TBP Balochi

جرمنی ءِ شھر ھیمبرگ ءَ یک پاکستانی پلاھی ادارہ الخدمے جرمنی ءِ چیردستی ءَ پڑھتا بلوچستان ءَ یک پروگرامے اڈ دیگ بیتگ-

اے مراگش ءَ یک دگہ پاکستانی ادارہ غزالی ایجوکیشن فاؤنڈیشن ءِ ایگزیکٹو ڈائریکٹر، سید عامر مھمد ءَ GEF ءِ مشن ءُ آیوکیں لیکھانی سر ءَ چمشانک داتگ –

مراگش ءَ پاکستان ءِ سپیر ثقلین سیدا ءَ ھم بھر زرتگ-

دی بلوچستان پوسٹ ءَ سر بیتگیں اھوالانی رد ءَ پڑھتا بلوچستان ءِ نام ءَ 11 اسکولانی واستا 28800 یورو – 8352000 پاکستانی کلدار مُچ کنگ بیتگ انت-

یک اھوالے ءِ رد ءَ بلوچستان ءَ غزالی فاونڈیشن ءِ اسکولانی نام ءَ داں انگت ءَ یورپ ءَ بازیں زَرے مُچ کنگ بیتگ انت، بلے اے زَر بلوچستان ءَ ھرچ بیگ ءَ نہ اَنت-

دی بلوچستان پوسٹ ءَ سر بیتگیں اھوالانی رد ءَ یورپ ءَ بازیں پاکستابی این جی اوز بلوچستان ءَ وانگ، جانسلامتی ءُ ڈکال ءِ نام ءَ پوڑی ( فنڈز) مُچ کن انت بلے آ بلوچستان ءِ سر ءَ ابید پنجاپ ءَ ھرچ بوگ ءَ انت-

بلوچستان ءِ دمگ کیچ ءَ سلاہ بندانی تیرگواری ءَ یک مردمے بیران بیتگ-

تیرگواری ءِ وئیل ءَ بیران بیتگیں مردم ءِ پجار ھیات ءِ نام ءَ زانگ بیتگ-

دمگی مردمانی رد ءَ گوستگیں شپ ءَ بلیدہ ءِ دمگ میناز ءَ سلاہ بندیں مردماں تیرگواری ءَ کتگ ءُ اے مرد کشتگ-

دمگی مردمانی رد ءَ اے مرد ءِ سیادی سرکاری پلامرزی ءَ ھستیں ٹولی ڈیتھ اسکواڈ ءَ انت- وئیل ءِ سبب زانگ نہ بیتگ-

ھزدار ءِ اندوھناکیں وئیل

ٹی بی پی شونگال

بلوچستان ءِ ھمک گوزوکیں روچ ءِ ھواری ءَ اندوھناکیں وئیلے ترومبشت کنت اِنت- اے دابیں روچ کم گوز ایت کہ زورانسری بیگواھی ءُ ریاستی زُلمانی ھلاپ ءَ کجام یک دمگے ءَ زھرشانی نہ بوگ ءَ انت، پرچاکہ ریاست ءَ بلوچ جنگِ آجوئی ءِ دَکَل کنگ ءِ واستا ھنچیں پالیسی جوڑینتگ انت کہ ایشی ءِ سان ءَ سرجمیں بلوچ چاگرد سانمند بوگ ءَ انت-

چہ ھزدار ءَ بی بی اسمہ جتک کہ ریاستی سروکی ءَ ھلوکیں ڈیتھ اسکواڈ ءِ دست ءَ آوار جنگ بلوچستان ءِ اولی وئیل نہ انت- بلوچستان ءِ جتا جتائیں ھنداں آجوئی لوٹوکانی ھلاپ ءَ پوج ءِ ھمراھداری ءِ پژدر ءَ ڈیتھ اسکواڈ ءِ کارندھاں دزی، آوار جنی ءُ کشت ءُ کوشکاری ءَ مھار گٹ ءُ دیگ بیتگ انت، ایشی ءِ راستی ءِ منانک بلوچستان ءِ اسمبلی ءِ باسکاں بازیں براں وتی درشاناں کتگ انت-

گوستگیں سال ءَ بارکھان ءَ سردار عبدالرھمان کھتران ءَ مری دمگ ءَ زالبول ءُ زھگ آوار جتگ انت ءُ وتی زاتی جیل ءَ بندیگ کتگ انت – میڈیا ءُ سول سوسائٹی ءِ زھرشانی ءِ سبب ءَ آ دزگیر کنگ بیتگ ات، بلے زالبول ءِ آوار جنگ ءُ کوش ءِ منانکاں ابید مزن واکداریں زورانی گون ءَ نزیکی ءِ سبب ءَ آ یل دیگ بیتگ ات ءُ پد ءَ الیکشن ءِ کٹگ ءَ پد بلوچستان ءِ اڑوکی سرکار ءَ وزیر کتگ ات-

