان ایوک ءَ ریاستی کنفیوژن ءَ پیش نہ دار ایت بلکیں اے کانود ، رھبند ءُ انسانی ھکانی نہ منگ انت ۔

آئی ءَ گوشتگ کہ یک نیمگ بلوچستان ءَ زورانسری آوار جنی ءِ جیڑہ برے دروگ ءُ وتگڑ گوش انت ءُ برے ھمے بٹاک ءَ جن انت کہ آوار جنگ بوتگیں مردم وت کوھاں شتگ انت ءُ برے اے جیڑھے جند ءَ انکار کن انت ، وھدیکہ دومی نیمگ ءَ ھمے سرکاری نمائندگانی نیمگ ءَ اڑیں درشان دیم ءَ آیگ ءَ انت۔

سمی دین ءِرد ءَ دہ روچ ءَ ساری بلوچستان ءِ سر وزیر ءِ اے درشان کہ 2 پروری ءَ پد ھچ کس آوار جنگ ءُ بیگواہ کنگ نہ بیت “ دپ ءِ وت منگ اے گپاں راست کنت کہ بلوچستان ءَ بازیں وھدے بیت کہ زورنسری آوار جنی بوگ ءَ انت ۔ بلے پدا ھپتگے ءَ ساری وفاقی وزیر خواجہ آسپ ءِ بیگواھیں مردمانی جیڑہ ءَ ”سراسر فراڈ “ گوشگ ءُ اشی ءِ جند انکار کتگ ۔

آئی ءَ گوشتگ کہ ھمے میان ءَ پاکستان ءِ وفاقی وزیر کانود اعظم نزیر تارڑ ءِ نیمگ ءَ زورانسری آوار جنی ءِ دیرگیں جیڑوے ءِ پٹ پول کنگے ھاتر ءَ نوکیں کمیٹی اڈ دیگ جار اے گپ ءِ گواھی دنت کہ ریاست وت اے جیڑہ ءِ ھستی ءَ منگ ءَ انت ۔

سمی دین بلوچ ءَ آسمہ جہانگیر ءِ کانفرنس ءَ رانا ثناء اللہ نوکتریں درشان ءِ سرا وتی ھیال درشان اتگ انت ءُ گوشتگ کہ زورانسری آوارجنی ءِ وڈیں سنگینیں جیڑھے ءَ مرگ ءُ ھیک ءِ وڈیں بے وڈیں درورے ءَ گوں جوڈینگ ءَ سانمندیں کھول ءِ ٹپاں واد پر ریچگ ءَ ھوار ریاست ءِ بے ھسی ءِ انتہا انت ۔ آئی ءَ گوشتگ کہ رانا ثناء اللہ ءِ اے گوشگ کہ تاں ھما وھد ءَ بلوچستان ءَ ناشرکاری ھست انت زورانسری آوار جنی بنت ، اے گپ وت راستی ءَ پدر کن انت کہ زورانسری آوارجنی بوگ ءَ انت ءُ دیمتر ءَ ھم برجاہ مان انت ۔

آئی ءَ گوشتگ کہ اے درشان ھنچیں زھگے ءِ دیم ءَ دیگ بوتگ کہ آئی ءِ پت گوستگیں ھبدہ سال انت کہ بیگواہ انت ۔ سمی دین ءَ گوشتگ کہ ستمبر 2022 ءَ شال ریڈزون ءِ نندانک ءِ وھد ءَ رانا ثناء اللہ اعظم نزیر ءَ بیگواھیں مردمانی کھول ءَگوں نیاد کتگ ، ھمے ٹاہ داتگ کہ ما شمے درداں پھم ایں ءُ ھمے گوش ایں کہ دیمتر ءَ کس بیگواہ کنگ نہ بیت ۔ ھمے کول کتگ کہ ھر ھمائی ءِ سرا کہ الزام ءِ ھست آمیدگس ءَ آرگ بیت کانود ءِ رد ءَ تچکیں ٹرائل بیت ۔

