TBP Balochi

ژوب ءَ جیل دگ ءِ نزیک ءَ یک وئیلے ءَ چاگردی باسک ءُ توحید ٹیکنیکل سینٹر انچارج مسرت عزیز برات ءَ تیر جتگ ءُ کشتگ-

اھوالانی رد ءَ اے زالبول ءَ ھمے زوتاں ژوب ءَ زالبولانی واستا یک ھنرمندی ھیلکاری بنجلے برجم کتگ- ڈسٹرکٹ پولیس آفیسر( ڈی پی او) ژوب سید صبور آغا ءِ رد ءَ وئیل ءِ پٹ ءُ پول بوگ ءَ انت – واکداراں یک مردمے جست ءُ پرس ءِ واستا دزگیر کتگ-

ڈی پہ او ءَ سدکی داتگ کہ انساپ دیگ بیت انت ءُ جرمکار دزگیر کنگ بیت اِنت-

اے وئیل ءَ چاگردی ترامجاھاں بازیں کچے ءَ درد ءُ رنج ءُ زھر درشان کنگ بوگ ءَ انت-

کیتھارینابلوم ءِ گاریں اِزت

گدار(ناول)

نبشتہ کار: ھائنرش بول

رجانکار: شاھد اھمد

چارُمی بھر

دی بلوچستان پوسٹ

ایکسپریس ھالتاک ءَ وتی دو جرنلسٹانی کوش ءِ ھلاپ ءَ درشان کُتگ۔ ھدّ ءَ چہ گیش زھرشانی۔۔۔ در اول ءَ مزن مزنیں بیان۔۔۔ ھاسیں ایڈیشن۔ شاھگانیں جاگہ ءَ مرگ ءِ ھال۔ اَنچوش مالوم بوتگ کہ جرنلسٹانی مرگ ءِ جاور اَبّکہ اِنت۔

آئی ءِ کوش کسے بینک منیجر، بینک ءِ ملازم یا بینک لوٹّوک ءَ چہ گیش لَس ءُ ھاس دلگوشی ءِ منّوگر اِنت۔ اد ءَ اے درشان کنگ المی نہ بیت کہ اے ھال بس ایکسپریس ھالتاک ءَ چہ ارزشت نہ دات بلکیں دومی ھالتاکانی رویہ ھم ھمے وڑ اَت۔ آیاں ھم جرنلسٹانی کوش ءِ دردناک، نااُمیتی ءُ دل تراک بوھوکیں جاور مَنّ اِت، تَھنا اے انّا بلکیں ھمے واست ءَ کہ آیاں وتی پیشہ وارانہ کارانی سبب ءَ ھمے کُربانی دات۔ ایکسپریس ھالتاک ءَ شونر ءِ کوش ءَ ھم بلوم ءَ زمہ واری گُشت ئِے۔ ھالتاکانی ھمے رویہ چارگ ءَ اَت بزاں ھمے وَ مَنّگی اِنت کہ اگاں ٹونگیس جرنلسٹے مہ بوتیں(پہ درور اگاں موچی یا بیکری والا یے بوتیں) گڑا آئی ءِ کوش ھم نہ بوتگ اَت۔ چہ ھمیشی ءَ ھمے جُست پاد کَیت کہ بلے اے چے سبب بوتگ کہ بلوم ءِ وڑیں زانتکار ءُ سُبک تب ءِ جنین ءَ تھنا بس کوش ءِ شوربندی جوڑ کُتگ بلکیں آئی ءِ سر ءَ کنگ ءِ واست ءَ ھما ھاس دمان ءِ ودار ھم کُت کہ ٹونگیس ءَ آئی ءَ را دیم ءَ آورتگ اَت؟ آئی ءَ تھنا بس آئی ءَ توپک ءَ را دست ءَ کُرت بلکیں آئی ءَ کارمرز ئِے ھم کُت۔

