TBP Balochi

بلوچستان ءِ جتاجتائیں دمگاں پاکستانی پوج ءِ سر ءَ بیتگیں اُرشانی زمہ واری بی ایل ایف ءُ بی آر جی ءَ منّ اِتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ وتی شنگ کرتگیں درشانے ءَگوشتگ کہ بی ایل ایف ءِ سرمچاراں 23 جولائی 2026 ءَ بلیدہ، بزپیش ءَ زورگریں پوج ءِ دو موٹرسائیکلانی تر ءُ گردی ٹولی ءِ سرءَ اُرش کتگ۔ اُرش ءِ آسر ءَ یک کارندھے جاھی مرتگ ءُ یکے سک ٹپی بیتگ۔

جارکش ءَ گوشتگ کہ بی ایل ایف ءِ سرمچاراں 21 جولائی 2026 ءِ شپ ءَ کراچی ءُ ھب چوکی ءِ میان ءَ ھمدرد یونیورسٹی ءِ نزیک ءَ کوسٹ گارڈز ءِ چوکی ءِ سر ءَ دستی بمب اُرش کرتگ، ایشی آسر ءَ کوسٹ گارڈز ءِ یک کارندھے مرتگ۔

جارکش ءَ گوشتگ کہ دگہ یک کاروائی یے ءَ بی ایل ایف ءِ سرمچاراں 17 جولائی2026 ءَ شپ ءِ دہ ءِ نزیکءَ پسنی کوسٹ ءِ مزنیں بنجل کہ اود ءَ ریڈار سسٹم اِنت، گرنیڈ لانچر ءِ باز آس داتگ ءُ نشانگ کتگ۔ درسیں گولا وتی نشانگ ءَ کپتگ اَنت چہ ایشی دژمن ءَ باز جانی ءُ مالی تاوان بوتگ۔ شپ ءَ دژمن پوجی کارندہ ءُ ٹییکنیشن مزنیں بنجل ءِ ریڈار سسٹم ءُ آدگہ تاواناں چارگ ءَ بیتگ اَنت کہ یکبرے پد ءَ سرمچاراں گوں شوربندی ءَ بنجل ءِ سر ءَ گوں گرنیڈ لانچر ءَ اُرش کتگ ءُ کوسٹ گارڈز ءِ کارندہ ریڈار سسٹم ءِ شوربندی گیشر تاوان داتگ۔

بلوچستان ءِ لبریشن فرنٹ دگہ یک شنگ کتگیں ءِ جارکش میجر گْوھرام بلوچ ءَ شنگ کتگیں درشانے ءِ تہ ءَ گْوشتگ کہ مئے سرمچاراں 23 جولائی 2026 کلات ءِ دمگ منگچر ءَ بُنجاھی ھائی وے سر ءَ دو کلاکاں کہ چہ گیش ناکہ بندی کتگ پٹ ءُ پول کتگ اے میان ءَ سرمچاراں شھدگ سر ءَ سُر پُر کنوکیں سرجمیں گاڑی پٹ ءُ پول کتگ اَنت- ناکہ بندی ھلاس کنگ ءَ پد زورگریں پوج ءَ دمگ ءَ پیشگامی کنگ ءِ جُھد کتگ- بلے پیسر ءَ چہ جاڑیگیں سرمچاراں آیانی سر ءَ مزنیں ءُ وتکاریں سلاھاں چہ تُرندیں اُرشے کتگ- اے پسھی کاروائی ءِِ آسر ءَ زورگریں پوج ءِ دو کارمند مرتگ ءُ بازین ئِے ٹپی بیتگ اَنت، اے پسھی کاروائی ءِ آسر ءَ زورگریں پوج ءِ دو کارندہ مرتگ ءُ بازین ئِے ٹپی بوتگ اَنت، جانی ءُ مالی تاوان ءَ پد پاکستانی پوج ءِ آ دگہ کارندہ پُشتکنزی ءَ لاچار بیتگ اَنت-

جارکش ءَ گوشتگ کہ دگہ یک کاروائی ءَ 22 جولائی 2026 ءَ مئے سرمچاراں تمپ ءِ دمگ گومازی ءَ ھمکروچی گلے کارانی کنگ ءُ دمگ ءِ جاورھالانی چارگ ءِ ھاتر ءَ گشت ءَ بیتگ اَنت- زورگریں پاکستانی پوج ءَ سرمچاراں پیشگامی کنگ ءِ دارگ ءُ آیاں انگیر کنگ ءِ نیئت آیانی راہ ءِ سر ءَ پیسر ءَ ناکہ بندی کتگ بیتگ- سرمچاراں پیشگامی ءِ میان ءَ زورگریں پوج ءِ سر ءَ اُرش کتگ ءُ دوئیں نیمگاں چہ تُرندیں میڑ بندات کتگ کہ یک کلاکے ءَ گیش تاں یکشل ءَ برجاہ بیتگ- سرمچاراں پسھی کاروائی ءِ آسر ءَ زورگریں پاکستانی پوج ءِ پنچ کارندہ مرتگ ءَ بازین ئِے ٹپی بیتگ اَنت-

