TBP Balochi

کیتھارینابلوم ءِ گاریں اِزت

گدار(ناول)

ندکار :ھائنرش بول

نومی بھر

رجانکار: شاھد اھمد

دی بلوچستان پوسٹ

چار ءُ تپاس ءِ کارانی تہ ءَ ھمے واستا وھد درکار بوت، وھدے کہ کیتھارینا بلوم ءَ گالردانی یک یک لبزے ءَ را گوں ھورتی ءَ دلگوش کتگ اَت ءُ ھما وھد ءَ کہ ھر گالرد اِش نہ کُتگ اَت ئِے داں کہ آ ساھت ءَ کہ آ ریکارڈ کنائینگ نہ بوتگ ات۔

پہ درور آئی ءِ گُشگ اَت کہ مردین آدم ” دیم ءَ روگ ءِ“ کوشست اِش کُتگ اَت۔ آئی ءَ را ریکارڈ کنگ ءِ وھد ءَ نبشتہ کُتگ اَت۔ ” مردین آدم (فریفتہ)دروھوک بوتگ اِت اَنت“ وھدے آئی ءِ سر ءَ پبلک پراسیکوٹر ءُ بائزمینے ءِ گون ءَ گپ ءُ ھبر کہ بوتگ اَت گڑا کیتھارینا ءَ سک زھر بوگ ءِ درشانی کُت۔ گڑا آئی ءَ درشان کنان ءَ گُشت کہ ”فریفتہ“ دروھگ بوگ ءِ متلب اِنت کہ درشان چہ دوئیں نیمگ ءَ بوتگ اَت۔ “ بلے ”دیم ءَ روگ ءُ“ واھشت ءِ یک نیمگ ءَ درشانی اِنت۔ پَسّو ءِ تہ ءَ ھبر کنوکاں نہ منّ اِت کہ اِنچُکیں کسانیں ھبرے نہ اِنت ءُ ایشی ءِ سبب ءَ چار ءُ تپاس ءِ تہ ءَ ھم دیر بہ بیت، گڑا آ آئی ءِ سر ءَ گوں ترندی ءَ برانز گپت کہ آ ھما وھد ءَ موادانی سر ءَ دزنبشت نہ کنت وھدے کہ ”دیم ءَ روگ ءِ“ جاگہ ءَ ”فریفتگی“ نبشتگ مہ بیت، پرچاکہ آئی ءِ واستا اے پرک مزنیں ارزشتے داشتگ اَت۔ آئی ءِ مرد ءَ گوں سِست ءُ سید ءِ سبب ھمیش بوتگ اَت کہ آ آئی ءِ مرزی ءَ ابید وتی واھشتانی پورا کنگ لوٹ کُرتگ اَت چمیشکا ”فریفتگی“ ءَ چہ گیش زبردستی ءُ زور ءِ کرد بوتگ اَت۔

ھمے کِسم ءِ سبوتیں لبز ”شفیق“ گوں ھورتی ءَ دیگ بوت، چہ ایشی ءِ کارمرد، آئی ءَ بلورنا کھول ءِ ھاتر ءَ کُتگ اَت۔ ریکارڈ ءِ تہ ءَ آئی ءِ جاگہ ءَ ” مھروان“ نبشتگ اَت۔ کیتھارینا ءِ گمان اَت کہ مھروان ءِ جاگہ ءَ ”شفیق“ نبشتہ بکنت۔ بلے چہ ایشی ءَ ابید لبز ” مونس“ کارمرز کنگ ءَ گُشتگ اَت۔ (سبوت ایش اَت کہ شپیک ءِ کارمرز بے بُن اَت) گڑا آئی ءَ ایشی ءِ سر ءَ برانز گپت ءُ گْوشگ ءَ اَت کہ ”مھروان ءُ مونس بوگ“ ءِ سیادی چہ گموار ءَ بلکل نہ اِنت ءُ بلورنا والا آئی ءِ گون ءَ چہ جوانیں اندازگے ءَ پیش اَتک۔

