TBP Balochi

جمعیت علمائے اسلام ءِ راھشون ءُ گوستگیں سروزیر بلوچستان نواب اسلم خان رئیسانی ءَ چاگردی رسانکدر ایکس ءَ وتی یک درشانے ءِ تہ ءَ گْوشتگ کہ انشاءاللہ گوادر بلوچ راج ءِ ملکیت بیتگ، ءُ بیت، راجدوستی ءِ B class contractors گوادر ءِ سودا جنگ ءَ اد ءَ اود ءَ دلگوش اَنت-

آئی ءَ گْوشتگ کہ گوادر بلوچ راج ءِ مال ءُ ملکیت ، جائیداد، مڈی اِنت، اے راستی منّگی اِنت، گوادر ءَ سودا جنگ ءَ موکل ندے ایں-

پنجگور : چہ بلوچ راجی زْرمبشت ( بی این ایم ) پنجگور ھنکین ءِ نیمگ ءَ شمسر ویل ءِ یکمی سالروچ ءَ یاتگاری مراگشے برجم دارگ بیتگ، آئی ءِ تہ ءَ گل ءِ باسک ءُ دوزواھاں بھر زرتگ۔

اے دم ءُ درگت ءَ تْرانکاراں شمسر ویل یات کرتگ ءُ درائینتگ پاکستانی پوج بلوچ راج ءِ سر ءَ زوراکیانی بیر گوارگ ءَ اِنت۔ ھم روچ مردم زور بیگواہ کنگ ءُ کشگ بیگ ءَ اَنت۔18 جنوری 2024 ءَ پاکستانی لشکر ءِ ارش ءَ ماں شمسر ءَ عللی دوست ء محمود کہ ما آئی ءَ چیئرمین دوستا ءِ نام ءَ زان ایں گوں سرجمیں کھول ءَ شھید بیتگ۔آئی ءِ سئے ماھی چک چراگ، پنچ سالی بابر ، ھپت سالی جنک ھانی ءُ چیئرمین دوستا ءِ لوگ بانک شازیہ پاکستانی پوج ءِ اُرش ءَ شھید بیتگ اَنت۔ھمے اُرش ءَ بلوچ جھدکارانی دگہ کھولے ءِ چارکس نجمہ ، ماھکان ، ماہ زیب ءُ پرھاد ھم شھید بیتگ اَنت۔اے ویل بلوچ زْرمبشت ءِ تہ ءَ پاکستانی زوراکی ءُ بلوچ ءِ دیمونیانی شموشگ نہ بیوکیں درے ءِ بستار ءَ نبشتہ بیتگ کہ ما ایشی ءَ بھ نہ شموش ایں۔

بی این ایم ءِ بنجاھی اگدہ داراں گوں بھر زیروکاں تْران کنان ءَ گْوشتگ اے گْوستانک ءِ سری ویل اِنت کہ دشمن ءَ ارش کرتگ ءُ بلوچ راجدوستیں جھدکارے گوں آئی ءِ سرجمیں کھول ءَ کشتگ۔بلوچ پہ وتی آجوئی ءَ وتی کھولاں نْدر کنگ ءَ اَنت بلے چہ وتی جھد ءَ دستکش بیگ ءَ ساڑی نہ اَنت۔

آیاں گْوشتگ چیئرمین دوستا سرجمیں راجی جھدکارے اَت۔ پہ راجی زْرمبشت ءَ درسیں پھناتاں مدام پرکاریں کارستے ، کہ آئی ءَ گوں مڑاہ زند گوازینتگ ءُ گوں مڑاہ ءَ شھمیر بیتگ۔انچیں راجے جھدکارے اَت کہ بی این ایم ءِ باسک اَت بلے آئی ءَ دگہ گلانی باسکانی ھم مدام کمک کرتگ ءُ آیانی میان ءَ پیر ءُ ڈالچاری نہ کرتگ۔

آیاں گْوشتگ راجی شھمیرانی دیمونی پہ ما ھاٹیگ ءُ سکین اَنت۔ما بلوچ راج ءِ درسیں شھمیرانی دیمونیاں مدام یات کن ایں۔مارا اے مسام کنگی ایں کہ ما شھمیرانی سسا ءُ کردانی رندگیری ءَ وتی جھد ءَ برجاہ دار ایں۔دیمونی زْرمبشت ءَ مگیم ءُ آجوئی ءِ منزل نزیک تر کن اَنت۔