ما کمو اے کسانیں گپاں یل بدے اِیں ءُ مزنیں شوربندیاں چار ءُ تپاس بکنیں۔ کمو دمانے ءَ پد کُشت ءُ ھون ءَ بے ھیال بَہ اِیں، پریس ءَ کہ شور پیداک بوتگ اَت آئی ءَ را ھم یل دے۔ ھمے ساھت ءَ کیتھارینا بلوم ءِ اوتاک ءَ سپائی بوتگ اَت۔ ایشی ءِ درتگیں کوھنیں ءُ وھدیگیں چیرپوش گند ءِ ڈبّہ ءَ دور داتگ اَت۔ تَھت ءَ را چِست کنگ ءُ یک جاگھے ءَ ھور ایر کُتگ اَت۔ اے درستیں بلورنا ءِ گْوشگ ءِ ھساب ءَ بوتگ اِت اَنت ءُ آئی ءَ را چہ اے سر ءُ سوج آئی ءِ سنگت ھاش ءَ داتگ اِت اَنت۔ بلے ھمے گپ چہ یکین ءَ گُشت کُت نہ کنیں کہ بلورنا ءِ کسٹوڈین ءِ داب ءَ بنت یا انّا؟
ھمے داب ءَ اے گپ یات کنگ ءِ بستار اِنت کہ پَنچ سالاں کیتھارینا بلوم وتی ھمے اوتاک ءِ کہ کُل نِھاد یک لَکھ مارک بوتگ اَت، چمیشی ءَ ھپتاد ھزار داتگ اَت اِش۔ اد ءَ آئی ءِ برات ءِ، کہ ھما وھد ءَ زندان ءَ کسانیں سزایے ءِ ورگ ءَ اَت، اے گپ یات کنگ ءِ کابل اِنت کہ” ھمے اوتاک ءَ اَنچیں بازیں کیمتی ئیں چیز اَنت کہ گار کنگ ءِ لائک اَنت۔“ ھمے واست اے جُستے ھم کہ اے بچّ اتگیں سی ھزاراں کَے دنت؟ وھدے بلوم ءِ مَڈّی اَنت۔ ھمے وامداری ءِ دیگ ءِ زمہ واری اَنت ھم۔

ھیر ھر چی بوتگ اَت بِلّے بوتگ۔ اے وھد ءَ ٹونگیس ءَ را کَبر کُرتگ اَت۔(بازیں مردمانی ھیال اِنت کہ شرپ ءُ اِزت، دود ءِ ھساب ءَ نہ بوتگ اَت) ھاسیں گپ اِیش اَت کہ شونر ءَ کبر کنگ ءَ ناں کہ سک باز نمائش بوت ءُ ناں مردماں آئی ءَ گیش دلگوش دات۔ نوں کَسے اے جُست کُت کنت کہ چُش چی ءَ بوتگ؟ بگندئے ھمے واست ءَ آ وتی پیشہ ءِ سبب ءَ نہ مُرتگ بلکیں آئی ءِ کُشگ یک جزباتی ءُ آدساتی اَت۔۔۔ شیک ءِ پوشاک( وھدے ٹونگیس ءَ گور ءَ اَت) نوں پولیس ءِ الماری ءَ بند اَت ءُ ھمراھی ءَ توپک ءَ گوں۔ توپک ءِ راستی ءِ بارو ءَ بس بلورنا ءَ اِلم اَت کہ آئی ءَ را چہ کجا گپتگ اَت؟ وھدے پولیس ءُ پبلک پراسیکوٹر آپس والا آئی ءِ بابت ءَ مالومات ءِ گرگ ءَ ناکام اِت اَنت۔

روکپتی بلوچستان ءِ تیابدپی شھر چھبار ءَ ناشناسیں مردمانی تیرگواری ءَ یک مردمے بیران بیتگ –

گیشیں اھوالانی رد ءَ چھبار ءِ ھند پلان ءَ گورگیج بازار ءَ تیرگواری ءَ یک مردمے بیران بیتگ-

چہ تیرگواری ءَ بیران بیتگیں مردم ءِ پجار شریف گورگیج ء جما جھمنند گورگیج بازار ءِ نام ءَ زانگ بیتگ-

