TBP Balochi

بلوچ ریپبلکن پاٹی ءِ بنجاھی پتر ءِ سیکرٹری جنرل ڈاکٹر بشیر عظیم نادراھی ءِ سبب ءَ مروچی سبی ءَ بیران بیتگ-

بی آر پی ءِ جارکش شیر مھمد بلوچ ءَ چاگردی ترامجاہ ایکس ءَ کسانوکیں درشانے ءَ گوشتگ ما بلوچ ریپبلکن پاٹی ءِ سیکرٹری جنرل ڈاکٹر بشیر عظیم ءِ بیرانی ءَ پدردیگ اِنت ءُ گماں بروبری ءَ شریدار اِنت-

آئی ءَ گوشتگ شھید نواب اکبر بگٹی ءِ نزیکیں ھمراہ ڈاکٹر بشیر عظیم ءَ وتی زند بلوچستان ءُ آئی ءِ مھلوک ءِ واستا جد ءُ جھد ءَ ندر کتگ – آئی ءِ جپاکشی ءُ وتی وتن ءِ مھر ھروھد ءَ مئے دلانی توک ءَ زندگ مان ایت – ما آئی ءِ جنگ ءَ برجاہ داریں ءُ آ ھروھد ءَ ایمنی ءَ بہ بیت –

بلوچ ءِ نامداریں شائر، ندکار مبارک قاضی ءِ اولی سالروچ ءِ درگت ءَ ڈگری کالج ھاران ءُ انٹر کالج مسکن کلات ءَ جتا جتائیں مراگش برجم دارگ بوت۔

گیشین اھوالانی رد ءَ مبارک قاضی ءِ اولی سالروچ گورنمنٹ بوائز ڈگری کالج ھاران ءِ نودربر کونسل ءِ نیمگ ءَ مزنیں شائستگی ءُ اھترام ءِ گوما برجم دارگ بوتگ ءُ ھمے رنگ ءَ گورنمنٹ انٹر کالج مسکان قلات ءِ نودربراں ھم برجم داشتگ کہ ایشی ءِ تہ ءَ نودربر ءُ جنکاں مبارک قاضی ءِ زند ءُ زور ءِ سر ءَ وش آتک کتگ۔

اے مراگش ڈگری کالج ھاران ءَ برجم دارگ بوت کہ ایشی ءِ تہ ءَ شورا زبان دوست ءَ ھوار نودربرانی مزنیں کساسے ساڑی بیتگ انت ۔

پروگرام ءِ اولی بھر ءَ اولی سال ءِ نودربر شھزاد سلیم ءَ قاضی مبارک ءِ زند ءُ شائری ءِ سر ءَ وتی تھیسس پیش داشتگ ءُ گشتگ کہ قاضی مبارک انوگیں دور ءِ مزنیں شاعرے بوتگ، آئی ءِ شئیرانی تہ ءَ کوہ، گیابان، بلوچستان ءِ کوہ، کھچر ءُ دریا اگاں مرچی جسمانی دروشم ءَ مئے ھمراہ نہ انت بلے آئی ءِ ازم ءُ شاعری پہ مدامی مئے دلانی تہ ءَ مان اِیت۔

آئی ءَ گوشت کہ قاضی مبارک اے دور ءِ بلوچی زبان ءِ مزنیں شاعرے بوتگ کہ آئی ءِ شاعری پہ بلوچستان ءُ بلوچ راج ءَ بوتگ، آئی ءِ شاعری ءَ پہ لس مردمے ءِ پھمگ ءَ ھچ وڑیں مشکلے نہ بوتگ۔

ایدگہ گشتانک دیوکاں ھم آئی ءِ شائری ءِ سر ءَ چمشانک دات ءُ گشت کہ آ وتی شائری ءِ وسیلہ ءَ مئے دلانی تہ ءَ زندگ انت۔

مراگش ءِ دومی بھر ءَ مشاعرہ ءِ بندوبست کنگ بوت کہ ایشی ءِ تہ ءَ خاران ءِ نامداریں شاعر ریاض زرمبش،جلال فراق،ضیاء شفیع،ممتاز ارمان،زید رحی،عتیق ارشاد ءُ اے دگہ نودربراں وتی شعر پیش داشت اَنت۔

