TBP Balochi

ھب چوکی ءَ زورانسری بیگواھیں مردمانی کھولانی نیمگ ءَ وتی دوستناکانی یل نہ کنگ ھلاپ ءَ زھرشانی برجاہ ءَ اِنت، چریشی ءِ سبب ءَ کراچی شال بُنجاھی شھدگ گوستگیں ھشت کلاکاں چہ ھرچ وڑیں روگ آیگ واستا بند اِنت-

پاکستانی پوج ءِ دست ءَ زورانسری آوار جنی ءِ نشانگ کنگ بیتگیں دوئیں برات ، جنید حمید ءُ یاسر حمید، ءِ ھمراھی ءَ چاکر بگٹی ءِ کھول ءَ مروچی سھب ءَ چہ بھوانی ءِ ھند سر ءَ شھدگ بند کتگ، چریشی ءَ چہ کراچی شال، گوادر ءُ دگہ دمگاں چہ زمینی اِھوال مھتل بیتگ-

شھدگ سر ءَ نندانک سبب ءَ مزنیں کچے ءَ گاڑی کٹّ اَنت وھدے کہ انتزامیہ ءِ گوم ءَ باز رند ءَ گپ دیوان بے سوب بیتگ –

بلوچ یکجھتی کمیٹی ءِ رِد ءَ چاکر بگٹی پانزدہ نومبر دوھزار بیست چار ءَ ھب چوکی ءِ آر سی ڈی دگ سر ءَ ٹویوٹا شرکت دیم ءَ چہ زورانسری بیگواہ کنگ بیتگ- مروچی آئی ءِ بیگواھی ءَ دو ماہ ءُ شانزدہ روچ سرجم بیتگ، بلے تنی وھدے آئی ءِ ھچ وڑیں ھال دز نہ کپتگ-

چاکر بگٹی ءِ کھول ءَ اشی ءَ ساری ھم زھرشانی کتگ دگ بند کتگ، چریشی ءَ ھب انتزامیہ ءَ گپ دیوان کتگ ءُ ٹاہ داتگ کہ چاکر بگٹی ھب سٹی تھانہ ءَ ساڑی اِنت، وھدے کھول تھانہ ءَ سر بیتگ گُڑا اود ءَ آئی ءِ ھچ وڑیں نام ءُ نشان نہ بیتگ-

اشی ءَ پد کھول ءَ پریس کانفرنس کتگ ھب انتزامیہ دہ روچ وھدے داتگ ءُ کڈن کتگ کہ اگاں چاکر بگٹی یل کنگ نہ بیت گُڑا تُرندیں زھرشانی ءَ لاچار بہ ایں-

ھمے وڑ گوستگیں سال ءَ چہ ھب ءُ کلات ءَ زورانسری آوار جنی ءِ نشانگ کنگ بیتگیں جنید ءُ یاسر ء عبدالحمید ھم دیم ءَ آرگ نہ بیتگ اَنت، وھدے کہ کھول ءَ وتی دوستناکانی زوت یل کنگ لوٹ کنگ ءَ اَنت-

بی وائی سی رِد ءَ چاکر بگٹی، جنید ، یاسر حمید ءِ کھول آیانی یل کنگ ھاتر ءَ بھوانی ءِ ھند سر ءَ نندانک داتگ ءُ دگ بند کتگ-

گل ءَ ھب ءُ کش گور ءِ بلوچ جھمننداں چہ دزبندی کتگ کہ آ انسانی ھکانی پھازگ ھاتر ءَ نندانک ءَ ھوار بہ بنت ءُ زورانسری بیگواھیں مردمانی کھول ءِ گوم ءَ یکجاھی درشان بہ کن اَنت-

کلات ءِ تھسیل منگچر ءَ سلاہ بندانی ساڑی بیگ ھال اِنت، بُنجاھی شھدگ سر بندگ ءِ ھم ھال اِنت-

دمگی اِھوالکار رِد ءَ دمگ ءَ تُرندیں تیرگواری ءِ توار اش کنگ بیگ ءَ اِنت – وھدے کہ بُنجاھی شھدگ سر ءَ روگ آیگ بند کنگ بیتگ-

