TBP Balochi

مروچی کراچی ءَ بیست ءُ پنچ جنوری ءَ بلوچ نسل کشی ءِ یات کنگ ءِ روچ ءِ درگت ءَ دالبندین ءَ بیوکیں راجی مُچی ءِ ھاتر ءَ سرپدی دیگ ءَ لیاری ءَ نیمروچ ءِ ساھت دو ءَ یک روانکے کشگی بیتگ –

مُچی ءِ یکجاہ بوگ ءَ پیش کراچی پولیس ءَ بیڑ برتگ ءُ زھرشانی کنوکانی سر ءَ لٹ شاپی کتگ ءُ ھمے وھد ءَ بلوچ یکجھتی کمیٹی ءِ ڈپٹی آرگنائزر لالا وھاب بلوچ ءُ دگہ ھمراھانی ھواری ءَ دزگیر کنگ بیتگ ءُ دمگ سرجم ءَ انگیر ءَ کنگ بیتگ-

ھب چوکی ءَ بلوچ یکجھتی کمیٹی ءِ نیمگ ءَ بیست ءُ پنچ جنوری ءَ دالبندین ءَ بیوکیں مُچی ءِ درگت ءَ سرپدی روانک ءَ شَکی ئیں مردم ءِ جاڑیگ بوگ ءِ گمان کنگ بیتگ-

ھب چوکی ءَ روانک ءِ وھد ءَ زھرشانی کنوکاں شکی ئیں مردمے داشتگ، آیانی گوشگ انت کہ دارگ ءِ وھد ءَ آئی ءَ سلاہ کش اتگ ءُ بیھار دیگ ءِ جھد کتگ پد ءَ دگہ دو مردم دارگ بیتگ انت، پٹ ءُ پول ءِ وھد ءَ زھرشانی کنوکانی اکس ءُ ویڈیوز گندگ بیتگ انت-

بلوچ یکجھتی کمیٹی ءِ آرگنائزر سمی دین بلوچ ءَ وئیل ءِ بارو ءَ گپ کنان ءَ گوشتگ ھب چوکی ءَ مئے سرپدی روانک ءِ وھد ءَ یک شکی ئیں مردمے داشتگ کہ آئی ءِ گور ءَ سلاہ ءُ دگہ دو مردمانی موبائلاں زھرشانی کنوکانی اکس ءُ ویڈیو بیتگ انت-

آئی ءَ گوشتگ اے وئیل ءِ ھال واکداراں سر کتگ بلے ھچ وڑیں کمک کنگ نہ بیتگ – اے جاورھال مئے پھریزگ ءِ سنگینیں جست ودی کن اَنت-

زانگ بہ بیت بلوچ یکجھتی کمیٹی ءِ روانک ءُ زھرشانی وھداں چیریں ادارہ ءُ ریاستی ادارھانی چیردستی ءَ چلوکیں ڈیتھ اسکواڈ ءِ نیمگ ءَ چارگی ءُ وئیل نوکیں گپ نہ اَنت-

ایشی ءَ پیش ءِ سال ءَ گوادر ءَ بلوچ یکجھتی کمیٹی ءِ راجی مُچی ءِ روانک ءِ وھد ءَ دو شکی ئیں مردم دارگ بیتگ ات اَنت کہ آیاں چیریں ادارھاں گوں ھمگرنچ بوگ ءُ زھرشانی کنوکاں تاوان دیگ ءِ گپ من اتگ ات-

ھمے وڑ شال ءَ ھم زھرشانی ءِ وھد ءَ لس پوشاکی گداں ایف سی ءِ کارندہ دارگ بیتگ ات ءُ زھرشانی ءَ ھوار بوگ ءِ جھد ءَ بیتگ ات-

بلوچ یکجھتی کمیٹی ءَ راجی ءُ میان اُستمانی ھکانی ادارھاں گوں دزبندی کتگ کہ آ زھرشانی کنوکانی پھریزگ ءَ سدکی بہ کنت ءُ اے وئیلانی تچکیں پٹ ءُ پول ءَ بہ کنت اِنت-

