TBP Balochi

بلوچستان ءِ جتا جتائیں جاھاں پاکستانی پوج سلاہ بندین مردماں نشانگ جوڑ کتگ-

سر بیتگیں ھالانی رد ءَ بلوچستان ءِ پنجگور ءَ اُرش ءَ پاکستانی لشکر ءَ تاوان رس اتگ ءُ اے اُرش ءَ بازیں کارندہ بیران ءُ دو بکتر بندیں گاڑیاں ھم تاوان رس اتگ۔

پنجگور ءِ دمگ گوارگو ءَ مزنیں کساسے ءَ سلاہ بندیں مردماں پاکستانی لشکر ءِ بازیں گاڑی ءُ پیادگیں کارندھانی سر بستگ ءُ اُرش ءِ جوڑ کتگ کہ آ دمگ ءَ دیم ءَ روگ ءِ جھد ءَ بیتگ انت-

دمگی مردماں ٹی بی پی ءَ گوں تران کنان ءَ گْوشتگ کہ اے اُرش ءَ فورسز ءِ بازیں کارندہ بیران ءُ ٹپیگ بوھگ ءِ ھال ھست ءُ اے اُرش ءَ فورسز ءِ دگہ گاڑی آں ھوار دو بکتر بندیں گاڑیاں ھم تاوان رس تگ اَنت۔

اے درگت ءَ انگت ءَ واکداراں ھچ وڑیں ھال ءُ اھوال نہ داتگ۔

زانگ بہ بیت کہ گوستگیں روچ ءَ پنجگور ءِ چیدگی ءَ اُرش ءَ ھم فورسز ءَ را تاوان رس اتگ۔ انگت ءَ اے اُرشانی زمہ واری کس ءَ نہ زرتگ انت۔

ھمے وڑ ءَ ھاران ءَ سلاہ بندیں مردماں پوج ءِ سر ءَ اُرش کتگ –

وئیل مروچی سھب ءَ شال ءُ ھاران ءِ بنجاھی شھدگ ءِ سر ءَ کلی کریم بخش ءَ ھما وھد ءَ پیش اتکگ کہ پوج سر ءُ پر ءَ بیتگ-

دمگی مردمانی رد ءَ اُرش ءَ پورسز ءَ پشتکنزی کنگ کپتگ –

بلوچستان ءِ دمگ کچھی ءَ پاکستانی پوج ءِ کاروان ءِ سر ءَ بیتگیں اُرشانی زمہ واری بی آر جی ءُ یو بی اے ءَ منّ اِتگ اَنت-

یونائیٹڈ بلوچ آرمی ءِ جارکش مزار بلوچ ءَ شنگ کتگیں درشان ءِ تہ ءَ گْوشتگ کہ کچھی ءَ بوتگیں بمب اُرش ءِ زمہ واری منّ اِتگ-

جارکش ءَ گوشتگ کہ یونائیٹڈ بلوچ آرمی ءِ سرمچاراں مروچی سُھب کساس 8:30 ءِ نزیک ءَ کچھی ءِ بُنجاھی شھر ڈھاڈر ءُ سنی ءِ میانی دمگ چیگڑدی ءَ زورگریں پاکستانی آرمی ءِ ھپت گاڑیانی سر ءَ ھمگرنچیں کاروان ءِ تہ ءَ ھستیں یک گاڑی یے چیرکتگیں بمب ءَ چہ ھما وھد ءَ نشانگ کتگ وھدے آ وتی بُنجاھی چیک پوسٹ ءِ نیمگ ءَ روگ ءَ بیتگ اَنت تراک ءِ آسر ءَ ھشت کارمند مرتگ وھدے کہ دو سک ٹپی بوتگ اَنت-

