بلوچ راجدپتر ءَ جون ءِ ماہ ءِ ارزشت
نبشتہ کار: زربار بلوچ
دی بلوچستان پوسٹ
ھمک راج ءِ گوستانک ءِ تہ ءَ لھتیں انچیں روچ ءُ ماہ بنت کہ آ تھنا وھد ءِ بھرے نہ بنت بلکیں راج ءِ پجّار ، مچانکی زانشت ءُ راجدپتر ءِ تہ ءَ یک چیدگے ءِ دروشم ءَ جوڑ بنت ، جون ءِ ماہ ھم پہ بلوچ راج ءَ بے دروریں راجدپترے ءِ واھند انت ۔جون ءِ ماہ پہ بلوچ راج ءَ سال ءِ تھنا یک ماھے نہ اِنت بلکیں راجدپتر ، کربانی، گھگیری ءُ راجی زانشت ءِ زندگیں چیدگ اِنت، اے ماہ ءَ گوں ھمگرنچیں درد ءُ اندوھانی آشوب نہ ایوک ءَ بلوچستان ءِ سیاسی راجدپتر ءِ سر ءَ جھلانکی ءَ سان آورتگ بلکیں بلوچ راج ءِ مچانکی یات ءُ راجی پجّار ءَ ھم یک نوکیں رنگے داتگ۔
سرڈگار راجدپتر ءِ تہ ءَ ھر وھد ءَ دری تاکت ءُ زوراکانی زور ءِ چیر ءَ بوتگ ءُ اے سرڈگار ءَ مدام وشھال ءَ ایمن ءُ آباد دارگ ءِ واستا بلوچ ورنایاں مدام وتی سر ندر کتگ ءُ بلوچستان ءُ بلوچ سرڈگار دائمی زندگ داشتگ ءُ وتارا داں ابد راجدپتر ءَ نمیراں کتگ بلوچ ورنایانی کُربانیانی کسّہ راجدپتر ءِ تہ ءَ نکش اَنت۔ اے سرڈگار ءِ بچ پہ وتی راجی آجوئی ءُ زوراک ءِ زوراکیں تاکتانی ھلاپ ءَ ھرچ وڑیں کُربانی دیگ ءَ چک ءُ پد نہ بوتگ اَنت۔ بلوچ راج یک انچیں راجدپتری بھِشتے دار ایت کہ آ وتی ڈیھ ءِ تہ ءَ دری مردمانی زوراکی ،ءُ لٹ ءُ پل کنوک ءُ ایندگہ سازشانی دیم ءَ کربانی دیگ ءِ امل ءَ وتی راجی ننگ ءُ ھستانک ءِ چیدگ لیک اَنت ءُ بلوچ راجدپتر ھمے بامردانی تہ ءَ یکے شھید حمید بلوچ ءِ نام ءَ زانگ بیت کہ آ جون ءِ ماہ ءَ پاھو دیگ بیت ، وھدے اُمان ءِ سرکار ءَ بلوچ ءِ زھگاں وتی لشکر ءِ تہ ءَ بھرتی کنگ ءِ کوشست کنت کہ وتی ملک ءِ تہ ءَ برجاھیں زُپاری زرمبشت ءَ را ھلاس بہ کنت۔ شھید حمید ءَ اُمان ءِ سرکار ءُ آئی ءِ سامراجی ایجنٹانی کار ءِ ھلاپ ءَ زھرشانی کت ءُ 9 دسمبر 1979 ءَ امان ءِ لشکری افسرے ءِ سر ءَ تیرگواری کنت ءُ بدبھتی ءَ اُمان ءِ افسر رک ایت بلے حمید بلوچ دزگیر کنگ بوت انت۔
