TBP Balochi

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں تمپ، مستونگ ءُ پنجگور ءَ سے جتاجتائیں اُرشاں زورگریں پاکستانی پوج ءُ آئی ءِ راشن سر کنوکیں گاڑی نشانگ کتگ اَنت-

جارکش ءَ گْوشتگ کہ بی ایل اے ءِ سرمچاراں گوستگیں شپ ءَ کیچ ءِ دمگ تمپ ءَ زورگریں پوج ءِ کارمند ھما وھد ءَ سنگر گپتگ ءُ اُرش ءِ نشانگ کتگ اَنت، وھدے دُژمنیں پوج ءِ سیزدہ چہ گیش کارمند پیادگ گشت کنگ ءَ بیتگ اَنت-

جارکش ءَ گْوشتگ کہ سرمچاراں وتکاریں سلاھاں ءُ گرنیڈلانچر ءَ چہ گولہ آس داتگ ءُ دُژمن نشانگ کتگ، اُرش ءَ زورگریں پاکستانی پوج ءِ ھپت کارمند جاہ پہ جاھی مرتگ اَنت ءُ کم چہ کم چار کارمند ٹپی بیتگ اَنت- مرتگیں کارمنداں چہ سے ءِ پجّار سپاھی صدام، سپاھی سمیع ءُ بصیر ءِ نام ءَ چہ بیتگ اَنت-

جارکش ءَ گْوشتگ کہ مروچی نیمروچ ءِ وھدے ءَ بلوچ لبریشن آرمی ءِ سرمچاراں مستونگ ءَ علیزئی بائی پاس ھند سر ءَ پاکستانی پوج ءِ کارمند ھما وھد ءَ نشانگ کتگ اَنت وھدے آ پرپٹ سر ءَ وتی بُنجل نیمگ ءَ روگ ءَ بیتگ – اُرش ءَ سفیر ساکن چکوال، پنجاب سک ٹپی بیتگ-

جارکش ءَ گْوشتگ دگہ یک کاروائی یے بلوچ لبریشن آرمی ءِ سرمچاراں دہ فروری ءَ پنجگور ءِ دمگ پروم دز ءَ زورگریں پاکستانی پوج ءَ را راشن سرکنوکیں مزدا گاڑیانی سر ءَ اُرش کتگ، اُرش ءِ آسر ءَ دوئیں گاڑی ناکارہ بیتگ اَنت وھدے کہ ڈرائیور کڈن کتگ اَنت پد ءَ یل داتگ اَنت-

جارکش ءَ گْوشتگ بلوچ لبریشن آرمی اے دوئیں اُرشانی زمہ واری ءَ منّ اِیت-

ساجد ءِ نبشتھانی گنج ءِ تہ ءَ لبزانکی مڈی ھمیش انت کہ اے کتاب ءَ مان انت- ساچ در

بلوچی زبان ءُ لبزانکءِ نمیرانیں نبشتہ کار ءُ اھوالکار شھید ساجد حسینءِ لبزانکی نکانانی گچین “نہ مُلک مُلکے نہ دَرمُلک” چہ ساچ در لبزانکی گل مکّرانءِ نیمگا چاپ ءُ شنگ بوتگ –

ساچ در لبزانکی گل مکرانءِ رِد ءَ اے کتاب پہ بلوچی لبزانک وانوکیں دوستاں نوکیں ٹیکی یے –

ساچ در ءِ رِد ءَ ساجد حسین ماں نزر آباد تمپ ءَ شانزدہ جنوری 1961 ءَ ودی بوتگ ءُ نُھ اگست 2020 ءَ زمین امبازاں دئیگ بوتگ – آئی ءَ نُھ سال ءَ وتی وانگ ھم سرجم کتگ ءُ سیاست، چاگرد، لبزانک ءُ اھوالکاری ھاس انگریزی اھوالکاری ءِ تہ ءَ وتی کرد پیلو کتگ –