جارکش ءَ گْوشتگ کہ اشی ءَ پد کاروان ءَ ھوار پوج ءِ گوما میڑ ءَ پد مئے سرمچاراں بیڑ جن ایں جنگی رپکانی سر ءَ کار کنان ءَ پہ سلامتی دراھگ ءَ سوبمند بیتگ اَنت ءُ اشی ءِ زمہ واری ءَ مئے گل یو بی اے منّ اِیت-

ھمے وڑ بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں مروچی سُھب ءَ چہ بیگاہ ءَ تاں سرمچار ءُ زورگریں دُژمنیں میڑ برجاہ بیتگ چریشی ءَ آسر ءَ زورگریں پوج ءِ دہ کارمند جاہ پہ جاھی مرتگ وھدے کہ بازیں کارندہ سک ٹپی بیتگ اَنت – دوستین بلوچ

جارکش ءَ گْوشتگ مئے سرمچاراں بلوچستان ءِ دمگ کچھی، ڈھاڈر ءُ سنی ءِ میانی دمگ ءَ زورگریں پاکستانی پوج ءِ کیپٹن عمر ءِ سروکی ءَ سبی ءَ چہ سنی ءَ رؤکیں ایف سی ءِ کاروان سنگر گپتگ ءُ نشانگ کتگ- سرمچاراں سک نزیک ءَ چہ وتکار ءُ مزنیں سلاھاں چہ کاروان ءِ سر ءَ اُرش کتگ ءُ چریشی ءِ آسر ءَ زورگریں پوج ءِ شش کارمند جاہ پہ جاھی مرتگ اَنت ءَ بازیں کارمندے یے سک ٹپی بیتگ اَنت-

جارکش ءَ گْوشتگ کہ اے اُرش ءِ میان ءَ کُمک ءِ ھاتر ءَ آؤکیں دومی کاروان ہیشگامی جُھد کتگ کہ راہ سر ءَ پیسر ءَ سنگر گپتگیں سرمچاراں تُرندیں اُرش ءِ نشانگ کتگ- اے اُرش ءِ آسر ءَ زورگریں دُژمن ءِ چار کارندہ جاہ پہ جاھی مرتگ ءُ بازین ئِے سک ٹپی بیتگ اَنت-

جارکش ءَ گوشتگ کہ اُرشاں پد پوج ءَ وتی لاش ءُ ٹپی کارمندانی ھیلی کاپٹراں چہ چست کتگ ءُ برتگ اَنت وھدے کہ بے دلیں پوج ءَ اے تُرندیں اُرشاں چہ تُرس آماچ بوتگ ءُ لس آبادیانی سر ءَ ھیلی کاپٹراں چہ شیلنگ ءُ بازیں ماٹر گولہ آس داتگ مئے سرمچار پہ سلامتی دراھگ ءَ وتی مُھریں اوتاکاں سر ءَ بوتگ اَنت-

درشانانی گُڈی ءَ دوئیں گلاں اُرشانی زمہ واری منّ اِتگ اَنت گْوشتگ کہ مئے اے وڑیں اُرش بلوچستان ءِ وتواجھی ءَ تاں برجاہ بنت-

ڈیجیٹل کتابجاہ ھزدار ءِ نودربراں وتی زانشتی ھکانی پھازگے ھاتر ءَ ایمنیں روانک ءِ کش اتگ کہ اودا نودربر ءُاستاداں ھوار لس مھلوک ءَ بھر زرتگ ۔

روانک ءِ ھلاسی ءَ پد دمگی واکداراں ڈیجیٹل کتابجاہ ءِ بنجاھی گیٹ کبل کتگ ، وھدیکہ بازیں نودربرانی گوم ءَ ردیں رویشت داشتگ ۔ کتابجاہ ءِ بند بوگ ءَ پد نودربر دگ ءِ کش ءَ نندگ ءُ وانگ ءَ لاچار بوتگ انت ۔

