دی بگ ویکٹری ، دی گریٹ ٹاسک
نبشتہ کار : مھروز ھمل
دی بلوچستان پوسٹ
دی بگ ویکٹری ، دی گریٹ ٹاسک ویتنام ءِ نامداریں آشوبی جنرل نگوین گیاپ ءِ ھما نوشتانک اِنت کہ آئی ءَ ویتنام ءِ جنگ ءِ میان ءَ وتی آشوبی لیکہ ، چمشانک درشانتگ اَنت۔
اے نوشتانکانی تہ ءَ گیاپ ءَ ویتنامی راج ءِ دیمھونی ، دلیری ءُ دراجکشیں جھد سوبمندی ءِ بنھشت گوشتگ ۔ گیاپ رد ءَ ھر وڑیں آجوئی زرمبشتے بہ بیت آئی ءِ تاکت چہ نوکتریں سلاہ ءُ پوجی ساز ءُ سامان ءَ ناں بلکیں چہ راج ءِ ھمکوپگی اِنت ۔ وھدیکہ راج وتی مولانی سر ءَ باور بہ دار ایت وتی سرڈگار ءِ آجوئی ءِ ھاتر ءَ یکجاہ بہ بیت گڑا مسترین ءَ چہ مستریں تاکت آیاں پروش دات نہ کن اَنت ۔ آئی ءَ ھر مدام ھمے گپ جتگ کہ جنگ ایوک ءَ جنگ ءِ میدان مہ بیت بلکیں سیاسی ،چاگردی ءُ پگری تکاں ھم برجاہ بہ بیت۔
آئی ءَ وتی نوشتانکانی تہ ءَ ویتنامی راج ءِ دیمھونیانی گپ جتگ ءُ ھمے گوشتگ کہ کجام وڑ ءَ دھکانکار، مزدور ، وانندہ ، زالبول ءُ ورنایاں آجوئی جنگ ءَ وتی کرد پیلو کتگ ۔ بازینے ءَ سلاہ چست کتگ ، بازینے ءَ مڈی برتگ ءُ بازینے ءَ زدگ بوتگیں مردمانی کمک کتگ ءُ بازینے ءَ سیاسی زانشت ءَ بھر زرتگ ۔ ھمے وڑ ءَ یک سرجمیں راجے پہ یک مکسدے ءِ ھاتر ءَ یکجاہ بوتگ ۔
گیاپ ھمے لیکہ ءِ سر ءَ بوتگ کہ آشوبی جنگ دراجکشیں املے ۔ مھکمیں زرمبشت اوپار ، راہ ءُ رھبند ، سیاسی زانشت ءُ یکشلیں جھدے ءَ چہ دیم ءَ روت ۔ آئی ءِ رد ءَ سوبمندی ایوک ءَ ایشی ءِ نام نہ اِنت کہ دژمن تو جنگ ءِ میدان ءَ پروش داتگ بلکیں راج ءِ آجوئی ، راجی شان ءُ شرپ ءِ زندگ دارگ ءِ نام سوبمندی اِنت ۔
گیاپ نوشتہ کنت کہ ”راج راجی آجوئی جنگ ءِ بنکی تاکت اِنت “ ۔ اے بس یک سیاسی اوگامے نہ اِنت بلکیں گوستانکی راستی ءُ آشوبی پلسپھے ۔ گوستانک گواہ اِنت کہ ھر ھما وھد ءَ کہ یک راجے ءَ ایردستی ، زوراکی ، لٹ ءُ پل ، یا دری زوراکانی بگیری ءَ جھد کتگ ۔ گڈا آ جھد ءِ راستیں تاکت سلاہ نہ بوتگ انت ، ناکہ مال ءُ مڈی ، بلکیں راج بوتگ ۔ راج ھما سرچمگ اِنت کہ زرمبشتاں زند بکشائیت ۔