ھمے میان ءَ چہ بلڈنگ ءَ نشتگیں مردماناں جُست ءُ پُرس کنگ بوت۔ ایشانی تہ ءَ کس ءَ کیتھارینا نہ زانتگ اَت یا آئی ءِ بارو ءَ سک باز کم زانت ھست اَت۔ کدی کدی روچ ءِ گُڈسر ءَ گوں آئی ءَ گند چہ لپٹ ءِ آیگ ءُ روگ ءَ بوتگ اَت، آیاں اے الم مالوم بوتگ اَت کہ سھریں رنگ ءِ پوکس دیگن آئی ئیگ اِنت۔ لھتینانی ھمے ھیال اَت کہ آ پرائیوٹ سیکرٹری ءِ بستار ءَ کار ءَ اَت۔ لھتے ھمے پھمگ ءَ اِت اَنت کہ آ ڈیپارٹمنٹل اسٹورے ءَ ملازمے اَت۔ آ مردمانی گپ اِت اَنت کہ آ مدام ساپیں پُچّانی گون ءَ گندک ءَ گندگ بوتگ اَت بلے مردمانی گون ءَ نندگ ءُ پاد آیگ ءَ آ سک تکانسر اَت۔

ھشتمی منزل ءَ کہ اود ءَ کیتھارینا ءِ گور ءَ ءُ دومی پنچ اپارٹمنٹ اَت۔ چہ ھمیشاں دو کیتھارینا ءِ بابت ءَ کمو باز مالومات ھست اِت اَنت۔ مسز سمل کہ ”ھیر ڈرسنگ سلون“ ءِ واھند اَت ءُ روح ویلڈل، کہ بجلی ءِ کار کنوک اَت۔ اے دوینانی گور ءَ کہ بیان اِت اَنت کہ کیتھارینا ءِ گور ءَ یکے روگ ءُ آیوکے بوتگ اَت۔ مسز سمل ءِ گُشگ اَت کہ ھر دومی ءُ سیمی ھپتگ ءَ اے مھمان پابند ءِ گون اتکگ بوتگ۔ کہ اُمر ءِ کساس ءَ چِل سال ءِ بوتگ۔ جسمانی ھساب جاندراہ ءُ گندگ ءَ شریں لوگے ءِ مالوم بوتگ اَت۔ مسٹر روح ویلڈل ءِ گُشگ اَت کہ مھمان ورنایے اَت، کہ کدی تھنا اَت، ءُ کدی بلوم ءِ ھمراھی ءَ گندگ بوتگ اَت۔ آئی ءِ اے آیگ ءُ روگ آئی ءَ سال ءِ تہ ءَ ھشت یا نو براں دیستگ اَت۔ بس ھمے گند ءُ نند اَنت کہ من دیستگ اَنت۔ ھر چی کہ من نہ دیستگ من ءَ آیانی بابت ءَ ھچ گُشت کُت نہ کناں۔

بلوچ اسٹوڈنٹس ایکش کمیٹی ءِ چیردستی ءَ کتاب کاروان ءِ درچ ءَ بلوچستان ءَ ھوار کوہ سلیمان ءِ دمگاں اسٹالانی سر ءَ پورسز ءِ کریک ڈاؤن برجاہ اَنت-

گل ءِ بنجاھی جارکش اظھر بلوچ ءَ گوشتگ داجل رجن پور ءَ برجم بیوکیں کتاب اسٹالانی سر ءَ پنجاپ پولیس ءَ بیڑ برتگ ءُ مئے سنگت زورانسری دزگیر کتگ ءُ گون وت برتگ انت ءُ کتاب اسٹال زورانسری بندکنائینتگ-

آئی ءَ گوشتگ مئے ھمراہ پولیس ءَ دزگیر کتگ ءُ برتگ انت ءُ آیانی گون ءَ رھوت بوگ ءَ نہ اِنت-

بلوچ اسٹوڈنٹس ایکشن کمیٹی ءِ بنجاھی جارکش ءَ گوشتگ گوستگیں روچاں ڈیرہ گازی، تونسہ شریف ءُ راجن پور ءَ ھوار کش ءُ گوری دمگاں وانگی ءُ زانشتی پُرکاریاں پولیس یکشل ءَ برگ ءُ گنڈا گردی کنگ ءُ نودربر ءُ سیاسی باسکانی ترسینگ ھمک روچی کار اش جوڑ بیتگ اے یک سک ءَ بژنی گپے-

