TBP Balochi

پاکستانی پوج ءَ بیڑبرتگ جتاجتائیں ھنداں چہ بازیں مردمے لَٹ ءُ کُٹ ءَ پد وتی ھمراھی ءَ برتگ اَنت گوں-

بلوچستان ءِ دمگ کلات ءِ تھسیل چہ منگچر ءَ ھال اِنت کہ پاکستانی پوج ءَ شھر ءِ جتاجتائیں ھندانی سر ءَ کاروائی کنان ءَ بیڑبرتگ ءُ شھری لَٹ ءُ کُٹانی نشانگ کتگ اَنت-

ھالانی رِد ءَ اے میان ءَ پاکستانی پوج ءَ بیست ءَ چہ گیش شھری آوار جتگ ءُ وتی ھمراھی ءَ ناشناسیں جاھے ءَ برتگ اَنت، چریشی ءَ پد آ دیم ءَ آرگ نہ بیتگ-

زانگ بہ بیت کہ گوستگیں روچ ءَ چہ مستونگ ءَ پاکستانی پوج ءَ زالبول گوں سے چُکاں ھوار پنچ مردم آوار جتگ ءُ بیگواہ کتگ اَنت وھدے کہ مستونگ ءِ دمگ کھڈ کوچہ کرفیو جتگ آپریشن بندات کتگ-

ھمے وڑ مستونگ ءُ کلات ءِ جتاجتائیں دمگاں ھم آپریشن ءِ ھال اِنت وھدے کہ ھُزدار ءَ پاکستانی پوج ءِ نیمگ ءَ چہ آبادی سر ءَ شیلنگ ءِ سوب ءَ شھری بیران بیتگ-

مھروانیں شھید ھوا جان

نبشتہ کار: یسّما بلوچ

دی بلوچستان پوسٹ

مھروان من نہ زان آں پہ تئی نام ءَ چے نبشتہ بہ کن آں ، ءُ کجام لبزاں بہ کما آں گُشئے مروچی من ءَ لبز ءُ گالاں دروہ اتگ، من زاناں ناکہ تئی کرد توسیپ ءِ مُھتاج اِنت ناکہ تئی مھروانی ءِ کسہ کَنگ بیت من ھروچی بگش آں ھرچی نبشتہ بکناں آ تئی کوھیں کردے دیما ھچ نہ انت بس اَمینچو گُشاں تئی داتگیں کربانی ءُ کرد راجدپترے کتابے ھما رُوژنائیں تاک جوڑ بوتگ کہ آئی ءَ جنگ ءَ را یک نوکیں دروشمے بکشات۔ تئی کرد جنگ ءِ تہ ءَ دیمروئی ءِ ھما درپشوکیں چراگ اِنت کہ وتی وڑیں ھزاراں چراگ رُوک کنت۔ تئی گچین کُتگیں راہ ھزاراں جنکانی سروکی ءَ کنت ءُ آیاں چوں یک رھشونے ءَ راہ پیشدار ایت ءُ دیما کار ایت ءُ گیش مھکم بوھگ ءِ سِکین ءَ دانت۔

تو زان ءِ ھما اِنت کہ تو رَپتگے من ھمے جُھد ءَ کَنگ ءَ بوتگ آں پہ تو چیزے نبشتہ بکن آں بلے منی دستاں لرزگ بنا کُتگ پہ اے ھاتر ءَ نہ کہ تو پہ مُدامی رَپتگے بلکیں پہ اے ھاتر ءَ کہ تئی وڑیں مھروانیں سنگتے ءِ جاگہ پہ مُدامی ھالیگ بوت. وَھدیکہ من ترا جیڑاں گُشئے ایوک ءَ ھاموشی دل ءَ چول جنت من وت پد ءَ اَجب ھیران باں کہ اے ھاموشی ءِ زمزیلاں چوں بہ پروش آں۔

من جوان سرپد آں کہ منی اے پُرشتگیں لبز ءُ گال تئی زبیاێیں کرد ءَ ھچ وَڑ ءَ شوکیں ءُ زیبائیں لبزانی تَہ ءَ کمات نَہ کَناں پرچَاکہ تو نُوں یَکّ انچیں کردے ئے واھند جُوڑ بُوتّگ ئے کہ آ بے مٹ ءُ بے درور اِنت ستاہ ءُ توسیپ ءِ مھتاج نہ اِنت ءُ پہ مُدامی اَبدمان اِنت راجدپترے تاکانی تہ ءَ انت.

