TBP Balochi

اوگان سیکورٹی بنشون ءَ گشتگ کہ اسلامی امارات اوگانستان ءِ فورسز ءَ برجاھیں پسھی اُرشانی وھد ءَ پاکستانی پورسز ءِ کم چہ کم ھشت ءُ دوازدھیں پوسٹ دستیگ کتگ انت۔

بنشون ءِ رد ءَ اے پوسٹ ننگرہار ءِ دمگ گوشتا ءُ استان کنڑ ءِ کش ءُ گور ءِ دمگاں کنٹرول کنگ بوتگ انت۔

بنشون ءِ گشگ انت کہ رودراتکی سیمسر ءِ استاناں ننگرہار، نوریستان، کنڑ، خوست، پکتیا ءُ پکتیکا ءَ ھوار پاکستانی لشکر ءِ گوما جنگ ءُ چوپ برجاہ انت۔ ایشانی گوشگ انت کہ جنگ ءِ وھد ءَ اوگان لشکر ءَ پاکستانی بازیں پوزیشن وتی دست ءَ کتگ انت۔

وزارت دفاع ءِ رد ءَ پاکستانی فوجی ھکومت ءِ نیمگ ءَ چہ بالی اُرش ءَ پد سیمسر ءِ دمگاں کاؤنٹر آپریشن بندات کنگ بوتگ۔

اوگانستان ءِ وزارت دفاع ءِ نیمگ ءَ چہ جاڑی بوتگیں بیان ءِ تہ ءَ گوشت کہ خوست، پکتیہ ءُ نوریستان ءَ ھوار سیمسر ءِ جتا جتائیں دمگانی تہ ءَ آپریشن برجاہ اِنت۔

اے درگت ءَ 201 خالد بن ولید کور ءِ جارکش ءَ گْوشتگ کہ رودراتکی استانانی سیمسر ءِ لشکر ءَ ”پاکستان ءِ بالی اُرشانی پسو ءَ“ سرجمی ءَ جنگ بندات کتگ۔ اے بابت ءَ پاکستانی کارندھانی نیمگ ءَ چہ ترندیں پسھی نہ بوتگ۔

اوگان رسانکدر ءَ سیکورٹی بنشون ءِ رد ءَ ھال داتگ کہ اے جنگ ءِ درچکش بیت کنت بلے بیران بوتگیں مردمانی کساس ءِلس رنگ ءَ پدر کنگ نہ بوتگ انت۔

کراچی سندھ حکومت نیمگ ءَ چہ سیکیورٹی ھائی الرٹ جنگ پد ءَ جتاجتائیں دمگاں پولیس، رینجرز ءُ سی ٹی ڈی ءِ کاروائیانی تہ ءَ تُرندی گندگ آیگ ءَ اِنت- لوگاں سرچ آپریشن ھاسکار بلوچ آبادیاں کنگ بیگ ءَ اِنت اود ءَ لیاری، ملیر ءُ دگہ دمگ ھوار اَنت-

سانمندیں دمگی مردمانی رِد ءَ لوگانی سر ءَ بیڑ ءِ میان ءَ ناشرکاری، زالبولانی گوما نامناسبیں رویشگ، زاہ ءُ بد کنگ ءُ لوگی سامانانی پٹ ءُ پول وئیلانی تہ ءَ گیشی اتکگ-

دمگی اِھوالکار ءِ گوشگ اِنت کہ بیڑانی میان ءَ شھریاں زاتی سرپدی یکجاہ کنگ بیگ ءَ اِنت ءُ باز ورنا زورانسری بیگواہ کنگ بیتگ اَنت- شھریانی رِد ءَ آیاں انچیں جُست کنگ بیت آیاں چُشیں ھچ جرم ءَ گوں سیادی نیست، وھدے کہ باز مردمانی سر ءَ انچیں کارانی منّگ ءِ ھاتر ءَ زور دیگ بیت کہ آ آیاں ھوار نہ اَنت-

انّیگاں نوکیں کار دیم ءَ آورتگ اِت کہ چریشی ءِ رِد ءَ ورنایاں دگانی سر ءَ بائیو میٹرک بزانکہ آیانی لنکک ءُ دگہ چیز گرگ بنت – اگاں کسے ءِ ھلاپ ءَ گوستانک ءَ کجام وڑیں ایف آئی آر نکش اِنت گُڑا آئی ءَ ناشرکاری ءِ شک تھانہ برگ بنت، ھالانکہ مردمانی ایف آئی آر آمیدگس پہ گوشدارگ اِنت یا کہ ھلاس بیتگ-

شھریاں جست چست کتگ کہ سیکیورٹی ادارھاں اے مستری کجام کانود ءِ رِد ءَ گون اِنت کہ آ کوھنیں ایف آئی آر ءِ بُنیاد ءَ مردماں دزگیر بکنت ءُ جتاجتائیں ایف آئی آر ءِ رِد ءَ نوکیں کیس جوڑ بکنت-

