TBP Balochi

پاکستانی پوج ءَ دو مردم آوار جتگ ءُ بیگواہ کتگ اَنت-

چہ کراچی ءَ سربیتگیں ھالانی رِد ءَ پاکستانی پوج رینجرز ءَ گوستگیں سال 29 دسمبر ءَ چہ گولیمار ریکسار ءَ 26 سالی ئیں محمد ء مالک آوار جتگ ءُ وتی ھمراھی ءَ برتگ، چریشی ءَ پد آ دیم ءَ آرگ نہ بیتگ-

محمد مالک زورانسری آوار جنی ءِ درگت ءَ آئی ءِ سرپدی کھول ءَ انسانی ھکانی گلاں داتگ اَنت-

زانگ بہ بیت ھمے سال ءِ بنداتی ءَ چہ بازیں بلوچ نودربر، شھری، استاد ءَ چہ بلوچستان ءَ آؤکیں مردماں کراچی ءَ زورانسری بیگواھی ءِ نشانگ کنگ ءَ اَنت، وھدے کہ بازیں مردمے جتاجتائیں کیساں دزگیری پدر کنگ ءُ گمانی دروگیں میڑاں کُشگ وئیل دیم ءَ اتکگ اَنت-

گوستگیں روچ ءَ کراچی ءَ سی ٹی ڈی ءَ یک گمانی میڑے ءَ بندیگیں حمدان بلوچ، جلیل ء محمد نور ءُ نیاز ء قادر بخش ءَ ھوار چار مردم کشتگ اَنت، آ دسمبر ءِ گُڈی ءُ ھمے سال ء میان ءَ زورانسری بیگواہ کتگ اَنت-

گوستگیں سال 28 دسمبر ءَ کراچی ءَ بلوچانی دمگاں مزنیں کچے ءَ آپریشن کتگ ءُ دزگیریاں پد تنی وھدے درزنانی مردم زورانسری بیگواہ کتگ اَنت- اشانی تہ ءَ 17 سالی ئیں نودربر امیر ء جاسم ولی داد جھمنند بلوچ آباد مند ھم ھوار اِنت، آ 19 دسمبر 2025 ءِ بیگاہ ءِ کساس شش ءَ کراچی ءِ دمگ ھشت چوک ءَ ایم آئی ءُ سی ٹی ڈی کارمنداں آوار جتگ ءُ بیگواہ کتگ اَنت-

ھمے وڑ چہ بلوچستان ءَ سیادی داروکیں نودربر ذاکر نور 30 دسمبر 2025 ءَ کراچی ءَ پاکستانی پوج ءَ آوار جتگ اَت، وھدے کہ ھمے سال 03 جنوری 2026 ءَ 30 سالی ئیں ولید ء عبدالمجید جھمنند لیاری آئی ءِ لوگ ءَ چہ آوار جتگ ءُ بیگواہ کتگ-

ھمے وڑ ھمے سال ءَ چہ کراچی ءَ زورانسری آوار جنی ءِ نشانگ کنگ بیتگیں بلوچ استاد زاھد ھم ھوار اِنت، آ 27 جنوری ءَ آئی ءِ لوگ ءَ چہ آوار جتگ ءُ پد ءَ آئی دزگیری پدر کتگ ءُ آئی ءِ سر ءَ بازیں کیسے جتگ-

چہ کراچی ءَ ھمے سال ءَ زورانسری بیگواہ کنگ بیتگیں دو فروری 25 سالی ئیں یاسر عرفات ء قادر بخش جھمنند مشکے، 07 فروری ءَ کراچی فقیر کالونی ءِ جھمنندیں میر بالاچ ء غلام جان، 16 فروری ءَ سے ورنا دانیال ء عبدالناصر، محمد اقبال ء خالق داد ءُ ارشاد علی جھمنند جعفر آباد ءُ 18 فروری ءَ چہ لیاری ءِ دمگ کلری ءَ سیادی داروکیں ورنا کاشف بلوچ ھوار اِنت، آ پاکستانی پوج ءَ لوگ ءُ دگہ ھندانی سر ءَ بیگواہ کتگ اَنت-