بلوچستان ءَ ریاستی ادارہ انساپ ءِ دیگ ءَ بے سوب بیتگ انت، ءُ آئینی ءُ کانونی ادارھاں گوں دل یکم بیگ ءَ پد مھلوک ءِ گور ءَ بس زھرشانی ءَ ابید دگہ راہ نیست انت- بلوچستان ءَ گوستگیں سیاسی برانز ءَ پد مھلوک سیاسی گھگیری ءَ ھک ءِ گرگ ءَ یکیں راہ سرپد بنت اِنت- ءُ ھزدار ءَ بی بی اسمہ جتک ءِ یل دیگ ھمے داب ءَ بیتگ کہ ڈیتھ اسکواڈ ءِ دست ءَ آوار جنگ ءِ ھلاپ ءَ کھول ءُ بلوچ راج ءَ ترندیں زھرشانی ءِ راہ گپتگ-

بلوچستان ءِ جاور ھال چارگ بہ بنت گڑا دیر نہ انت آیوکیں وھداں اے دابیں وئیل ترومبشت کن انت – بلے بلوچ راج ءِ ستک پھتو بیگ ءَ انت مھکمیں زھرشانی ءِ زور ءَ اے وڑیں وئیلانی گر ءُ دار سرجمی انت – ءُ سیاسی گھگیری ءِ سبب ءَ راج ءِ سر ءَ زوراکی ءِ زورانسری ءِ درچ ھلاس کنگ بیت انت-

بلوچستان ءَ زورانسری آوارجنی، درکانودی کُشت ءُ کوش ءُ بلوچ زالبولانی آوار جنی ءِ بگیری ءَ زھرشانی، روانک ءُ تھتگ بند بوتگ – زھرشانیانی سروکی بلوچ یکجھتی کمیٹی ءَ کتگ وھدیکہ اسلام آباد ءُ اُتل ءَ بلوچ نودربراں ھم زوراکیانی بگیری ءَ ھاموشیں روانک کش اِتگ –

شال ءَ بیگواھیں مردمانی کھولانی ھمراھی ءَ زھرشانی

بلوچ یکجھتی کمیٹی ءِ چیردستی ءَ ماں شال ءَ زھرشانی روانک ءِ کشگ بوتگ، کہ اودا بیگواھیں مردمانی کھولاں ھم بھر زرتگ – زھرشانی ءَ درنگاز کنوکاں بلوچستان ءَ زورانسری آوار جنی ءُ درکانودی کُشت ءُ کوشانی بگیری ءَ ترندیں نارہ جتگ ءُ میاں استمانی ادارھاں چہ لوٹ کتگ کہ گامگیج بہ زور انت –

زھرشانی ءَ بی وائی سی ءِ رھشوناں تران کنان ءَ گوشتگ کہ زورانسری آوار جنی ءُ کشت ءُ کوش ءِ درچ دراجیں وھدے ءِ منصوبے ءِ بھر ئے چہ ھمیشی ءَ بلوچ ورنا ترسینگ بوگ ءَ انت – ترانکاراں چہ اقوام متھدہ ءُ انسانی ھکانی گلاں گوں لوٹ کتگ کہ بلوچستان ءَ بؤکیں انسانی ھکانی لگتمالی ءِ بگیری ءَ گامگیج بہ زور انت –

ھمے وڑ ماں تربت ءَ بلوچ یکجھتی کمیٹی ءِ نیمگ ءَ زھرشانی گدان ءِ برجم دارگ بوتگ –

بلوچ یکجھتی کمیٹی ءِ بنجاھی جار ءِ پدا ورنایانی زورانسری آوار جنی ءُ درکانودی کشت ءُ کوش ءِ بگیری ءَ ماں تربت ءَ نمیرانیں پدا اھمد ءِ چار راہ ءِ سر ءَ سَے روچی گدان ءِ برجم دارگ بوتگ کہ اودا بیگواھیں مردمانی کھولانی باسکاں ھم بھر زرتگ –

بلوچ یکجھتی کمیٹی ءِ بنجاھی رھشون شاہ جی ءَ ھوار وتی ایندگہ سنگتاں زالبولیں باسکانی ھمراھی ءَ گوستگیں روچ ءَ یک پریس کانفرنس ءِ کتگ ءُ سَے روچی زھرشانی گدان ءِ برجم داشتگ ءُ آن لائن زھرشانی ءِ جار پرینتگ –

زھرشانی گدان ءَ بیگواھیں مردمانء کھول ءُ بی وائی سی ءِ باسک ءُ لس مردم ھوار بوتگ انت – بی وائی سی ءِ رِد ءَ گدان ءِ مول ءُ مراد سرجمیں بلوچستان ءَ درکانودی کشت ءُ کوش ءُ زورانسری آوارجنیاں جھان ءَ پیش دارگ – آیانی رِد ءَ زھرشانی گدان دو شمبے ءُ سَے شمبے ءَ ھم برجاہ بیت انت –