ساچ در ءِ رِد ءَ نمیرانیں ساجد حسین ءَ انگریزی ھالتاک ڈیلی ٹائمز، دی نیوز ءَ ایڈیٹر ءِ بستار ءَ کار کتگ ءُ بلوچستان ءِ سرا بازیں رپورٹ ءِ نبشتہ کتگ – آئی ءَ سال دوھزار پانزدہ ءَ ساجد ءَ بلوچستان ٹائمز ءِ نام ءَ بلوچی ءُ انگریزی آنلائن تاکے بندات ھم کتگ – آ سال دوھزار دوازدہ ءَ درانڈیھ بوتگ پدا یورپ ءَ سیاسی پناہ زرتگ ءُ پدا ھمودا سال دوھزار بیست ءُ دو ءِ دو مارچ ءَ سویڈن شھر اپسالا ءَ بیگواہ بیت ءُ پدا 24 اپریل ءَ اپسالا کئور ءَ آئی ءِ جون دست کپ ایت –

ساچ در ءِ رِد ءَ ساجد ءَ نبشتھانی گنج ئے ایر کتگ ءُ شتگ، ما اشاں ونت ءُ ساچشتانی جھدے بندات کُت کن ایں – اے گنج ءِ تہ ءَ لبزانکی مڈی ھمیش انت کہ اے کتاب ءَ مان انت –

بلوچستان ءِ دمگ تمپ ءَ پاکستانی پوج ءِ ھیلی کاپٹرانی آیگ چہ گوستگیں شپ ءَ برجاہ انت، پورسز ءَ گوستگیں شپ ءَ چار مردم دزگیر کنگ ءَ پد بیگواہ کرتگ انت-

تمپ ءَ پاکستانی پوج بازیں کچے ءَ پیش گامی کنگ ءَ انت ءُ ھمے وھد ءَ ھیلی کاپٹرانی آیگ ھم برجاہ انت-

دمگی مردمانی گوستگیں شپ ءَ پورسز ءَ چار مردم دزگیر کتگ ءُ برتگ انت کہ آیانی توک ءَ فاروق ء عبدالحمید، الیاس ء عبدالحمید جھمنند دازن، فارس ء مھمد کرین دازن ءُ ابراھیم ء علی جھمنند دازن ءِ نامان زانگ بیتگ انت-

ایشانی توک ءَ دو برات فاروق ءُ الیاس ایشی ءَ پیش بیگواہ کنگ بیتگ انت ءُ پد ءَ یل دیگ بیتگ انت-

زانگ بہ بیت گوستگیں شپ ءَ سلاہ بندیں مردماں پاکستانی پوج ءِ راہ بستگ ءُ ارش کتگ کہ چریشی ءَ چہ پاکستانی پوج ءِ سَے کارندہ سپاھی سدام، سپاھی سمیع ءُ بسیر مرتگ انت-

شریف ذاکر سر ءَ اُرش ءَ، تربت سول سوسائٹی ءِ جار پد ءَ تربت ءَ سرجمی ءَ تھتگ بندیں ھڑتال، باپاری بُنجاہ بند-

تربت سول سوسائٹی ءِ جار سر ءَ نامی ئیں چاگردی مرد ءُ ساچان گرائمر وانگجاہ ءِ ڈائریکٹر شریف ذاکر سر ءَ بیتگیں اُرش ءِ ھلاپ ءَ مروچی چارشمبے ءَ تربت شھر سرجمی ءَ تھتگ بندیں ھڑتال برجاہ ءَ اِنت-

ھڑتال ءِ سبب ءَ شھر ءِ سرجمیں دکان ءُ باپاری بُنجاہ بند اَنت وھدے کہ بینک، پٹرول پمپ مڈیانی ادارھاں ھوار کارگس ءُ پرائیویٹ اداہ بند بیتگ اَنت-

شریف ذاکر سر ءَ اُرش ءِ ھلاپ ءَ مروچی چارشمبے ءَ پرائیویٹ وانگجاھانی ایسوسی ایشن ءَ زھرشانی کنان ءَ وانگجاھانی بند کنگ جار جتگ وھدے کہ کیچ بار ءُ مکران بار ایسوسی ایشن ءِ نیمگ ءَ چہ آمیدگسی کاروائیانی دزکشی ءِ سبب ءَ آمیدگسی کار اوشت آماچ بیتگ-

