TBP Balochi

نوشکی ءَ ناشناسیں مردماں دَہ سالی ئیں زھگے کُشتگ-

کسان سالیں زھگ کوھی دمگ ءَ کُشگ بیتگ-

دمگی مردمانی رد ءَ مھمد عابد ء مھمد ھسن جھمنند سنکبر کیشنگی گوستگیں آدینگ ءَ وتی پسانی چارینگ ءَ شتگ بیتگ کہ پد ءَ بیگواہ بیتگ-

مروچی دہ سالی ئیں زھگ ءِ لاش کوھی دمگ ءَ دزکپتگ کہ آ ناشناسیں مردماں سِنگ جتگ ءُ کشتگ-

لاش بنکی میتگ ءَ آرگ بیتگ ءُ آ کل ءُ کسارات کنگ بیتگ-

بلوچستان ءِ دمگ نوشکی ءَ سلاہ بندیں مردمانی اُرش ءَ یک مردمے بیران-

تیرگواری ءِ وئیل نوشکی ءِ شھر نزیک ءَ مینگل کراس ھند سر ءَ بیتگ کہ اود ءَ سلاہ بندیں مردماں گاڑی اُرش ءِ نشانگ کتگ چریشی ءِ آسر ءَ طارق مینگل ء نیک نظر مینگل جھمنند کلی قادر آباد جاہ پہ جاھی مرتگ-

پولیس ءَ وئیل پدر کتگ گْوشتگ لاش میر گل خان نصیر ٹچینگ نادُراھجاہ برتگ-

وئیل ءِ سوب انگت زانگ نہ بیتگ بلے دمگی اِھوالکار رِد ءَ طارق مینگل سرکاری پلارمرزی ٹولی ءِ مردمے ءَ چہ زانگ بیتگ-

کسان سالی ئیں بچکے زورانسری آوار جنی ءِ ھلاپ ءَ کھول ءُ دمگ مردمانی زھرشانی برجاہ، یل کنگ لوٹ

بلوچستان ءِ دمگ چہ ھُزدار ءَ گوستگیں روچ ءَ سلاہ بندیں مردمانی دست ءَ پانزدہ سالی ئیں ورنایانی زورانسری آوار جنی ءِ ھلاپ ءَ کراچی، شال ءِ بُنجاھی شھدگ بیست کلاک ءَ چہ یکشل ءَ برجاہ ءَ اِنت-

انس ء احمد جھمنند گزگی ھُزدار ءِ کھول ءُ دمگ مردماں پہ سلامتی یل کنائینگ لوٹ کتگ-

بلوچ یکجھتی کمیٹی ھُزدار زون ءَ یک درشانے ءِ تہ ءَ گْوشتگ کہ اے زھرشانی ءِ سرجمی ءَ پلامرزی کنان ءَ ءُ راج ءَ چہ دزبندی اِنت کہ آ شھسوار چوک ( گھوڑا چوک) سر بہ بنت انس ءِ کھول ھمراھداری ءَ بہ کن اَنت-

بلوچ راھشون ڈاکٹر ماہ رنگ بلوچ ءَ گْوشتگ کہ پانزدہ سالی ئیں انس احمد چہ ھُزدار ءَ آوار جتگ ءُ برتگ اِنت چریشی ءَ پوج ءَ جتگ ءَ وتی ھمراھی ءَ برتگ آئی ءَ گْوشتگ کہ ھُزدار ءِ راج ءَ چہ دزبندی کن آں کہ آ پہ سلامتی یل کنائینگ ھاتر ءَ نندانک ءَ ھوار بہ بنت-

ڈاکٹت ماہ رنگ بلوچ ءَ گْوشتگ کہ زورانسری آوار جنی ءِ ھلاپ ءَ اے جُھد تھنا اسرمندیں کھول واستا نہ اِنت- اے بلوچ راجی رکینگ ءِ مُچی جُھد اِنت- مارا وتی انسانیت ءَ نوآبادکاراں چہ درکنگی اِنت کہ آیاں لَٹ ءُ کُٹ ءُ زوراک ءَ چہ دستیگ کتگ- اے زُلم ھچ کس ءَ بہ بکش اِیت، اد ءَ مئے چکاں ھم اناں-

