TBP Balochi

بلوچستان ءِ دمگ پنجگور ءُ آواران ءَ گوستگیں شپ ءَ ناشناسیں مردماں لیویز چوکی ءِ سر ءَ اُرش کتگ ءُ اود ءَ جاڑیگیں لیویز کارندھانی سلاہ ءُ دگہ ساز ءُ سامان پچ گپتگ انت ءُ پورسز ءِ راشن پجارینوکیں گاڑی اش نشانگ کتگ-

اھوالانی رد ءَ گوستگیں شپ ءَ آواران ءِ دمگ بزداد ءُ پنجگور ءِ ھند پروم ءَ سلاہ بندین مردماں لیویز پورس ءِ چوکیانی سر ءَ اُرش کتگ-

اُرشکاراں ھمے وھد ءَ لیویز کارندھانی سلاہ ءُ دگہ ساز ءُ سامان دستیگ کتگ انت –

ھمے وڑ پنجگور ءِ ھند پروم ءَ سلاہ بندین مردماں دو مزدا گاڑیانی سر ءَ تیرگواری کتگ ءُ تاوان داتگ انت- دمگی مردمانی رد ءَ گاڑیاں پوج ءِ راشن مان بیتگ انت-

بلوچستان ءِ دمگ کیچ ءَ ناشناسیں سلاہ بندیں مردماں تیرگواری کتگ نامی ئیں مرد شریف ذاکر ٹپی بیتگ-

پولیس ءِ رِد ءَ تیرگواری ءِ وئیل کوشک ملک آباد ءَ بیتگ کہ اود ءَ پرپٹ سواراں تیرگواری کتگ شریف ذاکر ٹپی کتگ-

شریف ذاکر تربت ءِ ھما نامی ئیں چاگردی مردمانی تہ ءَ ھوار اِنت آ بازیں سالاں چہ میان استمانی پڑ ءَ مزنیں کچے ءَ پُرکار بیتگ ساچان گرائمر وانگجاہ ءِ نام ءَ چہ پرائیویٹ وانگجاھے ءَ جوڑ کتگ –

زانگ بہ بیت کہ شریف ذاکر ءِ سنگانی سر ءَ برجاھیں لوگ گوستگیں روچاں بمب تراک ءِ نشانگ کتگ وھدے کہ لھتے روچ ءَ ساری شھر ءِ تہ ءَ آئی ءِ کسان سالی ئیں چُک کامل شریف ءُ یک نزیکیں سیادے آوار جتگ برتگ کہ انگت بیگواہ اِنت-

چاگردی مردمانی رِد ءَ سرجمیں کارانی پُشت ءَ سرکاری پلامرزی ٹولی ( ڈیتھ اسکواڈ ) ءُ چیریں ادارھانی کار اَنت اشی ءَ ساری ھم پاکستانی چیریں ادارھاں شریف ذاکر ءِ برات ھم تیرگواری کتگ کُشتگ-

پاکستان ءَ میان اُستمان ءِ سلامتی کونسل ءَ بی ایل اے مجید بریگیڈ ءُ ٹی ٹی پی ءِ سلاہ بندانی ترس ءِ ھلاپ ءَ میان اُستمان ءَ گامگیج زیرگ ءِ لوٹ کتگ-

سلامتی کونسل ءَ پاکستان ءِ مستقل مندوب منیر اکرم ءَ گپ کنان ءَ گوشتگ پاکستان ءِ تہ ءُ داعش ءِ بھرتی کنگ ءِ بھتام ءَ ترندی ءَ ایر جن ایں-

منیر اکرم ءَ گوشتگ چہ داعش ءَ ترس دمگ ءَ تالان بیتگ- داعش ءِ ترس ھست انت بلے پاکستان ءَ پرچا ترس ءِ گپ نیست انت-

