بلوچستان ءِ دمگ ماشکیل ءَ پاکستانی پوج ءَ تیرگواری کتگ پنجگور ءِ جھمنندے کُشتگ-
تیرگواری ءَ چہ کُشگ بیتگیں ورنا ئے پجّار وھیم ء عبدالواحد نام ءَ چہ بیتگ کہ پنجگور کلگ جھمنند اِنت-
اِھوالکار رِد ءَ اے ورنا دوھزاریں گاڑی ءَ چہ مال دلوت برگ ءَ بیتگ کہ پاکستانی پوج ءَ تیرگواری کتگ کُشتگ-
بلوچ یکجھتی کمیٹی ءِ نیمگ ءَ بلوچ چکچینی ءِ یاتگاری روچ ءِ درگت ءَ برجم داشتگیں راجی مُچی سوب مندی ءَ گوں آسر بوتگ – اے مُچی ءَ رکشان ءَ ھوار سرجمیں بلوچستان ءَ ھزارانی کچ ءَ مردماں بھر زرتگ –
راجی مُچی ءَ بلوچ یکجھتی کمیٹی ءِ رھشون ءُ مرکزی آرگنائزر ڈاکٹر ماھرنگ بلوچ، صبغت اللہ شاہ جی، ڈاکٹر صبیحہ بلوچ، لالا وھاب، سمی دین ءُ دگہ مردماں تران کتگ –
بلوچ راجی مُچی ءِ بندات گوں بلوچ راجی سوت ءَ بوتگ – مُچی ءَ بلوچستان ءِ جتا جتائیں دمگانی بلوچ چکچینی ءِ درگت ءَ درگت ءَ رپورٹ پیش کنگ بوتگ –
چہ سرکار ءِ نیمگ ءَ اے مُچی ءِ بے سوب کنگ ءِ ھاتر ءَ سَے روچ ءَ انٹرنیٹ بند کنگ بوتگ ءُ مرچی سھب ءَ موبائیل نیٹورک ءَ ھوار پی ٹی سی ایل ھم بند کنگ بوتگ ءُ سرجمی ءَ بلیک آؤٹ کنگ بوتگ -.
اشی ءَ ابید سرجمیں رکشان ءَ ھزارانی کچ ءَ پوج آرگ بوتگ وھدیکہ ڈالبندین ءُ سرجمیں چاگی ءِ مھلوک وڑ وڑ ءَ ترسینگ بوتگ انت ءُ بیھار دیگ بوتگ انت –
بی وائی سی ءَ گوشتگ کہ درسیں اڈانداں ابید سرجمیں بلوچستان ءَ ھزارانی کچ مھلوک ءِ کاروان ءِ دروشم ءَ اتکگ ءُ اےریاست ءِ نیمگ ءَ بلوچ چکچینی ءِ پالیسی ءِ بگیری ءَ بلوچ راجی ریفرنڈم ءِ بوتگ – ءُ اے مچی ءَ بلوچ راجی یکجاھی ءُ یکمشتی ءِ گوستانکی درور داتگ –
بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست ءُ چار جنوری ءِ شپ ءِ نُھ ءُ پنجاہ ملٹ ءَ شال ءِ دمگ تیرہ میل ءَ برجاھیں زورگریں پاکستانی پوج ءِ چیک پوسٹ سر ءَ دستی بمب اُرشے کتگ – دستی بمب چیک پوسٹ ءِ تہ ءَ کپگ ءِ سبب ءَ چہ دُژمن ءِ سے کارمند ٹپی بیتگ اَنت-
جارکش ءَ گْوشتگ کہ شھراں سرمچارانی پُشت ماں پُشت اُرش ءَ انگیر تنگ بیتگ – شال ءِ وڑیں شھر ءَ کہ اود ءَ دُژمن ءِ ھرجاہ ءَ کیمرہ پٹ کتگ بلے سرمچار وت ءَ کیمرھاں چہ رکینگ ءُ اُرش کنگ ءَ اَنت- اے ایشانی چیرجنگی ءِ رپکانی تچکیں سوبمندی اِنت-
جارکش ءَ گْوشتگ کہ بلوچستان لبریشن فرنٹ اے اُرش ءِ زمہ واری ءَ منّ اِیت ءُ سرڈگار ءِ وتواجھی ءَ تاں اُرشاں برجاہ دارگ اِھد کنت-