جارکش ءَ گوشتگ 22 جولائی 2026 ءِ روچ یک ءَ دگہ یک کاروائی ءَ سرمچاراں کلات ءِ دمگ رودینجُو ءِ ھند سر ءَ بُنجاھی شھدگ سر ءَ ناکہ بندی کتگ گاڑی پٹ ءُ پول کتگ- ناکہ بندی ءِ میان ءَ زورگریں پوج ءَ دیم ءِ آیگ ءِ جُھد کتگ ءُ سرمچاراں سنگرانی سر ءَ مارٹر ءِ بازیں گولھے آس داتگ، سرمچاراں پھازداری ٹولیاں زوت پسھی کاروائی کنان ءَ آیانی سر ءَ مزنیں ءُ وتکاریں سلاھاں چہ اُرش کتگ- اے کاروائی ءِ میان ءَ آر پی جی ءِ گولہ ءِ لگگ ءَ چہ دُژمن ءِ یک پوجی گاڑی ءَ سک تاوان رس اِتگ ءُ پوج ءَ جانی تاوان چست کنگ کپتگ، چریشی ءَ پد زورگریں کارندہ پُشتکنزی ءَ لاچار بیتگ اَنت-

ھمے وڑ بلوچ ریپبلکن گارڈز ءِ جارکش دوستین بلوچ ءَ وتی شنگ کرتگیں درشانے ءَ گوشتگ کہ دوشی سرمچار بلوچستان ءِ دمگ کچھی ءِ ھند ڈھاڈر ءَ تر ءُ گرد ءَ بیتگ اَنت کہ رپتار ھوٹل ءِ نزیک ءَ اناگت ءَ گوں زورگریں پوج ءَ دیم پہ دیم بوتگ اَنت، سرمچارانی ءُ پوج ءِ میان ءَ داں دیر ءَ میڑ برجاہ بوتگ۔ اے میڑ ءِ آسر ءَ زورگریں دژمن ءَ جانی ءُ مالی تاوان بوتگ۔ سرمچار پہ سلامتی درکپتگ اَنتءُ وتی مھکمیں اوتاکاں شتگ اَنت۔

سنگر گپتگیں سلاہ بندیں مردماں پاکستانی پوج ءِ کاروان اُرش ءِ نشانگ کتگ-

بلوچستان ءِ دمگ چہ نوشکی ءَ ھالانی رِد ءَ نوشکی کلی بٹو ءِ نزیک ءَ این 40 شھدگ سر ءَ سنگر گپتگ ءُ ناشناسیں سلاہ بندیں مردماں پاکستانی پوج ءِ یک مزنیں کاروانے ءِ سر ءَ تُرندیں اُرش ءِ نشانگ کتگ-

سلاہ بندیں اُرش ءَ پاکستانی پوج ءِ کارندھاں بیرانی ءِ ھال سر بیتگ-

پوج ءِ سر ءَ ھما وھد ءَ اُرش بیتگ وھدے پاکستانی پوج ءِ یک کاروانے بلٹ پروف گاڑیانی ھمراھی ءَ نوشکی شھر نیمگ ءَ روگ ءَ بیتگ اَنت-

اے میان ءَ سلاہ بنداں کاروان ءَ ھوار پولیس ھم اُرش ءِ نشانگ کتگ چریشی ءَ ڈپٹی کمشنر پولیس ءِ گاڑی ھم سانمند بیتگ، بلے اے اُرش ءَ رکّ اِتگ اَنت ءُ جاہ پہ جاھی تتکگ اَنت-

دو روچ ءَ ساری ھم نوشکی شھر ءِ نزیک ءَ پاکستانی پوج ءِ یک کاروانے اُرش ءِ نشانگ کتگ چریشی ءَ سے کارندہ بیران ءُ دگہ سے ٹپی بیتگ اَنت-

زانگ بہ بیت کہ دمگ ءَ بلوچ آجوئی لوٹوکیں سلاہ بندیں گل پُرکار اَنت آیانی نیمگ ءَ چہ شھدگ سر دستیگ ءُ ناکہ بندی، پاکستانی پوج ءَ ھوار مڈی بروکیں گاڑیاں اُرشانی نشانگ کتگ-

بلے اے وئیل ءِ زمہ واری انگت ھچ گل ءَ نہ زرتگ اَنت-

وائس فار بلوچ مسنگ پرسنز ءِ چیردستی ءَ زورانسری آوار جنگ بوتگیں آصف بلوچ ءَ ھوار ایندگہ آوار جنگ بوتگیں مردمانی وش ءُ سلامتی یل کنگ ءِ ھاتر ءَ شال پریس کلب ءِ دیم ءَ زھرشانی کنگ بوتگ ۔

زھرشانی ءَ زوراناری آوار جنگ بوتگیں مردمانی کھول ، انسانی ھکانی باسک ، وکیل ، نودربر ءُ سیاسی تکاں سیادی داروکیں مردماں بھر زرتگ ۔

زھرشانی ءَ وی بی ایم پی ءِ سروک نصراللہ بلوچ ، آصف بلوچ ءِ گھار ، شاہد کرد ءِ برات ، زھیر بلوچ ءِ گھار ءُ دگہ تران کاراں تران کتگ ۔

