TBP Balochi

گْوستانکی ردی

ٹی بی پی شونگال

ھبدہ جنوری ءِ بیگاہ ءَ ھب چوکی ءَ بلوچ نسل کشی ءِ یاتگار ءِ روچ (25 جنوری) ءَ دالبندین ءَ برجم بیوکیں مُچی ءِ واستا بلوچ یکجھتی کمیٹی ءِ سرپدی مھم برجاہ ات – ھمے وھد ءَ بلوچ یکجھتی کمیٹی ءِ رھشون سمی دین بلوچ ءِ سر ءَ سلاہ بندیں اُرش ءِ جھد کنگ بیتگ ات، چریشی ءِ آسر ءَ دو شکی ئیں مردم دزگیر بیتگ ات اَنت- آیانی گور ءَ سِلاہ، پجار کارڈز ءُ پروپائلنگ ءِ واستا زھرشانی کنوکانی تامر ءَ اکس گندگ بیتگ انت- اے مردمانی سیادی پاکستانی چیریں ادارھاں چہ گوشگ بیتگ ات-

ایشی ءَ پیش گوادر ءَ بلوچ راجی مُچی ءِ وھد ءَ بلوچ یکجھتی کمیٹی ءِ بنجاھی سروک، ڈاکٹر ماہ رنگ بلوچ ءِ سر ءَ اُرش ءِ جھد بیتگ ات،چریشی ءَ ملٹری انٹیلیجنس ءِ یک کارندھے دزگیر کنگ بیتگ ات-

پاکستان ءِ مزنیں واکدار، بلوچ یکجھتی کمیٹی ءِ ریاستی زوراکی ءُ زورانسری بیگواھیانی ھلاس کنگ ءِ وڑیں جائزیں لوٹانی سرجم کنگ ءَ ابید، بلوچ رھشونانی سر ءَ یکشل ءَ ایپ آئی آر نبشتگ کنگ، پُر ایمنیں مُچیاں لٹ شاپ کنگ ءُ بلوچ زالبولانی دزگیر کنگ ءِ وڑیں کارپداں گچین کنگ ءَ انت- اے دراھیں گامگیج زُرمبشت ءِ ایرموش کنگ ءِ بے سوبیں جھد انت-

پاکستان ءِ پالیسی ساز یکشل ءَ گْوستانکی ردیاں روگ ءَ انت ءُ سرپد بنت اِنت بلوچ رھشونانی دزگیر کنگ یا آیاں تاوان دیگ ءَ بلوچ راجی زرمبشت ھلاس کنگ بیت اِنت – بلے راستی ایش اِنت کہ گوست ءَ نا بلوچ رھشونی کُشگ ءَ زرمبشت ایرموش بیتگ نہ انیگ اے دابیں کارپداں ھلاس کنگ بیت اِنت-

پاکستان ءِ پوجی زوراک جنرل پرویز مشرپ ءَ گوشتگ ات کہ بلوچاں ھمود ءَ جن آں آیاں ھچ سما نہ بیت اِنت- بلے بلوچستان ءَ پوجی زوراکی، زورانسری بیگواھی، کشت ءُ کوش ءُ ریاستی زُلماں ابید دو دھکاں چہ بلوچانی آجوئی ءِ جد ءُ جھد نا ایوک ءَ برجاہ انت بلکیں وھد پہ وھد ایشی ءَ گیش ترندی ءُ دیمروئی آیگ ءَ انت-

پاکستان ءِ مزنیں واکدار گْوستانکی ردیاں دربرگ ءَ ابید آیاں دوبر کنگ ءَ دزگٹ انت، ءُ اے رویش ریاست ءِ سیاہ شپ بنت ءُ دیم ءَ پدر بنت اِنت-

روکپتی بلوچستان ءِ دمگ ھیرمند ءَ ایرانی لشکر ءَ تیرگواری کنان ءَ یک مردمے کشتگ-

بیران بیتگیں مردم ءِ پجار آصف ساسولی ء حسین ءِ نام ءَ زانگ بیتگ ءُ آ ساسولی ھیرمند ءِ جھمنند اِنت-

تیرگواری ءِ وئیل غلام علج داد خدا ءَ پیش اتکگ کہ اود ءَ گاڑی ءِ سر ءَ ایرانی لشکر ءَ تیرگواری کرتگ-