نوشکی ءَ بی وائی سی ءِ نیمگ ءَ ھم زھرشانی روانک کشگ بوتگ –

بلوچ یکجھتی کمیٹی نوشکی ھنکین نیمگ ءَ میر گل خان نصیر کتاب جاہ ءَ بگر تاں موشکی پریس کلب ءَ زھرشانی روانکے کشگ بوتگ کہ اودا ءَ لس مردماں ھوار سیاسی ءُ چاگردی باسکاں بھر زرتگ –

درنگاز کنوکاں ھزدار ءَ کشندہ ٹولی ءِ دست ءَ عاصمہ بلوچ ءِ آوار جنی ءُ تربت ءَ اسکالر اللہ داد بلوچ ءِ درکانودی کوش ءُ ھاران ءَ مبارک بلوچ ءُ ھاپز ھزرت علی بلوچ ءِ زورانسری آوار جنی ترندی ءَ گوں ایر جتگ –

روانک ءَ درنگاز کنوکانی گوشگ ات کہ بلوچ چکچینی ءِ اے درچ نوآبادی ھکمت املی ءِ درچ ئے کہ اشی ءِ مول مراد بلوچستان ءَ زانت ءَ لگتمال کنگ انت –

ھاران ءَ بیگواھیں مردمانی کھول ءِ نندانک برجاہ

بی وائی سی ھاران ءَ بیگواھیں مبارک بلوچ ءُ ھاپز ھزرت علی بلوچ ءِ یل کنائینگ ءِ نندانک ءَ بھر زرتگ – درنگاز کنوکانی گوشگ ات کہ ریاستی ادارہ زورانسری اوار جنی ءَ سلاھے ءِ دروشم ءَ کارمرز کنگ ءَ انت ءُ بیگواھیں مردمانی کھولاں ازیت دیگ انت –

ھاران ریڈ زون ءَ برجاھیں نندانک ءَ درنگاز کنوکاں اے گپ پدر کتگ کہ زورانسری آوار جنیانی بگیری ءَ گھگیری ھر ھال ءَ برجاہ بیت – آیاں چہ میان استمانی ادارھاں گوں لوٹ کتگ کہ بلوچستان ءَ زورانسری آوار جنی ءِ ھلاس کنگ ءِ ھاتر ءَ گامگین بہ زور انت –

مستونگ ءُ کلات ءَ تھتگ بند ھرتال کنگ بوتگ

بی وائی سی ءِ جار ءِ پدا مستونگ ءُ کلات ءَ تھتگ بند ھرتال کنگ بوتگ – اے وھد ءَ سرجمیں بازار ءَ درسیں دکان بند بوتگ انت وھدیکہ لس مردماں ریاستی زوراکیانی بگیری ءَ بی وائی سی ءِ پلامرزی کتگ -.

درنگاز کنوکاں گوشتگ کہ عاصمہ بلوچ ءِ آوار جنی، اللہ داد بلوچ ءں کوش ءُ زورانسری آوار جنیانی وئیل ریاستی زوراکیانی گڈسر انت آیانی گوشگ ات کہ بلوچستان ءِ مھلوک اے وڈیں کرتوتاں نہ ترسیت بلکنہ اے زوراکیانی بگیری ءَ گیشتر مھکمتر بنت –

چاگی ، ڈالبندین، نوکنڈی ءُ یک مچ ءَ زھرشانی

بی وائی سی ءِ چیردستی ءَ چاگی، ڈالبندین، نوکنڈی ءُ یک مچ ءَ ھم زھرشانی کنگ بوتگ – درنگاز کنوکاں نارہ جتگ ءُ ھمے لوٹ کتگ کہ زورانسری آوار جنگ بوتگیں درسیں بلوچ یل کنگ بہ بنت ءُ در کانودی کشت ءُ کوش ھلاس کنگ بہ بیت –

ھمے وڑ اسلام آباد ءُ اتھل ءَ بلوچ نودربراں ھاموشیں روانک کش اِتگ

اسلام اباد ءَ بلوچ اسٹوڈنٹس کونسل ءِ نیمگ ءَ ماں تربت ءَ کشندہ ٹولی ءِ دست ءَ کشگ بوتگیں نودربر اللہ داد بلوچ ءِ کوش ءِ بگیری ءَ ھاموشیں روانک ءِ کش اِتگ –

اے روانک قائداعظم شھدربرجاہ ءِ تہ ءَ کشگ بوتگ کہ اودا مزنیں کچے ءَ جنک ءُ بچکیں نودربراں بھر زرتگ –

ماں اتھل ءَ ھم نودربراں عاصمہ بلوچ ءِ اوار جنی ءُ اسکالر اللہ داد بلوچ ءِ کوش ءِ بگیری ءَ زھرشانی کتگ کہ اودا مزنیً کچے ءَ نودربراں بھر زرتگ –

