TBP Balochi

دلجان بلوچ ءِ کھول ءُ مھلوک ءَ زھرشانی کنان ءَ کراچی ءُ آواران ءِ شھدگ بند کتگ ۔

بیگواھیں دلجان بلوچ ءِ کھول ءُ مھلوک آواران ءِ ڈپٹی کمشنر (ڈی سی) ءِ کارگس ءِ دیم ءَ زھرشانی کنگ ءَ اَنت-

زھرشانی کنوکیں مردمانی گْوشگ اِنت کہ آ سکیں سردی ءَ ابید پچیں آزمان ءِ چیر ءَ زھرشانی کنگ ءَ اَنت پرچا کہ ریاست ءِ نیمگ ءَ بیھار دیگ ءَ تمبوانی واھنداں تمبو دیگ ءِ انکاری کتگ-

زھرشانی کنوکیں مردمانی گْوشگ اِنت کہ پہ زھرشانی ءِ ھلاس کنگ ءَ پاکستانی لشکر ءُ پولیس مُدام تنگ کنگ ءَ اَنت بلے داں دلجان بلوچ یل نہ بیت آ زھرشانی ءَ برجاہ دار اَنت۔

یات بہ بیت کہ دلجان بلوچ 12 جون 2024 ءَ پاکستانی لشکر ءَ چہ آواران ءَ دزگیر کتگ ءُ بیگواہ بوھگ ءَ پد آئی ءِ کھول ءَ 3اکتوبر 2024 ءَ ڈی سی آفس آواران ءِ دیم ءَ چار روچی دھرنا داتگ بیتگ۔

کھول ءِ گْوشگ اِنت کہ آ وھد ءَ ڈی سی آواران ءُ دگہ ضلعی واکداراں اے گپ ءِ سر ءَ تپاک کتگ اَت کہ دہ روچ ءِ تہ ءَ دلجان بلوچ ءِ یل کنگ بیت بلے تاں روچ ء مرچی ھچ وڑیں دیمروئی نہ بیتگ۔ لوگ ءِ مردمانی گْوشگ اِنت کہ دروگیں زبام ءُ کلاہ بندی ءِ سوب ءَ ما پد ءَ زھرشانی کنگ ءَ لاچار بوتگ انت۔

ھمے تک ءِ سر ءَ زھرشانی کنوکاں گوں ٹرانسپورٹ ءِ واھند ءُ لس مھلوک ءَ دزبندی کتگ کہ آ زھرشانی ءَ ھوار بہ بنت ءُ زلم ءُ زوراکی ءِ ھلاپ ءَ یکوئی ءِ درشان ءَ بہ کن اَنت ایشی ءِ زمہ واری دمگی انتزامیہ ءُ ھستیں سرکار ءِ سر ءَ کپ ایت۔

دلجان بلوچ ءِ کھول ءَ گیش گْوشتگ کہ پیسر ءَ پہ زھرشانی ءِ ھلاس کنگ ءَ دروگیں دلجمی دیگ بیتگ اَنت بلے نوں بے ھچ دلجمی ءَ زھرشانی ھلاس نہ بیت اِنت-

آ گْوشتگ کہ دلجان بلوچ ءِ یل کنگ ایشانی مستریں لوٹ اِنت ءُ آ ھر وڑ ءَ چہ ایشی ءَ پُشت ءَ نہ کنز اَنت۔

کوھلو ءِ دمگ کشک ءَ سلاہ بندیں مردماں یوفون موباھل ٹاور نشانگ کتگ-

ھالانی رِد ءَ اُرشکاراں تیرگواری کتگ ٹاور مشینری تاوان داتگ اَنت اُرش آسر ءَ ٹاور ءِ آسراتی سک تاوان داتگ اَنت، بلے ھچ وڑیں جانی تاوان ھال دز نہ کپتگ-

زانگ بہ بیت کہ بلوچستان ءَ ھال اھوالی شرکتانی ٹاورانی سر ءَ اُرش یک نوکیں گپے نہ اِنت- اشی ءَ ساری ھم جتاجتائیں یوپون ءُ دگہ نیٹ ورکس ٹاور نشانگ کتگ اَنت-

