TBP Balochi

یکشمبے ءِ روچ ءَ بلوچستان ءِ جتاجتائیں دمگاں چہ دگہ ھپت مردم زورانسری آوار جنی ءِ نشانگ کنگ بیتگ اَنت-

بلوچستان ءِ تیاب دپی شھر گوادر ءَ دمگی اِھوالکار جاوید بلوچ رِد ءَ آئی ءِ دو نزیکیں سیاد ذاکر سومار ءُ نسیم حمید چہ گھٹی ڈھور چوک ءَ پاکستانی پوج ءَ آوار جتگ ءُ بیگواہ کتگ اَنت-

ھمے وڑ چہ پنجگور ءَ ھال اِنت کہ عیسی ءَ بیست پنچ جنوری ءَ ساھت یازدہ ءِ نزیک ءَ پاکستانی پوج ءَ رحیم بخش ءِ لوگانی سر ءَ بیڑبرتگ آئی ءِ سے چُک زورانسری بیگواہ کتگ اَنت کہ آیانی نام ارشاد ء رحیم بخش، صدیق ء رحیم بخش ءُ ظھور ء رحیم بخش اِنت-

دومی نیمگ ءَ چہ بارکھان رکنی شھر ءَ اسلم کھیتران ءُ بلوچی زُبان ءِ ازمکار ناڑی گلاف مری سادھیں پوشکانی تہ ءِ سرکاری نمبر پلیٹ گاڑی ءَ سواراں آوار جتگ ءُ بیگواہ کتگ اَنت-

زانگ بہ بیت ھمے سال ءَ بنداتی ماہ ءَ تنی وھدے بلوچستان ءِ جتاجتائیں دمگاں چہ دو درزن ءِ نزیک ءَ بلوچانی زورانسری آوار جنی ءِ کیس دیم ءَ اَتکگ اَنت-

بلوچستان ءِ زورانسری آوار جنی ءِ ھلاپ ءَ پُرکاریں گلانی رِد ءَ پاکستانی پوج تُرس آماچ کنگ ھاتر ءَ زورانسری آوار جنی ءِ تہ ءَ گیشی آورتگ- آیانی لوٹ اِنت زورانسری آوار جنی گر ءُ دار کنگ بہ بیت-

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشانے ءِ تہ ءَ گوشتگ کہ مئے سرمچاراں ھزدار ءَ اینٹلی جنس بیسڈ کاروائی ءَ زورگیریں پاکستانی پوج ءِ کارمندانی سر ءَ وی بی آئی ای ڈی اُرش ءِ کتگ ءُ چریشی ءَ کم چہ کم دشمن ءِ یازدہ کارمند مُرتگ ءُ بیست ءُ ھشت زدگ بوتگ انت –

جارکش ءَ جیئند بلوچ ءَ سرجمیں ھال داتگ ءُ گوشتگ کہ بلوچ لبریشن آرمی ءِ گچینی ٹولی اسپیشل ٹیکٹیکل آپریشنز اسکواڈ (ایس ٹی او ایس) ءَ بی ایل اے ءِ انٹلی جنس ونگ “زراب” ءِ گوشگ ءِ پد ءَ کاروائی کتگ ءُ چہ ھزدار ءَ شست کلومیٹر دور کھوڑی ھند ءَ زورگیریں پاکستانی پوج ءِ کارمندانی بروکیں بس تراکناکیں شوروانی نشانگ جوڑ کتگ – چہ اے اُرش ءَ بس سرجمی ءَ پُرشتگ ءُ آئی ءَ سواریں یازدہ کارمند مُرتگ انت ءُ بیست ءُ ھشت زدگ بوتگ انت – مُرتگیں کارمندانی تہ ءَ زورگیریں پاکستانی پوج ءِ ملٹری انٹلی جنس ءُ فرنٹیر کور ءِ کارمند ھوار بوتگ انت –