دمگ مردمانی گوشگ اِنت کہ اے گامگیج ءَ چہ شھریاں تُرس بے ستکی ودی بیتگ ءُ لس مردمانی ھمکروچی زند ءِ سانمند بیگ ءَ اِنت- آیانی لوٹ اِنت کہ بیڑ ءُ دزگیریاں کانود ءِ تہ ءَ بیار اَنت ءُ شھریاں بُنیادی ھک شرپ ءِدلجمی جوڑ بکن اَنت-

تنی ھدے پولیس ، رینجرز ءُ سی ٹی ڈی نیمگ ءَ اے درگت ءَ ھچ وڑیں درشان دیم ءَ نیتکگ-

سوراب ءَ شال ءُ کراچی ءِ شھدگ ءَ الحرمین ھوٹل ءِ نزیک ءَ پولیس ءِ بکتر بند گاڑی ناشناسیں مردماں بمب تراکے ءِ نشانگ کتگ –

تراک ءَ گاڑی ءَ ھوار پھل پرشتگ ءُ گاڑی ءَ سواریں کارندھانی جانی تاوان ءِ ھال انت- لس اھوالانی تہ ءَ گاڑی ءَ سواریں یک پولیس کارندھے بیتگ کہ آئی ءِ پجار خلیل احمد ءِ نام ءَ زانگ بیتگ-

اھوالانی رد ءَ تراک ءِ توار دور دور ءَ گوشدارگ بیتگ –

پولیس بنشن ءِ رد ءَ تراک ءَ پد پولیس ءُ دگہ سیکیورٹی کارندہ ویل جاہ ءَ سر بیتگ انت ءُ تراک ءِ جاہ ءَ پٹ ءُ پول کنگ ءَ انت-

بلوچ لبریشن آرمی ءَ وتی آفیشل چینل ھکل ءَ آپریشن ھیروپ ءَ ھواریں دگہ شش نمیرانیں ھمراھانی اکس ءُ اھوال شنگ کتگ انت-

ھکل ءِ رد ءَ بنداتی نمیرانین ءِ پجار فدائی عنایت اللہ پنام ءِ بابر ے حاجی غنی بنگلزئی جھمنند اسپلنجی مستونگ ءِ نام ءَ کتگ-

آئی ءَ سال دوھزار ءُ بیست چار ءَ اپریل ءَ بی ایل اے ءَ بھر زرتگ ءُ اگست دو ھزار ءُ بیست ءُ چار ءَ مجید بریگیڈ ءِ بھر جوڑ بیتگ-

گل ءِ رد ءَ فدائی عنایت اللہ یک زانتکاریں سرمچارے بیتگ ءُ آئی ءِ جنگی زانشت ءَ زوت آ گل ءَ ناگاھو ءَ گل ءِ گشتی کمانڈر کتگ – ءُ آئی ءَ وتی ھمراھانی ھیلکاری ءَ مزنیں کرد پیلو کتگ انت-

آئی ءَ گوشتگ فدائی عنایت اللہ آپریشن ھیروپ ٹو ءَ شال ءَ جاڑیگ بیتگ ءُ شال ءِ وڑیں ترندیں جاھاں آ فرنٹ لائن ءَ بیتگ ءُ دشمن ءَ جنگ کنان ءَ دشمن پشت کنز کتگ –

آئی ءَ گوشتگ جنگ ءِ وھد ءَ آ گوں وتی ھمراھاں پیشگامی کنان ءَ ریڈ زون ءِ نزیک ءَ ریل اسٹیشن ءَ سر بیتگ کہ اود ءَ آئی ءَ داں بازیں اداران جنگ ءُ چوپ کنان ءَ داں گڈی وھد ءَ نمیران بیتگ-

دومی ءِ پجار فدائی نعمت اللہ گرگناڑی پنام ءِ جاوید ء میر احمد گرگناڑی جھمنند کلہ پدّا مستونگ ءِ نام ءَ کتگ-

ھکل ءِ رد ءَ آئی ءَ سال دوھزار ءُ بیست ءُ پنچ ءَ بی ایل اے ءَ ھوار بیتگ ءُ سال دوھزار ءُ بیست ءُ پنچ ءَ مجید بریگیڈ ءَ بھر زرتگ-

ھکل ءِ رد ءَ فدائی نعمت اللہ گرگناڑی جنگ ءَ بے درور ءُ مھکمیں دروشمانی چیدگ بیتگ- آئی ءَ گوشتگ ناگیگیں جاوراں ھم آئی ءَ وتی کرد پیش داشتگ ءُ بنداتی لڑاں آئی ءَ مزنیں کرد پیلو کتگ انت-