پروگرام ءِ گڈسر ءَ کالج اسٹوڈنٹ کونسل ءِ چیئرمین عزیز اکرم ءُ حبیب عارف ءَ دراھیں نودربرانی ھمراہی ءَ مھمان گرامی ءُ شورہ ءِ منت گپت۔

روکپتی بلوچستان ءِ تیابدپی شھر بندر عباس ءَ یک بندیگیں بلوچے ماں نشہ باپاری ءِ پژدر ءَ پاھو ءِ ھکم دیگ بیتگ-

اھوالانی رد ءَ بندیگین بلوچ مروچی پاھو ماں بندر عباس ءِ زندان ءَ پاھو دیگ بیتگ-

پاھو دیگ بیتگیں مردم ءِ پجار ھمید رضا ھسن زئی سانی ء مھمد جھمنند زاھدان ءِ نام ءَ زانگ بیتگ-

اھوالانی رد ءَ ھمید رضا دو سال پیش رودان ءَ نشہ باپاری ءِ بھتام ءَ گرگ بیتگ ءُ پد ءَ آ بندر عباس ءَ برگ بیتگ ءُ یک ھپتگے ءَ پیش آئی ءِ سر ءَ پاھو اتکگ ءُ مروچی آ پاھو دیگ بیتگ-

اھوالانی رد ءَ ھمید ءِ گڈی گندوک آئی ءِ مردماں گوستگیں روچ ءَ کتگ بیتگ-

زانگ بہ بیت دو ھپتگانی توک ءَ روکپتی بلوچستان ءَ پاھو ھکم دیگ ءِ مردمانی کساس یازدہ ءَ سر بیتگ اَنت-

ھسکہ ءَ ینگ ویمنز یونین ءَ یک شاتکامی دروشمے ءِ ھواری ءَ شھید زیلان ءِ نام ءَ نامینگ ءُ وتی بنجل ءِ بنھشت ایر کتگ-

زیلان بیسی ینگ ویمنز یونین سنٹر ءِ بنھشت ءِ واستا سنٹر ءِ دیم ءَ بازیں کچے ءَ مھلوک جاڑیگ بیتگ – اے بنجل ءَ کرد، انگریزی زبان ءَ دودمان ءُ ازمکاری ناچ ءُ کسمانکی سوت بیتگ اَنت رھوتی درگت ےَ زالبولانی ھنر ءَ گوں کنگ بیتگ – اے بنجل ءِ بنجاھی پتر زالبول ءُ زانشت ءِ چاگرد ءَ رھشونی کنگ ءِ مشن ءَ دار ایت-

ینگ ویمنز یونین ءَ شھید زیلان بیسی سینٹر ءَ بازیں کشگ بیتگیں زالبولانی اکس لچینگ بیتگ انت کہ ایشانی توک ءَ جینا ایمنی، مومیتا دیبناتھ، نرمین فرھو، نارین گوران – ایشانی ھواری ءَ آجوئی ءِ واستا ساھانی کربان کنوکیں زالبولانی اکسانی نامانی جاہ جوڑینگ بیتگ اَنت- ایشانی توک ءَ گچینی بلوچ زالبول فدائی ماھل بلوچ پنام ءِ زیلان کرد، سارہ تولھدان،رکن زیلال ءِ اکس بنجاھی پتر ءَ پیش دارگ بیتگ اَنت-

بنجاھی پتر ءِ بنھشت ءِ مراگش ءِ بندات ءَ آشوبی شھیدانی یاد ءَ یک دمانے ءِ بے تواری ءِ ھواری ءَ دروتی پیش کنگ بیتگ- ستاشانی ءَ پد زالبولانی رھشونی کنوکیں شھید زیلان، کہ آئی ءَ پد ءَ گوریلا لشکر ءَ بھر زرتگ بیتگ ءُ میڈیا پروٹیکشن زون ءَ شھید بیتگ – آئی ءِ مات ءَ تران کنان ءَ گوشتگ شھید زیلان ءِ مات ءَ سروک اے پی او ءِ دراھیں شھیدانی اشوب ءِ داد ءِ ستاشانی کتگ ءُ گوشتگ اے سینٹر شھید زیلان ءِ وابانی واھشت جوڑ بیت اِنت-