آیاں گْوشتگ بلوچ زْرمبشت دْرچے ءِ برورد اِنت۔ اگاں آگا ابدل کریم ءَ پاکستانی زورگری ءِ بگیری ءَ گھگیری بندات مہ کرتیں ، اے سنچ ءُ سما رودم دیگ مہ بوتیں گڑا مروچی مئے گْور ءَ لیکھی میرات ءُ گھگیری ءِ مارشت ھم نزور بیتگ اَت اَنت۔شھمیرانی دیمونی ءُ یکشلیں جھد ءِ برورد ءَ مروچی مئے زْرمبشت اد ءَ سر اِنت۔ بی این ایم بلوچستان ءِ آجوئی ءَ لوٹ ایت ءُ اے گپ گل ءِ راھبند ءُ مسام ءِ انچیں بھرے کہ کس مٹ کرت ئِے نہ کنت۔

اے مراگش ءَ گل ءِ بنجاھی اگدہ دار ءُ بنجاھی پتر ءِ باسکاں گپ جتگ ، مراگش ءِ پاگواجہ بی این ایم پنجگور ھنکین ءِ چار گزار اَت۔ مراگش ءَ لچہ گْوشی ھم بیتگ ءُ آشوبی گشندھاں پہ شھمیرانی ستا ءَ آشوبی سوت ھم گْوشتگ۔

بلوچستان ءِ دمگ پنجگور ءَ ناشناسیں سلاہ بندیں مردمانی تیرگواری ءَ چہ دو دری مردم بیران ءُ یکے ٹپی بیتگ-

تیرگواری ءِ وئیل پنجگور چتکان ھند سر ءَ بیتگ-

بیران بیتگیں مردمانی پجّار بلال ء محمد اقبال نام ءَ چہ بیتگ ءُ وھدے کہ ٹپی مردم ءِ پجّار انیل ء رانا بشیر کہ رحیم یار خان جھمنند گوشگ بیگ ءَ اِنت-

بلے وئیل سوب انگت زانگ نہ بیتگ-

بلوچ لبریشن آرمی ءِ جارکش جیئند بلوچ ءَ گوشتگ سرمچاراں ڈھاڈر ءُ تربت ءَ دو جتا جتائیں کاروائیاں پاکستانی پورسز ءِ چوکی ءِ دستیگ کنگ ءُ دشمنیں پوج ءِ یک گچینی کارندہ ءُ چاریگے کشتگ-

جارکش ءَ گوشتگ بی ایل اے ءِ سرمچاراں گوستگیں روچ ءَ کچھی ءِ ھند ڈھاڈر ءَ سبری ءَ پاکستان ءِ جھلی پورسز لیویز ءِ یک چوکی ءِ وتی دستیگ ءَ کتگ- سرمچاراں چوکی ءَ جاڑیگیں سَے کارندہ دزگیر کنگ ءَ پد سلاہ ءُ دگہ پوجی ساز ءُ سامان پچگپتگ انف – سرمچاراں لیویز کارندہ بلوچ بوگ ءِ سر ءَ سرپد کتگ ءُ یل داتگ انت-

جارکش ءَ گوشتگ یک دگہ کاروائی ءِ بلوچ لبریشن آرمی ءِ سرمچاراں گوستگیں روچ ءِ مگرب ءِ وھد ءَ تربت ءِ دمگ آپسر ءَ سلاہ بندین اُرش ءَ مھمد عارف ء مھمد عمر جھمنند پنجگور کشتگ-

مھمد عارف زورگرین پاکستانی پوج ءِ ملٹری انٹیلی جنس (ایم آئی) ءِ چیردستی ءَ کار ءَ بیتگ، آئی ءَ سال 2020 ءَ بلوچ راجی زرمبشت ءِ دو ھمدرد امیر بخش ءُ عمر جان جھمنند گچک شھید کنگ ءَ ھوار بیتگ ھمے وڑ 15 اگست 2020 ءَ گچک ءِ دمگ ءَ پوجی زوراکی ءَ زورگریں پوج ءِ رھشونی ءَ ھوار بیتگ، چرے وھد ءَ ڈیھ ءِ پھازگ ءَ بی ایل اے ءِ دو سرمچار آصف پنام ءِ فدا ءُ گلاب پنام ءِ وھید شھید بیتگ انت-