آئی ءَ گوشتگ کہ بلے مروچی وت یک وفاقی وزیر ءِ نیمگ ءَ ھمے گوشگ کہ اگاں کسے آوار جنگ بیت گڈا آ کانود ءِ رد ءَ ڈیل کنگ نہ بیت ۔ اے کانود ءُ رھبندانی بگیری ئے ءُ اشی ءِ بالادستی ءَ ریاست کنت ۔

سمی دین ءَ ھمے جست کتگ کہ ھنچیں چکے کہ آئی ءِ پت زورانسری آوار جنگ ءُ بیگواہ کنگ بوتگ ، آیا اے امیت دارگ ھم جرمے کہ مئے دوستیگیں مردم کانود ءُ رھبندانی رد ءَ ٹریٹ کنگ بہ بنت ؟ وھدیکہ سرکاری نمائندگ وت کانود ءِ سرا جست چست بہ کن انت گڈا لس مردم کجام امیت ءَ بہ دار ایت ؟

آئی ءَ گوشتگ کہ زورانسری آوارجنیبءِ جیڑھے درگت ءَ ریاست وت کنفیوژن انت ۔برے اے جیڑہ سرجمی ءَ نہ من انت ءُ برے ناشرکاری ءِ نام ءَ اشی ءَ جائز گوش انت ۔ بلے راستی ھمیش انت زورانسری آوار جنی ریاست ءِ پیشانی ءَ سیاھیں ٹکے جوڈ بوتگ ۔

گڈسر ءَ سمی دین بلوچ ءَ گوشتگ کہ تاں ھما وھد ءَ زورانسری آوار جنی ءِ جیڑہ سنگینی ءَ گوں گیش گیوار کنگ نہ بیت اشی ءِ سرا مدامی گپ بیت ۔ بس پہ درشان ،نہ منگ ، یا جواز پیش کنگ ءَ ریاست اے سنگینیں انسانی جرم ءَ بری الزمہ بوت کنت ۔

حب ءَ ٹرک ءُ دو گاڑی ءِ ٹکر ءَ یک مردمے بیران ءُ چار ٹپیگ بوتگ انت ۔

حب ءِ وئیل ءَ ٹپیگیں مردم نزیکیں ھسپتال ءَ سر کنگ بوتگ اَنت ءُ سکا ٹپیگ کراچی ٹراما سنٹر ءَ سر کنگ بوتگ اَنت۔ بیران بیتگیناں حب ءِ کلانیں اھوالکار عزیز لاسی حب ءِ روتاک انتخاب ءِ بیورو چیف بوتگ۔

روتاک انتخاب ءِ رد ءَ اھوالکار عزیز لاسی 34 سال ءَ گوں انتخاب ءَ ھمگرنچ بوتگ۔ آئی ءَ پہ انتخاب ڈیجیٹل ءَ ھم رپورٹ داتگ۔ آئی ءَ انوگیں وھد ءَ کراچی شال ءِ شھدگ ءِ سر ءَ رپورٹے داتگ ات۔ آ جنرل سیکرٹری ءُ لسبیلہ پریس کلب ءِ بُن ھشت ایر کنوکاں چہ یکے بوتگ۔

روتاک ءَ گشتگ کہ ادارہ آئی ءِ اھوالکاری کرد ءَ ارزشت دنت ءُ آ ادارہ ءِ نامداریں اھوالکارانی تہ ءَ شمار کنگ بیت۔

گوستگیں روچ ءَ سھراب بلوچ ء امین یعقوب ھب چوکی ءِ ھند چہ بلوچ کالونی ءَ فرنٹیئر کور ( ایف سی) ءِ کارندھانی ھواری ءَ کاؤنٹر ٹیررازن ڈیپارٹمنٹ ( سی ٹی ڈی ) ءِ کارندھاں آوار جتگ ءُ ناشناسیں جاھے ءَ برتگ-

چمدیستگیں مردمانی رد ءَ کارندھاں روچ ءِ رھمانی ءَ بیڑ برتگ ءُ سھراب بلوچ دزگیر کتگ بلے دزگیر کنگ ءِ وھد ءَ ھچ وڑیں وارنٹ پیش کنگ نہ بوتگ ءُ نہ آئی ءِ کھول ءَ دزگیر کنگ ءِ سبب سرپد کنگ بوتگ۔