اھوالانی رد ءَ آصف وتی گاڑی ءَ گوں روگ ءَ بیتگ کہ لشکر ءَ ابید ءِ دست دیگ ءَ آئی ءِ سر ءَ تیرگواری کرتگ ءُ چریشی ءَ چہ آ بیران بیتگ-

بلوچ یکجھتی کمیٹی ءِ راھشون سمی دین بلوچ ءَ چاگردی رسانکدر ایکس ءَ وتی شنگ کتگیں درشانے ءِ تہ ءَ گْوشتگ کہ مروچی بلوچ یکجھتی کمیٹی ءِ نیمگ ءَ چہ بیست پنچ جنوری ءَ دالبندین ءَ برجم دارگ بیؤکیں مچی ءِ سرپدی مھم ءِ درگت ءَ لیاری ءِ دمگ ھشت چوک ( آٹھ چوک) ءَ نیم روچ ءِ ساھت دو ءَ روانک کشگی بیتگ – بلے روانک ءِ بنداتی ءَ چہ ساری کراچی پولیس ءَ زھرشانی کنوکانی سر ءَ بیڑبرتگ ءُ لَٹ ءُ کُٹانی نشانگ کنان ءَ بازیں سنگتے آوار جتگ-

زھرشانی کنوکانی یل کنائینگ ھاتر ءَ زھرشانی کنگ سر ءَ پولیس ءَ زالبول ءُ چُکاں ھوار سرجمیں زھرشانی کنوکانی سر ءَ لَٹ ءُ کُٹ کتگ اَنت، چریشی ءَ چہ بازیں مردمے ٹپی بیتگ اَنت- سرجمیں مردین ءُ زالبول لَٹ ءُ کُٹانی نشانگ کنگ ءَ پد جتاجتائیں تھانھاں برتگ اَنت، آیانی تہ ءَ آمنہ بلوچ، فوزیہ بلوچ، لالا وھاب بلوچ ءَ ھوار کساس سی مردم ھوار اَنت-

سمی دین بلوچ ءَ گْوشتگ کہ من آں یک انچیں تھانھے تہ ءَ کتگ اِت کہ اود ءَ زالبولیں پولیس کارمند ساڑی نہ بیتگ- لَٹ ءُ کُٹ، بیھار ءُ تُرسنیگ ءَ پد پولیس ءَ راجی زور دیستگ ءُ مارا زالبول یل داتگ اَنت، بلے مردین سنگت انگت گار اَنت-

آئی ءَ گْوشتگ کہ سندھ ھکومت ءِ اے کاروائی شرمندگی اِنت- کراچی ءَ مئے پُرایمنیں زھرشانی سر ءَ ھر وھد ءَ زوراکی کنگ بیت، سنگتانی سر ءَ لَٹ کُٹ ءُ دزگیر کنگ بنت- سندھ ھکومت تچک بکنت کہ مئے پُرایمنیں زھرشانیاں چہ چی مسلہ اِنت؟

بلوچستان لبریشن پرنٹ ءِ جارکش میجر گْوھرام بلوچ ءَ وتی شنگ کتگیں درشان ءِ تہ ءَ تربت، زامران ءُ آواران ءَ پاکستانی پوج ءُ پولیس سے جتاجتائیں جاھاں اُرشانی نشانگ کتگ ءُ پولیس کارمندانی سلاہ دستیگ کتگ ءُ بند ساچی شرکت گاڑی ءُ پھازوکی کارمندانی سر ءَ بیتگیں اُرشانی زمہ واری منّ اِتگ اَنت-

جارکش ءَ گوشتگ کہ ھپدہ جنوری ءَ روچ ءِ ساھت دوازده ءَ بی ایل ایپ ءِ اسنائپر ٹیکٹیکل ٹیم ءَ زامران ءِ ھند چُر مبارکی کوه ءَ زورگریں پوج ءِ کارمندے نشانگ کرتگ ءُ کشتگ. چریشی ءَ پد دژمنیں پوج ءِ ￵ترّ ءُ ￶گرد چارتگ اَنت ءُ سرمچاراں گوں وتکاریں سلاہ چہ اُرش کرتگ چریشی ءِ آسر ءَ دژمن ءَ گیشتر جانی ءُ مالی تاوان دیمپانی کنگ کپتگ-

جارکش ءَ گْوشتگ دومی اُرش ءَ زامران ءِ ￵ھند پگنزان ءَ برجاھیں پاکستانی پوج ءِ چوکی ءِ سر ءَ گوں نوکین ءُ مزنیں سلاھاں اُرش کرتگ ءُ دو کارمند ٹپی بیتگ۔

جارکش ءَ گوشتگ کہ سیمی اُرش تربت، سنگانی سر ءَ برجاھیں پولیس ءِ چوکی ءِ ￵سر ءَ ￴کرتگ. سرمچاراں پولیس کارمندانی سلاه گپتگ اَنت ءُ چوکی مانداشتگ. پولیس کارمند بلوچ بوگ ءِ سوب ءَ کڈن کرتگ ءُ یل داتگ اَنت.