ھکل ءِ رد ءَ فدائی نعمت اللہ آپریشن ھیروپ ٹو ءَ مستونگ ءَ جاڑیگ بوتگ ءُ اود ءَ آئی ءَ دشمن ءِ بنجل پروشت ءُ پروش کتگ ءُ بے ستکی کتگ انت-

ھکل ءِ رد ءَ آئی ءَ ھیڈکوارٹر ءِ تہ ءَ دور کتگ ءُ ھمود ءَ جنگ کنان ءَ نمیران بیتگ-

سیمی ءِ پجار فدائی قدرت اللہ کرد پنام ءِ مجید بلوچ ء بدل خان کرد جھمنند مَرو اسپلنجی مستونگ ءِ نام ءَ کتگ-

ھکل ءِ رد ءَ آئی ءَ سال دوھزار ءُ بیست ءُ چار ءَ بی ایل اے ءَ ھواری زرتگ ءُ پد ءَ سال دوھزار ءُ بیست ءُ پنچ ءَ مجید بریگیڈ ءَ ھوار بوتگ ءُ شال ءَ ریڈ زون ءَ نمیران بوتگ-

بی ایل اے ءَ فدائین اُرشکار ءِ درگت ءَ گوشتگ شھید فدائین قدرت اللہ کرد پنام ءِ مجید بلوچ ھما ورنایانی تہ ءَ ھوار اِنت کہ آئی ءِ زند ءِ سفر کسان اِنت بلے مانا دراج اِنت۔ آئی ءِ جھد ھما نسل ءِ نمائندگی کنت کہ آ ھچ وڑیں جاوراں جوش ءُ جزبگ یا ازاروکی جذبگ ءِ چیر ءَ گھگیری ءِ راہ ءَ نہ روت بلکیں گوں یک ھاسیں زانشت ءُ پیسلے ءَ رؤت۔

گوشگ بوتگ کہ قدرت اللہ گل ءِ تہ ءَ ھوار بوھگ ءَ پد وتی سنگینی، تھمبل ءُ مھکمیں تب ءِ وسیلگ ءَ وت ءَ یک انچیں باسکے ءِ بستار ءَ پیش داشت کہ آئی ءَ را سک کمیں وھد ءِ تہ ءَ گران تریں زمہ واری ءِ ڈبو کنگ بوت کنت۔ مجید بریگیڈ ءِ تہ ءَ ھوار بوھگ ایوک ءَ فوجی تربیت ءِ آسر نہ اِنت بلکیں زھنی ءُ شرپداری پڑ ءَ چہ گوزگ ءَ پد زرتگیں زمہ واری اِنت ءُ قدرت اللہ ءَ اے پڑ گوں پھتوی ءَ زرتگ۔

گل ءِ رد ءَ آپریشن ھیروپ ءِ وھد ءَ شال ءِ جنگ آئی ءِ زند ءِ گڈی بلے برجمیں رنگے ءَ سابت بوتگ۔ آئی ءَ ریڈ زون ءِ نزیک ءَ ریل ءِ اسٹیشن ءَ گوں دژمن ءِ لشکر ءَ کلاکانی میان ءَ جنگ کتگ۔

“آئی ءَ ترندیں جنگ ءُ چوپ ءِ وھد ءَ تیر وارتگ بلے ٹپی بوھگ ءَ ابید آئی ءِ رھبند ءَ نہ لرزانک ءُ نہ کہ بے تاھیری بوتگ۔ آ یک انچیں سکونے ءِ گون ءَ بوتگ کہ ایوک ءَ یک انچیں مردمے ءَ کیت کہ آئی ءِ پیسلہ ءَ سرجم ءَ ھوار بوتگ۔”

گوشگ بوتگ کہ آئی ءِ گڈی ساھت اے ویڈیو ءِ تہ ءَ گندگ بیت انت۔ تراکناکیں چیزاں پُریں گاڑی یے ءِ تہ ءَ نشتگ ءُ گوں تبے ءَ وتی سنگتاں چہ رکست کنت۔ آئی ءِ دیم ءَ نہ ترس اِنت ءُ نہ بے وسی، بلکیں یک گھتریں رزامندی یے گندگ ءَ کیت۔ آ وتی سنگتاں گُش ایت کہ ما یکجاہ ایں، ما داں آجوئی ءَ یکجاہ ایں، اے (پاکستان) ءَ بے تاوان ءَ یل مہ کن اِت۔

اے میان ءَ آئی ءِ سنگتاں چہ یکے آئی ءِ پیشانی ءَ بوسگ دنت ءُ رکست کنت ءُ آ وت گوں آرامی ءَ گاڑی ءَ ریڈ زون ءِ نیمگ ءَ جنزان کنت ءُ اود ءَ وتی نشانگ ءَ لگّ اِیت ءُ شھید بیت۔

