TBP Balochi

بلوچستان ءَ سلاہ بندیں مردمانی نیمگ ءَ چہ پوج ءِ چوکیانی سر ءَ اُرش ءُ دستیگ کنگ دْرچ برجاہ ءَ اِنت، یکیں روچ ءَ ڈھاڈر ءُ تربت ءَ پولیس ءُ لیویز ءِ چوکیانی سر ءَ اُرش کتگ کارمند گپتگ ءُ سلاہ برتگ اَنت-

گیشیں ھالانی رِد ءَ بلوچستان ءِ دمگ کیچ ءِ تھسیل تربت ءَ تربت یونیورسٹی ءِ بُنجاھی گیٹ سر ءَ برجاھیں سیکیورٹی چوکی سر ءَ سلاہ بندیں مردماں اُرش کتگ، اُرش ءَ پولیس ءَ کارمند گپتگ ءُ شش سرکاری سلاہ، واکی ٹاکی سیٹ ءُ دگہ سامان برتگ اَنت-

اِھوالکار رِد ءَ سلاہ بندیں مردم پرپٹ ءَ سوار بیتگ ءُ کاروائی ءَ پد نزیکیں کوہ نیمگ ءَ شتگ اَنت-

زانگ بہ بیت کہ دو روچ ءَ ساری تربت ءِ دمگ سنگانی سر ءَ ھم یک پولیس چوکی ءِ سر ءَ اُرش کنگ بیتگ اَنت کہ اود ءَ چہ سرکاری سلاہ دگہ سامان دستیگ کتگ اَنت- اے اُرش زمہ واری بلوچستان لبریشن فرنٹ ( بی ایل ایف ) ءَ زرتگ اَت-

ھمے وڑ مروچی بلوچستان ءِ دمگ کچھی ءِ ھند ڈھاڈر ءَ سلاہ بندیں مردماں لیویز چوکی سر ءَ اُرش کتگ – اِھوالکار رِد ءَ ڈھاڈر ءِ دمگ صبری ءَ سلاہ بندیں مردماں لیویز کارمند گپتگ ءُ سلاہ دگہ سامان دستیگ کتگ اَنت، پد ءَ کارمند یل داتگ اَنت-

بلوچستان ءَ پوج ءِ چوکیانی سر ءَ پُشت ماں پُشت ءَ اُرش بیگ ءَ اِنت ، پولیس ءُ لیویز ءِ سلاھانی دستیگ کنگ وئیل جتاجتائیں دمگاں رپورٹ کنگ بیتگ اَنت-

ھمے ماہ ءِ بندات ءَ بلوچ لبریشن آرمی ( بی ایل اے ) ءَ ھُزدار ءِ دمگ زھری ءَ یک مزنیں کاروائی یے کتگ اَت لیویز تھانہ، نادرا کارگس، میونسپل کمیٹی ءُ دگہ سرکاری ماڑی مانداشتگ اَنت، وھدے کہ سرکاری سلاہ ءُ گاڑی ھم دستیگ کتگ اَنت-

بلوچستان ءَ سلاہ بندیں گلانی کاروائی اے وھد ءَ تُرند گندگ آیگ ءَ اِنت – تربت ، کیچ، ڈھاڈر ءُ دگہ دمگاں برجاہ ءَ اِنت- بلے مروچی تربت ءُ ڈھاڈر ءَ بیتگیں کاروائی ءِ زمہ واری انگت ھچ گل ءَ نہ زرتگ اَنت-

کیچ ءِ بُنجاھی شھر تربت ءَ سلاہ بندیں مردمانی اُرش ءَ چہ یک مردمے بیران-

پولیس رِد ءَ محمد عارف ء محمد عمر جھمنند پنجگور ءَ سلاہ بندیں مردماں تیرگواری کتگ کُشتگ-

اے مرد مگرب ءِ وھد ءَ وتی پرپٹ ءَ سوار بیتگ تربت ءَ چہ آپسر ءَ روگ ءَ بیتگ کہ آ راہ نیم ءَ تیرگواری کتگ کُشتگ وئیل ءَ پد اُرشکار تتکگ اَنت-؛ بلے وئیل سوب زانگ نہ بیتگ-

بلوچستان ءِ دمگ چہ کلات ءَ لشکر لشکر کشی کنگ ءَ اِنت- پوج ءِ بازیں گاڑیانی ھمگرنچیں کاروان دمگ ءَ سر بیتگ-