آئی ءَ گوشتگ کہ پاکستانی پوج ءَ کوھی دمگانی نشتگیں مردم پہ لَڈ ءُ ￶بار کنگ ءَ لاچار کرتگ اَنت۔ چیر جنگی جنگ ءِ ترند بوگ ءِ ￵سوب ءَ زورگریں پوج سسائی نادراہ کرتگ ءُ آ ھر بلوچ ءَ سرمچار سرپد بیت کہ آئی ءِ پروش ءِ نشان اِنت.

جارکش ءَ گوشتگ کہ پولیس ءَ ￴کڈن کن ایں کہ آ سرمچارانی رندگیری ءَ ￴مہ کنت اگاں نہ گڑا نشانگ کنگ بیت-

جارکش ءَ وتی شنگ کتگیں دگہ یک درشانے ءِ تہ ءَ گْوشتگ کہ مئے سرمچاراں آواران ءِ دمگ پیراندار ءَ ھژدہ جنوری ءِ بیگاہ ساھت سے نیم ءَ بند ساچی شرکت ءِ گاڑی تاوان داتگ ءُ وھدے کہ آیانی پھازوکی ءَ ساڑی ئیں کارمندانی سر ءَ ھم اُرش کتگ-

جارکش ءَ گْوشتگ کہ بند ساچی شرکت ءِ کارمند اے ھند سر ءَ دگ ءِ جوڑ کنگ ءَ دلگوش بیتگ اَنت کہ سرمچاراں اُرش کتگ اود ءَ ساڑی ئیں گاڑی تاوان داتگ اَنت وھدے کہ اد ءَ چہ کمے گستائی ءَ پاکستانی پوج ءِ چوکی سر ءَ ھم اُرش کتگ چریشی ءِ آسر ءَ آیاں جانی ءُ مالی تاوان چست کنگ کپتگ-

جارکش گوشتگ کہ بلوچستان لبریشن فرنٹ اے سرجمیں اُرشانی زمہ واری ءَ منّ اِیت ءُ آجو بلوچستان ءِ مول ءُ مراد ءَ تاں زورگریں پوج ءِ نشانگ کنگ ءِ اِھد کنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں زورگریں پاکستانی پوج ءُ چیریں ادارھانی جوڑکتگیں وتگڑیں ڈیتھ اسکواڈ ءِ سروک سراج جتوئی مرگ پرمان ءِ سر ءَ گامگیج زرتگ وھدے کہ تربت ءَ ایف ڈبلیو او ءِ گاڑی بمب تراک ءِ نشانگ کتگ-

جارکش ءَ گوشتگ بلوچ لبریشن آرمی ءِ سرمچاراں نُھ جنوری ءِ شپ ءَ ڈھاڈر ءَ یک کاروائی ءِ میان ءَ زورگریں پاکستانی پوج ءُ چیریں ادارھانی جوڑ کتگیں وتگڑیں ڈیتھ اسکواڈ ءِ اوتاک سر ءَ بیڑبرتگ ڈیتھ اسکواڈ ءِ سروک سراج جتوئی ء موسیٰ خان ھوار چار مردم ءَ دزگیر کتگ-

جارکش ءَ گوشتگ کہ جُست پُرس میان ءَ سراج جتوئی ءَ منّ اِتگ کہ آ دوھزار نوزدہ ءَ چہ زورگریں پاکستانی پوج ءِ چیردستی ءَ کار کنگ ءَ اِنت، آئی ءَ زورگریں پوج ءِ سروکی ءَ دمگ ءَ سلاہ بندیں ٹولی جوڑ کتگ کہ پوجی لشکر کشی ءَ ھوار لوگانی سر ءَ بیڑبرگ ءُ زورانسری آوار جنی ءَ زورگریں پوج ءِ کمکاری کتگ-