من وَھدیکہ تئی باروا جیڑاں گُڑا اَجبیں بے چاڑی ءِ منی باتن ءَ جاہ جنت من ءُ تو چوناھا دیم پہ دیم وَ کَدی نہ بوتگیں بلے لھتیں رشتہ ھست کہ آ روھانی گُشگ بنت آ گوں تی اَرواہ ءَ بندوک بنت گُڑا آیانی واست ءَ ھون ءِ رشتہ بوھگ یاکہ دگہ سیاد ءُ وارسی ھچ مانہ نہ دار ایت وَھدیکہ یک مردُمے تئی ھم ھیال بوت آئی سوچ ءُ گپاں گوں تو ڈِکّ وارت بزاں ھما تئی نزیکیں مردُمے ءُ ترا شری ءِ سر ءَ زانت ءُ پھم اِت کنت منی ءُ ھوا جان ءِ رشتہ ھم ھمے ھساب اَت ما مدامی گوں یکے دومی ءَ گپ ءَ اِتیں مزاک ءُ مسکرا کَنگ ءَ اِتیں ءُ یکے دومی ءَ کَلاگ زورگ ءَ اِتیں آ شوکیں دروشم کہ من مُدام کَندگ ءُ مزاک کَنگ ءَ دیستگ اَت مرچی من جیڑگ ءَ آں آئی ءَ وتی باتن ءَ اے گلزمین ءِ سرے چنکاس گم ،چنکاس درد، چنکاس بے وسی ءُ لاچاری مار اِتگ ءَ ءُ ایر بُرتگ اَت بلے اَنگت مھکم اَت چوں بولان ءِ کوھاں چوں زرے چولاں چوں بھارگاہ ءِ رُستگیں گواڑگاں ءُ شال ءِ برپّوشیں چادر ءَ کہ گندگ ءَ سک شوک ءُ ڈلدار اِنت بلے اے ڈلداری ءَ کجام کجام تبد ءُ لِوار ءِ دیمپانی برداشت کُتگ اَت ءُ کَنگی اَت آ اندیم اِتاں۔

دروشم ھما اَجگیں پُل اَت کہ آئی ءَ ایوک ءَ بلگ زانتگ اَت گیمرگ چے چیزے نام اَت آ بے سما اَت پرچاکہ آ مھکم اَت آئی ءَ وتی پیسلہ کُتگ اَت آیا زانتگ اَت کہ منی اے پیسلہ من ءَ کج ءَ بارت ءُ سر کنت چیا کہ آیا ھمے جاگہ ءَ سر بوھگی اَت ءُ آئی ءَ بازیں ودارے ءَ پَد وشیانی اے روچ دیستگ اِتاں ءُ آ باز گل اَت پرچا کہ آئی ءَ زانتگ اَت کہ اے مرگ ءَ کہ من وتی نام ءَ کَنگ ءَ آں اے مرگے نہ انت بلکیں ابدی زندگی انت۔ بگندئے دروشم جان مروچی مئے میان ءَ جسمانی ھوالگ ءَ ھوار نہ اِنت ءُ مارا چہ گستہ بوتگ بلے دروشم وتی ھم ھیالیں سنگتانی سوچ ءُ ھیالانی تہ ءَ زندگ انت ءُ مدام زندگ بیت ءُ یک مھکمیں کارستے ءِ دروشم ءَ یات کَنگ بیت پرچاکہ آئی ءَ وتارا پہ زمین ءُ پہ زمین ءِ مھراں کُربان کُتگ پہ پدمنتگیں راج پہ شھیدانی پاکیں ھون ءُ پہ مکسدِ آجوئی ءَ کربان کتگ ءُ وھدیکہ کسے وتارا پہ اے مکسدے واست ءَ ساڑی ءُ کُربان بکنت آ بے ھیال کَنگ نہ بیت بلکیں آ راجدپتر ءُ وتی نزریاتی سنگتانی دل ءَ مدام زندگ بیت۔

