ھُزدار، گوادر ءُ ڈیرہ بگٹی ءَ دگہ سے مردم آوار جنگ ءُ بیگواہ کنگ بیتگ اَنت وھدے کہ بیگواھیں مردمے یل بیگ ءَ پد بیران بیتگ-
گیشیں ھالانی رِد ءَ ھُزدار ءِ دمگ چہ نال ءَ سی ءُ ھپت سالی ئیں عبدالواحد ء نثار محمد کہ یک تاجرے ھشت جولائی 2026 سُھب کساس 8:30 ءَ ایف سی کارندھاں آوار جنگ ءَ پد ناشناسیں جاھے ءَ برتگ- آئی ءِ کھول رِد ءَ وئیل ءَ پد آئی ءِ درگت ءَ ھچ وڑیں ھال نیست-
وھدے کہ شوکت ء حسین کہ یک تاجرے، اے ھم ھشت جولائی 2026 ءَ سھب ھشت ءُ نیم ءَ چہ نال ءَ ایف سی ءِ کارندھاں آوار جتگ ءُ بیگواہ کتگ-
دومی نیمگ ءَ گوادر ءِ دمگ چہ جیونی ءَ بیست چار سالی ئیں انس دیدگ ء اسحاق ھم یک تاجرے کہ چار جولائی 2026 ءِ شپ کساس یک ءَ آئی ءِ دمگ ملٹری انٹیلی جنس ءُ پوج ءِ کارندھاں آوار جنگ ءَ پد بیگواہ کتگ- کھول ءِ رِد ءَ بیگواھی ءَ پد آئی ءِ درگت ءَ ھچ وڑیں ھال نیست-
ھمے وڑ ڈیرہ بگٹی ءِ جھمنند ریاض ء ساجن بگٹی کھول ءِ گوشگ اِنت کہ ریاض ھمے سال دوازدہ جون ءَ سی ٹی ڈی ءِ ایس ایچ او عمر کھوسہ ءَ آئی ءِ لوگ سر ءَ بیڑبرتگ زورانسری بیگواہ کتگ، زر لوٹ اِتگ ءُ بے کساس لَٹ ءُ کُٹانی نشانگ کتگ – کھول ءِ رِد ءَ ریاض مروچی کراچی ءِ یک پرائیوٹ ھسپتالے ءَ بیران بیتگ-
دمگی مردمانی رِد ءَ سی ٹی ڈی ھمکروچ سرفراز بگٹی ءِ سیاسی ھلاپیں لوگانی سر ءَ بیڑ بارت آیاں زورانسری بیگواہ کنت ءُ بازیں زرانی لوٹگ ءَ بلے ھکومت بیھار ءِ سوب ءَ اے وڑیں وئیل نکش نہ بنت-
دمگی مردماں دیمتر ءَ گوشتگ کہ اے وھد ءَ ھم ڈیرہ بگٹی ءَ باز مردم سی ٹی ڈی ءِ دست ءَ اَنت ءُ آیانی زند ءِ ھترہ اِنت-