دمگی اِھوالکار رِد ءَ نیچارہ ءُ کش گوراں پاکستانی پوج لشکر کشی ءَ دلگوش اِنت-

آئی ءَ گوشتگ کہ نیچار ءِ وانگجاہ ءَ پوج ءَ بُنجلے جوڑ کتگ اود ءَ بازیں کارمندے یے ساڑی اِنت وھدے کہ وانگجاہ سر ءَ سنگر ھم جوڑ کتگ-

ھمے وڑ چیڑخمب ءِ دمگ ءَ پوج ءِ پیشگامی کنگ ءَ اِنت-

واکدار ءَ تنی وھدے اے درگت ءَ ھچ وڑیں درشان دیم ءَ نیاورتگ وھدے کہ ھال اھوالی نزام بندی ءِ سبب ءَ ھال پہ زوت سر نہ بیگ ءَ اَنت-

بلوچستان ءِ دمگ کچھی ءِ ھند ڈھاڈر ءَ مروچی سلاپ بندیں مردماں لیویز پورس ءِ چوکی دستیگ کتگ-

دمگی مردماں ٹی بی پی ءَ گوں گوشتگ کہ ڈھاڈر ءِ ھند سبری ءَ سلاہ بندیں مردماں لیویز کارندھ دزگیر کتگ انت ءُ آیانی سلاہ ءُ دگہ ساز ءُ سامان پچگپتگ انت-

اھوال انت سلاہ بندیں مردماں پد ءَ لیویز کارندہ یل داتگ انت ءُ پشت مانداتگ ءُ شتگ انت-

گوستگیں روچ ءَ تربت سنگانی سر ءَ پولیس ءِ چوکی دستیگ کنگ ءَ پد کارندھانی سلاھانی پچگرگ ءُ پد ءَ چوکی ماندارگ بیتگ ات ءُ تربت پولیس ءِ چوکی ءِ سر ءَ اُرش ءِ زمہ واری بلوچستان لبریشن فرنٹ ءَ من اتگ ات-

دَہ روچ پیش بلوچ لبریشن آرمی ءَ زھری شھر دَہ اداراں گیش دستیگ کتگ ات ءُ لیویز تھانہ ، نادرا آفس، میونپسل کمیٹی ءُ بینک آجوئی دوستاں دستیگ کنگ ءَ پد مانداشتگ ات انت-

ڈھاڈر ءَ بیتگیں اُرش ءِ زمہ واری انگت کس ءَ پہ وت نہ زرتگ-

بلوچ یکجھتی کمیٹی ءِ بنجاھی جارکش ءَ وتی شنگ کرتگیں درشانے ءِ تہ ءَ گوشتگ کہ گوستگیں روچ ءَ ڈالبندین ءَ بؤکیں راجی مُچی ءِ ھاتر ءَ ماں لیاری ءَ ایمنیں مچی ءِ برجم دارگ بوتگ، بلے مدامی ءِ وڑ ءَ ریاست ءِ پاکستان ءُ پاکستان پیپلز پاٹی ءِ سرکار ءَ پرایمنیں زھرشانی مُچی ءِ سر ءَ بیڑ بُرتگ ءُ بلوچ زالبول، کماش ءُ ورنا سک باز لٹ شاپ کتگ انت ءُ بلوچ یکجھتی کمیٹی ءِ بنجاھی رھشون لالا وھاب بلوچ، سمی دین بلوچ ءَ ھوار مئے بازیں سنگتے دزگیر کتگ انت – بلوچ زالبول شش ھپت ادار ءَ گیش گار کتگ انت ءُ لٹ شاپ کنگ ءَ پد یل داتگ انت بلے لالا وھاب بلوچ ءَ ھوار ایندگہ سنگت انگت بیگواہ انت ءُ آیانی ھچ ھال نیست ءُ مارا ھچ وڑیں سرپدی دیگ بوگ ءَ نہ انت –