ترانکاراں گوشتگ کہ زورانسری آوار جنی مردمانی بنکی ھکانی بگیرداری ئے ۔ یک مردمے ءِ آوار جنگ ءَ ایوک ءَ ھما مردم ناں بلکنہ سرجمیں کھول سانمند بیت ۔ کھول ءَ یکشلیں مجگی زوراکی بے باوری ءُ ازیت ءِ تہ ءَ دور دنت ۔

آیاں گوشتگ کہ سرکار ءَ ھمے سال ءَ ٹاہ داتگ کہ چہ پروری ءَ آوار جنگ بوتگیں مردمانی جیڑہ گیشگیوار کنگ بوتگ انت ءُ دیمتر ءَ ھر وڈیں مردمے ءِ دزگیری ءَ پد بیست چار ساھت ءَ پد مجسٹریٹ ءِ دیم ءَ پیش کنگ بیت ءُ کھول ءَ دچار کپگ ءِ موکل دیگ بیت ۔ تران کاراں گوشتگ پدا ھم زمینی راستی اشی ءِ چپ انت بلوچستان ءَ آوار جنگ بوتگیں مردمانی گار کنگ ءِ درچ برجاہ انت ۔ وھدیکہ ھمک روچ زورانسری آوار جنگ بوتگیں مردمانی ژانگولیں جون دست کپگ ءَ انت ۔

ترانکاراں سرکار ءِ سرا زور داتگ کہ آ زورانسری آوارجنی ءِ درگت ءَ وتی کتگیں کولانی پابند بہ بیت درسیں آوار جنگ بوتگیں مردم یل کنگ بہ بنت ۔

ترانکاراں آصف بلوچ ءَ ھوار درسیں آوار جنگ بوتگیں مردمانی یل کنگ ءِ لوٹ کتگ ءُ گوشتگ کہ ھر مردمے سرا ھر وڈیں الزام ءِ ھست گڈا کانود ءُ رھبندانی رد ءَ آمیدگس ءَ آرگ بہ بیت ۔ زورانسری آوارجنگ بوتگیں مردمانی در کانودی کوش بند کنگ بہ بیت ۔

پنجگور ءِ دمگ چہ گرمگان دگ ءَ چاردہ سالی ئیں شھزاد ء نزیر ءِ تیرسُپتگیں لاش دزکپتگ – لاش پہ اژدری کاروائی ءِ ھاتر ءَ سول ھسپتال پنجگور ءَ برتگ-

کھول ءِ رِد ءَ شھزاد 31 مئی 2025 ءِ شپ ءَ پنجگور ءِ دمگ چہ پروم ءَ پاکستانی پوج ءَ آوار جتگ، چریشی ءَ پد آ زورانسری بیگواہ کتگ – کھول ءِ گوشگ اِنت کہ آ ناں آمیدگس ءَ پیش کنگ بیتگ ءُ نانکہ آئی ءِ دزگیری ءِ درگت ءَ سرکاری ادارھاں سرپدی داتگ-

اِھوالکار ءِ رِد ءَ 31 مئی 2025 ءِ شپ ءِ کساس دوازدہ ءَ پروم ءِ دمگ رحیم آباد ءُ نعیم آباد ءَ مزنیں کچے ءَ سرچ آپریشن کتگ، اود ءَ پاکستانی پوج ءَ سرجمیں دمگ انگیر ءَ کتگ بازیں لوگانی سر ءَ بیڑبرتگ – کھول ءَ ٹاہ داتگ کہ اے کاروائی ءَ پاکستانی پوج ءِ گوما دمگی سلاہ بندیں مردماں ھم ھوات بیتگ اَنت، آیاں دمگی مردم ڈیتھ اسکواڈ ءِ نام ءَ چہ بیتگ-

کھول ءِ گوشگ رِد ءَ رحیم آباد ءَ بیڑ ءِ میان ءَ شھزاد آئی ءِ لوگ ءَ چہ آوار جتگ، چریشی ءَ پد آیانی درگت ءَ ھچ وڑیں سرپدی دز نہ کپتگ -بازیں ماہ ءَ تاں آئی ءِ یل کنگ ءِ ھاتر ءَ کھول ءَ جتاجتائیں واکدار ءَ چہ گوں پریات کتگ، بلے آیاں ھچ وڑیں سرپدی نداتگ-