جارکش ءَ گوشتگ چاریگ عارف ءَ زرمبشت ءِ ھمدر ‘ دارو’ ءَ پوج ءِ دست ءَ گرائینگ ءَ ھوار بیتگ- کہ 2021 ءَ یک دروگیں میڑے ءَ سی ٹی ڈی ءَ شھید کتگ-

جارکش ءَ گوشتگ چاریگ ءَ گچک، گوارگو، رکشان ءَ کیچ ءِ دمگ آپسر ءَ وتگڑیں ڈیتھ اسکواڈ ءِ ھمراھی ءَ راہ بستگ ءُ لوگانی بیڑ برگ ءَ ھوار بیتگ – چاریگ مھمد عارف راجی گداری ءِ درچ ءَ سرمچاراں نشانگ کتگ ءُ گڈی آسر ءَ سر کتگ-

جیئند بلوچ ءَ گوشتگ بلوچ لبریشن آرمی اے دویں اُرشانی زمہ واری ءَ من ایت-

بیست ءُ پنچ جنوری ءَ دالبندین ءَ بلوچ نسل کشی ءِ یاتگاری روچ ءِ درگت ءَ برجم بیوکیں مُچی ءِ چن ءُ لانچانی درگت ءَ سرجمیں بلوچستان ءَ سرپدی مھم برجاہ انت- ھمے درچ ءَ بی وائی سی ءِ بنجاھی سروک ڈاکٹر ماہ رنگ بلوچ، ڈاکٹر صبیحہ ،سمی دین بلوچ، شاجی سبگت اللہ ءُ دگہ سروک کراچی ءَ ھوار سرجمیں بلوچستان ءِ بازیں جاھاں تر ءُ تاب ءَ انت-

بی وائی سی ءِ سروک ڈاکٹر ماہ رنگ ءَ پد ڈاکٹر صبیحہ ءُ سمی دین بلوچ ءِ نام ءَ ھم ارزی نبشتگ کنگ بیتگ –

ھاران ءُ نوکنڈی ءَ گوستگیں روچاں بلوچ یکجھتی کمیٹی ءِ نیمگ ءَ بلوچ نسل کشی ءِ ھلاپ ءَ سرپدی مھم برجم دارگ ءِ سر ءَ ڈاکٹر صبیحہ بلوچ ءُ دگہ مردمانی نام ءَ ارزی نبشتگ کنگ بیتگ انت کہ آیانی سر ءَ گداری ءِ درچ ھوار انت-

ھمے وڑ کراچی ملیر ءَ بیتگین روانک ءِ درگت ءَ سمی دین ءُ دگہ مردمانی نام ءَ ارزی نبشتگ کنگ بیتگ انت زانگ بہ بیت ایشی ءَ دو روچ پیش لیاری ءَ یکجھتی کمیٹی ءِ آگاھی مھم ءِ سر ءَ پولیس ءِ لٹ ءُ کٹ ءَ پد دزگیری بیتگ انت کہ ایشانی توک ءَ زالبول ھوار بیتگ انت پد ءَ زالبول یل دیگ بیتگ انت ءُ بلے بی وائی سی ءِ بنجاھی ڈپٹی آرگنائزر لالا وھاب ءُ دگہ بازین باسک انگت دزگیر انت

بلوچ اسٹوڈنٹس ایکشن کمیٹی ءِ سال بندات ءَ کتاب کاروان ءِ نام ءَ بلوچستان ءَ میڑھانی درچ یکشل ءَ برجاہ انت –

کتاب کاروان میڑہ بساک ءَ نوکیں سال بزانکہ دوھزار ءُ بیست ءُ پنچ ءِ بندات ءَ بندات کتگ انت ءُ اود ءَ بازیں جاھاں کتاب کاروان میڑہ برجاہ بیتگ انت-

گوستگیں روچ ءَ پنجگور تسپ، ھوشاپ، الندور بلیدہ ، دشت تولگی، سوراب، نوکنڈی، جھل مگسی ءُ وندر ءَ کتاب میڑہ برجاہ دارگ بیتگ انت-

مروچی گوادر ءَ ڈوریا اکیڈمی ءِ دیم ءَ برجم دارگ بیتگ ءُ گوستگیں روچ ءَ دی اویسس اسکول ءِ دیم ءَ برجم دارگ بیتگ –

