TBP Balochi

بلوچ لبریشن آرمی ءَ وتی آفیشل چینل ھکل ءَ ھزدار ءَ پاکستانی پوج ءِ کارمندانی بروکیں کوچ ءِ سر ءَ بوتگیں اُرش ءِ تامر شنگ کتگ –

گوستگیں روچ ءَ چہ ھزدار ءَ شست کلومیٹر دور کھوڑی ھند ءَ زورگیریں پاکستانی پوج ءِ کارمندانی چہ روالپنڈی ءَ بروکیں بس تراکناکیں شوروانی نشانگ جوڈ کنگ بوتگ ات اُرش ءَ بس سرجمیں پُرشتگ ات چریشی ءَ پاکستانی پوج ءَ مزنیں کچے ءَ جانی تاوان رستگ ات –

اُرش ءِ زمہ واری بلوچ لبریشن آرمی ءَ منّ اِتگ ءُ ھمے گوشتگ کہ اے اُرش بی ایل اے انٹلی جنس ونگ “زراب” ءِ ھال دیگ ءَ بی ایل اے ءِ گچینی ٹولی اسپیشل ٹیکٹیکل اسکواڈ بزاں اِس ٹی او اِس ءَ کُتگ –

ھکّل ءِ نیمگ ءَ شنگ بوتگین تامر ءِ تہ ءَ گندگ بیت کہ ھمے کوچ شھدگ ءِ سر ءَ پیداک انت کہ مزنیں تراکے ءِ زد ءَ کئے ایت – تامر ءِ تہ ءَ اُرش ءُ ائی ءَ پد اِس ٹی او اِس ءِ سرمچار ھم پیش دارگ بنت –

زانگ بہ بیت ھمے سال ءِ بندات ءَ گوں بی ایل اے ءِ اُرشانی تہ ءَ گیشی گندگ آیگ ءَ انت –

چدوپیسر نُھ جنوری ءَ ھزدار ءِ دمگ زھری ءَ ھپتاد سرمچاراں گیش دمگ وتی انگیر ءَ کُتگ ات ءُ اودا لیویز تانہ، نادرائے کارگس ءُ مونسپل کمیٹی ءِ سر ءَ وتی انگیر داں دھ ادار ءَ برجاہ داشتگ ات ءُ پدا رند ءَ مانداشتگ اِت انت –

چدوپیسر تربت ءِ نزیک ءَ پاکستانی پوج ءِ کارمندانی بروکیں کاروان ءَ ھواریں کوچ ءِ سر ءَ بلوچ لبریشن آرمی ءِ مجید برگیڈ ترندیں اُرش ءِ کتگ ات –

روکپتی ءُ رودراتکی بلوچستان ءِ سیمسری دمگ تپتان ءَ وت ماں وتی جنگ ءُ چوپ ءَ یک مردمے بیران ءُ یکے زدگ بیتگ-

اھوالانی رد ءَ دو ٹکانی کوھنیں دلرنجی ءَ گوستگیں روچ ءَ دوبر ھنے ٹکانی مردماں وت ماں وت جنگ ءُ چوپ کتگ ءُ یک مردمے بیران ءُ یکے زدگ بیتگ-

وئیل تپتان ءِ دمگ گوھرکوہ ءَ پیش اتکگ کہ اود ءَ ھبیب میر بلوچزئی ء علم خان بیران ءُ ایوب میربلوچزئی ء جما زدگ بیتگ کہ ھردوک گوھرکوہ ءِ جھمنند انت-

وئیل دیرگیں دلرنجی ءِ سبب ءَ پیش اتکگ کہ اود ءَ یکے دومی ءَ گپانی ٹوک داتگ چریشی ءَ برانز گرگ ءَ جنگ ءُ چوپ بیتگ –

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں 24 جنوری یکشمبے ءِ بیگاہ ءَ پنچ ءَ تربت ایم ایٹ شھدگ سر ءَ جوسک ھند دگ بند کتگ گوادر ءُ تربت ءَ چہ شال ءَ رؤکیں گاڑی پٹ ءُ پول کتگ اَنت ھمے میان ءَ سرکاری شرکت ءِ پھازدار دزگیر کتگ ءُ آئی ءِ سلاہ گوں وت برتگ-