آجوئی لوٹوکیں گلانی رِد ءَ ھال اھوالی ٹاور چاریگری ءِ ھاتر ءَ کارمرز کنگ بنت، ھمے سبب ءَ اے گل اشاں نشانگ کن اَنت-

کوھلو لیویز واکدار رِد ءَ وئیل رپورٹ نکش کتگ ءُ گیشیں پٹ پول کنگ ءَ اِنت-

بلوچ فدائی رفیق بزنجو ءِ پت ءُ سے سیاد پاکستانی پوج ءُ چیریں ادارھانی کارمنداں زورانسری بیگواہ کتگ-

ٹی بی پی ءَ دست کپتگیں ھالانی رِد ءَ شال ءَ ، فدائی اُرش ءَ پاکستانی پوج ءِ کارمندانی نشانگ کنوکیں محمد رفیق بزنجو بلوچ پنّام ءِ وشین ءِ پت مراد علی، سے سیاد اسماعیل ء غلام قادر، طارق ء غلام قادر ءُ گل حسن پاکستانی پوج کارمنداں زورانسری بیگواہ کتگ اَنت-

وسیلگ رِد ءَ ٹی بی پی ءَ گوشتگ کہ اے مردم نُھ نومبر ءَ میر مولا بخش گوٹھ، چہ دارو ھوٹل ھب ءَ پاکستانی پوج ءُ چیریں ادارھانی کارمنداں آوار جتگ ءُ بیگواہ کتگ اَنت-

اے مردمانی درگت ءَ تنی وھدے ھچ وڑیں ھال دز نہ کپتگ-

آزمانک: گچین

نبشتہ کار: شاھد اھمد

دی بلوچستان پوسٹ

ماھکانیں شپے اَت، گلامیں چاگردے ءَ جتائیں مردم گوں جتائیں دروشُمے ءَ یکشل ءَ زندگی کنگ ءَ اِت اَنت۔ من چہ ھمے چاگرد ءَ رُدوم زُرتگیں آسرے ءَ زندگی کنگ ءَ اِت آں۔ ھرچی کہ من دیستگ ءُ ھرچی کہ من دربُرتگ، دُرست منی زند ءِ بَھر اِت اَنت، بوت کنت من اوں نہ لوٹ اِتگ بلے درست مَنّ اِتگ اِت اَنت۔ دوستی ءُ نادوستی، مِھر ءُ کینگ، اُمیتی ءُ نااُمیتی، زندگی ءُ گلامی یکشل ءَ مَنّ اِتگیں گِچین اِت اَنت۔

گچین منی زند ءِ بَھرے بوتگ بِلّے کہ من وت نہ درچِتگ اَنت بلے درچِتگ اَنت، چے راست ءُ دروگ، گواچن اِیش اِنت کہ من ھمے چاگرد ءَ رُدوم زُرتگ اَت، بِلّے پَمن گچین ھزاب اَت یا آسودگ اَت۔ گچین زندگی ءِ بَھرے بلے بے راہ ءُ رھبندے ءَ انسان کجام اوں وھد ءَ رَدیں راھے ءَ شیوار بیت، بِلّے اے راہ رَد اِنت بلے راستی ءَ دروگے اَت۔
مجبوری گچین کنت، رَد پَھمی گچین کنت، کجام ھم جیڑھے ءَ دلگوش بہ بَہ ئے ءُ گند ئے ءُ یا دگہ راہ اوں مہ بیت، نااُمیتی ءِ وھد ءَ چے جیڑ ئے؟ جاوراں چے پَیم ءَ تئی زندگی مانپوشتگ، آ کُجام ساھت اَت۔
گچین کُتگ چہ وتی زند ءَ پہ منی ھیال ءَ راست اِت اَنت، درست منی سر ءَ زِد ءُ کینگ ءَ پُر اِت اَنت، کدی کدی من جیڑ اِت کہ من رَدیں گچین کُتگ ءُ پہ منی واست ءَ اے سوڑگ گران ءَ کپ اِیت، بلے من راست اِت آں، درست من ءَ روک روک ءَ گوں زِد ءُ کستاں چارگ ءَ اِت اَنت، منی گچین پہ من دژمنے اَت، من پد ءَ جیڑ اِت، من رَد آں۔ چے راست ءُ دروگ پہ منی نِز ءَ درست راست اِت اَنت چمیشکا ھمے سوڑگ کُت۔