نو یک سالے ءَ پد گرمکان دگ ءَ چہ شھزاد تیرسُپتگیں لاش دزکپتگ-

سب الٹرن کلاس ءِ لیکہ ءُ بلوچ زرمبشت

نبشتہ کار : یاسر باران

اولی بھر

دی بلوچستان پوسٹ

مرچی کہ ما سب الٹرن کلاس تھیوری ءَ ریس ءُ پریس کنگ ءَ اِنت اے مرچی چہ پیش بیستمی کرن ءَ انتونیو گرامشی ءَ وتی زندانی زمانگ ءِ prison Notebook توک ءَ نبشتہ کتگ ءُ دیم ءَ آورتگ ۔ انتونیو فرانچیسکو گرامشی نوزدھمی کرن ءِ گُڈی دھک ءَ بزاں 1891 ءَ اٹلی شھر Ales ودی بیتگ ۔ گرامشی وتی بنداتی وانگ ءُ زانگ ءَ وتی بنکی ھنکین ءَ وان ایت پد ءَ university of turin وانگ ءَ رؤت ۔ ھمود ءَ لٹریچر ءُ زبان ءِ سر ءَ کار کنت ءُ ھمے زمانگ ءَ وتی سیاست ءَ ھم بندات کنت بلے مالی جیڑھانی سوب ءَ آ یونیورسٹی ءَ وتی وانگ ءَ سرجم کت نہ کنت ءُ یلے کنت ۔ ھمے زمانگ ءَ 1921 ءَ اٹلی مارکسٹ پارٹی کہ جوڑ بیت گڑا اٹلی مارکسسٹ پارٹی ءِ بنداتی مردماں چہ یکے گرامشی بیت ءُ آ اٹلی مارکسسٹ پارٹی ءِ جنرل سیکٹری ھم بیت ۔ اے زمانگ ءَ Benito Mussolini Fascist dictatorship ھکومت دور بیتگ ءُ گرامشی ءِ سیاسی جھد ھمے فاشسٹ ھکومت ءِ نزام ءِ بگیری ءَ بیتگ ۔ اے فاشسٹ ھکومت 1926 ءَ اٹلی مارکسسٹ پارٹی ءِ سر ءَ کریک ڈاؤن کنت ءُ گرامشی ءَ گِپت ءُ زندانی کنت ۔ زندانی زمانگ ءَ گرامشی وتی نام داریں کتاب prison Notebook ءَ نبشتہ کنت۔ آ اے کتاب ءِ تہ ءَ بازیں جیڑھانی سر ءَ نبشتہ کنت ءُ بازیں تھیوری ءِ دیم ءَ کار ایت۔ گرامشی 1937ءَ زندان ءِ تہ ءَ دماگی پالج ءِ آماچ بیت ءُ نمیران بیت ۔ مرچی آ جھان ءِ نام داریں دانشورانی لڑا ھوار انت ۔

بیا گرامشی ءِ گرانبھائیں تھیوری ءِ پریچگ ءِ جھد ءَ کن ایں ۔

گرامشی سب الٹرن کلاس ءَ چوش نبشتہ کنت کہ وتواجھی کنوکیں تبکہ ءِ وتی راجدپتر ءُ وتی گوستانک ءِ بیت ۔ ھکمران کنوکیں تبکہ ءِ ھم وتی راجدپتر ءُ وتی دودمان انت ۔ سب الٹرن پراھگ (خلا )ءِ سر ءَ Dominant کنت ءُ اے باور کنائین ایت کہ منی گوست چہ شمئے گوست ءَ شرتر انت ۔ دیمتر ءَ گرامشی نبشتہ کنت کہ اے جیڑگ رد انت کہ ھکمران تبکہ یک جاہ انت ءُ کانودی ءُ سیاسی ءَ اَنت ۔ اے یکجاھی اشانی رسمی یکجاھی یے اشانی یکجاھی ءَ ھکمران تبکہ ءِ مپاد بندوک اَنت۔ ھکمران تبکہ مدام ھمے جیڑ ایت کہ چاگرد ءِ کانودی ءُ سیاسی کار منی دست ءَ بہ بنت ۔ ھکمران تبکہ وت ءَ مدام Superior لیک ایت، آ ھمے مار ایت کہ منی کانود ءِ بنیاد ءَ چاگرد دیم بہ جنز ایت ءُ چاگرد منی کانود ءُ نزام ءَ( apply بہ کنت) بہ زیر ایت۔ ھکمران تبکہ مدام وتی لیکہ ءَ چاگرد ءِ تہ ءَ implement کنگ ءِ واست ءَ انچیں سیاسی نزام جوڑ کنت کہ ھمے سیاسی نزام ءِ وسیلہ ءَ چی وتی لیکہ، وتی راجدپتر ءُ وتی گوستانک ءَ سب الٹرن کلاس سر ءَ مُش ایت تانکہ سب الٹرن کلاس ءِ جیڑگ ءُ مارگ ءِ مارشت ھلاس بہ بنت ءُ وتی راجدپتر ءَ بہ شموش ایت ءُ ھکمران تبکہ ءِ راجدپتر ءَ بہ زیر ایت ۔ ءُ سب الٹرن کلاس ھمے بہ مار ایت کہ منی گوست ءُ ھست زورگیر ءِ داتگیں رھبند ءِ رِد ءَ اَنت ءُ منی واست ءَ اے رھبند ءَ ابید دگہ ھچ نیست۔ ھکمران تبکہ وتی جوڈ کتگیں نزام ءَ چہ سب الٹرن کلاس ءِ گوستانک ءَ لپاش ایت ءُ آئی ءِ دود ءُ ربیدگاں ھلاس کنت آئی گھگیری ءِ سنچ ءَ چہ روتگاں گوج ایت ءُ ھلاس کنت ۔ ھکمران تبکہ ھمے جیڑ ایت کہ باندا اے تبکہ جاہ مہ جنت ءُ ھکمران تبکہ ءِ بگیری ءَ گھگیری مہ کنت ءُ گھگیری سب الٹرن کلاس ءِ سَسا ءَ چہ دور بہ بیت-