آئی ءَ گوشتگ کہ اے بس ءَ ایوک ءَ زورگیریں پاکستانی پوج ءِ کارمند سوار بوتگ انت – زراب ءِ داتگیں ھال ءِ رِد ءَ بس ءَ ھچ وڑیں لس مردم سوار نہ بوتگ – اے مساپر کشیں بس ” پنڈی کوچز” گھوڑا چار راہ ءِ بس اڈہ ھشت بج ءَ کینٹ ءَ شتگ کہ اودا درآیگ ءَ پد ادار نُھ ءَ اے بس کھوڑی ءَ سر بوتگ کہ ھمودا وی بی آئی ای ڈی ءِ سر ءَ اُرش کتگ ءُ دژمن ءَ را سک باز جانی تاوان داتگ –

جارکش ءَ گوشتگ کہ بلوچ لبریشن آرمی ءِ گچینی یونٹ ایس ٹی او ایس ءُ چیریں ادارہ زراب ءِ جوانیں ءُ سوبمندیں ھکمت املی ءِ سوب ءَ دژمن ءَ ٹوھیں تاوانے وارتگ – بلوچ لبریشن آرمی اے سوبمندیں اُرش ءِ زمہ واری ءَ منّ ایت ءُ کول کنت کہ ڈژمن ءِ سر ءَ چد ءُ مستریں اُرش کنت انت-

بلوچستان لیویز فورس ءِ ڈائریکٹر جنرل عبدالغفار مگسی ءَ شش زالبولیں کانسٹیبل ڈیوٹی ءِ واک ءِ پرمان ءِ بے سوبی ءُ ڈیوٹی ءَ نیاھگ ءَ درکنگ بیتگ انت-

شمبے ءِ روچ ءَ شنگ بیتگیں یک نوٹیفکیشنے ءِ رد ءَ پشین ءَ سیادی داروکہں چار زالبولین لیویز کانسٹیبل آیانی بے جاڑیگی، گیر پیشہ واراناں دروشن ءُ مجاز اتھارٹی ءِ کانون ءِ واک ءِ دار ءِ رھبند ءِ سر ءَ امل کنگ ءِ انکاری ءَ کشگ بیتگ انت – کشگ بیتگیں کانسٹیبلز بی بی شکیرہ، مہ جبین،بی بی رکسانہ ءُ گلسیمہ ھوار انت-

یک دگہ نوٹیفکیشنے ءِ رد ءَ دگہ دو زالبول کانسٹیبل رافعہ ءُ روبینہ ھدمت ھلاس کنگ بیتگ انت-

دمگی مردمانی رد ءَ آیاں دالبندین ءَ بلوچ یکجھتی کمیٹی ءِ چیردستی ءَ بلوچ نسل کشی ءِ یادگاری روچ ءِ درگت ءَ ڈیوٹی ءَ دارگ بیتگ انت-

بکے آ وتی برجم بیوکیں ڈیوٹی ءِ جاہ ءَ رپورٹ کنگ ءَ بے سوب بیتگ انت-

ھزدار ءَ پاکستانی پوج ءَ لوگانی سر ءَ بیڑ برتگ ءُ لوگ لوگ ءَ پٹ ءُ پول کتگ، جنینیں کارندہ بازیں کچے ءَ ھوار-

اھوالانی رد ءَ ھزدار ءِ دمگ نیامجو،کٹان ءُ ارباب کمپلیس ءِ ھنداں لشکر کشی برجاہ انت-

دمگی مردمانی رد ءَ دو سد ءُ پنجاہ ءَ گیش جنینین کارندہ آپریشن ءَ بھر زیرگ ءَ انت ءُ اود ءَ لوگ لوگ ءَ پٹ ءُ پول کنگ ءَ انت-

داں انگت ءَ دگہ دزگیریانی اھوال دیم ءَ نیتکگ انت ءُ واکداراں ھم اے درگت ءَ دگہ اھوال نیاورتگ انت-

مروچی سھب ءَ بلوچستان ءِ دمگ ھزدار ءَ یک بسے بمب اُرش ءِ نشانگ کنگ بیتگ ات-

تراک ھزدار ءِ شھر ءَ کساس شست کلو میٹر ءِ دوری ءَ کھوڑی ءِ ھند ءَ پیش اتکگ ات – تراک ءَ سانمند بیتگیں بس چہ ھزدار ءَ ونگو راولپنڈی ءَ روگ ءَ بیتگ-

