بندآری ءِ انگیریں بلوچستان، تاکت ءِ پالیسی
ٹی بی پی شونگال
بلوچستان ءِ دمگ مستونگ، نامانتریں ھند کھڈ کوچہ، گوستگیں یک ھپتگے ءَ ناگیگیں جاورانی دیمپانی ءَ کنگ ءَ انت- دمگ ءَ ترندیں رنگے ءَ پوجی آپریشن برجاہ انت- ھمے وڑ کھڈ کوچہ ءَ نہ کٹوکیں وھدے ءَ بند آری کنگ بیتگ- ھمے وھد ءَ زالبول، زھگ ءُ ورنایانی بازیں کچے ءَ بیگواھی ءِ اھوال دیم ءَ اتکگ انت- چریشی ءِ سبب ءَ دمگ ءَ ترس ءُ بیم ءِ جاور انت-
شانزدہ جولائی ءَ بلوچ لبریشن آرمی ( بی ایل اے) ءَ کھڈ کوچہ ءِ ھند ءَ یک مزنین پوجی کاروانے نشانگ کتگ ات- گل ءِ نیمگ ءَ شنگ کنگ بیتگیں درشان ءِ رد ءَ اے کاروان چہ شال ءَ دیم پہ پنجگور ءِ نیمگ ءَ روگ ءَ بیتگ ءُ اُرش ءَ کم چہ کم 62 کارندہ مرتگ انت- دومی نیمگ ءَ سرکاری واکداراں اے وئیل ءِ راستی یا ردی ءِ درگت ءَ ھچ درشان شنگ نہ کتگ- اُرش ءَ زوت پد واکداراں دمگ ءَ یک ٹوھین لشکر کشی ءِ بندات کتگ- ھمے وھد ءَ لس آبادی، جھمنندی جاہ، مسیت ءُ مدرسہ ءَ ھم کاروائیانی دیمپانی کنگ کپتگ، ھمے وڑ کھڈ کوچہ ءَ سرجمی ءَ کرفیو جنگ بیتگ ءُ مھلوک لوگانی تہ ءَ بند کتگ انت- کرفیو ءِ سبب ءَ زندگی ءِ ھمک روچی پھنات سرجم ءَ ناگیگی ءِ دیمپان بیتگ انت- اے جاورھالانی سر ءَ بلوچستان ءِ سیاسی ءُ چاگردی مھلوک ءَ زھر ءِ درشان پدر کتگ انت- گوستگیں سروزیر بلوچستان نواب اسلم رئیسانی ءَ ھوار بازیں سیاسی رھشوناں کرفیو ایر جتگ ءُ چہ سرکار ءَ لوٹ کتگ کپ زوت کرفیو ھلاس کنگ بہ بیت شھری ھمک روچی رنگ ءَ تر ءُ گرد ءَ اجازت دیگ بہ بنت لس آبادی ءَ مچانکی سزا دیگ ءَ ابید سیاسی رنگ ءُ ڈولاں واک دارگ بہ بیت-
اے اولی وئیل نہ انت ایشی ءَ پیش بلوچستان ءِ جتا جتائیں جاھاں اے دابیں گامگیج گندگ بیتگ انت- گوستگیں سال ءُ ماھانی وھد ءَ ھزدار ءِ دمگ زھری، نوشکی تیابدپی شھر جیونی ءَ ھوار بازیں دمگ دراجکشیں کرفیو ءِ زیردستی ءَ بیتگ انت، اود ءَ مھلوک ھمک روچی زندگی، واپاری، وانگ ءُ جانسلامتی ءِ وڑیں بنیاتی آسراتیاں زبھر بیگی بیتگ – اے وئیلاں بلوچستان ءِ مھلوک ءِ سما گیش مھکم کتگ کہ ریاست ءِ نیمگ ءَ واک کتگیں ترندیں پالیساں لس شھریانی مشکلاں گیش کنگ ءَ انت – مھلوک ءُ سیاسی پھناتاں سان گیش جھلانک بیگ ءَ انت کہ تاکت ءَ بندوکیں پالیسی ءُ یکشلیں پوجی کاروائیاں ریاست ءُ مھلوک ءِ میان ءَ ستک گیشتر نابود بیان انت- وھدیکہ کجام ھم دمگ ءَ کرفیو، ناکہ بندی ءُ ترندیں پوجی کاروائیانی درچ ءَ بند کنگ بیت انت گڑا ایشی ءَ چاگردی، زرکاری ءُ نپسیاتی سان گیش ءَ سما کنگ بیت انت-
دومی نیمگ ءَ ریاستی لیکہ ایش انت کہ بلوچستان ءَ سلاہ بندیں گھگیری کنوکانی کساس کم ءُ لھتے سداں ھوار انت- اگاں واکی جاورھال اے وڑ ءَ انت گڑا اے دابیں ھترناکیں پوجی آپریشن، دراج کشیں کرفیو، سر ءُ پرانی سر ءَ ترندی ءُ بازیں کچے ءَ پوج ءِ دارگ اے ٹاھانی ھواری ءَ یک تچکیں اڑانکے ودی کنت – اے جست وتی جاگہ ءَ انت اگاں گھگیری نابودی گڑا سرجمیں دمگاں مچانکی درشم ءَ پابندیانی دیمپانی کنگ بیت انت؟
بلوچستان ءِ جیڑہ ایوک ءَ یک سیکیورٹی یا لشکری جیڑہ نہ انت بلکیں یک سیاسی، گوستانکی ءُ راجی جیڑھے – ایشی ءِ جَڑ راجی ھک، سیاسی نمائندگی ءُ شناسی ءَ گوں بندوک انت- دانکہ اے بنکی جیڑہ گیشینگ ءَ سرجمیں امل بندات کنگ نہ بیت انت، اے وھد ءَ داں بلوچستان ءِ جاورھال ھمے داب ءَ بنت انت، تاکت ءِ کارمرد کنگ ءَ ھچ وڑیں گیش ءُ گیواری ءِ آسری بیگ مشکل انت- بلوچستان ءَ اگاں سیاسی امل دیم ءَ آرگ نہ بیت گڑا ھستیں جاورھال گیش سنگینیں رنگے ءَ شت کن انت- کرفیو،پوجی آپریشن، زورانسری بیگواھی ءُ ترندیں سیکیورٹی گامگیج بنیادی جیڑہ ھلاس نہ بنت – بلوچستان ءِ راستیں سیاسی، چاگردی ءُ راجی جیڑہ منگ ءُ دراھیں تَک ءُ پھناتانی امل بندات بہ کن گڑا ھمے راہ دمگ ءِ واستا پائدگ ءُ امن ءُ بنھشتے جوڑ بیت کنت- اگاں ناں گڑا بلوچستان ءِ جاورھال نا ایوک ءَ اے داب ءَ بنت بلکیں گیش ناگیگ بنت –