سرمچار کَے انت؟
نبشتہ کار: ماھجان کومی
دی بلوچستان پوسٹ
من ھر وھد ءَ کہ ننداں، گیگ ءُ موہ باں گڑا ھما کُنگریں اوبادگانی بابت ءَ جیڑاں کہ آ سرمچار ءِ نام ءَ زانگ بنت۔ سرمچار کَے اَنت؟
کجام مَردم سرمچار گشگ بنت؟ سرمچار چوں جوڑ بنت؟ لاچاری، زِبَھری، نیزگاری ءُ بیوسیں مردمےءَ زور اِیت ءُ سرمچار جوڑ کنت یا ناں سرمچار بوگ انگت ایشاں چہ بالاتریں ھیالے؟ اگاں چارگ بہ بیت گڑا سرمچار ھر کس گشگ نہ بیت۔ بلکیں سرمچار ھما مردم گشگ بنت کہ آ نہ تھنا وتی ساہ ءُ سراں چہ سرگوز اَنت، بلکیں وتی زند ءُ مرگ ءِ پیسلہ ءِ زورگ ءَ چک ءُ پد اوں نہ بنت۔ آ اے پیم نہ جیڑ اَنت کہ مارا زورگیریں پاکستان ءَ لاچار کتگ، بیوس کتگ، نیزگاری ءِ کٹ ءَ رسینتگ یا زِبھریں زندگی ءِ آماچ کتگ، گڑا پمیشکہ ما آئی ءِ ھلاپ ءَ جنگ ءَ در اتکگ ایں ءُ سرمچار جوڑ بوتگ ایں۔ پرچا کہ آ جیڑ اَنت زِبھری، لاچاری، نیزگاری ءُ بیوسی درست گوں گلامی ءَ بندوکیں چیز اَنت، ایشاں چہ جتا نہ اَنت۔ پمیشکہ سرمچار ھما مردم گشگ بنت کہ وتی زات ءَ چہ در کپ اَنت۔ پہ وت ءَ اَنچیں کِشکے گچین کن اَنت کہ آئی ءِ راہ آجوئی ءُ وشیں باندات، ایمنی، پُر آسراتی، یک ءُ دومی ءَ گوں سکّی ءُ وشیانی شریداری ءِ منزل ءَ داں روت سر بیت۔ ھمے دراجیں کشک ءِ نام بلوچستان ءِ آجوئی اِنت۔ اے دراجیں آجوئی ءِ سپر ءَ ھمک مَردم بھر زرت نہ کنت پرچا کہ پریشی ءَ مزنیں جگرے لوٹ اِیت، ھما مردم ھوار بوت کنت کہ آئی ءَ بلوچی پوشاکے گور ءَ اِنت۔
پمیشکہ سرمچار ھما مردم گشگ بنت کہ آ چاگرد ءِ درچتگیں ءُ گچینیں مردم اَنت۔ بہ کولء شھید گلام محمد ئیگ ءَ” ما اے گپ ءَ نہ گُش ایں کہ جنگ (پاکستانءَ) مئے سر ءَ مُشتگ، بلکیں اے جنگ ما بندات کتگ ءُ اے جنگ ءَ ما وت آسر کنیں۔ “ اے جنگ بلوچ سرمچاراں پرچا بندات کُتگ؟ پرچا کہ بلوچ سرمچار یک در ابرمی ریاستے ءِ ھلاپ ءَ جنگ ءَ اَنت، ھما ریاست کہ آئی ءَ جتائیں راجانی نہ تھنا زمین گوں وت ءَ زور ھوار کتگ بلکیں آیانی جتائیں دودمان، زبان، رسم ءُ رواج، بندپتر، راجدپتر ھم زورانسری ھوار کتگ اَنت۔ بلوچ سرمچار ھمے زورگیریں ریاست ءِ ھلاپ ءَ وتی جنگ ءِ نہ تھنا جار پرّینتگ بلکیں آئی ءَ ھلاپ ءَ یک مھکمیں جنگے کنگ ءَ اَنت۔ دنیا ءِ بندپتر ءَ ھرچ در ابرمی ریاستے کہ جوڑ بوتگ گڑا آیانی پالیسی مدام زوراکی ءِ سر ءَ ایر بوتگ اَنت ءُ پاکستان ھمے وڑیں ریاستے کہ آئی ءِ نز ءَ بلوچ سرڈگار ءِ سر ءَ نشتگیں بلوچ لیلُک اَنت، آ اد ءَ کس ءَ انسان نہ لیک اِیت۔ آ مدام زلم ءُ زوراکی ءِ سر ءَ بیسہ دار اِیت، پمیشکہ اے وڑیں در ابرمی ریاستانی کار مدام Three Alls پالیسی ءَ گوں بندوک اِنت، بزانکہ درستاں بہ کُش(چکچینی)، لوگاں ماندار ءُ لُٹ ءُ پُل بہ کن۔ اے وڑیں درابرمی ریاستانی پالیسی مارا اسرائیلی ءُ پاکستان وڑیں جاھاں گندگ ءَ کیت۔ پمیشکہ ما مرچی بچار ایں پاکستان ءِ وڑیں یزید ءُ زالم بلوچ پُسگاں چُکچین کنگ ءَ انت، مئے مات، گوھار، براتاں وتی تھاریں کوٹیاں بندیگ کنگ ءَ انت، آیاں کُشگ ءُ دور دیگ ءَ انت۔ اے زالمیں دژمن مئے تنگوئیں بچاں سرجمیں دنیا ءِ دیم ءَ گران کنگ ءَ انت۔ آیاں سالاں سال گار کنگ ءَ انت۔ اے وڑیں زوراکیں چاگرد ءَ سرمچارے ءِ پیداک بوگ ابرمی پدکردے۔ پرچا کہ وھدے تئی مئے زالبول دگانی سر ءَ وتی براتانی اکساں زور انت ءُ کاینت، پریات کن اَنت بلے آ ایشاں ھم اوپار نہ کنت کہ شما پرچا وتی مردمانی نام ءَ گر ات۔ اے وڑیں جاوراں سرمچار جوڑ بوگ ءَ ھچ پیمیں تاکت داشت نہ کنت۔ ھمے وڑیں ساھتاں سرمچار پیسلہ زور اَنت ءُ کوہ ءَ در کپ اَنت دانکہ چاگرد ءِ توکءَ زلم ءُ زوراکی ءِ ھلاس کُت بہ کن اَنت۔
سرمچار چاگرد ءِ ھما مردم اَنت کہ آ باسما اَنت، زانتکاریں مردم اَنت۔ درستاں گیش پہ سرمچاری ءِ مزنیں جگرے لوٹ اِیت دانکہ آ پیسلہ کُت بہ کنت کہ منی مرگ ءِ گچین ءِ مانا چی اِنت؟ سرمچار زانت منی مرگ آؤکیں پدریچ ءِ وشیں باندات اِنت، پمیشکہ آ چہ مرگ ءَ نہ ترس اِیت۔ اے ھما مردم اَنت کہ چاگرد ءِ توک ءَ وانندگ اَنت، پھتوئیں مردم انت، ھچ پیمیں ناھکی ءُ زوراکیبءَ اوپار کُت نہ کن اَنت۔ اے چاگرد ءِ درچتگیں بچ اَنت۔ چوش ما بچار ایں مئے چاگرد ءَ َھزاراں بلوچیں مھلوک ھست اِنت بلے ھر کس سرمچار بوت نہ کنت۔ اے ھما پُسّگ اَنت کہ آیاں وتی گلامی ءِ مارشت ھست اِنت، آ زان اَنت کہ گلامی چونیں نادراھی یے، پمیشکہ گلامیں چاگرد ءَ زندگ ءِ مانا مرگ اِنت۔
انچوش کہ یک چاگردے وھدے ایردست بوت گڑا آ چاگرد ءَ ساہ کَشگ مشکل بیت، اے پیمیں ساھتاں تھنا ھما مردم وتی ساہ ءَ رکینت کنت وھدے کہ آ سرمچاری پگر ءَ بہ زور اِیت، آ گلامی ءَ سما بہ کنت۔ وھدے کہ تو گلامی ءَ سما کن ئے گڑا تو وت نشت نہ کن ئے۔ نوں سرمچار پمیشکہ گشگ بنت کہ آ وتی ساہ ءُ سراں چہ سر گوز انت۔ سرمچار وانندگ ءُ زانتکاریں انسان اَنت۔ آ سرمچنڈ ءُ سرمتاب اَنت۔ آ وتی مرگ ءَ نہ چار اَنت۔ وھدے کہ آ بلوچستان ءِ آجوئیءَ وتی سپر ءَ بنا کن اَنت گڑا آ وتی بارو ءَ ھچ وڑ ءَ نہ جیڑ اَنت۔ سرمچار بھادر اَنت، ماتانی شیریں بچ ءُ جنک اَنت۔ ھما مردم سرمچار گشگ نہ بنت کہ وتی زات ءِ بارو ءَ جیڑ اَنت نَیکہ ھما مردم گشگ بنت کہ آیاں دنیا ءِ ڈگری گپتگ بلے وتی گلامی ءِ بابت ءَ نہ جیڑ ات کُت کن اَنت نَیکہ پیسلہ زرت کن اَنت۔
پمیشکہ مروچی سرمچار ءِ ھیال ءُ لیکہ بلوچ چاگرد ءَ ھمیش اِنت کہ آ مسالی کردار اَنت، درچتگیں پُسگ اَنت ءُ راج ءِ گچینی اوبادگ اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-