زانگ بہ بیت کہ سُھراب بلوچ پیسر ءَ ھم زورانسری بیگواھی ءِ آماچ بیتگ۔ سال 2017 ءَ چار روچ ءِ واستا آوار جنگ بوتگ ءُ سال 2019ءَ پد ءَ زورانسری بیگواہ کنگ بوتگ ءُ چِل روچ ءَ پد یل کنگ بوتگ۔ انوگیں ویل آئی ءِ سیمی زورانسری بیگواھی ءِ ویل اِنت۔

کھول ءِ گْوشگ اِنت کہ سھراب بلوچ ءِ ھلاپ ءَ ھچ وڑیں آمیدگس ءَ ھچ کیس نیست انت، اگاں آئی ءِ سر ءَ ھرچ وڑیں بھتامے ھست گُڑا آ کانود ءِ رد ءَ آمیدگس ءَ پیش کنگ بہ بیت۔

لاھور ءِ فلیٹز ھوٹل ءَ برجاہ عاصمہ جہانگیر ءِ کانفرنس ھمے وھد ءَ تُرندیں زھرشانی ءِ تہ ءَ اتکگ وھدے پاکستان ءِ گوستگیں تھکاری وزیر ءُ ھستیں سروزیر پاکستان ءِ مشیر رانا ثناء اللہ ءَ بلوچستان ءَ زورانسری آوار جنی ءَ چہ ھمگرنچیں ھلاپ ءَ ھیال درشان کتگ-

رانا ثناء اللہ ءِ تران ءِ میان ءَ گوشداروکیں یک زالبولے ءِ نیمگ ءَ چہ ” شٹ اپ” گوشگ ءِ سر ءَ آ ھشک ءُ ھبک بیتگ، چریشی ءَ پد چاگرد گیش ناگیگ بیتگ –

وتی تران ءِ تہ ءَ آئی ءَ بلوچستان ءَ برجاہ زورانسری آوار جنی توجیل پیش کنان ءُ بیگواھیں مردم بی ایل اے ءِ لوٹوک پشداران ءَ گوشتگ کہ بلوچ لبریشن آرمی ءَ چہ ھمگرنچیں مردم ءَ وتی انسانی ھک وت کربان کتگ-ھمے ھاتر ءَ بلوچستان ءَ زورانسری آوار جنی الّمی اِنت-

آئی ءَ گوشتگ کہ پیسر ءَ مرگ اتکگ یا ھیک؟ اگاں ناشرکاری بیت گُڑا زورانسری آوار جنی ھم بیت-

اے درشانانی سر ءَ کانفرنس ءَ ساڑی نندوکیں مردم زھر گپتگ ءُ رانا ثناء اللہ ءَ ھال یل دیگ ءِ لوٹ کتگ، بلے آئی ءِ نیمگ ءَ گپ سر ءِ اوشتگ ءَ پد جاور گیش ھراب بیتگ اَنت-

نامی ئیں چاگردی کارکن شیما کرمانی، بلوچ یکجھتی کمیٹی ءِ رھشون سمی دین بلوچ ھوار نیم ءَ چہ گیش مردماں زھرشانی کنان ءَ چہ ھال ءَ درتکگ اَنت، دراھگ ءَ پد ھال ءِ ڈن ءَ ماہ رنگ بلوچ ءَ یل کنگ ناراہ جتگ-

اے درگت ءِ سر ءَ عاصمہ جھانگیر ءِ برات زتک ءَ گوشتگ کہ رانا ثناء اللہ ءِ وڑیں مردم عاصمہ جھانگیر ءِ نام ءَ چہ برجمیں کانفرنس ءَ اَتکگ بھتام جنگ آئی ءِ ارواہ ءِ دلسیاہ کنگ ءِ برابر اِنت-