زھرشانی کنوکانی گوشگ انت کہ اے دابیں گامگیج مئے برانز ءَ نیزور کت نہ کن اَنت ءُ ما وتی جد ءُ جھد ءَ برجاہ داریں-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مروچی نیم روچ وھد ءَ مئے سرمچاراں کلات شھر نزیک ءَ زورگریں پاکستانی پوج یک ریموٹ کنٹرول آئی ای ڈی اُرش ءَ نشانگ کتگ-

جارکش ءَ گْوشتگ کہ مئے سرمچاراں دُژمنیں پوج ھما وھد ءَ تراک ءِ نشانگ کتگ، وھدے آ چہ شال ءَ ریڈار ءِ ڈیوائسز ءَ برگ ءَ بیتگ اَنت، تراک ءَ یک دُژمنیں کارمندے یے مرتگ ءُ سے کارمند نائک نبیل، نائک تنظیم ءُ لانس نائک وکیل ٹپی بیتگ اَنت وھدے گاڑی ءَ سک تاوان رس اِتگ-

جارکش ءَ گوشتگ بلوچ لبریشن آرمی اے اُرش زمہ واری ءَ منّ اِیت-

بلوچ یکجھتی کمیٹی ءِ چیردستی ءَ بیست ءُ پنچ جنوری ءَ ڈالبندین ءَ بلوچ چکچینی ءِ یاتگاری روچ ءِ درگت ءَ چن ءُ لانچ برجاہ انت –

زیکیں روچ ءَ بلوچ یکجھتی کمیٹی ءِ رھشون ڈاکٹر صبیحہ بلوچ ماں چاگی ءَ تر ءُ تاب ءَ سربوتگ کہ چارسر ءُ چہتر ءِ مھلوک ءَ جوانیں وڈے ءَ وش اتک کتگ ءُ ھار گور ءَ داتگ –

ماں چہتر ءَ وش آتکی ءُ چارسر مچی ءَ تران کنان ءَ ڈاکٹر صبیحہ بلوچ ءَ گوشتگ کہ مروچی بلوچانی ھمے یکجاہ ءُ یکمشتی ءَ سرکار پریشان کتگ – مارا ناں توپک دست ءُ ناکہ دگہ چیزے بلے مئے یکمشتی ءَ ترس آماچ آیں – آئی ءَ گوشتگ کہ ھاکماں چہ بلوچستان ءُ بلوچ راج ءَ گوں ھچ وڈیں ھمدردی نیست بلکنہ آئی ءَ گوں مئے مال ءُ مڈیانی لٹ ءُ پُل ءَ مھر انت – مروچی مئے یکجاہ بوگ ءِ وھد ایں، دژمن ءَ مئے یکجاہ بوگ الم وش نہ بیت بلے مارا بیست ءُ پنچ جنوری ءَ وتی گِساں در آیگی ءُ ماں ڈالبندین ءَ بؤکیں مُچی ءَ یک تاکتے ءِ گوم ءَ بھر زورگی انت ءُ اے باور کنائینگی ایں کہ بلوچ راج ءَ جھان ءِ ھچ وڈیں تاکت یکجاہ بوگ ءَ داشت نہ کنت – مزنیں کچے ءَ زھگ ءُ زالبول زیکیں مُچی ءَ ساڑی بوتگ انت –

دومی نیمگ ءَ زیکیں روچ ءَ بلوچ یکجھتی کمیٹی لسبیلہ ءِ نیمگ ءَ سرپدی دیگے اولی روانک ءُ انفارمیشنل ڈیسک ھب بلوچستان ءَ برجاہ دارگ بوتگ – کہ اودا سمی دین، ماہ زیب بلوچ ءُ سیما بلوچ ءَ تران کنان ءَ چہ لس مھلوک ءَ لوٹ کتگ کہ بیست ءُ پنچ جنوری ءِ راجی مچی ءَ بھر بہ زور ایت ءُ وتی کرد ءَ پیلو بہ کن ایت –