آئی ءَ گْوشتگ کہ ایم ایٹ شھدگ سر ءَ پٹ ءُ پول میان ءَ گوادر ءَ چہ تربت ءَ رؤکیں بس ءَ چہ پاکستانی چیریں ادارھانی ملٹری انٹلیجنس ( ایم آئی ) ءِ یک کارمندے یے محمد شریف ء نور محمد چہ بس ءَ ایر گپتگ ءُ کُشتگ – اے مرد ءِ پجّار آئی ءَ چہ دزکپتگیں سرکاری کاگد ءُ سروس کارڈ ءَ بتگ-

جارکش ءَ گوشتگ گوادر ءُ تربت ءَ چہ شال ءَ رؤکیں مزن ءُ ھاسیں شھدگے کہ سرمچاراں بازیں کلاکاں چہ بند کتگ ءُ پٹ ءُ پول برجاہ داشتگ ءُ چیریں ادارہ ءِ کارمند کُشتگ-

جارکش ءَ گوشتگ بلوچستان لبریشن فرنٹ ءَ پٹ ءُ پول میان ءَ چیریں ادارھانی کارمند ءِ کوش ءُ شرکت ءِ پھازدات ءِ سلاہ دستیگ کنگ زمہ واری ءَ منّ اِیت ءُ اے اِھد کنت کہ بلوچستان بلوچانی سرڈگار اِنت ءُ بلوچ سرڈگار ءِ پُسگ آجو بلوچستان ءِ مول ءُ مرادانی ھاتر ءَ ھچ وڑیں دیمونی ءَ چک ءُ پد نہ بنت-

بلوچستان ءِ دمگ کیچ ءَ ناشناسیں سلاہ بندیں مردماں تیرگواری کتگ یک مردمے کُشتگ-

کُشگ بیتگیں مردم ءِ پجّار غلام جان ء محمد عصا نام ءَ چہ بیتگ-

تیرگواری ءِ وئیل تربت کلات ھند سر ءَ بیتگ-

دمگی اِھوالکار رِد ءَ کُشگ بیتگیں مرد لیویز کارمندے یے بیتگ وھدے کہ اشی ءِ نزیکی ھکومتی پلامرزی ٹولی بزانکہ ڈیتھ اسکواڈ ءَ چہ بیتگ-

وئیل سوب انگت زانگ نہ بیتگ-

بلوچستان ءِ تیاب دپی شھر چہ گوادر ءَ پاکستانی پوج ءَ دو ورنا آوار جنگ ءَ پد بیگواہ کتگ اَنت-

گیشیں ھالانی رِد تیاب دپی شھر چہ گوادر ءَ پاکستانی پوج ءَ دو ورنا بھادر ء نصیر جھمنند دشت کروس تنک ءُ شُعیب ء قادر بخش جھمنند کروس تنک آوار جتگ ءُ بیگواہ کتگ اَنت-

اِھوالکار رِد ءَ اے دوئیں ورنا بیست پنچ جنوری ءَ ھما وھد ءَ آوار جنگ ءُ بیگواہ کنگ بیتگ اَنت وھدے کہ دوئیں چہ گوادر ءَ درتکگ ءُ دیم پہ دشت ءَ روگ ءَ بیتگ اَنت-

زانگ بہ بیت گوستگیں روچ ءَ ھم گوادر ءِ دمگ گھٹی ڈھور ءَ دو ورنا زاکر ء سومار ءُ نسیم حمید پاکستانی پوج ءَ آوار جتگ ءُ بیگواہ کتگ اِت اَنت-

مستونگ ءَ لینانی دراجکشیں بندی ءَ چہ دمگی مردماں شال – کراچی بُنجاھی شھدگ زھرشانی کنان ءَ بند کتگ-