گیاپ ءِ رد ءَ یک مھکمیں لشکرے جنگ کت کنت بلے آجوئی جنگ ءِ کٹگ ءَ سرجمیں چاگرد ءِ بھر زورگ المی اِنت ۔ وھدیکہ راجے ءِ ، دھکانکار، مزور ، نودربر ، استاد ، لبزانکار ، شائر ، مات ، گھار ، یک مکسدے ءِ ھاتر ءَ بہ اوشت انت گڑا یک تاکتے جوڑ بنت گڑا ایشی ءِ پروش دیگ ھم گران اِنت ۔ ھمے سوب اِنت کہ ویتنام ءِ جنگ جھان ءِ تاکتورتریں لشکرے ءِ دیم ءَ اَت بلے ویتنامی راج ءِ دیم ءَ آ تاکت ھچے نہ اَت ۔
راجی آجوئی زرمبشتانی تہ ءَ راج ایوک ءَ ھما کچ ءِ نام نہ اِنت بلکیں آ یک زندگیں سسا ، ارادہ ءُ وابے ءِ نام اِنت ۔ وھدیکہ مھلوک وتی سرڈگار ءِ آجوئی ءَ وتی زات ءَ چہ گیشتر ارزشت بہ دنت گڑا دیمھونی دیگ پہ آیاں گرانیں کارے نہ اِنت ۔ آ ھر وڑیں سکی سوری اوپار کن اَنت ، بندیگ بنت ، در پہ دری زند گوازین اَنت ، وتی دوستیگیں مردماں چہ گستا بنت ، ءُ باز براں وتی جانانی دیمھونی ءَ دینت بلے چہ وتی مولاں دزکش نہ بنت ۔
گیاپ ءِ رد ءَ آجوئی جنگ بس توپک ءِ بڈ ءَ کنگ ءُ جنگ کنگ ءِ نام نہ اِنت ، یک دھکانکارے کہ کار کنت ءُ زرمبشت ءِ باسکانی کمک ءَ کنت ، یک ماتے ءِ تہ ءَ وتی زھگ ءِ کربان کنگ ءِ ھوسلہ بیت ، یک استادے کہ نوکیں پدریچ ءِ تہ ءَ زانت سسسا پیداک کنت ءُ یک لبزانکارے کہ چہ وتی ند ءَ راجی مارشت ءَ زندگ دار ایت اے دراہ ھما جنگ ءِ سپاھی انت ، ءُ ھمے وڑ ءَ یک سرجمیں راجے یک تاکتے ءِ تہ ءَ مٹ بیت ۔ گوستانک ءِ آجوئی زرمبشتانی سر ءَ اگاں چمشانک دیگ بہ بیت گڑا اے راستی چد ءُ گیشتر پدر بیت کہ جھان ءِ تہ ءَ ھر کنڈ ءَ کہ آجوئی ءِ ھاتر ءَ جھد کنگ بوتگ گڑا آ داں ھما وھد ءَ سوبمند بوتگ انت وھدیکہ راج آیانی بھر بوتگ انت ۔ وھدیکہ راج چہ زرمبشت ءَ دور بہ بنت گڑا ھما زرمبشت بس لھتے مردمانی یا ٹولیانی بیت بلے وھدیکہ راج آئی ءِ پشت ءَ اوشتوک بہ بیت گڑا آ یک راجی تاکتے جوڑ بیت ۔ گیاپ ءَ مھلوک بس پلامرز نہ لیک اتگ انت آئی ءَ گوشتگ کہ زرمبشت واھند ھمیش اِنت ۔ آئی ءِ نزیک ءَ رھشون ءِ کار اے نہ انت کہ راج ءَ ھکم بہ دنت بلکیں آیانی واھشت ، امیت ، وابانی جھگیری ءَ بہ کنت ۔ ھما رھشون کہ چہ وتی راج ءَ دور بہ بیت آیانی جیڑھاں مہ پھم ایت ، آیانی گپ ءَ گوش مہ دار ایت گڑا آ سوبمند بوت نہ کنت۔ ھمے ھاتر ءَ ھر وڑیں راجی جھدے ءِ بنھشت راج ءُ رھشون ءِ میان ءَ اوست ، نزیکی اِنت ۔ راجی آجوئی ءِ جنگانی تہ ءَ زالبولانی کرد ھم راجی تاکت ءِ بھرے ، مات وتی چکانی ھیلکاری ءَ کن انت ، گھار براتانی ھوسلہ بنت ، جنک دیمھونیانی داستان جوڑ کن انت ۔ ھمے وڑ ءَ آجوئی زرمبشت ایوک ءَ مردینانی جھد نہ بیت بلکیں سرجمیں چاگردے ءِ داستان جوڑ بیت ۔