زانگ بہ بیت کہ سے شمبے ءَ ناشناسیں مردماں شریف ذاکر ءِ سر ءَ اُرش کتگ آ ٹپی کتگ اَت، آئی ءِ پاد ءَ دو تیر لگ اِیت ءُ آئی ءِ الاج نادُراھجاہ ءَ بیگ ءَ اِنت-

بلوچستان ءِ دمگ کیچ ءَ گوستگیں شپ ءَ پاکستانی پوج سر ءَ بیتگیں اُرش ءَ دو کارمندانی بیرانی ءِ پدری بیتگ-

پولیس رِد ءَ وئیل تمپ ءَ سے شمبے ءِ شپ ءَ ھما وھد ءَ بیتگ وھدے ایف سی ءِ کارمند گشت کنگ ءَ بیتگ-

ناشناسیں سلاہ بندیں مردماں سر ءُ دیم تیرگواری کتگ ءُ راکٹ گولہ ھم آس داتگ چریشی ءِ نشانگ ءَ آؤکیں سے کارمند سک ٹپی بیتگ اَنت آیانی تہ ءَ دو کارمند سپاھی صدام ءُ سپاھی سمیع ساہ داتگ ءُ بیران بیتگ اَنت-

بلے اُرش زمہ واری انگت ھچ گل ءَ نہ زرتگ-

ایران ءِ استان اسپھان ءَ ایرانی آمیدگس ءِ ھکم ءِ پد ءَ یک بندیگیں بلوچے پاھو دیگ ءَ جتائیں کوٹی ءَ برگ بیتگ-

اھوالانی رد ءَ اے بندیگ ءِ پجار مھدی شاہ بکش پیر سورانی ء نعمت اللہ جھمنند زاھدان ءِ نام ءَ زانگ بیتگ-

اھوالانی رد ءَ مھدی شش سال پیش اسپھان ءَ نشہ واپاری ءِ بھتام ءَ دزگیر کنگ بیتگ ءُ داد گاہ ءِ انکلاب ءَ آئی ءِ سر ءَ پاھو ءِ ھکم داتگ کہ چریشی ءَ پد آ گوستگیں روچ ءَ جتائیں کوٹی ءَ برگ بیتگ-

اھوالانی رد ءَ مھدی ءِ کھول ءَ گوستگیں روچ ءَ گڈی گِندوک کتگ بیتگ –

تربت یونیورسٹی ءِ نودربر احسان سرور ءُ کامل شریف ءِ پہ سلامتی یل کنائینگ ھاتر ءَ یونیورسٹی ءِ نودربراں زھرشانی ئیں روانکے کش اِتگ- اے روانک کیمسٹری ڈیپارنمنٹ، انگلش ڈیپارنمنٹ ءُ ایڈمن کارگس ءَ چہ گوزان ایجوکیشن ڈیپارنمنٹ ءِ دیم ءَ آسر بیتگ اود ءَ نودربراں وتی لوٹانی ھک ءَ زھرشانی کتگ-

زھرشانی کنوکاں دوئیں نودربراں ھوار سرجمیں زورانسری آوار جنگ بیتگیں مردمانی یل کنائینگ لوٹ کتگ-

زھرشانی ءَ ھواریں نودربرانی گْوشگ اِنت کہ آیانی مول تھنا وتی سنگتانی یل کنائینگ نہ اِنت، بلکیں ھمے ھساب ءَ اے کلوہ دیگ ھم بیتگ کہ ھکومت ءُ ھمگرنچیں ادارہ زورانسری آوار جنیانی جیڑہ ءَ گوں سنجیدگی ءَ شر بکنت-

نودربراں اے ھم گوشتگ اے جیڑہ تھنا اے یونیورسٹی ءَ تاں مھدود نہ اِنت بلکیں سرجمیں بلوچستان ءَ ھرچ نودربر واستا یک ھاسیں ءُ سنجیدگیں جیڑھے-

آئی ءَ گْوشتگ کہ چہ ھکومت ءَ لوٹ کتگ کہ آ احسان سرور، کامل شریف ءُ دگرانی زورانسری آوار جنی جنگ بیتگیں مردمانی یل کنائینگ ھاتر ءَ زوت ءُ شریں گامگیجے بزور اَنت دانکہ اسرمندیں کھولاں سکون ءُ دلجمی بہ رس اِیت-