پاکستان ءِ مستقل مندوب منیر اکرم ءَ انسداد عسکریت پسندی ءِ گامگیج ءِ سر ءَ جوانتریں امل ءِ واستا جنرل اسمبلی ءِ زیلی ادارہ ءَ شَور ءُ سِلاہ داتگ

بلوچستان ءِ دمگ پنجگور ءَ بیگواھیں مردمے ءِ لاش دزکپتگ-

گیشیں اھوالانی رد ءَ پنجگور ءِ ھند شاھو کھن ءَ یک مردمے ءِ لاش دزکپتگ- آئی ءِ پجار ھیات ء سبزل ءِ نام ءَ زانگ بیتگ کہ آ تربت بگ ءِ جھمنند انت-

زانگ بہ بیت ھیات پاکستانی پوج ءَ سَے جولائی دوھزار ءُ بیست ءُ چار ءَ چہ تربت ءَ دزگیر کتگ ءُ برتگ-

زانگ بہ بیت ھیات بلوچ ءِ زورانسری بیگواھی ءِ ھلاپ ءَ کھول ءِ نیمگ ءَ ڈی سی آفس ءِ دیم ءَ زھرشانی نندانک ھم دیگ بیتگ آ وھد ءَ ڈپٹی کمشنر ءِ سدکی ءَ پد زھرشانی ھلاس کنگ بیتگ ات-

روکپتی بلوچستان ءِ دمگ ایرانشھر ءَ ایرانی لشکر ءَ اھل سنت ءِ باسکے دزگیر کتگ ءُ برتگ-

گیشیں اھوالانی رد ءَ اھل سنت ءِ چاہ علی چاہ ھاشم دلگان ءِ نیکراھی وانگجاہ ءِ گوستگیں سروک ءُ کریم اباد زاھدان ءِ مئزین ایرانشھر ءَ دادگاہ ءَ لوٹ اتگ ءُ پد ءَ بیگواہ کرتگ-

آوار جنگ بیتگیں مردم ءِ پجار پنجاہ سالی ئیں مولوی عبدالبصیر شاھوزئی ء عبدالقادر جھمنند زاھدان ءُ انی نندوک بیتگ چاہ علی چاہ ھاشم دلگان ءِ نام ءَ زانگ بیتگ-

آئی ءِ گرگ ءُ برگ ءُ بندیگ کنگ ءِ سبب زانگ نہ بیتگ انت نانکہ انتزامیہ ءِ نیمگ ءَ دگہ چوشیں گپ دیم ءَ اتکگ اَنت-

بلوچستان ءِ جتاجتائیں دمگ شال ، نیسرآباد ءُ ھاران ءَ پاکستانی پوج ءُ پولیس سر ءَ اُرش کنگ بیتگ-

گیشیں ھالانی رِد ءَ دوشمبے ءِ شپ ءَ بلوچستان ءِ بُنجاھی شھر شال ءَ تُرندیں توارے اش کنگ بیتگ-

واکدار رِد ءَ سلاہ بندیں مردماں دستی بمب پی ٹی سی سینٹر ءَ چگل داتگ ءُ کہ تہ ءَ کپتگ ءُ تُرندی ءَ ترکّ اِتگ-

پولیس رِد ءَ سلاہ بندیں مردماں دستی بمب چگل دیگ ءَ پد تچگ ءَ سوبمند بیتگ اَنت-

وئیل ءَ پد کش گور ءِ دمگانی راہ ءُ در بستگ ءُ پٹ پول بندات کتگ-

ھمے وڑ نیمگ ءَ نسیرآباد اُچ پاور پلانٹ ءِ نزیک ءَ ناشناسیں مردماں پاکستانی پوج ءِ چوکی ءِ سر ءَ دستی بمب اُرشے کتگ۔

دومی نیمگ ءَ ھاران ءَ پاکستانی پوج ءِ بُنجاھی بُنجل سر ءَ ناشناسیں سلاہ بندیں مردماں گوں مزنیں سلاہ ءُ راکٹاں اُرش کتگ-