بنداتی تران ءَ پد ینگ ویمن یونین ءِ باسک ھلیم زانہ ءَ تران ءَ گوشتگ ما اے مرکز ءَ اے پی او لیڈر، شھید، ءُ دراھیں آجوئی دوستیں مھلوک ءُ دنیا ءِ دراھیں زالبولاں مراد باتی گوش ایں شمارا سرپدی ھست اِنت کہ شانزدہ ستمبر مھسا ایمنی ءِ کوش ءِ سالروچ اِنت ءُ جن جیان آجوئی ءِ یاگی ءِ سالروچ انت ءُ اے وڑیں سینٹر ءِ پچ کنگ زالبولانی واستا باز گچینی یے-

آئی ءَ گوشتگ سرمایہ دارانہ ءُ پدرانہ نزام ءِ ھلاپ ءَ سرجمین دنیا ءِ زالبول ءُ ورنایانی جد ءُ جھد برجاہ بیت اِنت ءُ اے جد ءُ جھد یک بے دروریں جنگے جوڑ بیتگ – آجوئی ءِ اے جنگ ءِ سروک زالبول کنگ ءَ اَنت – بلوچ زالبول زیلان کرد ( ماھل بلوچ) آئی ءِ یک مسالے، ماھل بلوچ کہ بلوچستان ءِ آجوئی ءِ جنگ ءَ اِنت، شھید زیلان کرد ءَ سانمند بیتگ کہ آئی ءَ 1996 ءَ وتی ساہ ندر کتگ ءُ آئی ءَ وتی نام مٹ کتگ زیلان کرد کتگ – ماھل بلوچ زیلان ءِ رندپد ءَ روان ءُ پدرانہ نزام ءَ یک مزنیں شھماتے بیتگ-

آئی ءَ گوشتگ ایشی ءَ پدر بیت اِنت کہ کرد زالبولانی جد ءُ جھد چنکس ترندگیر اِنت مئے مرکز اے جد ءُ جھد ءَ دیم ءَ جنزینگ ءُ جنکانی وانگ ءُ الم زانشت ءِ مرکز ءِ واستا ھروھد ءَ پرکار بیتگ –

تران ءَ پد زالبول، زالبولانی بیر ءُ دوبر رودم ءِ وتی تھیٹر پیش کتگ ءُ مرکز ءِ بنھشت زیلان بیس ءِ مات ءَ مُچی ءَ شاتکامی ءُ جن جیان آجوئی ءِ کتگ جنکانی ناچ ءِ ھواری ءَ مجلس ءِ ھلاسی بیتگ –

https://ok.ru/video/7985386031663

روکپتی بلوچستان ءِ دمگ چھبار ءَ یک مردمے ءِ لاش دزکپتگ کہ آئی ءِ اُمر کساس شست سال ءِ نزیک گوشگ بیتگ-

اھوالانی رد ءَ لاش میر آباد چھبار ءَ دزکپتگ کہ اود ءَ لاش ءِ اھوالانی رسگ ءَ پد انتزامیہ سر بیتگ ءُ لاشے چِست کتگ-

اھوالانی رد ءَ لاش گوستگیں روچ ءَ میر آباد ءَ شھدگ ءِ کش ءَ دزکپتگ ءُ چھبار ءَ انتزامیہ ءِ آیگ ءَ پد لاش چِست کنگ ءُ بیمارستان امام علی چھبار ءَ برگ بیتگ-

لاش ءِ پجار نہ بیتگ ءُ نانکہ کوش ءِ سبب زانگ بیتگ-

ایرانی پوج ءَ تیرگواری کتگ دو ورنا کشتگ-

تیرگواری ءِ وئیل سیمسر ءِ دمگ شمسر ءِ ھند سر ءَ بیتگ، کشگ بیتگیں ورنا ءِ پجّار نوید ء عبدین ءُ رشید ء نواب ناماں چہ بیتگ اَنت، کہ سیمسر ءِ دمگ حق آباد زیارت ءِ جھمنند اَنت-

دمگی اِھوالکار رِد ءَ تیرگواری ءِ وئیل گوستگیں روچ ءَ بیگاہ ءِ چار نزیک ءَ بیتگ کہ اود ءَ ایرانی پوج مرساد ءَ دو بے میاریں ورنا تچکی ءَ تیرگواری کتگ ءُ کشتگ اَنت-