اھوالانی رد ءَ وئیل وت ما وت زمین ءِ جیڑھے ءِ سر ءَ اڑوکی بیتگ انت چریشی ءَ دومی نیمگ ءَ تیرگواری بیتگ ءُ شریف نامیں مردمے بیران بیتگ-

روکپتی بلوچستان ءَ بندوکیں مردم ایران ءِ جتا جتائیں زنداناں گوستگیں سال ءَ بازیں کساسے ءَ بندیک پاھو دیگ بیتگ انت-

روکپتی بلوچستان ءَ ایران ءِ جتا جتائیں زنداناں 101 بلوچ زندانی پاھو دیگ بیتگ انت-

پاھو دیگ بیتگیں مردمانی توک ءَ یک بلوچ زالبولے ھم ھوار انت کہ وتی زھگ ءِ مجرم بیتگ-

شنگ بیتگیں رپورٹ ءَ گوشگ بیتگ کہ پاھو داتگیں مردمانی تہ ءَ 73 مردم نشہ باپاری 28 مردم کوشانی بھتاماں پاھو دیگ بیتگ اَنت-

اھوالانی رد ءَ 7 زندانی پاھو ءِ سزا واریں مردم دومی مردماں پھل کتگ ءُ پاھو ءَ رک اتگ اَنت-

روکپتی بلوچستان ءَ بندیگیں مردمانی پاھو دیگ ءِ سر ءَ اود ءَ سیاسی پھناتاں ایراد گرگ بیتگ کہ بندیگاں وتی سپاھی دیگ ءِ موہ دیگ بوگ ءَ نہ انت-

بلوچ یکجھتی کمیٹی ءَ رسانکدر ءَ شنگ کتگیں درشان ءِ تہ ءَ گْوشتگ کہ دسمبر ءِ گُڈی دھیں روچاں بلوچستان ءِ دمگاں دُکی، ھرنائی ءُ دگہ ھندانی سر ءَ پوجی زوراکی ءِ آسر ءَ درزنانی مری بلوچ زورانسری آوار جنی ءِ نشانگ کنگ بیتگ اَنت- ریاستی زوراکی وتی ھد ءَ سر بیتگ، بلے اے زُلم ناں تھنا رسانکدر ءَ بلکیں انسانی میان استمانی ادارھانی دلگوشی ءَ ھم زبھر اَنت- ریاست پاکستان بلوچستان ءِ دیر دراجیں دمگاں زُلم ءُ زوراکی ءِ دْرچ برجاہ داشتگ، ءُ ھال اھوالی نزام ءِ نہ بیگ سبب ءَ زوراکی ءِ جھان ءَ تاں سر بیگ ءَ نہ اِنت-

آئی ءَ گْوشتگ کہ چہ دکی ءَ یکیں کھول ءِ بازیں مردمے زورانسری آوار جنی ءِ نشانگ کنگ بیتگ اَنت کہ آیانی تہ ءَ سید محمد مری، خیر محمد مری، عبدالنبی مری ھوار اَنت، کہ لشکر کشی ءِ میان ءَ بیگواہ کنگ بیتگ اَنت – ھمے لوگ ءِ دگہ مردمے حسین بخش ء سید محمد مری چہ ھرنائی ءِ پیر صاحب چیک پوسٹ ءَ سپر ءِ میان ءَ زورانسری بیگواہ کتگ – ھمے وڑ گل محمد مری، عمران مری، شیر محمد مری ءُ سفر خان مری ھم ھرنائی ءَ لشکر کشی ءِ میان ءَ آوار جتگ اَنت – اشی ءَ اَبید ھم بازیں مردمے ھست کہ آیانی درگت ءَ سرپدی دز نہ کپتگ- دُکی ءُ ھرنائی ءِ اے وئیلاں یکجاھی ھساب ءَ کساس شانزدہ مری بلوچ زورانسری آوار جنی ءِ نشانگ کنگ بیتگ اَنت-