بی وائی سی ءِ رِد ءَ ھمے وھد ءَ ریاست ءِ نیمگ ءَ سلاہ بندیں مردمے دیم دیگ بوتگ کہ آ دزگیر کنگ بوتگ – ریاست ءِ نیمگ ءَ دیم دیگ بوتگیں کارمند مئے رپورٹنگ ءَ کنگ ءَ بوتگ کہ آئی ءَ گور ءَ پسٹِل ءِ گوں تیراں دستیگ کتگ –

اے مردمے گور ءَ سرجمیں پلان ءِ بوتگ کہ ھر وڈا آئی ءَ موہ رس ایت آ تیرگواری بہ کنت بلے سنگت ءَ آ ھما دمان دزگیر کتگ –

بی وائی سی ءِ رِد ءَ راجی مُچی ءِ ھاتر ءَ راج ءِ سلامتی ءِ ھاتر ءَ اے وھد ءَ بازیں جاھاں سرپدی دیگ ءِ درچ برجاہ انت ءُ ما ریاست ءَ سرپد کنگ لوٹ ایں کہ آ چہ اے وڈیں ناشرکاریاں وت ءَ بہ دار ایت ءُ ھوش ءَ سر ءَ بہ کنت – ھمے وڈ ما ھما درسیں مردماں ھم گوشگ لوٹ ایں کہ بس پہ کلدار ءِ ھاتر ءَ وت ءَ بھائے کتگ ءُ اے وڈیں ناشریاں ھوار انت –

ترانکارانی گوشگ ات کہ مئے گوم ءَ ھمکوپگ ءُ بوگ ءُ اوشتگ مئے راجی مُچی ءَ پدر کنت – اے درگت ءَ ما بازیں جاھاں سرپدی دیگ ءَ ایں ءُ ھمے درگت ءَ باندا 18 جنوری ءَ میراں ناکہ لیاری ءَ یک روانک ءِ کشگ بیت ءُ انفارمیشنل ڈیسک ءِ برجم کنگ بیت انت –

بلوچ یکجھتی کمیٹی ءِ رھشون ڈاکٹر ماہ رنگ بلوچ ءَ وتی درشان ءَ گوشتگ من دراھیں بلوچ راج، گچینی بلوچ عالم دیناں گوں دزبندی کن آں کہ بلوچ نسل کشی ءِ ھلاپ ءَ 25 جنوری ءَ دالبندین راجی مُچی ءَ بھر بہ زور اَنت-

آئی ءَ گوشتگ اسلام ءِ بنکی ءُ راستی زانشت ھمیش انت کہ زُلم، زوراکی، لس مھلوک ءُ زُلمانی ھلاپ ءَ زیردستانی ھمراھداری ءُ زُلم ءُ زورگری ءِ ھلاسی ءَ جد ءُ جھد ءِ بھر بہ زیر اِت-

آئی ءَ گوشتگ مروچی مئے جنگ یزیدیت ءُ پراونیت ءِ ھلاپ ءَ انت، مروچی مئے جنگ زُلم ءُ زوراکیانی ھلاپ انت، مروچی مئے جنگ نا انساپی ءُ زلمانی ھلاپ انت – اے جنگ ھمک بلوچ ءِ واستا انت- لوٹ انت ھمک پھناتانی مردمانی سنچ ءَ بیت اِنت-

ڈاکٹر ماہ رنگ بلوچ ءَ گوشتگ مروچی راجی گلامی اے دور ءَ ھمک بلوچ ءِ درد یک اِنت – ھمے یکجاھیں درد ءُ سما ءِ تک ءَ ھرچ پُر ایمنیں جد ءُ جھدے ما کنگ ءَ ایں، آ بلوچ ءُ مردم گیری ءِ پجار ءِ واستا انت – اے جد ءُ جھد ءَ ھوار بوگ ھمک بلوچ ءِ پرز انت-

بلوچستان ءِ دمگ چہ کیچ ءَ پاکستانی پوج ءِ دست ءَ دو کسان سالیں زھگ دزگیر کنگ ءَ پد بیگواہ-