ھمے وھد ءَ درنگاز کنوکاں گوشتگ کہ اے بژن ءُ پدردی جاور ھال انت ۔

نودربرانی گوشگ انت کہ آیانی گوں ھچ کس ءُ ادارھاں گوں زاتی بگیرداری ءِ نیست وھدیکہ آیانی زھرشانی ایمنیں زھرشانی ئے ءُ آیانی لوٹ بس وتی بنکی زانشت ءِ ھکانی پھازگ انت ۔

نودربراں بلوچستان ءِ سروزیر ، کلات ءِ کمشنر ءُ ایدگہ واکداراں گوں لوٹ کتگ کہ آ زوت ءَ زوت گامگیج بہ زور انت ءُ اے جیڑہ ءَ تچکی ءَ گیشگیوار بہ کن انت تانکہ وانگ ءُ زانگ برجاہ بہ بیت ۔

نودربراں گوشتگ کہ اگاں آیاں لوٹ منگ نہ بوت انت گڈا باندا بنجاھی شھدگ ءِ سرا نندانک دئینت کہ اشی ءِ درسیں زمہ دمگی واکدارانی سرا لڈگ بیت ۔

بلوچ یکجھتی کمیٹی ءِ رد ءَ راجی مچی ءَ دو سال سرجم بوگ ءَ شال ءِجتا جتائیں ھند ءُ دمگاں راجی مچی ءِ راجدپتری ارزشت سرپدی داتگ ۔

بی وائی سی ءِ رد ءَ اے درگت ءَ صوفی نور محمد اسٹریٹ (بروری) ہدہ ، کلی اسمائیل ءُ گوہر آباد ءَ پنتاک بھر کنگ بوتگ ۔ وھدیکہ ھزار گنجی ءَ پنتاک بھر کنگ ءَ ھوار ھوار دیوال نبیسی ، کارنر میٹنگ ءِ ھم برجاہ داشتگ کہ ھندی مردمانی گوم ءَ تران کنگ بوتگ ءُ آ راجی مچی ءِ ارزشت ءِسرا چمشانک دیگ بوتگ ۔

ھمے درگت ءَ چہ مھلوک ءَ لوٹ کنگ بوتگ کہ آ اے زرمبشت ءَ یاد بہ دار انت ، پرچاکہ آئی ءِ جھد ءُ سیادی ءِ پھازگ ، ناھکیانی بگیری ءَ یکمشت بوگ ءُ اوشتگ مئے درسانی زمہ واری ایں ۔

بلوچستان ءِ دمگ کچھی ءَ پوج ءِ سر ءَ سلاہ بندیں مردماں اُرش کتگ ءُ دومی نیمگ ءَ بلوچ سلاہ بندیں گل بلوچ ریپبلکن گارڈ ءَ اُرش ءِ زمہ واری من اتگ ءُ گوشتگ مئے اُرش داں انگت ءَ برجاہ انت-

بلوچ ریپبلکن گارڈز ء جارکش دوستین بلوچ ءَ شنگ کتگیں درشان ءِ تہ ءَ گْوشتگ کہ سرمچاراں مروچی سُھب ءَ ھپت ءَ زورگریں پاکستانی پوج ءِ دو جتاجتائیں کاروان سر ءَ اُرش کتگ اے وھد ءَ ھم یکشل ءَ برجاہ ءَ اِنت-

جارکش ءَ گوشتگ اے دراجیں میڑ ءِ سرجمیں ھال ءَ زوت رسانکدر ءَ شنگ کنگ بنت انت-

تربت ءِ دمگ درمکول پیدارک ءَ چارشمبے ءِ روچ ءَ ناشناسیں سلاہ بندیں پرپٹ سواریں مردماں تیرگواری ءِ آسر ءَ سے مردم بیران بیتگ اَنت-

تیرگواری ءِ آسر ءَ سے مردم سک ٹپی بیتگ اَنت اشی ءَ پد سئیں جاہ پہ جاھی بیران بیتگ اَنت- پولیس ءِ واکدار ءَ وئیل راست کنان ءَ گوشتگ کہ بیران بیتگیں مردمانی پجّار شاہ بیگ ء سردار عزیز، امان اللہ ء شیر محمد ءُ التاپ حسین ء مراد نام چہ بیتگ اَنت- واکدار ءَ سئیں مردم تیرگواری ءِ سوب ءَ بیران بیتگ اَنت-

