بلوچی میوزک پروموٹرز سوسائٹی ءِ نیمگ ءَ بلوچی زُبان ءِ نامداریں گُشندہ اُستاد امام بخش مجنوں ءِ شرپ ءَ ماں آرٹس کونسل کراچی ءَ یک پُرمڑاھیں مراگشے برجم دارگ بُوتگ ۔مراگش ءِ جارچینی ءِ ڈبہ اسحاق خاموش ءَ گون بوتگ ۔ اے مراگش ءَ چہ سندھ ، بلوچستان ءُ مزن ھؤر ءَ اتکگیں بازیں مردُمے ءَ بھر زُرتگ ءُ مراگش وشنود کتگ ۔
مراگش ءِ بندات ءَ گَل ءِ کارمستر خلیل تگرانی ءَ تران کنان ءَ گوشتگ کہ ماں کراچی ءِ جُلگھیں شھر ءَ مھلوک ءِ مزنیں کساسے ءَ اے مراگش ءَ بھر زُورگ اے گپ ءِ گوٛاھی ءَ دنت کہ مھلوک ءِ بھیسہ پہ بلوچی میوزک پروموٹرز سوسائٹی ءَ برجم اِنت ءُ مھلوک وتی راجی اِزمکار ءُ گُشندھاں دوست دار ایت ءُ آھاں ھمے رنگ ءَ شرپ بکش ایت۔
اُستاد امام بخش مجنوں ءِ زِند ءُ اِزم ءِ درگت ءَ وحید نُور ءِ جارچینی ءَ اُستاد نُورمحمد نُورل، انجنئیر داؤد کلمتی ءُ اِسحاق خاموشؔ ءَ اُستاد مجنوں ءِ زِند ءُ اِزم ءُ نوکیں دؤر ءِ بلوچی ساز ءُ زیمر ءِ درگت ءَ گپ ءُ تران کُتگ ۔ وھدیکہ اُستاد امام بخش مجنوں ءَ وتی زیمری زند ءِ سپر ءِ بارو ءَ تران کُتگ ۔
اے مراگش ءَ بلوچی میوزک پروموٹرز سوسائٹی ءِ نیمگ ءَ چاپ ءُ شِنگ بُوتگیں سے ماھی تاک ’’زیمر‘‘ ءِ دیمدرائی ھم کنگ بوتگ ۔
اسحاق رحیم ءَ روکپتی بلوچستان ءِ نامداریں دونلی سازگر شیر محمد اسپندار کہ ھمے زوتاں بیران بُوتگ آئی ءِ زِند ءُ اِزم ءِ بارو ءَ تران کُت ءُ تلو ءِ سرا آئی ءِ دونلی ساز گوشدارینگ بوت انت ۔
رَند تِر ءَ مراگش ءَ اُستاد امام بخش مجنوں ءِ زِند ءُ اِزم ءِ بارو ءَ اسحاق خاموش ءِ نبشتگ ءُ رِد ءُ بند داتگیں ڈاکیومنٹری مزنیں پردھے سرا پیشدارگ بُوت۔
مراگش ءِ ساز ءُ زیمری بھر ءَ اُستاد نُور محمد نُورل، اُستاد امام بخش مجنوں، سلیم بلوچ، عارف نُور، جہانزیب عطا ءُ صمد مجید ءَ وتی وتی ازم ءِ درانگازی کُت ءُ گوشداروکاں آھانی اِزم ساڑات۔