آئی ءَ گوشتگ ھرکجا ما وانگی ءُ زانشتی تکاں گیش کنگ ءُ ڈیھ ءَ وانگی کمیاں پورا کنگ ءِ جھد ءَ انت ءُ ورنایاں وانگ ءِ نیمگ ءَ آرگ ءَ انت بلے اود ءَ سرکار ءُ سرکاری ادارہ وانگ دشمنی ءَ کاینت ءُ دابیں پرکاریاں دار اَنت کہ سرپد بوگ ءَ برز انت-

جارکش ءَ گوشتگ پیش ءَ گوادر ءَ مئے چار ورنا گیر کانونی دزگیر کنگ ءُ آیانی ھلاپ ءَ ایف آئی آر نبشتگ کنگ بیتگ انت ءُ نی داجل ءُ برجاھیں کتب اسٹاب ءِ سر ءَ بیڑ برگ ءُ ھپت ھمراھانی دزگیری کنگ ءُ تھانھاں برگ بیتگ اَنت ءُ ما یک رندے پد ءَ سرکار ءُ آئی ءِ ادارھاں تچک کنگ لوٹ ایں کہ چوشیں کارپداں گستاھی بہ کن ات اگاں ناں ترندیں گھگیری ءِ راہ ءَ روان بہ ایں-

بلوچستان ءِ دمگ کیچ ءِ ھند زامران ءَ پاکستانی پوج ءِ لشکر کشی کنگ ءَ اِنت، ھمے میان ءَ تیرگواریں ھیلی کاپٹراں جتاجتائیں ھندانی سر ءَ شیلنگ کتگ-

ھالانی رِد ءَ گوستگیں سے روچ ءَ چہ پاکستانی پوج زامران ءِ جتاجتائیِ دمگاں پوجی لشکر کشی ءَ دلگوش اِنت- مروچی سُھب ءَ چہ تربت ھیڈکوارٹر ھیلی کاپٹرانی بالی گندگ بیتگ-

دمگی اِھوالکار رِد ءَ زامران ءِ جتاجتائیں دمگاں ھیلی کاپٹراں شیلنگ کتگ وھدے کہ پوج ءِ مزنیں کچے ءَ دمگ ءَ پیشگامی کنگ ءَ اِنت-

تنی وھدے ھچ وڑیں دزگیری یا جانی تاوان درگت ءَ ھچ وڑیں ھال نیست وھدے کہ واکدات نیمگ ءَ اے درگت ءَ ھچ وڑیں درشان دیم ءَ نیتکگ-

بلوچستان ءِ دمگ نوشکی ءَ سلاہ بندین مردماں پاکستانی پورسز ءِ بنجل نشانگ کتگ-

گوستگیں شپ ءَ سلاپ بندیں مرماں نوشکی ءِ ھند ھژدہ خول ءِ ھند ءَ پاکستانی پوج ءِ بنجل نشانگ کتگ-

دمگی مردمانی رد ءَ نیم ادارہ ءَ گیش تیرگواری ءُ تراکانی توار اشکنگ بیتگ انت-

اُرش ءَ پد مروچی سھب ءَ پوج بازیں کچے ءَ ھژدہ خول ءِ نیمگ ءَ ھوار ھوار ریکو ءِ ھند ءَ گندگ بیتگ-

گوستگیں روچاں نوشکی ءِ شھر ءَ پاکستانی پوج ءِ کاروان ءِ سر ءَ راہ بندگ ءُ نشانگ کنگ بیتگ ءُ ایشی ءَ پیش مڈی بروکیں پنچ گاڑی ھم نشانگ کنگ بیتگ انت کہ اے اُرشانی زمہ واری بلوچ لبریشن آرمی ءَ زرتگ ات اَنت-

مروچی بیتگیں اُرش ءِ زمہ واری تنی وھدی کس ءَ نہ زرتگ-

بلوچستان ءِ دمگ نوشکی ءُ گوادر ءَ پاکستانی پوج ءِ دست ءَ زورانسری بیگواہ کنگ بیتگیں سَے مردم یل کنگ بیتگ ءُ وتی لوگاں سر بیتگ انت-