اود ءَ ساڑی ئیں مردماں گوشتگ کہ انسانی ھکانی نام ءَ سر ءَ برجم دارگ بیتگیں کانفرنس ءَ زورانسری آوار جنیاں توجیل پیش کنگ ناکابل کبول اِنت، ءُ اے درشان ناں تھنا سانمندیں کھولانی ٹپّانی سر ءَ واد دور دیگ برابر اِنت بلکیں عاصمہ جھانگیر ءِ لیکہ ءِ رد کنگ اِنت-

بلوچ لبریشن آرمی ءَ آپریشن ھیروپ ءَ بھر زوروکیں باسکانی اکس ءُ اھوال وتی میڈیا چینل ھکل ءَ شنگ کتگ انت ۔

ھکل ءَ شنگ بوتگیں بلوچ لبریشن آرمی ءِ درشان ءِ رد ءَ آپریشن ھیروپ 2 ءِ ماں نوشکی ءَ پاکستانی پوج ءِ بنجل ءِ سر ءَ ارش کنوکیں زالبولیں کماندار ءِ پجار نمیرانیں جند ندر کماندار بانی بلوچ پنام ءِ بانڑی کہ نمیرانیں درمھمد پنام ءِ روستو ءِ لوگ بانک ءُ یار خان سمالانی ءِ چک انت ۔

بی ایل اے رد ءَ کماندار بانی بلوچستان ءِ دمگ گربوک ، بولان ، شاھرگ ءِ نندوک بوتگ کہ آئی ءَ سال 2014 ءَ بی ایل اے ءَ بھر زرتگ ءُ 2022 ءَ مجید بریگیڈ ءِ بھر بوتگ ۔

زالبولیں کماندار ءِ درگت ءَ گل ءِ گوشگ انت کہ آ آپریشن ھیروپ ءِ چارمی روچ ءَ بزاں 3 فروری ءَ ماں نوشکی ءَ میڑانی میان ءَ نمیران بوتگ ۔

بلوچ لبریشن آرمی ءِ رد ءَ کماندار جندندریگ بانی بلوچ ءِ زند بس ادارکی دیمھونی ءِ کسہ نہ انت بلکیں بلوچ گھگیری ءِ تہ ءَ ودی بؤکیں گل ءِ سنگینی ءُ پگری چیدگے کہ آئی ءَ بی ایل اے یک لیکھی ادارھے ءِ تہ ءَ مٹ کنگ ءَ کمک کتگ ۔

گل ءِ رد ءَ 2014 ءَ بلوچ لبریشن آرمی ءَ بھر زورگ ءَ پد کماندار بانی بلوچ ءَ اے نام مزنیں وئیل یا کاروائی ءَ نہ کٹ اتگ بلکیں یکشلیں درچ ءَ پدر انت ۔

آ ھما باسکانی تہ ءَ ھوار انت کہ آیاں گل ءِ بنھشت ، اوتاک ءِ راہ ءُ رھبند ، دراجیں وھدے ءَ گھگیری ءِ شوربندی ءَ وتی کرد پیلو کتگ ۔ کوھانی تہ ءَ زند گوازینگ ، ءُ بنکی آسراتیاں زبھر بوگ ءَ ابید آئی ءِ گھگیری زاتی دیمھونیاں چہ گیشتر گل ءِ رھبنداں جوڑ بوتگ ۔

بی ایل اے ءِ رد ءَ 2022 ءَ مجید بریگیڈ ءَ بھر زورگ ءَ پد آئی ءِ زمہ واری پوجی ءُ اکلاکی ھردو تکاں گیش بوتگ انت ۔ آئی ءَ جند ندرانی ھیلکاری ، نپسیاتی نزیکی ءُ آپریشنل رھبندانی ھمک وھد ءَ نگھپان بوتگ ۔ آئی ءِ بالاد داری ءَ چہ گیش رھنند ، سنچانی بودیشت، ءُ دور چاری ءَ سنگت مھکم کتگ انت ۔

آئی ءِ کرد کرتنی رھبند ءُ ردانی ءِ لیکہ بوتگ کہ جند ندرانی ھلیکاری ءُ آپریشنل تیاریاں چہ گندگ بیت ۔

