TBP Balochi

بلوچستان ءِ دمگ چہ مستونگ ءُ پنجگور ءَ پاکستانی پوج ءِ دست ءَ یکے بیگواہ کنگ بیتگ ءُ یکے چہ پنجگور ءَ آجو بیتگ-

کھول گْوشگ رِد ءَ غلام حیدر ء کرم خان نیچاری جھمنند کوھک مستونگ دہ ستمبر ءَ پاکستانی پوج ءَ لوگ سر ءَ بیڑبرتگ ءُ لَٹ کُٹ ءَ پد وتی ھمراھی ءَ برتگ کہ انگت بیگواہ ءَ اِنت-

ھمے وڑ ھژدہ جنوری 2019 ءَ چہ کراچی پاکستانی پوج ءِ دست ءَ آوار جنگ بیتگیں پنجگور ءِ جھمنند یوسپ بلوچ ء ٹھیکدار شھید یونس آجو بوتگ ءُ وتی لوگ ءَ سر بیتگ-

کھول رِد ءَ دْراھیں مَدتے ءِ بیگواھی ءَ پد آ آجو بیتگ-

ایشیاء کرکٹ کپ ءَ انڈیا ءَ جوانی ءَ گوازی کنان ءَ 357 رنانی ٹارگٹ ایر کتگ کہ ٹارگٹ ءِ پروشگ ءَ پہ پاکستان ءِ سرجمیں لیبیاں بس یکسد ءُ بیست ءُ ھشت رن جوڈ کتگ ءُ دراہ آؤٹ بوتگ انت ـ کپٹن بابر آعظم ءَ ھوار پاکستان ءِ ایندگہ لیبیاں ھچ وڈ ءَ مزنیں اسکور جوڈ کتگ نہ کتگ –

انڈیا ءِ سوبمندتریں بالر کلدیپ یادو بوتگ کہ آئی ءَ ھشت اوورانی تہ ءَ بیست ءُ پنچ رن داتگ ءُ پاکستان ءِ پنج لیبی واپس دیم داتگ انت –

کولمبو بوتگیں گوازی ءَ انڈیا ءَ اولسر ءَ بیٹنگ کنان ءَ دو وکٹانی تاوان ءَ سَے سد ءُ پنجاہ ءُ شش رن جوڈ کتگ کہ پاکستانیاں سِی ءُ دو اووراں بس یکسد ءُ بیست ءُ ھشت رن جوڈ کتگ –

اے گوازی ءَ پاکستان ءِ بس چار لیبی ڈبل فگر جوڈ کت کتگ، فخر زمان ءَ بیست ءُ ھپت رن جوڈ کتگ، افتخار احمد ءُ آغا سلیمان ءَ بیست ءُ سَے ءُ بیست ءُ سَے جوڈ کتگ ءُ آیانی تہ ءَ کپٹن کپٹن بابر آعظم ءَ بس دھ رن جوڈ کتگ کہ آ پانڈیا ءَ آؤٹ کتگ –

بھارت ءِ نیمگ ءَ بنداتی چار بیٹس میناں جوانیں گوازی پیش داشتگ – کہ آیانی تہ ءَ شبھمن گل ءَ پنجاہ ءُ ھشت رن جوڈ کتگ ءُ کپٹن روہت شرما ءَ ھم جوانی ءَ پنجاہ ءُ شش رن جوڈ کتگ –

ھمے وڈ ویرات کوہلی ءَ سنچری کتگ ءُ یکسد ءُ بیست ءُ دو رن جوڈ کتگ ءُ ناٹ آؤٹ بوتگ ءُ کے ایل راہول ءَ ھم سنچری کتگ ءُ یکسد ءُ یازدہ رن جوڈ کتگ – پاکستان ءِ نیمگ ءَ شاداب خان ءُ شاہین آفریدی جوڈ بوتگ انت کہ آیاں یک یک وکٹ ءِ گپتگ –

