کتاب چائینیز کمیونسٹ پاٹی ءِ وانگ چنکس ارزشت دار انت گوں چیئرمین زرین ءَ جُست
ٹی بی پی گچینی: مھروز ھمل
ھر ھما راج کہ وتی تجربگاں ھوار ھوار جھان ءِ اے دگہ راجانی راجکاری ، چاگردی ءُ آشوبی تجربگاں وان اِیت گڑا آ وتی سپر ءِ تہ ءَ گیشتر لیکھی پھتو بیت اِنت ۔ ھمے سوب اِنت کہ جھان ءِ مزن مزنیں راجی ءُ آجوئی زرمبشتاں ھرمدام وانگ ، پولکاری ءُ لیکھی باوست وتی جھد ءِ المی بھر ءِ جوڑ کتگ ۔چئیرمین زرین بلوچ ءَ ھمے پگری دود دیم ءَ بران کتگ ”چائنیز کمیونسٹ پاٹی “ بنگپ ءِ سر ءَ یک جوانیں کتابکے نبشتگ کہ آ ایوک ءَ یک راجکاریں پاٹی ءِ گوستانک نہ اِنت بلکیں بستمی کرن ءِ یک مزنیں راجدپتری بدلی ءِ دربرگ اِنت ۔
اگاں ما بچار ایں گڑا بلوچی زبان ءِ تہ ءَ میان استمانی گوستانک ، راجکاری پلسپہ ، دگہ بازیں آشوبی زرمبشتانی سر ءَ کتاب ءِ باز کمی اِنت ۔ اے وڑیں جاورانی تہ ءَ چئیرمین زرین ءِ اے کتابک ارزشت دار ءُ ستا کرز اِیت. آئی ءِ ارزشت ایوک ءَ اے نہ اِنت کہ آئی ءِ تہ ءَ چین کمیونسٹ پاٹی ءِ گوستانک نبیسگ بوتگ بلکیں اے بلوچ وانوکاں جھانی راجکاری گوستانک ءِ درگت ءَ سرپدی دنت کہ آئی ءَ سرجمیں جھان ءِ راجکاری سر ءَ مزنیں سانے دور داتگ ۔
کتاب ءِ نبشتہ کار ءَ سرتاک ءِ سر ءَ ایش ھم نبشتگ کہ ”اے کتابک مانا ءُ مراد اے نہ اِنت کہ ھستیں دور ءُ زمانگاں چینی کمیونسٹ پاٹی ءِ ماڈل ءُ ترز ءُ کار بلوچ ءِ گیگانی ءَ بگر اَنت یا ما بلوچ راجی زرمبشت ءَ سوشلسٹ رھبند ، لیکہ ءِ بنیاد ءَ دیم ءَ بہ جنزین ایں ۔ بلے سی سی پی ءِ آورتگیں آشوب ناں تھنا تاکت ءِ بنزہ ءَ مٹ کنت بلکیں سرجمیں چینی چاگرد ءِ مٹینگ ءَ سوبمند بیت ۔سامراجی ایردستی ءِ ھنڈالاں گوج اِیت “ ۔ چریشی ءَ اے گپ تچک بیت کہ ندکار ءِ مانا ءُ مول ھمیش اِنت کہ بلوچ ورنا جھان ءِ مزن مزنیں راجی ءُ انکلابی زرمبشتاں بہ وان اَنت ۔ آیانی گوستانکی تجربگ ، سوبمندی ، بے سوبی ، گلی بودشت ، مھلوک ءِ کرد ءُ راجکاری شوربندیاں بہ پھم اَنت ءُ بلوچ ورنا بس ھما رزلٹ ءَ مہ چار اَنت بلکیں ھما سوبمندی ءِ سر بیگے ءِ ھاتر ءَ دراج ءُ گرانیں سپر ءَ بہ پھم اَنت ۔