شھید حمید ءِ زند، آئی ءِ شھادت ءُ بلوچ راج ءَ آئی ءِ تچکیں کلوہ ھمے گپ ءِ منانک انت کہ ورنا ءِ کربانی تھریک ءَ تیلانک دنت۔ شھید حمید ءَ ھم وتی کُربانی ءَ گوں ورنایاں ھما جزم ءُ ھمت دات کہ اوشتگ ءَ نہ انت۔ ھزاراں ورنا ھمے کار ءِ بھر اَنت ءُ ھزاراں ورنا پہ اے مکسد ءِ گرگ ءَ زنداناں بند اَنت ءُ ھزاراں شھادت ءِ برزیں درجہ ءَ سر بوتگ اَنت۔ حمید بلوچ وتی واھگ ءِ تہ ءَ تپاکی، یکمشت ءُ مچ بوگ ءِ سر ءَ زور داتگ پرچا کہ آ یک دیر گندیں رھشونے ات ءُ دژمن ءِ رھبنداں چہ آشنا ات۔ شھید حمید بلوچ ءِ ھیال مدام مئے راھشونی ءَ کنت ءُ اے مئے پرز انت کہ ما حمید بلوچ ءُ اے دگہ شھیدانی رندگیری ءَ بہ کنیں ءُ بلوچ راجی زرمبش ءَ وتی منزل ءَ سر بہ کن ایں-
راجدپتر ءِ تہ ءَ جون ءِ ماہ یک ھاسیں ارزشتے دار ایت پرچا کہ ھمے ماہ ءَ بلوچ ءِ مزنیں رھشون نواب خیر بخش مری چہ جسمانی رنگ ءَ جتا بوت ءُ مرچی بلوچ ھماھی ءِ ھیال ءُ لیکھانی رندگیری ءَ کنگ ءَ انت ءُ دگنیا ءَ زانگ بنت ، درسگاہ آزادی نواب خیر بخش مری ءِ دھشت ءُ زند ءَ چندیں لبزاں گوں بیان کنگ ممکن نہ اِنت۔ نواب خیر بخش مری ءَ وتی سرجمیں زند بلوچستان ءِ آجوئی ءُ گلامی ءِ ھلاپ ءَ سکین ءَ گوازینت، آئی ءَ وتی ھیال ءُ لیکھانی سر ءَ ھچبر ھرچ وڑیں دزکشی نہ کت،آ داں گُڈّی ءَ وتی ھیالانی تہ ءَ مھکم بوت، آئی ءَ گران تریں جاوراں گوں مھکمیں وڑے ءَ دیمپانی کتگ۔
زندان ءُ زندان ءِ زھمت، ٹارچر، درانڈیھی ءُ وتی چُک ءِ شھادت ءِ سکی ءُ سوری برداشت کُت اَنت بلے وتی لیکہ ءَ چہ پد کِنز نہ بوت نہ ٹِکّ اِت ءُ نہ جھک اِت، بلکیں دژمن ءِ دیم ءَ چو کوہ ءَ اوشتات، آ اے گپ ءَ سرپداَت ءُ آئی ءَ اے باور ات کہ پہ بلوچ راج ءَ ابید آجوئی ءَ دگہ راہ ءُ درے نیست پمیشکا آ آجوئی ءِ راہ ءَ روان بوت ءُ بلوچ راج ءَ پہ بلوچستان ءِ آجوئی ءَ جنگ ءِ سکین داتگ ءُ ھلامی ءِ ھلاپ ءَ گھگیری ءِ ھیال دیم ءَ آؤرت۔ آئی ءَ پہ راجی سرپدی ءَ حق توار ءِ نام ءَ تربیتی سرکلے برجم داشت ءُ جھان ءِ سیاست ، بدلی ءُ راجی جُنزانی جھل ءُ بُرز ءِ بابت ءَ سیاسی ءُ پکری سرپدی ءِ دیم ءَ برتگ۔