یک ھپتگے ءَ دراجکشیں بندی ءَ پد مستونگ پڑنگ آباد ءِ جھمنند دگانی سر ءَ درتکگ اَنت ءُ جنگل کراس سر ءَ شال کراچی بُنجاھی شھدگ بند کتگ چریشی ءَ گاڑیانی روگ آیگ مھتل بیتگ-

زھرشانی کنوکانی تہ ءَ زالبول ءُ زھگ ھم ھوار اَنت- ھائی وے سر ءَ مُچ بیتگ اَنت، آیاں لینانی دراجکشیں بندی سر ءَ وتی نہ اُمیتی ءُ زھر درشان کنان ءَ ناراہ جتگ – آیاں گوشتگ یکو شکایت کنگ ءَ اَبید واکدار پھازی ءَ دیر کنگ ءَ بے سوب بیتگ چریشی ءِ سبب ءَ چہ آ یک ھپتگے ءَ تاں لین ءَ چہ زبھر اَنت-

زھرشانی کنوکاں اے اِھد کتگ کہ دانکہ آیانی لوٹ سرجم نہ بنت ءُ لین آرگ نہ بنت گُڑا آ وتی زھرشانی ءَ برجاہ دار اَنت- جاور یکشل ءَ نگیگ اَنت، دمگی واکدار زھرشانی کنوکانی گوم ءَ جیڑھے گیشینگ ھاتر ءَ گپ ءُ تران کنگ جُھد ءَ اِنت-

راجی مُچی

ٹی بی پی شونگال

چاگی بلوچستان ءِ ھما پشت کپتگیں جاہ انت کہ اود ءَ زمین ءِ گران بھائیں مڈیاں پرگنجی انت، بلے اود ءِ مردم انگت ءَ زند ءِ بنکی آسراتیاں چہ زبھر انت – چاگی عرب بادشاھانی چَرز ءِ شکار ءُ چین ءُ دگہ زَرکارانی سھر ءِ بنجل جوڑ بیتگ، بلے آئی ءِ راستیں نھاد ءَ اود ءِ مھلوک دیگ ءَ انت-

بلوچ نسل کشی ءِ یادگاری روچ ءِ وھد ءَ 25 جنوری ءَ بلوچ یکجھتی کمیٹی ءَ چاگی ءِ ھند دالبندین ءَ یک راجی مُچی یے برجم داشتگ ات، چریشی ءَ ھزاراں مردماں بھر زرتگ ات- اے مُچی ءَ ریاستی مزن واکداراناں یک تچکیں کلوھے داتگ کہ بلوچ نسل کشی ءِ پالیسی ھچ رنگ ءَ اوپار کنگ نہ بیت اِنت ءُ تران کنوکاں اے کول کتگ بلوچ کماشانی گاماں روان کن ایں ءُ ریاستی زوراکی ءِ ھلاپ ءَ سیاسی گھگیری ءَ برجاہ داریں ءُ راجی ھکانی واستا جد ءُ جھد ءَ گیش ترند کن ایں-

چین ءِ کمیونسٹ سرکار ءُ کینیڈا ءِ کمپنی بیرک گولڈ چاگی ءِ ھند سیندک ءُ ریکوڈک ءَ سھر ءُ چاندی ءِ کھناں دزگٹ انت ھمے وڑ سعودی ءِ سرکار ھم ریکوڈک پریام ءَ زرکاری ءِ واھشت ءَ کنگ اِنت- بلوچ راجی رادارہ اے پریاماں لُٹ ءُ پُلی گوش انت پرچاکہ نَپ بلوچ مھلوک ءَ ابید دری ڈیھی سرکار ءُ کمپنیاں رس اَنت – سالانی سال اے برجاھیں مڈیانی لُٹماری ءَ چاگی ءِ مھلوک بدھالی ءِ جاوراں پرینتگ-