ھمے وڑ چہ شال ءَ سر بیتگیں ھالانی رِد ءَ 17 فروری ءِ شپ ءَ پاکستانی پوج ءَ لوکاریز ءِ دمگ ءَ بیڑبرتگ رازق جتک نامیں مردمے وتی ھمراھی ءَ برتگ ءُ چریشی ءُ پد آ بیگواہ ءَ اِنت-

کراچی ءِ وڑ ءَ شال ءُ بلوچستان ءِ جتاجتائیں دمگاں چہ درزنانی زورانسری آوار جنی رپورٹ نکش کنگ بیتگ اَنت آیانی سر ءَ بلوچ گلاں ءُ انسانی ھکانی ادارھاں تُرندیں دلپدردی درشان اِتگ-

بلوچستان ءِ دمگ تمپ ءُ ھاران ءَ پاکستانی پوج آپریشن کنگ ءَ اِنت، اے میان ءَ لوگانی پروشگ ءُ دمگی مردماں نشانگ کنگ ءُ سُھر ءُ دگہ گرانبھائیں سامانانی دُزگ برجاہ-

مروچی سھب ءَ پاکستانی پوج ءَ کیچ ءِ دمگ تمپ کوھاڈ ءُ کش گور ءِ دمگ ءَ آپریشن بندات کتگ- دمگی اِھوالکار ءَ ٹی بی پی ءَ گوشتگ کہ سرجمیں دمگ انگیر ءَ کتگ لوگ لوگ ءَ بیڑ جنگ ءَ اِنت-

اِھوالکار ءِ رِد ءَ پوج ء زالبولاں ھوار دگہ مردم لَٹ ءُ کُٹانی نشانگ کتگ اَنت ءُ لوگاں ھستیں دگہ گرانبھائیں سامان برتگ اَنت-

پوج ءِ نیمگ ءَ چہ لوگانی پروشگ ءُ ماندارگ بیگ ءَ اِنت- دزگیریانی درگت ءَ چہ ھچ وڑیں ھال نیتکگ-

ھمے وڑ ھاران ءِ دمگ لجے ءُ آئی ءِ ھمگرنچیں دمگاں ھم پاکستانی پوج آپریشن کنگ ءَ اِنت-

یک دمگی مردمے ءَ ٹی بی پی ءَ چہ تران کنان ءَ گْوشتگ کہ سھب بانگواہ ءَ پوج ءِ بازیں گاڑیانی سر ءَ ھمگرنچیں کاروان دمگ ءَ سر بیتگ، دمگ انگیر ءَ کنگ ءَ پد آپریشن بندات کتگ-

واکدار تنی وھدے اے درگت ءَ ھچ وڑیں ھال شنگ نہ کتگ-

زانگ بہ بیت سرجمیں بلوچستان ءَ پوجی آپریشن گیشی گندگ اتکگ، ھمے ماہ ءَ شال ءَ ھوار دگہ دمگاں چہ بازیں مردمے زورانسری بیگواہ کتگ اَنت وھدے کہ بیست ءَ چہ گیش بیگواھیں مردمانی لاش دور دیگ بیتگ اَنت-

بلوچ یکجھتی کمیٹی ءَ گوشتگ کہ دولت بلوچ ء بدل جھمنند تجابان، یک گریب دھکنکاریں کھول ءَ چہ سیادی داشتگ بیتگ ءُ وتی بُنکی زمییناں کشتکاری ءَ کنگ ءَ بیتگ-

آئی ءَ گوشتگ کہ مارچ 2022 ءَ فرنٹیئر کور ءَ لوگ ء چہ بیڑبرتگ – دولت ءُ آئی ءِ دوازدہ سالی ئیں برات بیگواہ کتگ ءُ یک ماھے ءَ تاں ناشناسیں جاھے ءَ برتگ- یک ماھے ءَ آ یل کتگ، بلے زوراکی ءُ ناانساپی ءِ ساھگ آیانی زندمان ءَ چہ ھچبر ھلاس نہ بیتگ- دولت وتی ھمکروچی زند ءِ نیمگ ءَ واتر اتکگ بلے زُلم ءِ یات آئی ءِ ھمراہ بیتگ-

آئی ءَ دیمتر ءَ گوشتگ کہ ھژدہ فروری 2026 ءَ نیمروچ کساس دو ءَ وھدے آ لوگ ءَ واتر آیگ ءَ بیتگ کہ پرپٹ سواریں ڈیتھ اسکواڈ آ نشانگ کتگ ءُ بے دردی ءَ کشتگ-