تئی ھونانی ھمُک ترمپ پہ دژمن ءَ کَھرے جوڑ بوت دژمن نی ھیال بکنت کہ آئی ءِ سر گوں بلوچے شیرزالاں کَپتگ کہ وتی ساہ ءُ سراں چہ سرگوستگاں نی مئے شیرزال ھر وڑیں کُربانی ءِ دیگ ءَ ھچ چَک ءُ پَد نہ باں نی اما لاجان ءِ وَڑیں ماس وت وتی زھگاں دست ءَ بڈا جن انت ءُ پہ وشی کربان بوھگ ءَ راہ دے انت۔ نی مئے ماس مئے گھار مئے جنک وتی وش ءُ وشھالیں زند ءُ کلیں آسراتیاں یلہ دات کناں وت ءَ گوں شورھاں تراک دات ھم کناں ءُ دژمن ءِ کیمپانی تہ ءَ ھم شُت کن انت ءُ جنگ ءَ داشت کن انت آ نی جنگ ءِ ھرچ پڑ ءَ وتی براتانی ھم کوپگ اَنت۔

مھروانیں ھوا جان تو چہ مارا جسمانی ھوالگ ءَ وَ گستہ بوت ئے بلے مئے یکے دومی ءِ گون ءَ نزیک بوھگ پہ من زندگی ءِ یک پُرمھریں یاتے جوڑ بوت۔ تو زان ئے مھروانیں مردم شموشگ نہ باں ناکہ بے ھیال کَنگ باں بلے تو زان ئے وھد یاتاں کوھن تَرّینی بلے آئی سوچ ءُ ھیال آئی نزریاتی سنگتانی گون ےَ سپر کَن انت۔ تو ھم پہ من ھمے ھساب ءِ تو منی ھستی ءِ ھما بھرے کہ گوں من شموشگ نہ بئے بلے وھد زالمیں چیزے یاتاں کوھن تَرّینی بلے تئی ھیال گوں من سپر کنگ ءَ آں دانکہ من ھَست آں ءُ زندگ آں تئی ھیال ءُ سوچ ءَ وتی بودناکی ءِ کَچ ءَ زندگ دارگ ءِ جُھد ءَ کن آں۔

ھواریں لاڑُک

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ اسٹوڈنٹس آرگنائزیشن ءِ بنجاھی جارچین ءَ وتی یک بیانے ءِ تہ ءَ گشتگ کہ بنجاھی چیئرمین جیئند بلوچ پاکستانی لشکر ءَ چہ ھدہ ءَ وتی گس ءَ دزگیر کتگ ءُ ناشناسیں جاھے ءَ برتگ۔

بیان ءِ تہ ءَ گوشگ بیتگ کہ جیئند بلوچ یک نودربر سیاسی گلے ءِ رھشون انت، آئی ءَ جمھوری سیاسی امل ءِ سر ءَ باور اِنت۔ جارکش ءِ رد ءَ آ پیسر ءَ ھم دو رند ءَ زورانسری ءَ بیگواہ کنگ بوتگ۔

بی ایس او ءَ لوٹ کتگ کہ جیئند بلوچ زوت دیم ءَ آرگ بہ بیت ءُ بے شرت ءَ یل کنگ بہ بیت۔

جیئند بلوچ ءِ لوگبانک ءِ گْوشگ ءِ رِد ءَ سی ٹی ڈی ءِ کارندہ شپ ءِ یازدہ ءِ نزیک ءَ مئے لوگ ءَ پُتر اِتگ اَنت۔ تپنگ سک داتگ ءُ ما آزار دیگ بیتگ انت، چُک لٹ شاپ کتگ ءُ منی لوگواجہ جیئند بلوچ ءَ گوں وت برتگ۔ چہ ایشی ءَ پد آئی ءِ بابت ءَ ھچ وڑیں گال ءُ اھوال دیگ نہ بیتگ۔

آئی ءَ لوٹ کتگ کہ سیادی داروکیں واکدار اے گپ ءَ دل یکیمی بہ کن اَنت کہ اگاں آئی ءِ مرد ءِ سر ءَ ھرچ وڑیں کانونی الزام ھست گڑا آ کانون ءِ رد ءَ آمید گس ءَ آرگ بہ بیت ءُ اگاں آ سرکار ءِ دست ءَ انے گڑا آئی ءِ لوگ بانک ءَ را زوت آئی ءِ جان سلامتی ءُ جاہ ءُ نشان ءِ بابت ءَ سرپدی دیگ بہ بیت۔

بلوچستان ءِ جتاجتائیں دمگاں پولیس ءِ دو چوکی تراکینگ ءُ پوج ءِ چوکی ءِ سر ءَ اُرش کنگ بیتگ-