بلوچستان لبریشن فرنٹ ءِ جارکش میجر گوھرام بلوچ ءَ چاگردی ترامجاہ ٹیلی گرام ءَ شنگ کتگیں درشان ءِ تہ ءَ گوشتگ کہ سرمچاراں گل ءِ اھوتی ھالے ءِ سر بیگ ءِ بنیاد ءَ کار کُرتگ ءُ پاکستانی لشکر ءِ چریک سناء اللہ دیدگ پنام گرنیڈ ء نسرت اللہ‘ ءِ سر ءَ اُرش کُرتگ ءُ کُشتگ۔

جارکش ءَ گوشتگ سناء اللہ پنام گرنیڈ پیش ءَ یک بلوچ آجوئی دوستیں سلاہ بندیں گلے ءِ باسک بیتگ بلے دُژمن ءِ دیم ءَ سلاہ ءِ چگل دیگ ءَ پد راجدروھی کاراں ھوار بیتگ۔گْوستگیں سال ءَ ھم سرمچاراں نشانگ کُرتگ اَت بلے انگت چہ وتی ردیں کاراں دزکش نہ بوت۔

آئی ءَ گوشتگ دیر اِنت کہ اے مردم ءِ کارانی سر ءَ پر بی ایل ایپ ءِ سرمچارانی چم سَک بیتگ اَنت،سرمچاراں شمبے نوہ سمبر ءَ کیچ ءِ ھند دشت ءَ شئے زنگی ءُ جنگل بازار ءِ میانجی ءَ تیر جتگ ءُ کُشتگ۔آ چہ پاکستانی لشکر ءِ بُنجل ءَ گند ءُ نند کنگ ءَ پد واتر چہ تربت ءَ دشت ءَ آھگ ءَ بیتگ۔

جارکش ءَ گوشتگ سناء اللہ ءِ بابت ءَ گل ءَ پٹ ءُ پول کُرتگ کہ آ میاربار بیتگ، چہ ایشی ءَ راجی میاربارے لیکگ ءُ آئی ءِ بگیری ءَ کار کنگ ءِ شور کنگ بیتگ۔مدام سلاہ بند بیتگ ءُ سرمچارانی بگیری ءَ پاکستانی لشکر ءِ لشکرکشی ءُ کاراں ھوار بیتگ۔ سیاھجی ءُ مزن بند ءَ پاکستانی لشکر ءِ لشکرکشیاں گندگ بیتگ، سرمچارانی اوتاگاں اُرش کنگ ءِ میان ءَ آ راجی مڈیانی لُٹ ءُ پُل کنگ ءُ ماندارگ  ءَ ھوار بیتگ۔ آئی ءَ وتی تامُربند ءُ اکس مردماں پیش داشتگ اَنت ءُ ناز کُرتگ۔

آئی ءَ گوشتگ پہ پاکستانی لشکر ءِ آسراتی ءَ چاریگی ءُ جنگی پِڑ ءَ جنگ کنگ ءَ ابید سناء اللہ چاگردی دگہ سلکاریاں ھوار بیتگ۔منشیات ءِ کاروبار ءُ بلوچ شھیدانی مانشانی کم منگِھ کنگ ءِ میار آئی ءِ سر ءَ سابت بیتگ۔

جارکش ءَ گوشتگ شھید ابداللہ ء رسول بکش جھمنند جمک ءِ شھید کنگ ءُ بلوچ راجی آجوئی ءِ باسکانی زور بیگواہ کنگ ءَ ھوار بیتگ۔ پِدائی شھید نوید (اسلم) ءِ جنازہ ءِ نماز ءِ سر ءَ پہ مردمانی نشان کنگ اتکگ ءُ  پاکستانی لشکر ءِ نیمگ ءَ سرمچارانی بگیری ءَ کارانی بھر بیگ ءِ میار ءَ گل ءِ شورانی بنیاد ءَ کُشگ بیتگ۔

میجر گوھرام بلوچ ءَ گوشتگ دگہ یک اُرشے ءَ بلوچستان لبریشن فرنٹ ءِ سرمچاراں 10 ستمبر ءَ یکشمبے ءِ روچ ءِ سَے ءَ وتگڑیں سیمسر (گولڈسمتھ) ٹٹ ءِ پھریزگ ءَ برجاھیں پاکستانی لشکر ءِ پانگس ءِ سر ءَ اُرش کُرتگ ءُ زروگریں پاکستانی لشکر ءِ یک کارمندے کُشتگ۔