جارکش ءَ گوشتگ کہ لیاری مچی ءِ سر ءَ ریاست ءِ پاکستان ءُ پیپلز پاٹی سرکار ءِ اُرش بلوچ راج ءِ بگیری ءَ وتی نپرت ءِ درشانی انت ءُ بلوچ زالبولانی سریگانی سرچنگ تچکی ءَ بلوچ راجی مڑاہ ءِ سر ءَ اُرش انت – بلوچ راج ریاست ء پاکستان ءُ پیپلز پاٹی ءِ کرتوت ءُ زوراکیاں وتی راجدپتر ءَ نبیس ایت ءُ اشی ءَ وتی راجی زانشت ءِ بھرے جوڑ کنت ءُ یک منگھیں راجی گھگیری ءِ تہ ءَ بدل کنت – آئی ءَ گوشتگ کہ بلوچ زالبول ءُ کماش بے وارس نہ انت بلکیں آیانی پُشت ءَ سرجمیں بلوچ راج اوشتوک انت – بلوچ راج ءَ گوستگیں ھپتاد ءُ ھپت سال انت اے وڑیں زلم ءُ زوراکیانی بگیری ءَ گھگیری کنان ءُ پیداک انت اے وڑیں سِلیں کار مئے راجی گھگیری زرمبشت ءَ گیشتر مھکم کنت –

جارکش ءَ گوشتگ کہ ریاست پاکستان ڈالبندین ءَ بؤکیں بلوچ چکچینی ءِ یادگاری روچ ءِ درگت ءِ بلوچ راجی مچی ءِ بے سوب کنگے ھاتر ءَ وتی درسیں زور ءَ جنگ ءَ انت – زیکیں لیاری وئیل ءَ ابید مستونگ ءُ نسیر آباد ءَ پُرایمنیں راجی مُچیانی برجم کنگ ءَ پہ بلوچ یکجھتی ءِ سروک ڈاکٹر ماھرنگ بلوچ، بنجاھی رھشون صبغت اللہ شاہ جی ءُ ایندگہ سنگتانی بگیری ءَ ارزی نبشتہ کنگ بوتگ ءُ ھر ھند ءُ دمگاں مراگشانی بے سوب کنگ ءِ ھاتر ءَ نیٹ ءُ دامگ بند کنگ بوگ ءَ انت ءُ اڈاند پیداک کنگ بوگ ءَ انت بلے ریاست ءِ درسیں سازش ءُ پندل بے سوب بوان انت –

درشان ءِ گڈسر ءَ جارکش ءَ گوشتگ کہ زیکیں روچ ءَ لیاری ءِ بوتگیں وئیل ریاستی ناشرکاری ءُ رستری درشان کنت – ھمے رستری ءُ ناشرکاری ءِ بگیری ءَ بلوچ یکجھتی کیمٹی باندا دوشمبے ءِ روچ ءَ سرجمیں بلوچستان ءَ “دفاعِ بلوچ اقدار” ءِ نام ءَ زھرشانیانی درچ ءِ بندات کنگ بیت – ڈالبندین ءَ راجی مچی ءِ ھاتر ءَ برجاھیں سرپدی مھم ءُ زھرشانی ھواری ءَ سرجمیں بلوچستان ءَ کنگ بنت – بلوچ یکجھتی کمیٹی ءِ باسک ءُ بلوچ راج ڈالبندین ءَ راجی مُچی ءِ چن ءُ لانچانی درگت ءَ وتی کار ءَ گیش بہ کن انت –

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءَ گوشتگ مئے سرمچاراں کیچ ءِ دمگ زامران ءَ زورگریں پاکستانی پوج بمب اُرشے ءِ نشانگ کتگ ءُ دو کارندہ کشتگ انت-

جارکش ءَ گوشتگ بی ایل اے ءِ سرمچاراں زامران ڈل کک ءِ ھند ءَ زورگریں پاکستانی پوج ءِ یک گاڑی یے ریموٹ کنٹرول آئی ای ڈی اُرش ءِ نشانگ کتگ چریشی ءِ آسر ءَ گاڑی ءَ سواریں دو کارندہ جاہ پہ جاہ ءَ مرتگ انت ءُ گاڑی سرجم ءَ تباہ بیتگ-

آئی ءَ گوشتگ اے کارندہ دشمنیں پوج ءِ کاروان ءِ راہ ءَ پلگار کنگ ءَ بیتگ انت کہ نشانگ کتگ انت-

گڈسر ءَ آئی ءَ گوشتگ بلوچ لبریشن آرمی اے اُرش ءِ زمہ واری ءَ من ایت ءُ دشمن ءِ سر ءَ ترندیں اُرشانی درچ ءَ برجاہ دارگ ءِ کول ءَ کنت اِنت-