بلوچ یکجھتی کمیٹی ءِ سروک ڈاکٹر ماہ رنگ بلوچ ءَ گوشتگ دالبندین ءَ راجی مُچی ریاست ءِ جبر ءُ زوراکیانی ھستیں نزام ءِ ھلاپ ءَ بلوچ راج ءِ یک ریفرینڈمے – بلوچ راجی مُچی ءِ سوبمندی ویراندگانیں بلوچ راج ءَ بیت انت- بلوچ راج ءِ ھمک لوگانی مردم ءَ راجی ھمسنتی ءُ یکجاھی ءَ یک گچینی دروشمے برجم داشتگ – ءُ ریاست ءَ را یک تچکیں کلوھے داتگ کہ بلوچ راج نسل کشی ءِ ھلاپ ءُ وتی راجی پجار ءِ ھاتر ءَ یکجاہ ءُ ھمسنت انت-
آئی ءَ گوشتگ من بلوچ راج ءَ گوشگ لوٹ آں کہ اے مئے جد ءُ جھد ءِ بندات انت – مارا بلوچ نسل کشی ءُ وتی سرڈگار ءَ زُلم ءُ زورکیانی گڈی چیدگ ءِ ھلاس کنگ ءَ یل دراج، یکجاہ ءُ اوپاریں جد ءُ جھدے درکار اِنت-
ماہ رنگ بلوچ ءَ گوشتگ ھما وڑ بلوچ لانگ مارچ، گوادر ءَ راجی مُچی ءُ دالبندین ءَ راجی مُچی ءَ بلوچ راج ءَ ھمسنت ءُ تپاکی ءِ گچینین دروشم دیم ءَ آورتگ انت ءُ بلوچ راج ءِ رژنائیں باندات ءِ راہ گشینتگ ، ما اے جد ءُ جھد ءَ ھمے ڈول ءَ یکجاھی ءُ ھمسنتی ءَ دیم ءَ بران کن ایں ءُ مارا مئے منزل ءِ سر بوگ ءَ دنیا ءِ ھچ تاکت داشت نہ کنت اِنت-
آئی ءَ گوشتگ من دالبندین ءُ چاگی ءِ مھمانداری ءُ بھادریں مھلوک ءِ دل ءُ ستکیں منتواراں کہ آیاں گچینی ءُ بھادری ءُ دلیری ءِ ھواری ءَ بلوچ راجی مچی ءِ سوبمند کنگ ءَ کرد پیلو کتگ انت-
بلوچستان ءِ جتا جتائیں جاھاں دگہ ھشت مردمانی بیگواھی ءِ اھوال سربیتگ انت-
گیشیں اھوالانی رد ءَ بلوچستان ءِ دمگ آواران ءِ ھند مشکے تنک ھرکشان ءَ دو برات مساپر پسران، الاھج بکش نامیں دو شوانگ دزگیر کتگ ءُ بیگواہ کرتگ انت- اھوالانی رد ءَ گوشگ بوگ ءَ انت کہ اے ھردوکیں برات گریبو ءَ پاکستانی پوج ءَ یک ھپتگے ءَ پیش دزگیر کتگ ءُ بیگواہ کرتگ انت-
ھمے وڑ چہ پنجگور ءَ اھوال انت پاکستابی چیریں ادارہ ءُ پورسز ءَ چھاپہ جنگ ءِ وھد ءَ یاسر ء یاسین، ھیات ء ولی مھمد جھمنند مجبور آباد بونستان پنجگور ءُ جلیل ء عبدالخالق جھمنند عیسیٰ پنجگو آوار جتگ ءُ بیگواہ کرتگ انت-
کھولانی رد ءَ اے مردم ھمے ماہ ءِ نوزدہ جنوری 2025 ءِ سھب ءِ ساھت پنچ ءَ چہ لوگاں آوار جنگ ءُ بیگواہ کنگ بیتگ انت چریشی ءَ پد بیگواہ انت ءُ واکدار مارا سرپدی دیگ ءَ نہ اَنت کہ مردم چتور انت ءُ کجا انت-