آئی ءَ سرمچاراں کیچ ءِ ھند مند ءَ ھمزھی ءِ بند ءَ کاسگانی کور ءَ برجاھیں پاکستانی لشکر ءِ پانگس ءِ سر ءَ گوں اسنائپر توپک ءَ نشانگ کُرتگ ءُ یک کارمندے کُشتگ۔

جارکش ءَ گوشتگ بلوچستان لبریشن فرنٹ ریاست ءِ چریک ءُ دُژمنیں لشکر ءِ کارمند ءِ کوش ءِ زمہ واری ءَ منّ ایت ءُ بلوچ راج، چاگرد ءُ آجوئی زْرمبشت ءِ بگیری ءَ پُرکاریں ریاست ءِ دُرسیں چریکاں کڈن کنت کہ شَر بہ بنت۔بی ایل ایف بلوچ راجی سیتانی پھریزگ ءَ چوشیں مردمانی گرگ ءُ سزا دیگ ءَ برجاہ دار ایت۔

بلوچستان ءِ بنجاھی شھر شال، کیچ،ھزدار ءُ گوادر ءَ تیرگواری ءُ دگہ وئیلاں پنچ مردم بیران بیتگ اَنت-

گیشیں اھوالانی رد ءَ کیچ ءِ دمگ مند سورو ءَ تپر ءِ گون ءَ یک مردمے ءَ شکیل مراد نامیں مردمے کُشتگ-

کُشگ بیتگیں مردم ءِ سیادی مند ءِ ھند ھوزئی ءَ اِنت-

چہ ھزدار ءَ اھوال اَنت کہ زھری ءَ تیرگواری ءَ یک مردمے بیران بیتگ –

تیرگواری ءِ وئیل ءِ زمین ءِ جیڑہ ءِ سر ءَ بیتگ کہ اود ءَ مشک سرآپ ءِ ھند ءَ لھڑی ٹک ءِ دو ٹولیانی میان ءَ زمین ءِ جیڑہ ءِ سر ءَ تیرگواری کنگ بیتگ ءُ چریشی ءَ چہ عزیز اللہ ء شاہ مراد بیران بیتگ-

ھمے وڑ ءَ شال ءِ دمگ کیچی بیگ ءَ شھید چوک اسٹریٹ ءَ ناشناسیں مردمانی تیرگواری ءَ یک مردمے بیران بیتگ-

دومی نیمگ ءَ چہ گوادر ءَ یک لاشے دزکپتگ –

اھوالانی رد ءَ گوادر میرین ڈرائیو ءَ پدی زر ءَ یک مردمے ءِ لاش دزکپتگ کہ آئی ءِ پجار مھمد بخش ء حسین ءِ نام ءَ زانگ بیتگ ءُ مجاھد واڑ گوادر ءِ جھمنند گوشگ بوگ ءَ اِنت-

بلوچستان ءِ دمگ ڈیرہ بگٹی ءِ ھند زین کوہ ءَ گیس ویل نمبر شش ءُ نُھ ءِ دو گیا پائپ لائن مروچی سھب ءَ تراکناکیں شورواں گوں ناشناسیں مردماں نشانگ کتگ ءُ چریشی ءَ پد گیس ءِ سپلائی مھتل بیتگ-

دومی نیمگ ءَ زین کوہ ءِ دو جاھاں پوج ءِ سر ءَ ناسرجمیں اھوالانی رد ءَ ھم تراکانی اھوال بیتگ اَنت-

ھالانی تہ ءَ گوشگ بیتگ کہ یک تراکے ءَ پوجی گاڑی نشانگ کنگ بیتگ ءُ گاڑی ءَ تاوان بیتگ ءُ دومی تراک ھما وھد ءَ بیتگ کہ پوج پند ءَ روگ ءَ بیتگ ءُ چریشی ءَ چہ پوج نشانگ کنگ بیتگ-