گیشیں ھالانی رِد ءَ کیچ ءِ دمگ زامران ءَ عبدوئی ءِ ھند زامری ءَ برجاہ پاکستانی پوج ءِ چوکی ءِ سر ءَ سلاہ بندیں مردماں اُرش کتگ ءُ اُرش ءَ پد پوج ءُ اُرشکارانی میان ءَ تُرندیں تیرگواری کنگ بیتگ-

اِھوالکار ءِ رِد ءَ اُرش ءَ پوج ءَ جانی تاوان چست کنگ کپتگ بلے واکدار نیمگ ءَ ھچ وڑیں درشان نیتکگ-

ھمے وڑ زیارت ءِ تھسیل سنجاوی ءِ دمگ سگرہ ءَ پجّار نہ بوتگیں مردماں پولیس چوکی گوں تراکناکیں شورواں تراکینتگ ءُ تباہ کتگ-

بلے اے وئیل ءَ ھچ وڑیں جانی تاوان نہ بوتگ-

اِھوالکار ءِ رِد ءَ اُرش ءِ وھد ءَ پولیس چوکی ءَ ھچ کارندہ ساڑی نہ بوتگ چریشی ءِ سوب ءَ پولیس کارندھانی ٹپی ءُ بیرانی ءِ ھال دیم ءَ نیتکگ-

دومی نیمگ ءَ کوھلو ءِ دمگ ھوسٹری ءَ سلاہ بندیں مردماں لیویز پوسٹ دستیگ کنگ ءَ پد تراکناکیں شورواں چہ تباہ کتگ اَنت-

تنی سئیں وھدے وئیلانی زمہ واری زمہ واری ھچ گل ءَ نہ زرتگ اَنت-

چہ سینٹرل جیل تربت ءَ سربوتگیں ھالانی رد ءَ بلوچ یکجھتی کمیٹی ءِ بندیگیں رھشون سید بی بی بلوچ ءَ گوستگیں دو روچ ایں کہ کانودی ھک ءُ زیادتیانی بگیری ءَ شد کش زھرشانی نشتگ ۔

کھول ءِ رد ءَ سید بی بی بلوچ پیسرا چہ ناجوڈ بوتگ ھنو شدکشیں زھرشانی ءَ آئی ءِ جاور گیشتر نگیگ انت ۔

کھول ءَ چہ واکداراں لوٹ کتگ کہ آ زوت ءَ زوت گامگیج بہ زور انت ءُ آئی ءِ جیڑھانی گیشوار ءُ آئی ءَ درمان دیگ بہ بیت ۔

زانگ بہ بیت کہ سید بی بی بلوچ ھمے ماہ ءَ سے جولائی ءَچہ تھری ایم پی او رد ءَ سینٹرل جیل تربت ءَ بندیگ انت ۔