گیشیں اھوالانی رد ءَ نوشکی ءَ دو سال پیش بیگواہ کنگ بیتگیں نقیب جمالدینی یل بیتگ ءُ وتی لوگ ءَ سر بیتگ-

ھمے وڑ بلوچستان ءِ تیابدپی شھر گوادر ءَ گوستگیں روچاں گھٹی ڈور ءَ پاکستانی پوج ءِ دست ءَ آوار جنگ بیتگیں زاکر سومار ءُ نسیم حمید یل بیتگ ءُ وتی لوگاں سر بیتگ اَنت-

بلوچستان ءَ تیرگواری ءُ ننگ ءِ دو جتاجتائیں دو زالبولاں ھوار چار مردم کُشگ بیتگ اَنت-

ھُزدار ءِ دمگ کوڑاسک ءَ ناشناسیں مردماں تیرگواری کتگ حق نواز ء نجم الدین سمالانی ءُ آئی ءِ لوگ بانُک حامدہ ء اللہ بخش سمالانی کُشتگ ءُ تتکگ اَنت-

وئیل ءَ پد واکدار ءَ لاش نادُراھجاہ ءَ برتگ اَنت – لیویز واکدار رِد ءَ پٹ ءُ پول برجاہ ءَ اِنت بلے کوش سوب زانگ نہ بیتگ-

جھل مگسی ءِ دمگ گوٹھ راھیجہ مگسی ءَ علی نواز مگسی نامیں مردمے ءَ وتی جنک سلطانہ بدکاری ءِ بھتام ءَ تیرگواری کتگ ءُ کُشتگ ءُ تتکگ-

لیویز ءَ لاش نادُراھجاہ ءَ برتگ کُتکار ءِ پٹ ءُ پول بندات کتگ-

دومی نیمگ ءَ کیچ ءِ دمگ تربت ءَ تیرگواری ءَ چہ یک مردمے بیران بیتگ-

پولیس رِد ءَ تربت ءِ دمگ بھمن ءَ پرپٹ سواریں ناشناسیں سلاہ بندیں مردماں تیرگواری کتگ ءُ ریاض نامیں مردمے کُشتگ-

دمگی اِھوالکار رِد ءَ کُشگ بیتگیں مرد ءِ سیادی سلاہ بندیں سرکاری پلامرزی ٹولی ءَ اِنت-

پنجگور ءِ دمگ پروم ءَ مروچی پاکستانی پوج ءَ طارق ء محمود ءُ حلیمہ ء دوست محمد زورانسری آوار جتگ اَنت بازیں کلاکاں پد آ یل داتگ اَنت-

طارق ء حاجی محمود اشی ءَ ساری ھم زورانسری آوار جنی ءِ نشانگ کتگ اَنت-

زانگ بہ بیت کہ حلیمہ بیگواھیں دوست محمد جنک اِنت، کہ عمان آرمی ءِ آفیسرے بیتگ، وھدے آ چُٹیانی گوازینگ ءَ وتی دمگ ءَ اَتکگ بیتگ گُڑا دوازدہ فروری دوھزار دوازدہ ءَ واتری ءَ روگ ءَ آ کراچی ائیرپورٹ ءَ چہ پاکستانی چیریں ادارھانی کارمنداں دگہ یک سیادے ءِ ھمراھی ءَ آوار جتگ ءُ بیگواہ کتگ اَت-

بلے پد ءَ سیاد یل داتگ وھدے کہ دوست محمد انگت بیگواہ ءَ اِنت-

حلیمہ دوست محمد ءُ طارق ءِ زورانسری بیگواھی ءِ درگت ءَ چہ واکدار درشان دیم ءَ نیتکگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں آواران ءِ دمگ کولواہ ءَ پاکستانی پوج ءِ کاروان اُرش ءِ نشانگ کتگ ءُ جانی ءُ مالی تاوان دیمپانی کنگ کپتگ-