روانک ءِ درنگاز کنوکانی گوشگ ات کہ اللہ داد ءِ نمیرانی بس یک وئیلے نہ انت بلکنہ ایردستی ءُ زوراکی ءِ بگیری ءَ برجاھیں گوستانکی جھدے درچ ئے –

روانک ءِ گڈسر ءَ بلوچ نودربراں چہ بلوچ راج ءَ یکجاھی ءِ کلوہ داتگ ءُ گوشتگ کہ آ ریاستی زوراکی ءُ ناشرکاریانی بگیری ءَ یکجاہ بہ بنت ءُ جھد بہ کن انت پرچاکہ اے آیانی رکینگ ءُ آجوئی جھد انت -.

درنگاز کنوکاں اقوام متھدہ ءُ انسانی ھکانی گلاں گوں لوٹ کتگ کہ آ بلوچستان ءَ زورانسری اوار جنی، درکانودی کشت ءُ کوش ءُ زالبولانی آوار جنی ءِ بگیری ءَ گامگیج بہ زور انتءُ اے زوراکیانی ھلاس کنگ ءَ پی املی گامگیج زورگ بہ بیت –

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گورکوپ ءُ ھیرونک ءَ پاکستانی پوج سر ءَ بیتگیں اُرشانی زمہ واری منّ اِتگ اَنت-

جارکش ءَ گْوشتگ کہ مئے سرمچاراں گوستگیں شپ نُھ ءَ کیچ ءِ دمگ گورکوپ نیامی کلگ ءَ سرودی ھند سر ءَ برجاھیں زورگریں پاکستانی پوج ءِ بُنجل سر ءَ نوکیں ءُ مزنیں سلاھاں چہ اُرش کتگ یک لشکر ءِ کارمندے یے کُشتگ ءُ دو ٹپی بیتگ اَنت- وھدے کہ اُرش ءَ پوج ءَ مالی تاوان ھم چست کنگ دیمپانی کنگ کپتگ-

جارکش ءَ گْوشتگ اُرش ءَ پد زورگریں پوج ءَ چو مدامی وڑ ءَ شھری آبادیانی سر ءَ بازیں مارٹر گولہ آس داتگ ءُ داں دیراں تاں تیرگواری کتگ بلے سرمچاراں وتی سوبمندیں جنگی رپکاں مُھریں اوتکاں سر بیتگ اَنت-

جارکش ءَ وتی دگہ درشانے ءِ تہ ءَ گْوشتگ گوستگیں شپ ءِ دوازدہ ءَ مئے سرمچاراں کیچ ءِ دمگ ھیرونک ءَ برجاھیں زورگریں پاکستانی پوج ءِ بُنجل نوکیں ءُ وتکاریں سلاھاں چہ نشانگ کتگ، چریشی ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ گوشتگ بلوچستان لبریشن پرنٹ اے اُرشانی زمہ واری ءَ منّ اِیت ءُ بلوچستان ءِ وتواجھی ءُ زورگریں پوج ءِ دراھگ ءَ تاں مئے اُرش برجاہ بیت-

بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں جعفر آباد ءِ دمگ ڈیرہ اللہ یار ءَ ابڑو رائس مل نزیک ءَ سرکاری پلامرزی کنوکیں غلام رسول ابڑو ءِ اوتاک سر ءَ دزبمبے ءَ چہ اُرش کتگ- اُرش ءَ غلام رسول رکّ اِتگ-

جارکش ءَ گْوشتگ کہ ما غلام رسول ءَ کڈن کن ایں کہ آ بلوچ راجی دُژمنی ءَ چہ دزکش بہ بیت اگاں ناں آ کجام روچ ءَ مئے نشانگ جوڑ بیت-

جارکش ءَ گْوشتگ مئے گل اے اُرش زمہ واری ءَ منّ اِیت ءُ اے وڑیں کاروائیاں بلوچستان ءِ وتواجھی ءَ تاں برجاہ بنت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں ھاران ءُ نوشکی ءَ زورگریں پاکستانی پوج جتاجتائیں اُرشاں نشانگ کتگ، چریشی ءِ آسر ءَ زورگریں پوج ءِ پانزدہ کارندہ مرتگ انت ءُ بازینے ٹپی بیتگ اَنت وھدے کہ دُژمنیں پوج ءِ گون ءَ میڑ ءَ ھمراھیں سرمچار نقیب جمالدینی شھید بیتگ-

آئی ءَ گْوشتگ کہ بی ایل اے ءِ سرمچاراں گوستگیں شپ ءَ ھاران ءِ دمگ روتینکو ءَ زورگریں پاکستانی پوج ءِ یک پوسٹے اُرش ءِ نشانگ کتگ- سرمچاراں وتکار ءُ مزنیں سلاھاں ھوار گرنیڈ لانچر ءَ چہ بازیں گولھے یے آس داتگ دُژمنیں پوج ءِ دو کارمند جاہ پہ جاھی مرتگ وھدے کہ کم چہ کم دگہ سے کارندہ ٹپی بیتگ اَنت-