جون 2005 ءَ بلوچستان ءَ بندات بوتگیں پوجی آپریشن ءَ پد بوتگیں وئیل ءَ بلوچ سیاست ءُ راجی زرمبش ءِ تہ ءَ نوکیں رنگ ءِ آؤرتگ، بلوچ راجدوستانی نزیک ءَ جون ءِ ماہ ھما کربانی جد ءُ جھد ءُ استکامت ءِ یات ءَ دنت کہ بلوچ راج ءَ وتی سیاسی ، چاگردی ءُ راجی ھکانی گرگ ءِ واستا داتگ انت ، ھمے سوب انت کہ جون ءِ ماہ مدام پہ بلوچ راج ءَ راجدپتری سیاسی ءُ زانشتی ارزشت ءِ دار ایت ، جون 2005 ءَ بندات بوتگیں پوجی آپریشن ءُ آئی ءَ پد نواب اکبر بگٹی ءِ شھادت ءَ بلوچ سیاست ءِ یک نوکیں دورے بندات کت جون 2005 ءَ بلوچستان ءِ دمگ ڈیرہ بگٹی ءُ کوھلو ءَ پوجی آپریشن بندات بنت بلوچ نیشنلسٹ پارٹیانی رد ءَ اے آپریشن ءَ چہ بلوچستان ءِ تہ ءَ سیاسی چست ءُ ایر گیش بوت انت ءُ بلوچ آجوئی جُنز ءَ را یک نوکیں رھبندے دات۔
جون ءِ ماہ پہ بلوچ راج ءَ اے واستا ھم سک باز ارزشت داریت کہ اے ھما ماہ انت کہ اے ماہ ءَ ذاکر مجید ءِ ڈاکٹر دین جان ءِ وڑیں سیاسی لیڈر زندانی کنگ بنت ، 8 جون 2009ءَ ذاکر مجید پاکستانی چیریں اِدارانی دست ءَ بیگواہ کنگ بیت 8 جون پہ بلوچ راج ءَ یک راجدپترے نہ انت بلکیں ھچبر ھلاس نہ بوکیں ازیت ءُ درد ءِ یک تورناکیں چیدگے۔ بلوچ کوم ھمک سال 8 جون ءَ بلوچ مسنز پرسنز ڈے ءِ روچ ءَ دار ایت اے روچ ھما بلوچ پسّگانی نام ءَ کہ آیاں پاکستان ءَ پہ زور گار ءُ بیگواہ کتگ اے روچ ھما ھزاراں نوجواں نودربر سیاسی کارکن زالبول ءُ پیر ءُ کماشانی نام ءَ انت کہ آ بس ھمے گناہ ءَ بیگواہ کنگ بوتگ انت کہ آیاں وتی پجار ءُ وتی زمین ءِ آجوئی ءِ گپ جتگ۔چوناھیگا سال ءِ درستیں ماہ بلوچ ءِ ھاتر ءَ یک مانا انت بلے اے باوست ءِ مکسد کیس اسٹڈی زیرگ انت-
تنھا یک ماھے مئے واستا چونیں دردناکیں ھست انت ۔ماں تنھا یکیں جون ءِ بابت ءَ جیڑگ ءَ اتَاں اناگت ءَ یکے ھال شنگ بوت کہ بی وائی سی ءِ سروک ڈاکٹر مھرنگ بلوچ ءُ سبگت اللّہ شاجی 22 جون ءَ یک دروگیں پندلے ءَ اُمر ءِ کیدے سزادیگ بوت آں ، ڈاکٹر مھرنگ ءِ گناہ بس ھمیش ات آئی مدام وتی ھک ءِ گپ جت ءَ وتی گار ءُ بیگواھیں مردمانی لوٹ کتگ ۔
ڈاکٹر ماہ رنگ ءُ شاہ جی ءِ امر کید ءِ سزا برزاں داتگیں لھتے وئیلانی داب ءَ بلوچ گوستانک ءَ نکش انت ۔ گوستانک اے گپ ءِ شون ءَ الم دنت کہ یک ماھے مئے واستا انکس ازیت ناک بوتگ گڑا بگندے سرجمیں سال پہ ماں کیامت انت کہ ھرچ گوستگیں ندر بوتگیں ساھانی یات ءَ گیج ایت ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