بلوچستان ءِ واپاری شھر ھب ءَ بیگواھیں مردمانی کھولانی نیمگ ءَ آیانی مردمانی یل نہ کنگ ءِ ھلاپ ءَ کراچی، شال ءِ بنجاھی شھدگ بند ، بیگواھیں دو برات جنید ھمید ءُ یاسر ھمید ءُ چاکر بگٹی ءِ کھولانی نیمگ ءَ آیانی یل نہ کنگ ءِ ھلاپ ءَ بھوانی ءِ ھند ءَ شھدگ بند کتگ چریشی ءِ سبب ءَ کراچی شال، گوادر ءُ دگہ ھنداں زمینی راہ سستگ –

بیگواھیں یاسر ءُ جنید حمید ءِ گوھار ءِ رد ءَ منی برات چار ماھاں چہ ریاستی ادارھاں گیر کانونی دزگیر کتگ انت ءُ داں انگت ءَ مارا آیانی سر ءَ جتگیں جرم چی انت ءُ یا آیاں چی جرم کتگ-

یاسمین حمید ءِ گوشگ اِنت منی برات مھنت کشے، آئی ءَ سیاسی یا گیر کانونی پرکاریاں ھچ سیادی نیست انت – آیاں زورانسری بیگواہ کنگ ءُ کانونی ءِ لگتمالی انت-

آئی ءَ گوشتگ ما لوٹ کن ایں اے بیگواھیں مردماں دیم ءَ بیار ات ءُ زورانسری بیگواھیاں بہ دار ات-

دمگی انتزامیہ ءِ باسک دگ ءِ پچ کنگ ءَ گپ ءُ تران ءَ اتکگ انت بلے زھرشانی کنوکاں گوشتگ آیانی مردم یل نہ بنت اِنت اے زھرشانی برجاہ بیت اِنت-

بلوچستان ءِ دمگ کیچ ءِ ھند زامران ءَ پاکستانی پوج ءِ لشکر کشی ششمی روچ ءَ ھم برجاہ ءَ اِنت-

پاکستانی پوج زامران ءِ جتاجتائیں دمگاں پوجی لشکر کشی ءَ دلگوش اِنت کہ اود ءَ جھلی پوج پیشگامی کنگ ءَ اِنت وھدے کہ تیرگوار ءُ دگہ بالگرد ھم بھر زیرگ ءَ اَنت-

دمگی اِھوالکار رِد ءَ زامران ءِ جتاجتائیں دمگاں ھیلی کاپٹراں چہ شیلنگ کنگ بیتگ-

تنی وھدے ھچ وڑیں دزگیری یا جانی تاوان درگت ءَ ھچ وڑیں ھال سر نہ بیتگ وھدے کہ واکدار نیمگ ءَ چہ ھچ وڑیں درشان شنگ کنگ نہ بیتگ-

بلوچ یکجھتی کمیٹی ءِ سروک ڈاکٹر ماہ رنگ بلوچ ءَ گوشتگ بلوچ راجی مُچی ءَ پد دالبندین ءِ مھلوک ءِ تنگ کنگ ریاستی پروشانی نشانی انت-

آئی ءَ گوشتگ بلوچ راجی مُچی ءَ ھزارانی مھلوک ءَ بھر زرتگ، ءُ اے مُچی وتی سنچ ءَ سرجم ءَ پُر ایمن بیتگ- اے مُچی ءِ دارگ ءُ بے سوب کنگ ءَ ریاست ءَ دراھیں در ءُ پندل کارمرد بے سوب بیتگ انت نی مُچی ءَ پد دالبندین ءِ مھلوک ءَ تنگ کنگ ءَ انت آیاں ترسینگ ءَ انت ءُ یک بلوچ درائیورے دزگیر کنگ بیتگ-