جارکش ءَ گْوشتگ کہ بلوچ لبریشن آرمی ءِ سرمچاریں سنگت نقیب جمالدینی پنّام ءِ ماران، نوشکی ءَ زورگریں پاکستانی پوج ءَ گوں یک بلاھیں میڑے ءَ، بازیں دُژمنیں کارندھانی کشگ ءَ پد شھید بیتگ-

جارکش ءَ گْوشتگ کہ ھپت فروری ءِ شپ ءَ نوشکی ءِ دمگ زور آباد ءَ خزینگ ءِ ھند ءَ زورگریں پاکستانی پوج ءَ دمگ انگیر ءَ کتگ سرمچار نقیب جمالدینی ءِ دزگیر کنگ ءِ جُھد کتگ، بلے سنگت نقیب ءَ دزگیر بیگ ءِ جاہ ءَ زورگریں پاکستانی پوج ءَ گوں دیم پہ دیم بیگ گچین کتگ-

جارکش ءَ گْوشتگ دُژمن ءَ چہ اے میڑ ءِ میان ءَ سنگت نقیب ٹپی بیتگ، بلے آ یک کلاکے ءَ چہ گیش ٹپی ئیں جاوراں دُژمنیں پوج ءَ گوں جنگے کتگ، اے میان ءَ دُژمنیں پوج ءِ سیزدہ کارندی مرتگ انت ءُ چار ٹپی بیتگ اَنت- تیرانی ھلاس بیگ ءَ سنگت نقیب ءَ دُژمنیں ءِ دست ءَ دزگیر بیگ ءِ جاہ ءَ گُڈی تیر پلسپے سر ءَ کار کتگ وتی گُڈی تیر ءَ چہ وتی دست ءَ شھیدی گچین کتگ-

جارکش ءَ گْوشتگ کہ شھید سنگت نقیب جمالدینی پنّام ءِ ماران ء حمید اللہ جمالدینی نوشکی ءِ دمگ کلی جمالدینی ءِ جھمنند بیتگ- تو گوستگیں ھشت ماھاں چہ بلوچ لبریشن آرمی ءَ ھمگرنچ بیتگ ءُ یک شھری چیرجنگی بستار ءَ راجی ایردستی ءِ ھلاپ ءَ وتی پرز پیلو کنگ ءَ بیتگ ئے-

جارکش ءَ دیمتر ءَ گْوشتگ شھید نقیب جمالدینی ءَ یک کم مدتے ءِ میان ءَ نوشکی شھر ءُ کش گوراں دُژمنیں پوج ءِ سر ءَ اُرش کتگ ءُ گل ءِ زمہ داریاں جوانیں وڑے ءَ پیلو کتگ، تو دلیر ءُ بامردی ءِ یک مسالے بیتگ ئے- تئی پگر ءُ لیکہ ءِ درگت ءَ چہ یک سرپدیں سنگتے بیتگ-

جارکش ءَ گُڈی ءَ گْوشتگ کہ بلوچ لبریشن آرمی شھیدیں سنگت نقیب ءَ را اے گرانبھائیں دیمونی سر ءَ سُھرچکیں دروت ندر کنت ءُ اے اِھد کنت کہ زوت یا دیر شھیدانی گرانبھائیں مشن ءَ مِنزل ءَ سر کنت-

بلوچ لبریشن آرمی ءِ سروک بشیر زیب بلوچ ءَ راج ءِ نام ءَ یک کلوھے ءَ گوشتگ ما زیک ھم گشتگ مروچی ھم گشگ ءَ ایں کہ ایشی ءَ گوشان بہ ایں کہ مئے گور ءَ جنگ ءَ ابید دگہ ھچ راہ پشت نہ کپتگ – بیا ات اے دشمن ءُ آئی ءِ دلارانی ھلاپ ءَ در بہ کپ ات – یک ترند ءُ تیز ءُ سک ءَ بے رھمیں جنگے ءِ بندات ءَ بہ کن ات- اولی شرت ایش انت کہ توپک ءَ چِست بہ کن ات ءُ توپک ءِ دیمپانی ءَ توپک کنت اِنت – اگاں توپک چِست کت نہ کن ئے گڑا توار چِست بہ کن ات- دگ ءُ میداناں در بہ کپ ات، ابید ترس ءَ دشمن ءِ چمانی توک ءَ بہ چار ات –