آئی ءَ گْوشتگ کہ بلوچستان ءَ ریاستی زوراکی یک نوکیں گپے نہ اِنت، اد ءَ لوگانی ماندارگ، مال ءُ دلوتانی دُزگ، راج ءَ را دلسیاہ کنگ، چیک پوسٹانی سر ءَ زلیل کنگ، ءُ زورانسری آوار جنی ءَ پد ٹپ ٹوریں لاشانی دور دیگ ھمکروچی جوڑ بیتگ، چوشکہ بلوچستان ءَ رسانکدر ءِ واستا ” بلیک ہول ” سیاھیں ٹُنگے جوڑ بیتگ، ھمے ھاتر ءَ اے زوراکی ناں تھنا میان استمانی بلکیں وت بلوچستان ءِ راج ءَ ھم سر نہ بنت- ریاست وتی زوراکیانی چیر دیگ ھاتر ءَ موباھل نیٹ ورک بند کتگ اَنت ءُ راج ءَ را وتی ھیال ءُ لیکھانی درشان کنگ ءَ ھم منّوگر نہ اِنت- بیگواھیں مردماں کھولاں رسانکدر ءَ روگ ءُ یا زھرشانی ءِ کنگ موکل ھم دیگ نہ بیت، وھدے کہ ریاستی رسانکدر ءُ اے پروپیگنڈہ ٹولی زورانسری آوار جنی ءِ اے وئیلاں دروگ گشگ ءُ اسرمندانی ٹپاں واد پر کنگ ءَ اِنت-

آئی ءَ گْوشتگ کہ ما انسانی ھکانی گلاں چہ دزبندی کن ایں کہ آ دُکی ، ھرنائی ءُ دگہ دمگاں چہ زورانسری آوار جنگ بیتگیں مردمانی یل کنائینگ ءَ شریں کردے پیلو بہ کنت- ما بلوچ راج ءَ چہ ھم دزبندی کن ایں کہ آ وتی چُکچینی ءِ ھلاپ ءَ یکجاہ بہ بنت یک یکجاھی راجی گھگیری ءِ راہ ءَ در بہ چن اَنت- زورانسری آوار جنی ءِ نشانگ بیتگیں مردمانی کھولاں گوں دزبندی اِنت کہ آ وتی دوستناکانی کیس ءَ رسانکدر ءَ بیار اَنت ءُ اشانی سر ءَ توار چست بہ کن اَنت- بلوچ راج ءَ چہ ھم دزبندی اِنت آ وتی وتی دمگاں زورانسری آوار جنی ءِ ھرچ کیسے ءِ ھال ءَ بدے اَنت ءُ اے زوراکیاں جھان ءِ دیم ءِ آرگ ءَ وتی کرد ءَ پیلو بہ کن اَنت-

ڈیرہ بگٹی ءِ دمگ پیرکوہ ءَ بیست ءُ دو سالی ئیں زالبول ءَ وھد سر ءَ الاج نہ بیگ ءِ سبب ءَ چلگی ءِ وھد ءَ ننک ءَ ھوار بیران بیتگ-

زانگ بہ بیت کہ ڈیرہ بگٹی ءَ گائنالوجسٹ یا جنکی ڈاکٹر نہ بیگ ءِ سبب ءَ چہ زالبول چلگی ءِ وھد ءَ دو سد کلومیٹر ءَ دیر پنجاب ءِ دمگاں رحیم یار خان ءُ صادق آباد ءَ برگ بنت کہ اود ءَ نیم راہ ءَ زالبول چلگ بنت وھدے کہ گیشتر زالبول ءُ چُک ھمے میان ءَ ھم بیران بیتگ اَنت-

ڈیرہ بگٹی ءِ تھسیلاں ھمگرنچیں سے لک ءَ گیش آبادی ءِ دمگ ءَ اَبید ایشی ءِ تہ ءَ نادُراھجاہ ، وانگجاہ ءُ دگہ بُنکی آسراتی نیست اَنت-

میٹرنل مورٹیلٹی سروے رِد ءَ پاکستان ءَ چلگی ءِ میان ءَ مرگ ءِ کچ گیشتر بلوچستان ءَ اِنت اود ءَ چلگی ءِ میان ءَ یک لک ءِ تہ ءَ دوسد ءُ نود ءُ ھشت ماتاں وتی ساہ داتگ اَنت-