شھید لیاکت پنام ءِ نود ءِ نام ءَ

نبشتہ کار: شاھاپ بلوچ

دی بلوچستان پوسٹ

اے اَدارکی دنیا پہ کس ءَ مھتل نہ اِنت مرچی تَو ئے باندا مناں امروز کلاک ءُ گوں ساھتَاں گام جَنان اِنت وھد نہ اوشت اِیت انسان ھم پش نہ کپ اِیت یک روچے ھرکس اے کُوڈھیں دنیا ءَ سپر کنت ءُ روت بِلّے پش کَپتگیں چیز انسان ءِ مُجتی ئیں کرد اِنت دو سد سال بہ گْوز اِیت کِردار پَشت کَپ اَنت کردار ھما وڑ ءَ بیت کردار ترا نامدار کنت انچوش کہ بلوچانی کوھنیں داستانی رنگ دپتراں مان اَنت کہ بلوچ ھزارانی سال ءَ گوں کبزہ گیراں جنگ کنان ءُ پیداک اَنت۔ ترک لشکر بیت،، برٹش بیت یا پاکستان بلوچ وتی زمین ءِ رکینگ ءَ چہ ڈنی ریاستاں گوں جنگ کنان اِنت سراں دیان اِنت ھچ وڑیں کربانی ءَ چک ءُ پد نہ اِنت بلے ڈنی کبزہ گیرانی کبزہ نہ منّ اِتگ۔ بلوچ ءِ ھمے پلسپہ ھمے یکین اِنت سر روت بلے زمین مَہ روت ، ھمے رنگ ءَ بلوچ ءِ ھما کردار کہ ساڑایگ بوتگ اَنت مرچی ھم بلوچ پاکستان ءِ ھلاپ ءَ در کپتگ وتی راجی پجار ءَ وتی مال ءُ مڈیانی ھاتر ءَ مرچی ھم بلوچ ءِ واھشت ھمیش اِنت کہ منی سر کربان بیت بلے زمین ءِ سودائی ءَ گوں سوداگراں نہ کناں، نہ ننداں زمین ءِ سودائی ءَ تیار نہ باں مرچی بلوچ دپتراں نوکیں کردار دیم ءَ آؤرتگ ءُ آ وَ پیداک اَنت مرچی بلوچ ءِ بچ ءُ جَنک دوئیں درکپتگ اَنت دژمن ءِ ھلاپ ءَ شھید شاری ءِ کردار بیت شر، یا شھید ریھان جان ءِ بیت، یا میدان ءِ جنگ ءَ شھید بوتگیں سر بنت، یا کہ شھید مسلم بیت، یا امیر جان ءُ دلجان بنت چہ ھمے کردارانی تہ ءَ چہ یک کردارے شھید نود اِنت راجی بامردانی دپتراں نمیران اِنت شھید نود ءِ کردار راجی شھیداں چہ یکے آئی ءَ چہ ھر دور ءَ دیمپانیں شرتگ ءُ ھیروپانی باریگ ءَ وت ءَ پیسر ءَ تیار ءُ جاڑیگ کُتگ آ ئی ءَ زانتگ من اے راہ ءِ مساپراں من ءَ چینکس تکلیپ مُشکَل جنجالاں دیمونی کیت چو کاروان ءِ داب ءَ من ءَ راھی بوگی اِنت۔ دیم ءَ جُنزان باں، آ ھچ اے ھیال ءَ ھَم نہ بیتگ من ءَ چہ پد منی لوگ چون بیت برات کسان اَنت گونڈوکیں گھار ءُ مات ءِ ھال چے بیت پت ءَ دیر اِنت داھمی ئیں دنیا ءَ سپر کُتگ، اے بارو ءَ ھچ چَک ءُ پد نہ بیتگ راجی پگر ءِ دیم ءَ برگ ءِ واستا ھرچ پیمیں کُربانی ءَ تیار بیتگ ، چُشیں ھزار سر روت مئے مول ءِ دیم ءَ مَا ھچ چَک ءُ پد نبیں، دژمن ءِ نیست ءُ نابود کنگ ءِ ھاتر ءَ مارا اے پند بُرگی اِنت، بلوچ آجوئی ءِ ھاتر ءَ تُن ءُ گژن ھید ءُ ھون ءَ ھچ مانا نہ دار ایں ھما چیز کہ مانا دار اِیت مئے راجی بیرک اِنت مئے وتواجھی اِنت راجی پجار اِنت نود ھمے پگر ءِ منُّوک بیتگ مرگ ءُ زندگ داھمی مئے ھمراہ اَنت مارا یک منزلے ءَ روَگی اِنت، ھیروپ ءِ دوم ءَ پھل آباد ءِ سینگ ءَ گوں دیم پہ دیمی جنگ ءَ نمیران بیت یک کردارے جوڑ بیت مارا وتی کردانی سر ءَ پھر اِنت کہ بلوچ ءِ جنگ ءِ تہ ءَ انچیں بامرد ودی بیت آ بلوچ ءِ وتواجھی ءِ جنگ ءَ آیانی کُربانی نوکیں چھر ءِ داب بکشا اِیت انچوش شھید نود ءِ شھادت پہ سنگتاں ڈڈی یے اَت لس مھلوک ءَ جاری اَت، پرچا کہ شھید نود انچیں چھرھے اَت شھید ءِ وتی مزاجے اَت کہ ھر کس ءَ سان کنان اَت سرمچارے اَت انچیں بازیں سنگت ءُ دوست سک گمیگ اَنت شھید ءِ روگ ءَ باز تورینتگ اَنت دردیگ کتگ اَنت گُش ئے بچکندگ ءَ اَنت ھما اَنت مئے دیم ءَ اَنت، اے ھبر ھچ باور نہ بنت ما کجا رویں تو گون نہ ئے۔ تو مئے ھیالانی ھمراہ ئے مدام کسھانی تہ ءَ مُجتی گون ئے من کجام وھد ءُ پاس ءَ تئی ھمراہ آں ھر کجا بہ باں من ءَ نودو تئی دروشم منی چمانی تہ ءَ کید اِنت من ھچ بر شموشکار نہ باں تا ابد ،کوہ کوھسار شھید نود ءَ پجاہ کار اَنت شھید مَزنیں وھدے ءَ بیت اے کوھانی ھمبل بیتگ یاگی اَت چہ وتی لوگ ءَ زامران ءِ پراہ ءُ شاھگانیں مات بند بیت یا کُلبر ءِ تَل بنت اے درست گول اِتگ اَنت راہ ءُ کِشک ھر وھد تئی تَرانگاں کَپ اَنت کجام جاہ ءَ گْوزَان باں تئی نشان راہ ءِ سر ءَ ایر اَنت سپر مساپر ءَ ترانگے گیج اِیت اے شھیدانی ترانگ بامردانی کسہ اَنت کہ مارا ھر دمان ءَ یات بنت موسم ءُ ھورانی گورتگیں شنز ءُ ترونگل بنت، یا انجیرے ءِ امب ءِ ساھگ، یا جنگانی وھد سنگر ءِ تہ ءَ، یا کُٹوری ءِ بُرزیں ٹل ءِ سَر بامردانی کسہ ھر کجا درشان بنت۔ من ءَ یات اِنت ھما جنگجاہ ازگندے ءِ چوکی ءَ تو چونیں جنگ کرداری جنگ دات منی یاتانی کوار ءِ ھمراہ اَنت تئی بامردی کسہ زامران ءَ سادیم ءِ نیمگ ءَ کونڈ موش پرمائینتگ دژمن ءَ پہ ایمنی نشتگ کہ ھالو ھالو بہ نند اِیت ترا چہ پد تئی دراتکگیں سَنگت تئی نشان ءَ گران اَنت روان اَنت دژمن ھم شری ءَ بزانت سرپد بہ بیت کہ چَینچو کِرد ماتاں پیداک کُتگ پہ زمین ءِ شیدائی ءِ ھزاراں سَر پہ جھد ءَ ندر بنت بِلّے اے زمین ءِ یک انچیں تو بُرت نہ کَن ئے پرچا کرداں اد ءَ کردار پیداک کتگ زمین ھمینچو ھونین بُوان اِنت پدریچ گیش جاہ جَنَان اَنت سما کپَان اِنت اِھساس بُوان اِنت شَئور رُدان اَنت میدان ءِ جنگ ءَ باج بُرتگ تو دژمن انچیں تاوانے داتگ آ دنیگا ھما تاوانیں سر ءَ اوشتاتگ بِلّے اِے دَمَگ ءَ ھرکس نود بوگ لوٹ اِیت پرچا کہ نود کردارے بَلاھیں بیتگ تئی رتکگیں ھوناں رنگین پیداک کُتگ تئی میتگ ءَ تئی پگر ءَ مردمانیبھیال مٹینتگ اَنت زمین ءِ بچ آشوبی اَنت جاور مروچاں بدل بیتگ اَنت دژمن ھم وتی گڈی زور ءِ سر ءَ اِنت ھمت اِنت مردمانی مُز رُدان اَنت جنگ ءَ نوکیں داب دیان اَنت ھما لوٹ کہ تئی بیتگ اَنت واھگ تئی بیتگ تو مدام ھمے گپ جتگ جنگ ءَ نوکیں دروشمے بکشایگی اِنت جنگ مرچی دور ءِ سر ءَ اِنت زیک بازیں جاگھے یل بوتگ مرچی ھما جاگہ ءَ سنگت سر ءَ اَنت کار ھم بوگءَ اَنت دیمروی ھم بیتگ بس ابیتکیں بیگاہ ءِ ترانگ لھم لھم ءَ کشان بنت زیمریں شپ مولمے پتایان اَنت زھیر واراناں دل سھب کُدین اَنت زیمیگ اَنت روچ دراھیں جتائی ءِ درد اَنت کہ مارا سُوچن جنان اَنت پد ءَ جیڑاں دوبر ترا یات کناں جنگ ھمیش اِنت کہ دوستی ءِ ھمرایاں پُل اِیت بھر بھر کنت یک یک کنت روان کنت اے کندیل ءِ واھگاں کُشان کنت بلے باندات ءِ امیتاں مانا یے دنت راج ءِ دپتراں نوک کنت راج ءَ آبسرے ءَ سر کنت ایش تئی واھگ ءَ نودو جنگ ءِ دوران ءَ شھادت ھم تئی واھگ اَت پُوراہ بوت اَنت تئی واھگ، جان داتگ زمین نہ داتگ تئی پَند نودو توسیپ ءِ مھتاج نہ اَنت من گوں گوھریں گالاں تئی کردار ءِ سر ءَ انساپ کُت نہ کناں تو انچیں کردے ءِ واھند اَت ئے نودو۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