داں دیراں تُرندیں تیرگواری ءُ تراکانی توار اش کنگ بیتگ-

سئیں اُرشانی زمہ واری انگت ھچ گلاں نہ زرتگ اَنت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں زورگریں پاکستانی پوج ءُ کوسٹ گارڈز ءِ دو جتاجتائیں اُرشاں نشانگ کتگ پنچ کارمند کشتگ-

جارکش ءَ گْوشتگ کہ بی ایل اے ءِ سرمچاراں پسنی ءِ شھر کوسٹ گارڈز ءِ بُنجاھی بُنجل ءِ پھازوکی چوکیانی سر ءَ ساڑی ئیں کارمندانی سر ءَ وتکاریں سلاھاں چہ اُرش کتگ وھدے کہ اے میان ءَ گرنیڈ لانچر ءَ چہ بازیں گولھے آس داتگ کہ سوبمندی ءَ نشانگ ءَ کپتگ اَنت- اُرش ءَ دُژمنیں پوج ءَ جانی ءُ مالی تاوان چست کنگ کپتگ-

آئی ءَ گْوشتگ کہ بلوچ لبریشن آرمی ءِ سرمچاراں شوربندی رِد ءَ بنگلہ بازار ھند سر ءَ زورگریں پوج ءِ راہ سر ءَ آئی ای ڈی بمب چیر کتگ- اُرش ءَ پد اے ھند سر ءَ زورگریں پاکستانی پوج ءِ سے گاڑیاں ھمگرنچیں گشتی سر بیتگ اَنت، کہ آ ریموٹ کنٹرول آئی ای ڈی ءَ چہ نشانگ کتگ اَنت، دُژمنیں پوج ءِ یک گاڑی یے تراک نشانگ ءَ اَتکگ، چریشی ءِ آسر ءَ پنچ دُژمنیں کارمند مرتگ ءُ بازین ئِے ٹپی بیتگ-

جارکش ءَ دیمتر ءَ گْوشتگ کہ اُرش ءَ پد بے دلیں دُژمنیں پوج ءَ لَس آبادیانی سر ءَ تُرندیں تیرگواری کتگ وھدے کہ وتی تاوانانی چیر دیگ جُھد کنان ءَ سرمچارانی تاوان ءِ ٹاہ داتگ- پروش وارتگیں پاکستانی پوج ءَ شپ وھد ءَ بازیں شھری زورانسری آوار جنی ءِ نشانگ کتگ اَنت-

جارکش ءَ درشان ءِ گُڈی ءَ گْوشتگ کہ بلوچ لبریشن آرمی اے اُرشانی زمہ واری ءَ منّ اِیت- ما اے اِھد کن ایں کہ زورگریں پاکستانی پوج آئی ءِ ھمکاراں چہ بلوچ راج سر ءَ بیوکیں زُلم ءِ ھساب ءَ گر ایں-

بلوچ یکجھتی کمیٹی کیچ ءِ نیمگ ءَ اللہ داد بلوچ ءِ کوش ءِ ھلاپ ءَ شھید فدا چوک ءَ دومی روچ ءَ زھرشانی بنجل برجاہ، بنجل ءَ نیشنل پاٹی ءُ ھک دو تھریک ءِ رھشوناں اتکگ ءُ یکجھتی کتگ-

گوستگیں روچاں تربت ءَ ناشناسیں سلاہ بندیں مردمانی دست ءَ کشگ بیتگءِ ورنا اللہ داد بلوچ ءِ کوش ءِ ھلاپ ءَ مروچی دومی روچ ءَ شھید فدا چوک ءَ زھرشانی نندانک برجاہ انت ھمے وڑ نندانک ءَ گوستگیں ماہ ءَ بلیدہ ءَ کشگ بیتگیں نوید بلوچ، چہ تمپ ءَ کشگ بیتگیں زریپ بلوچ ءِ کھول ءُ چہ گوادر ءَ کشگ بیتگیں زکریا بلوچ ءِ کھول ھوار انت-