گوستگیں روچ ءَ کراچی ءِ ھند لیاری ءَ بلوچ یکجھتی کمیٹی ءِ چیردستی ءَ روانک ءِ سر ءَ سندھ پولیس ءَ بیڑ برتگ ءُ زھرشانی کنوک لٹ شاپ کتگ انت ءُ بازینے دزگیر کتگ انت-

کراچی پولیس ءَ ھمے وھد ءَ زالبول باسکاں ھوار زھرشانی کنوک لٹ شاپ کتگ انت ءُ پد ءَ گل ءِ رھشون سمی بلوچ، آمنہ بلوچ، لالا وھاب ءُ دگہ بازیں مردم دزگیر کتگ انت ءُ پولیس ءَ جتا جتائیں تھانھاں برتگ انت پد ءَ شپ ءَ زالبول ءُ لھتے مردم یل کتگ انت بلے داں انگت ءَ بازیں مردین ہولیس ءِ دزگیری ءَ انت-

ایمنسٹی انٹرنیشنل ساوتھ ایشیا ءَ وئیل ءِ سر ءَ پدردی درشان کنان ءَ گوشتگ گوستگیں روچ ءَ لیاری ءَ پولیس ءَ بلوچ یکجھتی کمیٹی ءِ پُر ایمنین زھرشانی ءِ ترندین کاروائی کتگ ءُ زھرشانی کنوک دزگیر کتگ انت کہ اے اجوئی ءِ لیکھانی درشان ءُ پرایمنیں زھرشانی ءِ ھکانی لگتمالی انت-

ایمنسٹی انٹرنیشنل ءِ رد ءَ زالبولیں زھرشانی کنوک بازیں ادارھاں داں بندیگ کتگ انت ءُ پد ءَ یل داتگ انت بلے نُھ مردین کہ آیانی توک ءَ بی وائی سی ءِ بنجاھی ڈپٹی آرگنائزر لالا وھاب بلوچ ھوار اِنت داں انگت ءَ ابید بھتام ءَ بندیگ انت-

ایمنسٹی انٹرنیشنل ءَ وتی درشان ءَ پاکستان ءِ واکداراں بیست ءُ پنچ جنوری دوھزار ءُ بیست ءُ پنچ ءَ دالبندین بلوچستان ءَ برجم بیوکیں مُچی ءَ پیش بلوچ باسکانی ھلاپ ءَ ترسینگ ءُ ایرموش کنگ گیش کتگ انت چریشانی توک ءَ بلوچ یکجھتی کمیٹی ءِ رھشونانی ھلاپ ءَ ارزی نامہ ھوار انت-

ایمنسٹی انٹرنیشنل ءَ پاکستان ءِ واکداراں لوٹ کتگ کہ لیاری ءَ دزگیر کتگیں دراھیں مردم یل کنگ بہ بنت ءُ پرایمنیں زھرشانی سدکی کنگ بہ بجگ ابید کجام ھم ناشری ءَ دزگیری، درکانودی تاکت ءِ کارمرد ءُ رھشون یا زھرشانی کنوکانی سر ءَ ایف آئی آر ءَ گستاھی بہ بیت اِنت-

سندھ ءِ دمگ چہ سیون شریف ءَ شال، چہ کراچی ءَ تربت ءِ جھمنندیں ءُ چہ نوشکی ءَ یک ورنایے زورانسری بیگواہ کتگ اَنت-

چہ سیون شریف ءَ زورانسری بیگواہ محمد جواد ء قدرت اللہ قمبرانی بلوچ ءِ ناکوزتک ءِ گوشگ اِنت کہ آ سنگتانی ھمراھی ءَ سیل ءُ سواد ھاتر ءَ شتگ- چریشی ءَ ما سارتیں دمگ مردم گیشتر سارتی ءَ رو ایِں – گُڑا منی ناکوزتک ھم شتگ اود ءَ ھپتدہ جنوری ءِ بیگاہ وھد ءَ چہ سیون شریف دربار ءَ سادھیں پوشاکانی تہ ءِ مردماں آ دزگیر کتگ ناشناسیں جاھے ءَ برتگ چریشی ءَ پد آ بیگواہ ءَ اِنت-