جارکش ءَ گْوشتگ کہ چاریگ سراج جتوئی ءَ منّ اِتگ کہ زورگریں پوج ءِ کرنل وقاص ءِ سروکی ءَ پد کرنل ضیاء ءُ پد ءَ برگیڈیئر عمر ءِ سروکی ءَ کار کتگ – آئی ءَ منّ اِتگ کہ بیست مردم آئی ءِ ڈیتھ اسکواڈ ءِ بھر اَنت- آئی ءَ منّ اِتگ کہ اے سلاہ بندیں ٹولی ڈھاڈر ءَ چہ بگر بی بی نانی ءَ تاں دُژمنیں پوج ءِ چیردستی ءَ کار کنگ بیتگ وھدے کہ ڈھاڈر ءَ ھوار کش گور ءِ دمگاں لشکر کشی ءَ تچکی ءَ ھمگرنچ بیتگ-

جارکش ءَ گوشتگ کہ چاریگ سراج جتوئی ءِ راجدروھی ءِ کنگ سر ءَ بلوچ راجی آمیدگس ءَ مرگ پرمان داتگ کہ آئی ءِ سر ءَ گوستگیں شپ ءَ بی ایل اے ءِ سرمچاراں گامگیج زرتگ ءُ آ کُشتگ وھدے کہ آ دگہ سئیں بے میار بیگ ءِ سر ءَ یل کتگ اَنت- چاریگ سراج ءَ جُست ءُ پُرس میان ءَ اے نیٹورک ءَ چہ ھمگرنچیں مردمانی نام ءُ سرپدی داتگ اَنت، اے مردماں زوت بی ایل اے ءِ سرمچار گُڈی آسر ءَ سر کن اَنت-

جارکش ءَ دیمتر ءَ گْوشتگ کہ بلوچ لبریشن آرمی ءِ سرمچاراں تربت ءِ دمگ کلاتک ءَ یک ریموٹ کنٹرول آئی ای ڈی اُرش ءَ پُلپانچیں شرکت فرنٹیئر کور ورکس ( ایف ڈبلیو او ) ءِ گاڑی تراک ءَ چہ نشانگ کتگ، تراک ءَ سے کارمند ٹپی بیتگ اَنت وھدے کہ گاڑی ءَ سک تاوان رس اِتگ-

جارکش ءَ گْوشتگ اے دوئیں اُرشانی زمہ داریاں بلوچ لبریشن آرمی منّ اِیت-

مروچی کراچی ءَ بیست پنچ جنوری ءَ بلوچ چُکچینی ءِ یاتگاری روچ ءِ درگت ءَ چہ دالبندین ءَ بیؤکیں مچی ءِ سرپدی مراگشانی دْرچ لیاری ءَ سرپدی مھم سر ءَ زوراکی ءُ لَٹ ءُ کُٹ کنگ ءَ پد دزگیر بیتگیں سمی دین بلوچ یل کنگ بیتگ-

بلے بلوچ یکجھتی کمیٹی ءِ ڈپٹی آرگنائزر لالا وھاب بلوچ، آمنہ بلوچ ءُ دگہ دزگیر بیتگیں کارکنانی درگت ءَ ھچ وڑیں ھال نیتکگ-

بلوچ یکجھتی کمیٹی ءِ سروک ڈاکٹر ماہ رنگ بلوچ ءَ گْوشتگ کہ ریاست پاکستان یک پُرایمنیں زھرشانی ءَ ایرموش کنگ ءَ زرورت ءَ چہ گیش تاکت کارمرز کتگ یکرندے پد ءَ وتی زوراکی درشان کتگ – اے زوراکیں ریاستی زوراکی ءِ یک رُژنا ایں مسالے چریشی ءِ مول ءُ مراد انساپ ءُ انسانی ھکانی ءِ درگت ءَ توار چست کنوکیں تواراں بے توار کنگ اِنت-

آئی ءَ گْوشتگ کہ بلوچ چُکچینی ءِ یات ءَ بیست پنچ جنوری ءَ دالبندین ءَ راجی مُچی ءِ درگت ءَ سرپدی مراگشانی یک بھرے ءِ دروشم ءَ ،لیاری، کراچی ءَ نیم روچ ساھت دو ءَ یک روانکے کشگ بیتگ، بلے روانک ءِ بندات بیگ ءَ چہ ساری، کراچی پولیس ءَ زھرشانی کنوکانی سر ءَ زوراکی کتگ – ھمے میان ءَ زھرشانی کنوکانی سر ءَ لَٹ ءُ کُٹ ھم کتگ-