ھر ھما وھد ءَ کہ ندکار دگہ راجے ءِ زبان ءِ اے وڑیں لیکھی نکاناں وتی زبان ءَ ترین اِیت منی نز ءَ آ زانت ءُ زانشت ءِ نوکیں درے پچ کنت ۔ ”چائنیز کمیونسٹ پارٹی “ ءِ کتابک ارزشت داریں زانشتی جھدے ، کہ وانوکاں چین ءِ راجکاری راجدپتر ، کمیونسٹ پاٹی ءِ ردوم ءُ آئی ءِ لیکھی پژدر ءَ پھمینگ ءِ جھد ءَ کنت ۔
اے وڑیں کتاب یا کتابک ایوک ءَ اے واستا ھم ارزشت دار نہ اِنت کہ آ جھان ءِ مزنیں پاٹی ءِ گوستانک، لیکہ ءُ گل ءِ ردوم ءِ سر ءَ چمشانک دے اَنت بلکیں اے واستا کہ وانوکاں استان ،گل سازی ، راجکاری ، آشوبی جھد ءُ راجی دیمروئی، یکمشتی ءِ جھد ءُ چاگردی مٹی ءِ وڑیں لڑانی سر ءَ زانگ ءُ پھمگ ءِ سکین ءَ دنت ۔ ءُ اے وڑیں کتاب ھما وانوک ءَ ارزشت دار اَنت کہ جھان ءِ راجکاری گوستانک، آشوبی زرمبشت ءُ راجی دیمروی ءَ پھمگ لوٹ اَنت اے وڑیں نکانانی بلوچی ءِ تہ ءَ مٹ جوانیں گامگیجے ۔
ھر زانتکاریں چاگردے وتی ورنائیں پدریچ ءَ ایوک ءَ گوں جزبات ناں بلکیں زانت ءُ زانشت ءِ پگر ءَ ھم دنت بید مھکمیں پگر ءَ ناں راجاں دیمروی کتگ ءُ ناں کہ زرمبشتے ءَ داں دیراں اوشتات کتگ ھمے ھاتر ءَ اے وڑیں کتاب ورنایانی زانشتی ، پگری ءُ آشوبی ردوم ءَ المی اِنت وھدیکہ ورنا وتی زبان ءَ جھان ءِ مزن مزنیں لیکھی ، گوستانکی ، راجکاری ءِ نکاناں وان اَنت گڑا آیانی تہ ءَ زانشت ، پولکاری ، تجزیہ ءُ رھشونی ءِ بودشت ود اِیت ۔ ءُ سگار شنگکار ءِ نیمگ ءَ اے کتابک ءِ چاپ ءُ شنگ لبزانکی ءُ زانشتی پڑ ءَ جوانیں گامگیجے ءُ چائنیز کمیونسٹ پاٹی ءِ سر ءَ چئیرمین ءَ جوانی ءُ سنگینی ءَ چمشانک داتگ تا کہ گرانبھائیں لیکھی ءُ زانشتی نکان مئے وتی زبان ءَ وانوکاں سر بہ بنت ۔
اے اولی رند نہ اِنت بلکیں سگار شنگکار ءِ نیمگ ءَ چد ءُ پیسر ھم اے دابیں جوانیں کتابک ءُ لٹریچر شنگ کتگ ءُ وشی ءِ گپ ایش اِنت کہ اے درچ اوشت ءِ آماچ نہ بوتگ بلکیں گوں تیزی ءَ برجاہ ءُ نوکیں کتابانی سر ءَ کار بیگ ءَ اِنت ءُ من بگوشاں کہ اے کتابک ءِ چاپ بس یک پردے ءِ جھدانی منت ایں ناں بلکیں یک پگری ءُ لیکھی گلے ءِ جھدانی برورد اِنت کہ آئی ءِ سروکی ءَ ھستیں وھد ءَ چئیرمین زرین بلوچ کنگ ءَ اِنت ءُ اے کتابک ءِ نبشتہ کار اِنت ۔ ھمے درگت ءَ ما سنگت چئیرمین زرین بلوچ ءَ ھال اھوال کت تا کہ آئی ءِ نبشتہ کتگیں کتابک ءِ ھر تکاں شریں وڑی ءَ پھمت بہ کن ایں ۔