آئی ءَ گْوشتگ کہ ما آئی ءِ آوار جنی ءِ گپ اش کتگ ما ھما ایں گماں گوں دوچار ایں ھکومت سندھ چہ دزبندی کن ایں کہ آ جواد بلوچ ءِ یل کنائینگ ھاتر ءَ وتی کرد ءَ پیلو بہ کنت-

ھمے وڑ کیچ تمپ یِ جھمنند زبیر پاکستانی پوج زیکیں سُھب ءَ چہ ملیر جام گوٹ ءَ آوار جتگ ءُ بیگواہ کتگ-

دومی نیمگ ءَ چہ نوشکی ءَ آصف بلوچ ء عمر جان چار جنوری دوھزار بیست پنچ سُھب ءِ ساھت چار ءَ قاضی آباد، نوشکی ءَ آئی ءِ لوگ ءَ چہ پاکستانی پوج ءَ زورانسری بیگواہ کتگ-

بلوچستان ءِ دمگ کیچ ءِ ھند زامران ءَ پاکستانی پوج ءِ گاڑی ءِ سر ءَ بمب اُرشے ءِ نشانگ بیتگ-

اھوالانی رد ءَ زامران ءِ ھند ڈیل کک ءِ ھند ءَ پورسز ءِ گاڑی بمب ءِ نشانگ کنگ بیتگ-

دمگی مردمانی رد ءَ پورسز ءِ گاڑی تراک ءَ تباہ بیتگ، بلے جانی تاوانانی بارو ءَ دگہ اھوال سر نہ بیتگ انت-

واکدارانی نیمگ ءَ اے درگت ءَ دگہ اھوال دیم ءَ نیتکگ انت-

ھمے سال ءِ نوزدہ روچانی میان ءَ کیچ ءَ پاکستانی پوج ءِ سر ءَ پنچ جتا جتائیں بمب اُرش بیتگ اَنت کہ چریشانی توک ءَ تربت ءَ بی ایل اے مجید بریگیڈ ءِ نیمگ ءَ پاکستانی پوج ءِ کاروان ءِ سر ءَ فدائی اُرش ھوار اِنت گوستگیں روچاں کلات ءَ دو ءُ زھری ءَ دو بمب تراکانی زور ءَ بلوچ لبریشن آرمی ءَ پاکستانی پوج نشانگ کتگ ات-

سال ءِ بندات ءَ بلوچ لبریشن آرمی ءِ اُرشانی توک ءَ ترندی اتکگ، گوستگیں نوزدہ روچانی وھد ءَ بی ایل اے ءَ بیست ءُ سَے اُرش کتگ انت کہ چریشاں تربت ءَ مجید بریگیڈ ءِ نیمگ ءَ پوجی کاروان، زھری شھر ےَ بی ایل اے ءِ گچینی باسک فتح اسکواڈ ءُ اسپیشل ٹیکٹیکل آپریشن اسکواڈ ءِ نیمگ ءَ دَہ اداراں شھر ءِ دستیگ کنگ ھوار اَنت-

اسلام آباد ءَ تھنک ٹینک پاک انسٹی ٹیوٹ فار پیس اسٹڈیز ( پیس) ءَ گوستگیں سال ءَ وتی رپورٹ ءَ گوشتگ بلوچ لبریشن آرمی ( بی ایل اے) ءَ دسمبر ءَ دوازدہ اَرش کتگ انت کہ ایشانی توک ءَ چِل ءُ پنچ مردم مرتگ اَنت-

رپورٹ ءَ گوشگ بیتگ کہ بی ایل اے ءِ اُرشانی ءُ زور ءِ توک ءَ ترندی ءَ ٹولج ءِ آپریشنل گامگیج ءُ دیمروئی یک مزنیں رنگے ءَ گندگ بنت اِنت- اے جیڑھانی گیش ءُ گیواری ءَ پاکستانی ریاست ءَ وتی نیمگ ءَ راہ ءِ تچک ءَ روگ ءِ درکاری انت-

کیتھارینابلوم ءِ گاریں اِزت

گدار(ناول)