دمگی اِھوالکار ءِ رِد ءَ بیران بیتگیں مردمانی پجّار شاہ بیگ سردار عزیز ءِ چُک بیتگ – سردار عزیز ءُ آئی ءِ چُکانی درگت ءَ چہ گوستانک ءَ اے بھتام جنگ ءُ آیگ ءَ اِنت آ ھکومتی سروکی ءَ کارکنوکیں یک سلاہ بندیں ڈیتھ اسکواڈ ءِ سروکی ءَ کنگ اَنت-

وئیل ءِ سوب انگت زانگ نہ بیتگ نانکہ وئیل ءِ زمہ واری دگہ گلے ءَ زرتگ-

بلوچستان ءِ بنجاھی شھر شال ءَ یک مردمے بیگواہ ، نوشکی ءَ آپریشن لوگ لوگ پٹ ءُ ھنڈ، بازیں مردمے دزگیر، زامران ءُ بلیدہ ءَ آپریشن، ڈرون اُرش-

سر بیتگیں ھالانی رد ءَ شال ءِ دمگ سریاب دگ ءَ یک ورنایے آوار جنگ ءَ پد بیگواہ –

کھول ءِ رد ءَ دوازدہ جون ءَ شال سریاب دگ ءَ سی ٹی ڈی ءَ نور زیب ء دوست مھمد جھمنند منگچر آوار جتگ ءُ بیگواہ کتگ-

کھول ءِ رد ءَ نور زیب فرسٹ ائیر ءِ نودربرے کہ آ آوار جنگ ءَ پد بیگواہ انت-

ھمے وڑ ءَ نوشکی ءِ دمگ غریب آباد ءُ کش ءُ گوری دمگاں لشکر ءَ بیڑ برتگ ءُ لوگ لوگ ءَ پٹ ءُ ھنڈ کتگ ءُ بازیں مردمانی آوار جنی ءِ ھال انت-

دمگی مردمانی رد ءَ پاکستانی پوج ءَ غریب آباد ءَ گوستگیں روچ ءِ آسر ءِ وھد ءَ کاروائی کتگ ءُ بازیں مردمے کہ آیانی تہ ءَ کماش ءُ ورنا ھوار انت-

ھمے وڑ ءَ زامران ءِ جالگی ءُ کش ءُ گوراں پاکستانی پوج ءَ آپریشن بندات کتگ ءُ پندی کارندہ بازیں کچے ءَ بھر زورگ ءَ انت-

ھمے وڑ ءَ بلیدہ ءَ ڈرون جھازاں اُرش کتگ- بلے واکداراں اے درگت ءَ انگت ءَ ھچ وڑیں اھوال نہ داتگ انت-

ھمے وڑ ءَ کچھی ءُ سنی ءَ پاکستانی پوج ءُ سلاہ بندانی میان ءَ جنگ ءُ چوپ بیتگ کہ ھمے دمگ ءَ پوج ءِ گاڑی بمب تراکے ءِ ھم نشانگ کنگ بیتگ-

سرمچار کَے انت؟

نبشتہ کار: ماھجان کومی

دی بلوچستان پوسٹ

من ھر وھد ءَ کہ ننداں، گیگ ءُ موہ باں گڑا ھما کُنگریں اوبادگانی بابت ءَ جیڑاں کہ آ سرمچار ءِ نام ءَ زانگ بنت۔ سرمچار کَے اَنت؟