گیاپ ءِ رد ءَ اے راستے کہ سلاہ ءُ مڈی لشکری تاکت ءِ ھاتر ءَ المی انت بلے راجی پلامرزی ءِ ھمدرور بوت نہ کن اَنت ۔ ھما لشکر ءِ پشت ءَ کہ راج گوں مہ بیت آ دیراں تاں جنگ کرت نہ کنت ۔ وھدیکہ ھما راج ءِ کہ دلانی تہ ءَ آجوئی ءِ واھگ زندگ بہ بیت آئی ءِ گور ءَ سلاہ ءِ توری کمی بہ بیت بلے دراجیں وھدے ءَ تاں وتی گھگیری ءَ برجاہ داشت کنت ۔
راجی آجوئی جنگ راستی ءَ مھلوک ءِ دل ءُ مجگانی جنگ بیت اگاں راج ءِ تہ ءَ امیت ، باور آتک ءُ مول ءِ رژن زندگ بہ بیت گڑا زرمبشت ھم زندگ مان اِیت ۔ بلے اگاں راج ءِ اوست ھلاس بہ بیت گڑا درستاں چہ مستریں تاکتوریں گل نزور تر اِنت ھمے ھاتر ءَ گیاپ راجی زانشت ءَ ھر یک زرمبشتے ءِ درسراں مستریں سرمایہ گوش اِیت ۔ گڑا ما گشت کنیں کہ گیاپ ءِ اے لیکہ ایوک ءَ ویتنام ءَ تاں بندوک نہ اِنت بلکیں درستیں راجی آجوئی زرمبشتانی ھاتر ءَ یک بنکی رھبندے ءِ ارزشت ءَ دار ایت کہ آجوئی جنگانی اسل تاکت راج انت پرچاکہ ھما دیمھونی دینت ، ھما سکی سوریاں اوپار کن اَنت ھما واب گند اَنت ءُ ھما اَنت کہ گوستانک ءِ دیم ءَ مٹ کن اَنت ۔
جنرل ءِ رد ءَ ”ویتنام ءِ سوبمندی ءِ راز راجی گھگیری ، راجکاریں گل ءُ آیانی دلیری ءُ تمردی ءَ اوشتگ انت “ جھان ءِ راجدپتر ءِ تہ ءَ ویتنام ءِ آجوئی جھد یک انچیں داستانے کہ آئی ءَ اے پدر کتگ کہ راجانی تاکت ایوک ءَ سلاہ ، پوجی مڈی یا مالی ھستمندی ءَ چہ نہ اِنت بلکیں آیانی تاکت مھلوک انت ، آیانی راجکاری ءِ سسا ، آیانی گل ءُ مھکمی ءَ گوں اوشتگ ءِ تہ ءَ چیر اِنت ۔ ویتنام ءَ گوں یکے ءَ ناں بلکیں دو مزنیں تاکتانی بگیری ءَ جھد کتگ بلے آکر کار وتی جھد ءَ سوبمند بوتگ اَنت دژمن اِش پروش داتگ ۔ اے سوبمندی ءِ پشت ءَ راجی گھگیری ، مھکمیں راجکاریں گل ءُ آیانی ھوسلہ بوتگ اَنت کہ دژمن ءَ پروش دات نہ کرتگ انت ۔ ویتنامی راج ءَ وتی سرڈگار ایوک ءَ جگراپیائی دمگ ءِ ناں بلکیں وتی پجار ، گوستانک ، راجی شان ءِ چیدگ اِش زانتگ ۔ ھمے سوب اَت وھدیکہ دری زورآورانی بگیری ءَ جھد کہ بندات بوت گڑا اے ایوک ءَ لھتے جنگول یا رھشونانی جنگ نہ اَت بلکیں سرجمیں چاگرد ءِ گھگیری جوڑ بوت ۔ دھکانکاراں وتی زمین جھد ءِ بھر جوڑ کت انت ، نودربراں سیاسی شئور ، زالبولانی بے دروریں دیمھونی ھمے وڑ سرجمیں راج ءِ گھگیری یک تاکتے ءِ تہ ءَ مٹ بوت ۔ ءُ راجی گھگیری ویتنام ءِ سوبمندی ءِ اولی پدیانک ات ۔ اے گھگیری ایوک ءَ جنگ ءِ میدان ءَ تاں نہ اَت بلکیں ھمک روچی زند ءِ ھر تکاں ھست اَت ۔ مردم بازیں جیڑہ ءُ جنجال ، در پہ دری زند ، مالی تنگی ، بازیں ترس ءُ بیھاراں ابید ھم وتی مکسد ءَ دزکش نہ بوت اَنت ۔ آیانی دل ءِ تہ ءَ آجوئی ءِ واھشت انچش مھکم اَت کہ یکشلیں دیمھونیاں پد آیاں وتی منزل نزیک ءَ دیست ۔
دومی چیز راجکاریں گل اَت ۔ ویتنامی رھشون ءَ ایوک ءَ پوج شونداتانی سر ءَ وت ءَ نہ داشت بلکیں راجکاری ءِ سر ءَ دلگوش دات ۔ مھلوک چہ جھد ءِ مول ، راجی آجوئی ارزشت ، وتی زمہ واریانی درگت ءَ سرپد کت اَنت ۔ ھمے راجکاریں گل ءَ ویتنامی زرمبشت درگان درگانی ءَ رکینت ءُ تچکین راہ پیش داشت اَنت ۔ اشی ءِ دگہ نپے ایش اَت کہ مھلوک ءُ رھشونانی میان ءَ اوست اِش پیداک کت ۔ مھلوک ءَ باور اَت کہ آیانی دیمھونی یک مزنیں مولے ءِ ھاتر ءَ اِنت ۔ ویتنام ءِ سوبمندی ھم چہ ھمیشی ءَ اَت کہ آ دلپروش نہ بوت اَنت نہ پرشت انت ۔ مایوسی ءِ آماچ نہ بوت انت ۔ پرچاکہ آجوئی ءِ جھد ارزان نہ انت ءُ ویتنامی راج ءَ بازیں کرنے ءَ تاں جیڑہ ءُ جنجالانی دیمپانی کت بلے آیانی ھوسلہ ءِ تہ ءَ کمی نیاتک ۔ آیانی ھوسلہ ءِ مھکمی اَت کہ جھد ءِ سر ءَ وت ءَ داشت اِش وھدیکہ مڈی کم تر اِت اَنت بلے آ اوشتوک ات اَنت ۔ وھدیکہ جاور نگیگ بوت اَنت بلے پد ءَ ھم آیاں امیت ءِ دامن یل نہ دات ۔ وھدیکہ دیمھونیانی درچ گیش بوت بلے پد ءَ ھم آیانی ھوسلہ نہ پرشت ۔
ویتنامی رھشون گیاپ ءِ یک دگہ نکتھے اے بوتگ کہ ”سامراجی تاکتانی بگیری ءَ جھد ءِ تہ ءَ اوپار ءُ دراجکشیں شوربندی المی انت“ ۔ آئی ءِ نز ءَ آجوئی جنگ انچائیں سنگرے نہ انت یک دو روچ ءَ ، ماہ یا سالانی تہ ءَ جنگ ءَ سوب مند بہ بہ ئے بلکیں اے دراجکشیں گوستانکی کارے کہ راجاں بے کساس دیمھونی دیگ کپ ایت بازیں جنجال ءُ چکاسانی تہ ءَ گوزگ کپ ایت ۔ ھمے سوب اِنت کہ جنرل گیاب ءَ ھر وھد ءَ اے گپ جتگ ”کہ ھر ھما راج کہ اشتاپی کنت گڑا آ گیشتر وتی منزل ءَ سربوگ ءَ ساری دم بارت ، وھدیکہ ھر ھما راج کہ گوں سبر ءُ اوپار ، دورچاری ءَ جھد کنت گڈا الم باج ءَ بارت ءُ سوبمند بیت “.