آئی ءَ گوشتگ ھرکس اے بے نسل، بے پت ءِ دروگیں پاکستان ءَ وتی ڈیھ گوش ایت آئی ءَ تچک ءَ بہ گوش ات کہ تو اے دراھیں زلم ءُ زوراکی، لٹ ءُ پُل، اے ڈیھ ءِ بدکاری ءَ تچک ءَ ھوارے – اے ودار ءَ مہ کن ات کہ کسے ءِ جنک، کسے ءِ زھگ (دشمن) وتی زلمانی آماچ بہ کنت اِنت-

آئی ءَ گوشتگ اے ودار ءَ مہ کن ات کہ کدی دشمن کسے ءِ زھگ، کسے ءِ گوھار، کسے ءِ جنک ءَ وتی زُلمانی نشانگ بہ کنت اِنت- بس نی بے توار بوگی نہ انت، ارس ریچگی نہ انت بلکیں دشمن ءُ آئی ءِ دلاراں گریوانیگ انت ھرکس دشمن ءِ امل ءَ ھوار اِنت، مروچی مئے گوھار، برات اے سرڈگار ءِ وارسانی سر ءَ زُلم ءُ زوراکی کنگ ءَ انت اے درستاں پاکستان کنگ ءَ انت، پنجاپی کنگ انت، پنجاپی پوج کنگ ءَ انت-

بشیر زیب بلوچ ءَ گوشتگ آئی ایس آئی ءُ ایم آئی کنگ ءَ انت، آیانی دلار،بلوچ ءِ نام ءَ کنگ ءَ انت، اے چیز ءَ سرپد بہ بو، اے بلکل بلوچ نہ انت، مروچی مئے گور ءَ وھد ھست انت کہ ھمت بہ کن ایں ءُ اے دراھیں جبر، لُٹ ءُ پُل، زورگری، بدکاریانی یک سردار، یک ٹک، یک تکے مھم سر مہ گیج انت، اے سردار نہ انت، اے قبائلی نہ انت، اے دلار ءُ ایجنٹ انت ، اے پنجاپی ءِ شھار کتگیں ھڈ ءِ سور انت، اے پاکستانی پوج ءِ چمپلاں سر ءَ کنوکیں بے ایمان انت، بے زمیر انت،لگور ءُ دپ چَٹ انت، اے بس نام ءِ بلوچ انت، کرد ءُ امل ءَ چہ پنجاپی ءَ گیش بدکردار ءُ بے دود انت – آیاں بلوچ سردار ءُ نواب، قبائلی میر ءُ متکبر گوشگ وت وتی سر ءَ پنچانی جنگ ءُ یک زُلمے-

گیش آئی ءَ گوشتگ مئے نپرت ءُ دشمن مٹینگ ءَ اے درست پندل انت- اے درست سرپد بوگی ءَ انت، مئے نپرت انتقام ءَ داں مہ بیت انت، ( اے نپرت ءُ انتقام) پاکستان ءُ پنجاپی ءِ واستا کنگ لوٹ ایت آئی ءِ دلارانی واستا کنگ لوٹ ایت، اد ءَ بس دو تبک انت پاکستان ھاکم ءُ زالم، بلوچ زیردست بزگ ءُ ایشانی جنگ انت-

آئی ءَ گوشتگ اے جنگ ءَ ترندی ءُ بے رھمی آرگی انت ءُ اے گڈی جنگ کنگی انت، اگاں پاکستان ءَ پروش وارت گڑا سک ءُ بے رھمی ءَ جنگ کنگی انت، ءُ پاکستان ءِ پروش ورگ ءَ پد اے دلار مروچی ھم ابرت ءِ نشانگ ءَ انت ءُ باندا راجدپتر ءَ ھم ابرت ءِ نشانگ ءَ بنت اِنت- مئے آیوکیں نسل، آیانی پشکپتگیں ھڈاں چہ کبراں کش انت ءُ چگل دے انت وتی سرڈگار ءَ جاہ اش نہ دے انت، آ روچ دور نہ انت بلے ما شما بیا ایں اے جنگ ءَ تیز ءُ ترند بہ کن ایں- ایشی ءِ واستا مارا ھزاراں ناں لکانی سرانی کربانی دیگی انت، اگاں سرانی کربانی دیگ ءَ جاڑیگ بو، آ روچ دور نہ بیت انت پروشی دشمن بیت انت ءُ سوبمندی بلوچ بیت انت، اگاں ناں ھمک روچ وتی گوھار، ماتانی اَرس جست گر انت، ارمانی بہ ایں – نی مارا ارمانی بیگی نہ انت نی جنگ تیز کنگی انت، اے مٹ کنگی انت-

کلوہ ءِ گڈسر ءَ گوشتگے دشمن ءَ بے سکون جنگ،دشمن ءُ آئی ءِ دلارانی واستا سرڈگار تنگ کنگی انت، ھمک درد، ھمک زلم، ھمک تکلیپ ءِ ھساب گرگی انت، یکدم بے رھمی ءَ ھساب گرگی انت نی ما ءُ شما سوبمند انت-