بساک ءِ نیمگ ءَ شنگ بیتگیں تامر بنداں کتاب میڑھانی وھد ءَ سرکاری واکدارانی نیمگ ءَ بیھار ءُ ترسینگانی درچ برجاہ انت-

بساک ءِ گوشگ انت کہ کتاب کاروانانی دارگ ءُ گل ءِ کتاب میڑھانی باسکانی ترسینگ ءِ مول ءُ مراد ایش کہ بلوچاں اَچ وانگ ءُ زانگ ءَ دور کنگ انت ءُ سرکار ءُ آئی ءِ واکدار یکشل ءَ گل ءِ ھمراھاں ترسینگ ءَ انت-

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں مروچی کشمور ءَ ساھی دگ سر ءَ پاکستانی پولیس فورسز ءِ یک گاڑی یے سر ءَ ریموٹ کنٹرول آئی ای ڈی ءَ چہ نشانگ کتگ-

جارکش رِد ءَ تراک ءِ آسر ءَ پولیس ءِ دو کارمند مرتگ ءُ سے ٹپی بیتگ اَنت-

دوستین بلوچ ءَ گْوشتگ کہ مئے گل اے اُرش ءِ زمہ واری ءَ منّ اِیت- ءُ مئے اے وڑیں اُرش بلوچستان ءِ وتواجھی ءَ تاں برجاہ بنت-

کشمور ءَ ناشناسیں مردماں پولیس ءِ گاڑی بمب ءِ نشانگ کتگ-

پولیس ءِ گاڑی شاھی دگ ءَ نشانگ کنگ بیتگ-

اے اُرش ءَ دو کارندہ بیران ءُ سَے زدگ بیتگ انت-

وئیل ءِ زمہ واری تنی وھدی کس ءَ نہ زرتگ-

بلوچ لبریشن آرمی ءَ بلوچستان ءِ جتا جتائیں جاھاں پاکستانی پورسز ءِ سر ءَ بیتگیں جتا جتائیں اُرشانی تامربند آفیشل چینل ھکل ءَ شنگ کتگ انت-

تامر بنداں بلوچستان ءِ جتا جتائیں جاہ مستونگ، کیچ، کلات ءَ ھوار دگہ دگہ جاھاں پورسز آئی ای ڈی اُرش ءَ سنگر گپتگیں اُرشانی نشانگ ءَ گندگ بنت اِنت-

ھپت منٹ سِی سکینڈ ءَ ھواریں تامر بند ءِ بندات مستونگ ءِ دمگ اسپلنجی ءَ پاکستانی پوج ءِ کاروان ءِ سر ءَ یک آئی ای ڈی اُرشے بیت انت گندگ بیت انت کہ پیش ءَ پوج ءَ بمبے نشانگ کب انت پد ءَ سنگر گپتگیں سلاپ بند پاکستانی پوج ءِ سر ءَ دگہ سلاھاں گوں نشانگ کن انت-

ایشی ءَ پد کیچ ءِ دمگ دشت ءَ پاکستانی پورسز ءَ یک بمبے ءِ نشانگ کن انت ءُ نوشکی ءِ دمگ گلنگور ءَ پاکستانی پوج ءِ بنجل ءِ سر ءَ نوکتریں سلاھاں گوں نشانگ کن انت پد ءَ نوشکی ءِ کوھی دمگاں آپریشن ءَ دزبندین پوج ءَ نشانگ کنگ ءَ گندگ بنت اِنت-

ایشی ءَ پد تمپ میر آباد ءَ پاکستانی پوج ءِ بنجل ءَ اُرش ءِ نشانگ کن انت اود ءَ مِکین دامگی نزام ءَ نشانگ کنگ ءَ ھم گندگ بنت اِنت ھمے وھد ءَ بازیں تراک گندگ بنت اِنت-

زامران ءُ کلات ءَ ھم پاکستانی پوج ءِ سر ءَ بیتگیں اُرش ھم ھمے تامر ءِ بھر انت-

تامر ءِ سَے منٹ چِل سکینڈ ءَ سلاہ بندیں مردم ٹوھیں کچے ءَ کوھی دمگاں گندگ بنت اِنت – بی ایل اے ءِ رد ءَ اے جاہ کلات ءِ دمگ شاہ مردان انت کہ ایشی ءَ پد زوت شاہ مردان بنجل ءِ سر ءَ اُرش ءَ جتا جتائیں جاہ ءُ یک بھرے پوجیانی لاش زمین ءِ سر ءَ کپگ ءَ گندگ بنت اِنت-