ھمے وڑ بلیدہ میناز ءَ یک مردمے بیگواہ کنگ بیتگ، کھول ءِ رد ءَ سراج بلوچ ء نسر اللہ یازدہ جنوری 2025 ءَ پورسز ءَ زورانسری آوار جتگ ءُ بیگواہ کرتگ-
دومی نیمگ ءَ چہ کیچ ءَ چیریں ادارھاں دست ءَ بیگواھیں اسرار ء عطاء اللہ یل بیتگ، کھول ءِ رد ءَ اسرار دوازدہ مارچ2024 ءَ چہ جند ءِ لوگ ءَ بیگواہ کنگ بیتگ – ھمے وڑ چہ نوشکی ءَ مھمد عاطف یل بیتگ ءُ وتی لوگ ءَ سر بیتگ-
بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست چار جنوری آدینگ روچ ءَ زورگریں پاکستانی پوج ءِ ھیڈ کوارٹر سر ءَ اُرش کتگ پوج جانی ءُ مالی تاوان ءِ دیمپان کتگ-
جارکش ءَ گْوشتگ کہ تربت ءَ برجاھیں بُنجل ( اصغر گیٹ) سر ءَ مروچی دوازدہ پنجاہ ملٹ ءَ سرمچاراں اے ون ءِ شش گولہ آس داتگ کہ نشانگ ءَ کپتگ اَنت چریشی ءِ آسر ءَ زورگریں پوج ءِ کارمنداں جانی ءُ مالی تاوان رس اِتگ-
جارکش ءَ گْوشتگ کہ اُرش ءَ پد سرمچاراں جوانیں جنگی رپکاں چہ وتی مُھریں اوتاکاں سر ءَ بیتگ اَنت وھدے کہ زورگریں پوج ءِ کارمند سرگنوکی ءَ گپتگ ءُ سر ءُ دیم تیرگواری اش کتگ ءُ جتاجتائیں ھندانی سر ءَ بستگ ءُ راج ءِ سر ءَ زوراکی کتگ-
جارکش ءَ دیمتر ءَ گْوشتگ کہ سرمچارانی سوبمندیں اُرش سرجمیں بلوچستان ءَ برجاہ اِنت کہ اے سرڈگار ءَ چہ سیادی ءُ مھر ءِ درشان اِنت ءُ زورگریں ءِ واستا بلوچستان ءَ چہ دراھگ ءَ دگہ ھچ راہ پش نہ کپتگ-
جارکش ءَ گْوشتگ بلوچستان لبریشن فرنٹ اے اُرش زمہ واری ءَ منّ اِیت ءُ آجو بلوچستان ءِ وتواجھی ءَ تاں زورگر ءَ نشانگ کنت-
پاکستان ءِ گوستگیں سر وزیر ءُ تھریک انساپ ءِ سروک عمران خان ءَ اڈیالہ جیل ءَ چہ یک درشانے ءِ تہ ءَ گْوشتگ کہ بلوچ بیگواھیں مردمانی جیڑہ باز سنجیدہ اِنت چریشی ءِ ھاتر ءَ ماہ رنگ بلوچ وتی توار ءَ چست کنگ ءَ اِنت-
آئی ءَ گْوشتگ کہ بلوچستان ءِ ھال نو سرجمیں ڈیھ ءَ اِنت، تھریک انساپ ءِ ھم بازی کارکن بیگواہ اَنت – ما اے جیڑہ ءَ میانی استمانی انسانی ھکانی گلانی دیم ءَ اے جیڑہ ءَ ایر کن ایں-
دالبندین ءَ بلوچ یکجھتی کمیٹی ءِ برجم بیوکیں مچی پنّام بلوچ چُکچینی ءِ روچ درگت ءَ چہ چن ءُ لانچ گُڈی بھر ءَ پُترتگ-
بلوچ یکجھتی کمیٹی ءِ بُنجاھی راھشون بیگواھیں مردمانی کھولاں ھوار بلوچستان ءِ دیر دراجیں دمگاں چہ مردمانی آیگ ءِ دْرچ برجاہ ءَ اِنت، دمگ ءَ موباھل انٹرنیٹ بندی ءَ چہ مردماِ تُرندیں دلسیاھی ءِ دیمپان کنگ کپگ ءَ اِنت-