کجام مَردم سرمچار گشگ بنت؟ سرمچار چوں جوڑ بنت؟ لاچاری، زِبَھری، نیزگاری ءُ بیوسیں مردمےءَ زور اِیت ءُ سرمچار جوڑ کنت یا ناں سرمچار بوگ انگت ایشاں چہ بالاتریں ھیالے؟ اگاں چارگ بہ بیت گڑا سرمچار ھر کس گشگ نہ بیت۔ بلکیں سرمچار ھما مردم گشگ بنت کہ آ نہ تھنا وتی ساہ ءُ سراں چہ سرگوز اَنت، بلکیں وتی زند ءُ مرگ ءِ پیسلہ ءِ زورگ ءَ چک ءُ پد اوں نہ بنت۔ آ اے پیم نہ جیڑ اَنت کہ مارا زورگیریں پاکستان ءَ لاچار کتگ، بیوس کتگ، نیزگاری ءِ کٹ ءَ رسینتگ یا زِبھریں زندگی ءِ آماچ کتگ، گڑا پمیشکہ ما آئی ءِ ھلاپ ءَ جنگ ءَ در اتکگ ایں ءُ سرمچار جوڑ بوتگ ایں۔ پرچا کہ آ جیڑ اَنت زِبھری، لاچاری، نیزگاری ءُ بیوسی درست گوں گلامی ءَ بندوکیں چیز اَنت، ایشاں چہ جتا نہ اَنت۔ پمیشکہ سرمچار ھما مردم گشگ بنت کہ وتی زات ءَ چہ در کپ اَنت۔ پہ وت ءَ اَنچیں کِشکے گچین کن اَنت کہ آئی ءِ راہ آجوئی ءُ وشیں باندات، ایمنی، پُر آسراتی، یک ءُ دومی ءَ گوں سکّی ءُ وشیانی شریداری ءِ منزل ءَ داں روت سر بیت۔ ھمے دراجیں کشک ءِ نام بلوچستان ءِ آجوئی اِنت۔ اے دراجیں آجوئی ءِ سپر ءَ ھمک مَردم بھر زرت نہ کنت پرچا کہ پریشی ءَ مزنیں جگرے لوٹ اِیت، ھما مردم ھوار بوت کنت کہ آئی ءَ بلوچی پوشاکے گور ءَ اِنت۔