گیشیں اھوالانی رد ءَ گوستگیں شپ ءَ پاکستانی پوج ءَ کیچ ءِ ھند گومازی ءَ دو کسان سالیں زھگ دزگیر کنگ ءَ پد بیگواہ کنگ بیتگ اَنت-

ھردوکانی پجار یوسف ء قاسم ءُ شاھو ء حبیب ءِ ناماں زانگ بیتگ اَنت-

ایشانی توک ءَ یوسف پد ءَ یل دیگ بیتگ ءُ قاسم داں انگت ءَ پاکستانی پوج ءِ بندیگی ءَ اَنت-

بلوچ یکجھتی کمیٹی ءَ بیست ءُ پنچ جنوری ءَ ماں دالبندین ءَ راجی مُچی ءِ درگت ءَ وتی پنتاک شنگ کتگ ءُ گوشتگ پُرگنجیں ڈیھ ءِ واھنداں : ما (بلوچ راج)چہ ھزاریں سالاں کوھن ءُ کدیم ءَ اے ڈیھ(بلوچ سرزمین) ءِ واھند اِنت۔ مئے راجی پدریچانی پدریچ ھمے ڈیھ ءِ ھاک ءِ دلبند ءَ کل اِنت ءُ اے ڈیھ ءِ ھمک شے، آثارمئے راج ءِ گوستانک ءُ ھستانک ءِ شاھدیءَ دینت۔بلے چہ گوستگیں بازیں دھکاں درآمدیں اِستان ءُ تاکت مئے جند ءِ ڈیھ ءِ سر ءَ مئے راجی پجار ءُ ھستانک(وجود) ءَ ولگوج کنگ ءِ جھد ءَ اَنت۔ مئے مردم یک یک ءَ زورانسری آوار جنگ ءُ کُشگ بوگ ءَ اَنت، مئے چار دیوالی ءُ گِسانی بلوچ مڈاہ ءُ گیرت پامال کنگ بوگ ءَ انت، مئے ربیدگ ءُ دودمان بے شرپ کنگ بوگ ءَ اَنت، بلوچ ننگ ءُ ناموس لگتمال کنگ بوگ ءَ اِنت، مئے ڈیھءِ ھمک ابرمی گواجن (معدنیات) لٹ ءُ پل کنگ بوگ ءَ انت۔ ءُ 21 کرن ءَ ھم ما چہ زندمان ءِ بُنکی زلورت چوشکہ ساپیں آپ، وردن ءُ وراک، وانگجاہ، نادراھجاہ ءُ جانسلامتی ءِ لوٹاں زبھر کنگ بوتگ اِنت۔ کار ءُ روزگار بزانکہ پہ پوریاگری، ماھیگری، دہکان کاری ءُ ایدگہ کلیں روزگار کہ وتی جند ءِ کمک ءَ کنگ بنت پہ بلوچءَ ایشانی کنگ گران کنگ بوتگ۔ پمیشکا بلوچ نا پہ آسودگی ءَ کار ءُ روزگارے کت کنگ ءَ اِنت، ءُ نئیکہ پہ سیاد ءُ وارسی ءَ شت کنگ ءَ انت، وتی جند ڈیھ ءُ پت ءُ پیرکی ڈگار ءَ وتی روچانی گوازینگ پہ بلوچ ءَ باز گران بوتگ۔ بلوچ وتی آتراپ ءَ ھرکجا کہ گام جنت تاں آئی ءَ جست گرگ بیت کہ کئے ئے؟ وتی پجار ءَ بہ کن؟ چہ کجا پیداک ئے ءُ کجا روگ ءَ ئے؟ اے سرجمیں راجی ھاسیں جیڑہ ءَ ابید اوں بلوچ ءَ را پہ وتی بزگی ءَ توارچست کنگ ءِ موہ اوں نیست انت۔ پمیشکا یک مزنیں کساسے ءَ بلوچ مھلوک بے تواری ءِ مَرگ ءَ مِرگ ءَ انت۔ ءُ اے سرجمیں استانی پالیسی بلوچ چکچینی ءِ ساز اِتگیں پندلے ءِ بھر اَنت کہ چہ گوستگیں بازیں دھکاں گوں ترندی ءَ برجاہ اَنت۔