بلوچ یکجھتی کمیٹی ءَ نا ایوک ءَ بلوچ مھلوک ءَ زورانسری بیگواھی ءُ ریاستی زُوراکیانی ھلاپ ءَ یکجاہ کنگ ءِ بلکیں دالبندین ءَ اے راجی مُچی ءَ بلوچ مڈیانی پھریزگ ءُ دری زرکارانی لٹ ءُ پلی منسوبھانی ھلاپ ءَ راجی گھگیری ءِ بیرک برز کتگ-

دالبندین ءَ چہ سرجمیں بلوچستان ءَ مھلوک ءِ پرجوشیں بھر زیرگ ءَ اے منانک پدر کتگ کہ بلوچ راج وتی جد ءُ جھد ءَ نا ایوک ءَ یکجاہ انت بلکیں سیاسی گھگیری ءِ اے درچ ءَ مھکم بیت ءُ برانز گپت انت- گوستگیں راجی مُچیانی سان پہ بلوچ راجی زرمبشت ءَ دور رس بنت ءُ اے جد ءُ جھد ریاستی زوراکی ءِ ھلاپ ءَ یک مھکمیں سیاسی زرمبشتے ءِ دروشم ءَ دیم ءَ کیت انت-

بلوچستان ءِ دمگ کلات ءَ مڈی بروکیں گاڑیانی سر ءَ سلاہ بنداں اُرش کتگ-

گوستگیں شپ ءَ کلات ءِ دمگ منگچر ءَ مڈی بروکیں سے گاڑیانی سر ءَ سلاہ بندیں مردماں تیرگواری کرتگ ءُ گاڑیانی ٹائر تراکینتگ انت ءُ دگہ تاوان داتگ انت-

ھمے ماہ ءَ بلوچستان ءَ مڈی بروکیں گاڑیانی سر ءَ اے سیمی وئیل انت ایشی ءَ پیش نوشکی ءَ دو جتا جتائیں وئیلاں ھشت گاڑی نشانگ کنگ بیتگ انت کہ آیانی زمہ واری بلوچ لبریشن آرمی ءَ زرتگ انت-

بلوچستان ءَ جتا جتائیں وھداں بلوچ آجوئی لوٹوکیں سلاہ بندیں گلانی نیمگ ءَ مڈی بروکیں گاڑی نشانگ بوگ ءَ انت اے گل اے اُرشاں بلوچانی مڈیانی لُٹ ءُ پلگ گوشگ ءَ انت-

زانگ بہ بیت تربت ءَ مجید بریگیڈ ءِ اُرش ءِ وھد ءَ بلوچ لبریشن آرمی ءَ وتی درشان ءَ گوشتگ بی ایل اے بلوچانی مڈیانی لُٹ ءُ بروکیں شریداریں مال برداریزن گاڑیانی واھنداں سرپد کنت اِنت کہ آ بلوچ مڈیانی لُٹگ ءِ شریداری ءَ دزکش بہ بنت اِنت اگاں ناں گڑا آیانی گاڑی سوچگ بنت اِنت-

کلات ءَ بیتگیں اُرش ءِ زمہ واری انگت ءَ کس ءَ نہ زرتگ-

روکپتی بلوچستان ءِ دمگ سرباز ءَ ایرانی لشکر ءَ یک ورنایے آوار جنگ ءَ پد بیگواہ کرتگ-

گیشیں اھوالانی رد ءَ سرباز ءِ ھند ملک آباد سرکور ءَ ایرانی چیریں ادارھانی کارمنداں یک ورنایے آوار جتگ ءُ گون وت برتگ-

آوار جنگ بیتگیں ورنا ءِ پجار امیر بلوچ ء رھیم بکش جھمنند اوریز سرکور ءِ نام ءَ زانگ بیتگ –

اھوالانی امیر یک دینی مدرسے ءَ وانگ ءَ انت کہ آ گوستگیں روچ ءَ ملک آباد ءِ بازار ءَ لس پوشاکی کارندھاں آوار جتگ ءُ برتگ کہ چریشی ءَ پد آئی ءِ بارو ءَ دگہ اھوال نہ بیتگ اَنت-

زانگ بہ بیت گوستگیں دو روچ ہیش اَچ راسک ءَ ھم دینی وانگ جاھے ءَ یک ورنایے آوار جنگ بیتگ اَت-