جارکش ءَ گْوشتگ بیست ھپت جنوری ءِ سُھب یازدہ نیم ءَ سرمچاراں آواران ءِ دمگ کولواہ ءَ رودکان ھند سر ءَ سنگر گپتگ زورگریں پاکستانی پوج ءِ شش گاڑیانی کاروان نوکیں ءُ مزنیں سلاھاں چہ نشانگ کتگ، چریشی ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ گْوشتگ زورگریں پوج ءِ اے کاروان پوجی لشکر کشی ءِ نیئت ءَ چہ دمگ ءَ پُترگ ءَ بیتگ کہ سرمچاراں سنگر گپتگ ءُ نشانگ کتگ، اُرش ءَ پوج ءِ گاڑیاں ھم تاوان رس اِتگ-

جارکش ءَ گْوشتگ کہ بی ایل ایف اے اُرش زمہ واری ءَ منّ اِیت ءُ بلوچستان ءِ وتواجھی ءَ تاں زورگریں پوج سر ءَ مئے اُرش برجاہ بنت-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ مئے سرمچاراں تربت ءُ کلات ءَ دو جتا جتائیں کاروائیاں زورگریں پاکستانی پوج ءِ چاریگ کشتگ ءُ بلوچانی مڈیانی لٹ ءُ بروکیں گاڑی نشانگ کتگ انت-

جارکش ءَ گوشتگ بی ایل اے ءِ سرمچاراں گوستگیں روچ ءَ تربت کلاتک ءَ زورگریں پاکستانی پوج ءُ چیریں ادارھانی جوڑ کرتگیں وتگڑیں ڈیتھ اسکواڈ ءِ کارندک گلام جان ء مھمد عصا جھمنند ھپتو ڈگاری کھن تیرگواری کرتگ ءُ کشتگ-

آئی ءَ گوشتگ چاریگ گلام جان سلاہ بندیں ڈیتھ اسکواڈ ءَ بازیں وھداں ھوار بیتگ کہ دمگ ءَ لوگانی سر ءَ بیڑ ءُ زورانسری بیگواھیاں زورگریں پوج ءِ رھشونی ءَ تچک ءَ ھوار بیتگ ءُ دمگ ءَ سلاہ بندیں ٹولی ءِ ھواری ءَ دگانی بندگ ءُ دزی ءَ نشہ واپاری ءَ ھوار بیتگ-

آئی ءَ گوشتگ گلام جان ءِ سر ءَ راجی گداری ءِ بوگ ءَ سرمچاراں نشانگ کتگ ءُ کشتگ ءُ آئی ءِ پرپٹ ءُ دگہ ساز ءُ سامان دستیگ کتگ انت-

جارکش ءَ گوشتگ بلوچ لبریشن آرمی ءِ سرمچاراں سَے شمبے ءِ شپ ءَ کلات ءِ ھند منگچر ءَ رنگی کراس ءَ بلوچانی مڈیانی لٹ ءُ بروکیں ھواریں گاڑی نشانگ کتگ انت- سرمچاراں مڈی بروکیں سَے گاڑی نشانگ کتگ ءُ ناکارہ کتگ انت-

جارکش ءَ گوشتگ بلوچ لبریشن آرمی اے اُرشانی زمہ واریاں من ایت-

روکپتی بلوچستان ءِ دمگ دلگان ءَ ایرانی لشکر ءَ تیرگواری کنان ءَ یک مردمے کشتگ-

اھوالانی رد ءَ مروچی دلگان ءَ ایرانی لشکر ءِ لس پوشاکی کارندھاں یک مردمے ءِ سر ءَ ابید دست دیگ ءَ تیرگواری کتگ کہ چریشی ءَ آ مردم بیران بیتگ-

اھوالانی رد ءَ بیران بیتگیں مردم ءِ پجار ابول بامری ء شاپور جھمنند دلگان ءِ نام ءَ زانگ بیتگ-

بیران بیتگیں مردم ءِ جسد پورسز ءَ گون وت برتگ ءُ دگہ اھوال ھم انتزامیہ ءَ شنگ نہ کتگ انت-

زانگ بہ بیت سال دوھزار ءُ بیست ءُ چار ءَ روکپتی بلوچستان ءَ ایرانی لشکر ءِ تیرگواریاں بیران ءُ زدگ بیتگیں مردمانی کساس دو سد ءُ سِی ءُ شش بیتگ انت کہ ایشانی توک ءَ یک سد ءُ بیست ءُ دو مردم بیران ءُ یک سد ءُ چاردہ مردم زدگ بیتگ انت-