ما چہ آئی ءَ پُرس ایت کہ چائینیز کمیونسٹ پاٹی ءِ وانگ ءُ نبشتگ ، ماڈل بلوچ چاگرد ءَ پرچا ارزشت دار انت ؟ءُ تئی نز ءَ وانگ ءُ زانگے مول چی بہ بنت ؟ ءُ تو چہ چینی آشوب ءِ وانگ ءَ پہ بلوچ زرمبشت ءَ چی دربرتگ ءُ بلوچ زرمبشت ءِ باندات ءِ درگت ءَ تئی لیکہ چی انت ؟
اے درگت ءَ آئی ءَ درائینت کہ چائنیز کمیونسٹ پارٹی ءِ ماڈل ءِ وانگ ءُ نبشتہ کنگ ءِ پشدر ءُ بنجاجی ھیال آشوبی وانگی دودمان ءِ تہ ءَ ریپارم آرگ ءِ جھد ءِ کنگ اَت۔ بلوچ ءِ گورءَ ھاس روایتی وانگ ءِ یک روشت ءُ ربیدگے ھست، یا کہ اے بوتگ کہ ایوک ءَ ڈیٹا اسٹوریج، اِلم ءُ زانت ءِ کسہ گوئی، داستان ءِ دروشم ءَ ایندگہ سوبمندیں جنزانی وانگ ءُ پہ وت ءَ پروگام ءَ چہ گیشتر تھنا سیاسی باوستانی تہ ءَ وت ءَ دارگ ءُ یک ءُ دو کتاب ءِ وانگ ءُ کمّیں نگاہ ءَ چہ ایندگہ سوبمندیں جنزانی وانگ ءَ رند وتی جند ءِ سیاسی سرکل ءِ تہ ءَ کمتری مارشت ءِ سوب جوڑ بوتگ۔ ھمے ربیدگ ءِ پروش دیگ ءُ آشوبی جھدکار ءَ وانشت پہ وانشت ءِ زھنیت ءَ چہ کشگ، وانگ ءَ چہ اڑانداں پھمگ ءُ گیشوار کنگ ءِ نام اِنت، اے جُنز ءِ وانگ ءُ نبشتہ کنگ ءِ ارزشتداریں بھر ایش اِنت کہ جھد ءَ نوکیں نگاہ ءَ گوں پریامانی دیم ءَ برگ، زانشتی چاگرد ءِ جوڑشت ءِ کسانیں جھدے بوتگ۔
آشوبی جھد کار چوں وتی وانگ ءَ کرد ءِ تہ ءَ مٹ بہ کن اَنت ءُ وانگ ءِ ھوالہ ءَ دروَری کردار ءِ جوڑینگ، ڈومین ، سبجیکٹ ، ٹاسک ربیدگ ءِ چاگرد ءِ ودی کنگ ، بے راھبندیں وانشت ءِ درگت ءَ ریپارمیشن ءِ آرگ ءِ مھم ءِ سکین دیگ ءُ سیاسی باوستانی تہ ءَ کپی چنڈی ئیں زانت ءِ نشاندھی کنگ، چین ءِ آشوب ءِ وانگ ءُ پھمگ مئے واستا سک باز ھژدری اِنت یکے وَ دنیا ءِ آشوبی جنزانی وتی زلورت ءُ زمینی راستی بنت بلے آشوب وتی تہ ءَ یک یونیورسل پیکٹرے ھم دار اِیت کہ باز جیڑہ ءُ ھالات دگنیا ءَ گوں ھمدپ بوت کن اَنت، بلے اے ھم راستی یے کہ باز براں لیکہ جُتا بنت ، نپسیات ءُ دژمن