پمیشکہ سرمچار ھما مردم گشگ بنت کہ آ چاگرد ءِ درچتگیں ءُ گچینیں مردم اَنت۔ بہ کولء شھید گلام محمد ئیگ ءَ” ما اے گپ ءَ نہ گُش ایں کہ جنگ (پاکستانءَ) مئے سر ءَ مُشتگ، بلکیں اے جنگ ما بندات کتگ ءُ اے جنگ ءَ ما وت آسر کنیں۔ “ اے جنگ بلوچ سرمچاراں پرچا بندات کُتگ؟ پرچا کہ بلوچ سرمچار یک در ابرمی ریاستے ءِ ھلاپ ءَ جنگ ءَ اَنت، ھما ریاست کہ آئی ءَ جتائیں راجانی نہ تھنا زمین گوں وت ءَ زور ھوار کتگ بلکیں آیانی جتائیں دودمان، زبان، رسم ءُ رواج، بندپتر، راجدپتر ھم زورانسری ھوار کتگ اَنت۔ بلوچ سرمچار ھمے زورگیریں ریاست ءِ ھلاپ ءَ وتی جنگ ءِ نہ تھنا جار پرّینتگ بلکیں آئی ءَ ھلاپ ءَ یک مھکمیں جنگے کنگ ءَ اَنت۔ دنیا ءِ بندپتر ءَ ھرچ در ابرمی ریاستے کہ جوڑ بوتگ گڑا آیانی پالیسی مدام زوراکی ءِ سر ءَ ایر بوتگ اَنت ءُ پاکستان ھمے وڑیں ریاستے کہ آئی ءِ نز ءَ بلوچ سرڈگار ءِ سر ءَ نشتگیں بلوچ لیلُک اَنت، آ اد ءَ کس ءَ انسان نہ لیک اِیت۔ آ مدام زلم ءُ زوراکی ءِ سر ءَ بیسہ دار اِیت، پمیشکہ اے وڑیں در ابرمی ریاستانی کار مدام Three Alls پالیسی ءَ گوں بندوک اِنت، بزانکہ درستاں بہ کُش(چکچینی)، لوگاں ماندار ءُ لُٹ ءُ پُل بہ کن۔ اے وڑیں درابرمی ریاستانی پالیسی مارا اسرائیلی ءُ پاکستان وڑیں جاھاں گندگ ءَ کیت۔ پمیشکہ ما مرچی بچار ایں پاکستان ءِ وڑیں یزید ءُ زالم بلوچ پُسگاں چُکچین کنگ ءَ انت، مئے مات، گوھار، براتاں وتی تھاریں کوٹیاں بندیگ کنگ ءَ انت، آیاں کُشگ ءُ دور دیگ ءَ انت۔ اے زالمیں دژمن مئے تنگوئیں بچاں سرجمیں دنیا ءِ دیم ءَ گران کنگ ءَ انت۔ آیاں سالاں سال گار کنگ ءَ انت۔ اے وڑیں زوراکیں چاگرد ءَ سرمچارے ءِ پیداک بوگ ابرمی پدکردے۔ پرچا کہ وھدے تئی مئے زالبول دگانی سر ءَ وتی براتانی اکساں زور انت ءُ کاینت، پریات کن اَنت بلے آ ایشاں ھم اوپار نہ کنت کہ شما پرچا وتی مردمانی نام ءَ گر ات۔ اے وڑیں جاوراں سرمچار جوڑ بوگ ءَ ھچ پیمیں تاکت داشت نہ کنت۔ ھمے وڑیں ساھتاں سرمچار پیسلہ زور اَنت ءُ کوہ ءَ در کپ اَنت دانکہ چاگرد ءِ توکءَ زلم ءُ زوراکی ءِ ھلاس کُت بہ کن اَنت۔

سرمچار چاگرد ءِ ھما مردم اَنت کہ آ باسما اَنت، زانتکاریں مردم اَنت۔ درستاں گیش پہ سرمچاری ءِ مزنیں جگرے لوٹ اِیت دانکہ آ پیسلہ کُت بہ کنت کہ منی مرگ ءِ گچین ءِ مانا چی اِنت؟ سرمچار زانت منی مرگ آؤکیں پدریچ ءِ وشیں باندات اِنت، پمیشکہ آ چہ مرگ ءَ نہ ترس اِیت۔ اے ھما مردم اَنت کہ چاگرد ءِ توک ءَ وانندگ اَنت، پھتوئیں مردم انت، ھچ پیمیں ناھکی ءُ زوراکیبءَ اوپار کُت نہ کن اَنت۔ اے چاگرد ءِ درچتگیں بچ اَنت۔ چوش ما بچار ایں مئے چاگرد ءَ َھزاراں بلوچیں مھلوک ھست اِنت بلے ھر کس سرمچار بوت نہ کنت۔ اے ھما پُسّگ اَنت کہ آیاں وتی گلامی ءِ مارشت ھست اِنت، آ زان اَنت کہ گلامی چونیں نادراھی یے، پمیشکہ گلامیں چاگرد ءَ زندگ ءِ مانا مرگ اِنت۔