ڈپٹی کمشنر ھزدار یاسر دشتی ءِ رد ءَ کھوڑی ءِ ھند ءَ تراکناکیں شورو دگ ءِ کش ءَ یک الٹو گاڑی ءَ بیتگ انت کہ ھما وھد ءَ ترک اتگ کہ مساپر بریں بس روگ ءَ بیتگ-

آئی ءَ گوشتگ تراک ءَ الٹوگاڑی سرجم ءَ تباہ بیتگ تراک ءِ زدگ ءَ اتکگیں بس سانمند بیتگ-

چیریں اھوال دارے ءَ دی بلوچستان پوسٹ ءَ گوشتگ نشانگ بیوکیں بس ءَ سواریں دراھیں پوجی بیتگ انت-

تراک ءِ آسر ءَ مرتگیں کارندہ پاکستانی پوج ءِ ملٹری انٹیلی جنس ( ایم آئی) ءِ دو کارندھانی پجار نائک شیراز ءُ سسٹم آپریٹر اھمد رضا ءِ ناماں زانگ بیتگ انت-

زدگ بیتگیں کارندہ سی ایم ایچ ءَ برگ بیتگ انت کہ گیشیں اھوالانی ودار انت-

اُرش ءِ زمہ واری تنی وھدی ھچ کس ءَ پہ وت ءَ نہ زرتگ-

زانگ بہ بیت نُھ جنوری ءَ ھزدار ءِ دمگ زھری ءَ ھپتاد ءَ گیش سلاہ بندیں مردم اتکگ ات اُنت ءُ آیاں لیویز کارگس،نادرا کارگس ءُ مونسپل کمیٹی ءِ کنٹرول کتگ اتطءُ دہ ادارانی گرگ ءَ پد مانداشتگ ات انت ءُ ایشی ءَ پیش تربت ءِ شھر ءَ پاکستانی پوج ءِ کارندھانی بروکیں کاروان ءِ سر ءَ یک بسے ءِ سر ءَ وتکش تراکے بیتگ ات-

اے ھردوکیں اُرشانی زمہ واری بی ایل اے ءَ من اتگ ات اَنت-

تربت ءَ شپ ءِ وھد ءَ پاکستانی پوج ءَ بیڑبرتگ یک مردمے آوار جتگ ءُ بیگواہ کتگ-

گیشیں ھالانی رِد ءَ تربت ءِ دمگ چاہ سر ءَ کاؤنٹر ٹیررازم دیپارنمنٹ ( سی ٹی ڈی) ءَ بیڑبرتگ ضمیر سرور نامیں ورنایے آوار جنگ ءَ پد بیگواہ کتگ-

بیگواہ کنگ بیتگیں ورنا ءِ کھول گوشگ اِنت کہ شپ ءِ کساس دو ءَ سی ٹی ڈی کارمند آیانی لوگ ءَ پُترتگ اَنت، لوگ سرجمی ءَ پٹ ءُ پول کتگ اَنت ءُ ضمیر سرور آوار جنگ ءَ پد ناشناسیں جاھے ءَ برتگ-

کوھلو ءُ بولان ءَ پاکستانی پوج ءِ چیک پوسٹانی سر ءَ سلاہ بندیں مردماں اُرش ءِ نشانگ کتگ اَنت-

گیشیں ھالانی رِد ءَ کوھلو ءِ دمگ نوئے شم ھند سر ءَ پاکستانی پوج اُرش ءِ نشانگ کتگ چریشی ءَ پوج ءَ جانی تاوان ءِ دیمپانی کنگ کپتگ- بلے واکدار ءِ درشان انگت دیم ءَ نیتکگ-

اِھوالکار رِد ءَ ھمے میان ءَ پوج ءِ کمک ءَ سر بیوکیں ھم اُرش نشانگ کنگ بیتگ-

دومی نیمگ ءَ بولان ءِ دمگ آب ھم شال سبی شھدگ سر ءَ ایف سی چیک پوسٹ گوستگیں شپ ءَ سلاہ بندیں مردماں مزنیں سلاھاں چہ نشانگ کتگ-