اے تامر ءَ کیچ ءِ ھند گورکوپ ءَ پاکستانی پوج ءِ یک گاڑی یے بمب اُرش ءِ نشانگ کنگ ءَ گندگ بیت اِنف کہ سرجم ءَ تباہ بیت اِنت – گورکوپ اُرش ءَ پد دشت ءِ یک دگہ پوجی گاڑی یے بمب ءِ نشانگ کن انت چریشی ءَ گاڑی تباہ بیت اِنت اے اُرش عرب شیخ ءِ پھزداری ءَ کارندھانی سر ءَ کنگ بیت اِنت ءُ عرب شیخ ءِ گاڑی ھم گندگ بنت اِنت-

تامر ءِ گڈسر ءَ زامران ءَ یک پوجی گاڑی یت نشانگ کن انت کہ سرجم ءَ تباہ بیت انت-

بلوچستان ءَ سلاہ بندیں مردمانی نیمگ ءَ چہ پوج ءِ چوکیانی سر ءَ اُرش ءُ دستیگ کنگ دْرچ برجاہ ءَ اِنت، یکیں روچ ءَ ڈھاڈر ءُ تربت ءَ پولیس ءُ لیویز ءِ چوکیانی سر ءَ اُرش کتگ کارمند گپتگ ءُ سلاہ برتگ اَنت-

گیشیں ھالانی رِد ءَ بلوچستان ءِ دمگ کیچ ءِ تھسیل تربت ءَ تربت یونیورسٹی ءِ بُنجاھی گیٹ سر ءَ برجاھیں سیکیورٹی چوکی سر ءَ سلاہ بندیں مردماں اُرش کتگ، اُرش ءَ پولیس ءَ کارمند گپتگ ءُ شش سرکاری سلاہ، واکی ٹاکی سیٹ ءُ دگہ سامان برتگ اَنت-

اِھوالکار رِد ءَ سلاہ بندیں مردم پرپٹ ءَ سوار بیتگ ءُ کاروائی ءَ پد نزیکیں کوہ نیمگ ءَ شتگ اَنت-

زانگ بہ بیت کہ دو روچ ءَ ساری تربت ءِ دمگ سنگانی سر ءَ ھم یک پولیس چوکی ءِ سر ءَ اُرش کنگ بیتگ اَنت کہ اود ءَ چہ سرکاری سلاہ دگہ سامان دستیگ کتگ اَنت- اے اُرش زمہ واری بلوچستان لبریشن فرنٹ ( بی ایل ایف ) ءَ زرتگ اَت-

ھمے وڑ مروچی بلوچستان ءِ دمگ کچھی ءِ ھند ڈھاڈر ءَ سلاہ بندیں مردماں لیویز چوکی سر ءَ اُرش کتگ – اِھوالکار رِد ءَ ڈھاڈر ءِ دمگ صبری ءَ سلاہ بندیں مردماں لیویز کارمند گپتگ ءُ سلاہ دگہ سامان دستیگ کتگ اَنت، پد ءَ کارمند یل داتگ اَنت-

بلوچستان ءَ پوج ءِ چوکیانی سر ءَ پُشت ماں پُشت ءَ اُرش بیگ ءَ اِنت ، پولیس ءُ لیویز ءِ سلاھانی دستیگ کنگ وئیل جتاجتائیں دمگاں رپورٹ کنگ بیتگ اَنت-

ھمے ماہ ءِ بندات ءَ بلوچ لبریشن آرمی ( بی ایل اے ) ءَ ھُزدار ءِ دمگ زھری ءَ یک مزنیں کاروائی یے کتگ اَت لیویز تھانہ، نادرا کارگس، میونسپل کمیٹی ءُ دگہ سرکاری ماڑی مانداشتگ اَنت، وھدے کہ سرکاری سلاہ ءُ گاڑی ھم دستیگ کتگ اَنت-

بلوچستان ءَ سلاہ بندیں گلانی کاروائی اے وھد ءَ تُرند گندگ آیگ ءَ اِنت – تربت ، کیچ، ڈھاڈر ءُ دگہ دمگاں برجاہ ءَ اِنت- بلے مروچی تربت ءُ ڈھاڈر ءَ بیتگیں کاروائی ءِ زمہ واری انگت ھچ گل ءَ نہ زرتگ اَنت-