گرامشی ءِ رد ءَ سب الٹرن کلاس یک جاہ نہ انت ءُ یک جاہ بیت ھم نہ کناں دانکہ آ یک ریاستے ءِ جوڈ کنگ ءِ قابل نہ بنت ۔ ءُ اے تبکہ ءَ راجدپتر نیست اگاں راجدپتر ءِ ھست انت گڑا اشی ءِ راجدپتر ھکمران تبکہ ءِ جوڑ کتگیں نزام ءَ گوں بستگ ، ءُ اے وڑیں راجدپتر ریاست ءُ ریاستی ٹولیانی راجدپتر زانگ بنت-

ھکمران تبکہ چیردستیں تبکہ ءَ بزاں کہ سب الٹرن کلاس ءَ مالی ءُ اقتصادی ھساب ءَ وتی چیردست کنت ۔ پہ درور ءَ بزاں کہ ھکمران تبکہ چاگرد ءِ توک ءَ کار ءُ روزگار ءِ سرجمیں راہ ءُ دراں بند کنت ءُ یک راہ ءِ پشت گیج ایت ۔ شھر ءِ توک ءَ پنچ ءُ شش کار جاہ جوڑ کنت ءُ اے کارجاھانی جوڑ بؤگ ءَ پد سب الٹرن کلاس پہ لاپ ءِ شوھاز ءَ شھر ءَ کیت سب الٹرن کلاس وش نہ انت کہ من پہ لاپ ءِ ھاتر ءَ دگہ شھراں بہ رواں ءُ کار بہ کناں بلے آ لاچار کنگ بیتگ انت اشانی واست ءَ بید ءِ شھر ءِ آیگ ءَ دگہ ھچی راہ پشت نہ کپتگ ات ۔ لاچار ات انت کہ کم چہ کم نھاد ءَ کار بہ کن انت ۔

ھکمران تبکہ ءِ اے سیاسی نزام کہ ھست اِنت اے نزام وھدیکہ کوھن بیت گڑا ھکمران تبکہ چار ایت کہ اے سیاسی نزام کوھن اِنت ءُ سب الٹرن کلاس ءِ تہ ءَ اے نزام ءِ بگیری ءَ گھگیری باوست بؤگ ءَ اِنت گڑا ھکمران تبکہ سب الٹرن ءِ گھگیری ءِ دارگ ءِ واست ءَ شور بندی ٹھین ایت ءُ نوکیں پالیسی ءِ اڈ دنت۔ نوکیں سیاسی نزام ءَ باکائدہ پروگرام کنت ءُ چاگرد ءِ تہ ءَ راہ دنت ۔ ءُ اے سیاسی نزام سب الٹرن کلاس ءِ منارینگ ءِ ھاتر ءَ چاگرد ءِ تہ ءَ باکائدہ پروگرام اڈ دے اَنت ءُ اے پروگرام بازیں دروشمے ءَ چاگرد ءِ توک ءَ ھست مان اَنت ۔ کہ آ فیسٹول دروشم انت ، Ngo culture ئے ۔ آ چاگرد ءِ تہ ءَ دان ءُ آرت ءِ بھر کنگ ءِ دروشم اَنت یا دگے بازیں دروشمے ءَ ھست اَنت ۔

ھکمران تبکہ ءِ نوکیں سیاسی نزام ءِ مول ءُ مراد چوش ات اَنت کہ کجام وڑ ءَ وتی سیاسی پروگرام ءَ سب الٹرن کلاس ءَ بہ منارین انت ءُ اشانی سر ءَ وتی ھکمرانی ءَ برجاہ بہ دار انت دانکہ اے تبکہ منی بگیری ءَ گھگیری ءِ کنگ ءِ ھاتر ءَ جاہ مہ جن اَنت ۔ سب الٹرن کلاس ءِ لھتے تبکہ اے جھد ءَ کنت کہ ما ھکمران تبکہ ءِ سیاسی نزام ءِ تہ ءَ بہ رواں ءُ وتی لوٹاں سرجم کت بہ کناں بلے اے وت ءَ سیاسی نزام ءِ تہ ءَ جاگہ دات نہ کن اَنت اگاں جاگہ دات بہ کناں ھم سب الٹرن کلاس ءِ لوٹ مھدود اَنت ۔

وھد وھد ءِ سر ءَ سب آلٹرن کلاس ھم وتی سیاسی پاٹی ءِ جوڑ کناں بلے اے پاٹی ءِ مزنیں لوٹ نہ بنت ءُ آ آشوب ءِ لوٹ نہ کن اَنت بلکیں انچیں لوٹ بنت بلے پد ءَ ھم چیزے وھد ءَ پد ھاموش بنت ۔ سب الٹرن کلاس ءِ میان ءَ یک انچیں کلاس ءِ ھم بیت کہ آ یک سیاسی پاٹی ءَ چہ بالادستی ءِ نیمگ ءَ رؤت یا بالادستی ءِ نیمگ ءَ رؤگ ءِ جھد ءَ کنت ءُ آ دگہ سب الٹرن ءِ جھگیری ءَ کنت دانکہ اے سب الٹرن ءِ جند کہ ھست انت آ اے پاٹی ءِ بالادستی ءَ بہ من ایت ءُ اے پاٹی ءِ لوٹانی بنیاد ءَ دیم ءَ بہ جنز ایت۔ پرچہ کہ سب الٹرن کلاس وھدے کہ یک پاٹی ءِ ھمراہ بیت بہ زانکہ کہ اے پاٹی توانمند ءِ زانگ بیت۔