ھالانی رِد ءَ تیرگواری ءِ درچ داں دیراں برجاہ بیتگ- بلے اُرشانی زمہ واری انگت ھچ گل ءَ نہ زرتگ اَنت-

بھرام ءِ گوں وتن ءَ مھر ءِ لیکہ

نبشتہ کار :ڈاکٹر جلال بلوچ
رجانک : مھروز ھمّل

دی بلوچستان پوسٹ

سرڈگار ءَ گوں مھر ءِ گوستانک ھما وھد ءَ بندات کنگ بیتگ وھدیکہ مردماں چاگردی زند ءِ گوازینگ بندات کتگ ءُ سرڈگار پہ سرجمیں چاگرد ءَ کشار ءِ وسیلھے جوڑ بوتگ، زمین ءَ چہ کشار گرگ ءِ پگر ءَ زمین ماتے ءِ ارزشت دیگ بوتگ ءُ مات مھر ءِ شرپ گوشگ بیت، چُکے ءِ گوں مات ءَ مھر درشان کنگ نہ بیت، مات ءِ دلبند ءَ کہ ھما آسودگی رس ایت آئی ءِ ھچ درور نیست ءُ پد ءَ ھما مات (سرڈگار) ءِ دلبند ءَ کہ ترا روگی اِنت پگر بہ کن اِت کہ آئی ءِ کجام وڑیں مھرے بیت — آیا آ مھر ءِ درشان کنگ ءَ پہ گال شوھاز کنگ بوتگ –

مھر ءُ وپا ءِ شرپ داریں مات، ءُ درساں مستریں ھما مات کہ گوں سرڈگار ءَ مھر ءُ وپا ءِ درونت ءَ دنت ھمے ھاتر ءَ تئی دل پہ مات ءَ مرگ لوٹ اِیت کہ مردم ءِ رگ رگانی تہ ءَ ھوار بیت ءُ پد ءَ ھاک ءُ مردمانی کہ مدامی سیادی یے بیت آ چد ءُ گیشتر مھکم بیت، ءُ مردم ھمک وھد ءَ وتی ھوناں گوں اے ھاک ءِ سیراپ کنگ ءَ سرین بند بیت اِنت –

اگاں بلوچستان ءُ بلوچانی گپ ءَ بجن ایں جوانتر اِنت پرچا کہ مئے بنگپ ھم ماتیں سرڈگار ءِ بلوچستان ءِ یک پرزندے ءِ سر ءَ اِنت –

بلوچستان ءِ گوستانک اے گپ ءِ گواھی ءَ دنت کہ ھر ھما وھد ءَ اے سرڈگار ءِ سر ءَ درآمداں اُرش کرتگ، آئی ءِ سر ءَ کبزہ کنگ ءِ جھد کتگ، یا گوں بدیں نگاھاں چار اِتگ گڑا زمین زادگاں ماتیں سرڈگار ءِ رکینگ ءِ ھاتر ءَ گھگیری ءِ راہ گچین کتگ ءُ ھنچیں وڑے ءَ گھگیری کتگ کہ آئی ءِ درور نیست اِنت —— اشی ءَ من ھمے واستا گوشگ ءَ آں کہ ارباں سَے سال ءِ کسانیں وھدے ءِ تہ ءَ سِند گپتگ ، ءُ آیاں دہ سال پہ ایران ءِ گرگ ءَ لگ اِتگ بلے بلوچستان ءِ گرگ پہ آیاں تاں ھما وھد ءَ بس وابے بوت وھدیکہ آیاں دمگی مردم ھاکمی کنگ ءِ زمہ واری نہ دات اَنت –

ھمے گوں ھاک ءَ مھر ءُ وپا اِنت کہ آئی ءَ سائرس برباد کت ءُ یلہ دات، یونانی ھنچوش کُت اَنت کہ آیانی تگِرد چپی بوت – سرڈگار ءَ گوں مھر ءِ اے جزبگ مھر گڑھ ءُ مروچیگیں راج ءِ پرزندانی تہ ءَ یکیں وڑ ءَ گندگ بنت –