آئی ءِ کھول سک تُرس ءِ زند گوازینگ ءَ اَنت ءُ وتی دوستناکانی پہ سلامتی یل کنائینگ چہ لاچار اَنت- آ جست کن اَنت: ما کجا بہ رو ایں؟ ما چون زندگ بہ بہ ایں وھدے ما وتی راج ءَ چہ مھر کنگ جرمے جوڑ کنگ بیتگ؟ نا انساپی تھنا دولت ءِ ھلاپ ءَ اناں بلکیں ھرچ بلوچ ءِ ھلاپ ءَ اِنت-

گُڈی ءَ گوشتگ کہ ما انسانی ھکانی کارکناں ءُ میان اُستمانی اداراھاں چہ زوت گامگیج لوٹ کتگ- زورانسری آوار جنی، دروگیں میڑ، درکانودی کوش ءُ ٹارگٹ کلنگ درچ بند کنگ لوٹ اِیت- بلوچ راج وتی سرڈگار سر ءَ آجوئی ءِ زند ءُ زُلم ءِ ھلاپ ءَ تواد چست کنگ ھک دار اِیت-

کراچی ءُ بلوچستان ءَ جتاجتائیں دمگاں ھژدہ مردم آوار جنگ ءُ بیگواہ کنگ بیتگ اَنت-

گیشیں ھالانی رِد ءَ لیاری ءِ دمگ چہ کلری ءَ سیادی داروکیں ورنا کاشف بلوچ ھژدہ فروری ءِ شپ ءِ ساھت دو ءَ پاکستانی پوج ءَ آئی ءِ لوگ ءَ چہ آوار جتگ ءُ بیگواہ کتگ-

ھمے وڑ گوستگیں شپ ءَ لیاری ءَ پولیس سندھ رینجرز ءَ جتاجتائیں لوگاں بیڑبرتگ سیزدہ مردم آوار جتگ ءُ بیگواہ کتگ اَنت- دمگی مردمانی رِد ءَ چاکیواڑہ، بغدادی ءُ کلری ءِ دمگاں آوار جتگ اَنت بلے آیانی پجّار انگت نہ بیتگ اَنت-

دومی نیمگ ءَ وائس فار بلوچ مسنگ پرسنز ءِ رِد ءَ شانزدہ فروری ءَ پاکستانی پوج ءَ این سی سی آئی (NCCI) ھسپتال کراچی ءِ نزیک ءَ دانیال ء عبدالناصر، محمد اقبال ء خالق داد ءُ ارشاد علی جھمنند جعفر آباد آوار جنگ ءَ پد ناشناسیں جاھے ءَ برتگ اَنت-

کھول ءِ گوشگ اِنت کہ زورانسری آوار جنگ بیتگیں سئیں ورنا الاج ھاتر ءَ کراچی ءَ شتگ اَنت، بلے آ اود ءَ چہ پوج ءِ کارندھاں زورانسری بیگواہ کتگ اَنت، کھول ءَ وھدے وتی دوستاناکانی زورانسری آوار جنی ءِ ایف آئی آر نکش کنگ ھاتر ءَ پولیس اسٹیشن ءَ شتگ اَنت، ایف آئی آر نکش کنگ جاہ ءَ پولیس کھول جتاجتائیں دروشماں تُرسینگ بندات کتگ-

وی بی ایم پی ءِ چیئرمین نصراللہ بلوچ ءَ دانیال ناصر، محمد اقبال ءُ ارشاد علی ءِ زورانسری آوار جنی ءُ پولیس تھانہ ءِ کارندھانی نیمگ ءَ چہ زورانسری بیگواہ کنگ بیتگیں کھول ءَ تُرسینگ گوں تُرندیں لبزاں ایر جتگ-

وائس فار بلوچ مسنگ پرسنز ءَ سندھ ھکومت ءَ چہ لوٹ کتگ کہ آ بلوچستان ءِ ورنایانی زورانسری آوار جنی ءَ زوت گامگیج بزور اَنت ءُ دانیال ناصر، محمد اقبال ءُ ارشاد علی ءِ پہ سلامتی یل کنائینگ ءِ ھاتر ءَ وتی کرد ءَ پیلو بہ کن اَنت-