نودربراں گْوشتگ کہ اے وڑیں وئیلاں زوت ءُ شریں وڑیں شر کنگ ناں تھنا اسرمندیں کھولانی واستا الّمی اِنت بلکیں سرجمیں چاگرد ءِ واستا ھم زرورت اِنت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں بولان، ھاران، شال، آواران ءُ پروم ءَ نُھ جتاجتائیں سوبمندیں کاروائی کتگ اَنت، آیانی تہ ءَ پوج سر ءَ اُرش، لیویز ءِ سلاھانی دستیگ کنگ ءُ راہ بندگ ھوار اَنت، وھدے کہ راہ بندگ میان ءَ یک ریاستی کارمند ناصر ء حسین دزگیر کتگ-

جارکش ءَ گْوشتگ کہ بولان ءَ ریاستی کارمند ناصر ءُ آئی ءِ سنگتانی سپر کنگ ھال سر بیگ ءَ سرمچاراں سبی – شال شھدگ سر ءَ دو جتاجتائیں دمگاں پیر غائب ءُ بی بی نانی ءِ ھند شھدگ سر ءَ شش کلاکاں تاں راہ بستگ وھدے کہ پٹ پول میان ءَ ناصر دزگیر کتگ ءُ آئی سنگت تچگ ءَ سوبمند بیتگ، ناصر ءِ جُست ءُ پُرس برجاہ ءَ اِنت کہ آ زوت انساپ آمیدگس ءَ آرگ بیتگ-

جارکش ءَ گْوشتگ کہ اے میان ءَ سرمچاراں پیر غائب کراس سر ءَ برجاھیں زورگریں پوج ءِ چوکی راکٹ لانچر ءُ نوکیں سلاھاں چہ نشانگ کتگ، چریشی ءِ آسر ءَ دو کارمند مرتگ بازین ئِے ٹپی بیتگ اَنت-

آئی ءَ گْوشتگ کہ دگہ یک اُرشے سرمچاراں بی بی نانی ھند سر ءَ برجاھیں زورگریں پوج ءِ چیک پوسٹ سر ءَ راکٹ لانچر ءُ نوکیں سلاھاں چہ اُرش کتگ، چریشی ءَ دو کارمند مرتگ ءُ یکے ٹپی بیتگ-

جارکش ءَ گْوشتگ کہ دگہ یک اُرشے آواران ءِ دمگ بزداد ءَ سرمچاراں لیویز چیک پوسٹ سر ءَ اُرش کتگ اود ءَ ساڑی ئیں سرجمیں سلاہ ءُ دگہ سامان دستیگ کتگ اَنت- بلے لیویز کارمنداں بلوچ بیگ سوب ءَ تاوان نداتگ اَنت-

آئی ءَ گْوشتگ کہ گوستگیں شپ ءَ ھشت ءُ نیم ءَ، سرمچاراں شال ءِ سبی دگ ءَ برجاھیں پولیس ٹریننگ کالج ءِ گیٹ سر ءَ برجاھیں کارمندانی سر ءَ دزبمبے ءَ چہ اُرش کتگ، چریشی ءِ آسر ءَ دو کارمند ٹپی بیتگ اَنت-

جارکش ءَ گْوشتگ کہ سرمچاراں ھاران شھر ءَ زورگریں پاکستانی پوج ءِ بُنجاھی بُنجل سر ءَ بازیں راکٹے آس داتگ کہ بُنجل تہ ءَ کپتگ اَنت- اے اُرش ءَ یک کارمندے یے مرتگ ءُ سے ٹپی بیتگ اَنت-

آئی ءَ گْوشتگ کہ سرمچاراں گوستگیں شپ ءِ دہ ءَ، پنجگور ءِ دمگ پروم ءَ دِز لیویز چیک پوسٹ سر ءَ اُرش کتگ اود ءَ ساڑی سرجمیں سلاہ ءُ دگہ سامان دستیگ کتگ اَنت، وھدے کہ لیویز کارمنداں ھچ وڑیں تاوان نداتگ-

جارکش ءَ گْوشتگ کہ ھمے دمگ ءَ ، دگہ یک کاروائی ءَ سرمچاراں پوجی چوکی سر ءَ پٹّیں سرویلنس کیمرہ نشانگ کتگ ءُ تباہ کتگ اَنت-