آئی ءَ گوشتگ کہ کماندار بانی زند ءَ وتی ھمسپر ءَ گوں اے جھدے بھر بوتگ ۔ نمیرانیں درمحمد پنام ءِ روستو ایوک ءَ مزن بالادے سنگتے نہ بوتگ بلکیں گل ھما بنداتی تمردیں سرمچاراں گوں ھوار انت کہ آیاں گرانتریں سنگرانی تہ ءَ رھشونی کتگ ۔

آئی ءَ گوشتگ کہ بانی ءُ درمھمد ءَ وتی زند ءِ ھشت سال جھد ءِ تہ ءَ یکے ءُ دومی ءَ گوں گوازینتگ ۔ 31 اکتوبر 2022 ءَ درمھمد دژمن ءِ گون ءَ جنگ دیان ءَ نمیران بوتگ ، بلے آئی ءِ نمیرانی ءَ کماندار بانی ءِ تہ ءَ ھچ تپاوت نہ اتکگ ، اے زاتی تاوان آئی ءِ دیم ءَ ھچ آڑاند نہ بوتگ بلکیں آ گیشتر گلی کاراں مھکمتر ءُ سنگین بوتگ ۔

بی ایل اے ءَ کماندار ءِ درگت ءَ دیمتر ءَ گوشتگ کہ آپریشن ھیروپ دو ءِ میان ءَ کماندار بانی ءَ ماں نوشکی ءَ آئی ایس آئی ءِ ھیڈکواٹر ءِ سر ءِ اُرش ءِ کمان کتگ ۔ آئی ءَ یکشل ءَ سے روچاں تاں میڑانی بھر بوتگ ءُ وتی جند ندریگیں یونٹ مھکم کتگ تاں ھما وھد ءَ آ نمیران نہ بوتگ دیم ءَ بوتگ ۔

گل ءِ رد ءَ اے میان ءَ کماندار بانی ءَ وت ایوک ءَ دوازدہ ءَ گیش پوجی کارمند کشتگ انت ۔

گل ءِ رد ءَ کماندار بانی بلوچ ءِ نمیرانی گل ءِ زانشت ، پوجی لیکہ ، ءُ پگری وپاداری ءَ اولسر انت آ بی ایل اے ءِ نوکیں دور ءِ رھشون انت کہ جنگ ءِ رھشونی چہ جنین ءُ مردین ءَ در کتگ لیکھی بنیاد ءَ آورتگ ۔

آئی ءِ سپر بلوچ راجی زرمبشت ءِ ھما تکانی چیدگ انت کہ دیمھونی ، پھتوی ءُ پگری اوشتانکیطءَ ھوار بنت ءُ ادارھے جوڑ کن انت ۔ کماندار بانی بلوچ ءِ نام نوں بس یک جند ندر ءِ نہ انت بلکیں گلی پگر ءِ درچ انت۔

ھُزدار ءِ دمگ زرینہ کھٹانہ ءَ ناشناسیں سلاہ بندیں مردمے لوگ ءَ ُپُترتگ بیست دو سالی ئیں لاپ پُریں زالبول تیرگواری کتگ کشتگ-

گیشیں ھالانی رِد ءَ وئیل گوستگیں روچ ءَ بیگاہ ءِ کساس شش ءَ بیتگ وھدے کہ سلاہ بندیں مردمے دانش زھری لوگ ءَ پُترتگ ءُ آئی ءِ لوگ بانُک نمرہ ء سعید احمد زھری ءِ سر ءَ تیرگواری کتگ- اُرشکار ءَ زالبول شش تیر جتگ چریشی ءِ آسر ءَ آ جاہ پہ جاھی بیران بیتگ- کُشگ بیتگیں زالبول لاپ پُر بیتگ، چریشی ءِ سوب ءَ کھول رِد ءَ یکے اناں بلکیں دو جانانی تاوان بیتگ اَنت-

وئیل ءَ پد میاربار تچگ ءَ سوبمند بیتگ اَنت- کُشگ بیتگین ءِ کھول ءَ گوشتگ کہ اشی ءَ گوں ھچ کس ءَ زاتی دُژمنی نانکہ دگہ جیڑھے بیتگ، اشی ءَ اَبید آ کشتگ-