شرپمندیں بلوچ راج : مرچی اے دنیا ءَ زندگ بوگ یاکہ زند گوازینگ ءِ بنکی لیکہ گوں “تاکت” ءَ ھمگرنچ اِنت۔ یک سرجمیں باریگے ءِ گوزگ ءَ پد مرچی دنیا اے جاہ ءَ سر انت کہ پہ زندگ بوگ ءَ “تاکتے” بوگ المی اِنت۔ اے تاکت ءِ پجار جتائیں شکلانی تہ ءَ انت: چوشکہ راجی ءُ مھلوکی تاکت، ملکی ءُ استانی تاکت، زورآوری ءُ زوراکی ءِ تاکتاں ھوار تاکت جتائیں شکلانی تہ ءَ بھر بھر ءَ مارا گندگ ءَ کیت اِنت۔ بلے پہ ھمک ءَ تاکت ءِ بوگ یک اژدری ئیں شے یے جوڑ بوتگ۔ چوشکہ بلوچ ایردست اِنت گڑا بلوچ ءِ گور ءَ تاکت ءِ چہ درستاں مستریں شکل “راجی ءُ مھلوکی تاکت” زانگ بیت۔ بزانکہ بلوچ ءِ گور ءَ پہ زندگ بوگ ءَ یک تاکتے ءِ لوٹ کہ المی انت آ ھمیش اِنت۔ اے ایردستی ءِ باریگ ءَ بلوچ ءِ گور ءَ ھمیش تاکت ءِ شکل ءَ ابید پہ زندگ بوگ ءَ دگہ ھچ ڈولیں راہ ءُ درے نیست اِنت۔ پمیشکا پہ راجی تاکت ءِ زندگ دارگ ءَ “راجی مارشت ءُ سما” ءِ زندگ دارگ المی اِنت۔بزانکہ وتی تاکت ءِ شکل ءُ ارزشت ءَ ھوار ایدگہ زورآوریں تاکتانی شکل ءُ وتی ڈیھ ءَ آھانی پائیدگ ءُ کسان مزنیں کلیں سر پُراں چہ باسما بوگ المی اِنت۔