ھکل ءَ گیشتر آئی ءِ بارو ءَ درشان کتگ ءُ گْوشتگ کہ قدرت اللہ ءِ جند ءِ سرپد بوگ ءِ واستا آئی ءِ گُڈّی ساھتانی گندگ بس اِنت۔ گھگیری ءِ پڑ ءَ مستریں تاکت زانت ءُ ترندی نہ اِنت بلکیں ھما بے تواری ءِ باور اِنت کہ انسان ءَ چہ وتی آسر ءَ بے ترس کنت۔ آئی ءِ بچکندگ ھمے باوست ءِ چیدگ انت۔

بی ایل اے ءِ رد ءَ آئی ءِ ناکوزتک شھید فدائی عبدالسلام پنام ءِ نصراللہ ھم ھمے جُھد ءِ بھر بیتگ ءُ شھید کنگ بوتگ۔ شھید فدائی قدرت اللہ کرد پنام ءِ مجید بلوچ ءِ زند ءُ شھادت مارا اے دربرگ ءَ دنت کہ گھگیری ایوک ءَ جنگ ءِ میدان ءَ نہ بیت بلکیں اے ھما ساھت ءَ ھم ھست اِنت کہ مردم گوں وتی پیسلگ ءَ سرجم ءَ آرام ءَ اوشتات کنت۔ گوستانک ءِ تہ ءَ زبردستیں توار ھما ​​بے تواری ءِ بچکند اِنت کہ آسر ءَ پیسر دیم ءِ سر ءَ مانیت۔

چارمی ءِ پجار شمس الحق پنام ءِ عمر جان ء مراد جان جھمنند سوراپ پنجگور ءِ نام ءَ کتگ-

ھکل رسانکدر ءِ رد ءَ آئی ءِ اُمر بیست ءُ شش سال بیتگ ءُ آ ستمبر 2023 ءَ بی ایل اے ءَ ھوار بیتگ ءُ فتح یونٹ اسکواڈ ءِ بھر بوتگ- آ بولان ، چمالنگ ءُ کلات ءَ بیتگ ءُ آ نوشکی ءَ ھیروپ ءِ وھد ءَ شھید بیتگ-

آئی ءَ گوشتگ چہ پنجگور سوراپ ءَ سیادی داروکیں بیست ءُ شش سالی ئیں ورنا شمس پنام ءِ عمر جان ھما پکر ءُ لیکھانی واھند بوتگ کہ کمے وھد ءَ بازیں چیدگاں سر بوتگ-

آئی ءَ گوشتگ شھید شمس الحق ءَ سال دوھزار ءُ بیست ءُ سَے ءَ راجی زرمبشت ءِ بھر بوگ ءَ پد جنگی سنچ ءُ زانگ ءَ پد زوت آ گل ءِ دیمی ٹولی فتح اسکواڈ ءِ بھر بیتگ ءُ آئی ءَ بولان ءِ کور ءُ شیپ ءُ چمالنگ ءِ کوھانی توک ءَ ءُ کلات ءِ ترسناکیں پٹ ءَ آئی ءَ وتی کرد پیش کتگ-

شمس الحق ھما بھادراں ھوار بیتگ کہ آیاں درہ بولان آپریشن ءَ بنداتی ءَ دشمن ءِ دنتان کَش اتگ انت- آ ایوک ءَ جنگولے نہ بیتگ بلکیں یک اسٹریٹجک سپاھی یے بیتگ کہ جنگ ءِ میدان ءَ ھُرتچارے بیتگ-

آ آپریشن ھیروپ ٹو ءِ وھد ءَ نوشکی ءَ جنگ ءِ وھد ءَ دشمن ءِ کھر ءِ دیوال بیتگ ءُ گڈی ساھت ءَ داں نمیران بیتگ-

پنچمی ءِ پجار لال بخش پنام ءِ درپشان ء رسول بخش جھمنند کرکی تربت ءِ نام ءَ کتگ –

ھکل ءِ رد ءَ آئی ءَ 10 اگست 2025 ءَ بی ایل اے ءَ ھواری ءِ بھر زرتگ ءُ آ ایس ٹی او ایس ءِ بھر بیتگ ءُ آ کلات ءَ بیتگ ءُ آپریشن ھیروپ ٹو ءِ وھد ءَ نوشکی ءَ نمیران بوتگ-

ھکل ءِ رد ءَ تربت کرکی ءَ سیادی داروکیں لال بخش پنام ءِ درپشان گچینی ھما آدینک ءَ بیتگ کہ وھدیکہ ڈیھ ھمے آزمائش ءَ بئیت انت گڑا جوانتریں زھندار کتاباں یل کن انت ءُ سنگر ءَ پھریز انت- لال بخش یک جوانتریں نودربرے بیتگ ءُ آئی ءَ ایف ایس سی کنگ ءَ پد ڈاکٹری ءَ روگ ءَ بیتگ ءُ دانکہ انسانیت ءِ واستا وتی کرد ءَ پیلو بہ کن آن بلے ءِ ھاک ءِ ھرسیں چَماں آ یک مسیھائی ءَ جتا کتگ ءُ ھاک ءِ نیمگ ءَ جنزینتگ-