مستونگ ءُ گوادر ءَ زالبول، سے چکاں ھوار ھپت مردم آوار جتگ ءُ بیگواہ کتگ اَنت-

گیشیں ھالانی رِد ءَ مستونگ ءِ دمگ چہ کونگڑھ ءَ بیست ءُ یک جولائی 2026 ءِ بیگاہ کساس 6:30 ءَ یک زالبولے، آئی ءِ سے کسانیں سالی ئیں چُک ءُ دگہ کھول ءَ ھوار درستی پنچ مردم پاکستانی پوج ءَ ایف سی کارندھاں آئی ءِ لوگ ءَ چہ زورانسری بیگواہ کتگ-

کھول ءِ رِد ءَ زورانسری آوار جنگ بیتگیں بی بی رافیعہ مرھوم امام بخش (اُمر 33 سال) آئی ءِ سے چُک کہ آیانی تہ ءَ سے ماہ، چار سال ءُ شش سال اِنت، آئی ءِ برات محمد عارف ءُ گھارزتک بی بی ندا مرھوم سراج احمد (اُمر 18 سال) ھوار اِنت

کھول ءِ گوشگ اِنت کہ وئیل ءَ پد سرجمیں مردمانی درگت ءَ ھچ وڑیں ھال نیست، وھدے کھول سک زھنی آزار ءُ تُرس آماچ اِنت-

کھول ءَ ھمگرنچیں واکدار ءَ چہ لوٹ کتگ سرجمیں زورانسری بیگواھیں مردماں زوت پہ سلامتی یل بہ کن اِت ءُ کھول ءِ دست ءَ بد اِت-

ھمے وڑ گوادر ءِ دمگ چہ جیونی ءَ ھند لبادی ءَ بیست ءُ سے جولائی 2026 ءَ شپ ءَ معظم ے عبدالمجید پاکستانی پوج ءَ آوار جنگ ءَ پد زورانسری بیگواہ کتگ-

وھدے کہ چہ پیشکان ءَ ھم گوستگیں شپ ءَ عدنان ء رضائی پاکستانی پوج ءِ ادارہ ءِ کارندھاں آوار جنگ ءَ پد بیگواہ کتگ-

اِھوالکار ءِ رِد ءَ عدنان ء رضائی ھم 2012 ءَ پاکستانی پوج ءَ زورانسری بیگواہ کتگ کہ آئی ءِ لاش پد ءَ دور دیگ بیتگ-

شال تپتان شاھدگ ءِ سر ءَ سلاہ بندیں مردمانی کنٹرول برجاہ انت، دگہ یک گاڑی یے تباہ بوتگ۔

چاگی ءِ دمگ پدگ چارسر ءَ گوستگیں روچ ءَ شال ءُ تپتان ءِ ھاسیں واپاری راہ ءِ سر ءَ سلاہ بندیں مردماں سلاہ بندیں اُرش ءِ تہ ءَ دگہ گاڑی یے نشانگ جوڑ کتگ۔

کاروان ءِ تہ ءَ ھواریں گاڑی یے سلاہ بندیں مردماں دستیگ کتگ ءُ پد ءَ مانداشتگ-

زانگ بہ بیت کہ بلوچ لبریشن آرمی ءَ ھاسیں واپاری راہ ءِ سر ءَ ’زرکاری بندش‘ ءِ جار جتگ ءُ ایشی ءَ پد آئی ءَ مزنیں شاھدگانی سر ءَ کنٹرول برجاہ کتگ ءُ تاں انوگ ءَ نزیک ءَ دو درزن ءَ گیش گاڑی ماندارگ بوتگ انت۔

ھب ءُ گوادر ءَ ھشت ءُ چار سالی ئیں کماشے ءَ ھوار چار مردم آوار جنگ ءُ بیگواہ کنگ بیتگ اَنت-