ندکار :ھائنرش بول

رجانکار: شاھد اھمد

ھشتمی بھر

دی بلوچستان پوسٹ

چار ءُ تپاس ءِ کاروائی ءَ یازدہ چہ دوازدہ ءُ نیم ساھت ءَ، یک ساھتے ءِ اوشت ءَ چہ پد، یک ءُ نیم ءَ چہ شش ءُ چِل ءُ پنچ ءَ داں پورا بوت۔ سُبارگ ءِ اوشت ءَ کیتھارینابلوم ءَ کاپی ءُ سینڈوچز ءِ زورگ انکار کُت۔ جنین اپسر پلینزر، موئڈنگ ءُ بائز مینے ءِ کمکار ءِ اوپارانی کوشست ءَ ابید ھم آئی ءِ رویہ بدل نہ بوت۔ انچوش کہ ھاش ءِ گْوشگ اَت پہ آئی ءَ مشکل ءُ گران اَت کہ آ زاتی ءُ سرکاری رویھانی پرک کنگ ءَ بہ کُت ئِے ءُ اے پھم کُت ئِے کہ اے چار ءُ تپاس چنکیاس ھَدّ ءَ تک زلوری اَت۔ اے وھد ءَ وھدے کہ بائز مینے کالر ءِ بٹن پچ کُت، ٹائی ءِ ڈکّ لھم کُت ئِے کاپی ءُ سینڈوچز ءِ دل لوٹگ ءَ اَت۔ آئی ءِ رویہ کیتھارینا ءِ نیمگ ءَ شک پیداک بوگ ءَ اَت۔ اے ساھت ءَ کیتھارینا دلتپرکہ بوگ ءَ اَت کہ آ آئی ءَ را سیل ءِ تہ ءَ بہ بَر اَنت۔ اے ھم ریکارڈ ءِ سر ءَ اَت کہ وھدے اے دوئیں اپسراں وھدے آئی ءِ چار ءُ دلگوش ءِ سر ءَ اِت اَنت آیاناں کاپی ءُ سینڈوچز پیش کنگ بوت گڑا آیاں نہ منّگ ءِ گون ءَ گوں وتی زوراں سر سُرینت۔ آ میانجی ءَ نِشت سگریٹ اِش کش اِت ءُ مونجا مونجائی ءَ وتی بزگیں دیم ءُ ھُشکیں پونز ءَ چہ ٹوائلیٹ ءِ گند ءَ گوں زوراں کوکّار ءَ اَت۔ رند ءَ جنین پولیس اپسر ءُ دو ورنائیں پولیس والاھانی نیمگ ءَ آئی ءَ موکل دات ئِے کہ آ آئی ءِ (نبض) ءَ چیک بکنت۔ وھدے کہ نارمل اَت۔ پد ءَ آ چہ مشکل آئی ءِ سر ءَ جاڑی بوت کہ آئی ءِ واستا یک کیک ءِ ٹُکّرے ءُ کاپی دیم پہ دیم دکان بیار اِیت، آئی ءَ منّ اِت آئی ءِ زر وت دات اَنت۔ اگرچہ یک پولیس اپسرے وھدے ھما وھد ءَ بلوم ءِ دلگوشی ءَ اَت کہ وھدے آ وتی اپارٹمنٹ ءَ جانشودی ءَ گُد ءُ پُچ ءِ مٹ کنگ ءَ اَت آئی ءِ سر ءَ پہ وشی جاڑی اَت کہ آئی ءِ ھاتر ءَ کمک بکنت۔ چہ آئی ءِ نہ منّگ ءَ پلینزر ءُ دوئیں پولیس والاھانی گمان اَت کہ بلوم ءِ لجّ ءَ ھچ اوں شرم نیست اِنت۔

گواہ ءِ زاتی زندگی ءِ جاورانی بیان یک ءُ نیم ساھت ءَ بگر داں پنچ ءُ چل ءُ پنچ ءَ ھلاس بوت۔ اگرچہ بائز مینے ءَ لوٹ اِتگ اَت کہ آئی ءِ بیان ءَ لُک بکنت بلے بلوم ءَ گْوشت کہ آ وتی ھر بیان ءِ درنگاز ءَ یک پہ یک ءِ لوٹ ءَ کنگ ءَ اَت۔ آئی ءِ سر ءَ دوئیں پبلک ءُ پراسیکوٹراں ھم تپاک کُت۔ چہ ھمے سبب ءَ بائز مینے ھم جاڑی بوت۔ بندات ءَ آئی ءَ مجبوری تہ ءَ اَت بلے رند ءَ آئی ءَ مار اِت کہ جیڑہ ءِ چار ءُ تپاس ءَ آئی ءِ زندگی ءِ آدینک سک ءَ ارزشتدار اَت۔