ھکل ءِ رد ءَ لال بخش ءِ سیادی یک ھنچیں کھولے ءَ بیتگ کہ آیاں ڈیھ ءِ آجوئی ءَ وتی ھون ریتکگاں آ شھید شاہمیر، شھید امیر ءُ نامدارین فدائین، فدائی فاروق، فدائی سوالی ءُ فدائی بلال ءِ ناکوزتک بیتگ- اے وڑیں چاگردے ءَ رُستگیں ورنایے ءَ زمین ءِ گوانک نادلگوش کنگ نہ بیت-

10 اگست 2025 ءَ سرجم ءَ سلاہ بندین جد ءُ جھد ءِ راہ ءَ جنز اتگ ءأ وتی زانشت ءُ زانت ءِ درچ ءَ آ گچینی ٹولی ایس ٹی او ایس ءِ بھر بوتگ-

آپریشن ھیروپ ٹو ءِ وھد ءَ آ نوشکی ءَ دشمن ءَ گون جنگ کنان ءَ وتی کھول ءِ دوداں برجاہ داران ءَ شھید بیتگ ءُ وت ءَ وتی ناکوزتکیں شھیدانی لڑا وت ءَ ھوار کتگ-

ششمی ءِ پجار عاطف شاہ پنام ءِ آغا مرید ء شکور شاہ جھمنند کلی مینگل نوشکی ءِ نام ءَ کتگ-

آئی ءَ 15 ستمبر2025 ءَ بی ایل اے ءَ بھر زرتگ ءُ ایس ٹی او ایس ءِ بھر بیتگ- نوشکی ءَ بیتگ ءُ نوشکی ءَ آپریشن ھیروپ ٹو ءَ شھہد بیتگ-

ھکل ءِ رد ءَ عاطف شاہ پنام ءِ آغا مرید ھما زانشت ءِ پھتوئیں درور بیتگ کہ اود ءَ ورنا وتی زمین ءِ گوانک ءَ لبیک گوش انت ءُ وتی زاتی واھشتاں آجوئی ءِ.ھاتر ءَ لگتمال کن انت-

آئی ءَ گوشتگ نوشکی مینگل ءِ جھمنندیں ورنا عاطف شاہ ستمبر دوھزار ءُ بیست ءُ پنچ ءَ ھما وھد ءَ سلاہ بندیں جنگ ءَ ھوار بوتگ وھدیکہ بلوچستان ءِ سرڈگار یک پیسلہ داریں وھدے ءَ اوشتوک بیتگ ءُ آ گل ءِ گچینی ٹولی ایس ٹی او ایس ءَ ھوار کتگ ءُ اود ءَ کمے وھد ءَ آئی ءَ وت ءَ یک جوانیں سپاھی ءِ منارینتگ-

ھکل ءِ رد ءَ عاطف شاہ ءِ سیادی ھما ھاک ءَ بوتگ کہ آئی ءَ وتی گڈی ساہ ءَ داں جنگ کندگ ءِ اھد کتگ ءُ آپریشن ھیروپ ٹو ءَ نوشکی ءَ دشمن ءِ ھلاپ ءَ یک میدانے جنگ بیتگ گڑا عاطف شاہ ءَ وتی دمگی زمین ءِ اِلم ءُ لشکری زانشت کارمرد کنان ءَ ھمک ءَ دیم ءَ بیتگ ءُ بھادری ءَ جنگ کنان ءَ داں نمیران بوتگ-

بلوچستان ءِ دمگ کیچ بلیدہ ءَ دوبر بیگواہ بیتگین ورنا ءِ لاش دزکپتگ-

گیشین اھوالانی رد ءَ 14 اگست 2024 ءَ چہ بلیدہ میناز ءَ پاکستانی پوج ءِ دست ءَ آوار جنگ بیتگیں نسرم ء پیر بخش ءِ لاش مروچی چہ بلیدہ ءِ دگ ءَ دزکپتگ-

اھوالانی رد ءَ لاش ءَ تیرانی نشان پِر انت ءُ لاش ءِ اھولانی سربوگ ءَ لیویز ءَ لاش چِست کتگ ءُ برتگ-

اھوالانی رد ءَ نسرم ایشی ءَ پیش 12 اکتوبر 2023 ءَ بلیدہ پزیر ءَ دگہ مردمانی ھواری ءَ آوار جنگ بیتگ ءُ پد ءَ 13 جون 2024 ءَ یل کنگ بیتگ –

اھوالانی رد ءَ دو ماہ ءِ گوزگ ءَ پد نسرم دوبر چہ میناز ءَ پوج ءَ آوار جتگ ءُ برتگ ءُ مروچی آئی ءِ تیر سپتگیں لاش ماں دَگ ءِ کش ءَ دزکپتگ-