گیشیں ھالانی رِد ءَ بلوچستان ءِ گوادر ءِ ھند چہ پانوان جیونی ءَ یک ھشت ءُ چار سالی ئیں کماشے ءِ زورانسری آوار جنی ءِ کیس دیم ءَ اَتکگ-

گیشیں ھالانی رِد ءَ مھمد بلوچ ء حبش جھمنند پانوان جیونی، گوادر کہ یک دھکانکارے یازدہ جولائی 2026 ءِ بیگاہ چار ءَ آئی ءِ لوگ ءَ چہ پاکستانی پوج ءِ کارندھاں وتی ھمراھی ءَ برتگ، چریشی ءَ پد آ بیگواہ اِنت-

زانگ بہ بیت کہ ھمے سال یازدہ جولائی ءَ چہ پانوان ءَ دو درزن ءَ گیش شھری زورانسری آوار جنی ءِ نشانگ کنگ بیتگ اَنت-

ھمے وڑ چاردہ جولائی 2026 شپ ءِ دہ ءَ ھب چوکی ءِ ھند زھری گوٹھ دارو ھوٹل ءَ ایم آئی ءِ کارندھاں پانزدہ سالی ئیں مُعیز جان ء سبزل جھمنند آواران آوار جتگ ءُ بیگواہ کتگ-

دومی نیمگ ءَ بلوچستان ءِ بُنجاھی شھر شال ءِ ھند چہ کمبرانی دگ ءَ چاردہ جولائی 2026 ءَ قاھم شاہ بلوچ ء مروان شاہ ءُ اویس شاہ بلوچ ءُ قاھم شاہ جھمنند روبدار کلات آوار جتگ ءُ بیگواہ کتگ اَنت-

ھمے گوشگ بوگ ءَ اِنت کہ قاھم شاہ یک پرائیوٹ سیکیورٹی گارڈے ءُ اویس یک نودربرے-

چریشی ءَ پد آیانی درگت ءَ ھچ وڑیں ھال نیست-

پاکستانی پوج آئی ایس پی آر ءَ وتی شنگ کرتگیں درشان ءِ تہ ءَ ٹاہ داتگ کہ پوج ءَ بلوچستان ءِ دمگ سوراب ءُ مستونگ ءَ 10 سلاہ بند جتگ ۔

آئی ایس پی آر ءِ ٹاہ ءِ رد ءَ چل ءُ ھشت ادارانی میان ءَ سوراب ءُ مستونگ ءَ انٹلی جنس بیسڈ آپریشن ءَ 10 سلاہ بند جنگ بوتگ انت ۔

آئی ایس پی آر ءِ رد ءَ پوج ءَ سلاہ بندانی اوتاکانی سرا ارش کتگ کہ سوراب ءَ ھپت ءُ مستونگ ءَ سے مردم جنگ بوتگ انت ءُ دو زالبولیں وتکش کنوکاں ھوار یک کمک کار ءِ ھم دزگیر کتگ.

آئی ءِ رد ءَ اے اوتاکاں گولہ ءُ سلاہ ھم دست کپتگ وھدیکہ کلئرینس آپریشن ھنگت برجاہ انت ۔

زانگ بہ بیت آئی ایس پی آر ءِ نیمگ ءَاے دابیں ٹاہ پیسرا ھم جنگ بوتگ کہ پوج ءَ پیسری زورانسری آوار جتگیں مردم کشتگ ءُ پدا آیانی سرا سلاہ بندیں گلانی گوم ءَ سیادی ءِ بھتام جتگ وھدیکہ زورانسری آوار جنگ بوتگیں زالبول وتکش تراک کنوک گوشتگ انت ءُ دزگیری ءِ بٹاک جتگ ۔

ھمے سال ءَ بازیں زورانسری آوار جنگ بوتگیں بلوچ زالبولانی سرا ھم ھمے بھتام جتگ ءُ میڈیا ءِ دیم ءَ آورتگ انت ۔ بلے پدا ھم آ زالبول چہ آمیدگس ءَ یل کنگ بوتگ انت.

پاکستانی پوج ءِ نیمگ ءَ اے نوکتریں درشان ءِ تہ ءَ کہ آئی ءَ سلاہ بندیں گلانی باسکانی جنگ ءِ ٹاہ داتگ اشی ءِ درگت ءَ تنی وھدی ھچ بلوچ آجوئی لوٹوکیں گلانی نیمگ ءَ اے وڈیں ھال یا درشان شنگ کنگ نہ بوتگ کہ اے راست انت یا دروگ.