آئی ءَ گوشتگ بلے ریاست اے راستی ءِ سرپد بوگ ءَ کوردیم انت کہ بلوچ راج ءَ ترس ءُ بیم پروش داتگ انت – اے وڑیں ھرکتاں بلوچ راج وتی ھکانی جد ءُ جھد ءَ پشتکنز نہ بیت اِنت- اگاں دالبندین ءِ مھلوک ءِ تنگ کنگ بند نہ بیت گڑا ما ایشی ءِ ھلاپ ءُ ترندیں زھرشانی کن ایں-

زانگ بہ بیت ھمے سال ءِ بیست ءُ پنچ جنوری ءَ دالبندین ءِ ھند بلوچ نسل کشی ءِ یادگاری روچ ءِ درگت ءَ یک مُچی ءِ برجم داشتگ بیتگ ءُ چریشی ءِ سبب ءَ سرکار ءَ دالبندین ءَ ھوار رکشان ءِ دمگاں رھوتی نزام بند کتگ انت-

دمگی مردماں دی بلوچستان پوسٹ نیوز ڈیسک ءَ گوشتگ داں انگت ءَ مُچی ءِ کمک کنگ ءِ پژدر ءَ بازیں ڈرائیور دزگیر ءُ ھمے وڑ مھمانداری ءِ شرپداریں شھریاں ترسینگ ءَ اَنت-ء

دمگی اھوالکار ءَ دی بلوچستان پوسٹ ءَ لیویز ءِ کارندہ ءِ ریفرنس ءَ گوشتگ چیریں ادارھاں مُچی ءَ کمک ءُ بھر زیروکاں دمگی انتزامیہ ءُ سرکاری پلامرزی ءِ مردمانی کمک ءَ پجار کنگ ءَ انت، چریشی ءِ پژدر ءَ گمان کنگ بیگ ءَ انت یک پرایمنیں مُچی ءَ پژدر ءَ مردماں زورانسری بیگواہ کنگ یا زھنی ازیت دیگ بنت انت-

منگچر ءِ ھند خالق آباد ءَ لاشے ءِ ھڈ دزکپتگ انت – دمگی اھوالانی رد ءَ شوانگے ءَ لیویز ءَ را اھوال داتگ کہ منگچر ءِ ھند بزی ءِ کوھی دمگاں یک لاشے ءِ ھڈ گندگ بیتگ اَنت-

لیویز ءِ کارندہ سر بیتگ ءُ لاش ءِ ھڈ اش چِست کنگ ءُ پجار نہ بیتگ ءُ پجار ءِ ھاتر ءَ لیویز ءِ تھانہ ءَ ایر اَنت-

زانگ بہ بیت بلوچستان ءَ گوستگیں دو دھکاں سدانی کچ ءَ لاش دزکپتگ انت کہ آیانی پجار نہ بیتگ اَنت ءُ بے وارس کنگ ءُ کل کنگ بیتگ انت-

بلوچستان ءَ ژانگول کرتگیں لاشانی ھساب کنگ بنت بلے آیانی پجار نہ بوتگ انت-

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشانے ءِ تہ ءَ کلات ءُ نوشکی ءَ زورگیریں پاکستانی پوج ءُ چیریں ادارھانی کارمندانی کوش ءِ زمہ واری منّ اِتگ –

جارکش ءَ سرجمیں ھال داتگ ءُ گوشتگ کہ بی ایل اے ءِ سرمچاراں مروچی نوشکی ءَ مینگل کراس ءَ زورگیریں پاکستانی پوج ءُ چیریں ادارھانی جوڈ کتگیں کُشندہ ٹولی ءِ کارمند طارق مینگل ءِ سر ءَ اُرش کتگ ءُ کُشتگ –

آئی ءَ گوشتگ کہ اے کارمند نوشکی ءُ کش ءُ گورے ھند ءُ دمگاں زورگیریں پاکستانی پوج ءِ گوشگ ءِ پد ءَ سلاہ بندیں ٹولی ءِ سروکی ءَ کنگ ءَ بوتگ ـ وھدیکہ اے ٹولی گسانی سر ءِ بیڑ، زھگ ءُ زالبولانی کم شرپ ءُ زورانسری آوارجنیاں زورگیریں پوج ءِ کمک کارے بوتگ وھدیکہ نوشکی ءَ ورنایانی ٹارگٹ کلنگ ءَ ھم سلاہ بندیں ٹولی ھوار بوتگ –