کیچ ءِ دمگ تمپ ءَ گوستگیں شپ ءَ پاکستانی پوج ءَ بلوچی زبان ءِ آشوبی گشندہ استاد منھاج مکتار ءِ لوگ ءِ سر ءَ بیڑ برتگ ءُ تیرگواری کتگ-

اھوالانی رد ءَ گوستگیں شپ ءِ ساھت یک ءَ پاکستانی پوج ءُ ڈیتھ اسکواڈ ءِ کارندھاں تمپ کُنشکلات ءَ بلوچی زبان ءِ آشوبی گشندہ استاد منھاج مکتار ءِ لوگ ءِ سر ءَ بیڑ برتگ ءُ اود ءَ لوگ ءِ سر ءَ تیرگواری کرتگ ءُ یک دزبمبے چگل داتگ-

وئیل ءَ لوگ ءِ دروازگ ءُ دریگاں تاوان رس اتگ بلے دگہ جانی تاوانانی اھوال نیست-

زانگ بہ بیت چِد ءُ پیش بلوچی زبان ءِ آشوبی گشندہ منھاج مکتار ءِ لوگ پوج ءُ ڈیتھ اسکواڈ ءَ نشانگ کتگ بیتگ انت-

کیچ ءِ بنجاھی شھر تربت ءَ گوستگیں شپ ءَ پاکستانی پوج ءَ لوگانی سر ءَ بیڑ برتگ ءُ لوگ پٹ ءُ ھنڈ کتگ انت-

دی بلوچستان پوسٹ ءَ سر بیتگیں اھوالانی رد ءَ پاکستانی پورسز ءَ چارشمبے ءِ شپ ءَ تربت ءَ سنگانی سر ءَ لوگ لوگ ءَ پٹ ءُ پول کتگ انت- دمگی مردمانی گوشگ انت کہ ایف سی ءُ لس پوشاکی کارندہ لوگاں پترینان انت ءُ ھمک مردماں پجار نامہ ءَ لوٹگ ءَ انت ءُ ھمے وھد ءَ زلبولاں ترسینگ ءَ انت-

ھمے وھد ءَ دمگ ءِ جتا جتائیں جاھاں پورسز ءِ ناکہ بندی ءُ سروینکس ڈرونز ھم برز ءَ بال ءَ گندگ بوتگ انت-

دگہ دزگیریانی اھوال انگت ءَ سر نہ بیتگ اَنت-

روکپتی بلوچستان ءِ بنجاھی شھر زاھدان ءَ گمشادزئی ٹک ءِ سردار حاجی حمید گمشادزئی ایرانی آمیدگس ءَ پیش بوگ ءِ وھد ءَ دزگیر ءُ ناشناسیں جاھاں برگ بیتگ-

گیشیں اھوالانی رد ءَ حاجی حمید گمشادزئی گوستگیں روچ ءَ وتی کیس ءِ پیش ءَ ماں زاھدان ءَ شتگ بیتگ کہ اود ءَ آ آمیدگس ءَ پیش بوگ ءِ وھد ءَ دزگیر کنگ ءُ ناشناسین جاھاں برگ بیتگ-

اھوالانی رد ءَ گوستگیں وھد ءَ حاجی حمید ءَ وتی گوھار زتک ءِ کوش ءِ سر ءَ ایرانی سرکار ءُ واکدارانی سر ءَ ایراد گپتگ ءُ گوشتگ کہ سرکار مارا ایمنی ءَ نیلگ ءَ انت ءُ مئے بلوچ مھلوک ءَ روچ ءِ رھمان تیرباران کنگ ءُ کشگ ءَ انت-

آئی ءَ وتی گوستگیں تران ءَ کبریستان ءَ جنازہ ءِ وھد ءَ مھلوک ءَ تران کنان ءَ گوشتگ کہ اگاں ایران ءِ واکدار لوٹ انت اد ءَ امن ءُ ایمنی بہ بیت گڑا بلوچانی کشت ءُ ھون ءَ بند بہ کنت-

چرے گپانی پژدر ءَ ایرانی آمیدگس ءَ آ تلب کتگ ءُ پیش بوگ ءِ ھکم داتگ-

حاجی حمید گمشادزئی ءِ دزگیری ءُ بیگواھی ءِ ھلاپ ءَ روکپتی بلوچستان ءِ سیاسی ءُ لس مھلوک ءَ ایر جتگ ءُ آئی ءِ یل کنگ ءِ لوٹ ءَ کنگ ءَ انت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں گوستگیں شپ ھشت بیست ملٹ ءَ پسنی ببرشور ءَ کوسٹ گارڈ بُنجل سر ءَ اُرش کتگ، اُرش ءَ دُژمن ءِ دو کارمند ٹپی بیتگ اَنت-