سامراجی تاکت ایوک ءَ بلاھیں لشکرے ءِ واھند نہ بنت بلکیں آیانی گور ءَ مال ءُ مڈی ، سپارتی واک ، نوکتریں ٹیکنالوجی ءُ آیاں میان استمانی سیاسی پلامرزی ھم گون بیت ۔ اے وڑیں تاکتانی دیم پہ دیمی ءَ اوشتوکیں راج اگاں جزباتی بہ بیت اشتاپ کاری بہ کنت گڑا پہ آئی ءَ دراجکشیں جھد ءِ برجاہ دارگ گران بیت، گیاپ ءِ رد ءَ آجوئی ءِ زرمبشت اشتاپ کاری یا جزباتی ءِ بدل ءَ انچیں شوندات بہ ٹھین اَنت کہ وھد ءِ ھمراھی ءَ وتی تاکت ءِ تہ ءَ ھم گیشی بیار انت ۔ گیاپ ءِ رد ءَ سبر ایوک ءَ ودار ءِ نام نہ انت بلکیں زانشتی ءُ مھکمیں ھوسلہ ءَ گوں اوشتگ ءِ نام اِنت ۔ آجوئی لوٹوکیں راجاں مدامی اے چیز ءِ دیمپانی کنگ کپتگ کہ سوبمندی دور بہ بیت ، مڈی کمے کساس ءَ بہ بنت ءُ دیمھونی دیگ ءِ درچ برجاہ بہ بیت گڑا اے وھد ءَ ھما راج اوشتات کنت کہ آئی ءِ تہ ءَ سبر ءُ اوپار ءِ ھاٹیگ بہ بیت ۔ زرمبشت ءَ لوٹ اِیت کہ وتی لیکہ زندگ بہ دار ایت ، مھلوک ءِ پلامرزی ءَ گوں وت بہ کنت آیوکیں پدریچ ءَ گوں وت ھوار بہ کنت ءُ مٹ بیوکیں جاورانی تہ ءَ وتی شونداتاں دیم ءَ آران بہ کنت ۔ ھمے لیکہ ءِ سر ءَ ویتنام ءِ جھد یک درورے کہ ویتنامی راج ءَ بازیں دھکاں بازیں جیڑہ ءُ زوراکیانی دیمپانی کتگ ۔ میتگ تباہ بوتگ اَنت ، بازیں کھولے سانمند بوتگ مال ءُ دلوتاں تاوان رس اِتگ ءُ بے کساس مردماں دیمھونی داتگ بلے ایشی ءَ ابید ھم آ پدکنز نہ بوتگ انت ۔ آیانی رھشون ءُ راج ءَ ھردوکاں ھمے گپ ءِ سر ءَ ستک بوتگ کہ آجوئی ءِ راہ دراج اِنت، گیاب ءَ اے گپ ھم شری ءَ زانتگ کہ اشتاپ کاری گیشتر زرمبشت ءَ تاوان بار کت کنت، بازیں راج ءِ اشتاپ کاری ءَ انچیں پیسلہ کنت کہ آیانی واستا گیشتر جنجالی پیداک کن اَنت، بلے ایشی ءِ پژدر ءَ دورچاری ءِ شوندات جاوراں شری ءَ ٹپاس اِیت ءُ پہ وھد جوانیں گامگیج زور اِیت ءُ ھمے گامگیج دراجکشیں جھد ءِ سوبمندی ءَ بلاھیں کردے پیلو کن انت ۔ گیاپ ءِ نبشتانکانی یک شکے ایش اِنت کہ ”دراجکشیں جھد ءِ تہ ءَ امیتانی زندگ دارگ المی انت“ ۔ پرچاکہ راج ایوک ءَ گوں سلاھاں ناں بلکیں امیت ءُ ستک ءَ گوں جنگ کنت ۔ آیاں اے گپ ءِ سر ءَ ستک بیت کہ آیانی دیمھونی یک مزنیں مکسدے ءَ اِنت ھمے سسا ءَ آ وتی جھد ءَ برجاہ دار اَنت ءُ ھمے امیت زرمبشتاں چہ پروش ورگ ءِ مارشت ءَ رکین ایت ۔ گیاپ ءِ رد ءَ آجوئی ءِ جنگ یک پدریچے ءِ ناں باز براں اے پدریچ در پدریچ روان کنت ۔ ھمے واست ھر یک پدریچے ءِ زمہ واری اِنت کہ وتی بھر ءِ جھد ءَ بہ کنت پد ءَ ایشی ءَ دومی ءَ سر بہ کنت ھمے درچ زرمبشت ءَ زندگ دار ایت ءُ وھد ءِ ھمراھی ءَ مھکمتر کنت ۔
جنرل گیاپ ءَ وتی نوشتانکانی تہ ءَ اے گپ ھم جتگ کہ ھر وھد ءَ نوکتریں سلاہ ءُ لشکر ءِ شرتری ھم ترا سوبمند کت نہ کن اَنت ۔ اے گمان پوجی پگر ءِ چپ اِنت کہ تاکت ایوک ءَ ٹینک ، ٹوپ ، جھاز ، میزائیل ءُ جنگی ٹیکنالوجی ءَ گوشگ بیت ۔ گیاپ ءِ پگر ھمیشی ءِ درشانی ءَ کنت کہ جنگ ایوک ءَ چہ مشینانی سر ءَ کنگ نہ بیت بلکیں مردم ءُ آیانی ھوسلہ ، آیانی گل ءُ راجکاری سنچ ءَ کٹگ بیت۔ گوستانک ایشی ءِ گواھی ءَ دنت کہ کسان ءُ مھکمیں راجانی دیم ءَ مزن مزنیں تاکت ءُ لشکر ءِ شرتری ءُ گیشی بے سوب بوتگ انت ۔ ایشی ءِ بنکی سوب ھمیش اِنت کہ نوکتر ءُ مزنیں سلاہ ھما وھد ءَ کار دینت وھدیکہ آیانی پشت ءَ مھکمیں راجکاری مول ، مھلوک ءِ پلامرزی ءُ یکشلیں شونداتے بہ بیت ۔ اگاں یک لشکرے ءِ گور ءَ مزن مزنیں سلاہ بہ بنت بلے چہ دمگی مھلوک ءِ پلامرزی ءَ زبھر بہ بیت گڑا آ وت ءَ برجم داشت نہ کنت ۔ گیاپ ءِ رد ءَ وھدیکہ یک راجے وتی مکسد ءَ بندوک بہ بیت ، وتی سرڈگار ءَ وتی پجار بہ زانت ءُ آجوئی ءَ وتی زند ءِ اولی ٹارگٹ بہ لیک ایت گڑا آ ھر تکاں گھگیری ودی کنت ۔ گڑا پد ءَ ھچ وڑیں نوکتریں یا ٹوھیں سلاہ اے گھگیری ءَ ھلاس کت نہ کنت“ ۔ ویتنام ءِ جنگ ھم ھمے لیکہ ءِ درورے کہ اود ءَ جھان ءِ مزنیں لشکر ءِ گوں وتی سلاہ ءُ نوکتریں ٹیکنالوجی ءَ ساڑی اَت بلے ایشی ءَ ابید ھم آئی ءَ دراجیں ءُ دمبرائینوکیں راج ءِ دیمپانی کنگ کپت، ویتنامی راج ءَ گوریلہ جنگ ، راجکاریں گل ءُ مھلوک ءِ پلامرزی ءَ انچیں کارشونی یے وتیگی کت کہ آئی ءَ زوراک پروش دات ۔ گیاپ ءِ رد ءَ لشکری تاکت مھلوک ءَ چہ جتا بہ بیت گڑا آ نزور تر اِیت ءُ ایشی ءِ چپ ءَ زرمبشتے ءَ مھلوک ءِ پلامرزی گون بہ بیت گڑا گوں کمے مڈیاں مزنیں تاکتے ءَ گوں دیم پہ دیم بوت کنت“ ۔ ٹوھیں سلاھاں گوں زمین ءِ سر ءَ ادارکی کبزہ کنگ بیت بلے مردمانی مجگ ءِ سر ءَ سرجمی ءَ کنٹرول کنگ نہ بیت ۔ اگاں مھلوک ءِ تہ ءَ گھگیری ءِ جزبگ زندگ بہ بیت گڑا آ دری تاکتاں وتی زمین ءِ سر ءَ کبزہ کنگ ءَ نیل اَنت ۔
نامداریں آشوبی رھشون جنرل گیاپ ءِ بنکی نکتھے اے ھم بوتگ کہ دری تاکت راجی گھگیری ءِ دیم ءَ الم پروش ور انت “ اے گمان ایوک ءَ پوجی تجزیہ ءِ نہ اِنت بلکیں گوستانک ءِ تجربھانی گچین اِنت کہ چریشی ءَ اے پدر بوتگ کہ ھر وڑیں دری تاکتے ءَ اگاں چیزے وھد ءَ تاں راج ءِ ایردست کتگ بلے یکشل ءَ وتی کبزہ برجاہ داشت نہ کتگ تانکہ راج ءِ پلامرزی گون نہ بوتگ ۔ دری تاکت ھر وھد ءَ لشکری تاکت ، نوکتریں سلاہ ، مال ءُ مڈی ٹیکنالوجی ءِ زور ءَ یک دمگے ءَ مانریتکگ اَنت گڑا بندات ءَ ھمے تاکت ءِ زور ءَ آیاں نپ رس اِتگ بلے وھد ءَ گوزگ ءِ ھمراھی ءَ راستی دیم ءَ آیان بوتگ ۔ ءُ دمگی مھلوک ءَ آیانی تاکت نہ منّ اِتگ ۔ گیاپ ءِ رد ءَ راجی گھگیری ایوک ءَ لھتے مردمانی سلاھبندی کار نہ بنت بلکیں اے سرجمیں چاگرد ءِ مچانکی تاکتے بیت ۔ وھدیکہ یک راجے وتی ھستانک ، وتی زمین ءُ وتی آجوئی ءِ ھاتر ءَ یکجاہ بیت گڑا آ ھر تکاں گھگیری پیداک کنت ۔
گیاپ وتی نوشتانکانی تہ ءَ نبشتہ کنت کہ راجی آجوئی جھد ءِ سوبمندی گوں سیاسی زانشت ، راجی یکمشتی ءُ دیمھونی اِنت “۔ اے ھر سے جتا جتا نہ اَنت بلکیں یکے دومی ءَ گوں بندوک اِنت وھدیکہ ھر سے یکجاہ بہ بنت گڑا راج نہ پروشوکیں تاکتے ءِ تہ ءَ بدل بیت ۔