گوستگیں دو روچانی توک ءَ اے دونی وئیل انت کہ رپورٹ بوگ ءَ اِنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ کوھلو ءُ بولان ءِ اُرشاں جونئیر آفیسر ءَ ھوار سے کارمند کوش، پوج ءُ ڈیتھ اسکواڈ ءِ ھپت کارمندانی ٹپی کنگ زمہ واری منّ اِتگ-

بلوچستان لبریشن فرنٹ ءِ جارکش میجر گْوھرام بلوچ گْوشتگ مئے سرمچاراں 25 جنوری شمبے ءِ شپ ءَ ھشت ءَ کوھلو ءِ دمگ نوئے شم ءَ لنڈ ءِ ھند سر ءَ برجاھیں ایف سی چیک پوسٹ مزنیں سلاھاں چہ نشانگ کتگ چریشی ءِ آسر ءَ ایف سی ءِ دو کارمند لانس نائیک راھب حسین ء غلام حیدر ءُ دومی مرتگیں سپاھیگ ءِ سیادی کشمیر ءَ گوشگ بیگ ءَ اِنت-

جارکش ءَ گْوشتگ زورگریں پوج ءِ گیش بیتگیں سسّائی زور ءُ بے دلی ءِ سبب ءَ سرمچارانی اُرشاں وتی مرتگیں کارمندانی پجّار ءُ آیانی کچ ءَ چیر دیگ جُھد کنت بلے باز وھد ءَ کُشگ بیتگیں کارمندانی کھول نیمگ ءَ چہ آیانی پجّار پدر کنگ بنت-

جارکش ءَ گْوشتگ کہ سرمچارانی سوبمندیں اُرش ءَ پد پوج ءَ بُرز ءَ سرویلنس ڈرون بال داتگ سرمچاراں نشانگ کتگ ءُ دور داتگ – وھدے سرمچاراں ڈرون کیمرہ جتگ ءُ دور داتگ گُڑا پوج ءِ کُمک ءُ ڈرون چست کنگ ھاتر ءَ دمگی کُشندہ ٹولی ( مری سیکیورٹی) ءِ کارمند وئیلجاہ ءَ سر بیتگ اَنت کہ آیانی سر ءَ سرمچاراں آ ھم اُرش کتگ چریشی ءِ آسر ءَ ڈیتھ اسکواڈ ءِ چار کارمند ٹپی بیتگ اَنت-

جارکش ءَ گْوشتگ کہ دگہ اُرشے سرمچاراں 25 جنوری ءِ شپ ءِ یازدہ نیم ءَ بولان ءِ دمگ آپ گم ءَ شال سبی شھدگ سر ءَ برجاھیں زورگریں پاکستانی پوج ءِ چیک پوسٹ سر ءَ اُرش کتگ، اُرش یازدہ نیم ءَ تاں دوازدہ ءَ برجاہ بیتگ – اُرش ءَ سرمچاراں نوکیں ءُ وتکاریں سلاہ کارمرز کتگ، چریشی ءِ چہ دُژمن ءِ یک کارمندے یے مرتگ ءُ سے ٹپی بیتگ اَنت-

جارکش ءَ گْوشتگ زورگپتگیں بلوچستان ءِ کُنڈ کُنڈ ءَ بلوچ سرمچار زورگریں ریاستی پوج ءُ آئی ءِ چاریگاں نشانگ کنگ ءَ اَنت کہ اشی ءِ زھراں پروش وارتگیں ریاستی پوج لَس مھلوک سر ءَ اُرش ءُ لَٹ ءُ کُٹ ءُ لُٹ ءُ پُل ءِ دروشم ءَ کش اِیت-

جارکش ءَ گْوشتگ کہ بی ایل ایف اے اُرشانی زمہ واریاں منّ اِیت بلوچستان ءِ وتواجھی ءَ تاں زورگریں پوج ءُ آئی ءِ چاریگاں نشانگ کنگ اِھد ءَ کنت-