ایشی ءَ ابید بیگواھیں سھیل اھمد،اسد بلوچ، وسیم ملنگ، تمپ ءَ بیگواہ بیتگیں اکبال ءِ کھول ءَ ھوار انت-

زھرشانی نندانک ءَ نیشنل پاٹی ءِ رھشون ءُ گوستگیں دمگی سروک مھمد تاھر، یاسین بلوچ ءُ دگر، ھک دو تھریک ءِ ھاجی ناسر پلیزئی، سعید جمعہ، سادک پتھ، تربت سول سوسائٹی ءِ کنوینئر گلزار دوست اتکگ ءُ یکجھتی ءِ کتگ-

زھرشانی نندانک ءِ بلوچ یکجھتی کمیٹی ءِ بنجاھی رھشون سبگت اللہ شاجی ءُ دگہ مردین ءُ زالبول ھوار انت-

زھرشانی نندانک ءِ مھلوک ءِ گوشگ انت کہ باندا بلوچ یکجھتی کمیٹی ءِ نیمگ ءَ کیچ ءَ زھرشانی روانکے کش ایت ءُ ایشی ءَ آیاں دزبندی کتگ کہ بھر بہ زور ایت-

بلوچستان ءِ دمگ چہ کیچ ، گوادر ءُ ھب ءَ سے مردم بیگواہ کنگ بیتگ اَنت وھدے کہ یک مردمے آجو بیتگ-

گوادر ءِ دمگ چہ پسنی ءَ گوستگیں شپ ءَ پاکستانی پوج ءَ شش ورنا آوار جتگ ءُ ناشناسیں جاھے ءَ برتگ-

ھالانی رِد ءَ چہ پسنی ءِ وارڈ نمبر شش ءَ نصیب سوالی ءُ مقبول اکرم ، ساجد سوالی، فیصل صوالی، احمد رضا خان، سلیم رضا آیانی لوگاں چہ پوج ءَ آوار جتگ ءُ بیگواہ کتگ اَنت-

ھمے گوشگ بیگ ءَ اِنت کہ پاکستانی پوج ءَ بیڑ وھد ءَ زالبول ءُ چُک لَٹ ءُ کُٹانی نشانگ کتگ اَنت-

ھمے وڑ کیچ بلیدہ ءِ دمگ چہ سلو ءَ ناشناسیں سلاہ بندیں مردماں یک ورنایے پہ تُپنگ زور آوار جتگ ءُ ناشناسیں جاھے ءَ برتگ-

جمعہ ءِ شپ ءَ کساس نُھ ءِ نزیک ءَ دو پرپٹ سواراں چار سلاہ بندیں مردماں سلاہ ءِ زور سر ءَ سلو ءِ جھمنندیں ورنا عبدالقیوم آوار جتگ ءُ آئی ءِ چمّ گُدے ءُ دست بستگ ءُ برتگ – چریشی ءَ پد آئی ءِ درگت ءَ ھچ وڑیں ھال نیست-

ھمے وڑ چہ ھب چوکی ءَ بیگواھیں نوروز اسلام بلوچ یل کنگ بیتگ-

نوروز اسلام ھب ءَ آئی ءِ لوگ ءَ چہ پاکستانی پوج ءَ زورانسری آوار جنی ءِ نشانگ کتگ-

زانگ بہ بیت چیزے روچ ءَ پد آئی ءِ کھول ءَ دگہ بیگواھیں مردمانی کھول ءِ ھمراھی ءَ نندانک داتگ، اود ءَ وھدے انتزامیہ ءَ بیست روچ وھد لوٹ اِتگ-