ءِ پندل سازی جُتا بنت بلے سد درسد یکے دومی ءَ چہ گستا بوت نہ کن اَنت، اگاں ما ایمانداری ءَ گوں دگنیا ءِ کجام ھم جنز ءَ یک ءُ دو کتاب ءِ اِلم ءِ نگاہ ءَ چہ گیش سرجم ءَ پروجیکٹ ءُ کیس وانشت ءِ نگاہ ءَ بہ زوریں گڑا ما چہ دگنیا ءِ زانت ءَ نوکیں راہ ءُ در گیشینت کت کنیں، انچوشکہ شما جست گپتگ، بنجاھی ھیال یک اپیونیں راجے کہ آئی ءَ لس مھلوک ءَ چون آئی ءِ پارٹی ایجوکیٹ کنگ ءِ زمہ ءَ زور اِیت ءُ چِہ ھساب ءَ پارٹی وتی جنگی جاورانی تہ ءَ لس مھلوک ءَ ایجوکیٹ کنت، کتاب ءِ تہ ءَ درورے ھست کہ پارٹی ءَ وتی راج ءِ بے وانندگیں مردماں ھزار لبز ءِ وانگ ءِ پروگرام ءِ جوڑینت، چین ءِ سرجمیں آشوب ءِ تہ ءَ لھتیں انچیں پیکٹر ، کنڈیشن ءُ کسہ ھست اَنت کہ آیاں ما وتی نگاہ ءَ چارگ ءِ جھد ءَ بہ کنیں، گڑا پروگرام سازی ءِ تہ ءَ مارا کمک رس اِیت بلے چُش ھم نہ اِنت کہ بلوچ جھد، بلوچ جھد کار ءُ بلوچ ءِ راجی گل ءَ سوبمندی نہ دیستگ۔ مروچی بلوچ جھد ھم ھمے مزنیں اسپیکٹرم ءِ ترزکار ءَ کہ آئی ءِ تہ ءَ جنگ ءَ چہ یک ریجنے ءَ کشگ ءُ لس مھلوک ءَ وتی پروگرامانی تہ ءَ ھوار کنگ ءِ داناکاری ھوار ا٘نت، مروچی بلوچ ھم ھمے ھیال ءَ گوں وتی جھد ءَ دیم ءَ برگ ءَ اِنت۔
تئی نز ءَ نوآبادیاتی کالونیل نزام ءَ بلوچی زبان ءِ سرا چونیں سان دور داتگ ءُ زبان ءُ دودانی درگت ءَ راجکاری گل زمہ واری چی بہ بنت ؟
چیئرمین زرین بلوچ ءَ درائینت کہ کالونیل اسٹرکچر ءِ تہ ءَ لھتیں روِشت ءُ ھیال مدام زورآور بنت ھمے وڑ ءَ کہ ماتی زبان ءِ درگت ءَ ھم چہ گوست ءَ ھمے روشت ءُ زھنیت سک زوراک بوتگ کہ بلوچی زبان پد منتگ یا اکیڈمک زبانے نہ اِنت۔ اے بندر ءَ وتی زبان ءِ نہ پھریزگ ءِ کالب ءَ کیت۔
گوس بکش بزنجو وتی یادداشتانی تہ ءَ نبشتہ کنت کہ بلوچی زبان ءَ راجی زبان ءِ بستار ءَ آکچ ءَ دیمروی نہ کتگ ما پمیشکا وتی راجی زبان ءَ جاہ دات کت کنگ ءَ نہ ایں۔ بندر ءَ اے مسیبت چہ ھمود ءَ پادآتکگ ءُ آ ھمے نزوریں منانکانی آرگ ءِ کوشست ءَ کنت کہ ریاست ء کلات ءِ زبان ھم پارسی بوتگ، ھمے سوب زورگیریں پاکستان ءَ رس اِیت کہ آ اردو زبان ءَ مئے سر ءَ مُش اِیت، اے دری زبان مئے واستا چہ زبان ءَ گیشتر مئے تب ، مزاج ءُ مئے مچانکی یادداشتانی ھلاس کنگ ءِ سلاہ اِنت، بُندر ءَ بی ایس او ءِ اِلمی ریپارمیشن ءِ بنکی دروَر ایش انت کہ گل ءِ سنگتاں راجی جوڑشت ، ڈیکالونائزیشن ءِ اولی گام ھمیشی ءَ سرپد بوتگ اَنت کہ چیز وتی ساچشت ، وتی جند ءِ راجدپتر ، زبان ، دود ءُ ربیدگ ءِ بارو ءَ سرپدی دیگ اِنت، زبان ابید ءِ سیاسی پورس ءَ دیمروی کُت نہ کنت بی ایس او یک سیاسی سنگرے ءِ بستار ءَ راجدپتر ، زبان ءُ دودمان ءِ نگھپان اِنت۔ھمے پلسپہ اِنت کہ مروچی بلوچ ورنا دژمن ءِ تالیمی ادارھانی تہ ءَ بی ایس او وتی ورنایاں ھمے پروگرام ءِ سر ءَ ری ایجوکیٹ کنگ ءَ ا٘نت ءُ وتی راجدپتر ءُ وتی ماتی زبان ءِ ارزشت ءَ ما چہ دری لبزانک ءَ وانگ ءَ ایں، دانکہ ما ھمے منانک ءُ منتک ءَ مھکم بہ کنیں کہ وتی زبان ءُ وتی دود ءُ ربیدگ ءِ پھازگ ءُ رکینگ پہ راج ءِ ھستانک ءَ چینچک ارزشتدار اِنت۔ ھمے درگت ءَ چائنہ کمیونسٹ پارٹی ءِ کتاب ءِ تہ ءَ درورے مان کہ مردم چہ وتی جند ءِ زبان ، دود ءُ ربیدگ ءُ چہ وتی جند ءِ راجی بامرداں نا آشنا بہ بیت گڑا آ راجی جنز کدی اوں سوبمند بوت نہ کنت۔سیاسی پورس ءِ بستار ءَ مئے کوشست ھمے بوتگ انچوشکہ چائنہ ءِ تہ ءَ ھندی زانت ءِ پیکٹر سک گیش گندگ ءَ کیت گڑا ما ھم گوں ھمے نیت ءَ وانگ ءَ ایں، دانکہ ما وتی جند ءِ یادداشتاں رکینت بہ کنیں ءُ وتی جند ءِ ماتی زباناں دیمروی دات بہ کنیں ءُ ھمے ریپارمیشن ءَ بیاریں کہ دژمن ءِ داتگیں ھمک ھیال ءُ روِشتاں چہ وت ءَ در کت بہ کنیں۔
زانت ءُ زانشت ءِ راہ ءُ در ءِ گیشگواری ، راجکاری ءُ جنگ ءَ مھلوک ءِ پلامرزی ءِ ارزشت ءِ درگت ءَ آئی ءَ وتی ھیال درشان ات انت ءُ ھمے گشت:
چیئرمین زرین: اِلم ءُ زانت ءِ اگاں راہ ءُ در گیشوار بہ بنت گڑا الم ءِ وسیلہ ءَ نوکیں ھیال ودی بنت۔ چہ اے کتاب ءَ ھمے سرپدی ءُ زانت رس اِیت کہ لس مردمانی کمک ءَ ابید جھد سرجم بوت نہ کنت ، لس مھلوک تاکت ءِ بنزہ اِنت، سیاست ءُ جنگ دو جُتائیں چیز نہ اَنت، چگراپیہ ءِ سرءَ کمال اولی سوبمندی ا٘نت۔زانت ءِ تاکت بزان چائنہ یک وھدے اِلم ءِ بنجاہ زانگ بیت وتی راجی بامردانی کربانیانی سکین ،پگر ، ترزکار ءُ پلسپہ ھمے جنگی جاورانی تہ ءَ ترندیں پوزیشن ھمیش اِنت کہ تو وتی زمین ءُ مھلوک ءَ اِلمی نگاہ ءَ چوں دوبر یکجاہ کُت کن ئے۔