بلوچستان ءَ انسانی ھکانی گلانی گوشگ انت اود ءَ بازیں کساسے ءَ بیگواھیں مردم دروگیں میڑانی نام ءَ کشگ ءُ چگل دیگ بوگ ءَ انت –

گوستگیں روچاں کراچی ءَ ھوار بلوچستان ءِ بازیں جاھاں دروگیں میڑانی نام ءَ بندیگین مردم کشگ ءُ چگل دیگ بیتگ انت-

آیانی توک ءَ ھمدان بلوچ ءِ نماز جنازہ گوستگیں روچ ءَ بلوچ آبادی دمگ لیاری ءَ وانگ بیتگ ءُ اود ءَ کھول ءَ لاش ءِ ھمراھی ءَ زھرشانی ھم کتگ-

پاکستان ءِ بنجاھی شھر اسلام آباد ءَ پہ وانگ ءُ زانگ ءَ نندوکیں بلوچستان ءَ سیادی داروکیں نودربر نبیل ارمان ءِ زورانسری بیگواہ کنگ بیتگ۔

آئی ءِ ھمراھیں نودربرانی رد ءَ نبیل ارمان چار شمبے ءِ روچ ءِ بیگاہ ءَ اسلام آباد ءِ سیکٹر جی 7 ءَ وتی سنگتانی کارگس ءَ ناشناسیں مردماں آوار جتگ برتگ ءُ چریشی ءَ پد آئی ءِ بارو ءَ ھچ اھوال دیم ءَ نیتکگ انت۔

نودربرانی رد ءَ نبیل ارمان ءَ زورانسری ءَ بیگواہ کنگ ءِ دراجیں سلسلگ ءِ تہ ءَ دگہ نمبرے جوڑ کنگ ءَ نہ دئیں ءُ چہ انسانی ھکانی جھدکار، دیمروئی لوٹوکیں واک، وکیل، سول سوسائٹی ءُ نودربر گلاں دزبندی کن این کہ اے وئیل ءِ ھلاپ ءَ وتی توار ءَ چست بہ کن اَنت۔

نودربرانی گشگ ءِ رد ءَ نبیل ارمان نمل یونیورسٹی ءِ گریجویٹ نودربرے۔ نودربر گلاں اے گپ جتگ کہ آ پاکستانی لشکر ءَ دزگیر کتگ ءُ پد ءَ آ ناشناسیں جاھے ءَ برگ بیتگ۔

نودربراں گْوشتگ بلوچستان ءَ ھوار سرجمیں ملک ءَ بلوچ نودربرانی ھلاپ ءَ کارروائی ءِ سلسلگ گوستگیں بازیں سالاں چہ برجاہ اَنت۔ پنجاب ءُ بنجاھی شھت ءَ وانگ ءَ بازیں بلوچ نودربر پیسر ءَ ھم زورانسری ءَ بیگواھیانی آماچ بوتگ اَنت کہ ایشانی تہ ءَ بازیں نودربر انگت ءَ یل کنگ نہ بوتگ اَنت۔

گوستگیں سال ءَ سعید بلوچ ءِ زورانسری بیگواھی ءِ ھلاپ ءَ قائداعظم یونیورسٹی ءَ بازیں روچاں زھرشانی نندانک داتگ بوتگ بلے انگت ءَ آ سرکاری رنگ ءَ پیش کنگ نہ بوتگ۔

نودربر گلاں جار جتگ کہ اگاں نبیل ارمان زوت یل نہ بوت گڑا ترندیں رنگے ءَ زھرشانی کنگ بیت ءُ مھم ھم بندات کنگ بیت انت۔

بلوچستان ءِ شھر نوشکی ءَ پاکستانی پوج ءَ آئی ایس آئی ھیڈکوارٹر ءِ کش ءُ گورانی لوگ جاہ پروش اتگ انت ، ءُ ایندگہ گسانی ھالی کنگ ءِ ھکم داتگ ۔

نوشکی ءِ شھر کازی آباد ءَ برجاھیں پاکستان ءِ چیریں ادارہ انٹر سروسز انٹلیجنس (آئی ایس آئی ) ءِ ھیڈ کوارٹر ءِ نزیکیں گس پاکستانی پوج ءَ پروشتگ انت ۔ کارگس ءَ نزیکیں ایدگہ گسانی واھنداں ھکم داتگ کہ زوت گساں یل بہ کن انت کہ پدا رند ءَ اے گسانی پروشگ ءِ ھم ھکم دیگ بوتگ ۔

نوشکی ءِ شھر ءُ ایندگہ دمگاں چدوپیسر پاکستانی پوج ءَ چار گسانی تہ ءَ بارودی مواد کل کتگ ءُ تباہ کتگ انت کہ اے گسانی تہ ءَ بی ایل اے ءِ سروک بشیر زیب بلوچ ءِ بنکی گس ءَ ھوار دگہ سیاسی مردمانی گس ھوار بوتگ انت ۔ ھمے وڈا گوادر ءُ کیچ ءَ ھم گس ماندارگ بوتگ انت ۔