بساک ءُ بلوچ کتاب دوستی

نبشتہ کار: سعید اھمد بلوچ

دی بلوچستان پوسٹ

نہ زاناں اے سرھال کہ من گِچین کُتگ ایشی ءَ کُجا ءُ چِتور بندات بہ کن اَں کجام لبزاں گچین بہ کن آں کہ پرے سرھال ءَ گوں انساپ بہ بیت پرچا کہ منی زانت ءُ زانشت ءِ کَچّ ءُ کئیل انچو نہ اِنت کہ چُشیں سرھالے ءِ سر ءَ ھما تچک ءُ جوانیں گپاں آیاں درشان کُت بہ کن آں بلے پد ءَ ھم وتی کُنٹیں مجگ ءَ زور دیاں ءُ لھتیں گپ درشان کن آں-

اے کُلیں جھان ءِ دود اِنت کہ نوک آؤکیں سال ءَ تیر ءُ بَمبُکاں (پٹاسک) گوں وش اَتک کنگ بیت بلے بیا بچار بلوچ ورناھاں کہ نوکیں سال ءَ گوں زانت ءُ زانشت ءَ سرچکاریں کتاباں گوں وش اَتک کن اَنت چُشیں گراں بھائیں ورناہ راجاں پہ ارزانی نہ رست اِیت بلوچ ءَ ھون ریتکگ ءُ چُشیں بامرد ودی کُتگ، بلوچ ھزاراں جپاکشی ءُ جھد ءَ پد نوں اے راہ گچین کتگ ءُ راست کتگ-

اَنچو گُشگ بیت وھدے کہ بانے مستری بند اِیت آئی ءِ بُن چوٹ بہ بیت تَل آ الّم روچے ناں روچے کپ اِیت ءُ بلے مستری ءِ جھد ھمے بیت کہ بان ءِ واھُند سرپد مہ بیت کہ بان ءِ بُن چوٹ اِنت ءُ کار رد بوتگ، ھما وڑ ءَ اے ریاست یک مستری یے ءِ دروشم ءَ مارا سرپد بوگ نئیلگ ءَ اِنت کہ اے مئے مادریں ھنکین بلوچستان چون ءُ چتور اے وتگڈیں اِستان ءِ بھر بوتگ اے کتابانی سر ءَ بندش ھمے بُنگپ ءِ چیر دئیگ ءِ جھدے کہ ھچبر سوبمند نہ بیت- ریاست ءِ جھد ھمیش اِنت کہ بلوچ ءَ من چہ کتاب ءَ دور بہ کناں آ زانت کہ کتاب ءِ رھشونی ءَ جُنزوکیں مساپر الّم گوں سوبمندی ءَ منزل ءَ سربیت-

بژن وَ ھئیر نہ بیت کہ اے پیسر ءَ زانگ اَنت اے ھما اَنت کہ 2013 ءَ کتاب اِش سوتک اَنت ءُ بندیگ کُت اَنت مرچی پد ءَ ھمے پارلیمنٹ ءَ سر اَنت ءُ کتاب گوں کتاب دوستاں ھوار دوبر بندیگ کنگ بوگ ءَ اَنت، اے ما وَ پیش ءَ زانتگ اَنت نوں بلے وت ءَ راجدپتر ءِ تاکاں گوں بنّامیں رنگے ءَ نکش کنگ ءَ اَنت-

من سرپد باں بساک ناں تھنا نودربر راجکاری ءَ کار ءَ اِنت بلکیں ھر کُجام پِڑ ءَ سْیادی داروکیں مردماں پہ جُھد ءَ اِنت پرچا کہ کتاب ھر پِڑ ءِ مردمانی رھشونی ءَ کنت ءُ بساک ءَ اے گرانیں بار وتی کوپگاں زرتگ ھزار جنجال ءُ اڈاند ءَ ابید ھم بلوچستان ءِ ھمک میتگ ءُ شھراں کتاب سر کنگ ءَ اِنت- منی اُمیت ءُ واھگ ھمیش اِنت سنگت ھر وڈیں جیڑھانی دیمپان بہ بنت بلے کتاب دوستی ءِ لیکہ ءَ یک گامے ھم پُشت مہ کنز اَنت ءُ ھمے داب ءَ جُنزان بہ کن اَنت-