بلوچانی کہ وتن یا سرڈگار ءَ گوں مھر ءِ بازیں درور ھست اَنت – چوش کہ ابداللہ ھان وتی شائری ءِ تہ ءَ گُش اِیت کہ:
“کوھنگ اے کوھیں کلات
کسی پت ءِ میراس نہ اِنت”
ھمے وڑ ءَ “وائے وتن ھشکیں دار ” ھم گوں سرڈگار ءَ مھر کنگ ءِ درورے – اے دابیں سک باز درور بلوچی شائری ءُ داستانانی تہ ءَ دست کپ اِیت – اے بلوچانی گوں سرڈگار ءَ مھر ءِ جزبگ اِنت کہ جھان ءِ مزن مزنیں تاکتانی دیم ءَ سر ءِ جھل کنگ ءِ بدل ءَ سرڈگار گوں وتی ھوناں سیراپ کنگ گیشتر ارزشت داتگ، ءُ انگت دیان اَنت –

گوستانک اے گپ ءِ گواھی ءَ دنت کہ ھر ھما وھد ءَ درامداں بلوچ دمگانی سر ءَ اُرش کتگ گڑا بلوچاں آیانی بگیری ءَ گھگیری ءِ راہ گچین کتگ ءُ اے درچ انگت برجاہ اِنت – ھزرت ایسٰی ءِ ودی بوگ ءَ پیسر بگر تاں روچ ء مروچی ھزاراں، بلکیں لکاں بلوچ پرزنداں پہ سرڈگار ءِ رکینگ ءَ وتی جانانی دیمھونی داتگ کہ آیاں ما برے بابا ھمزہ بلوچ ءِ دروشم ءَ گند ایں برے ھمل ءِ جیئند، برے مھراب ھان ءُ برے نورا ءُ بلوچ ھان ءِ ، برے سلیمان (شیھک جان) ءُ پیرک، برے کریم ءُ ھکیم ءِ ، برے دلوش ءُ دلجان ءِ دروشم ءَ گندگ بنت، ءُ برے امیرالملک ءُ سمیئ بلوچ جوڑ بنت ءُ پہ سرڈگار ءَ زند ءِ کربان کنگ ءَ چک ءُ پد نہ بنت –

سرڈگار ءِ ھمے آشکانی تہ ءَ یکے “بھرام” اِنت کہ پہ سرڈگار ءَ دیوانگ اَت – کہ آئی پگر وتن، سنگتانی دیوان ءَ بنگپ وتن، ھیال ءُ وابانی تہ ءَ وتن، آئی ءِ دین ءُ ایمان وتن، آئی ءِ ھر چیز وتن، پہ آئی ءَ اول وتن ءُ گڈی ءَ ھم وتن –

سرڈگار (وتن) ءَ گوں ھمے مھر ءِ جزبگ ءَ آ آجوئی ءِ جنگ ءِ نیمگ ءَ کش اِت وھدیکہ آئی ءَ وتی گام اے راہ ءَ ایر کُت اَنت گڑا پد ءَ پُشت ءَ چک ئِے نہ جت ءُ نہ چار اِت ئِے –

گوں سرڈگار ءَ بے کساس آئی ءِ ھمے مھر اَت کہ سرڈگار ءِ آجوئی ءِ ھاتر ءَ مدامی پہ مَرگ ءَ ساجو اَت، آئی ءَ اے شری ءَ زانتگ اَت کہ یک ماتے من ءَ نُھ ماہ ءَ وتی لاپ ءَ جاگہ دنت ءُ پہ ھما مات ءَ ھر یکے وتی پِدا کنگ ءَ مدامی ساجو اِنت ءُ گڑا یک ماتے ھما اِنت کہ مدامی ھمائی ءِ لاپ ءَ بوگی اِنت، ھما راستیگیں جاہ اِنت ءُ مارا درستاں روگی اِنت—– من ءَ ھم ھمود ءَ روگی اِنت ھمے ھاتر ءَ وھدیکہ مردم من ءَ مات ءِ لاپ ءَ ایر دیگ ءَ بنت گڑا من شرمندگ مہ باں —– وھدیکہ من مات ءِ ‘دلبند ءَ واب بہ کپ آں گڑا ھما مات ھم پہ من ءَ پھریگ بہ بیت – ھمے جزبگانی سوب ءَ آ مدامی سرڈگار ءِ پرز پیلو کنگ ءَ سریں بند اَت –