گرامشی اٹلی ءِ زرمبشت Risorgimento درور ءَ دنت ءُ ھمے گوش ایت کہ اٹلی ءَ کہ اے الطالوی ریاست جوڑ بیتگ ۔ اے ریاست ءُ پاٹی ءَ آ کچ ءَ مھلوک ءِ پلامرزی گون نہ بیتگ بلکیں اے پاٹی ءَ پہ زور آ دگہ نزوریں پاٹی وتی نیمگ ءَ آورتگ اَنت یا وَ لالچ داتگ اَنت ءُ سب الٹرن ءِ سرا وتی hegemony ترندی ءَ گوں برجم داشتگ انت ۔ سب آلٹرن کلاس کجام وھد ءَ object ءَ چہ در کیت subject نیمگ ءَ رؤت-

گرامشی ءِ نز ءَ سب الٹرن کلاس بندات ءَ نزوریں تبکہ ءِ بیت ۔ بلے کم کم ءَ Innovatory force نیمگ ءَ رؤت چاگرد ءِ تہ ءَ وتی سر ءُ پُراں گیش کنت ءُ اول سر ءَ آ وتی دیم ءِ ھرچ اڈاندے ھست آیاں دور کنت ءُ پد ءَ چاگرد ءِ تہ ءَ وتی پجار ءُ زبان ءَ منارین ایت ءُ وتی Dominance گیش کنت ۔گرامشی نبشتہ کنت کہ اے کلاس ایوک ءَ اد ءَ سوبمند نہ انت اکتدار ءِ گرگ سوبمندی ءِ گوشگ نہ بیت بلکیں سوبمند بؤگ ءِ ھاتر ءَ ترا چاگرد ءِ تہ ءَ دومی چاگردی ٹولی کہ ھست انت آیانی پلامرزی ھم درکار بیت اے ٹولی وھدے کہ یک جاہ بوت انت بزاں کہ اے سوبمندی ءِ مان زمان اَنت۔ پاٹی وھدے کہ اکتدار ءَ کئیت اے ٹولیانی تہ ءَ لھتے ٹولی دیم کئیت پلامرزی کنت ءُ لھتے ٹولی ھاموشی ءَ گوں اشانی پلامرزی ءَ کنت ۔ وھدے گوزگ ءَ پد اے سیاسی پاٹی یک مھکمیں تاکتے ءِ دروشم ءَ ریاست ءِ نیمگ ءَ رؤت ۔

سب الٹرن کلاس ءِ سیاسی نزام کہ ھست انت اے ھما وھد ءَ سوبین بیت کنت کہ آ راج ءَ یک جاہ کت بہ کنت یک سیاسی نزامے ءِ وسیلہ ءَ چہ آیاں یک جاہ ءُ یک مشت بہ کنت ۔ پاٹی ءِ مستریں چیز اے نہ انت کہ چاگرد ءِ تہ ءَ اکتدار ءِ گرگ سوبین بیتگ بلکیں مستریں چیز ایش انت کہ تو وتی پاٹی ءِ سیاسی پروگرام ءَ چہ چوں راج یکجاہ کتگ -گرامشی اد ءَ اٹلی ءِ درور ءَ دنت کہ اٹلی ءَ کمیونزم شھری ریاست ءِ ھاکمی ءَ چہ پد الطالوی بورژازی ریاست یک مھکمیں ریاستے ءِ دروشم ءَ دیم ءَ کئیت بلے راج ءِ یکجاہ کنگ ءَ سوبین نہ بیت پرچا کہ اے پاٹی ءَ چاگرد یکجاھیں سیاسی شوربندی ءِ رد ءَ یک جاہ کت نہ کتگ ۔ چاگرد ءِ تہ ءَ راج ءِ یک جاہ کنگ ءَ بے سوب بیتگ ۔ ھرچ وڈیں پاٹی ءِ بہ بیت آ پاٹی کہ راج ءَ یک جاہ کت مہ کنت گڈا آ مدام پشت ءَ رؤت یا پرشت ءُ پروش ءِ آماچ بیت، ءُ آؤکیں وھد ءَ مھلوک ءِ گھگیری ءِ دیمپان بیت ۔

سب الٹرن کلاس ءِ گوست ءَ کہ ما چاریں آ مدام درگان درگانی ءِ آماچ اِنت آ ھر مدام کہ یک جاھی ءِ جھد ءَ کن انت گڑا ھکمران تبکہ ءِ سان مدام سب الٹرن کلاس ءِ یک جاھی ءِ دیم ءَ اڑاند بنت ۔۔
گرامشی رِد ءَ سب الٹرن کلاس اگاں جنگ ھم بہ کنت بلے ھکمران تبکہ ءِ ساناں چہ وت ءَ رکینت کت نہ کنت ۔ پرچاکہ ھکمران تبکہ ءَ سب الٹرن کلاس ءِ سر ءَ بازیں سان ءِ دور داتگ آ سان دودءُ ربیدگ ءُ دودمان بہ بہ انت ، راجدپتر ءِ زبان ءِ یا دگہ چاگردی جیڑھانی بہ بنت ۔ پہ اکتدار گرگ ءَ اے سان ھلاس نہ بنت بلکیں بازیں وھدے تاں اے سان سب الٹرن کلاس سرا ھست بنت۔