چائنیز کمیونسٹ پارٹی ءَ مارکسزم ءُ گراؤنڈ بیسڈ پریکٹس ءِ درگت ءَ آئی ءَ گشت کہ:
چیئرمین زرین: چائنیز کمیونسٹ پارٹی ءَ مارکسزم وتی زمین ءِ تہ ءَ چوں امل ءِ تہ ءَ آؤرتگ ءُ اے چیز پدر کُتگ کہ لیکہ سِتک ءِ چم ءَ چارگ مہ بیت، ھمے پلسپہ ءَ دگنیا ءِ تہ ءَ آرگ ءِ جھد ءَ کنت کہ لیکہ گراونڈ بیسڈ پریکٹس ءِ نام اِنت۔چوشکہ گوست ءَ ما لیکہ سِتک ءِ رنگ ءَ زرتگ ءُ پریکٹس کنگ ءِ جُھد کتگ گڑا بازبراں مارا سیاسی تاوان گندگ ءَ اتکگ۔
چائنہ کمیونسٹ پاٹی ءُ چائنیز آشوب ءِ وانگ ءَ وانوک چی در برت کنت اے درگت ءَ آئی ءَ ھمے پسو دات کہ:
چیئرمین زرین: چہ چائنہ ءِ کمیونسٹ پارٹی ءَ ما ھمے پھم اِت کنیں کہ لیکہ وتی جاورانی ھساب ءَ وتی راجی نپانی دیم ءَ چون پریکٹس کنگ بہ بیت، چائنہ کمیونسٹ پارٹی ءِ وانگ ءَ ما زانت کنیں کہ دریا ءِ سر ءَ گرپت دارگ جنگی پوزیشن ءَ مھکم کنت، پروپگنڈہ اسکواڈ پارٹی ءِ کہ ھما بنکی زمہ واری بیت کہ لس مھلوک ءَ ایجوکیٹ بہ کنت، جنگ ءِ دیمروی ءُ سوبمندی ءِ سپر ءِ میان ءَ نگدی نگاہ چون مھکم بہ بیت، ترندیں جنگ ءَ جھانی سیاست بزان گریٹ گیم ءِ وھد ءَ آئسولیٹ اپروچ چینچک تاوان دنت ءُ سوبمندی ءِ راہ ءِ میان ءَ اڑاند جوڑ بیت بزانکہ راجی جنز ھما وھد ءَ سوبین بنت ھردیں چہ آئسولیٹ اپروچ ءَ در بیا اَنت ءُ وت ءَ را یکیں جاہ ءَ مدار اَنت، چائنہ کمیونسٹ پارٹی ءُ چائنیز آشوب ءِ وانگ ءَ ما زانت کنیں کہ ڈپلومیسی ءِ تہ ءَ گوں ھمدردی ءُ نزوریں پوزیشن ءَ نزیکی مہ بیت بلکیں دگنیا ءَ اے باور کنائینگ بہ بیت کہ ما وتی زمین ءِ تہ ءَ ھما جنگ ءَ کنگ ءَ ایں کہ آ جنگ پہ ایندگہ مردماں نپ اِنت، اد ءَ جنگ ءَ چہ آئسولیٹ پوزیشن ءَ کشگ اِنت۔ ڈپلومیٹک چینلانی وسیلہ ءَ وتی تاکت ءَ منارینگ، انچش گش اَنت کہ چائنہ ھردیں کوریا ءِ جنگ ءَ دَور کنت گڑا کوریا ءِ جنگ ءَ دَور کنگ ءِ سوب گوں کوریا ءَ ھمدردی نہ بیت بلکیں دگنیا ءِ تہ ءَ وتی تاکت ءِ منارینگ بیت کہ چائنہ اے ریجن ءِ تہ ءَ نوکیں تاکت اِنت ءُ چائنہ ءِ کنسرن دگنیا ءِ تہ ءَ گون بہ بنت، چائنہ کمیونسٹ پارٹی ءِ وانگ ءَ ما سرپد بئیں کہ راجدپتری ردیاں ماتم ءِ جاہ ءَ چہ گیش باندات ءِ امانت ءِ ھساب ءَ سرپد بوگ ءُ رکینگی اِنت ءُ چہ اشانی وانگ ءَ مارا ھمے نپ رس اِیت کہ چہ وت ماں وتی جنگ ءَ چینچک درسد دژمن تئی زمین ءِ تہ ءَ وتی زوراکی ءِ روتگاں ترند ءُ تاکتور کنت۔مارا اے گندگ کیت کہ لانگ مارچ ءِ پیسلہ ءُ امل آشوب ءِ توک ءَ چینچک بلاھیں مٹّی ءِ مانزمان بیت ءُ لیڈرشپ ءِ پیسلہ میّن کنت کہ جنز کجام نیمگ ءَ بہ روت۔
گڈسر ءَ آئی ءَ ادارہ جاتی ڈسپلن ءِ درگت ءَ ھمے گشت کہ :
چیئرمین زرین: اے جھد ءِ سوبمندی ءِ اولی گام ترندیں ادارجاتی ڈسپلن ءِ ھاتر ءَ دانا ءُ باسمائیں لیڈرشپ درکار بیت، لیڈر ءِ اولی سوبمندی گوں جُھدکارانی سیاسی تربیت ءَ بندوک اِنت۔ھمے سئیں چیز جھد ءَ سوبین کت کن اَنت۔
چئیرمین ءَ وتی کتابک ءِ درگت ءَ وتی لیکہ ءُ چمشانک دات انت آئی ءِ پسواں چہ اے گپ پدر بیت کہ وانگ ءُ زانگ ، سیاسی زانشت ، گلی ھیلکاری ، ماتیں زبان ءُ گوستانکی سرپدی ھر وڈیں راجکاریں زرمبشت ءِ ھاتر ءَ المی انت ۔ ءُ واھشت ءُ جزباتانی بنیاد ءَ ھچ وڈیں زرمبشت سوبمند بوت نہ کنت بلکنہ آئی ءِ ھاتر ءَ وانگ ، پولکاری ، تجربگاں چہ دربرگ ءُ راج ءِ تہ ءَ زانشت پیداک کنگ ءُ جاورانی رد ءَ شوندات ٹھینگی انت ۔ آئی ءِ رد ءَ جھان ءِ جتا جتائیں زرمبشت ءُ گوستانکانی وانگ ءُ ما وتی چاگردءِ جیڑھاں پھمیت ءُ پہ وت راھے در گپت کن ایں ۔ آئی ءِ رد ءَ اے ھم ھست ایں کہ جھان ءِ ھر وڈیں زرمبشت ءُ تجربہ ءَ دربرگ ءَ ساری مارا اے گپ زانگی انت کہ ھر یک دمگے ءِ وتی جتائیں جاور ءِ بنت۔
چئیرمین زرین بلوچ ءِ سروکی ءَ نودربر گل ءِ اے زانشتی درچ اے گپ ءِ گواھی دنت کہ ورنا ایوک ءَ وانگ ءَ گوں بندوک نہ انت بلکنہ پگری تکاں ھم جوانیں وڈی ءَ وتی کرد ءَ پیلو کنگ ءَ انت ۔ مناں باور ایں گل ءُ آئی ءِ کیڈرانی اے جھد اوشت ءِ آماچ نہ بیت ءُ چریشی ءَ زبان ھم زندگ مان ایت ،راج باسما بیت ءُ وتی آوکیں پدریچ ءَ پگری زانشت ءِ امبار ءِ ایرکنت ۔