جارکش ءَ گْوشتگ کہ کوسٹ گارڈ کارمند ھما وھد ءَ نشانگ کتگ وھدے آ بُنجاھی گیٹ دیم ءَ اوشتوک بیتگ اَنت، اُرش ءَ پد کوسٹ گارڈ کارمنداں سرمچارانی راہ دارگ ھاتر ءَ تُرندیں تیرگواری کتگ بلے سرمچاراں شھری چیرجنگی رپکاں چہ دراھگ ءَ سوبین بیتگ اَنت-

جارکش ءَ گْوشتگ بلوچستان لبریشن فرنٹ اے اُرش زمہ واری ءَ منّ اِیت ءُ سرڈگار ءِ وتواجھی ءَ تاں پوج سر ءَ اُرش ءَ برجاہ دار اِیت-

ورنا ئے زورانسری آوار جنی ءِ ھلاپ ءَ کھول ءُ دمگ مردم زھرشانی ءَ اَنت، یل کنگ ءِ لوٹ کنگ ءَ اَنت-

بلوچستان ءِ دمگ چہ ھُزدار ءَ سر بیتگیں ھالانی رِد ءَ سلاہ بندیں مردماں یک پانزدہ سالی ئیں ورنایے زورانسری بیگواہ کتگ، آئی ءِ پجّار انس ء احمد جھمنند گذگی ھُزدار نام ءَ بیتگ-

وئیل ءِ ھلاپ ءَ کھول ءُ دمگ مردماں گذگی ءِ نزیک شال، کراچی بُنجاھی شھدگ سر ءَ نندانک داتگ شھدگ گاڑیانی واستا بند کتگ-

بلوچ یکجھتی کمیٹی ھُزدار رِد ءَ کسانی سالی ئیں ورنا ءِ آوار جنوک پاکستانی چیریں ادارھانی کارمند بیتگ اَنت ءُ سلاہ بند بیتگ اَنت- ورنا زورانسری وتی ھمراھی ءَ برتگ چریشی ءَ پد آ بیگواہ ءَ اِنت-

بلوچ یکجھتی کمیٹی ھُزدار ءَ دمگ مردماں چہ دزبندی کتگ کہ آ انس احمد ءِ کھول ءِ زھرشانی ءَ ھوار بہ بنت ءُ آئی ءِ یل کنائینگ ھاتر ءَ توار چست بہ کن اَنت-

کھول ءَ جار جتگ کہ اگاں انس زوت دیم ءَ آرگ نہ بیت گُڑا زھرشانی نندانک گیش کنگ بیت-

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشانے ءِ تہ ءَ گوشتگ کہ سرمچاراں نوشکی ءُ تربت ءَ دو جتا جتائیں اُرشاں زورگیریں پاکستانی پوج ءُ کشندہ ٹولی ءِ یک کارمندے ءِ سر ءَ اُرش کتگ –

بی ایل اے ءِ جارکش ءَ سرجمیں ھال داتگ ءُ گوشتگ کہ مئے سرمچاراں گوستگیں شپ ءَ نوشکی ءَ ھژدہ خول ءِ ھند ءَ زورگیریں پاکستانی پوج بنجلے ءِ سر ءَ یکیں وھد ءَ دو نیمگاں اُرش کُتگ –

اے اُرش ءَ سرمچاراں راکٹ ءُ گرنیڈ لانچراں ھوار وتکاریں سلاھاں گوں دشمن پوج ءِ سر ءَ اُرش کتگ – نیم ادار ءَ گیش برجاہ بوتگیں اے اُرش ءَ سَے دژمن کارمند مُرتگ ءُ کم چہ کم چار زدگ بوتگ انت –

جارکش ءَ گوشتگ گوستگیں شپ ءَ بی ایل اے ءِ سرمچاراں تربت ءِ دمگ بھمن ءَ زورگیریں پاکستانی پوج ءُ چیریں ادارھانی جوڈ کتگیں کُشندہ ٹولی ءِ کارمند ریاز ء نیاز احمد جھمنند میری ءِ سر ءَ اُرش کتگ ءُ آ کُشتگ ءُ آئی سلاہ دستیگ کتگ –