نوشکی ءَ ھما بیگاہ ءِ شش ءَ کرفیو جنگ بوتگ کہ ھنگت برجاہ انت ۔ مردمانی رد ءَ پاکستانی پوج ءِ واکداراں مھلوک ءَ ھمے گوشتگ کہ تاں ھما وھد ءَ شما ریاست ءِ ھک ءَ روانک نہ کش ایت ، وتی گس ءُ دکانانی سرا بیرک ءَ نہ جن ایت کرفیو ھلاس کنگ نہ بیت انت ۔

زانگ بہ بیت 31 جنوری ءَ بلوچ لبریشن آرمی ءَ آپریشن ھیروف ءِ رد ءَ بلوچستان ءِ چاردہ دمگاں ترندیں ارش کتگ ءُ دمگ وتی انڈر ءَ کتگ انت ۔ ھمے آپریشن ءَ نوشکی ھم داں شش روچ ءَ بی ایل اے ءِ کنٹرول ءَ بوتگ ۔

ھمے وھد ءَ بی ایل اے ءَ نوشکی ءِ تہ ءَ پاکستانی پوج ءِ دو بنجاھی ھیڈکوارٹر ءُ آئی ایس آئی ءِ ھیڈکوارٹر سرا جندندری ءَ ھوار دگہ ارش کتگ کہ اے ارشاں مزنیں کچے ءَ پوجی کارمند مرتگ ءُ بازیں جانی ءُ مالی تاوان ءِ دیمپان بوتگ ۔

بلوچ لبریشن آرمی ءَ وتی چینل ھکل ءَ دو دگہ نمیرانیں ھمراھانی اکس ءُ اھوال شنگ کتگ انت-

ھکل ءِ رد ءَ اولی سرمچار ءِ پجار شھید ارسلان پنام ءِ موسیٰ ء منور خان ماندائی جھمنند کلی عطا محمد نوشکی ءِ نام ءَ کتگ کہ آئی ءَ فائن آرٹس ،یونیورسٹی آف بلوچستان ءَ سرجم کتگ – آئی ءَ سال دوھزار ءُ بیست ءُ پنچ ءَ بی ایل اے ءَ بھر زرتگ ءُ نوشکی ءُ ھاران ءِ میداناں جنگ ءَ بھر مند بیتگ ءُ ھاران ءَ فتح اسکواڈ ءِ بنزہ ءَ شھید بیتگ-

آئی ءِ رد ءَ ارسلان پنام ءِ موسیٰ ھما وانندگیں بلوچ ورنایاں بیتگ کہ آیاں ند ءُ رنگانی درچ ءَ وابانی واھشت ءَ بنت- وتی ھاک ءِ آجوئی ءِ واستا ھونانی رنگ ءَ گچین کنگ انت- یونیورسٹی آف بلوچستان ءِ فائن آرٹس ءِ نودربری ءِ دروشم ءَ ارسلان ءِ بودشت ءَ بیتگ- بلے آئی ءَ سماہ کتگ راجی پجار ناگیگی ءِ دیمپان انت گڑا آرٹ ءِ درستاں گیشتریں شاھکاری کربانی ءِ دروشم ءَ انت – نوشکی ءِ سرڈگار ءَ چِست بیتگیں ورنا دوھزار ءُ بیست ءُ پنچ ءَ سرجم ءَ بی ایل اے ءِ بھر بیتگ –

ارسلان ءَ نوشکی ءُ ھاران ءِ ناگیگیں جاھاں وتی سیاسی ءُ جنگی سنچ ءِ بور تاچینتگ- یک آرٹسٹے ءِ سما ءُ یک سپاھی ءِ ترندی ءَ ایشی ءِ دھشت ءَ ھوار کنت- آپریشن ھیروپ ءِ پیسلہ داریں درچ ءَ ارسلان ءَ ھاران ءِ میدان ءَ جاڑیگ بیتگ ءُ اود ءَ ترندیں جنگ ءِ وھد ءَ آئی ءَ شھیدی پہ وت ءَ گچین کتگ – آئی ءِ شھیدی راستی ءِ منانک انت کہ بلوچستان ءِ درسگاہ نی اے ڈولیں ھنرمند پیداگ کنگ ءَ انت کہ وتی ھاک ءَ نکش ءُ نگارینگ ءَ وتی ھون ءَ گوں سمبھینگ ءَ زان انت-

دومی ءِ پجار شھید کبیر سرپرہ پنام ءِ الیاس ء پسند خان سرپرہ جھمنند گُرگینہ پسند خان ءُ انی شال سریاب ءَ نندوک بیتگ- آئی ءَ سال دوھزار ءُ بیست ءُ پنچ ءَ جولائی ءَ بھر زرتگ-