بلوچستان ءَ سکلڈ برتھ اٹینڈنٹ بزانکہ کسے ھیلکاری ئیں الاج کنوکیں کارمندے ءَ چہ چلگی کنگ ءَ تھنا سی ءُ ھشت درسد اِنت، نزانتکار ءُ بے ھیلکاری ئیں کارمندانی الاج کنگ ءِ سوب ءَ مرگ گیش بوان اَنت-

زانگ بہ بیت کہ بیرانیانی دومی مزنیں سبب پرائمری ءُ ٹرشری ھیلتھ کیئر ءِ نزام ءَ ھستیں نزوری وھدے کہ سیمی مزنیں سبب نادُراھجاہ مردمی توانمندی ءِ کمی اِنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں کیچ ءُ آواران ءَ دو جتاجتائیں اُرشاں دُژمن نشانگ کتگ ءُ جانی مالی تاوان داتگ اَنت-

جارکش ءَ گْوشتگ کہ یک جنوری دوھزار بیست پنچ ءِ شپ دوازدہ ءَ مئے سرمچاراں کیچ ءِ دمگ ھیرونک ءَ برجاھیں زورگریں پاکستانی پوج ءِ بُنجل سر ءَ مزنیں ءُ وتکاریں سلاھاں چہ اُرش کتگ-

جارکش ءَ گْوشتگ ھما وھد ءَ کنگ بیتگ وھدے زورگریں پوج نوکیں سال ءِ شاتکامی ءَ دلگوش بیتگ اَنت – اُرش ءَ دُژمن ءَ جانی ءُ مالی تاوان چست کنگ کپتگ-

جارکش ءَ گْوشتگ کہ مئے سرمچاراں راھبندانی رِد ءَ ھما وھد ءَ ودار کتگ وھدے دُژمن نوکیں سال ءِ شاتکامی ءَ کنگ ءِ چن ءَ لانچ ءَ دلگوش بیتگ اَنت-

جارکش ءَ گْوشتگ کہ دگہ یک اُرشے بی ایل ایف ءِ اسنائپر ٹیکٹیکل ٹولی ءَ مروچی بیگاہ ءِ شش ءَ آواران ءِ دمگ جھاؤ، دارو کوچگ ءَ برجاھیں زورگریں پاکستانی بُنجل سر ءَ اسنائپر ءَ چہ اُرش ءِ نشانگ کتگ دُژمنیں پوج ءِ یک کارمندے یے کشتگ-

جارکش ءَ گْوشتگ بلوچستان لبریشن فرنٹ اے اُرشانی زمہ واریاں منّ اِیت ءُ بلوچ سرڈگار ءِ وتواجھی ءَ تاں زورگریں پوج سر ءَ اُرش ءَ برجاہ بنت-

روکپتی بلوچستان ءِ بنجاھی شھر زاھدان ءَ سلاہ بندانی میان ءَ تیرگواری ءَ دو مردم زدگ بیتگ اَنت-

اھوالانی رد ءَ مارکیٹ ءَ دو سلاہ بندیں ٹولیانی میان ءَ یک زالبولے ءُ یک مردینے زدگ بیتگ اَنت-

اھوالانی رد ءَ تیرگواری ءَ ھردوکانی پجار زانگ نہ بیتگ اَنت –

تیرگواری ءِ سبب زانگ نہ بیتگ ءُ ناگتی دو ٹولیاں وت ماں وت تیرگواری کرتگ کہ چریشی ءَ زالبولے ءَ ھوار دو مردم زدگ بیتگ اَنت-

تیرگواری ءَ پد مارکیٹ ءِ تاجراں ترس ءُ بیم ودی بیتگ اَنت-

کاؤنٹر ٹیررازم ڈیپارٹمنٹ ( سی ٹی ڈی) ءَ چہ تربت ءَ بیگواھیں زمان جان ءُ ابولھسن قلعہ عبداللہ توبہ اچکزئی ءِ کراس ءَ دزگیری پدر کتگ انت ءُ آ بلوچ سلاہ بندیں گل بی ایل ایف ءَ بندوکی ءِ بھتام جتگ اَنت-