ھردوکیں اُرشاں پوج ءَ جانی ءُ مالی تاوانانی ھال ھست اِنت بلے داں انگت ءَ اے اُرشانی زمہ واری ھچ کس ءَ پہ وت ءَ نہ زرتگ-

بلوچ لبریشن ٹائیگرز ءِ جارکش میران بلوچ ءَ رسانکدر ءَ شنگ کتگیں یک درشانے ءِ تہ ءَ گْوشتگ کہ گوستگیں روچ ءَ بلوچ سرمچاراں ڈیرہ بگٹی ءِ دمگ سوئی ءِ ھند گو ءَ یک بیڑے ءَ آئی ایس آئی ءِ شش چاریگ دزگیر کتگ اَنت – اے سرجمیں مردم تچکی ءَ پاکستان ءِ سلکاریں چیریں ادارہ آئی ایس آئی ءِ ھاتر ءَ کار کنگ ءَ بیتگ اَنت- دزگیریں چاریگانی تہ ءَ یکے ءِ برات آئی ایس آئی ءِ کیپٹنے ءُ یکے ءِ برات آئی ایس آئی ءُ جھلی اپیسرے-

جارکش ءَ گوشتگ کہ رسانکدر ءَ اشاں پُٹبالر پیشدارگ ءَ اَنت بلے اِش آئی ایس آئی ءِ پُرکاریں چاریگ اَنت کہ ڈیرہ بگٹی ءَ بے میاریں مردماں چست کنائینگ ءُ شھید کنائینگ ءَ تچکی ءَ ھوار اَنت-

میران بلوچ ءَ گْوشتگ کہ دہ ستمبر ءِ سُھب ءَ پاکستانی پوج ءَ زین کوہ، سوئی ءُ اُوچ ءِ کش گوریں دمگاں مزنیں کچے ءَ لشکر کشی بندات کتگ کہ سرجمیں روچ ءَ برجاہ بیتگ- زین کوہ ءِ کوھی دمگ ءَ پاکستانی پوج ءِ کارندھانی سر ءَ بی ایل ٹی ءِ سرمچاراں ھما وھد ءَ اُرش کتگ وھدے آ لشکر کشی ءَ دلگوش بوتگ اَنت پوج ءِ بازیں کارندھے کُشتگ ءُ ٹپی کتگ اَنت وھدے کہ اے جنگ ءُ چوپ ءَ پاکستان پوج ءِ سے بمب اتم گواریں بالگردانی کُمک ھم گون بیتگ ءُ اشانی تہ ءَ یکے سرمچاراں نشانگ کتگ ءُ آئی ءِ درگت ءَ ھال اِنت کہ آ سوئی ءِ بُنجل ءَ سر بوگ ءَ ساری کپتگ ءُ تباہ بوتگ-

بی ایل ٹی ءِ جارکش گوشگ اِنت کہ یکجاھی ھساب ءَ اے لشکر کشی ءَ ھشت بمب گواریں بالگرد بھر زورگ ءَ اَنت کہ آیاں مزنیں کچے ءَ کارندہ جتاجتائیں دمگاں ایر گپتگ اَنت ءُ اے وھد ءَ اے دمگاں ساڑی اَنت-

آئی ءِ گْوشگ اِنت کہ ھما جاگھاں لشکر کشی کنگ بوگ ءَ اِنت اے جاھانی سر ءَ بی ایل ٹی ءِ نیمگ ءَ تیاری کنگ بیتگ ءُ دُژمنیں لشکر ھرچ وڑیں پیشگامی ءِ پسّہ دیگ بیت-

سر بیتگیں اھوالانی رد ءَ ایرانی آمیدگس ءِ ھکم ءَ روکپتی بلوچستان ءَ دگہ یک بندیگیں مردمے پاھو دیگ بیتگ-

پاھو دیگ بیتگیں مردم ءِ پجار بیست ءُ سَے سالی ئیں سعید سنجرانی ء حنیف جھمنند زاھدان ءِ نام ءَ زانگ بیتگ –