پسنی ءَ پاکستانی کوسٹ گارڈز ءِ ھیڈکوارٹر ءِ سر ءَ اُرش ءَ پد پاکستانی پوج ءِ گاڑی بمب ءِ نشانگ، اُرش ءَ پورس ءَ جانی تاوانی ھال، شھر انگیر-

بلوچستان ءِ تیابدپی شھر گوادر ءِ ھند پسنی ءَ کوسٹ گارڈ ءِ ھیڈ کوارٹر ناشناساِ نشانگ کتگ کہ اود ءَ تراکانی ھواری ءَ بازین تراک ھم کنگ بیتگ انت-

اُرش ءَ پد شھر ءَ گشت جنوکیں پوج ءِ کاروان ءَ ھواریں گاڑی ھم شوروانی نشانگ کنگ بیتگ-

دمگی اھوالکارانی رد ءَ اُرشاں پد شھر ءَ ترندیں تیرگواری داں نیم ادار ءَ برجم بیتگ پورسز ءِ بازیں فاڑی گشت کنگ ءَ ھوار راہ اش بستگ انت-

واکداراں اے درگت ءَ اے درگت ءَ ھچ نہ گشتگ اُرشانی آسر ءَ پوج ءَ جانی تاوانانی گمان انت-

اُرش ءِ زمہ واری انگت ءَ کس نہ زرتگ-

بلوچ وومن فورم آواران ھنکین ءِ نیمگ ءَ یک سیاسی ھیلکاری دیوان ءِھنکینی آرگنائزر نورین بلوچ ءِ سروکی ءَ برجم دارگ بوت ، دیوان ءِ مھمان ءِ ھاس بُنجاھی آرگنائزر ڈاکٹر شلی بلوچ ءُ گچینی مھمان بُنجاھی ڈپٹی آرگنائزر حنیفہ بلوچ ءُ بُنجاھی پتر ءِ باسک زکیہ بلوچ بوتگ اَنت۔

سرھال:تنظیم ءُ تنظیم کاری ءُ راجی جُنزانی تہا زالبولانی کرد-

تران کنوک: ڈاکٹر شلی بلوچ تنظیم ءِ ھاسیں بزانت چوں اے وڑءَ اِنت ،ھما پلیٹ فارم کہ آئی ءِ سر ءَ جتائیں سوچانی مردم پہ یک ھاسیں مکسدے ءِ ھاتر ءَ یکجاہ بہ بنت، تنظیم گوشگ بیت ۔دومی لبزاں گوں ما چوں گشت کنیں کہ یکیں سیمسر ءَ سْیادی داروکیں مردمانی ھما ٹولی کہ یک تچکیں لیکہ یے ءِ بنیاد ءَ چاگرد ءِ جتا جتائیں جیڑھانی یک تچکیں ھل یے دیما بْیار ایت ءُ آئی ءِ سر ءَ کار بہ کنت، تنظیم گوشگ بیت۔

ابید ءِ گل ئے جوڑشت ءَ ھچ کس ، دومی کسانی سرجم منوگر بوت نہ کنت ، ھر کس وتی وڑءَ آزات ھرچی کہ بہ کنت، چہ ایشی ءَ ھمک وھد مردمانی کار ءُ کردانی تہا اڑاند پاد کاینت کہ چرائی ءَ کار ءِ درچ اوشت ءِ آماچ بیت ءُ ھچبر پہ یک ھاسیں مکسد ءِ گرگ ءَ سوبمند بوت نہ کن اَنت ۔ پمیشکہ اے یک راستی یے کہ یک راجے اگاں یک سْیاسی لیکہ یے ءِ بنیاد ءَ پہ یک ھاسیں مکسدےءِ گرگ ءَ دیما کئیت گڈا پرائی ءَ اژدری اِنت کہ وتی کارانی بُن گیج ءَ گوں گل ئے جوڑشت ءَ بہ کنت ھمے پلیٹ فارم ءِ جھل ءَ آ وتی سْیاسی لیکہ ءَ گوں سْیادی داروکیں مردماں یکجاہ کنت ءُ دیما بُرت کنت۔پدا گل ءِ وجود ءِ دارگ ءِ اھم تریں شے ھمے راہ ءُ راھبند بنت کہ پہ گلے ءِ وجود ءَ آ یک چینے ءِ بستار ءَ دار ایت۔ اے چین ءِ متلب مردمی زات چہ وتی زاتاں در کپ اَنت ءُ گل ءِ پابند بنت بزانکہ گل ءِ دستور ءُ راھبندانی، چو کہ جھلی ادارہ بالائیں ادارہ آنی پابند بنت ، گل ءِ جھل ءِ دراھیں زات گل ءِ بنجاہ ءِ پابند بنت ، چہ بُنزہ ءَ بہ گر دانکہ بُنجاہ ءَ دراہ گل ءِءِ پروگرام ءِءِ پائیدگانی ھاترءَ یک پیم کار کن اَنت ۔