مَدان مَدان ءَ مردم چہ من گستا بوت اَنت، گُش ئے زندگی ءِ بار تَھنا من ءَ گون اَت من ءَ گُمان بوت، پگر ءُ سَسّا ءَ منی جان ءِ ھون ءُ گوشت ءَ ورگ ءَ اَت، من جیڑ اِت، جیڑگ منی زند ءِ مستریں واھُند بوتگ اَت، تَھنائی ءَ منی سسا کِشار کنگ ءَ اَت، من سرپد اِت آں، گچین منی زند ءِ مستریں رُدوم اِنت۔

یک روچے واھگانی بازار سک گرم اَت، ھمے واھگ بازیں گچینانی تہ ھوار اَت، کسے کَیت وتی دل ءِ تَب ءَ وتی واھگاں گرم دیگ ءُ پُست ءَ مان بدے ءُ بُرو، منی جیڑگاں سما گور اَت کہ اگاں من چداں وتی پگر ءُ سساھاں کارمرز بکناں گڑاں چاگرد ءِ چَمّاں من ملامت باں، من جیڑ اِت بِلّے بُرو چِداں تئی جاگہ ءُ منزل تئی چِداں پَھم گستا اِنت تو وت یک کِرّے ءَ کن۔ ھو! من وتی گپ زُرت اَنت چِداں شُت آں بلکیں چُش مہ بیت کہ کَسے ترا اد ءَ جاگہ مہ دنت، من کندگے جَت دیم ءَ سیمی منزل ءَ رھادگ بوت آں۔

انچوش کہ میزان میزان ءَ منی تَھنائی گیش بوان اَت، یکشل ءَ زند ءِ گچین مُھکم کنگ ءَ دیم پہ راستی ءِ نیمگ ءَ شُت آں بلے من پُشت ءَ دوبر بِھ چَک نہ تَرّینت، ”بُرو بُرو دیم ءَ بُرو اد ءَ من جاگہ کس نہ دنت“ یکشل ءَ گچین وتی راہ ءَ جَزگ ءَ اَت۔

منزل دور اِنت، سپر ءِ پَنداں بُرّگ ءَ اِت آں، گُژن، تُن، سر ءَ اَت کدی کدی ھمے سپر ءِ تہ ءَ جیڑ اِت کہ ھو اے راستی گران اِنت ءُ مُجّتی منزل ءَ گیش کنان اِنت، بزگ ءُ واری ءَ منی کوپگانی بار گیش بوتگ اِت آں” ھو راستی منی گچین بوتگ“ ءُ گچین پگر ءُ سسا ءَ رُدوم دیگ ءَ اَت۔
گچین زند ءِ گرانیں باراں سُبک ءُ کنت ءُ گیش باراں گران اوں کنت۔
منی زند ءِ راستیں گچین دروگے بوتگ اَت، دروگ ءَ منی راستی گار کُتگ اَت، من بریں اد ءَ سرگرداں ءُ بریں اود ءَ، نہ زاناں راہ کجا شمُشتگ اَت، بے ھیالی ءَ منی کوپگ ءِ بار گیش کُتگ اِت اَنت، بے ھیال، گرانیں بار، زندگی یکشل ءَ پہ بزگی ءُ واری ءَ پُروشت۔

”مُجّتی گچین بے زانتی ءَ مہ کن اگاں کُت گڑا منزل ءِ شوھاز ءَ ترا بازیں پَند بُرّگ لوٹ اِیت“ شپ ھما شپ، ماھیکان ھما ماھیکان، بس پگر ءُ سسا ءَ وتی دیم تَرّینتگ اَت۔