آئی ءَ گوشتگ کہ اے چاریگ کامران عمر ءِ سلاہ بندیں ٹولی ءَ بندوک بوتگ کہ آ گوستگیں سال ءَ دسمبر ماہ ءَ بی ایل اے ءِ سرمچاراں یک اُرشے ءَ کُشتگ بوتگ – – اے ٹولی میری ھند ءَ ھوار کش گور ءِ دمگاں گسانی سر ءَ بیڑ، چادر ءُ چاردیوالی لگتمالی، ورنایانی زورانسری آوار جنی ءَ گوں پاکستان ءَ ھوار بوتگ ءُ زانگ بوتگ –

ریاز گسانی سر ءِ بیڑ ءُ زورانسری آوارجنیاں زورگیریں پوج ءِ کمک کارے بوتگ وھدیکی زورگیریں پوج ءِ گوشگ ءِ پدا دگ بندی ءُ گاڑیانی سر ءَ تر ءُ گرد ھم کتگ – ھمے کارانی کنگ ءَ زورگیریں پاکستانی پوج ءَ آئی کارمند پہ نشہ باپاری، دُزی ءُ ڈنگی، ملام گرگ ءَ یل داتگ انت –

گڈسر ءَ جارکش ءَ گوشتگ کہ بی ایل اے ھردو اُرشانی زمہ واری ءَ مب ایت –

بلوچ یکجھتی کمیٹی نال ھنکین ءِ جارکش ءَ رسانکدراں وتی شنگ کرتگیں درشانے ءِ تہ ءَ ڈپتھیریا نادراھی شنگ بوگ ءِ سر ءَ دلپدردی درشان کتگ گوشتگ کہ دمگی واکدار زوت گامگیج بہ زور انت –

جارکش ءَ گوشتگ کہ واکدارانی نیمگ ءَ بس یک روچے ءِ واست ءَ میڈیکل کیمپ جنگ بوتگ کہ سک باز کم انت ما لوٹ کن ایں کہ اے نادراھی ءِ گر ءُ دار ءِ ھاتر ءَ زوتاں زوت گامگیج زورگ بہ بیت –

آئی ءَ گوشتگ کہ ڈپتھیریا نادراھی ءِ گر ءُ دار ھاتر ءَ اژدری انت کی ھمے زوتاں نادراھجاہ پچ کنگ بہ بنت تانکہ ھما دمان ءَ نادراھانی الاج کنگ بہ بیت ـ میڈیکل کیمپ گیش کنگ بہ بیت تانکہ گیش ءَ چہ گیش مردم آسراتی دیگ بہ بنت – مردم سرپد کنگ بہ بیت کہ وتی پھریز ءَ کت بہ کناں ءُ نادراھی گیش تالان بوت مہ کنت –

آئی ءَ گوشتگ کہ کورنٹائن زون ءُ آئسولیشن سنٹر اڈ دیگ بہ بیت تاکہ سانمندیں مردم جتا کنگ بہ بنت تانکہ نادراھی گیش تالان مہ بیت – نال ءِ کش ءُ گور ءِ دمگ دلگوش دیگ بہ بنت پرچا کہ وردنی ڈُکال ءِ سوب ءَ اودے مردم گیشتر سانمند بوگ ءَ انت –

جارکش ءَ گوشتگ نادراھانی کچ گیش بوتگ ءُ 16 ءَ سر بوتگ انت ءُ چہ ڈپتھیریا نادراھی ءَ چار مردم بیران بوتگ انت کہ آیانی نام عبدالکریم ء فیض محمد اُمر 13 سال، مھرنگ ء جمع خان اُمر 35 سال ، خدیجہ ء عبدالوہاب اُمر 9 سال، رمیسہ ء گور خان اُمر 4 سال انت –

آئی ءَ گوشتگ کی ما دمگی واکداراں چہ لوٹ کن ایں کہ ھمے زوتاں گامگیج بہ زور ایت تانکہ اے نادراھائی گر ءُ دار کنگ بہ بیت اگاں ناں اے نادراھی سرجمیں دمگ ءَ تالان بیت ءُ اشی ءِ ھرابیں رِزلٹ ءِ در کیت –