بلوچستان ءِ تیاب دپی شھر گوادر دگ وئیل ءَ پاکستانی پوج ءِ چاردہ کارمند ٹپی بیتگ اَنت –

دگ وئیل ءَ تیاب دپی شھر گوادر ءظ دمگ اورماڑہ ءِ دمگ کوسٹل ھائی وے ءِ ھند سر ءَ بیتگ-

اِھوالکار رِد ءَ پوج ءِ گاڑی مرینگ نہ بیتگ چپی بیتگ- چریشی ءَ سوار چاردھیں کارمند ٹپی بیتگ اَنت-

ٹپی نادُراھجاہ ءَ برگ بیتگ اَنت-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ مئے سرمچاراں گوادر ءُ شال ءَ دو جتا جتائیں اُرشانی وھد ءَ زورگریں پاکستانی پوج ءُ چیریں ادارہ ءُ چاریگ نشانگ کتگ اَنت کہ چریشی ءِ آسر ءَ یک چاریگے مرتگ ءُ یکے زدگ بیتگ-

جارکش ءَ گوشتگ بی ایل اے ءِ سرمچاراں یکشمبے ءِ شپ ءَ گوادر ءِ شھر ءَ پاکستانی پوج ءُ چیریں ادارھانی چاریگ دزبمبے ءِ نشانگ کتگ ، تراک ءَ آ سک ٹپیگ بیتگ کہ اے مرد بیکری ءِ دکان ءَ دشمنیں پوج ءِ واستا کار ءَ بیتگ-

آئی ءَ گوشتگ یک دگہ کاروائی ءَ بلوچ لبریشن آرمی ءِ سرمچاراں شال ءِ ھند کیچی بیگ ءَ زورگرین پوج ءِ چاریگ ھالد ھسین ء گلام سرور جھمنند اوستہ مھمد تیرگواری کتگ ءُ کشتگ-

جارکش ءَ گوشتگ اے کارندی بی ایل اے ءِ انٹیلجنس ونگ ءَ نگاھاں کتگ کہ شال ءَ ھوار کلات ءَ زورگرین پوج ءِ واستا چاریگری کار ءَ بیتگ ءُ کیچی بیگ ءَ آئی ءَ وتی رنگ ءُ دروشم مٹ کتگ ءُ دشمنیں پوج ءِ واستا ھال یکجاہ کنگ ءِ ٹاسک دیگ ءَ بیتگ-

جیئند بلوچ ءَ گوشتگ بلوچ لبریشن آرمی اے ھردوکیں اُرشانی زمہ واریاں من ایت –

روکپتی بلوچستان ءَ بندوکیں پاھو دیگ ءِ ھکم ءَ مردمانی کساس دَہ ءَ سر بیتگ اَنت- گوستگیں سیمی ھپتگ ءَ انگت ءَ دَہ کسانی پاھو دیگ ءِ ھکم ایرانی آمیدگس ءَ شنگ کتگ اَنت-

سر بیتگیں ھالانی رد ءَ ایرانی آمیدگس ءَ ما شیراز ءَ عادل آباد زندان ءَ دو بندیگیں بلوچاں ھوار سَے کسانی پاھو دیگ ءِ پرمان داتگ-

گیشین اھوالانی رد ءَ شیراز عادل آباد ءَ پاھو دیگ ءِ ھکم ءَ مردمانی پجار سِی ءُ سَے سالی ئیں عبدالجلیل اھسان ء ولی مھمد جھمنند ایرانشھر، سِی ءُ دو سالی ئیں یحیی زرگری ء اسحاق جھمنند ایرانشھر ءُ بیست ءُ یک سالی ئیں مھدی جھان پور استان پارس ءِ ناماں زانگ بیتگ اَنت-

پاھو ءِ ھکم ءَ برگ بیتگیں عبدالجلیل دو سال پیش نشہ باپاری ءِ بھتام ءَ گرگ بیتگ ءُ ھمے ڈول یحیی زرگری ھم دو سال پیش گرگ بیتگ ءُ پد شیراز ءِ آمیدگس ءَ پاھو دیگ ءِ ھکم داتگ-

ایشانی توک ءَ استان فارس ءِ جھمنندین مھدی یک سالے ءَ پیش کوش ءِ بھتام ءَ گرگ بیتگ –