کھول ءِ گوشگ اِنت کہ وئیل ءَ گوزگ ءَ بیست چار کلاک ءَ چہ گوستگ بلے تنی وھدے ھُزدار پولیس ءِ نیمگ ءَ چہ ھچ وڑیں ھال نہ کتگ نانکہ نزیکیں تھانہ ءِ ایس ایچ او ءَ وئیل درگت ءَ گامگیجے زرتگ-

کشگ بیتگین ءِ مات ءُ پت دگہ سیاداں ڈی آئی جی پولیس ءُ کمشنر ھُزدار ءَ چہ لوٹ کتگ کہ وئیل ءِ زوت گامگیج بزور اِیت ءُ پلگاریں پٹ ءُ پول کنگ بہ بیت ءُ ھمگرنچیں میارباراں زوت ءَ چہ زوت دزگیر بہ کن اِت انساپ بدے اِت-

بلوچ لبریشن آرمی ءِ میڈیا ونگ ھکل ءَ آپریشن ھیروپ ٹو ءَ ھواریں دو باسکانی اکس ءُ اھوال شنگ کتگ انت-

میڈیا ءِ رد ءَ خورشید کے بی پنام ءِ ارمان ء خدا بخش جھمنند کلگ سورانی تربت، ودی بوگ ءِ رمس 1999 کہ آئی ءَ یکم جون2022 ءَ بلوچ لبریشن آرمی ءَ وت ءَ بھر مند کتگ-

گل ءِ ھوار بوگ ءَ پد آئی ءَ جتا جتائیں زمہ واری سمبال اتگ ءُ جنوری 2023 ءَ فدائی ءِ فیصلہ ءَ داں سر بیتگ- اے پیسلہ کجام جزباتی یا ازاروکی نہ بیتگ بلکیں یک دراج کش ءُ فکری ءُ زمینی زانشت ءَ پد بیتگ-

ھکل میڈیا ءِ رد ءَ آئی ءِ گوادر ءِ میدان ءَ جاڑیگ بوگ ءِ وھد ءَ زمہ واری ایوک ءَ ھمبرابری ءَ نہ بیتگ انت بلکیں جاورھال ءُ رھوتی ءُ رھبندانی پلگارگ ءُ آپریشنل ءِ راہ ءِ ھموار کنگ ءَ آئی ءِ کرد ءَ داں ھوار بیتگ – آئی ءِ کرد اے درچ ءِ نشانی ءَ کنت کہ باز وھد ءَ جد ءُ جھد تھنا شور ءُ نمائشی ءَ گوں ناں بلکیں یکشلی ءُ زمہ واری ءُ بے تواری ءِ امل ءَ سر کنت-

ھکل میڈیا ءِ رد ءَ کمبر اسماعیل پنام ءِ سرباز ء محمد اسماعیل جھمنند سوراپ ہنجگور رمس ءِ ودی بوگ 2003 ءَ بیتگ کہ آئی ءَ جولائی 2022 ءَ بلوچ لبریشن آرمی ءَ وت ءَ بھرمند کتگ –

آئی ءَ گوشتگ اگست 2022 ءَ فدائی زمہ واری سمبال اتگ انت – آئی ءِ ھوار بوگ یک زانت، سنچ، راستی ءِ راہ ءِ گچین بیتگ چریشی ءَ آئی ءَ رھبند ءُ لیکہ اوپار ءُ زمہ واری ءَ داشتگ انت- آپریشن ھیروپ ءِ وھد ءَ آئی ءَ گوادر ءِ میدان ءَ یونٹ ءِ کمانڈ ءِ زمہ واری دیگ بیتگ انت – میدان ءِ جاوراں آئی ءِ جاڑیگ بوگ گل ءِ ھوارینگ ءُ زمینی رھوتی ءِ چیدگ بیتگ – آئی ءِ کرد ھمے پدراھی ءَ کنت کہ باز وھد ءَ سروکی برزیں توار ءَ اناں بلکیں بے تواری ءِ چیر ءَ ءُ وھد ءِ زمہ واریانی سر کنگ ءَ بیت انت-