روان انت —

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ لبریشن آرمی ءِ سرکاری چینل ھکل ءَ زیارت ءَ پاکستانی لشکر ءِ دو بنجلانی سر ءَ اُرش ءِ ویڈیو شنگ کتگ۔

چار منٹ ءُ پنجاہ ءُ پنچ سیکنڈ ءِ ویڈیو ءِ تہ ءَ بلوچ سرمچار گندگ بنت کہ آ مزنیں کساسے ءَ نوکیں سلاھاں گوں سلاھ بند ءُ بلوچستان ءِ بیرک ءَ وتی دست ءَ کتگ ءُ بوت کنوکیں ٹارگٹانی نیمگ ءَ دیم ءَ روگ ءَ اَنت۔

سرمچاراں مھکمیں رنگے ءَ فورسز ءِ نشانگ جوڑ کنگ ءَ پد ویڈیو ءَ گندگ بیت کہ آ پاکستانی فورسز ءِ بنجلانی سر ءَ سرجمیں کنٹرول ءَ زورگ ءَ اَنت ءُ مزنیں سلاھاں دستیگ کنگ ءَ اَنت۔

ویڈیو ءِ تہ ءَ سرمچار دیم ءَ روگ ءِ وھد ءَ یکے دومی ءَ را جاور ھال ءِ بابت ءَ سرپدی دیگ ءَ گندگ بنت ءُ سرمچارانی ٹولی آسانی ءَ بنجل ءَ سر بنت۔

ویڈیو ءِ تہ ءَ پاکستانی لشکر ءِ سر ءَ تیرگواری ءَ پد کارندہ ءِ تتکگینانی ندارگ ھم ھوار اَنت ءُ سرمچار بنجلانی تہ ءَ پتر انت ءُ آیانی جاگھاں سوچگ ءَ اَنت ءُ پاکستانی لشکر ءِ کارمرد بوتگیں مزنیں کساسے ءَ سلاہ دست کپ اَنت ءُ گوں وت اش بر اَنت۔

زانگ بہ بیت بلوچ لبریشن آرمی ءِ نوکتریں ساپ ءُ سلوئیں تامرانی تہ ءَ گندگ بیت کہ آ پاکستانی لشکر ءَ کجام کساس ءَ تاوانباری ءِ نیمگ ءَ برگ ءَ انت –

بلوچ یکجھتی کمیٹی ءِ رھشون سید بی بی شریپ ءِ ماں زندان ءَ دومی روچ ءَ شدھرتال برجاہ انت-

اھوالانی رد ءَ مروچی دومی روچ ءَ تربت سنٹر جیل ءَ سید بی بی شریپ ءِ شدھرتال زھرشانی برجاہ انت-

زانگ بہ بیت بلوچ یکجھتی کمیٹی تُربَت ھنکین ءِ نیمگ ءَ یک زھرشانی یے جارے جَتگ اَت ءُ زھرشانی ءِ مول ءُ مراد ماں شال آمیدگس ءِ نیمگ ءَ بلوچ یکجھتی کمیٹی ءِ ناھکیں زھشونانی اُمر کید ءِ سزا داتگ اِت اَنت۔ ھمیشی ءِ بگیری ءَ ماں تُربَت شھید پدا چوک ءَ زھرشانی یے شکل ءَ یک روانکے کشگی بیتگ بلے ھمے روچ ءَ ءُ یکیں دمان ءَ چہ سرکار ءِ نیمگ ءَ ھم یک جارے پرّینگ بوتگ کہ تُربَت ءَ ھچ وڑیں راجی مُچی یے یا کہ زھرشانی ءِ موکل دیگ نہ بیت ءُ ھرکس ءَ کہ سرکار ءِ رھبند پروشت انت گڑا آھانی سر ءَ 144 دفعہ کانون ھرکت ءَ کَیت اِنت بلے باندا بزاں 2 جولائی 2026 اِنت گڑا سرکار وتی جند ءِ رھبندانی پروشگ ءَ سر سر جنت-