آئی ءَ گوشتگ کہ زورگیریں پوج ءَ اے بلوچ چکچینی کنگ ءِ بدل ءَ مھار بڈا داتگ ءُ یل داتگ انت کہ گزنلی ءَ ڈرائیوراں ملام گرگ، باپاری کنوکاں ملام گرگ، لس مردمانی کم شرپ ءُ ورنایانی بلیک میل کنگ ءَ زورگیریں پاکستانی پوج ءَ پہ کار کتگ –

اے ٹولیءَ ھواریں آدگہ درسیں کارمندانی پجار بوتگ کہ بی ایل اے ءِ انٹلی جنس ونگ “زراب” ءِ نزر ایر انت اے کارمند بلوچ لبریشن آرمی ءِ سرمچارانی نشانگ ءَ انت –

جارکش ءَ گوشتگ کہ بی ایل اے ءِ سرمچاراں ھشت جنوری ءَ چہ پندران ءَ پاکستان ءِ چیریں ادارہ آئی ایس آئی ءِ کارمند محمد شاکر دزگیر کتگ، کہ آئی ءَ دپ ءِ وت وتی کتکاری منّ اِتگ انت ءُ پدا رندءَ بلوچ راجی آمیدگس ءِ پیسلہ ءِ رِد ءَ مرگ ءِ سزا داتگ –

کارمند محمد شاکر کلات ءِ موبائیل ٹاور کمپنی ءِ سپروائزر بوتگ کہ زورگیریں پوج ءِ گوشگ ءِ پد ءَ وت ءَ دوزواہ ءِ گوشتگ ءُ گلانی تہ ءَ ٹریکنگ سِم سر کنگ ءِ جھد ءَ بوتگ –

جارکش ءَ گوشتگ کہ انٹلی جنس ونگ زراب ءَ ھال سربوتگ ءُ آئی ءَ پٹ پول کتگ ءُ پدا سرمچاراں محمد شاکر دزگیر کتگ –

آئی ءَ گوشتگ کہ محمد شاکر ء حاجی عبدالرزاق ءَ جست ءُ پُرس ءِ میان ءَ دپ ءِ وت منّ اتگ کہ آئی ءَ سال دوھزارءُ بیست ءُ یک ءَ پاکستانی چیریں ادارہ آئی ایس آئی ءِ میجر مجتبی ءِ سروکی ءَ چاریگی کار کتگ –

محمد شاکر ءَ وت منّ اِتگ کہ آئی ءَ ماں کلات ءَ پاکستانی پوج ءِ گوستگیں کرنل عُمر، ایم آئی اپسر شاہد، صوبیدار غلام حسین ءُ صوبیدار جمیل ءَ گوں ھال اھوال ءَ بوتگ وھدیکہ آیانی پنچ مردم انت کہ چاریگی کار ءَ کنگ ءَ انت -.

محمد شاکر ءَ گوشتگ کہ چہ آئی ایس آئی ءِ نیمگ ءَ آئی ءِ سر ءَ اکس دیم دیگ بوتگ کہ ھمایانی رِد ءَ آ چاریگی کنگ ءَ بوتگ – آئی ءَ دپ ءِ وت منّ اِتگ کہ آئی ءَ کلات پندرانی ءَ ورنا آغا اختر شاہ ءِ مکبری کتگ کہ پدا آ پوج ءَ زورانسری آوار جتگ – آئی ءَ خیل ءِ ھند ءَ ھم یک ورنائے مکبری کتگ کہ شپ ءَ پوج ءَ آئی ءِ گس ءِ سر ءَ بیڑ برتگ ءُ ورنا زورانسری آوار جتگ –