مُچی ءِ چن ءُ لانچ ءِ درگت ءَ چہ بلوچ یکجھتی کمیٹی بُنجاھی راھشون کامریڈ گلزادی بلوچ ءَ رسانکدر ءَ تران کنان ءَ گْوشتگ کہ بیست پنچ جنوری ءِ مُچی ءِ سرجمیں چن ءُ لانچ گُڈی بھر ءَ اِنت اے درگت ءَ تھنا بلوچستان اناں بلکیں اوگانستان ءُ ایران ءِ جھمنندیں بلوچ ھم جُھد کنگ ءَ اَنت کہ آ اے مُچی ءَ وت ءَ بھر بہ کن اَنت ءُ آ درست ڈاکٹر ماہ رنگ بلوچ ءَ اش کنگ ءِ واستا بے واب اَنت پرچاکہ ڈاکٹر ماہ رنگ بلوچ اے وھد ءَ انسانی ھکانی درگت ءَ چہ آ یک توانمندیں توارے جوڑ بیتگ ءُ بیگواھیں مردمانی کھولانی واستا یک اُمیتے-
آئی ءَ گْوشتگ کہ اوگانستان ءُ ایران ءَ جھمنندیں بلوچ اے مُچی ءَ بھر بیگ ھاتر ءَ جُھد کنگ ءَ اَنت بلے ریاست ءَ جتاجتائیں ھندانی سر ءَ اڑان ودی کتگ مُچی ءَ بھر زیروکانی راہ ءَ دارگ اَنت-
آئی ءَ گْوشتگ کہ ھمے وڑ گوادر راجی مُچی ءِ وھد ءَ ریاست ءَ کہ رویشگ پیش داشتگ بلوچ زالبولانی سر ءَ لَٹ ءُ کُٹ کتگ اَنت آ درستانی دیم ءَ اَنت بلے ھما پسّہ بلوچستان ءِ مردمانی نیمگ ءَ چہ ءُ بلوچ یکجھتی کمیٹی نیمگ ءَ اتکگ آ ھم ریاست ءَ دیستگ مروچی یکرندے پد ءَ ھما رویشگ ءَ پیشدارگ ءَ اِنت بلے ما آئی ءَ گوشگ لوٹ ایں کہ بلوچ ءَ ھچبر سرجھل نہ کتگ بلوچ ھچبر دم نہ برتگ اگاں یکرندے پد ءَ ریاست ءَ دالبندین مُچی بے سوب کنگ جُھد کتگ گُڑا آئی ءِ پسّہ سک تُرسناک بیت کراچی ءَ مئے مات ءُ گھارانی گوشان دور دیگ بیتگ اَنت آیانی پاکیں چادرانی سر ءَ دست ایر کتگ آیانی سر ءَ زوراکی کتگ بلوچ راجی مچی دالبندین ءَ بیوکیں مُچی ءَ بلوچستان ءِ جتاجتائیں دمگاں چہ بیگواھیں مردمانی کھولاں ھوار مردمانی مزنیں کساسے ءَ اد ءَ ساڑی اَنت ءُ دالبندین ءِ شرپمندیں راج ھمے وڑ مارا ازت ءُ شرپ داتگ اے وت ریاست ءِ درشاناں رد کنگ واستا بس اَنت بلوچ راج ءَ را نو پہ لَٹ ءُ کُٹ ءَ ھلاس کت نہ کن ئے بلوچستان ءُ بلوچ راج نو تئی دست ءَ چہ درتکگ بلوچ راج ءِ ورنایانی شعور ءَ را تو لَٹ ءُ کُٹ ٹپ ءُ ٹوریں لاشاں ءُ آزارجاھاں چہ ھلاس کُت نہ کن ئے اے تئی ردی اِنت کہ اے وڑیں گامگیجاں چہ تو بلوچاں نزور بہ کن ئے تو اے ردی ءَ ھچبر مبو پرچاکہ مروچی مُچی ءَ یکروچے ساری بلوچستان ءِ دیر دْراجیں دمگاں چہ ھزارانی مردم مُچ بیگ ءُ آ کھول ھم ساڑی اَنت کہ آیانی مردم ریاست ءَ لَٹ ءُ کُٹ کتگ ءُ شھید کتگ اَنت-