آئی ءَ گْوشتگ کہ بی وائی سی ءِ راھشون سمی دین بلوچ، لالہ وھاب بلوچ گوں دگہ کارکنانی ھمراھی ءَ دزگیر کتگ اَنت- ھمے وڑ دمگ سرجمی ءَ انگیر ءَ کتگ، اود ءِ سر بیگ مھتل کنائینتگ-

آئی ءَ گْوشتگ کہ پُرایمنیں زھرشانی ءِ ھلاپ ءَ تاکت ءِ اے کارمز ھکیں تواراں ایرموش ءُ جمھوری ھکانی ٹپ کنگ ھاتر ءَ ریاست ءِ برجاھیں مھم ءِ پیشدار اِیت- آئی ءِ زوراکیں گامگیجاں اَبید انساپ ءُ انسانی ھکانی ءِ درگت ءَ توار کنوکیں مردم مھکم اَنت-

مروچی کراچی پولیس ءَ بیست ءُ پنچ جنوری ءَ بلوچ نسل کشی ءِ یاتگار ءِ روچ ءِ درگت ءَ دالبندین ءَ بیوکیں مُچی ءِ سرپدی دیگ ءِ درچ ءَ لیاری ءَ دو بج ءِ وھد ءَ یک روانکے روگی بیتگ-

روانک ءَ پیش کراچی پولیس ءَ بیڑ برتگ ءُ زھرشانی کنوک گپتگ انت-

ھمے وھد ءَ بلوچ یکجھتی کمیٹی ءِ ڈپٹی آرگنائزر لالا وھاب ءُ دگہ باسک دزگیر کتگ انت- ایشی ءَ ابید سرجمیں انگیر کتگ انت زھرشانی ءِ وھد ءَ لٹ ءُ کُٹ کنگ بیتگ ءُ ھمے وھد ءَ سمی دین، فوزیہ بلوچ ،آمنہ بلوچ ءُ دگہ بازیں باسک دزگیر کنگ ءُ بغداری تھانہ ءَ برگ بیتگ انت-

کیچ ءَ پولیس ءُ پوج ءِ سر ءَ سَے جتا جتائیں جاھاں سلاہ بندیں مردماں اُرش کتگ ءُ پولیس ءِ سلاہ پچ گپتگ ءُ برتگ انت-

تربت ءَ سلاہ بندیں مردماں پولیس ءِ چوکی ءِ سر ءَ اُرش کنگ بیتگ ےُ سلاہ ءُ سامان برگ بیتگ انت-

اھوالانی رد ءَ تربت ءَ کوھنیں چونگی ءَ پولیس ءِ ناکہ نمبر پانزدہ ءَ سلاہ بندین مردماں پولیس ءِ کارندہ گپتگ ءُ سرکاری سلاہ پچگپتگ انت ءُ واکی ٹاکی سیٹ ءُ دگہ سرکاری ساز ءُ سامان برتگ انت-

سرکاری بنشون ءِ رد ءَ سلاہ بندیں مردم پرپٹاں سوار بیتگ انت ءُ کاروائی کنگ ءَ پد جنگل ءِ نیمگ ءَ پشت اش مانداتگ ءُ شتگ انت-

دومی نیمگ ءَ زامران ءَ گوستگیں روچ ءِ دوازدہ ءُ بیگاہ ءِ وھد ءَ سلاہ بندیں مردماں پورسز نشانگ کتگ-

بنداتی اُرش زامران چر مبارک ءِ ھند ءَ کنگ بیتگ ءُ دومی اُرش پگنزان ءِ ھند ءَ پورسز ءِ چوکی نشانگ کنگ بیتگ-

مروچی کراچی ءَ بیست ءُ پنچ جنوری ءَ بلوچ نسل کشی ءِ یات کنگ ءِ روچ ءِ درگت ءَ دالبندین ءَ بیوکیں راجی مُچی ءِ ھاتر ءَ سرپدی دیگ ءَ لیاری ءَ نیمروچ ءِ ساھت دو ءَ یک روانکے کشگی بیتگ –

مُچی ءِ یکجاہ بوگ ءَ پیش کراچی پولیس ءَ بیڑ برتگ ءُ زھرشانی کنوکانی سر ءَ لٹ شاپی کتگ ءُ ھمے وھد ءَ بلوچ یکجھتی کمیٹی ءِ ڈپٹی آرگنائزر لالا وھاب بلوچ ءُ دگہ ھمراھانی ھواری ءَ دزگیر کنگ بیتگ ءُ دمگ سرجم ءَ انگیر ءَ کنگ بیتگ-