جارکش ءَ گوشتگ کہ محمد شاکر ءَ دپ ءَ وت گوشتگ کہ چہ کلات ءَ یک لیویز کارمندے ءُ کلات ءِ بنجاھی شھدگ ءِ سر ءَ پترول پمپ ءَ کارکنوکیں ورنا فراز زہری سکونت پد شار ھم پاکستانی پوج ءِ دست ءَ آوار جنائیں اِتگ انت ھمے وڈ کوہک ءَ ھم یک ورنائے ءِ مکبری کتگ ءُ آئی تامر جوڈ کتگ ءُ پاکستان ءِ چیریں ادارھاں سر کتگ، پدا رند ءَ دومی روچ ءَ پاکستانء پوج ءُ چیریں ادارھاں اودا بیڑ برتگ بلے آ مرد اودا ساڑی نہ بوتگ بلے اودا پاکستانی پوج ءَ ٹیوب ویل ءَ کار کنوکیں پشتون ءِ اوار جتگ –

شاکر ءَ گوشتگ کہ پندران ءِ نندوکیں مردمے ءِ مکبری ءِ ٹاسک مناں دیگ بوتگ کہ آ شال شتگ بوتگ ـ شال ءَ شتگیں مردے مکبری کنگ ءِ جھد کتگ بلے آئی ءَ ھچ وڈیں سرپدی نہ رستگ بلے چیزے روچ ءَ پد آ مرد چہ شال ءَ آوار جنگ بوتگ –

آئی ءَ گوشتگ کہ چہ کلات ءَ من ءُ منی سنگت محاب ءَ ہندو باپاری ءِ بلوچ سرمچارانی نام ءَ بلیک میل کتگ ءُ چہ آئی ءَ پانزدہ لک پاکستانی کلدار ملام گپتگ –

آئی ءَ گوشتگ کہ منی نیٹ ورک ءَ چاگردی ترامجاہ پیس بک ءَ ورنا نامیں اکاؤنٹ جوڈ کتگ ءُ سرمچارانی ھک ءَ پوسٹ داتگ ءُ ھمے اکاونٹ ءَ گوں ورنایاں ھال اھوال کتگ ءُ چہ پاکستانی پوج ءِ دست ءَ آوار جنائیں اِتگ انت –

چاریگ ءَ گوشتگ کہ پاکستانی پوج ءِ میجر ءَ وائس میسج کتگ کہ (آئی ءِ ریکارد ھست انت ) “سردار شکیل نوں مئے کارے نہ ایں آئی ءِ جاہ ءَ ترا سردار کن این، نوں تو وتی تیاری ءَ بہ کن “

چاریگ شاکر ءَ وتی ٹولی ءَ ھوار ایندگہ چاریگانی نام ھم داتگ انت –

جارکش جیئند بلوچ ءَ گوشتگ محمد شاکر راجی مکبرے بوتگ ءُ بلوچ راجی آمیدگس ءَ مرگ ءِ سزا داتگ، کہ گوستگیں روچ ءَ سرمچاراں آ کُشتگ – جارکش ءَ گوشتگ کہ کلات ءُ کش ءُ گور ءِ ھند ءُ دمگاں پاکستانی پوج ءِ ھاتر ءَ کار کنوکیں چاریگاں ھما سزا دیگ بیت کہ محمد شاکر ءَ دیگ بوتگ –

کیچ ءِ بُنجاھی شھر تربت ءِ دمگ آبسر ءِ بُنجاھی دگ سر ءَ پاکستانی پوج ءِ کارمنداں پرپٹ سواریں سے مردمانی سر ءَ تیرگواری کتگ، چریشی ءِ آسر ءَ یک مردمے ٹپی بیتگ-

اِھوالکار رِد ءَ پوج ءَ ٹپی ءَ ھوار سئیں مردم گوں پرپٹ ءَ وتی ھمراھی ءَ برتگ اَنت- ٹپی ءُ آ دگہ مردمانی پجّار انگت نہ بیتگ-

دمگی مردمانی رِد ءَ پوج ءَ رؤکیں پرپٹ سر ءَ تچکی ءَ تیرگواری کتگ چریشی ءَ چہ آ کپتگ ءُ دزگیر کتگ وتی ھمراھی ءَ برتگ-