آئی ءَ گْوشتگ کہ اسلامی جمہوریہ پاکستان ءَ اے کلوہ دیگ لوٹ ایں کہ اگاں تو بلوچ چُکچینی چہ دست نداشت زوراکی بند نہ کت ھوش ناکن نہ زرت کُشت ءُ کوش ءَ چہ پُشت کنز نہ بوت ئے گُڑا بلوچ ءِ پسّہ کئیت گُرا بژنی ءَ اَبید ھچ دز نہ کپ اِیت نو پُرایمنیں مردماں پُرایمنیں زھرشانی کن اَنت ھچ کس جنگ نہ لوٹ اِیت اگاں ما کسے جنگ کن ایں گُڑا آ ھم ایمنی ھاتر ءَ پرچاکہ ما باز لاش چست کتگ باز ھونریچی دیستگ مُچی کبر دیستگ نو بس بہ کن اِت ما گیش لاش چست نہ کن ایں مئے پُرایمن زھرشانی ءَ ایرموش کنگ جُھد مہ کن اِت اگاں ناں اشی ءِ پسّہ تُرند بیت-
بلوچستں ءِ دمگ کیچ ءَ پاکستانی پوج ءِ دست ءَ 65 سالی ئیں کماش گوں دو زھگاں ھوار بیگواہ-
بیگواھیں مردمانی تہ ءَ 65 سالی ئیں شوانگ عبدالکریم ءُ آئی ءِ زھگ بیگواہ
اے مردم بلیدہ ءِ ھند میناز ءَ بیست ءُ یک جنوری ءَ پاکستانی پوج ءَ دزگیر کتگ ءُ ناشناسیں جاھاں برتگ اَنت-
کھول ءِ رد ءَ عبدالکریم چمانی نیزوری ءَ ابید وتی گریبی ءَ شوانگی ءَ بیتگ –
اھوالانی رد ءَ دزگیری ءَ پد آیانی بارو ءَ ھچ اھوال نیست انت ءُ چریشی ءَ کھول ءَ واکداراں گامگیج زیرگ ءُ آیانی یل کنگ ءِ لوٹ کرتگ – سرکاری ادارھاں انساپ ءِ لوٹ کرتگ-
بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراں ھُزدار ءَ پولیس ءِ ایس ایس پی ءِ کارگس دستی بمب اُرش ءَ نشانگ کتگ-
جارکش ءَ گْوشتگ کہ بیست دو جنوری ءِ شپ ءَ نُھ نیم ءَ سرمچاراں ھُزدار ءَ ایس ایس پی ءِ کارگس سر ءَ ھما وھد ءَ اُرش کتگ وھدے ایس ایس پی اود ءَ ساڑی بیتگ- دستی بمب گوں تُرندی ءَ ترکّ اِتگ چریشی ءَ چہ پوج ءَ جانی ءُ مالی تاوان دیمپانی کنگ کپتگ-
جارکش ءَ گْوشتگ کہ اے اُرش زورگریں پوج ءِ ھلاپ ءَ مئے جُھد بھر اِنت، کہ یک آجو بلوچستان ءِ جوڑ بیگ ھاتر ءَ برجاہ بنت- ما وتی مڈی ءُ راج ءِ پھازگ ھاتر ءَ ھرچ وڑیں گامگیج زوریں ءُ دُژمن ءِ کجام زوراکی ءِ پسّہ ءَ گوں تُرندی ءَ دے ایں- گل ءَ راج ءَ چہ دزبندی کتگ کہ آ زرمبشت آجوئی ءِ بھر بہ بنت ءُ زورگر ءِ توانمندانی ھلاپ ءَ بہ اوشت اَنت-
آئی ءَ گْوشتگ کہ بلوچستان لبریشن فرنٹ اے اُرش زمہ واری ءَ منّ اِیت، ءُ بلوچستان ءِ وتواجھی ءَ تاں پوج ءَ را نشانگ کن ایں-