جارکش ءَ گْوشتگ کہ بی ایل ایف اے اُرشانی زمہ واری ءَ منّ اِیت ءُ اے اِھد کنت کہ بلوچستان ءِ وتواجھی ءَ تاں زورگریں پوج ءُ آئی شوربندیاں ھوار ھرچ ھما مھکمہ یا کہ مردم مئے نشانگ ءَ بنت کہ آیاں بلوچ راجی پجّار ءِ گارکنگ ءُ دستیگ ءَ دْراجکشی ءَ زورگریں ریاست ءِ ھمراھداری کتگ-

چہ پنجگور ءَ گوستگیں شپ ءَ کشگ ءُ چگل دیگ بیتگیں کیچ ءِ جھمنندین ھیات سبزل ءِ کھول ءَ میت ءِ ھمراھی ءَ تربت ءَ شہید فدا چوک ءَ بی وائی سی ءِ ھمراھی ءَ زھرشانی نندانک ءَ نشتگ –

ھیات سبزل میر کلگ تربت ءَ سَے جولائی دوھزار ءُ بیست ءُ چار ءَ بیگاہ ءِ ساھت شش ءَ گاڑی سواریں سلاہ بندیں مردماں آوار جتگ ءُ بیگواہ کتگ ات-

آئی ءِ بیگواھی ءِ ھلاپ ءَ کھول ءَ تربت پریس کلب ءَ پریس کانفرنس کتگ ءُ جتاجتائیں وھداں زھرشانی ءُ نندانکاں ھم بھر زرتگ –

زانگ بہ بیت اے اولی لاش نہ انت کہ بلوچستان ءَ بیگواھیں مردمانی کھولاں سوگات کنگ بوگ ءَ انت کہ ایشی ءَ پیش ھم بیگواھیں بلوچ کُشگ ءُ آیانی لاش جنگل ءُ ویرانگاں چگل دیگ بیتگ انت کہ آیانی تہ ءَ گیشتریں بیگواھیں مردم سی ٹی ڈی ءَ دروگیں میڑانی ناماں کشتگ انت-

بلوچستان ءِ دمگ ڈیرہ بگٹی ءُ گوادر ءَ بیست ءُ چار ساھتانی میان ءَ شانزدہ مردم ءَ گیش پاکستانی پوج ءَ آوار جتگ انت-

اھوالانی رد ءَ پاکستانی پوج ءَ سوئی ، ڈیرہ بگٹی ءَ بیڑانی وھد ءَ پنچ شھری دزگیر کتگ ءُ بیگواہ کتگ انت-

بیگواہ کنگ بیتگیں مردمانی تہ ءَ توطا ء موسی بگٹی، گازی ء چیڈو بگٹی، ءُ جنگل ء جعفت بگٹی چہ بگٹی کالونی ءَ آوار جنگ بیتگ انت ءُ جمعہ ء مھمود بگٹی چیریں ادارھاں دودانی پھل ءَ بیگواہ کتگ ،سیف اللہ ء کوھی بگٹی پورسز ءَ سوئی شھر ءَ جند ءِ لوگ ءَ روگ ءِ وھد ءَ عاشقانی ءِ ھند ءَ بیگواہ کنگ بیتگ-

ھمے وڑ چہ پسنی ءَ یازدہ مردم بیگواہ کنگ بیتگ انت-

آیانی توک ءَ ھشت مردمانی پجار، ساجد، فیصل، اھمد رزا، سلیم رزا، نسیب، مقبول اکرم، زمان بلوچ ءُ علی بلوچ ءِ ناماں زانگ بیتگ انت-

ھمے وڑ تربت ءِ دمگ تمپ ءَ اکتوبر دوھزار ءُ بیست ءُ چار ءَ پاکستانی پوج ءِ دست ءَ بیگواہ کنگ بیتگیں سمیع اللہ ء ھلیل اھمد دوشمبے ءِ شپ ءَ یل بیتگ ءُ وتی لوگ ءَ سر بیتگ کہ آئی ءِ یل بیگ ءِ ھال کھول ءَ راست کتگ-