براھوئی ءِ تہ گُشنے ھست کہ:

“ڈگارنازی آ تینا گام تے مدانا تخ
دُن دِرک ءُ سِت کہ کیسہ دا گلزمین نے پِٹو ” بزاں کہ زمین ءِ سر ءَ ترّدکی بہ جن ئے گڑا اے گلزمین ترا بد دوا کنت –

من بھرام ھر وھد ءَ کہ دیستگ اَت زمین ءِ شرپ دیگ ءَ دیستگ اَت، وھدیکہ آئی ءَ گام جتگ گڑا آئی ءَ کدم ھنچیں اندازے ءَ چست کتگ اَنت کہ منی سوب ءَ مات (زمین) درد مہ بیت –

آ مھر ءُ دوستی ءِ چیدگ اَت — آئی ءِ سرجمیں زند پہ سرڈگار ءِ ھزمت ءَ گوست، ءُ آ اے سرڈگار ءَ پہ آیوکیں پدریچ ءَ بھشتے جوڑ کنگ لوٹگ ءَ اَت، آئی ءِ ھمے واھشت اَت کہ آئی ءَ پانزدہ سال یکشل ءَ جھد کت کہ منی سرڈگار آجو بہ بیت، ھنچیں آجوئی یے کہ اے سرڈگار یک گُلستانے جوڑ بہ بیت، اے وتن امن ایمنی ءِ ھارے جوڑ بہ بیت، آئی ءِ تہ ءَ ھچ وڑیں پرک ءُ درک مہ بیت کہ آئی ءِ تہ ءَ روھ ءِ آسودگی ءِ ھر وڑیں آسراتی بہ بیت اِنت –

روکپتی بلوچستان ءِ راسک ءَ ایرانی چیریں ادارھاں بیڑ برتگ ءُ اود ءَ یک نودربرے آوار جتگ ءُ برتگ-

گیشیں اھوالانی رد ءَ راسک ءِ ھند پیشین مند میتاپ ءَ یک لوگے ءِ سر ءَ ایرانی لشکر ءِ لس پوشاکی کارندھاں یک لوگے ءِ سر ءَ بیڑ برتگ ءُ اود ءَ یک نودربرے آوار جتگ ءُ گون وت برتگ-

آوار جنگ بیتگیں مردم ءِ پجار عبدالرشید دادور ء ھیدر کہ یک دینی مدرسے ءِ نودربرے بیتگ-

اھوالانی رد ءَ ایرانی لشکر ءِ لس پوشاکی کارندہ گون سپاہ ءَ ھوار لس شکسی گاڑیاں گوں اتکگ انت ءُ پیشین ءَ مند میتاپ ءَ یک لوگے انگیر اش کتگ ءُ اود ءَ عبدالرشید اش آوار جتگ ءُ برتگ کہ چریشی ءَ پد آئی ءِ درگت ءَ ھچ ھال نیست اِنت-

بلوچ یکجھتی کمیٹی ءِ چیردستی ءَ چاگی ءِ دمگ ڈالبندین ءَ برجم دارگ بوتگیں راجی مُچی ءَ ھزارانی کچ ءَ مردماں بھر زرتگ –

شھرے کُنڈ ءَ ڈنو پٹ ءَ مروچی سھب ءِ ادار یازدہ ءَ بندات بوتگیں اے مُچی بیگاھے ادار پنچ ءَ آسر بوتگ –

ڈالبندین ءِ دمگی اھوالکارانی گوشگ انت کہ ڈالبندین ءَ چد ءُ پیسر انکس مزنیں مُچی کنگ نہ بوتگ کہ ایشی ءِ تہ ءَ اولی رند انت زھگ ءُ زالبولاں ھوار مزنیں کچے ءَ مھلوک ءَ بھر زرتگ –