بلوچستان ءِ دمگ نوشکی ءَ مزنیں کچے ءَ آپریشن بیگ ءَ اِنت۔ کوھی دمگاں چہ گن شپ ءُ دگہ ھیلی کاپٹراں ھوار فورسز ءِ بازیں گاڑی ءِ رھادگ بوھگ ءَ گندگ بوتگ انت۔

ھالانی رد ءَ مرچی سھب ءَ پاکستانی پوج ءَ نوشکی کوہ ءِ دو دمگاں آپریشن بندات کتگ کہ اودا ہیلی کاپٹرانی یکشلیں بال برجاہ اَنت-

اھوالانی ءِ رد ءَ پاکستانی اُرد ءِ کارندہ نزیک ءِ دہ گاڑیانی تہ ءَ ھمے دمگ ءِ نیمگ ءَ دیم ءَ روگ ءَ گندگ بوتگ اَنت۔

دومی نیمگ ءَ دمگ ءَ رھوتی نزام ءِ سر ءَ ھم بندش جنگ بوتگ۔ اے درگت ءَ انگت ءَ واکداراں ھچ وڑیں ھال ءُ اھوال دیم ءَ نیتکگ اَنت-

روکپتی بلوچستان ءِ دمگ کھنوج ءِ زندان ءَ ایرانی آمیدگس ءَ یک بندیگیں مردمے پاھو داتگ-

پاھو دیگ بیتگیں مردم ءِ پجار مھمد بامری پنام ءِ الاویز مبارکی ءِ جھمنند چارچای زھکلوت ءِ نام ءَ زانگ بیتگ-

اھوالانی رد ءَ دلاویز کوش ءِ بھتام ءَ کھنوج ءِ شھر ءَ گرگ بیتگ کہ اود ءَ پد ءَ آمیدگس ءَ آئی ءِ سر ءَ پاھو دیگ ءِ ھکم داتگ بیتگ-

زانگ بہ بیت ایران ءَ پاھو دیگانی وئیل بازیں کساسے ءَ گندگ بنت اِنت کہ انسانی ھکانی بھتام اِنت اود ءَ مردماں آمیدگساں گپ کنگ ءِ موہ دیگ بوگ ءَ نہ اِنت چریشی ءِ سبب ءَ بندیگیں مردم گیشتر یک نیمگی آمیدگس ءِ پرمان ءَ پاھو دیگ بوگ ءَ اَنت-

بلوچستان ءِ دمگ چہ پنجگور ءَ پاکستانی پوج ءَ یک مردمے آوار جنگ ءَ پد بیگواہ کتگ-

بیگواہ کنگ بیتگیں مردم ءِ پجّار فرید ء عبدالحفیظ نام ءَ چہ بیتگ-

اے مرد پنجگور ءِ دمگ چہ خدابادان لوگ سر ءَ پوج ءَ بیڑبرتگ ءُ اش آوار جتگ-

دہ سالی محمد مسور ءِ یل کنگ ءِ ھاتر ءَ شال ءَ زھرشانی یکشل ءَ برجاہ اِنت-

شال ءَ سئے روچ ءَ چہ آوار جنگ بوتگیں دہ سالی زھگ محمد مسور ءِ یل کنگ ءِ ھاتر ءَ زھرشانی کنگ بوھگ ءَ اِنت ۔ زھرشانی کنوکاں پولیس ءُ سرکار ءِ سر ءَ بھتام جتگ کہ آ زھگ ءِ واتر کنگ ءَ ناکام بوتگ اَنت۔

دوشمبے ءِ روچ ءَ شھر ءِ مستریں میدان ءَ زھرشانی یے برجم دارگ بوتگ کہ ایشی ءِ تہ ءَ زھرشانی کنوکاں سئے روچ پیسر آوار جنگ بوتگیں چُک ءِ یل کنگ ءِ لوٹ کتگ کہ چریشی ءَ واکدار بے سوب اَنت-