ھمے وڑ گوادر ءِ تھسیل چہ جیونی ءَ ھپدہ سالی ئیں نودربر عبداللہ ء عبدالحمید ھم پاکستانی لشکر ءَ آوار جتگ ءُ بیگواہ کتگ-

زانگ بہ بیت بلوچستان ءَ اَبید کراچی ءِ جتاجتائیں دمگاں بلوچ پُسگانی زورانسری آوار جنی ءُ بیگواہ مردماں دروگیں میڑاں کُشگ دْرچ یکشل ءَ برجاہ ءَ اِنت-

مات ھوری ءِ درد

ٹی بی پی شونگال

مات ھوری ءِ سرجمیں زند ریاستی زوراکیانی ساھگ ءَ گوستگ – مار ھوری ءُ آئی ءِ کھول ھما ھزاراں بلوچ باھوٹیاں ھوار بیتگ کہ 1973/77 ءَ ذولفقار علی بھٹو ءِ سرکار ءِ وھد ءَ بلوچستان ءِ دمگ کوھلو، کاھان ءُ سبی ءَ ھونریچیں پوجی آپریشن ءِ وھد ءَ ریاسری زوراکیانی سبب ءَ وتی ھند ءَ لڈ ءُ بار اش کتگ ءُ اوگانستان ءَ بازیں سالاں درانڈیھ بوتگ انت – مات ھوری ءِ کھول ءُ مری ٹک پاکستان ءِ زیاالحق ءِ پوجی زوراک ءَ پد نوزدہ سد ءُ نود ءِ دھک ءَ بلوچستان ءَ واتر بوتگ انت ءُ شال ءَ کوہ چلتن ءِ دامن ءَ نیوکاھان اش آباد کتگ ءُ ھمود ءَ جھمنندی بیتگ انت-

بیست ءُ یکمی کرن ءَ بلوچ انسرجنسی ءِ بندات ءَ ھم نیوکاھان ءِ جھمنند ریاستی برانز ءِ آماچ انت- بلوچ رھشون خیر بخش مری ءِ دزگیری ءِ ھمراھی ءَ یازدہ جنوری دوھزار ءَ نیوکاھان ءَ یک سد ءُ پنجاہ ءَ گیش جھمنندیں مردم دزگیری ءُ زورانسری بیگواہ کنگ بیتگ انت- دو دھکاں گیش گوزگ ءَ پد ھم نیوکاھان ءِ جھمنند زوراکیاں دمگ ءَ لڈ ءُ بار، مچانکی سزا، ریاستی زوراکی، زورانسری بیگواھی ءُ بندیگجاہ ءَ کوشانی دیمپانی کنگ ءَ انت-

مات ھوری ءِ زندگی زورانسری دمگ ءَ لڈ ءُ بار، ریاستہ زوراکیانی اوپار ءُ زورانسری بیگواھیانی ھلاپ ءَ جد ءُ جھد ءَ گوں بندوک انت- انساپ ءِ شوھازگ ءَ مات ھوری وتی پیری ءِ کوپگ ءِ یل کنائینگ ءِ ھاتر ءَ ریاستی بنجلاں ٹکان بیتگ ءُ وتی زھگ ءِ یل کنائینگ ءِ امیت ءُ ودار ءَ بے کساسیں درداں سگان ءُ اے دنیا ءَ رُکست بوتگ – بلے زورانسری بیگواھیانی ھلاپ ءَ اے پیرزالیں توار راجدپتر ءِ تاکاں ھچبر شموشگار نہ بیت انت-

بلوچستان ءَ ھزاراں زورانسری بیگواھی مات ھوری ءِ ءِ زھگ گل محمد مری ھم ھوار انت، آ دوھزار ءُ دوازدہ ءَ زورانسری بیگواھی ءِ آماچ کنگ بیتگ- زھگ ءِ یل کنائینگ ءِ ھاتر ءَ مات ھوری ھشتاد (80) سال ءِ اُمر ءَ پاکستان ءِ بنجاھی شھر اسلام آباد ءَ زھرشانی نندانک ءُ شال ءَ زھرشانی زرمبشتاں ھوار بیتگ- بلوچستان ءَ ھزاراں مات وتی زھگانی یل کنائینگ ءَ جد ءُ جھد ءِ دامن ءَ پھریزگ ءَ انت ءُ ریاست بلوچ ماتانی درد ءُ گمانی گیش کنگ ءَ زورانسری بیگواھیانی راستی ءَ انکاری انت-