چوکہ ما ھمک زرمبشت ءَ واناں گڈا اودا زالبولانی یک مزنیں کردے مارا گندگ ءَ کئیت کہ آیاں وتی کرد پیلو کُتگ ءُ نمیران اَنت، دنیا ءِ تہا ھرچی کہ سوبمندیں زرمبشت ھست اَنت آیانی سوبمندی ءِ یک مزنیں کرد ءِ زالبولانی بوتگ کہ آ با سما ءُ شیوار بوتگ اَنت وتی راجی زمہ واری وتی کوپگاں زرتگ چوکہ انگولا ، الجزائر ،ویتنام ،کرد ،تامل ٹائگر ،ہندوستان ءُ دگہ بازیں ملک ھست اَنت کہ اودا جُنزانی تہا زالبولانی بھر زرتگ۔ زرمبشتانی تہا ھما وھد ءَ کہ زالبول پاد کئیت شعوری بنیاد ءَ ھوار بیت گڈا بزانکہ پہ آ راج ءَ منزل نزیک اِنت ، زالبول ءِ با سما بوئگ ریاست ءِ درد سر جوڑ باں، پرچہ کہ ریاست مُدام پندل سازیت ءُ انچیں ڈسکورس پچ کنت دانکہ زالبول جہد ءَ ھوار مہ بنت ، جوںکہ باز براں ھمے ڈسکورس سٹیٹ ءِ نیمگ ءَ پچ کنگ بوتگ کہ زالبول ننگ ءُناموس ءِ نام اِنت پہ ڈن ءَ درآھگ پہ آئی ءَ ایب اِنت ،زالبول نزور اِنت آئی ءِ باڈی اینچو اسٹرونگ نہ اِنت ءُزالبول پیسلہ سازی ءِ وھد ءَ ایموشنل بیت پیسلہ زیریت ءُایش ءَ چہ مستریں ڈسکورس ایش اِنت کہ مُدا گش اَنت کہ زالبول ءِ ھکل پاد ءِ کُڈ ءَ اِنت ، اے درست ڈسکورس آں کہ ریاست ءِ نیمگ ءَ چہ پچ کنگ بوتگ اَنت کہ دانکہ زالبول جہد ءَ ھوار مہ بنت۔ ہندوستان ھما وھد ءَ کہ برطانیہ ءِ قبضہ ءَ بیت گڈامردینانی سرا کریک ڈاؤن لگیت زالبول درست فرنٹ لائین ءَ کاینت لیڈکن اَنت گڈا برطانیہ ءِ ہوم سیکٹری انچو پریشان بیے آ گشیت زالبولانی چوں اے وڑ ءَ پادآھگ ءُ شعوری بنیاد زرمبشت ءِ تہا ھوار بوئگءَ من ءَ پریشان کُتگ ، گڈا اداچہ من تو زانت کنیں کہ زالبول ءِ با سما بوئگ چینکس ارزشت داریت ،زالبول کہ با سما بیت گڈا آ یک راجے با سما کنت ۔ زی ما بلوچ راجدپتر کہ ونتگ مارا بانڈی ، گل بی بی ، چھاگلی ، مائی بیبو ، سلطان خاتون ءِ درور گندگ ءَ اتکگ اَنت ،ما آیانی بہادری ءِ کسہ کتابانی تہا ونتگ اَنت بلے مروچی ما بانڈی ، گل بی بی ءُ سلطان خاتون ءَ وتی اھد ءَ گندگ ءَ اِنت ، مرچی کمبر ءِ مات سلطان خاتون ءِ درور ادا مئے دیوان ءِ تہا ھست اِنت کہ آیاں وتی چک دست بڈا جتگ اَنت ءُ پہ زمین ءِ پاسپانی ءَ دیم داتگ اَنت ءُ پہ ھالو ھلو وتی چک زمین ءِ میار کُتگ اَنت ، اے مئے وش بھتی اِنت کہ من مروچی اے دلیریں ماتانی میان ءَ ساڑی اَنت آیانی ھمے جوزگ ءُ بچکندگ پہ ما ھاٹیگ ءُ توکل اَنت ۔ اگاں بلوچ جنک ننگ ءِ نام بہ بوتیں گڈا بانک در نہ کپت بانک اولی جنک بیت کہ ھر سکی ءِ دیمپان بیت ءُ بلوچ ءِ گدان گدان ءَ دیستگیں واب ءَ سر کنگ ءِ جھد ءَ کنت آ گیرت ءِ نام ءَ لوگ ءَ نہ نند ایت ، ھما راہ کہ مارا پیش دارگ بوتگ گوں ستک ءُ دل مارا ھما راہ ءَ جنزگی اِنت۔ دیوان ءِ گڈ سرا بازیں گپ ءُ باوست ءَ پد دیوان ءِ ھلاسی جار جنگ بوت۔