اھوالانی رد ءَ 2 جولائی نہ بوتگ کہ ھمے شپ ءَ سی ٹی ڈی ءَ بلوچ یکجھتی کمیٹی ءِ بُنجاھی باسک، سید بی بی شریپ بلوچ ءِ لوگ ءَ دور کتگ ءُ سید بی بی گوں وت برتگ بلے زانگ لوٹ ایت اے ساھت ءَ سید بی بی شریپ پورتھ شیڈول ءَ آئی ءِ نام مان بوتگ ءُ ھمک پیشی ءَ ھم شتگ ءُ اتکگ گڑا سرکار ءَ راہ ءُ رھبند زانتگ انت کہ سید بی بی ناں زھرشانی ءَ روانک گون بوتگ کہ آ دزگیر کنگ بہ بیت ءُ نَیکہ آ ھر ھپتگ پیشی ءَ نہ شُتگ، گڑا سرجمیں شپ ءَ سید بی بی تھانہ ءَ بند کنگ بیت ءُ اِندگی شپ ءَ سید بی بی ءَ یلہ کنگ بیتگ بزاں اے ساھت ءَ زھرشانی ءِ وھد ھلاس بوتگ گڑا یکیں دمان ءَ پد ءَ سی ٹی ڈی سید بی بی ءِ لوگ ءَ دور کتگ آئی ءِ لوگ ءِ دروازگ ءَ پروشتگ انت آ اد ءَ نہ بیت گڑا سھب ءَ سید بی بی شریپ تُربَت پریس کلب ءَ یک پریس کانپرنسے کنت آ جْوانی ءَ واضح کنت ءُ گُش اِیت، گڑا آ سی ٹی ڈی ءِ دپتر ءَ روت ءُ پد ءَ آئی ءِ سر ءَ ناھکیں 3Mpo ءِ تحت ءَ دزگیر کنگ بیت گڑا سید بی بی تُربَت زندان ءَ بند کنگ بیت۔

زی سید بی بی ءَ شدیکیں ھڑتال ماں تُربَت زندان ءَ بندات کُتگ ءُ سید بی بی ءِ لوٹ سے اَنت یکے ڈاکٹر ماھرنگ ءُ سبگت اللہ شاھجی ءِ دروگیں ءُ وتگڑیں بُھتام ھلاس کنگ بہ بنت ءُ دومی در کانودی رِد ءَ منی سر ءَ 3Mpo ءِ جَنگ ءَ ایرجن آں سمی تُربَت پولیس ایس ایس پی زھیب ءَ درکانودی رِد ءَ ڈیسمیس کنگ بہ بیت۔

سلاہ بندیں مردماں چہ درملکی شھریانی واستا سیکورٹی کارندھانی سلاہ، گاڑی ءُ شیخ ءِ زاتی گاڑی دستیگ کتگ انت۔

بلوچستان ءِ دمگ واشک ءَ یک گچینی جاھے ءِ سر ءَ اُرش ءِ ھال انت کہ اود ءَ سرکاری سلاھاں ھوار سلاہ بنداں 11 گاڑی دستیگ کتگ انت۔

اے وئیل ءَ داں انگت ءَ جانی تاوانانی اھوال دیم ءَ نیتکگ انت۔

زانگ بہ بیت چہ عرب ملکاں بازیں شھری ءُ سرکاری کارندہ پہ شکار ءَ بلوچستان ءَ کاینت، اود ءَ آھاں بلوچستان سرکار ءِ نیمگ ءَ ایمنی ءُ دگہ آسراتی دیگ بنت۔

بلوچستان ءِ دمگ ھاران ءِ ھند دالی ءَ ناشناسیں سلاہ بندیں مردماں پاکستانی لشکر ءَ پند ءَ گشتی ٹولی ءِ سر ءَ اُرش کتگ-

بنشون ءِ رد ءَ اے اُرش ءِ آسر ءَ کارندھانی مَرگ ءِ ھال بیتگ بلے اے ھال انگت ءَ سرکاری رنگ ءَ پدر نہ بوتگ اَنت۔

انوگ ءَ تاں چہ واکداراں ھچ وڑیں سرکاری بیان شنگ نہ کتگ کہ چہ واکداراں بیران ءُ ٹپیگ بوتگیں کارندھانی کساس ءُ اُرش ءِ دروشم ءِ بابت ءَ ھچ وڑیں ھال ءُ اھوال شنگ نہ بوتگ۔ کسے ءَ اے اُرش ءِ زمہ واری نہ زرتگ-

پاکستانی پوج ءَ بیڑبرتگ جتاجتائیں ھنداں چہ بازیں مردمے لَٹ ءُ کُٹ ءَ پد وتی ھمراھی ءَ برتگ اَنت گوں-

بلوچستان ءِ دمگ کلات ءِ تھسیل چہ منگچر ءَ ھال اِنت کہ پاکستانی پوج ءَ شھر ءِ جتاجتائیں ھندانی سر ءَ کاروائی کنان ءَ بیڑبرتگ ءُ شھری لَٹ ءُ کُٹانی نشانگ کتگ اَنت-

ھالانی رِد ءَ اے میان ءَ پاکستانی پوج ءَ بیست ءَ چہ گیش شھری آوار جتگ ءُ وتی ھمراھی ءَ ناشناسیں جاھے ءَ برتگ اَنت، چریشی ءَ پد آ دیم ءَ آرگ نہ بیتگ-

زانگ بہ بیت کہ گوستگیں روچ ءَ چہ مستونگ ءَ پاکستانی پوج ءَ زالبول گوں سے چُکاں ھوار پنچ مردم آوار جتگ ءُ بیگواہ کتگ اَنت وھدے کہ مستونگ ءِ دمگ کھڈ کوچہ کرفیو جتگ آپریشن بندات کتگ-

ھمے وڑ مستونگ ءُ کلات ءِ جتاجتائیں دمگاں ھم آپریشن ءِ ھال اِنت وھدے کہ ھُزدار ءَ پاکستانی پوج ءِ نیمگ ءَ چہ آبادی سر ءَ شیلنگ ءِ سوب ءَ شھری بیران بیتگ-