بلوچستان ءَ سدانی مات ریاستی زوراکی ءُ مچانکی سزائی پالیسیاں اوپار کنگ ءَ انت ءُ مات ھوری ءِ وڑیں ماتانی ھمت ءَ چہ جد ءُ جھد برجاہ انت- مات ھوری وتی زھگ ءِ بازیں سالانی ودار، آئی ءِ زورانسری بیگواھی ءِ دردانی ھواری ءَ اے دنیا ءَ رکست بوتگ – بلے مات ھوری ءِ وڑیں بلوچ ماتانی درد مروچی ھم راج ءِ مچانکی زانشت ءِ بھر جوڑ بیتگ انت- چُشکہ بلوچ راج ءَ ریاست پاکستان ءِ ریشگ ءَ نیزور کنان کنت ءُ اے ھواریں راجی درد بلوچ سیاسی زانشت ءَ گیش کنگ ءِ سبب جوڑ بیت انت-

بلوچ لبریشن آرمی ءَ وتی رسانکدری چینل ھکل ءَ آپریشن ھیروپ ءَ بھر زیروکیں ھوا بلوچ ءُ آئی ءِ مات ءِ ھمراھی ءَ تامر بند شنگ کتگ-

بی ایل اے ءَ ھوا بلوچ ءِ مات ءِ پجار لعل جان ءِ نام ءَ پدر کتگ ، بی ایل اے ءِ رد ءَ ھوا بلوچ ءِ پت ناکو نبی بخش ھم بی ایل اے ءِ سرمچارے بوتگ، کہ 8 نومبر 2021 ءَ نمیران بوتگ-

بی ایل اے ءِ نیمگ ءَ شنگ بیتگیں دو منٹ ءُ دَہ سکینڈی تامر بندی ءَ ھوا بلوچ ءُ آئی ءِ مات لعل جان گندگ بنت انت- چریشی ءَ مات آئی ءَ را بلوچستان ءِ بیرک ءَ بڈ ءَ دیگ ءَ انت ءُ ھردوک گلائیشی ءَ گندگ ءُ بوسگ دیگ ءَ ھم گندگ بنت-

تامر ءِ یک بھرے ءَ ھوا بلوچ کلوہ دیان ءَ گوشگ انت من وتی دراھیں ھمراھانی ماتاں گوشگ لوٹ آں کہ آ ھم لمہ یاسمین ءِ ڈول ءَ مھکم بہ بنت – وتی زھگ ءَ ھمت بہ دے انت ءُ شھادت ءِ واستا گمزدگ مہ بنت- پرچاکہ مروچی ھما زھگ وتی سرڈگار ءِ واستا کربان کنگ ءَ انت – ءُ سرڈگار ءِ واستا وتی زھگاں راھیگ بہ کن انت مئے سرڈگار ءَ مئے دیمھونیانی درکاری انت-

ھوا بلوچ گوش ایت مئے کربانیاں چہ آیوکیں نسل یک وشھالیں زندمانیں گواز ایت ھمے واستا مارا کربانی دیگ لوٹ ایت من ماتاں گوش آں وت ءَ مھکم بہ کن ات-

تامر ءِ گڈسر ءَ ھوا بلوچ ءُ بی ایل اے ءِ مجید بریگیڈ ءِ زالبولین فدائین ٹریننگ ءُ پوجی مشقانی کنگ ءَ گندگ بنت-

ھوا بلوچ نبی بخش ءِ جنک بیتگ ءُ کیچ ءِ دمگ تمپ کوھاڈ ءِ جھمنند بیتگ- ھوا بلوچ بی ایل اے ءِ مجید بریگیڈ ءِ آپریشن ھیروپ دو ءِ وھد ءَ گوادر ءِ میدان ءَ بھر مند بیتگ-