بلوچی زبان ءِ گشندھی پڑا کلانیں گشندہ استاد رحیم بلوچ بازیں وھداں نادراھی ءَ پد بیران بیتگ-

اھوالانی رد ءَ استاد رحیم بلوچ ءَ وتی گشندھی ءِ زمانگ ءَ نامداریں سوت ‘ کنداناں وتی سر ءَ رنداناں ’ نامان بیتگ-

آئی ءَ گشندھی ءِ ھیلکاری انڈیا ءَ شتگ نامداریں ازمکار مھمد رفیع بلوچ ءَ دربرتگ-

آئی ءَ اود ءَ بازیں تامرانی واستا سوت جتگ انت-

آئی ءِ بیرانی ءِ سر ءَ چاگردی ترامجاھان دلپدری درشان کنگ بوگ ءَ انت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں کراچی ءِ دمگ کاٹھور ءَ پولیس چوکی ءُ تمپ ءِ دمگ گومازی ءُ آسیاباد ءَ زورگریں لشکر نشانگ کتگ ءُ جانی ءُ مالی تاوان داتگ اَنت-

جارکش ءَ گْوشتگ مئے سرمچاراں گوستگیں شپ ءَ گڈاپ کراچی ءِ دمگ کاٹھور ءَ بھریہ ٹاون پروجیکٹ ءِ پھازوکی پولیس چوکی نوکیں سلاھاں چہ نشانگ کتگ چریشی ءِ آسر ءَ پولیس کارمنداں جانی ءُ تاوان چست کنگ کپتگ- پولیس ءِ اے چوکی بھریہ ٹاؤن شوربندیانی پھازگ ھاتر ءَ ھشت ماہ ءَ پیسر جوڑ کنگ بیتگ-

جارکش ءَ گْوشتگ کہ بھریہ ٹاؤن کہ بلوچانی زمینانی سر ءَ دستیگ کتگ ءُ جوڑ کتگ، کہ سندھ ھکومت ءُ سندھ پولیس ءِ کُمک ءَ چہ سرجم بیتگ- بلوچ راج ءَ ھوار آ دگہ ایردستیں راجاں کڈن کن ایں کہ آ پولیس ءُ دگہ سیکورٹی کارمنداں چہ دیر بہ بنت پرچاکہ سرمچار کجام وھد ءَ آیاں نشانگ کت کن اَنت-

جارکش ءَ گْوشتگ کہ دومی اُرش سرمچاراں بیست ھشت جنوری ءِ شپ ءَ دہ ءُ نیم ءَ تمپ ، گومازی ءَ زورگریں پوج ءِ بُنجل سر ءَ اے ون گولہ آس داتگ کہ بُنجل تہ ءَ کپتگ چریشی ءِ آسر ءَ زورگریں پوج ءَ جانی ءُ مالی تاوان داتگ-

میجر گْوھرام ءَ گوشتگ اے بُنجل بی ایل ایف ءِ شھیدیں سنگت سرمچار جھانگیر پنّام ءِ کیپٹن لوگ سر ءَ دستیگ کنگ ءَ پد جوڑ کتگ-

جارکش ءَ گْوشتگ کہ دگہ یک اُرشے بیست ھشت جنوری ءِ شپ ھشت ءَ تمپ ءِ دمگ آسیاباد ءَ برجاھیں زورگریں پوج ءِ چوکی سر ءَ بازیں اے ون گولہ آس داتگ کہ بُنجل تہ ءَ کپتگ اَنت اے اُرش ءَ ھم زورگریں پوج ءَ جانی ءُ مالی تاوان دیمپانی کنگ کپتگ-

جارکش ءَ گْوشتگ بلوچستان لبریشن فرنٹ اے سئیں اُرشانی زمہ واری ءَ منّ اِیت ءُ بلوچ سرڈگار ءِ وتواجھی ءَ تاں زورگریں پوج را ءَ نشانگ کنگ اِھد کنت-