کبیر سرپرہ پنام ءِ الیاس ءِ زندمان ءِ سپر سریاب ءِ دمکاں بندات بیتگ ءُ ھاران ءِ پلکاں داں شھیدی ءِ منزل ءَ سر بیتگ- جولائی دوھزار ءُ بیست ءُ پنچ ءَ وھدیکہ آ سلاہ بندیں جد ءُ جھد ءِ راہ ءَ گچین کنت، آئی ءِ سالانی سال ءِ زانشت ءِ آسر بیتگ کہ آئی ءَ بلوچستان ءِ سیاسی بنجل شال ءَ ردوم زرتگ ءُ زندمان گپتگ – کبیر ءِ سیادی گُرگینہ ءِ یک ھنچیں دمگے ءَ بیتگ کہ گھگیری ءِ وشبو انت – آئی ءَ وتی امل ءَ منینتگ کہ ڈیھ ءِ گوانک ءِ شھر ءِ رژن ءُ زاتی واھشت ھچ مانا نہ دار انت-

آئی ءِ اے دھشت ءَ آ بے توار بوتگ چوشکہ آ یک راستیں سرمچارے ءِ رنگ ءُ دروشم ءَ جنت- کبیر سرپرہ باز کم وھد ءَ وت ءَ ترندیں جنگی جاوراں جاڑیگ کنت- آپریشن ھیروپ ءِ وھد ءَ ھاران ءِ میدان ءَ پرکار بیتگ- کبیر ءَ فرنٹ لائن ءِ جاڑیگ بوگ ءَ وتی بھادری ءِ رند پد یل کتگ انت- دشمن ءَ گون جنگ ءِ وھد ءَ آئی ءَ پشتکنزی ءَ ابید وتی سینگ مِک کتگ ءُ جنگ کنان ءَ شھیدی گچین کتگ – آئی ءِ کربانی ءِ پکر اے یکشلی ءِ بھر انگ کہ چہ سریاب ءَ بندات بیتگ ءُ ھاران ءَ داں پراہ ءُ شاھیگان بیتگ-

بلوچستان ءِ بُنجاھی شھر شال ءِ دمگ ڈغاری ءَ پاکستانی پوج ءِ آپریشن، سے مردم زورانسری بیگواہ، کواڈ کاپٹر ءَ چہ بمب دور دیگ بیتگ-

گوستگیں روچ ءَ ڈغار ءِ دمگ پاکستانی پوج ءِ مزنیں کچے ءَ بازیں گاڑیانی ھمراھی ءَ پیشگامی ءَ پد دمگ انگیر ءَ کتگ آپریشن بندات کتگ-

دمگی اِھوالکار ءِ رِد ءَ کواڈ کاپٹر ءَ چہ جتاجتائیں ھندانی سر ءَ بمب چگل دیگ بیتگ بلے تنی وھدے جانی تاوان ءِ درگت ءَ ھچ وڑیں ھال نیست-

آئی ءَ دیمتر ءَ گوشتگ کہ پوج ءَ اے میان ءَ سے مردم ھم آوار جتگ ءُ ناشناسیں جاھے ءَ برتگ اَنت کہ آیانی پجّار درگت ءَ سرپدی آیگ پش کپتگ اَنت-

بلوچستان ءِ دمگ کیچ ءِ ھند بلیدہ ءَ سلاہ بندیں مردمانی اُرش ءَ یکیں کھول ءِ شش مردم بیران وھدے کہ سے ٹپی بیتگ اَنت-

پولیس ءُ دمگی ھالانی رِد ءَ اُرش ھما وھد ءَ کنگ بیتگ وھدے ناشناسیں مردماں یک لوگے ءِ سر ءَ مارٹر گولھے آس داتگ ءُ پد تیرگواری کتگ-

پولیس ءِ گوشگ اِنت کہ بیران بیتگیں مردمانی تہ ءَ زالبول ءُ چُک ھم ھوار اَنت-

پولیس ءِ رِد ءَ بیران بیتگیں مردمانی تہ ءَ مسلم ء چارشمبے، ملا یوسف ء محمد شریف، عبدالغفار ءِ لوگ بانُک فضیلہ، گل ناز ء عبدالغفار، چنگیز ء عبدالغفار ء زھرہ ء عبدالغفار ھوار اَنت-

ٹپی بیتگینانی تہ ءَ عبدالغفار ء محمد، سارہ ء عبدالغفار ءُ عائشہ ء عبدالغفار ھوار اَنت-

دمگی اِھوالکار ءِ رِد ءَ لوگ واھنند ءِ پجّار دمگ ءَ پُرکاریں سرکاری پلامرزی سلاہ بندیں ٹولی کہ آ بلوچستان ءَ ڈیتھ اسکواڈ گوش اَنت-

تنی وھدے اُرش ءِ زمہ ھچ گل ءَ نہ زرتگ-