انچوش کہ یک چاگردے وھدے ایردست بوت گڑا آ چاگرد ءَ ساہ کَشگ مشکل بیت، اے پیمیں ساھتاں تھنا ھما مردم وتی ساہ ءَ رکینت کنت وھدے کہ آ سرمچاری پگر ءَ بہ زور اِیت، آ گلامی ءَ سما بہ کنت۔ وھدے کہ تو گلامی ءَ سما کن ئے گڑا تو وت نشت نہ کن ئے۔ نوں سرمچار پمیشکہ گشگ بنت کہ آ وتی ساہ ءُ سراں چہ سر گوز انت۔ سرمچار وانندگ ءُ زانتکاریں انسان اَنت۔ آ سرمچنڈ ءُ سرمتاب اَنت۔ آ وتی مرگ ءَ نہ چار اَنت۔ وھدے کہ آ بلوچستان ءِ آجوئیءَ وتی سپر ءَ بنا کن اَنت گڑا آ وتی بارو ءَ ھچ وڑ ءَ نہ جیڑ اَنت۔ سرمچار بھادر اَنت، ماتانی شیریں بچ ءُ جنک اَنت۔ ھما مردم سرمچار گشگ نہ بنت کہ وتی زات ءِ بارو ءَ جیڑ اَنت نَیکہ ھما مردم گشگ بنت کہ آیاں دنیا ءِ ڈگری گپتگ بلے وتی گلامی ءِ بابت ءَ نہ جیڑ ات کُت کن اَنت نَیکہ پیسلہ زرت کن اَنت۔

پمیشکہ مروچی سرمچار ءِ ھیال ءُ لیکہ بلوچ چاگرد ءَ ھمیش اِنت کہ آ مسالی کردار اَنت، درچتگیں پُسگ اَنت ءُ راج ءِ گچینی اوبادگ اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

سلاہ بندیں مردماں بارکھان ڈپٹی کمشنر دزگیر کنگ ءَ پد کُشتگ-

بلوچستان ءِ دمگ چہ بارکھان ءَ ھالانی رِد ءَ گھاٹہ چوک ءِ نزیک ءَ سلاہ بندیں مردماں ناکہ بندی برجاہ داشتگ گاڑی پٹ ءُ پول کتگ اَنت ءُ بازیں کلاکاں تاں ناکہ بندی جتگ-

ھالانی رِد ءَ اے میان ءَ سلاہ بندیں مردماں پجّار کنگ ءَ پد ڈپٹی کمشنر بارکھان مرید بگٹی ءُ آئی ءِ پھازدارانی ھمراھی ءَ آوار جنگ ءَ پد وتی ھمراھی ءَ برتگ-

تھکاری وزیر بلوچستان ءِ جارکش ءِ رِد ءَ سلاہ بنداں ڈپٹی کمشنر مرید بگٹی کُشتگ-

زانگ بہ بیت کہ اے دمگ ءَ بلوچ آجوئی لوٹوکیں سلاہ بندیں گل پُرکار اَنت ءُ پاکستانی پوج ءَ ھوار دگہ ادارھانی سر ءَ اُرشاں ھمگرنچ بیتگ اَنت، بلے مروچی بیتگیں وئیل زمہ واری انگت ھچ گل ءَ نہ زرتگ-

بلوچستان ءِ دمگ ھُزدار ءِ ھند اورناچ ءِ کوھی دمگاں گوستگیں سے روچ ءَ چہ پوجی آپریشن برجاہ ءَ اِنت، اے میان ءَ تیرگواریں ھیلی کاپٹر ءُ ڈرون بالگرد کارمرزی ھال اِنت-

دمگی اِھوالکار ءِ رِد ءَ آپریشن ءِ میان ءَ جتاجتائیں کوھی ھندانی سر ءَ ھیلی کاپٹراں بُرز بالی ءَ گندگ بیتگ، وھدے کہ دمگاں ھیلی کاپٹراں چہ شیلنگ کنگ ءِ ھال اِنت-

اِھوالکار ءِ گوشگ اِنت کہ پاکستانی پوج ءِ نیمگ ءَ چہ دمگ ءَ جھلی ءُ بُرزی آپریشن برجاہ ءَ اِنت-

بلے واکدار ءِ نیمگ ءَ چہ تنی وھدے آپریشن ءِ ھچ وڑیں ھال دیم ءَ نیتکگ- اے کاروائی ءِ میان ءَ ھچ وڑیں جانی تاوان، دزگیری یا دگہ تاوانانی درگت ءَ ھچ وڑیں ھال دیم ءَ نیتکگ-