سیاسی زانشت ھر وڑیں زرمبشتے ءِ اولی تک اِنت ، داں ھما وھد ءَ راج وتی ھک ، ایردستی ءُ سیاسی جاورھالاں مہ پھم اِیت آ مھکمیں جھدے ءِ بھر نہ بیت ۔ سیاسی زانشت ھما روژنائی اِنت کہ راج ءَ ھمے مارشت ءَ دنت تو ایردست کنگ بوتگ ئے ترا زوراکی منگی نہ اِنت ترا اے جاور مٹ کنگی اِنت، سیاسی زانشت مردماں ھمے درونت ءَ دنت اے جیڑہ ءُ زوراکی یک نزامے ءِ بھر اِنت ءُ ایشانی گیشگیواری ءُ رکگ ءَ یکمشتی ءَ جھد کنگی اِنت ۔ دومی جنرل راجی یکمشتی ءِ گپ ءَ جنت ھمے گوش اِیت کہ ھر وڑیں زرمبشت ھما وھد ءَ سوبمند بوت کنت وھدیکہ چاگرد وتی تہ ءُ توکی جیڑھاں یک کر کنت یک مکسدے ءِ( مولے) ءِ ھاتر ءَ یکجاہ بیت ۔ گیاپ ءِ رد ءَ ویتنام ءِ سوبمندی ءِ یک سوبے ھمے بوتگ کہ ھر تکاں سیادی داروکیں مردم یکجاہ بوتگ انت ۔ دھکانکار ، مزور ، نودربر ، زالبول ءُ زانتکار درستاں وتی وتی پڑ ءَ جھد ءِ تہ ءَ بھر زرتگ ءُ ھمے یکجاھی انچیں تاکتے جوڑ بوتگ کہ دری تاکت ءُ زوراک چہ وتی زمین ءَ در کتگ اَنت، سیمی آئی ءَ دیمھونی گپ جتگ ۔ ھر وڑیں آجوئی زرمبشتاں دیمھونی ءِ کچءُ کساس چارگ نہ بیت ءُ ایوک ءَ جان ءِ کربانی دیگی نہ انت بلکیں وتی وھد ، مڈی ، آسودگی ، زاتی نپ ھم کربان کنگی اَنت ۔ گیاپ ءِ رد ءَ ھر ھما راج کہ دیمھونی دیگ ءَ چک ءُ پد بہ بیت گڑا آ مسترین ءَ چہ مستریں جھد ءَ ھم برجاہ داشت نہ کنت.“ ویتنام ءِ جھد ءَ اے ھر سے گندگ ءَ کاینت سیاسی زانشت ءَ راج ءِ تہ ءَ بیداری پیداک کتگ ، راجی یکمشتی ءَ آ دراہ یکیں لڑ ءِ تہ ءَ آؤرتگ اَنت ءُ دیمھونی ءَ آیانی ءَ جھد مھکمتر کنان کتگ کہ گڈسر ءَ آ یک مزنیں سامراجی تاکتے ءِ بگیری ءَ وتی جنگ ءَ سوبمند بوتگ اَنت ءُ دژمن اِش پروش داتگ ۔ گیاپ ءِ پگر ءَ ما ھمے دربرت کنیں کہ ھر وڑیں راجے بہ بیت ایوک ءَ سلاہ ءُ دری کمک ءَ آجوئی گپت نہ کنت تانکہ راج وت وتی ھکاں مہ مار اِیت ءُ یکجاہ مہ بیت ءُ دیمھونی دیگ ءَ چک ءُ پد مہ بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-