چوشکہ بلوچ ڈیھ جھان ءِ ھما یک ءُ تھنائیں ڈیھاں چہ یکے کہ آئی ءِ میان ءَ ابرمی ھرچ ڈولیں گواجن (معدن) یک مزن ءُ پُرزوریں شکلے ءَ ھست اِنت۔ چوشکہ ایدگہ دنیا ءِ گیشتریں تاکتانی ابرمی بنجاہ چہ یکے ءَ گیش نہ اِنت، کہ آ ھمائی ءِ بنیاد ءَ آ وتی معاشی گزران ءَ کن اَنت۔ بلے چہ گرمیں آپ ءُ نیلمبومیں زر ءَ بگر دانکہ کوئلہ ، گیس ءُ تانبا ءَ دربیا بلوچ ڈیھ ءَ ھچ شے ءِ کمی نہ اِنت۔ چہ ھمیش ابرمی پُرچکاریں مال ءُ مڈی ءُ زمینی ھد ءُ بند ءُ سیمسر ءِ سبب ءَ دنیا ءِ جتائیں تاکتانی دیم ھمد ءَ بلوچ ڈیھ ءَ سک اَنت۔ چوشکہ بلوچ ڈیھ مرچی جتائیں تاکتانی دست ءَ بھر کنگ بوتگ، ءُ جتائیں تاکت جتائیں دمگاں وتی پائیدگانی بنیاد ءَ لیڈ کنگ ءَ اَنت۔ “ایردست کنگ، ءُ لٹ ءُ پل کنگ ءُ وتی تاکت ءَ را مستریں شکلے دیگ” مرچی ئیں دنیا ءِ ھاسیں لوٹ جوڑ بوتگ۔ زورآوری ءِ ھمیش لیکہ ءِ بنیاد ءَ بلوچ ایردستی ءِ زند ءِ آماچ کنگ بوتگ۔ ھاسکار چہ گوستگیں ھپتاد سالاں بلوچ یک سرجمیں زوراکی ءِ یکشل ءَ دیمپان اِنت۔ یک نیمگے بلوچ ءِ مال ءُ مڈیانی سودا جنگ بوگ ءَ اِنت ءُ دومی نیمگ ءَ بلوچ ءِ راجی چکچینی برجاہ اِنت، کہ آئی ءِ تہ ءَ “کشگ ءُ چگل دیگ”ءِ پالیسی، ھزاراں بلوچ پرزندانی زورانسری چست کنگ ءُ پد ءَ ناشناسیں بندیگ جاھاں بند کنگ، مردمانی نشانگ کنگ ءُ آھانی سر ءَ تیرگواری کنگ ءُ کشگ، زانگولیں جونانی دزکپگ، دروگیں میڑ ءِ نوکیں پالیسی کہ دہ/ دہ، بیست/بیست ءَ بلوچ پرزنداں چست کنگ ءُ دروگیں میڑ ءِ نام ءَ آیاں کشگ ءُ چگل دیگ، یاکہ بازیں آوارجتگیں مردمانی جنگ ءُ آھانی جنگ ءَ پد بے پجار ءَ کل ءُ کسارت کنگ، ھزاراں میتگ ءُ ھلک ءُ بازاراں بلڈوز کنگ ءُ آھانی مردماں پہ لڈ ءُ بارءَ لاچار کنگ ءَ ھوار دگہ بازیں پندلانی بُنیات ءَ بلوچ ءِ ھونریزی کنگ،چوشکہ مزن شاھراھانی ھمک ماہی تورناکیں ویل کہ کھولانی کھول پرسیگ کنگ بنت، آپ ءِ ڈول ءَ نشہ ءِ عام کنگ، ءُ دگہ باز۔۔ اے زلم ءُ زوراکی تھنا جانی (جسمانی) شکل ءَ نہ اَنت بگندئے زھنی بستار ءَ اوں بلوچ کُشگ بوگ ءَ انت۔ ھمک کوچگ ءُ شھرانی میان ءَ پوجی چیک پوسٹ ءُ چاونیانی جوڑ کنگ ءِ مکسد بلوچ ءَ را زھنی بستار ءَ کُشگ ءُ نادراہ جوڑ کنگ ءِ ھاسیں مکسدے،کہ پوجی سرچ آپریشنانی جتائیں شکلاں کارمرز بوگ ءَ انت۔ یاکہ زورآور ءِ ایدگہ زانشتی مراگش کہ چہ بلوچ ءِ پگر ءُ ھیالاں بلوچ مارشت ءِ ھلاس کنگ ءُ بلوچ ءَ را وتی درآمدیں پجار ءِ بھر کنگ ءِ کوشست انت۔ چوشکہ بلوچ ءِ نام ءَ مرچی ھمک مردمے کہ درآمدانی سسٹم ءَ بھر انت آ ھمیش زھنی نادراہی ءِ سبب انت۔ پمیشکا اے وھد ءُ زمانگ پہ بلوچ راج ءَ یک نگیگیں زمانگے زانگ بیت، چوشیں باریگاں ھچ راجانی مھلوک ءَ دست سر ءَ نہ کتگ ءُ وش واب نہ بوتگ انت بگندئے اے گھگیری ءِ زمانگ انت، دلیری، سربرز ءُ بلندی ءَ ھوارھید ءُ ھون روچی ءُ کربانیءِ باریگ انت۔ پمیشکہ زندگیں راجے ءِ مظاہرہ کنگ ءُ ھرچ ڈولیں کسان مزنیں درآمدانی زوراکیانی دیم دارگی انت، چیاکہ بلوچ ڈیھ ، مھلوکی تاکت ءُ راجی پجار ءِ بقا ھمد ءَ ھمگرنچ اَنت۔