آوار جنگ بوتگیں زھگ ءِ کھول ءَ وتی پریشانی ءِ درشانی کتگ ءُ گْوشتگ کہ انتزامیہ ءَ محمد مسور ءِ یل کنائینگ ءِ ھاتر ءَ جوانیں گامگیج نہ چست نہ کتگ۔

شال ءَ کھول ءِ مردمانی نیمگ ءَ سیمی رند زھرشانی بوتگ کہ ایشی ءِ تہ ءَ شھری زھگ ءِ پچ گرگ ءِ ھاترا سڑکاں درکپتگ اَنت۔

اھوالانی رد ءَ وھدے کہ واکداراں انگت ءَ اے پٹ ءُ پول ءِ بابت ءَ نوکیں ھال شنگ نہ کتگ بلے برجاھیں زھرشانی ءَ چہ شھر ءِ تہ ءَ ٹریپک ءِ روانی ءِ تہ ءَ مھتلی بیتگ ءُ لس مھلوک ءِ ایمنی ءِ جیڑھ گیش بوتگ اَنت۔

آواران بازار ءَ دلجان بلوچ ءِ کھول نیمگ ءَ چہ آئی ءِ زورانسری آوار جنی ءِ ھلاپ ءَ زھرشانی ئیں روانک کش اِتگ کہ ڈی سی کمپلیکس ءِ دیم ءَ سر بیتگ نندانک ءَ مَٹ بیتگ- زھرشانی ءَ زالبول ءَ زھگاں ھوار مزنیں کچے ءَ مردماں بھر زرتگ-

زھرشانی کنوکاں دلجان بلوچ ءِ پہ سلامتی یل کنائینگ ءَ زور دیان ءَ لوٹ کتگ کہ ھکومت ءُ کانود ایر کنوکیں ادارھانی بے تواری سر ءَ تُرندیں ایرجنی-

زانگ بہ بیت کہ سے ھپتگ ءَ ساری دلجان بلوچ ءِ یل کنائینگ ھاتر ءَ بے مدت ءَ تاں نندانک داتگ – زھرشانی کنوکانی گْوشگ اِنت کہ دلجان بلوچ ءَ زوت ءَ چہ زوت دیم ءَ بیار اِت ءُ زورانسری آوار جنی ءِ دْرچ ھلاس کنگ بہ بیت-

اے نندانک میان ءَ دمگی انتزامیہ، ڈی پی او آواران، ءُ دمگی سیاسی ءُ چاگردی راھشوناں چاردہ روچانی تہ ءَ دلجان بلوچ ءِ یل کنائینگ دلجنی داتگ، چریشی ءَ زھرشانی ئیں نندانک اداروکی مھتل کنگ بیتگ دلجمی دیگ وھد ھلاس بیگ ءَ اَبید دلجان بلوچ یل کنگ نہ بیتگ چریشی ءَ پد کھول یکرندے پد زھرشانی ءَ اِنت-

زھرشانی کنوکانی گْوشگ اِنت کہ دمگی انتزامیہ ءُ ھکومت وتی کول سرجم نہ کتگ اَنت- اے جاورھالانی سبب ءَ دلجان بلوچ ءِ کھول ءَ مروچی دوبر دی سی کمپلیکس ءِ دیم ءَ زھرشانی بندات کتگ-

زھرشانی کنوکانی لوٹ اِنت کہ زورانسری آوار جنی ءِ درچ زوت بند کنگ بہ بیت ءُ دلجان بلوچ ءَ ھوار سرجمیں بیگواھیں مردم یل کنگ بہ بنت، زھرشانی کنوکاں لوٹ کتگ کہ اگاں دلجان بلوچ کجام یک جرمے ءَ دزگیر اِنت گُڑا آئی ءَ آمیدگس ءَ پیش بہ کن اِت اگاں زوت یل بہ کن اِت-

زھرشانی کنوکاں تچک کتگ دانکہ آیانی لوٹ سرجم کنگ نہ بیت اَنت، زھرشانی برجاہ بیت-