بلوچ لبریشن آرمی ءِ جارکش جیئند بلوچ ءَ شنگ کتگیں بیانے ءَ گْوشتگ کہ بی ایل اے ءِ سرمچاراں یک ھمگرنچ ءُ مھکمیں رھبندے ءِ رد ءَ شال ءِ کوچگی دمگ زورگیریں پاکستانی لشکر ءِ دو ھاسیں ءُ بنجاھی بنجلانی سر ءَ ھمگرنچیں اُرشے کتگ ءُ چاردہ کارندہ جاہ پہ جاہ ءَ مرتگ اَنت۔ اے سوبمندیں گامگیج ءَ پد بی ایل اے ءِ سرمچاراں دژمن ءِ دوئیں کیمپ وتی سرجمی ءَ وتی انگیر ءَ کتگ انت ءُ اود ءَ مزنیں کساسے ءَ نوکیں پوجی سلاہ، گولہ بارود، رھوتی سامان ءُ دگہ ھاسیں فوجی سامان دستیگ کتگ انت ءُ وتی مھکمیں بنجلاں واتر شتگ انت۔
جارکش ءَ گْوشتگ کہ گوستگیں روچ ءَ شپ ءِ شش ءِ نزیک ءَ بلوچ لبریشن آرمی سرمچاراں شال شھر ءَ گوں ھمگرنچیں دو ھاسیں جاھانی سر ءَ زورگیریں پاکستانی لشکر ءِ ھاسیں پوسٹانی سر ءَ یکیں وھد ءَ ترندیں اُرش کتگ۔ اے جنگ ءِ وھد ءَ بی ایل اے ءِ گشادیں لشکر ’فتح اسکواڈ‘ ءَ دیم ءَ ترندی ءَ شتگ زورگیریں لشکر ءِ پوزیشنانی سر ءَ اُرش کتگ ءُ آ پُشتکنزی ءَ لاچار کتگ اَنت ءُ گڈی دیم ء روگ ءِ ھاترا دگہ فوجی لشکراں آپریشنل ءُ فیلڈ کمکاری کتگ ۔ سرمچاراں ولی تنگی ءِ دیم ءَ دژمن ءِ سر ءَ اُرش کتگ ءُ زورگیریں لشکر ءِ 9 کارندہ کشتگ انت ءُ پوسٹ ءِ سرجمیں کنٹرول زرتگ ءُ اے میان ءَ دگہ فورسے ءَ اسپن کاریز ءِ جاہ ءَ دیم ءَ شُتگ ءُ زورگیریں لشکر ءِ پنچ کارندہ کُشتگ اَنت ءُ دژمن ءِ سرجمیں پھریزی بنجل ھاک ءُ پر بوتگ۔
آئی ءَ گیش گوشتگ کہ اے جنگ ءَ بی ایل اے ءِ پیشگام ’’فتح اسکواڈ‘‘ ءَ چہ درستاں گیشتریں زانشتکاری، راہ ءُ رہکاری ءُ بے دروریں دلیری ءِ درشانی کتگ ءُ زورگیریں لشکر ءِ سر ءَ گچینی وار جتگ ءُ اے پریچیں آپریشن ءَ را سوبمندیں رنگے ءَ وتی گڈی آسر ءَ سر کتگ۔ اے آپریشن ءِ وھد ءَ بلوچ لبریشن آرمی ءِ دو سرمچاریں سنگت میر عالم کیازئی پنام ءِ سلمان ءُ سنگت نور احمد سمالانی پنام ءِ نوتک ءَ گوں دژمن ءَ دلیری ءَ دیم پہ دیم بوھگ ءِ وھد ءَ وتی جان ندر کتگ۔ بی ایل اے ءِ سنچ داریں شھیداں بے دروریں کربانی، بے مٹیں راجی تب ءُ مئیل ءُ آشوبی ززم ءِ سر ءَ سھریں سلام پیش کنت ءُ وتی اے جزم ءِ درشان کنت کہ شھیدانی مشن تاں گڈی ءَ برجاہ دارگ بیت۔