آپریشن ھیروپ: تاکت ءِ زور

ٹی بی پی شونگال

بلوچ لبریشن آرمی ءَ بلوچستان ءِ گچینی شھراں بلوچ راجی سلاہ بندین جد ءُ جھد ءِ راجدپتر ءَ درستاں مسترین، مھکم ءُ دراجکش تِریں اُرش کتگ، چُشکہ آپریشن ھیروپ ءِ دومی بھر ءِ بھر بیتگ- اے اُرشاں بلوچ لبریشن آرمی ءِ فدائی ونگ مجید بریگیڈ، ءِ پنجاہ فدائیناں بھر زرتگ، چریشی ءَ شش روچاں داں بلوچستان ءَ ریاست ءِ امل داری ءَ املی رنگ ءَ ھلاس کتگ – شش روچاں مھکمیں آپریشن ھیروپ ءِ دومی بھرگ ءَ تچک بیتگ کہ بلوچ لبریشن آرمی بلوچستان ءَ ریاستی رٹ ءَ ھلاس کتگ ءُ کنٹرول کنگ ءِ زور ءَ داشت کنت-

بلوچستان ءِ نَپ ءُ زرکاری درگت ءَ گچینی دوازدہ شھراں پاکستانی پوج ءِ لشکری بنجل، پولیس اسٹیشنز، انٹیلی جنس کارگس ءُ زرکاری بنجلانی سر ءَ ھترناکیں جنگی اُرش کتگ ءُ بلوچ لبریشن آرمی ءَ وتی جنگی زورانی املی پدراھی کتگ ءُ بلوچستان ءَ پاکستانی پوج ءِ بودناکی ھلاس کتگ – بلوچ لبریشن آرمی ءَ اے مھکمیں جنگی اُرشانی سبب ءَ دنیا ءَ را اے کلوہ ھم داتگ بلوچستان ءَ پیسلہ سازیں تاکت بلوچ راجی ادارہ انت ءُ آیانی منگ ءَ ابید نا بلوچستان ءَ زرکاری ممکن ءُ ناکہ بلوچ راج ءِ پیسلہ رد کنگ بیت انت-

بلوچستان ءِ بنجاھی شھر شال ءَ ھوار چین پاکستان ءِ گزرانکی بنجل گوادر ءُ کھنانی میان اُستمانی منسوبہ بندی ریکوڈک ءُ سیندک ءَ ھواریں شھر نوشکی ءُ چاگی ءَ ھزارانی جنگولاں پشت ما پشت ءَ ھترناکیں جنگی کاروائیاں اے راستی لائک انت کہ بلوچ لبریشن آرمی ءِ لشکر کم نہ انت – آیوکیں وھدانی اُرش ایشی ءَ گیش مھکم ءُ ایشی ءَ گیش دراج کش ءُ مزنیں رنگے ءَ بنت انت-

کینیڈا ءِ میان اُستمانی مائننگ کمپنی بیرک گولڈ ءَ بلوچستان ءَ مٹ بوتکیں جاور ءُ گیش بوتگیں پھزداری ءِ ترس ءَ ریکوڈک منسوبہ ءِ دراھیں تک ءُ پھناتانی چار ءُ تپاس ءِ پیسلہ بلوچستان ءِ زمینی جاورانی راستی ءُ بلوچ راجی تاکت ءِ منگ ءِ برابری انت-

سرجمیں بلوچستان ءَ شش روچاں چپ ءُ چاگرداں سانمند کنوکیں ھترناکیں جنگی کاروائیاں تچک بیت انت کہ آیوکیں روچاں پاکستانی پوج ءُ بلوچ جنگولانی میان ءَ ترند ءُ پیسلہ داریں جنگ بنت انت ، ءُ بلوچستان ءَ سیاسی ءُ جنگی نکش ءِ مٹ بوگ ءَ بلوچ لبریشن آرمی ءِ آپریشن ھیروپ ءِ گچینی کرد بیت انت-