بلوچستان ءَ زورانسری آوار جنی ءُ زورانسری بیگواہ کنگ بیتگیں مردمانی لاشانی دور دیگ ءِ دْرچ یکشل ءَ برجاہ ءَ اِنت-

بلوچستان ءِ بُنجاھی شھر شال ءِ دمگ کلی قمبرانی ءَ یک ورنایے آوار جنگ ءُ بیگواہ کنگ بیتگ-

کھول ءِ رِد ءَ جنید احمد ء شاہ محمد گوستگیں شپ ءَ پاکستانی پوج ءَ لوگ ءَ چہ آوار جتگ ءُ ناشناسیں جاھے ءَ برتگ، چریشی ءَ پد آئی ءِ درگت ءَ ھچ وڑیں ھال دز نہ کپتگ-

کھول ءَ ٹاہ داتگ کہ جنید احمد ھچ درکانودی پُرکاریاں ھوار نہ بیتگ ءُ آئی ءَ زوت یل بکن اِت-

ھمے وڑ کیچ ءِ دمگ رودبُن ھشک آباد ءَ پاکستانی پوج ءَ آپریشن ءِ میان ءَ لوگانی سر ءَ بیڑبرتگ ءُ پٹ ءُ پول کتگ-

ھالانی رِد ءَ اے میان ءَ پاکستانی پوج ءَ بازیں مردمے آوار جتگ ءُ ناشناسیں جاھے ءَ برتگ اَنت آیانی تہ ءَ ماجد ء فقیر، حمل ء بشام، اسماعیل ء خلیل، وھاب ء عبدالواحد خالق ء عبدالواحد، رضا ء یوسف ءُ جاسم نام ءَ چہ بیتگ اَنت-

اِھوالکار ءِ رِد ءَ پاکستانی پوج ءَ اشانی ھمراھی ءَ دگہ بازیں شھری یے ھم ناشناسیں جاھاں برتگ اَنت کہ آیانی پجّار انگت نہ بیتگ اَنت-

ھمے وڑ پنجگور ءَ سی پیک دگ سر ءَ برجاہ ناھانی شرکت نزیک ءَ یک لاشے دزکپتگ کہ آ تیر جتگ ءُ کُشتگ-

پولیس ءِ رِد ءَ کُشگ بیتگین ءِ پجّار جھانزیب ء محمد علی جھمنند عیسیٰ سورگ نام ءَ چہ بیتگ-

واکدار رِد ءَ لاش پہ ھژدری کاروائی ءِ ھاتر ءَ دمگی نادُراھجاہ ءَ برتگ، بنداتی ھالانی رِد ءَ کُشگ بیتگین ءِ جسم سر ءَ تیرانی بازیں نشان بیتگ-

کھول رِد ءَ جھانزیب کساس چار ماہ ءَ ساری ناشناسیں سلاہ بندیں گاڑی سواراں وتی ھمراھی ءَ برتگ، چریشی ءَ پد آ بیگواہ بیتگ-

زانگ بہ بیت ھمے ماہ ءِ تہ ءَ پنجگور ءَ کساس نُھ مردمانی لاش جتاجتائیں ھنداں چہ دزکپتگ اَنت کہ پیسر ءَ زورانسری نشانگ بیتگ اَنت-

بلوچ ریپبلکن گارڈز جارکش دوستین بلوچ ء شنگ کتگیں درشان ءِ تہ ءَ گْوشتگ کہ مئے سرمچاراں کچھی ءِ دمگ ڈھاڈر ءَ پاکستانی پوج ءِ پلامرزی ئیں گوستگیں ڈی ایس پی علی اکبر ءِ اوتاک بمب اُرش ءِ نشانگ کتگ-

جارکش ءَ گْوشتگ کہ علی اکبر ءُ آ دگہ ریاستی پلامرزی مردماں کڈن کن ایں کہ آ ریاست ءِ پلامرزی ءُ بلوچ راجی آجوئی ءِ اڑان بیگ ءِ جُھد ءَ مہ کن اَنت اگاں ناں آ وتی تاوان ءِ زمہ وار وت بنت-

جارکش ءَ گوشتگ مئے گل بی آر جی اے اُرش ءِ زمہ واری ءَ منّ اِیت ءُ مئے اے وڑیں کاروائی بلوچستان ءِ وتواجھی ءَ تاں برجاہ بنت-