پنچ ءُ چل ءُ پنچ ءَ اے جُست پیداک بوت کہ چار ءُ تپاس جاڑی بہ بیت یا آئی ءَ بہ اوشتارین اِت؟ ءُ اے کہ زاناں بلوم آجو کنگ بہ بیت یا آئی ءَ را سیل ءِ تہ برگ بہ بیت؟ کساس بلوم را پنچ ساھت ءَ پہ آئی ءَ جاڑی کنگ بوتگ اَت کہ آ سینڈو چز بوارت۔ بائز مینے ءَ اے ھم سوگند کُتگ اَت کہ اگاں آ چار ءُ تپاس ءَ برْج ءَ دارگ جاڑی بہ بیت گڑا آ آجو کنائینگ بیت۔

دومی سرھال آئی ءِ ءُ مس وولٹرس ھائم ءِ سیادی ءِ بابت ءَ اَت۔ چہ آئی ءَ رژنائی ءِ تپاسگ آئی ءَ گُشت کہ آ آئی ءِ دینی مات اِنت ءُ آئی ءَ مدام آئی ءِ زات ءَ واھگ داشتگ اَت ئِے۔ سیادی ءِ ھساب ءَ آ آئی ءِ مات ءِ دوریں ناکو زھگ ءِ گوھار اِنت، ھمے واستا وھدے آ شھر ءَ اتک گڑا آئی ءَ آئی ءِ گون ءَ ھال ءُ اھوال اَت۔ کَیت پارٹی ءِ سوال گڑا ” ڈانس پارٹی ءَ من ءَ بیست پروری ءَ لوٹگ بوتگ اِت آں، بیست ءُ یک پروری ءَ کارنول ءِ بندات بوگ ءَ بوتگ اَت۔ رند ءَ تاریک چمیشکا دیم ءَ برگ بوت پرچا کہ مس وولٹرس ھائم ءَ را لھتے دزگٹی اتکگ اِت اَنت۔ چار سال ءَ اے اولی موہ اَت کہ من ناچ کُتگ اَت۔

انّا من وتی بیان ءَ کمو بدلی لوٹاں۔۔ من دو، سے، یا شاھد چار رند ءَ، بلورنا ءِ لوگ ءَ، وھدے کہ من پارٹی ءِ رد ءُ بند کُتگ اَت، گڑا ناچ کُتگ اَت۔ اے وڑ بوتگ اَت کہ وھدے من چہ سپائی ءَ دزھورک بوگ ءَ پد رزان مُشگ ءَ دزگٹ بوتگ اِت آں، یا وھدے مھمانانی واستا کاپی برگ ءَ بوتگ اِت آں، ءُ ڈاکٹر بلورنا ءَ بار ءِ زمہ واری وت زُرتگ اَت۔ گڑا ھمے موھاں آ من ءَ کمرہ ءِ توک ءَ لوٹائینتگ۔ من ڈاکٹر بلورنا ءُ دومی مھمانانی گون ءَ کہ چہ آیاں شھدربرجاہ ءِ پروپیسر، تاجر ءُ سائنسدان اِت اَنت، ناچ کُتگ اَت۔ بلے لھتے وھداں پد من ناچ کنگ ءَ گیشتر واھگدار نہ بوت آں، بلکیں رند ءَ گڑا من ناچ بلکل یل دات۔ سبب ایش اَت کہ مردین آدم سک باز ھَنوش اِت اَنت ھمے جاور ءَ منی نیمگ ءَ گیشتر دلگوش اِت اَنت ۔ ھمے واستا انچوش کہ منی گور ءَ گاڑی یے بوت گڑا من ناچ ءَ ھوار بوگ یل دات۔ ایشی ءَ چہ پیسر من ءَ کسے چہ شریپیں مردمے پکّار بوتگ اَت کہ من ءَ لوگ ءَ بہ رسین اِیت۔ کدی کدی من ھما ساھب ءِ گون ءَ ھم ناچ کُتگ اَت۔ چہ ایشی ءَ اے جُست نہ کُتگ اَت کہ زاناں ھاش ھم ناچ ءِ ساھت ءَ چہ آئی ءِ نیمگ ءَ گیش دلگوش بوتگ اَت؟