اھوالکارانی رِد ءَ مچی ءَ بھر زورکیں مردمانی تہ ءَ گیشتریں کچ ورنایانی بوتگ کہ ڈالبندین ءُ چاگی، رکشان ڈویژن ءَ دگہ ھند ءُ دمگانی مھلوک اتکگ انت –

چاگی ءِ دمگ ڈالبندین ءَ بلوچ یکجھتی کمیٹی ءِ چیردستی ءَ برجم دارگ بوتگیں اے مُچی بلوچ چکچینی ءِ یاتگاری ءِ نام ءَ دارگ بوتگ –

اے مُچی ءَ بیگواھیں مردمانی سیاد ءُ وارساں ھم بھر زرتگ ءُ آیانی دست ءَ وتی دوستیگیں مردمانی اکس بوتگ انت –

راجی مُچی ءَ بلوچ یکجھتی کمیٹی ءِ سروک ڈاکٹر ماہ رنگ بلوچ، صبغت اللہ شاہ جی، وھاب بلوچ، سمی دین، ڈاکٹر صبیحہ بلوچ ءَ ھوار دگہ ترانکاراں تران کتگ-

ڈاکٹر ماہ رنگ بلوچ ءَ تران کنان ءَ گوشتگ کہ ریاست بلوچاں ھمے باور کنائینگ ءَ انت کہ ادے نندوکیں مردمانی ارزشت چوں رستر ءَ گنتر انت ءُ آیانی مرگ ءُ زند ریاست ءِ دست ءَ انت –

آئی ءَ گوشتگ کہ بلوچ چد ءُ گیشتر جون چست نہ کنت بلکیں نوں آیاں ھر یک بیگواھیں مردمے سلامتی ءَ لوٹ ایت ءُ ھمے وڑ وتی سرڈگار ءُ مڈی لوٹ انت – اے سرڈگار ءِ پھازگ ءِ ھاتر ءَ مئے کماشاں زوراکی ءِ دیمپانی کتگ بلے ایردستی نہ منّ اِتگ –

آئی ءَ گوشتگ کہ بلوچاں لوٹ ایت کہ وتی ھاموشی ءَ ھلاس بہ کن انت ءُ پاکستان ءَ ھوار سرجمیں جھان ءَ بہ گوش انت کہ آیاں چکچینی ھچ وڑ ءَ نہ لوٹ ایت –

آئی ءَ گوشتگ کہ سرجمیں جھان ءَ اے کلوہ ھم دیگ بہ بیت کہ ادا ھر مڈی ءِ کہ ھست انت آ بلوچانی ئیگ انت ءُ آیانی مرزی ءَ ابید ھچ وڑیں پریاماں نہ منّ ایں –

ایندگہ ترانکاراں گوشتگ کہ انسانی ھکانی لگتمالی ءَ ھوار بلوچستان ءَ مھلوک ءِ لٹ ءُ پل ھم برجاہ انت کہ آئی ءِ درور چاگی انت –

آیاں گوشتگ کہ ادا سُھر ءَ ھوار دگہ بازیں مادنے ھست بلے اد ءِ مردم انگت بے وس انت –

ترانکاراں گوشتگ کہ چاگی ءَ ایٹمی تجربگ ءِ سوب ءَ تباہکاری ءِ سان ءَ مھلوک سانمند بوگ ءَ انت بلے آیانی رکینگ ءِ ھچ وڑیں گامگیج زورگ بوگ ءَ نہ انت –

ترانکاراں چہ انسانی ھکانی گلاں گوں لوٹ کتگ کہ آ انسانی ھکانی لگتمالی ءِ بگیری ءَ نوٹس بہ زور انت –

اے مُچی ءَ پیش چاگی ءَ پنچ شمبے ءِ روچ ءَ انٹر نیٹ بند کنگ بوتگ انت وھدیکہ دمگی اھوالکارانی رِد ءَ مروچی سھب ءَ موبائیل ھم بند کنگ بوتگ انت اشی ءَ ابید پی ٹی سی ایل لینڈ لائن ھم بند کنگ بوتگ انت –