عبدالجلیل ءُ یحیٰ ءَ وتی کھول ءَ گڈی گندوک یکشمبے ءِ سھب ءَ کتگ بیتگ کہ چریشی ءَ پد ھردوک جتائیں کوٹیان برگ بیتگ اَنت-

بلوچی زبان ءِ مزن نامیں شائر مبارک کازی ءِ اولی سالروچ ءِ درگت ءَ ستاشانی

بلوچی زبان ءِ مزن نامیں آشوبی شائر مبارک کازی ءِ نمیرانی ءِ اولی سالروچ ءِ درگت ءَ بلوچستان ءَ لبزانکار ءُ ندکار آئی ءِ ستاشانی ءَ کنگ ءَ اَنت-

گوستگیں سال دوھزار ءُ بیست ءُ سَے ءِ شانزدہ ستمبر ءَ بلوچستان ءِ دمگ کیچ ءَ بلوچی زبان ءِ مزن شائر ءِ نمیرانی ءِ اولی سالروچ ءِ درگت ءَ آئی ءِ کوھیں کرد ءِ ستاشانی کنگ بوگ ءَ اِنت-

بلوچی زبان ءِ مزن نامیں شائر مبارک کازی گوستگیں سال ءَ ماں کیچ تربت ءَ ناگتی بیران بیتگ ات کہ آئی ءِ بیرانی ءِ سر ءَ بلوچ لبزانکار ھوار بلوچ مھلوک رنجیگ ءُ گمیگ کتگ ات-

بلوچستان ءَ مبارک کازی اولی شائر بیتگ کہ آئی ءَ مزنیں کساسے ءَ زندگی ءَ ھوار مرگ ءَ پد شرپے ءِ نگاہ ءَ چارگ بوگ ءَ اِنت-

مبارک کازی 1955 ءَ ماں پسنی ءَ کھدہ امان اللہ ءِ لوگ ءَ ودی بیتگ کہ آئی ءَ وتی شائری بلوچی زبان ءَ گون بندات کتگ –

مبارک کازی ءَ بلوچی زبان ءِ شائری ءَ ارواھے بکش اتگ ءُ چرے سبب ءَ بلوچ لبزانکاریں تکاں مبارک کازی ءَ مزنیں نامے پہ وت کش اتگ-

مبارک کازی ءِ شیری کتاب ‘ شاگ ماں سبزیں ساوڑ، ھانی منی ماتیں وتن، زرنوشت، آپ سماک ءَ جتگ، منی اھد ءِ گم کسہ’ دگہ دگہ کتاب چاپ بیتگ اَنت-

مبارک کازی ءِ کتاب بلوچی ءَ ھوار اردو، براھوئی ءُ انگریزی ءَ ھم رجانک کنگ بیتگ اَنت-

ھمے ڈول گوستگیں روچ ءَ ما روکپتی بلوچستان ءَ مبارک کازی ءُ آبدآسکانی یات ءَ ھم لبزانکی دیوانے برجم دارگ بیتگ کہ اود ءَ بازیں کچے ءَ لبزانکاراں بھر زرتگ ءُ ستاشانی ندر کتگ انت-

ٹی بی پی بلوچی بلوچی زبان ءِ مزن نامیں شائر مبارک کازی ءِ ستاشانی ءَ اے شَیر ءَ یات کنت

داں کوچگاں آسے بلیت تو زندگ ئے
داں برز ءَ استالے چمیت تو زندگ ئے

داں بلبلے پرسیگ بیت تو زندگ ئے
داں جنگل ءَ آسکے ھزیت تو زندگ ئے

داں آسمی پلے سْرپیت تو زندگ ئے
داں کوھسراں گْرندے کپیت تو زندگ ئے

داں بزگرے پاتاں گْوپیت تو زندگ ئے
داں شوانگے میشاں زریت تو زندگ ئے

داں رندی دیوانے جمیت تو زندگ ئے
داں کول ءُ اکرارے ٹهیت تو زندگ ئے

داں آشکے ارساں شلیت تو زندگ ئے
داں شائرے شئراں گشیت تو زندگ ئے

داں روچ گردشتاں گْوزیت تو زندگ ئے
داں شپ گوں واباں انسریت تو زندگ ئے

مبارک کازی