مڈاھداریں وانوکاں : چوشکہ شما سرپد اِت،بلوچ یکجہتی کمیٹی ءَ 25 جنوری ” بلوچ چُکچینی ءِ یاتگیری روچ” نامینتگ، کہ اے روچ ءِ درگت ءَ ھمک سالاں جتائیں شکلاں مراگش اڈ دیگ بیت۔ ءُ چوشکہ اےسال ءَ اے روچ ءِ اولی سالروچ ءِ درگت ءَ بلوچستان ءِ دمگ دالبندین ءَ یک مزنیں مھلوکی مچی ءِ جار جنگ بوتگ۔ اے روچ ءِ اڈ دیگ ءِ مول ءُ مراد دژمن ءِ چکچینی ءِ ھاسیں پالیسی ءِ ھلاپ ءَ گھگیری کنگ ءُ چرےپالیسیاں وتی راج ءَ باسما کنگ انت۔ ءُ کلیں نمیراناں یاتدارگ انت کہ آھانی پجار بوتگ یا نہ بوتگ۔ ءُ وتی راج ءَ ھوار اے کلوہ داں میان اُستمانی راج ءُ ادارہاں سر کنگ اِنت کہ اے وھد ءَ بلوچ راج وتی جند ءِ ڈیھ ءِ سر ءَ چونیں تورناکیں جاورانی دیمپان اِنت۔ اے درگت ءَ بلوچ یکجہتی کمیٹی چہ درستیں بلوچ راج ءَ دزبندی کنت کہ 25 جنوری ءَ چہ وتی لوگاں دربیا اِت ءُ وت ءَ دالبندین ءِ مچی جاہ ءَ سر بہ کن اِت ءُ راجی گھگیری ءِ بھر بہ بئے۔ چیاکہ بلوچ ءِ چوشیں مھلوکے نیست انت کہ زورآور ءِ چکچینی ءِ سان آئی ءِ سر ءَ ناکپتگ انت،پمیشکا گھگیری ءِ چوشیں مراگشانی بھر بوگ وتی راجی پجار ءِ رکینگ انت۔ اگاں ما مرچی ھاموش بَہ اِیں، چہ وتی لوگاں چہ در میا ایں ءُ یا اے جُنز ءِ بھر مہ بَہ اِیں گڑا ما وتی آؤکیں پدریچ ءِ بربادی ءِ زمہ وار وت بَہ اِیں۔ ھمے واستا 25 جنوری ءَ ھرچ ڈولیں جاورانی مکابلہ بہ کن ات ءُ در بیا ات، وتارا دالبندین ءَ بہ رسین اِت، ءُ دنیا ءَ ھمے کلوہ ءَ بہ دے اِت کہ بلوچ راج وتی چُکچینی ءِ ھلاپ ءَ یکجاہ ءُ یکمُشت اِنت۔ دنیا ءَ ھوار وتی دژمن ءَ باور بہ کنائین ات کہ تئی زلمانی روچ کم انت۔

واکدار ءَ پدر کتگ کہ گوستگیں روچ ءَ کلات ءَ بلوچ لبریشن آرمی ءَ اُرش ءِ آسر ءَ پوج ءِ کارمنداں جانی تاوان ءِ دیمپانی کنگ کپتگ-

پولیس واکدار ءَ گْوشتگ کہ گوستگیں روچ ءَ کلات ءِ دمگ نیچارہ ءَ پاکستانی پوج ( فرنٹئرکور) ءِ گاڑی ءِ نزیک ءَ تراکے بیتگ چریشی ءِ آسر ءَ یک کارمندے یے جاہ پہ جاھی مرتگ ءُ دو کارمند ٹپی بیتگ اَنت-

آئی ءَ گوشتگ کہ بیران بیتگیں کارمند ءِ لاش ءُ ٹپی کلات ءَ سر کنگ بیتگ اَنت- واکدار ءِ گْوشگ اِنت کہ پوج گشت ءَ بیتگ وھدے کہ آ آئی ای ڈی اُرش ءِ نشانگ کنگ بیتگ-

