ھُزدار : پاکستانی پوج ءِ آپریشن برجاہ ، آبادی سر ءَ شیلنگ

پاکستانی پوج ءِ نیمگ ءَ چہ ھُزدار ءِ جتاجتائیں دمگاں آپریشن ءِ دْرچ یکشل ءَ برجاہ ءَ اِنت-

گیشیں ھالانی رِد ءَ ھُزدار ءِ دمگ اورناچ سورگڑ ءِ دمگاں جتاجتائیں ھندانی سر ءَ پاکستانی پوج ءِ تیرگواریں ھیلی کاپٹرانی بال برجاہ-

ھُزدار ءَ اے وھد ءَ مزنیں کچے ءَ جھلی ءُ بُرزی آپریشن ءِ دْرچ یکشل ءَ برجاہ ءَ اِنت اود ءَ تھسیل وڈھ، اورناچ، زھری ءَ ھوار جتاجتائیں دمگ ءَ پوجی آپریشن ءِ تہ ءَ اِنت-

ھمے وڑ گوستگیں روچ ءَ وڈھ ءَ دراکھالہ گاسلٹی ءِ ھند ءَ پاکستانی پوج ءِ نیمگ ءَ چہ دمگی آبادی ءِ سر ءَ گولہ گواری ءُ شیلنگ کتگ، چریشی ءِ آسر ءَ یک مردمے بیران بیتگ ، وھدے کہ بازیں پس ءُ دلوت ھم مرتگ اَنت-

وئیل ءِ ھلاپ ءَ کھول ءَ دمگ ءَ لاش ءِ ھمراھی ءَ شھدگ سر ءَ نندانک داتگ زھرشانی نکش کتگ-

زانگ بہ بیت کہ ھمے ماہ ءَ پاکستانی پوج ءِ بُرزی آپریشن ءِ میان ءَ مستونگ ءِ دمگ کھڈکوچہ ءُ کنڈ عمرانی ءَ شیلنگ کنان ءَ دمگی آبادی نشانگ کتگ، چریشی ءَ مدرسہ ءَ ھوار نزیکیں لوگاں تاوان رس اِتگ-

ھمے وڑ ھاران ءَ ھم پاکستانی پوج ءِ نیمگ ءَ چہ شیلنگ ءِ آسر ءَ بازیں مال ءُ دلوتے مرتگ-