سعید سنجرانی گوستگیں روچ ءَ بیرجند ءِ زندان ءَ پاھو دیگ بیتگ –

سعید سنجرانی ایرانی سال 1399 ءَ ماں نشہ باپاری ءِ بھتام ءَ دزگیر کنگ بیتگ ءُ چریشی ءَ پد آئی ءِ سر ءَ ایرانی انکلابی آمیدگس ءَ پاھو دیگ ءِ ھکم داتگ بیتگ-

روکپتی بلوچستان ءَ گوستگیں روچانی توک ءَ اے چارومی مردم اِنت کہ پاھو دیگ بوگ ءَ اِنت کہ چِد ءُ پیسری روچ ءَ زاھدان ءِ زندان ءَ سَے کس پاھو دیگ بیتگ اَنت کہ آیانی توک ءَ دو کسانی پجار نہ بیتگ اَنت بلے یکے ءِ پجار مھمد ناروی ءِ نام ءَ زانگ بیتگ ات کہ آ زاھدان ءِ جھمنند ات-

بلوچستان ءِ دمگ ڈیرہ بگٹی ءِ جتاجتائیں دمگاں لشکر کشی برجاہ، ھالانی رِد ءَ تھسیل سوئی ءَ چہ پاکستانی لشکر ءَ دگہ چار مردم زورانسری آوار جنگ ءَ پد بیگواہ کتگ، آیانی پجّار لوٹا بگٹی ءُ آئی ءِ برات دین مھمد ء جوانسال بگٹی ، شریپ ء گوس بگٹی ءُ پاروک ء ابراھیم بگٹی ناماں چہ بیتگ-

ھمے وڑ پنچمی ءِ حاجی میاں خان ء صالح بگٹی کہ عدل خان کالونی ءِ جھمنند اِنت ءُ پی پی ایل شرکت ءِ کاردار ءِ مروچی سُھب ءَ پاکستانی پوج ءَ آوار جتگ ءُ گوں دگرانی ھمراھی بیگواہ کتگ اَنت-

زانگ بہ بیت کہ ڈیرہ بگٹی ءَ مزنیں کچے ءَ لشکر کشی برجاہ ءَ اِنت ، وھدے کہ جتاجتائیں دمگاں پوج ءُ سلاہ بندیں مردمانی میان ءَ جنگ ءُ چوپ ءِ ھم ھال اِنت-

دمگی مردمانی گْوشگ رِد ءَ کہ سُھب ءَ چہ بُرز ءَ بمب گواریں بالگردانی بال بُرزی ھم برجاہ ءَ اِنت ءُ بازیں دمگان لوگانی سر ءَ بمبگواری کتگ ءُ نشانگ کتگ اَنت، چریشی ءِ آسر ءَ جانی تاوان ءِ ھال اِنت-

بلے انگت سرکاری واکدارانی نیمگ اے درگت ءَ درشان شنگ نہ کتگ بلے دومی نیمگ ءَ پاکستان ءِ نگران وزیر داخلہ سرفراز بگٹی ءَ یک درشانے ءِ تہ ءَ گوشتگ کہ ما اے لشکر کشی شش ایں پُٹبالر لیبیانی یل کنائینگ ءِ ھاتر ءَ بندات کتگ-

بلوچ لبریشن ٹائیگرز ءِ جارکش میران بلوچ ءَ رسانکدراں وتی شنگ کرتگیں کسانیں درشانے ءِ تہ ءَ گوشتگ کہ ڈیرہ بگٹی ءِ دمگ زین کوہ، سوئی ءُ ڈیرہ بگٹی ءِ شھر ءَ اے وھدی پاکستانی پوج ءِ شست گاڑیانی کاروان ھمراھے شش بالگرد ءَ مانریتکگ ءُ لشکر کشی ءَ انت –

بی ایل ٹی ءِ جارکش ءَ گوشتگ کہ جتا جتائیں جاھاں بی ایل ٹی ءِ سلاہ بندانی میڑ گوں آیاں برجاہ انت، سرجمیں ھال دیمتر ءَ رسانکدر ءَ.شنگ کنگ بنت –