اے اُرش زمہ واری بلوچ لبریشن آرمی ءَ منّ اِتگ اَت-

بی ایل اے ءِ جارکش جیئند بلوچ ءَ درشان ءِ تہ ءَ گْوشتگ کہ سرمچاراں پاکستانی پوج ءِ پیادگی کارمند ھما وھد ءَ ریموٹ کنٹرولڈ آئی ای ڈی اُرش ءِ نشانگ کتگ کتگ اَنت وھدے آ اے دمگ ءَ پوجی پیشگامی کنگ بیتگ اَنت، تراک ءَ سے دُژمنیں پوج ءِ کارمند جاہ پہ جاھی مرتگ اَنت-

آئی ءَ گْوشتگ کہ سرمچارانی سنگر گپتگیں دومی ٹولی ءَ دُژمنیں پوج ءِ آ دگہ پیادگی کارمندانی سر ءَ وتکاریں سلاھاں چہ اُرش کتگ، چریشی ءِ آسر ءَ دگہ چار کارمند مرتگ اَنت-

نوکیں سال ءِ ھمراھی ءَ بلوچ لبریشن آرمی ءِ اُرشانی تہ ءَ تُرندی گندگ اَتکگ، گوستگیں پانزدہ روچانی میان ءَ بی ایل اے نوزدہ اُرش کتگ آیانی تہ ءَ تربت ءَ مجید برگیڈ ءِ نیمگ ءَ چہ پوجی کاروان سر ءَ اُرش، زھری شھر بی ایل اے ھاسیں ٹولی فتح اسکواڈ ءُ اسپیشل ٹیکٹیکل آپریشنز اسکواڈ ( ایس ٹی او ایس) نیمگ ءَ چہ دہ کلاکاں گیش دستیگ کنگ ھوار اِنت-

دو ھپتگانی تہ ءَ بلوچ لبریشن آرمی زامران، کلات، زھری ءَ آئی ای ڈی اُرشاں پوج نشانگ کتگ وھدے کہ کولپور ءِ بُنجاھی شھدگ بستگ اِت-

اسلام آباد ءِ تھنک ٹینک پاک انسٹی ٹیوٹ فار پیس اسٹڈیز (پپس) ءَ گوستگیں سال ءَ وتی رپورٹ ءَ گْوشتگ کہ بلوچ لبریشن آرمی ( بی ایل اے) ءَ دسمبر ءَ دوازدہ اُرش کتگ، اے اُرشاں چل پنچ مردم مرتگ-

رپورٹ ءَ گوشگ بیتگ کہ بی ایل اے ءِ اے اُرشانی کچ ءُ تُرندی ءَ اے گیشی ٹولی ءِ جنگی رپک ءُ بودناکی ءَ پدر کنت، اے گیش بیتگیں ھترھاں چہ دیم پہ دیم بیگ ھاتر ءَ پاکستانی ریاست نیمگ ءَ ھُرت چاری کنگی اِنت-

روکپتی بلوچستان ءِ دمگ میرجاہ ءَ سلاہ بندیں مردماں یک دکانے ءِ سر ءَ تیرگواری کرتگ ءُ چریشی ءَ چہ یک مردمے بیران ءُ زھگ ءُ زالبولے ءَ ھوار سَے مردم زدگ بیتگ اَنت-

تیرگواری ءِ وئیل میرجاہ ءِ کوھنیں بازار ءَ یک کوسمیٹک دکانے ءَ پیش اتکگ –

تیرگواری ءَ بیران بیتگیں مردم ءِ پجار سعید گنگوز پنام ءِ سعید پردیس ء عبدالرحیم ءِ نام ءَ زانگ بیتگ –

اھوالانی رد ءَ تیرگواری ءَ یک رھگوزی ءِ زدگ بیتگ ءُ دکان ءَ یک زالبول ءُ یک کسان سالیں زھگے زدگ بیتگ-

تیرگواری ءِ وئیل ءِ سبب زانگ نہ بیتگ ءُ لاش ءُ زدگ بیتگیں مردم چست کنگ ءُ ھسپتال ءَ رسینگ بیتگ انت-