پولیس ءِ رد ءَ آیانی گور ءَ اُرشکاری ءَ دزبمب دزکپتگ اَنت-

پولیس ءِ نیمگ ءَ شنگ بیتگیں ایف آئی آر ءِ رد ءَ یکم جنوری ءَ چاریگیں اھوال دیگ ءَ سی ٹی ڈی ءَ زمان جان ءُ ابولھسن توبہ اچکزئی کراس ءَ قلعہ عبداللہ ءَ پرپٹ ءَ سوار بیتگ ءُ راہ ءَ دارگ بیتگ ءُ ھردوکانی گور ءَ دو دانگ ھینڈ گرینیڈاں ھوار دگہ شورو دزکپتگ اَنت-

زمان جان ءُ ابولھسن ءِ سیادی کیچ ءِ دمگ بالگتر ءَ اِنت ءُ آیانی زورانسری بیگواھی ءِ بھتام کھول ءَ ڈسٹرکٹ کونسل کیچ ھوتمان ءِ سر ءَ لڈ اتگ-

کھول ءِ رد ءَ اے ھردوکاں ابید الطاف نامیں ورنایت ڈسٹرکٹ کونسل کیچ ھوتمان ءَ وتی لوگ ءَ لوٹارینتگ ءُ پد ءَ کانون جوڑیشتکارابی دست ءَ داتگ انت بلے دو روچ ءَ پد الطاف یل بیتگ –

زانگ بہ بیت شانزدی دسمبر دوھزار ءُ بیست ءُ چار ءَ زمان جان ء سِپا ھان، ابولھسن ء رھمت ءُ الطاف ء بھرام زورانسری بیگواھی ءِ آماچ کنگ بیتگ انت دو روچ ءَ پد الطاف یل کنگ بیتگ ات ءُ بیست دسمبر ءَ یک پریس کانفرنسے ءَ کھول ءَ گوشتگ کہ ڈسٹرکٹ کونسل چیئرمین میر ھوتمان ءَ مئے مردم وتی لوگ ءَ لوٹارینتگ ءُ بیگواہ کتگ اَنت-

زانگ بہ بیت زمان جان ءُ ابولھسن ءِ یل کنائینگ ءِ ھاتر ءَ آیانی کھول گوستگیں بیگاہ ءَ چہ ھوشاپ زیروپوائنٹ ءَ سی پیک دگ ءِ سر ءَ نشتگ انت-

دوشی زھرشانی بنجل ءِ سر ءَ ایف سی ءَ بیڑ برتگ ات ءُ اود ءَ زھرشانی ءَ نندوکین زالبول کمشرپ کتگ ات اَنت-

ھمے وڑ چِد ءُ پیش ھم زمان جان ءُ ابولھسن ءِ کھول ءَ زھرشانی نندانک داتگ بیتگ ات کہ انتزامیہ ءَ کول کنگ ءَ پد آیاں وتی زھرشانی ھلاس کتگ ات-

دومی نیمگ ءَ کھول ءَ گوشتگ زمان ءُ ابولھسن ءِ دروگیں دزگیری کنگ ءِ بھتام ءَ رد کن ایں –

دو ھپتگ ءَ پیش ڈیرہ مراد جمالی ءَ دشتار ءِ دست ءَ کُشگ بیتگیں زالبول ءِ لاش پٹ فیڈر کینال ءَ دزکپتگ-

زالبول ءِ لاش پٹ فیڈر کینال بیدار پھل ءِ نزیک ءَ نِھر ءَ دزکپتگ – سٹی پولیس ءَ لاش چہ نھر ءَ کش اتگ-

پولیس ءَ لاش پوسٹ مارٹم ءِ واستا سیول ھسپتال ڈیرہ مراد جمالی ءَ برتگ ءُ گیشیں پٹ ءُ پول کنگ ءَ انت-