دومی نیمگ ءَ پاکستان ءِ نگران وزیر داخلہ ءَ لشکر کشی ءِ ھبر راست کتگ ءُ ٹاہ داتگ چہ ڈیرہ بگٹی ءَ آوار جنگ بوتگیں شش فٹبال ءِ لیبیانی یل کنائینگ ءَ لشکر کشی کنگ بوگ ءَ انت –

آئی ءَ گوشتگ کہ ڈیرہ بگٹی ءِ دمگ سوئی ءَ آوار جنگ بوتگیں یل کنائینگے کوشست ءَ کنگ ءَ انت –

آئی ءَ گوشتگ کہ سرجمیں دمگ انگر ءَ کتگ آوار جنگ بوتگیں مردمانی ھاتر ءَ لشکر کشی بوگ ءَ انت ءُ گوستگیں روچ ءَ پھازگی ادارہ ھکم دیگ بوتگ انت کہ آیانی یل کنائینگ ءَ گامگیج بہ زور انت –

وھدیکہ بلوچ ریپبلکن پاٹی ءِ جارکش شیر محمد بگٹی ءَ چاگردی ترامجاہ ایکس ءِ تہ ءَ نبشتگ کہ پاکستانی پوج ءَ ڈیرہ بگٹی ءِ دمگ سوئی ءُ اُچ ءِ دمگ گنڈوئی، سوناری مٹ، سردار پتی، بشک، ڈیم ءُ لگڑ داون ءَ پوج ءَ مزنیں کچے ءَ لشکر کشی بندات کت ءُ جنگی بالگرد اے ھند ءُ دمگاں بمبگواری کنگ ءَ انت –

دومی نیمگ ءَ اھوالکارانی گوشگ انت کہ ڈیرہ بگٹی ءِ دمگ سوئی ءِ نزیک ءَ بلوچ سرمچار ءُ پاکستانی پوج ءِ میان ءَ ترندیں میڑ ھال آیگ ءَ انت –

روکپتی بلوچستان ءِ جتا جتائیں ھنداں جتا جتائیں وئیلاں سَے مردم بیران بیتگ اَنت ءُ یکے زدگ بیتگ-

گیشیں اھوالانی رد ءَ روکپتی بلوچستان ءِ دمگ دلگان ءَ ناشناسیں مردماں یک مردمے کارچ جتگ ءُ کشتگ-

اھوالانی رد ءَ ناشناسیں مردماں دلگان ءَ بیست ءُ دو سالی ئیں مسعود ھوتی ء شاہ دوست کارچ جتگ ءُ زدگ کتگ بیتگ کہ آ زدگیں جاوراں ایرانشھر ءِ نادراہ جاہ ءَ برگ بیتگ ءُ آئی ءَ اود ءَ وتی ساہ داتگ اَنت-

ھمے وڑ ءَ روکپتی بلوچستان ءِ دمگ دوست مھمد بازار ءَ ایرانی لشکر ءَ یک کشین گاڑی ءِ سر ءَ تیرگواری کتگ ءُ چریشی ءَ یک مردمے بیران بیتگ-

بیران بیتگیں مردم ءِ پجار علی سوپی ءِ نام ءَ زانگ بیتگ کہ آ ایرانی لشکر ءَ تیرگواری کتگ ءُ چریشی ءَ چہ آ بیران بیتگ-

ھمے وڑ ءَ سراوان ءَ دگ ءِ وئیل ءَ یک تیل کشے بیران ءُ یکے زدگ بیتگ-

بیران بیتگیں مردم ءِ پجار مھسن توتازئی ء اسلام ءُ زدگ بیتگین ءِ پجار مھدی توتازئی جھمنند کریم آباد زاھدان ءِ ناماں زانگ بیتگ اَنت-

روکپتی بلوچستان ءَ ھمک روچی ئیں نہ اوشتوکیں وئیلاں بازیں ھسابے ءَ مردمانی جان ءُ ساہ روگ ءَ اَنت بلے اے درگت ءَ سرکاری تکاں گامگیج زورگ ءَ ھچ پیم ءَ گندگ بوگ ءَ نہ اَنت-