بلوچ یکجھتی کمیٹی ءِ بندیگیں رھشون ڈاکٹر ماھرنگ بلوچ ءَ چہ ہدہ جیل ءَ وتی درشان ءِ شنگ کتگ ءُ گوشتگ کہ بلوچ ءُ اوگانیانی سیادی ایوک ءَ ھمساھکی نہ انت بلکیں سداں سال گوستانکی ، دودمانی ءُ مردمی سیادی ءِ کسہ ئے ۔ ھردو راجاں یک ءُ دومی ءِ وشی ءُ سکیاں بھر زرتگ ءُ یکے دومی ءِ زمین ءِ سر ءَ باھوٹی بوتگ انت ، گوستانک ءِ نگیگ تریں ساھتاں ھم وتی براتی ءِ سیادی برجاہ داشتگ ۔ اے سرجمیں گوستانکی سپر ءَ بلوچ ءُ اوگانی راج ھچبر سامراجی تاکت یا دری تاکتانی مپاد ءَ یکے دومی ءِ بگیری ءَ نہ اوشتاتگ انت ۔ ھمے سوب انت کہ بلوچ ءُ اوگانیانی سیادی ستک ، شرپ ءُ مچانکی گوستانکے تجربگانی سر ءَ بوتگ ۔
آئی ءَ گوشتگ کہ بلے مروچی یک پدرد ءُ بژنی جاورے ودی بوگ ءَ انت کہ اے ایوک ءَ پہ بلوچ ءَ ناں پدردی یے نہ انت بلکیں بلوچ ءُ اوگانی راج ءِ میان ءَ ھستیں گوستانکی سیادی ءِ ھاتر ءَ مزنیں ھترھے جوڑ بوت کنت ۔ لھتے ماہ بیت کہ بلوچستان ءِ بازیں دمگاں ھمے ھال آیگ ءَ انت کہ گوستگیں اوگانی پوج ءَ بندوکیں لھتے مردم پاکستانی پوج ءِ گوم ءَ زلم ءُ زوراکیاں ھوار انت ۔ اے کار بلوچ راج ءِ تہ ءَ نپرت ءُ گم پیداک کنگ ءَ انت ۔
آئی ءَ گوشتگ کہ بلوچستان ءِ بازیں ھند ءُ دمگاں پاکستانی پوج ءِ ھمراھی ءَ زوراکی کنگ ءَ اے مردم گندگ بوتگ انت کہ گوستگیں اوگانی پوج ءِ کارمند بوتگ انت ءُ اَنہ پاکستانی پوج ءِ تہ ءَ کار ءَ انت زھری ءَ ھوار ایندگہ ھند ءُ دمگاں اوگانی پوج ءِ کارمند زوراکیاں گون بوتگ انت ھمے وڑ ءَ مستونگ ءِ مھلوک ءَ ھم شکایت کتگ کہ اوگانی پوج ءِ گوستگیں کارمند پاکستانی پوج ءِ آشرواد ءَ وانگجاھے ءِ سر ءَ کوزہ کتگ ءُ اود ءَ وتی بنجل ءِ اڈ داتگے ۔
ڈاکٹر ماھرنگ بلوچ ءَ گوشتگ کہ من اوگانستان ءِ گوستگیں سرکار ءِ درسیں سروکاں دلگوش گور کنگ لوٹاں کہ باز براں گوستانک اے وڑیں چکاس کار ایت ءُ مروچی اوگان سروکانی دیم ءَ ھمے ساھت انت اگاں مروچی اے مردماں پہ کسانیں لب ءُ ملامے ءَ بلوچ راج ءِ بگیری ءَ زلم ءُ زوراکیاں ھوار بوتاں گڑا پہ بلوچاں اے بس یک کارے نہ بیت بلکیں اوگانی راج ءُ گوستانکی دودمان ءُ وکار ءِ ھم چپے ۔
آئی ءَ گوشتگ کہ اوگانی راج وت چہ ھمے زلم ءُ زوراکی ، درپہ دری ءَ گوستگ ۔ آیاں وتی سرڈگار ءِ سر ءَ تاکتور ءُ تباہ کاری دیستگ انت ھمے واست ءَ چہ اوگان راج ءَ شرتر کس زانت نہ کنت کہ یک ماتے ءِ چک کہ پچ گرگ بہ بیت ، وھدیکہ یک زھگے ءِ باندات شوروانی دوتانی تہ ءَ گار بہ بیت ، وھدیکہ یک راجے ءِ ھستمانی گوں زوراکی ءَ چیر ترینگ ءُ گار کنگ ءِ جھد بہ بیت گڑا اے زیم چینچو دردناک انت ۔
آئی ءَ گوشتگ کہ راجدپتر ایوک ءَ اے یات نہ کنت کہ کئے زورآور بوتگ ءُ کئے نزور آ اے ھم یات کنت زوراکی ءِ وھد ءَ کئے ھاموش بوتگ ءُ کئے آئی ءِ بگیری ءَ اوشتوک بوتگ ۔ اگاں لھتے مردم چیزے ملامانی ھاتر ءَ بلوچ راج ءِ بگیری ءَ کارمرز بوگ انت گڑا آیاں یات کنگی ایں کہ اے نپ پہ مدامی بنامی ءِ سوب جوڑ بنت ۔ آوکیں پدریچ جست کنت وھدیکہ یک راجے ءِ وتی ھستی ، وتی پجار ءُ وتی بنکی ھکانی ھاتر ءَ جھد ءَ بوتگ گڑا شما کئی ھمراہ بوتگ ئے ؟
آئی ءَ گوشتگ کہ من چہ اوگام سروکان لوٹ کناں کہ اے جیڑھ ءَ سنگینی ءَ بہ زیر انت ءُ اے درگت ءَ پٹ ءُ پول بہ کنت ءُ چشیں مردماں چہ بلوچ چکچینی ءَ بہ دار انت ۔
آئی ءَ وتی درشان ءِ گڈسر ءَ گوشتگ کہ بلوچ ءُ اوگانیانی گوستانی برادری ، دیمھونی ، ءُ یکمشتی ءِ گوستانک انت اے گوستانک ءَ چشیں سیاھیں ٹک ءِ مہ لگ ایت کہ پہ آوکیں پدریچ ءَ شرمندگی بہ بیت ۔ مروچی وھد ءِ لوٹ انت اوگانی سروک وتی اکلاکی ، راجی ءُ گوستانکی کرد پیلو بہ کن انت ءُ وتی مردماں چہ بلوچ راج ءِ بگیری ءَ ھر وڑیں کار کنگ ءَ بہ دار انت تانکہ ھردو راجانی میان ءَ سداں سالی ستک ءُ شرپ ءِ سیادی پھریزگ بہ بیت ۔